ပဲခူး၊ ဇူလိုင် ၁၂၊ ၂၀၂၄။

ပဲခူးတိုင်းအနောက်ခြမ်း၊ ပေါက်ခေါင်းမြို့နယ်၊ ကြို့ပင်ဝိုင်းအုပ်စု အုပ်ချုပ်ရေးမှူး ၂ ဦး အသတ်ခံရပြီးနောက် ထပ်မံတာဝန်ယူခဲ့သူ အုပ်ချုပ်ရေးမှူးကို ဇူလိုင် ၁၀ ရက် မနက်ပိုင်းမှာ သေနတ်နဲ့ပစ်သတ်ခဲ့တယ်လို့ ပေါင်းတည်မြို့နယ်ပြည်သူ့ကာကွယ်ရေးတပ်ဖွဲ့ ၃၆၀၁ PPDF တပ်ရင်းဆီက သိရပါတယ်။

ဇူလိုင် ၁၀ ရက် မနက် ၉ နာရီခွဲလောက်မှာ ပြည်ခရိုင်ပြည်သူ့ကာကွယ်ရေးတပ်မတော် ၃၆၀၁ PPDf တပ်ရင်း၊ တပ်ခွဲ ၁ နဲ့ တပ်ရင်း ၄ ရဲဘော်တွေက အုပ်ချုပ်ရေးမှူး အသက် ၅၀ အရွယ် ဦးဝင်နိုင်ကို သူနေထိုင်တဲ့ ရွှေကူရွာအနီးမှာ ပစ်ခတ်ခဲ့တာလို့ ဆိုပါတယ်။

“သူ(ကိုဝင်းနိုင်)တို့အဖွဲ့က (အပေါင်းအသင်း) ၆ ဦးရှိတယ်။ ခု ၃ ဦးသေပြီ။ သူတို့အားလုံးက သတင်းပေး ဒလန်တွေ လုပ်နေတာ။ ခုလည်း (သူတို့က)အုပ်ကြီးတဦးသေရင် တဦးတက်ပြီးလုပ်နေတာ။ ခုသေတဲ့ ဝင်းနိုင်ကလည်း ဘယ်သူ့ဂရုစိုက်ရမလဲဆိုပြီး အုပ်ချုပ်ရေးမှူးလုပ်လာလို့ ရှင်းခဲ့တာ။” လို့ ပေါင်းတည်မြို့နယ် ပြည်သူ့ ကာကွယ်ရေးတပ်ဖွဲ့ ၃၆၀၁ PPDF တပ်ရင်း ပြန်ကြားရေး တာဝန်ခံက ပြောပါတယ်။

ပြီးခဲ့တဲ့ မေ ၃၁ ရက်နဲ့ ဇွန် ၁၃ ရက်ကလည်း လက်ရှိ ဦးဝင်းနိုင်တာဝန်ယူထားတဲ့နေရာမှာ လုပ်ဆောင်ခဲ့တဲ့ အုပ်ချုပ်ရေးမှူး ကိုညွန့်စိန်နဲ့ ကိုပွားသီးတို့ကို ပြည်ခရိုင်ပြည်သူ့ကာကွယ်ရေးတပ်ဖွဲ့ ဝင်တွေကပဲ ပစ်ခတ်ရှင်းလင်းခဲ့ပါသေးတယ်။

ကျေးရွာအုပ်စုအုပ်ချုပ်ရေးမှူး ၃ ဦး ရက်ခြားပြီး အသတ်ခံရတာကြောင့် ဇူလိုင် ၁၁ ရက် ဒီမနက်မှာတော့ ပေါက်ခေါင်းမြို့နယ်၊ ငါးဘတ်ကုန်း၊ ချင်းလည်ရွာတွေဘက်မှာ စစ်အုပ်စုဝင်တွေက ခရီးသွား ပြည်သူတွေကို စစ်ဆေးမှုတွေ ပြုလုပ်ခဲ့တယ်လို့ သိရပါတယ်။

ပြီးခဲ့တဲ့ ဇွန် ၁၅ ရက်ကလည်း ပေါက်ခေါင်းမြို့နယ်၊ တောင်လယ်ရွာက စစ်ကောင်စီသတင်းပေးလို့ သတင်းထွက်နေသူ ကိုဗိုလ်ဝင်းကိုလည်း သူရဲ့နေအိမ်မှာ သေနတ်နဲ့ ပစ်သတ်ခံခဲ့ရပါသေးတယ်။

စာတည်း – လင်း

မြေလတ်အသံ၊ မတ် ၁၇၊ ၂၀၂၃။

လယ်ယာစိုက်ပျိုးရေး တခုတည်းနဲ့ မိသားစုစားဝတ်နေရေး မပြေလည်တာကြောင့် ထိုင်းနိုင်ငံကို နည်းမျိုးစုံနဲ့ သွားရောက် အလုပ်လုပ်ကိုင်ကြသူတွေထဲမှာ လယ်သမား သားသမီးတွေလည်း ပါဝင်တယ်လို့ သိရပါတယ်။

အဲဒီလို သွားကြသူတွေထဲမှာ ပဲခူးတိုင်းက အများဆုံးဖြစ်ပြီး မြေလတ်ဒေသ မကွေးတိုင်း မင်းတုန်း၊ ကံမ၊ သရက်နဲ့ အခြားမြို့နယ်များ စစ်ကိုင်းတိုင်းတို့ကလည်း ပါဝင်လာတယ်လို့ ဆိုကြပါတယ်။

လယ် ၅ ဧကနဲ့ ၁၀ ဧကအထက် ပိုင်ဆိုင်ကြတဲ့ လယ်သမားတွေရဲ့မိသားစုဝင်တွေဖြစ်ပြီး အများစုမှာ စားဝတ်နေရေး မပြေလည်တာကြောင့် တရားဝင်နည်းလမ်းအပြင် တရားမဝင်နည်းလမ်းတွေကိုပါ အသုံးပြုသွားလာနေကြတာလို့ သိရပါတယ်။

“ကျတော်တို့မိသားစုက လယ် ၆ ဧက ပိုင်ဆိုင်ပါတယ်။ မိသားစု ၅ ယောက်လောက်နဲ့ အဆင်ပြေပါတယ်။ အာဏာသိမ်းပြီးနောက်ပိုင်းမှာ လယ်ယာမြေမှာ ထည့်သွင်းရတဲ့စိုက်ပျိုးစရိတ်တွေ အဆမတန် ခုန်တက်သွားတော့ လယ်ကပြန်ရတဲ့ငွေနဲ့ ထွက်ငွေနဲ့က မမျှဘူး ဖြစ်နေတယ်။ အာဏာမသိမ်းခင်နဲ့ အာဏာသိမ်းပြီး တော်တော်ကွာသွားလို့ အဆင်မပြေတော့လို့ အခုလို သူများတိုင်းပြည်မှာ အလုပ်သွားရောက် အလုပ်လုပ်ရတာပါ” လို့ ပဲခူးတိုင်း အနောက်ခြမ်းက လူငယ်တဦးက ပြောပါတယ်။

ထိုင်းနိုင်ငံကို တရားမဝင်နည်းလမ်းမျိုးစုံ သွားရောက်အလုပ်လုပ်ကိုင်ရသူတွေဟာ တရားဝင်အလုပ်လုပ်ကိုင်ရသူတွေထက် ပင်ပန်းတယ်လို့ သူကဆက်ပြောပါတယ်။

“သူများတိုင်းပြည်မှာ တရားမဝင်သွားရောက်ရလို့ ခိုးပြီးနေရတာဆိုတော့ အလုပ်လုပ်ရတော့ သူများတွေ မလုပ်ရတဲ့ ဆောက်လုပ်ရေးလို အလုပ်ကြမ်းမျိုးကို လုပ်ရတယ်။ သူများတိုင်းပြည်ကို မလာချင်ဘဲနဲ့ မိသားစုနဲ့ခွဲကာ နေရမယ့်အခြေအနေမျိုး ဖြစ်လာလို့ မလာချင်ဘဲနဲ့ လာခဲ့ရတာ” လို့ ပြောပါတယ်။

ထိုင်းနိုင်ငံကို တရားမဝင်နည်းနဲ့ လာခဲ့ရပေမယ့် ထိုင်းဘတ်ငွေ ၂ သောင်း ၇ ထောင်ခန့် (လက်ရှိ မြန်မာငွေပေါက်စျေး ကျပ်သိန်းနှစ်ဆယ်ကျော်) ပွဲစားကို ပေးရပြီး အပေါင်းအသင်းတွေရဲ့ထောက်ပံ့မှုနဲ့ ပေးနိုင်ခဲ့ကာ နေရာဒေသအသီးသီးက လယ်သမားသားသမီးတွေ တွေ့ရသလို အခြေခံလူတန်းစား လူငယ်တွေလည်း အများအပြားရှိတယ်လို့ ဆိုပါတယ်။

ထိုင်းနိုင်ငံကို နည်းလမ်းမျိုးစုံနဲ့ သွားရောက် အလုပ်လုပ်ကိုင်ကြတာကြောင့် ပြည်တွင်းမှာလည်း လုပ်သားရှားပါးမှုနဲ့ ကြုံတွေ့ရတယ်လို့ ဒေသခံလယ်သမားတဦးက ပြောပါတယ်။

“လုပ်သားရှားပါးဆိုတာ ကျွမ်းကျင်လုပ်သား ရှားပါးတာကို ပြောတာပါ။ ပန်းရံမလုပ်ရ လက်သမားအလုပ် မဆင်းရတဲ့သူတွေလည်း ရှိပေမယ့် သူတို့တွေက လယ်ယာလုပ်ငန်းကိစ္စတွေမှာ မကျွမ်းကျင်ဘူး။ မကျွမ်းကျင်တော့ လုပ်ရတာအဆင်မပြေဘူး။ အလုပ်မရှိတဲ့လူတွေ ရှိတယ်။ လယ်ယာလုပ်ငန်းနဲ့ နီးစပ်တဲ့သူ မဟုတ်ကြဘူး” လို့ ပြောပါတယ်။

ထိုင်းနိုင်ငံကို တရားဝင်လုပ်သား ပို့ဆောင်ပေးနေတဲ့ အေဂျင်စီတခုက တာဝန်ရှိသူ အမျိုးသမီးတဦး ပြောတာကတော့ “ပို့ဆောင်ပေးနေရသူတွေထဲမှာ ပဲခူးတိုင်းနဲ့ မကွေးတိုင်းအပြင် စစ်ကိုင်းတိုင်းမြို့နယ်အချို့က လူငယ်တွေလည်း လာရောက်ကြတယ်” လို့ ဆိုပါတယ်။

ဒါ့အပြင် တရားမဝင်လာရောက်သူတွေလည်း အများအပြားရှိနေပြီး ထိုင်းအာဏာပိုင်တွေရဲ့ ဖမ်းဆီးခံရမှုတွေလည်း ရှိနေပါတယ်။

လက်ရှိမြန်မာနိုင်ငံမှာ စစ်တပ်က အာဏာသိမ်းပြီးချိန်ကစလို့ စီးပွားရေး ယိုယွင်းကျဆင်းကာ အခြေခံအလုပ်သမားအများစု စီးပွားရေးအကြပ်အတည်းနဲ့ ရင်ဆိုင်နေရတယ်လို့ သိရပါတယ်။

စာတည်း – 007

စစ်ကိုင်း၊ ဧပြီ ၃၊ ၂၀၂၃။

စစ်ကိုင်းအခြေစိုက် ဆားတောင်မိုးကြိုပြည်သူ့ကာကွယ်ရေးအဖွဲ့ဆီကို ပြီးခဲ့တဲ့မတ်လ ၃၁ ရက်မှာ စစ်ကောင်စီတပ်သားတဦး အလင်းဝင်ရောက်လာခဲ့တယ်လို့ သိရပါတယ်။

ရခိုင်ပြည်နယ်၊ ဂွမြို့အခြေစိုက် ခမရ ၅၆၃ က တပ်သားအောင်ကိုကိုဦး ၂၈ နှစ်ဖြစ်ပြီး သူနဲ့အတူ လက်နက်ခဲယမ်းတွေတော့ မပါလာခဲ့ဘူးလို့ ဆိုပါတယ်။

“ကျနော် စစ်ကိုင်းမြို့နယ်၊ ဆားတောင်မိုးကြိုးပြည်သူ့ကာကွယ်ရေးအဖွဲ့မှာ အလင်းဝင်တယ်။ ခု လွတ်မြောက်ရေးနယ်မြေကို ရောက်နေပါပြီ။ ကျနော့်ခံယူချက်က စစ်တပ်အောက်မှာ တာဝန်မထမ်းဆောင်ချင်လို့ လမ်းမှားမှန်းသိသိကြီးနဲ့ ဆက်မလျှောက်ချင်တော့လို့ပါ” လို့ ဆားတောင် မိုးကြိုးပြည်သူ့ကာကွယ်ရေးတပ်ဖွဲ့က မြေလတ်အသံကို ပေးပို့တဲ့ရုပ်သံဖိုင်မှာ တပ်သား အောင်ကိုကိုဦးက အတည်ပြုဖြေဆိုထားပါတယ်။

ဒါ့အပြင် ပြည်သူနဲ့တသားတည်းဖြစ်အောင် ခုလိုအလင်းဝင်ခဲ့တာဖြစ်ပြီး၊ ရှေ့ဆက်ပြီးတော့လည်း ပြည်သူနဲ့အတူ စစ်ကောင်စီကို တော်လှန်သွားမယ်လို့လည်း ဆိုထားပါတယ်။

လက်ရှိမှာ အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန – MOD နဲ့ချိတ်ဆက်ထားဆဲဖြစ်တဲ့အတွက် တပ်သား အောင်ကိုကိုဦးကို ဆုငွေချီးမြှင့်နိုင်ခြင်း မရှိပေမယ့် ကောင်းမွန်စွာစောင့်ရှောက်ထားတယ်လို့ ဆားတောင်မိုးကြိုး ပြည်သူ့ကာကွယ်ရေးတပ်ဖွဲ့ သတင်းပြန်ကြားရေးတာဝန်ခံဆီက သိရပါတယ်။

စာတည်း – လင်း

ပဲခူး၊ ဧပြီ ၃၊ ၂၀၂၃။

ပဲခူးတိုင်းအနောက်ခြမ်း၊ ပြည်ခရိုင်၊ ပေါင်းတည်မြို့နယ်၊ တောင်ပို့လှအုပ်စု သရက်ချဥ်ရွာ ဘုရားထီးတင်ပွဲကနေ ပြန်လာတဲ့ရဲတွေကို ဧပြီလ ၂ ရက်မနေ့ညက မိုင်းဆွဲတိုက်ခိုက်ခဲ့တယ်လို့ ပေါင်းတည်မြို့နယ် ပြည်သူ့ကာကွယ်ရေးတပ်ဖွဲ့ဝင် တဦးဆီက သိရပါတယ်။

သရက်ချဥ်ရွာနဲ့ နတ်ပုတီးရွာကြားမှာ ဆိုင်ကယ် ၅ စီးနဲ့ ပေါင်းတည်မြို့ဘက်ကို ပြန်လာတဲ့ ပေါင်းတည်ရဲစခန်းက ရဲ ၇ ဦးလောက်ကို ည ၉ နာရီခွဲခန့်မှာ နန်းထိုက်အောင်စစ်ဆင်ရေးအဖြစ် မိုင်းဆွဲခဲ့တာလို့ ဆိုပါတယ်။

“သူတို့ပြန်လာတဲ့အချိန်မှာ နောက်ဆုံးက ဆိုင်ကယ် ၂ စီးကို ရိုးမြောင်းကူးတံတားနား မိုင်းဆွဲခဲ့တာပါ။ ထိခိုက်မှုတော့ မသိရသေးပေမယ့် ထိခိုက်မှုတော့ ရှိနိုင်တယ်” လို့ ပေါင်းတည်ပြည်သူ့ကာကွယ်ရေးတပ်ဖွဲ့ဝင် တဦးက ပြောပါတယ်။

ဒီတိုက်ခိုက်မှုကြောင့် ရဲ ၁ ဦးထိခိုက်ဒဏ်ရာရခဲ့ပြီး အဲ့ဒီရဲကို ကားနဲ့လာသယ်သွားတယ်လို့ သိရကြောင်း ဒေသခံတဦးက ဆိုပါတယ်။

“ဘုရားပွဲမှာက လောင်းကစားဝိုင်းရှိတယ်။ ဘုရားပွဲကနေ တောင်ပို့လှရွာက သူတို့အသိအိမ်မှာ ဘီယာသောက်ပြီးအပြန် လမ်းမှာ မိုင်းဆွဲခံရတာ။ ရဲ ၁ ဦး ထိခိုက်ဒဏ်ရာရသွားပြီး ဒဏ်ရာရသူကို ကားနဲ့လာသယ်သွားတယ်” လို့ ပြောပါတယ်။

ဒီစစ်ဆင်ရေးကို ပေါင်းတည်မြို့နယ် ပြည်သူ့ကာကွယ်ရေးတပ်ဖွဲ့ တပ်ခွဲ ၃၊ တပ်ခွဲ ၄ က ပူးပေါင်းလုပ်ဆောင်ခဲ့တာဖြစ်ပြီး၊ ရဲတွေဘက်က ထိခိုက်မှုအခြေအနေနဲ့ပတ်သက်ပြီး မြေလတ်အသံက သီးခြားအတည်မပြုနိုင်သေးပါဘူး။

ပြီးခဲ့တဲ့ မတ်လ ၁၄ ရက်ကလည်း ပေါင်းတည်မြို့နယ်၊ လက်ပံပါးပျဥ်းရွာက စစ်တပ်သတင်းပေးလို့ လူသိများသူ အမျိုးသားတဦးကို အဲ့ဒီရွာအနီးမှာပဲ နန်းထိုက်အောင်စစ်ဆင်ရေးအဖြစ် ပေါင်းတည်ပြည်သူ့ကာကွယ်ရေးတပ်ဖွဲ့က ရှင်းလင်းခဲ့ပါသေးတယ်။

ပေါင်းတည်မြို့နယ်ကို စစ်ကောင်စီက အခုနှစ်ဖေဖေါ်ဝါရီလ ၂ ရက်ကစတင်ကာ မာရှယ်လော ထုတ်ပြန်ထားတာဖြစ်ပြီး မြို့နယ်အတွင်းမှာတော့ မြို့ပြပြောက်ကျားအဖွဲ့တွေနဲ့ စစ်ကောင်စီတပ်တို့ မကြာခဏဆိုသလို ထိတွေ့တိုက်ခိုက်မှုတွေ ဖြစ်ပွားလျှက်ရှိနေတာလည်း ဖြစ်ပါတယ်။

စာတည်း – လင်း

ပဲခူး၊ ဧပြီ ၂၊ ၂၀၂၃။

ပဲခူးတိုင်းအနောက်ခြမ်း၊ ပြည်ခရိုင်၊ ပေါင်းတည်မြို့မှာကျင်းပမယ့် သင်္ကြန်ရေကစားမဏ္ဍပ်ကုန်ကျငွေအတွက် စစ်ကောင်စီအဖွဲ့ဝင်တွေက လောင်းကစားသမားတွေကို မဲလက်မှတ်ရောင်းကာ ရံပုံငွေရှာဖွေနေတယ်လို့ အုပ်ချုပ်ရေးပိုင်းနဲ့နီးစပ်သူတဦးက ပြောပါတယ်။

မဲလက်မှတ်တွေကို ထွေအုပ်၊ ရဲ၊ အုပ်ချုပ်ရေးမှူးနဲ့ ရာအိမ်မှူး၊ ဆယ်အိမ်မှူးတွေက အဓိကဦးဆောင်ကာ ရောင်းချနေတာလို့ ဆိုပါတယ်။

“မဲလက်မှတ်တစောင်ကို ငါးထောင်နဲ့ရောင်းတယ်၊ အဓိကက ၂ လုံး၊ ၃ လုံး၊ ဘောလုံးဒိုင်၊ နယ်လှည့်လောင်း ကစားဝိုင်းဒိုင်တွေနဲ့ ဌာနဆိုင်ရာတွေကိုရောင်းတယ်၊ မဝယ်ချင်လည်းဝယ်ရတယ်၊ အဓမ္မရောင်းနေကြတာ”လို့ မြို့ခံတဦးက ပြောပါတယ်။

မဏ္ဍပ်ဆောက်လုပ်ဖို့အတွက် စစ်ကောင်စီလက်အောက်ခံ စည်ပင်သာယာရေးဌာနကဦးဆောင်ကာ ကုန်ကျငွေကို မြို့နယ်အတွင်း တရားမဝင်ကျွန်းသစ်ခိုးထုတ်သူတွေကထောက်ပံ့ကြပြီး၊ အသုံးပြုမယ့်ရေကို မီးသတ်ဦးစီးဌာနက တာဝန်ယူရတယ်လို့ သူကဆက်ပြောပါတယ်။

လက်ရှိမှာ မဲလက်မှတ်တွေကို အဓမ္မရောင်းချနေပြီး ဆိုင်ကယ်၊ အဲကိုလာ၊ ပန်ကာတွေကိုလည်း မဲဖောက်ပေးမယ်လို့သိရကြောင်း နောက်ထပ်မြို့ခံတဦးက ပြောပါတယ်။

“မဲလက်မှတ်ရောင်းတာ အဓိက က သင်္ကြန်ရက်အတွက် အရက်ဖိုးရှာတာလည်း ပါတယ်။ မဏ္ဍပ်ပေါ်တက်တဲ့သူတွေ သောက်ရမယ်လေ၊ ဆိုင်ကယ်မဲဖောက်တာကလည်း လူစည်အောင်လုပ်တဲ့ သဘောပါ” လို့ ပြောပါတယ်။

ပြီးခဲ့တဲ့နှစ် သင်္ကြန်အကြိုနေ့မတိုင်မီကလည်း ပေါင်းတည် မြို့ပေါ်ရပ်ကွက်တခုနဲ့ မဏ္ဍပ်အနီးမှာ ဗုံးပေါက်ကွဲခဲ့သလို မဏ္ဍပ်ပေါ်မှာ အရက်ထိုင်သောက်နေတဲ့ လုံခြုံရေးစစ်သားကိုလည်း လူငယ်အချို့က အရက်ပုလင်းခွံနဲ့ပစ်ပေါက်ခဲ့သလို ဧပြီလ ၁၆ ရက်(သင်္ကြန်အတက်နေ့)ကလည်း မဏ္ဍပ်အနီး ဘုရားကြီးလမ်းနဲ့ ရန်ကုန်လမ်းထောင့်အလွန်မှာ ဗုံးပေါက်ကွဲခဲ့တဲ့အတွက် ရေကစားလာတဲ့အမျိုးသမီးတဦး သေဆုံးခဲ့ပါသေးတယ်။