ဟယ်သာ

မြိုင်၊ နိုဝင်ဘာ၂၉၊ ၂၀၂၅။

မကွေးတိုင်း၊ မြိုင်မြို့နယ်နဲ့ ပေါက်မြို့နယ်အတွင်းစစ်ကြောင်းထိုးနေတဲ့ စစ်ကော်မရှင်စစ်ကြောင်းက နိုဝင်ဘာ ၂၈ ရက် မှာ အမျိုးသား ၂ ဦးကို သတ်ဖြတ်သွားတယ်လို့ ပြည်သူ့လွတ်မြောက်ရေး တပ်ပေါင်းစု-PLC ရဲ့ တာဝန်ခံဆီက သိရပါတယ်။

နိုဝင်ဘာ ၂၇ ရက်မှာ မြိုင်မြို့နယ် စက်မှု ၂ ကနေ ထွက်လာတဲ့စစ်ကြောင်းက သရက်ကန်ရွာကို လာချိန် စက်မှု ၂ နဲ့ သရက်ကန် ကြားကတောတိုက်မှာ အသက် ၃၀ အရွယ် ကိုငသိမ်းကို ဖမ်းဆီးခဲ့ပြီးနောက် သရက်ကန်ရွာကို ဝင်ရောက်တပ်စွဲခဲ့ကာ နိုဝင်ဘာ ၂၈ ရက်မနက်ပိုင်းမှာ ရွာကပြန်ထွက်ချိန် မြေရင့်နဲ့ နှမ်းဆီကန် ကြားကတောတိုက်တွေထဲမှာ သတ်ခဲ့တာလို့ ဆိုပါတယ်။

“သူနေတဲ့ တောတိုက်က တဲမှာတွေ့လို့ ဖမ်းခေါ်သွားတာ။ သရက်ကန်ပျူရွာကနေ ညောင်ဂျစ်ပင် အပြန်လမ်းမှာ သတ်သွားတာပါ။ မနေ့ညက ညောင်ဂျစ်ပင်မှာညအိပ်ပါတယ်။ အခု ပခုက္ကူမြို့နယ် တဲကုန်းရွာကို ရောက်သွားပါပြီ။”လို့ဆိုပါတယ်။

ကိုငသိမ်းရဲ့အလောင်းကို ဒီကနေ့ မနက် ၈ နာရီ က တွေ့ခဲ့ရပြီး အဲ့ဒီနေရာနဲ့ ၁ မိုင်ဝန်းကျင်အကွာ နှမ်းဆီကန်ရဲ့တောင်ဘက်ကတောထဲမှာလည်း အောင်သာကျေးရွာဘက်က ပျူစောထီးဟု ယူဆရသူရဲ့ အလောင်းကိုလည်း ဒီကနေ့မနက် ၈နာရီ အချိန်မှာတွေ့ခဲ့တယ်လို့ ဆိုပါတယ်။

“မှတ်ပုံတင်က ဘဲကြီး၊ အောင်သာလို့ တွေ့တာ ပြည်သူဆိုတာ ကျတော်တို့ဘက်က ဒီနားဝန်းကျင်က ဖမ်းခံထားရတာမျိုး သတင်းကြားထားတာမျိုးမရှိဘူးဆိုတော့ အခြားနေရာက ရှိမလားပေါ့။ စုံစမ်းနေတာ။ အတည်ပြုလို့မရသေးလို့ပါ။ ပြည်သူအလောင်းနဲ့ မီတာ ၁,၇၀၀ ကျော်လောက် အကွာမှာတွေ့တာပါ။” လို့ သူကဆက်ပြောပါတယ်။

ပျူစောထီးဟုယူဆရသူကို စစ်ကော်မရှင်တပ်တွေက သတ်တယ်လို့ ယူဆရပြီး ၂ ဦးစလုံးရဲ့ ရုပ်အလောင်းတွေကို ဒီကနေ့နေ့လည်မှာပဲ သဂြိုဟ်ခဲ့တယ်လို့ သိရပါတယ်။

အထက်ပါစစ်ကြောင်းဟာ စက်တင်ဘာလကုန်ပိုင်းကစတင်ပြီး မြိုင်မြို့နယ်နဲ့ ပေါက်မြိုင်နယ်အစပ်က ကျေးရွာတွေကို စစ်ကြောင်းထိုးမီးရှို့တာတွေ ပြုလုပ်နေခဲ့တဲ့ စစ်ကြောင်းလည်း ဖြစ်ပါတယ်။

စာတည်း – လင်း

မကွေး၊ နိုဝင်ဘာ ၂၅၊ ၂၀၂၅။

မကွေးတိုင်း၊ ပေါက်မြို့နယ်နဲ့ မြိုင်မြို့နယ်ထဲက ကျေးရွာ ၅ ရွာကို စစ်ကော်မရှင်စစ်ကြောင်းတွေက နိုဝင်ဘာ ၁၈ ကနေ ၂၄ ရက်အတွင်းမီးရှို့ဖျက်ဆီးခဲ့တယ်လို့ ဒေသခံတွေဆီက သိရပါတယ်။

ကပစ ၂၄ ကထွက်လာတဲ့ အင်အား ၂၀၀ ကျော်ပါစစ်ကော်မရှင်စစ်ကြောင်းက နိုဝင်ဘာ ၁၈ ရက်မှာ ပေါက်မြို့နယ်၊ တယ်ပင်ရွာနဲ့ နိုဝင်ဘာ ၂၃ ရက်မှာ ကျောက်မဲတောင်ရွာတို့ကို မီးရှို့ ဖျက်ဆီးခဲ့တယ်လို့ ဆိုပါတယ်။

“ကပစ ၂၄ အနီးတဝိုက်မှာပဲ ရှိနေသေးတယ်။ ကျောက်မဲတောင်ကို မီးရှို့ပြီးမှ ပြန်ဆုတ်သွားတာပါ။”လို့ ဒေသခံတဦးက ဆိုပါတယ်။

အခုလိုမီးရှို့ဖျက်ဆီးခဲ့တာကြောင့် အိမ်ခြေ ၁၀၀ ဝန်းကျင်ရှိ ကျောက်မဲတောင်ရွာက နေအိမ် ၁၅ လုံး၊ အိမ်ခြေ ၈၀ ရှိ တယ်ပင်ရွာက နေအိမ် ၇ လုံးမီးလောင်ပျက်စီးခဲ့တယ်လို့ ဆိုပါတယ်။

လက်ရှိမှာတော့ စစ်ကြောင်းက ကပစ ၂၄ အနီးရှိ မျှားပိုင်းကျေးရွာအနီးမှာရှိနေပြီး စစ်ကြောင်းကြောင့် သီးခြောက်၊ သရဖီ၊ လယ်လန်း၊ မြေခြား၊ သရက်လေးပင်၊ သပွတ်စု၊ တောင်ချို၊ ဒေါင်းသာ၊ ကျောက်ကား၊ ကျားသိုက်၊ ခင်တန်းရှည်၊ ဆင်ဇာ၊ ပလောင်း၊ ကျောက်မဲတောင်၊ ကျောက်တံခါး၊ ခင်အေး၊ မျှားပိုင်း၊ အုန်းမှင်၊ တယ်ပင်၊ မကျီးကုန်း၊ ယောကုန်း၊ ထန်းပင်ချောင်းစတဲ့ ကျေးရွာက ဒေသခံတွေလည်း တိမ်းရှောင်နေရတယ်လို့ သိရပါတယ်။

ဒါ့အပြင် အဆိုပါစစ်ကြောင်းဟာ အောက်တိုဘာလနောက်ဆုံးပတ်ကစလို့ ပေါက်မြို့နယ်တောင်ပိုင်း လယ်လန်းက နေအိမ် ၃ လုံး၊ သရဖီကျေးရွာက နေအိမ် ၃၇ လုံး၊ သီးခြောက်ကျေးရွာက နေအိမ် ၁၀ လုံး၊ ဆင်ဇာရွာက နေအိမ် ၆ လုံး၊ ကျောက်ကာစစ်ရှောင်စခန်းက နေအိမ် ၃၀ ကိုမီးရှို့ပြီး ပြည်သူ ၅ ဦးကိုသတ်ကာ ၅ ဦးကိုဖမ်းဆီးခဲ့သေးတယ်လို့ ဒေသခံတဦးက ပြောပါတယ်။

အလားတူ နိုဝင်ဘာ ၂၄ ရက် မနေ့ကညနေဘက်မှာ မြိုင်မြို့နယ်၊ တဲကြီးကျေးရွာကို ရောက်နေတဲ့ စစ်ကြောင်းက ရွာထဲကနေအိမ်တွေကိုမီးရှို့ခဲ့တယ်လို့ ဆိုပါတယ်။

တဲကြီးကျေးရွာကို ရောက်ရှိနေတဲ့စစ်ကြောင်းဟာ နိုဝင်ဘာ ၂၃ ရက်မှာ တဲကြီးကျေးရွာနဲ့ ၂ မိုင်ခန့်အကွာရှိ ပေါက်မြို့နယ် နယ်သတ်ရွာက နေအိမ် ၂ လုံးကို မီးရှို့ ဖျက်ဆီးခဲ့ပြီး မနေ့ကညနေပိုင်းမှာ ဒေသတော်လှန်ရေးတပ်တွေနဲ့ တိုက်ပွဲဖြစ်ပြီးနောက် တဲကြီးရွာကိုမီးရှို့ခဲ့တာလို့ သိရပါတယ်။

“ထပ်ရှို့တယ် သိရတာ။ စစ်ကြောင်းက အဲ့ရွာထဲမှာရှိနေတာဆိုတော့ ဘယ်လောက်လောင်တယ် ဘယ်လောက်ကုန်သွားတယ်ဆိုတာကို ကျနော်တို့ကသေသေချာချာ သိလို့မရဘူး။ မနေ့ကလည်း ရှို့တယ် “လို့ ဒေသခံတဦးက ဆိုပါတယ်။

နိုဝင်ဘာ ၂၅ ရက်ဒီမနက်ပိုင်းမှာတော့ တဲကြီးရွာကိုရောက်နေတဲ့စစ်ကြောင်းက ရွာရဲ့ တောင်ဘက်ပိုင်း ဆီကို အထွက်ပြနေတယ်လို့ ဒေသခံတွေဆီက သိရပါတယ်။

တမခ ၁၀၁၊ ခလရ ၄၁၈ နဲ့ ခလရ ၄၁၉ ကစစ်ကော်မရှင်တပ်သားတွေပါဝင်ပြီး မြိုင်နဲ့ ပေါက်မြို့နယ်အစပ်ရှိ တဲကြီး၊ နသတ်၊ ကံသတ်၊ ကမ္ဘားဖြူ၊ ကျောက်ခွက် စတဲ့ကျေးရွာတွေကို နို၀င်ဘာ ၁၉ ရက်ကစလို့ စစ်ကြောင်းထိုးကာ ကျေးရွာတွေကိုမီးရှို့နေပြီး ဒေသခံကာကွယ်ရေးတပ်တွေနဲ့လည်း မကြာခဏထိတွေ့ ပစ်ခတ်မှုတွေဖြစ်နေတာပါ။

စစ်အာဏာသိမ်းချိန်ကနေ ၂၀၂၅၊ မေလကုန်ပိုင်းအထိ မကွေးတိုင်းအတွင်းက အရပ်သားနေအိမ်ပေါင်း ၁၆,၄၇၀ လုံး မီးရှို့ဖျက်ဆီးခံထားရတယ်လို့ သုသေသနအဖွဲ့တခုဖြစ်တဲ့ Data for Myanmar ရဲ့ နိုဝင်ဘာ ၂၂ ရက်ထုတ်အစီရင်ခံစာမှာ ဖော်ပြထားပါတယ်။

စာတည်း – လင်း

◼ ၂ ရက်အတွင်း အဆိုပါစစ်ကြောင်းမှ ဘက်ပြောင်းလာသူ ၄ ဦးထိရှိလာ

မကွေး၊ နိုဝင်ဘာ ၂၄၊ ၂၀၂၅။

မကွေးတိုင်း၊ မြိုင်မြို့နယ်နဲ့ ပေါက်မြို့နယ်အစပ်ကကျေးရွာတွေကို စစ်ကြောင်းထိုးနေတဲ့ စစ်ကော်မရှင် စစ်ကြောင်းထဲက စစ်ကော်မရှင်တပ်သား ၁ ဦး ဘက်ပြောင်းလာတယ်လို့ အညာမြေတပ်ပေါင်းစု (မြိုင်) ဆီကသိရပါတယ်။

နိုဝင်ဘာ ၂၃ ရက် မနေ့ကညနေပိုင်းမှာ အသက် ၂၆ နှစ်အရွယ်တပ်သား ပြည့်စုံဟိန်းဟာ လက်နက်ခဲယမ်းတွေကိုယူပြီး စစ်ကြောင်းကနေခွဲထွက် ပုန်းနေခဲ့ပြီး စစ်ကြောင်းအဝေးကိုရောက်ခါမှ တော်လှန်ရေးတပ်တွေဆီကို ဘက်ပြောင်းသွားခဲ့တာလို့ ဆိုပါတယ်။

“ဒီစစ်ကြောင်းက တကြောင်းတည်း ကျနော်တို့ဆီမှာအလင်းဝင်လာတဲ့ ပြည်စုံဟိန်း က ဒီမှာ ကျန်နေခဲ့တာ။ ချက်ချင်းကျနော်တို့ဆီကို ဝင်မလာသေးဘူး။ သူလဲကြောက်တာတွေရော လန့်တာတွေရော ပါမှာပေါ့လေ။ ခွဲထွက်ပြီးကျန်နေခဲ့ပြီးမှ အခုလိုမျိုးအချိန်မှဝင်တာ”လို့ ကိုဘိုဘိုသန့်ဇင်က ဆိုပါတယ်။

တပ်သား ပြည်စုံဟိန်းဟာ မနေ့ကမနက်ပိုင်းမှာ MA 1 ၁ လက်၊ 5.56 ကျည် ၄၂၀ တောင့်၊ ၄၀ မမ ၆ လုံး၊ MA 1 ကျည်ဘောက် ၇ ဘောက်၊ အီနာဂါ ၂ လုံးနဲ့ လက်ပစ်ဗုံး ၂ လုံး ကိုယူဆောင်ခဲ့ပြီးနောက် ညနေပိုင်းမှာ ဘက်ပြောင်းလာခဲ့တာလည်း ဖြစ်ပါတယ်။

ကျောက်ဆည်ဘက်မှာ စစ်မှုထမ်းအပတ်စဉ် ၁၅ အတွက် ပေါ်တာဆွဲဖမ်းဆီးခံရတာဖြစ်ပြီး စစ်သင်တန်းဆင်းပြီးနောက် ခလရ ၄၁၈ ကိုရောက်ရှိကာ အဲ့ဒီကတဆင့် စစ်ကြောင်းထဲကို လိုက်ပါခဲ့ရတာလို့ ဆိုပါတယ်။

လက်ရှိမှာ တပ်သားပြည့်စုံဟိန်းကို အညာမြေတပ်ပေါင်းစုက ဥပဒေနဲ့အညီ ထိန်းသိမ်း စောင့်ရှောက်ထားပြီး ရိုက်နှက်စစ်ဆေးတာတွေမလုပ်ဘူးလို့ ဆိုပါတယ်။

“ရိုက်နှက်စစ်ဆေးတာမျိုးတွေတောင်မလုပ်ဘူး။ သူပြောတဲ့အတိုင်းပဲ ကောင်းကောင်းမွန်မွန်နဲ့ အလင်းဝင်လာတယ်။ ပစ္စည်းတွေပါ ယူခဲ့တယ်။ ကျနော်တို့ဘက်ကလည်း ပြန်ပြီးတော့ လုံခြုံမှုနဲ့ စောင့်ရှောက်မှု ဥပဒေအရကာကွယ်ပေးထားပါတယ်။ ဆေးဝါးစောင့်ရှောက်မှုက စလို့ပေးထားပါတယ်။”လို့ပြောပါတယ်။

တပ်သားပြည့်စုံဟိန်းအပါအဝင် အထက်ပါစစ်ကြောင်းကနေ ဘက်ပြောင်းလာတဲ့တပ်သား စုစုပေါင်း ၄ ဦးရှိပြီး နောက်ထပ်ဘက်ပြောင်းလာသူတွေလည်းရှိနေတယ်လို့ ကိုဘိုဘိုသန့်ဇင်က ပြောပါတယ်။

“အခုထိကျနော်တို့အတည်ပြုနိုင်တာတော့ ၄ ယောက်ပေါ့နော်။ အတည်မပြုနိုင်သေးတဲ့သူတွေလည်း ရှိတယ်။ အဖွဲ့တွေကလည်းများတော့ တချို့အဖွဲ့တွေဆီရောက်သွားတဲ့သူတွေ အမျိုးမျိုးရှိတယ်” လို့ ပြောပါတယ်။

အလားတူ နို၀င်ဘာ ၂၂ ရက် မနက် ၉ နာရီ၀န်းကျင်မှာလည်း အဆိုပါစစ်ကြောင်းမှာပါဝင်လာတဲ့ ခလရ ၄၁၈ မှ တပ်သား သန့်ဇင်၊ တပ်သားတင်ထွန်းနဲ့ ခလရ ၄၁၉ မှ တပ်သား အောင်မိုးတို့ဟာ MA 1 ၃ လက်၊ ကျည်ဘောက် ၃ ခုနဲ့ ကျည် ၈၇ တောင့်တို့ကိုယူပြီး မြိုင်ပကဖဆီကို ဘက်ပြောင်းလာခဲ့ကြတယ်လို့လဲ သိရပါတယ်။

ဒေသခံကာကွယ်ရေးတပ်တွေဘက်ကလည်း မနေ့က နေ့လယ်ပိုင်းမှာ ပျက်ကျသွားတဲ့ ပါရာမော်တာကို လိုက်ရှာဖို့ မြိုင်မြို့နယ်၊ တဲကြီးရွာကထွက်လာတဲ့ အဲ့ဒီစစ်ကြောင်းကို ပေါက်မြို့နယ်၊ နသတ်ရွာကိုလာချိန် လမ်းခုလတ်မှာ ကြားဖြတ် တိုက်ခိုက်ခဲ့တာကြောင့် စစ်ကော်မရှင်တပ်ဖွဲ့ဝင် ၄ ဦးသေဆုံးခဲ့ပါသေးတယ်။

ဒီကနေ့ ညနေပိုင်းအထိ စစ်ကော်မရှင်တပ်တွေက တဲကြီးရွာမှာရှိနေတာကြောင့် မြိုင်နဲ့ ပေါက်မြို့နယ် အစပ်ရှိ တဲကြီး၊ နသတ်၊ ကံသတ်၊ ကမ္ဘားဖြူ၊ ကျောက်ခွက်ရွာကဒေသခံတွေလည်း ထွက်ပြေးတိမ်းရှောင်နေကြရတယ်လို့ သိရပါတယ်။

စာတည်း – လင်း

မြေလတ်အသံ၊ နိုဝင်ဘာ ၁၅၊ ၂၀၂၅။

စစ်ကိုင်းတိုင်း၊ ကလေးမြို့နယ်တောင်ပိုင်းနဲ့ မကွေးတိုင်း၊ မြိုင်မြို့နယ်တို့ကို စစ်ကော်မရှင်တပ်က နိုဝင်ဘာ ၁၃ ရက်နဲ့ ၁၄ ရက်မှာ ဗုံးကြဲတိုက်ခိုက်ခဲ့တယ်လို့ ဒေသခံတွေဆီက သိရပါတယ်။

ဒေသခံကာကွယ်ရေးတပ်တွေနဲ့ စစ်ကော်မရှင်တပ်တို့တိုက်ပွဲတွေဖြစ်နေတဲ့ စစ်ကိုင်းတိုင်း၊ ကလေးမြို့နယ်တောင်ပိုင်းရှိ ကမ်းပါးနီစစ်စခန်းအနီးတဝိုက်ကို နိုဝင်ဘာ ၁၄ ရက်နေ့လယ် ၂ နာရီဝန်းကျင်မှာ ဂျက်ဖိုက်တာ ၂ စီးနဲ့ ဗုံး ၂ လုံး Y12 နဲ့ ဗုံးအလုံးရေ ၃၀ ကျော်ကြဲချခဲ့ပြီး ထိခိုက်မှုကိုတော့ အတည်မပြုနိုင်သေးဘူးလို့ ဒေသခံတဦးက ပြောပါတယ်။

ကလေးမြို့နယ်တောင်ပိုင်းကကျေးရွာတွေကို စစ်ကော်မရှင်တပ်က အင်အားထောင်ကျော်နဲ့ စက်တင်ဘာ ၂၇ ရက်ကစတင်ဝင်ရောက်ကာ တပ်ဖြန့်စစ်ကြောင်းထိုးနေခဲ့ပြီး စစ်ကြောင်း ဝင်ရောက်ချိန်ကစလို့ နေ့စဉ်နီးပါတိုက်ပွဲသံတွေလဲကြားနေရတယ်လို့ ဆိုပါတယ်။

ပြီးခဲ့တဲ့ နိုဝင်ဘာ ၁ ရက်နဲ့ ၂ ရက်မှာလည်း အဆိုပါစစ်ကော်မရှင်တပ်က နတ်ချောင်းရွာက အသက် ၅၀ ကျော်အရွယ် အမျိုးသာ ၁ ဦးနဲ့အမျိုးသမီး ၂ ဦးအပါ ၄ ဦးကိုသတ်ဖြတ်ခဲ့ပြီး နိုဝင်ဘာ ၁၁ ရက်မှာလည်း ဒေသခံကာကွယ်ရေးတပ်တွေနဲ့ တိုက်ပွဲဖြစ်ပြီး လက်နက်ကြီးနဲ့ပစ်လို့ နတ်မြောင်းရွာကနေအိမ် ၂ လုံး မီးလောင်ပျက်စီးခဲ့ပါသေးတယ်။

“တချို့က ဝက်စာကျွေး၊ ပစ္စည်းယူသွားကြတာ။ တလရ တပ်ဖွဲ့တွေကတားတယ်။ မရဘူး။ အခု တောင်ပိုင်းလည်း လက်လှမ်းမှီသလောက် လေးလောင်းတွေ့ထားပါတယ်။ သက်ကြီးပိုင်း ၅၀၊ ၆၀ ကြား နှစ်ယောက်ကို နတ်ချောင်းမှာသတ်ပီး ရေမြောင်းထဲ ပစ်ချထားတာ။”လို့ စစ်ရေးအခြေအနေကို သိရှိသူတဦးက ပြောပါတယ်။

စစ်ကြောင်းဝင်ရောက်လာစဉ်ကနေ နေ့စဥ်နီးပါးတိုက်ပွဲဖြစ်နေပြီး စစ်ကော်မရှင်တပ်ဖွဲ့ဝင် အများအပြားသေဆုံးကာ ကလေးမြို့နယ်ဆေးရုံမှာလည်း ထိခိုက်ဒဏ်ရာရသူတွေနဲ့ ပြည့်နေပြီး အရှင်ဖမ်းမိထားသူတွေလည်းရှိကာ ဒေသတွင်းကာကွယ်ရေးတပ်ဖွဲ့ဝင်တွေဘက်ကလည်း သေဆုံးနဲ့ထိခိုက်တွေရှိတယ်လို့ ဆိုပါတယ်။

ကလေးမြို့နယ်မြောက်ပိုင်းကို ပြီးခဲ့တဲ့ စက်တင်ဘာလ ပထမအပတ်ကတည်းက ဝင်ရောက်နေတဲ့ စစ်ကြောင်းတွေဟာ စက်တင်ဘာ ၂၇ ရက်ကစတင်ကာ ကလေးမြို့နယ်တောင်ပိုင်းကို ဝင်ရောက်ခဲ့လို့ ကလေးမြို့နယ်မှာ စုစုပေါင်း ပြည်သူတသိန်းနီးပါး စစ်ရှောင်တိမ်းနေကြရတာတယ်လို့ စစ်ရှောင်ကူညီနေသူတွေဆီက သိရပါတယ်။

အလားတူ နိုဝင်ဘာ ၁၃ ရက်ည ၈ နာရီဝန်းကျင်မှာ မြိုင်စက်မှု ၂ အနီးရှိ ကုန်းရွာထဲကို ပါရာမော်တာ ၂ စီးနဲ့ ဗုံး ၂ လုံး၊ နိုဝင်ဘာ ၁၄ ရက် နေ့လယ် ၁၂ နာရီခန့်မှာ ကုန်းရွာအနီးတဝိုက်ကို ဗုံး ၄ လုံးကြဲချခဲ့တဲ့အပြင် နေ့လယ် ၃ နာရီဝန်းကျင်မှာလည်း မြိုင်မြို့နယ်အနောက်တောင်ဘက်၊ ဝယ်တောင်(မြောက်)ရွာ အနီးတဝိုက်ကို ဂျက်ဖိုက်တာပေါ်ကနေ စက်သေနတ်တွေပစ်ခတ်ခဲ့တာပါ။

“မြိုင်စက်မှု ပတ်ဝန်းကျင်တွေကိုကြဲသွားတာပါ။ ပါရာမော်တာနှစ်စီးနဲ့ လေးကြိမ်ကြဲသွားတာပါ။” လို့ အညာမြေတပ်ပေါင်းစုရဲ့ပြန်ကြားရေးတာဝန်ခံ ကိုဘိုဘိုသန့်ဇင်က ပြောပါတယ်။

ဒီဗုံးကြဲပစ်ခတ်ခဲ့တဲ့နေရာတွေဟာ ရွာအပြင်ဘက်နေရာတွေဖြစ်တာကြောင့် ထိခိုက်ပျက်စီးမှုတွေ မရှိခဲ့ဘဲ စစ်ကြောင်းရောက်ရှိနေတဲ့အတွက်ကြောင့် ခုလိုဗုံးဆက်တိုက်ကြဲတာဖြစ်နိုင်တယ်လို့ သူကဆက်ပြောပါတယ်။

မြိုင်မြို့နယ်အတွင်း စစ်ကော်မရှင်တပ်ရဲ့လေကြောင်းတိုက်ခိုက်မှုတွေကမကြာခဏရှိနေပြီး နိုဝင်ဘာလထဲမှာတော့ စစ်ကြောင်းကြောင့် နေ့ရောညပါ ဗုံးကြဲချလာနေတယ်လို့ သိရပါတယ်။

“ကျနော်တို့နယ်တွေမှာ လေကြောင်းက တလျှောက်လုံးကြဲနေတာပါ အခုနောက်ပိုင်းဂျက်ဖိုက်တာတွေနဲ့ မကြဲတော့ပဲ ပါရာမော်တာတွေ ဂျိုင်ရိုကော်ပတာတွေ နဲ့အဓိက ကြဲနေတာပါ “လို့ ကိုဘိုဘိုသန့်ဇင်က ပြောပါတယ်။

နိုဝင်ဘာ ၁၅ ရက်ဒီနေ့လယ် ၁၂ နာရီခွဲဝန်းကျင်းမှာလည်း မြိုင်စက်မှု ၂ ထဲက စစ်ကော်မရှင်တပ်ဖွဲ့ဝင်တွေအတွက် Y8 နဲ့ ရိက္ခာတွေလာချနေတယ်လို့ ကိုဘိုဘိုသန့်ဇင်က ပြောပါတယ်။

အောက်တိုဘာတတိယပတ်လောက်ကစလို့ မြိုင်မြို့နယ်အတွင်း စစ်ကြောင်းထိုးမီးရှို့ပြီး ဒေသခံတွေကို ဖမ်းဆီးသတ်ဖြတ်ခဲ့တဲ့ အင်အား ၂၀၀ ခန့်ပါစစ်ကြောင်းဟာ နိုဝင်ဘာ ၁၅ ရက် ဒီကနေ့အထိ မြိုင် စက်မှု ၂ ထဲမှာတပ်စွဲနေထိုင်နေတာလည်း ဖြစ်ပါတယ်။

စာတည်း – လင်း

မြိုင်၊ နိုဝင်ဘာ ၁၃၊ ၂၀၂၅။

မကွေးတိုင်း၊ မြိုင်မြို့နယ်အတွင်း စစ်ကြောင်းထိုးနေတဲ့စစ်ကော်မရှင်စစ်ကြောင်းက ဖမ်းဆီးထားတဲ့ ဒေသခံ ၅ ဦးထဲက ၂ ဦးကို သတ်ဖြတ်ခဲ့ပြီး နေအိမ်တချို့ကိုလည်းမီးရှို့သွားတယ်လို့ ဒေသခံတွေဆီက သိရပါတယ်။

အဆိုပါစစ်ကြောင်းဟာ နိုဝင်ဘာ ၁၂ ရက်မနက်ပိုင်းမှာ မြိုင်အခြေစိုက် စက်မှု ၂ ကနေထွက်လာပြီးနောက် ၃ မိုင်အကွာ ဝက်ပုတ်ရွာအနီးမှာ ဖမ်းဆီးခံထားရသူတွေထဲက အသက် ၃၄ နှစ်အရွယ် မငယ်တာနဲ့ ၄၉ နှစ်အရွယ် ကိုကံစိန်တို့ကိုသတ်ကာ နေအိမ် ၂ လုံးကိုလည်း မီးရှို့ခဲ့တယ်လို့ ဒေသခံတဦးက ဆိုပါတယ်။

စစ်ကြောင်းပြန်ဆုတ်သွားချိန် နေ့လယ် ၁၁ နာရီလောက်မှာ ဒေသခံတွေနဲ့တော်လှန်ရေးတပ်ဖွဲ့တွေ နယ်မြေရှင်းလင်းရေးလုပ်ချိန်မှာ ကြိုးတုပ်၊ ဓါးနဲ့မွှန်းခံထားရတဲ့ အလောင်းတွေကိုတွေ့ခဲ့တာလို့ ကိုဘိုဘိုသန့်ဇင် က ပြောပါတယ်။

“မနေ့တုန်းက သူတို့ ၉ နာရီလောက်က ဝက်ပုတ်ထဲကိုရောက်လာပြီးတော့ နေ့လယ် ၁ နာရီလောက်မှာ ပြန်ပြီး Back (နောက်ဆုတ်) သွားပါတယ်။ ကျနော်တို့ နယ်မြေရှင်းလင်းရေးဝင်လုပ်ခါမှ သူတို့က အမျိုးသမီး ၁ ယောက်နဲ့ အမျိုးသား ၁ ယောက်ကိုသတ်ဖြတ်ခဲ့ပြီးတော့ နေအိမ် ၂ လုံးကို မီးရှို့ထားခဲ့တာပေါ့။” လို့ အညာမြေတပ်ပေါင်းစုပြန်ကြားရေးတာဝန်ခံ ကိုဘိုဘိုသန့်ဇင်က ပြောပါတယ်။

ဝက်ပုတ်ကျေးရွာဟာ အိမ်ခြေ ၁၆၀ ခန့်ရှိတဲ့ ပျူစောထီးအားကောင်းတဲ့ကျေးရွာဖြစ်ပြီး ၂၀၂၄ ဩဂုတ် ၈ ရက်မှာ အညာမြေတပ်ပေါင်းစုနဲ့ မဟာမိတ်တပ်တွေက သိမ်းပိုက်ထားပြီးနောက် ဒေသခံတွေဆီ ပြန်လည်အပ်နှင်းထားတဲ့ကျေးရွာဖြစ်တယ်လို့ အညာမြေတပ်ပေါင်းစု ပြန်ကြားရေးတာဝန်ခံက ဆက်ပြောပါတယ်။

“တော်လှန်ရေးစကတည်းကနေ ၂၀၂၄ ဩဂုတ်လအထိ ပျူစောထီးတွေနေထိုင်ခဲ့တယ်။ စစ်တပ်နဲ့ အထိုင်ချပြီး (အခုအခြေအနေက)ပြည်သူရွာပြန်ဖြစ်သွားတာ။ ပျူစောထီးတွေက စစ်တပ်ထဲ လိုက်သွားတာရှိတယ်၊ သေတဲ့လူတွေကသေကြတယ်ပေါ့ “လို့ ကိုဘိုဘိုသန့်ဇင်က ပြောပါတယ်။

အဆိုပါစစ်ကြောင်းဟာ အောက်တိုဘာ တတိယပတ်လောက်ကစတင်ပြီး ပခုက္ကူမြို့နယ်နဲ့ မြိုင်မြို့နယ်က ကျေးရွာတွေကို စစ်ကြောင်းထိုးခဲ့ပြီးနောက် နိုဝင်ဘာ ၁၁ ရက်မှာ ပျူစောထီးအားကောင်းတဲ့ သရက်ကန်ရွာကတဆင့် မြိုင်စက်မှု ၂ ကိုလာချိန် ရွာတန်းရှည်ကျေးရွာအနီးမှာ အသတ်ခံရသူ ၂ ဦးအပါအဝင် ရွာတန်းရှည်ရွာဒေသခံ ၅ ဦးကို ဖမ်းဆီးသွားခဲ့တာပါ။

ဒါ့အပြင် ဒေသကာကွယ်ရေးတပ်တွေနဲ့ ထိတွေ့မှုဖြစ်ခဲ့ကာ တိုက်ပွဲအခြေအနေကို အသေးစိတ်မသိရသေးဘဲ နိုဝင်ဘာ ၁၃ ရက်ဒီမနက်ထိတော့ စစ်ကြောင်းက စက်မှု ၂ ထဲမှာပဲရှိနေသေးတယ်လို့ ဆိုပါတယ်။

စစ်ကြောင်းထိုးနေစဥ် ပြီးခဲ့တဲ့နိုဝင်ဘာ ၆ ရက်မှာလည်း မြိုင်မြို့နယ်၊ နှမ်းဆီကန်ရွာကို မီးရှို့ဖျက်ဆီးခဲ့တာကြောင့် နေအိမ် ၂၀ ကျော်၊ နိုဝင်ဘာ ၁၁ ရက်မှာ ရွာတန်းရှည် အနီးကတောတိုက် ၂ လုံးကိုလည်း မီးရှို့ဖျက်ဆီးခဲ့ပါသေးတယ်။

စစ်ကြောင်းကြောင့် မြိုင်မြို့နယ်အတွင်းရှိ ဝက်ပုတ်၊ချောင်းနားတိုက်၊ ဆယ်ပြား၊ ရွာတန်းရှည်၊ မိတ္ထီလာ စတဲ့ကျေးရွာတွေအပါအဝင် ကျေးရွာ ၁၀ ရွာကျော်က ဒေသခံတွေ ထွက်ပြေးတိမ်းရှောင်နေကြရပါတယ်။

စာတည်း – လင်း

မြိုင်၊ နိုဝင်ဘာ ၁၁၊ ၂၀၂၅။

မကွေးတိုင်း၊ မြိုင်မြို့နယ်အတွင်းစစ်ကြောင်းထိုးနေတဲ့ စစ်ကော်မရှင်စစ်ကြောင်းက နိုဝင်ဘာ ၁၁ ဒီမနက်မှာ မြိုင်မြို့ရှိ စက်မှု ၂ ထဲကိုသွားချိန် ဒေသခံ ၅ ဦးကိုဖမ်းဆီးပြီး နေအိမ်တချို့ကိုလည်း မီးရှို့သွားတယ်လို့ အညာမြေတပ်ပေါင်းစု ပြန်ကြားရေးတာဝန်ခံ ကိုဘိုဘိုသန့်ဇင် ဆီကသိရပါတယ်။

အင်အား ၂၀၀ ကျော်ပါစစ်ကြောင်းဟာ ဒီမနက် ၁၁ နာရီဝန်းကျင်မှာ သရက်ကန်ရွာကထွက်လာချိန် သရက်ကန်ရွာအနီးမှာ အနောက်တောင်ပိုင်းကျေးရွာက ဒေသခံ ၅ ဦးကို ဖမ်းဆီးခေါ်ဆောင်သွားပြီး သရက်ကန်နဲ့ စက်မှု ၂ ကြားက တောတိုက်ထဲရှိ နေအိမ် ၂ လုံးကိုလည်းမီးရှို့ဖျက်ဆီးခဲ့တယ်လို့ ဆိုပါတယ်။

“သရက်ကန်ပျူစောထီး ရွာကနေ မြိုင်မြို့နယ်အနောက်တောင်ပိုင်းကနေဖြတ်ပြီး စက်မှု ၂ ထဲကိုဝင်တာပါ။ ပြည်သူတွေက အခုထိပြန်လွတ်မလာသေးတာထောက်ရင် စက်မှု ၂ ထဲထိ ပါသွားတာပါ။ ဆွေမျိုးတော်စပ်တဲ့သူတွေလို့ ကနဦးသိရှိရပါတယ်။” လို့ ကိုဘိုဘိုသန့်ဇင်က ပြောပါတယ်။

ဖမ်းဆီးခံရသူတွေရဲ့ အသေးစိတ်အချက်အလက်တွေကိုတော့ မြေလတ်အသံက ဆက်လက် စုံစမ်းနေပါတယ်။

အဲ့ဒီစစ်ကြောင်းဟာ ပခုက္ကူအခြေစိုက်တပ်မ ၁၀၁ ကဖြစ်ပြီး အောက်တိုဘာလကစလို့ ပခုက္ကူမြို့နယ်ရှိ ညောင်ဂျစ်ပင်၊ ကမ္မရွာတွေနဲ့ မြိုင်မြို့နယ်ရှိ တွင်းမ၊ သရက်ကန်၊ နှမ်းဆီကန် စတဲ့ကျေးရွာတွေကို လှည့်လည်စစ်ကြောင်းထိုးနေခဲ့ပြီးနောက် ဒီမနက်မှာ မြိုင် စက်မှု ၂ ထဲကိုဝင်သွားတာလို့ ဆိုပါတယ်။

စက်မှု ၂ ထဲကို စစ်ကြောင်းဝင်ရောက်နိုင်ဖို့အတွက် နိုဝင်ဘာ ၁၀ ရက် မနေ့ကည ၈ နာရီခန့်မှာလည်း စက်မှု ၂ ဝန်းကျင်ကို ပါရာမော်တာ ၂ စီးနဲ့ ဗုံးသီး ၄ လုံးခန့်ကြဲချခဲ့ပြီး စက်သေနတ်တွေနဲ့ပါပစ်ခတ်ခဲ့တယ်လို့ ကိုဘိုဘိုသန့်ဇင်က ပြောပါတယ်။

ဒီဗုံးကြဲတိုက်ခိုက်မှုအတွင်း အထိအခိုက်တော့မရှိခဲ့ဘဲ ခုလိုဗုံးကြဲတာဟာ စစ်ကြောင်းဝင်ဖို့လမ်းရှင်းတာဖြစ်နိုင်တယ်လို့ သူကခန့်မှန်းပါတယ်။

စစ်ကြောင်းထိုးနေစဥ် ပြီးခဲ့တဲ့နိုဝင်ဘာ ၆ ရက်မျာလည်း မြိုင်မြို့နယ်၊ နှမ်းဆီကန်ရွာကို မီးရှို့ဖျက်ဆီးခဲ့တာကြောင့် နေအိမ် ၂၀ ကျော်မီးလောင်ပျက်စီးခဲ့ပါသေးတယ်။

အဆိုပါစစ်ကြောင်းကြောင့် မြိုင်မြို့နယ်အတွင်းရှိ ချောင်းနားတိုက်၊ ဆယ်ပြား၊ ရွာတန်းရှည်၊ မိတ္ထီလာ စတဲ့ကျေးရွာတွေအပါအဝင် အနည်းဆုံးရွာ ၇ ရွာကျော်က ဒေသခံတွေ ထွက်ပြေးတိမ်းရှောင်နေကြရတယ်လို့ ဆိုပါတယ်။

စစ်ကြောင်းတွေဟာ စက်မှု ၂ ထဲကို ၂၀၂၄၊ ဒီဇင်ဘာလမှာ နောက်ဆုံးအကြိမ်ဝင်ရောက်ခဲ့တာဖြစ်ပြီး အဲ့ဒီအချိန်က ဒေသတွင်းတော်လှန်ရေးအင်အားစုတွေနဲ့ တိုက်ပွဲတွေလည်း ပြင်းထန်ခဲ့တယ်လို့ ကိုဘိုဘိုသန့်ဇင်က ပြောပါတယ်။

စာတည်း – လင်း

မြေလတ်အသံ၊ နိုဝင်ဘာ ၁၀၊ ၂၀၂၅။

မကွေးတိုင်း၊ ဆားလင်းကြီးမြို့နယ်နဲ့ ပေါက်မြို့နယ်အတွင်းရောက်ရှိနေတဲ့ စစ်ကြောင်းတွေကနေ စစ်ကော်မရှင်တပ်ဖွဲ့ဝင် ၄ ဦး ဒေသခံကာကွယ်ရေးတပ်တွေဆီဘက်ပြောင်းလာတယ်လို့ သက်ဆိုင်ရာတပ်ဖွဲ့တွေဆီက သိရပါတယ်။

ဆားလင်းကြီးမြို့နယ်၊ ဝက်မှေးကျေးရွာမှာ အထိုင်ချတပ်စွဲထားတဲ့စစ်ကြောင်းက အသက် ၃၁ အရွယ် စစ်ကော်မရှင်တပ်သား ၁ ဦး နိုဝင်ဘာ ၉ ရက်မှာ မြို့နယ်၊ ရပ်ကျေးပကဖအဖွဲ့တွေနဲ့ ချိတ်ဆက်ပြီး ဘက်ပြောင်းလာခဲ့တယ်လို့ ဆားလင်းကြီးမြို့နယ်ပကဖရဲ့ပြောရေးဆိုခွင့်ရှိသူက ဆိုပါတယ်။

“ရပ်ကျေးပကဖတွေနဲ့ ချိတ်ဆက်ပြီးဝင်လာတာပါ။ စစ်ကြောင်းရောက်တာကတော့ ၁ လနီးပါး ရှိနေပြီ။ ဝက်မှေး၊ ကံတောမှာတော့ စစ်ကူဆိုပြီးပို့လိုက်တာ ၁၀ ရက်ကျော်ခန့် ရှိနေပြီလို့ သိရတယ်”လို့ ဆိုပါတယ်။

ဘက်ပြောင်းလာချိန် ကျည်ဘောက် ၂ ခု၊ ကျည်တောင့် ၁၈၀ ယူလာပြီး ဒေသခံကာကွယ်ရေးတပ်ဖွဲ့ဝင်တွေနဲ့အတူ စစ်ကော်မရှင်ကိုဆက်လက်တော်လှန်သွားမယ်လို့ ပြောဆိုကြောင်း ဆားလင်းကြီးမြို့နယ်ပြည်သူ့ကာကွယ်ရေးရဲ့ပြောရေးဆိုခွင့်ရှိသူက ဆိုပါတယ်။

၂၀၂၁၊ စစ်အာဏာသိမ်းချိန်ကနေ လက်ရှိအချိန်ထိ ဆားလင်းကြီး ပကဖဆီကို ဘက်ပြောင်းလာတဲ့ စစ်သားနဲ့ရဲ စုစုပေါင်း ၂၀ ဦးရှိပြီလို့ သိရပါတယ်။

အလားတူ နိုဝင်ဘာ ၁ ရက်နဲ့ နိုဝင်ဘာ ၆ ရက်မှာလည်း ပေါက်မြို့နယ်အတွင်းရောက်နေတဲ့ စစ်ကော်မရှင်စစ်ကြောင်းကနေ တပ်သား ၃ ဦးဘက်ပြောင်းလာခဲ့တယ်လို့ ပေါက်မြို့နယ် ပြည်သူ့ကာကွယ်ရေးအဖွဲ့တာဝန်ရှိသူက ပြောပါတယ်။

“ဒီတိုင်းတွေ့တာပါ ကျနော်တို့ မြို့နယ် ပကဖ မှာ ၃ ယောက်ရှိပါပြီ၊ အလင်းဝင်ထားတဲ့သူတွေကို ဖမ်းဆီးချုပ်နှောင်ခြင်းမရှိဘဲ စောင့်ကြည့်ပုံစံမျိုးနဲ့ ကောင်းကောင်းမွန်မွန် ကျွေးမွေးအနားယူခိုင်းထားပါတယ်ခင်ဗျ။ စိတ်ချရတဲ့အချိန်တခုရောက်ရင်တော့ သူတို့ဆန္ဒအတိုင်းလုပ်ပေးနိုင် မလုပ်ပေးနိုင်တာကို တိုင်ပင်ပြီးဆက်လက်လုပ်ဆောင်ပေးမှာပါ” လို့ ဆိုပါတယ်။

နိုဝင်ဘာ ၁ ရက်မှာ ခမရ ၁၀၉ လက်အောက်ခံ တပ်သား ၁ ဦးနဲ့ ခမရ ၄၁၉ လက်အောက်ခံတပ်သား ၁ ဦးတို့ဟာ လက်နက်ခဲယမ်းတွေနဲ့ စစ်ကြောင်းကနေထွက်ပြေးပြီးဘက်ပြောင်းလာခဲ့ကြတယ်လို့ ဆိုပါတယ်။

ထွက်ပြေးလာစဥ် ၎င်းတို့မှာ RPG ၁ လက်၊ အဖူး ၄ ဖူး၊ MA 4 ၁ လက်၊ ၄၀ မမ ၁၂ လုံး၊ လက်ပစ်ဗုံး ၂ လုံး၊ ၅.၅၆ ကျည် ၁၀၀ ထောင့် G3 ကျည် ၁၉ ထောင့်ပါ ယူဆောင်လာခဲ့တယ်လို့ သိရပါတယ်။

ဒါ့အပြင် နိုဝင်ဘာ ၆ ရက်မှာလည်း ခမရ ၁၄ က စစ်ကော်မရှင်တပ်သား ၁ ဦး၊ MA 1 ၁ လက်၊ ကျည်ဘောက် ၃ ဘောက်၊ 5.56 ကျည် ၁၀၀၊ အီနာဂါ ၁ လုံး၊ လက်ပစ် ၁ လုံးနဲ့ RPG ၁ ဖူးနဲ့အတူ ဘက်ပြောင်းလာခဲ့တာလို့ ပေါက်မြို့နယ် ပြည်သူ့ကာကွယ်ရေးအဖွဲ့တာဝန်ရှိသူ ကပြောပါတယ်။

“သူက စစ်ကြောင်းအတွင်းကနေထွက်ပြေးလာပြီး ကျနော်တို့ နယ်မြေခံ ပကဖ တွေက တွေ့ရှိခဲ့တာပါ။ တွေ့တွေ့ချင်းမှာလည်း သူက ကျနော်တို့ဘက်ကို အလင်းဝင်ဖို့ ပြေးလာတာပါလို့ ပြောပါတယ်”လို့ ဆိုပါတယ်။

ပေါက်မြို့နယ်ထဲကကျေးရွာတွေမှာ စစ်ကော်မရှင်တပ်က ဆက်တိုက်ဆိုသလိုစစ်ကြောင်းထိုးနေပြီး ဒေသခံတွေအနေနဲ့လည်း လေကြောင်းနဲ့ လက်နက်ကြီးအန္တရာယ်ကို သတိထားကြဖို့ ပေါက်မြို့နယ်ပြည်သူ့ကာကွယ်ရေးအဖွဲ့က သတိပေးထားပါတယ်။

စာတည်း – လင်း

ဟယ်သာ၊ အောင်စိုး

မြိုင်၊ နိုဝင်ဘာ ၆၊ ၂၀၂၅။

မကွေးတိုင်း၊ မြိုင်မြို့နယ်နဲ့ ထီးလင်းမြို့နယ်ထဲကို နိုဝင်ဘာ ၆ ရက်ဒီမနက်ပိုင်းမှာ စစ်ကော်မရှင်တပ်က လေကြောင်းကနေ ဗုံးကြဲတိုက်ခိုက်ခဲ့တယ်လို့ ဒေသခံတွေဆီက သိရပါတယ်။

မြိုင်မြို့နယ်၊ နှမ်းဆီကန်ရွာအနီးတဝိုက်ကို ဒီမနက် ၇ နာရီဝန်းကျင်မှာ ဂျက်ဖိုက်တာနဲ့ ပါရာမော်တာတွေပေါ်ကနေ စုစုပေါင်းဗုံး ၉ လုံးကြဲချတိုက်ခိုက်ခဲ့တယ်လို့ ဆိုပါတယ်။

“လေကြောင်းကတော့ စစ်ကြောင်းတွေအရွေ့မှာ သူတို့ရဲ့ထုံးစံအတိုင်း လေယာဉ်ပစ်ကူတွေပါ တွဲပါလာပြီးတော့ အရပ်သားပစ်မှတ်တွေကို အဓိကထားပြီးတော့ကြဲချနေတဲ့ သဘောမျိုးပါပဲ။ ထိခိုက်ဒဏ်ရာရတယ်လို့တော့မရှိဘူး၊ တောဘက်တွေမှာကျတယ်။”လို့ဒေသခံတဦးက ပြောပါတယ်။

နှမ်းဆီကန်ရွာထဲမှာ တွင်းမရွာကနေလာတဲ့ အင်အား ၂၀၀ နီးပါးပါစစ်ကြောင်းကဝင်ရောက်တပ်စွဲနေတာကြောင့် အနီးတဝိုက်ကိုပစ်ကူပေးနေတဲ့သဘောဖြစ်နိုင်တယ်လို့ အထက်ပါဒေသခံက ခန့်မှန်းပါတယ်။

အဆိုပါစစ်ကြောင်းဟာ နိုဝင်ဘာ ၅ ရက်မှာလည်း နှမ်းဆီကန်ရွာထဲက နေအိမ်တွေကို မီးရှို့ဖျက်ဆီးခဲ့ပြီး စစ်ကြောင်းရှိနေသေးတာကြောင့် ပျက်စီးမှုအခြေအနေကို မသိရသေးဘူးလို့ ဆိုပါတယ်။

“အရင်းအမြစ်ကတော့ တပ်မ ၁၀၁ ကလာခဲ့တာပေါ့။ ညောင်ဂျစ်ပင် ရောက်တယ်ဆို လက်ရင်းဂိတ်ရှိတဲ့တွေကပြန်လိုက်လာလိုက် အဲ့ကနေမှ တွင်းမရောက်တယ်။ တွင်းမကတွေက ပြန်လိုက်လာလိုက်။ အဲ့လိုပေါ့ တွင်းမရွာထဲကထွက်လာတယ် နှမ်းဆီကန်ရွာကိုရောက်တယ်။ ပြည်သူ့အိမ်တွေလဲမီးရှို့တယ်လို့သိရတယ် ဘယ်နှအိမ်ရှို့လဲဆိုတာတော့ သေချာမသိရဘူး “လို့ ဆိုပါတယ်။

အိမ်ခြေ ၂၈၀ ခန့်ရှိတဲ့ နှမ်းဆီကန်ရွာဟာ ပျူစောထီးအားကောင်းတဲ့ သရက်ကန်နဲ့ တွင်းမရွာကြားမှာရှိပြီး ဒေသခံတွေကတော့ ၂၀၂၃ နှစ်ကုန်ပိုင်းကတည်းက စစ်ရှောင်နေကြရပြီး လက်ရှိထပ်ဝင်နေတဲ့ စစ်ကြောင်းကြောင့်လည်း နှမ်းဆီကန်၊ မြေရင့်၊ သာစည်၊ စိုကန်စတဲ့ ကျေးရွာက ရေရှည်စစ်ရှောင် ၅၀၀ ဝန်းကျင်လည်း နေရာထပ်မံရွေ့ပြောင်းနေရတယ်လို့ ဆိုပါတယ်။

ဒါ့အပြင် ဒေသခံကာကွယ်ရေးတပ်တွေနဲ့လည်းတိုက်ပွဲဖြစ်နေပြီး အသေးစိတ်အခြေအနေကိုတော့ မသိရဘူးလို့ အထက်ပါဒေသခံက ပြောပါတယ်။

အလားတူ နိုဝင်ဘာ ၅ ရက် ည ၁၀ နာရီကျော်မှာလည်း ထီးလင်းမြို့နယ်မြောက်ပိုင်းရှိ ပုံညာတောင်တန်းကို စစ်ကော်မရှင်တပ်က တိုက်ခိုက်ရေးလေယာဥ် ၁ စီးနဲ့ ဗုံးသီး ၂ လုံး ကြဲချတိုက်ခိုက်ခဲ့ကာ ထိခိုက်မှုတွေတော့မရှိခဲ့ဘူးလို့ ဒေသခံအမျိုးသားတဦးက ပြောပါတယ်။

စစ်ကော်မရှင်တပ်တွေဟာ မကွေးတိုင်းအတွင်းကကျေးရွာတွေကို အောက်တိုဘာနဲ့ နိုဝင်ဘာ ပထမပတ်အတွင်း စစ်ကြောင်းထိုးမီးရှို့တာအပြင် အရပ်သားတွေနေထိုင်တဲ့နေရာတွေကိုပါ မကြာခဏလေကြောင်းကနေဗုံးကြဲတိုက်ခိုက်နေတာကြောင့် ဒေသခံထိခိုက် သေဆုံးမှုတွေလည်း ရှိနေပါတယ်။