နန်းခမ်း 
မြိုင်၊ မေ ၅၊ ၂၀၂၃။
မကွေးတိုင်း၊ မြိုင်မြို့နယ်၊ မန်ကျည်းလေးပင်ရွာက နေအိမ်တွေကို ပျူစောထီးအဖွဲ့က မေလ ၅ ရက် ဒီမနက် ၁၀ နာရီခွဲလောက်မှာ မီးရှို့သွားတယ်လို့ ဒေသခံတွေဆီက သိရပါတယ်။
ကန်နီရွာကပျူစောထီးတပ်ဖွဲ့ဟာ သူတို့ရွာနဲ့ ၁ မိုင်နီးပါးဝေးတဲ့ မန်ကျည်းလေးပင်ရွာထဲကို ဒီမနက်ပိုင်းမှာ ပစ်ခတ်ဝင်ရောက်လာပြီး မီးရှို့ခဲ့ရာ ပစ်ခတ်မှုကြောင့်လည်း ကလေးငယ်တဦးနဲ့ မိခင်ဖြစ်သူတို့ ကျည်ရှပ်ထိဒဏ်ရာရရှိခဲ့တယ်လို့ နွေဦးတော်လှန်ရေး မြိုင်မြို့ကတာဝန်ရှိသူ အမျိုးသမီးတဦးက ပြောပါတယ်။
“ဖမ်းဆီးခံရတဲ့ပြည်သူတွေတော့ မရှိပါဘူး။ သားအမိနှစ်ယောက်ကတော့ လက်နက်အစ ထိမှန်သွားတာတော့ ရှိတယ်။ ရွာထဲကို မီးလာရှို့တာက ပျူတွေပဲ အင်အားဘယ်လောက်နဲ့ ဝင်လာလဲမသိရသေးဘူး” လို့ ပြောပါတယ်။
ကနဦးသိရှိထားချက်အရ အိမ် ၁၅ လုံး၊ နွားစာတဲ ၂ လုံး၊ သနပ်ခါးခြံ ၄ ခြံ မီးလောင်ပြာကျခဲ့ပြီး နောက်ဆက်တွဲအခြေအနေတွေကိုတော့ မြေလတ်အသံက ဆက်လက်စုံစမ်းနေဆဲပါ။
အခုလက်ရှိမှာ ပျူစောထီးတွေက ရွာကနေပြန်လည်ထွက်ခွာသွားပေမဲ့လည်း ဒေသခံတွေကတော့ ကျေးရွာထဲကို ပြန်လည်နေထိုင်ခြင်းမရှိသေးပါဘူး။
အိမ်ခြေ ၂၀၀ ဝန်းကျင်ရှိတဲ့ မန်ကျည်းလေးပင်ရွာဟာ အခုတကြိမ်နဲ့ဆိုရင် မီးရှို့ခံရတာ ၃ ကြိမ်မြောက် ရှိပြီး၊ ၂၀၂၂ ခုနှစ်၊ ဇွန်လ ၁၃ ရက်မှာ နေအိမ် ၁၁ လုံးနဲ့ ဒီဇင်ဘာ ၂၉ ရက်မှာ နေအိမ် ၄၂ လုံး မီးရှို့ဖျက်စီးခံခဲ့ရတာလည်း ဖြစ်ပါတယ်။
စာတည်း – လင်း