ကျော်ကြီး 
မုံရွာ၊ နိုဝင်ဘာ ၈၊ ၂၀၂၅။
စစ်ကိုင်းတိုင်း၊ မုံရွာမြို့နယ်အပိုင်၊ မုံရွာ-မန္တလေးလမ်းပိုင်းတနေရာမှာ ဆိုင်ကယ်စီးလာတဲ့ ဒေသခံကာကွယ်ရေးတပ်ဖွဲ့ဝင် ၄ ဦး ပစ်ခံရပြီး ၃ ဦးကျဆုံးခဲ့တယ်လို့ မုံရွာအခြေစိုက်ဒေသကာကွယ်ရေးအဖွဲ့ဝင်တွေဆီက သိရပါတယ်။
နိုဝင်ဘာ ၇ ရက်ညနေ ၅ နာရီခန့်မှာ ဆိုင်ကယ် ၂ စီးနဲ့လာတဲ့ ကာကွယ်ရေးတပ်ဖွဲ့ဝင် ၄ ဦးကို Honda Fit ကားနဲ့လာတဲ့ စစ်ကော်မရှင်တပ်ဖွဲ့ဝင်တွေက လိုက်လံပစ်ခတ်ခဲ့ရာ ၁ ဦးကတော့လွတ်မြောက်ခဲ့တယ်လို့ ဆိုပါတယ်။
“သူတို့က အနောက်ဘက်ကနေ အရှေ့ဘက်ကိုလာတာ။ ကားကဒလန်မောင်းတာ။ ဖြစ်ရင်းမတ်တပ်ကိုမှ ကားလေးနဲ့လာပြီး တောက်လျှောက်လှမ်းပစ်သွားတာ။ လွတ်သွားတဲ့ကလေးတယောက်ကို လိုက်ပစ်ရင်းပြည်သူတယောက်ထိတာ။”လို့ မုံရွာအခြေစိုက်ဒေသကာကွယ်ရေးအဖွဲ့ဝင်တဦးက ပြောပါတယ်။
သေဆုံးသွားသူ ၃ ဦးဟာ ယင်းမာပင်ခရိုင်အခြေစိုက်တပ်ရင်းတွေက ဒေသခံကာကွယ်ရေးတပ်ဖွဲ့ဝင်တွေဖြစ်တယ်လို့ အထက်ပါကာကွယ်ရေးတပ်ဖွဲ့ဝင်ကအတည်ပြုပြီး သက်ဆိုင်ရာအဖွဲ့အစည်းတွေဘက်ကတော့ ထုတ်ပြန်ကြေညာတာမရှိသေးပါဘူး။
အလောင်းတွေကိုတော့ နိုဝင်ဘာ ၈ ရက် ဒီမနက်ပိုင်းမှ နီးစပ်ရာတော်လှန်ရေးတပ်ဖွဲ့တခုက ကောက်ယူပြီး သင်္ဂြိုဟ်ဖို့ပြင်ဆင်နေတယ်လို့ သိရပါတယ်။
ဒါ့အပြင် ပစ်ခတ်မှုအတွင်း ကျည်ထိမှန်ခဲ့တဲ့ လမ်းသွားလမ်းလာ အသက် ၄၀ အရွယ် ဒေသခံအမျိုးသားကိုတော့ မိသားစုတွေက မုံရွာဆေးရုံမှာ ဆေးကုသနေတယ်လို့ သိရပါတယ်။
ပြီးခဲ့တဲ့ စက်တင်ဘာ ၁၅ ရက်ည ၉ နာရီကျော်ကလည်း စစ်ကော်မရှင်တပ်တွေအထိုင်ချထားတဲ့ ရွှေတောင်ဦး စခန်းကုန်းကနေပစ်ခတ်တဲ့ လက်နက်ကြီးဟာ မုံရွာမြို့နယ်၊ ညောင်ပင်စောင့်ရွာ လက်ဖက်ရည်ဆိုင်အနီးက ကားပေါ်ကို ကျရောက်ပေါက်ကွဲပြီး သက်ကြီးပိုင်းအမျိုးသား ၁ ဦးသေဆုံးခဲ့ပါသေးတယ်။
စာတည်း – လင်း