မုံရွာ၊ သြဂုတ် ၂၉၊၂၀၂၅။
စစ်ကိုင်းတိုင်း၊ မုံရွာမြို့နယ်၊ ကျောက္ကာ(မြောက်)ရွာကို ဝင်ရောက်နေတဲ့ စစ်ကော်မရှင်စစ်ကြောင်း ကြားဖြတ်တိုက်ခိုက်ခံရပြီး စစ်သားသေဆုံးမှုများတယ်လို့ Yae Nagar PDF အဖွဲ့ဆီက သိရပါတယ်။
ကျောက္ကာ(မြောက်)ရွာ၊ ရွှေဂူနီဘုရားကြီးအနီးမှာ သြဂုတ် ၂၀ ရက် ညနေ ၆ နာရီခွဲဝန်းကျင်လောက်က စစ်သားအင်အား ၆၀ ခန့်နဲ့ ဝင်ရောက်စစ်ကြောင်းထိုးနေတဲ့ စစ်ကော်မရှင်တပ်ဖွဲ့ကို ဒေသတွင်း တော်လှန်ရေးတပ်ဖွဲ့တွေက ကြားဖြတ်တိုက်ခိုက်ခဲ့ရာ စစ်သား ၁၅ ဦးသေဆုံးပြီး ၁၇ ဦးထိခိုက်ဒဏ်ရာရခဲ့တယ်လို့ ဆိုပါတယ်။
“ဒီစစ်ကြောင်းနဲ့ ကျနော်တို့အဖွဲ့တွေနဲ့က မီတာ ၅၀ လောက်အကွာမှာ ပစ်ခတ်မှုဖြစ်ခဲ့တာပါ။ တိုက်ပွဲကြာချိန် ၁ နာရီရှိမယ်။ ည ၇ နာရီခွဲလောက်မှ ပစ်ခတ်မှုရပ်နားလိုက်တာ။ သေဆုံးသူ ၁၅ ဦးကတော့ ပစ်ခတ်နေချိန် မျက်မြင်တွေ့ရတာ ဖြစ်တယ်။”လို့ Yae Nagar အဖွဲ့ရဲ့ တာဝန်ရှိသူတဦးက မြေလတ်အသံကို ပြောပါတယ်။
ကျောက္ကာရွာဘက်ကို ဝင်ရောက်နေတဲ့စစ်ကော်မရှင်စစ်ကြောင်းနဲ့ ဒေသတွင်းတော်လှန်ရေးတပ်ဖွဲ့တွေအကြား သြဂုတ် ၈ ရက်စပြီး နေ့စဥ်ဆိုသလို ထိတွေ့တိုက်ပွဲတွေ ဖြစ်ပွားနေတယ်လို့ သူကဆက်ပြောပါတယ်။
လက်ရှိ သြဂုတ် ၂၈ ရက်အထိ အဲ့ဒီ စစ်ကော်မရှင်စစ်ကြောင်းဟာ ကျောက္ကာရွာမှာပဲ ဆက်လက်ရှိနေတာကြောင့် ကျောက္ကာတောင်ရွာနဲ့ မြောက်ရွာအပါအဝင် ဇလုပ်၊ ကိုင်းတော၊ ရေကန်စု၊ ထနောင်းဝန်း၊ ရွာထုံ စတဲ့ကျေးရွာတွေက သက်ကြီးရွယ်အို၊ ကလေးငယ်နဲ့ အမျိုးသမီးတွေအပါအဝင် အရပ်သားပြည်သူ ၇,၀၀၀ ကျော်ခန့် ဘေးလွတ်ရာတွေဆီ ထွက်ပြေးတိမ်းရှောင်နေရတယ်လို့ သိရပါတယ်။
အဆိုပါ တိုက်ခိုက်မှုကို မုံရွာခရိုင်ကွပ်ကဲရေးအဖွဲ့ရဲ့ ဦးဆောင်မှုနဲ့အတူ မုံရွာမြို့နယ်တပ်ရင်းတပ်ဖွဲ့တွေနဲ့ မုံရွာမြို့နယ်ပကဖ၊ မုံရွာတိုက်နယ် ၂ ပကဖ၊ မုံရွာတိုက်နယ် ၃ ပကဖ၊ အရာတော်မြို့နယ် တိုက်နယ် ၁၁ ပကဖ၊ မုံရွာခရိုင် ပကဖ၊ Danger Force နဲ့ Yae Nagar PDF အဖွဲ့တို့က ပူးပေါင်းလုပ်ဆောင်ခဲ့တယ်လို့ ဆိုပါတယ်။
ပြီးခဲ့တဲ့ သြဂုတ် ၈ ရက်နဲ့ ၁၀ ရက်တွေမှာလည်း ကျောက္ကာရွာကို ဝင်ရောက်နေတဲ့ စစ်ကော်မရှင်စစ်ကြောင်းနဲ့ ဒေသတွင်းတော်လှန်ရေးတပ်ဖွဲ့တို့ ထိတွေ့တိုက်ပွဲဖြစ်ပွားပြီး စစ်သား ၂၀ ဦးသေဆုံးကာ ၁ ဦးအရှင်ဖမ်းမိခဲ့တယ်လို့ သိရပါတယ်။
တည်းဖြတ် – M
