လှူဒါန်း

မြေလတ်အသံ၊ မတ် ၂၉၊ ၂၀၂၅။

သရုပ်ဆောင်ပိုင်ဖြိုးသုရဲ့ “အကယ်ဒမီရုပ်” ကမ်ပိန်းမှ ရရှိထားတဲ့ ရန်ပုံငွေထဲက ကျပ်သိန်း ၅၀၀ လှူဒါန်းသွားမယ်လို့ Artists’ Shelter Facebook စာမျက်နှာ ဖော်ပြလာပါတယ်။

မတ် ၂၈ ရက် မနေ့ နေ့လယ်မှာ စစ်ကိုင်းမြို့ အနောက်မြောက်ဖက်ကို ဗဟိုပြုပြီး အင်အား ၇.၇ ပမာဏရှိ အင်အားပြင်းထန်မြေငလျင် ဖြစ်ပေါ်ခဲ့ကာ အဆိုပါ ငလျင်ဘေးဒဏ်ကြောင့် အခက်အခဲဖြစ်ပေါ်နေတဲ့ ဒေသတွေကို ပေးပို့ကူညီသွားဖို့ စီစဉ်နေတယ်လို့ Artists’ Shelter Facebook က ဖော်ပြပါတယ်။

အဆိုပါ အကယ်ဒမီရုပ် ကမ်ပိန်းကို ယခုနှစ် ဖေဖော်ဝါရီ ၁ ရက်ကနေ ၂၀ ရက်အထိ ရက်ပေါင်း ၂၀ ကြာ ပြုလုပ်ခဲ့ဖြစ်ပြီး ရည်မှန်းထားတဲ့ ပမာဏထက် ကျော်လွန်ကာ (၂၆၅%) ထိ ကောက်ခံရရှိခဲ့ပြီး စုစုပေါင်း ခန့်မှန်း အမေရိကန်ဒေါ်လာ ၂၈၇,၂၂၆ (နှစ်သိန်းရှစ်သောင်းခုနှစ်ထောင်နှစ်ရာနှစ်ဆယ့်ခြောက် ဒေါ်လာ) ရရှိခဲ့တာပါ။ ကမ်ပိန်းကောက်ခံရရှိတဲ့ ရန်ပုံငွေတွေကို မြန်မာနိုင်ငံအတွင်းက စစ်ဘေးရှောင်ဒေသတွေနဲ့ အခြားလိုအပ်တဲ့နေရာတွေကို ပေးပို့လှူဒါန်းရန်အတွက် စတင်လုပ်ဆောင်နေပြီဖြစ်ပြီးတော့ လက်ရှိ ငလျင်ဒဏ်ခံရတဲ့ဒေသတွေကိုလည်း ကူညီဖို့စီစဉ်နေတာပါ။

အဆိုပါကမ်ပိန်းမှာ တွယ်ချိတ်နားကပ် ၃ စုံ၊ ပိုင်ဖြိုးသု လက်မှတ်ပုံစံ ဆွဲကြိုး ၁ ကုံးနဲ့ သရုပ်ဆောင်ပိုင်ဖြိုးသုရဲ့ ရွှေ ၁ ကျပ်သားပါ အကယ်ဒမီရွှေစင်ရုပ်တို့ ပါဝင်မဲဖောက်ပေးခဲ့တာ ဖြစ်ပြီး ပထမဆု ရွှေ ၁ ကျပ်သားပါ အကယ်ဒမီရွှေစင်ရုပ်ကို ဂျပန်နိုင်ငံ၊ ဟီရိုရှီးမားခရိုင်၊ အိုနိုမိချီ မှ ကယန်းတိုင်းရင်းသား ဂျိုးစက်ဂျိမ်းက ရရှိခဲ့တာဖြစ်ပါတယ်။

ငလျင်ကြောင့် စစ်ကိုင်း၊ မန္တလေး၊ နေပြည်တော်၊ ပဲခူးမြို့တို့မှာ လူသေဆုံးမှုနဲ့ အဆောက်အဦ ထိခိုက်ပျက်စီးမှုများခဲ့ပြီး နိုင်ငံတဝန်း ငလျင်ဘေးဒဏ်ကြောင့် သေဆုံးခဲ့ရသူစုစုပေါင်း ၁,၆၄၄ ဦးနဲ့ ဒဏ်ရာရရှိသူစုစုပေါင်း ၃,၄၀၈ ဦးရှိပြီး ၁၃၉ ဦးပျောက်ဆုံးတယ်လို့ စစ်ကောင်စီက မတ် ၂၉ ရက် ညပိုင်းမှာ ထုတ်ပြန်ထားပါတယ်။

စစ်ကိုင်း၊ မေ ၂၇၊ ၂၀၂၃။

စစ်ကိုင်းတိုင်း၊ ယင်းမာပင်ခရိုင်၊ ပုလဲမြို့နယ်၊ နှောကန်ကျေးရွာက မီးဘေးသင့်ပြည်သူတွေဆီ အလှူရှင်ပြည်သူတွေကလှူဒါန်းထားတဲ့ပစ္စည်းတွေကို မေလ ၂၆ ရက်နေ့က သွားရောက်ပေးအပ်ခဲ့တယ်လို့ ပုလဲမြို့ပြည်သူ့အုပ်ချုပ်ရေးအဖွဲ့ထံကသိရပါတယ်။

မီးဘေးသင့်ပြည်သူတွေအတွက် သိန်း ၄၀ခန့်တန်ဖိုးရှိ ဆန် ၊ ဆီ ၊ အဝတ်အထည် ၊ ကျောင်းသုံးဗလာစာအုပ် ၊ တာပေါ်လင်မိုးကာစ စတဲ့ပစ္စည်းတွေလှူဒါန်းပေးခဲ့တာဖြစ်ပြီး အလှူရှင်တွေကိုယ်စား ပုလဲမြို့ နယ်ပအဖခေါင်းဆောင်နဲ့အဖွဲ့ဝင်များ၊ လူသားချင်းစာနာမှုကူညီရေးတာဝန်ခံတို့က သွားရောက်လှူဒါန်းပေးခဲ့တာလို့ ဆိုပါတယ်။

“ကျနော်က နှောကန်ရွာမီးရှို့ဒဏ်ခံခဲ့ရတဲ့ပြည်သူတယောက်ပါ။ ရွာကို စစ်**တွေလာပြီးတော့ တရွာလုံး နီးပါးပြာကျအောင်မီးရှို့သွားခဲ့တာ။ပုလဲမြို့နယ်ပအဖ၊ပကဖနဲ့အလှူရှင်တွေကဝိုင်းဝန်း ကူညီလှူဒါန်းပေး ထားလို့ လောလောဆယ်ကျနော်တို့စားဝတ်နေရေးအဆင်ပြေနေပါတယ်” လို့ မီးဘေးသင့်ရွာခံ အမျိုးသားတဦးကပြောပါတယ်။

နှောကန်ကျေးရွာမှာ အိမ်ထောင်စု ၁၃၆ စုရှိပြီး ဧပြီလ ၂ ရက်၊ နေ့လည်ပိုင်းမှာ စစ်ကောင်စီတပ်ဖွဲ့ဝင်တွေက မီးရှို့ဖျက်စီးခဲ့လို့ အိမ်ထောင်စု ၁၀၄ စု မီးဘေးသင့်ခဲ့ရတာဖြစ်ကာ ဧပြီလ ၂၄ ရက်နဲ့ မေလ ၁၂ ရက်နေ့တွေမှာလည်း ၂ ကြိမ်သွားရောက်လှူဒါန်းပေးထားတယ်လို့ သိရပါတယ်။

မေလ ၁၂ ရက်နေ့မှာဘဲ ပုလဲမြို့နယ်အတွင်း မီးဘေးသင့်တဲ့ရွာတွေဖြစ်တဲ့ မင်းတိုင်ပင် ၊ နှောရိုး ၊ ကိုင်းတွင်း ၊ တုံးကန် ၊နွယ်အင်း ကျေးရွာတွေအတွက် အမျိုးသားညီညွတ်ရေးအစိုးရ NUG လက်အောက်ခံ လူသားချင်းစာနာထောက်ထားခြင်းနဲ့ဘေးအန္တရာယ်ဆိုင်ရာစီမံခန့်ခွဲရေးဝန်ကြီးဌာနတို့က တရွာကို ၄ သိန်းကျပ်နှုန်း ထောက်ပံ့ပေးခဲ့တယ်လို့သိရပါတယ်။

စာတည်း – ရင်ငြိမ်း

စစ်ကိုင်း၊ မေ ၁၀၊ ၂၀၂၃။

စစ်ကိုင်းတိုင်း၊ ယင်းမာပင်ခရိုင်၊ ယင်းမာပင်မြို့နယ်အတွင်းမှာ စစ်ကောင်စီတပ်ရဲ့ မီးရှို့ဖျက်ဆီးတာကို ခံခဲ့ရတဲ့ကျေးရွာက အသက်ကြီး အဘိုး၊ အဘွားတွေအတွက် အညာပစ်တိုင်းထောင်လေးများအဖွဲ့က ပုဆိုးနဲ့ ထမီတွေကို မေလ ၉ ရက်မှာ လှူဒါန်းခဲ့ပါတယ်။

မီးရှို့ခံခဲ့ရတဲ့ ကျေးရွာက အဘိုး၊ အဘွား ၁၁၇ ဦးကို လုံချည် တယောက်တထည် ဂါရဝပြုလှူဒါန်းခဲ့တယ်လို့ အညာပစ်တိုင်းထောင်လေးများအဖွဲ့မှ မဖူးပွင့်ဝေက ဆိုပါတယ်။

စာတည်း – လင်းဇေ

စစ်ကိုင်း၊ ဧပြီ ၇၊ ၂၀၂၃။

စစ်ကိုင်းတိုင်းထဲက မီးဘေးသင့်ပြီး နေစရာအိမ်မရှိတော့တဲ့ ပြည်သူတွေအတွက် အိမ်လှူဒါန်းနေတာ ဒီကနေ့ဆို အလုံးရေ ၆၀၀ ပြည့်သွားပြီလို့ သိရပါတယ်။

ပြီးခဲ့တဲ့နှစ် ဒီဇင်ဘာလထဲက လှူတန်းနေတာဖြစ်ပြီး အိမ်အလုံးရေ ၁၀၀၀ ဆောက်လုပ်ဖို့ ရည်ရွယ်ထားကာ အခုဆိုရင် အရာတော်၊ ဒီပဲယင်း၊ ရွှေဘို၊ ရေဦး ၄ မြို့နယ်မှာ အိမ်အလုံးရေ ၆၀၀ ဆောက်နိုင်ခဲ့ပြီလို့ ဆိုပါတယ်။

“တအိမ်ကို ၂ ခန်းပါလို့ လူ ၅ ယောက်ကတော့ ကျယ်ကျယ်ဝန်းဝန်း နေလို့ရတယ်။ မိသားစုဦးရေကိုကြည့်ပြီး ၃ ခန်းမှလောက်တယ်ဆို ၁ ခန်းကတော့ သူတို့စိုက်ပေါ့။ ကျတော်တို့ကတော့ အခန်း၂ ခန်းနဲ့ အိမ်တလုံး အခမဲ့ဆောက်ပေးတယ်။” လို့ S&C တာဝန်ခံက ပြောပါတယ်။

အိမ်တလုံးကို ဆောက်လုပ်စက ၂ သိန်းကုန်ကျပေမယ့် အခုနောက်ပိုင်းမှာတော့ ဝါးဈေးတွေတက်လာတဲ့အပြင် လမ်းခရီးစရိတ်နဲ့ ကုန်ဈေးနှုန်းတက်လာတာတွေကြောင့် ၂ သိန်း ၃ သောင်းထိ ကုန်ကျလာတယ်လို့ ဆိုပါတယ်။

အိမ်အမိုးအဖြစ်သုံးတဲ့ ထန်းလက်ရှားပါးမှု အခက်ခဲလည်း ကြုံနေရကာ ရပ်ဝေးက ရွာတွေအထိပါ သွားရောက်ခုတ်ယူနေရတဲ့အတွက် အချိန်ကြာပြီး အိမ်ဆောက်လုပ်မှုမှာတော့ ကြန့်ကြာသွားတယ်လို့လည်း သူကဆက်ပြောပါတယ်။

ဒါ့အပြင် သင်္ကြန်တွင်းမှာလည်း အဆိုပါမြို့နယ်ထဲက အသက် ၇၀ ကနေ ၁၀၀ ကျော်ရှိတဲ့ အဖိုးဖွားတွေအတွက် သက်ကြီးပူဇော်ပွဲတွေ ကျင်းပဖို့စီစဉ်နေပြီး အသက် ၁၀၀ ကျော် အဖိုးဖွားကတော့ ၆ ဦးလောက် ပါဝင်တယ်လို့လည်း သိရပါတယ်။

စာတည်း – 007

ဆားလင်းကြီး၊ ဧပြီ ၄၊ ၂၀၂၃။

စစ်ကိုင်းတိုင်း၊ ဆားလင်းကြီးမြို့နယ်ထဲက မီးဘေးသင့်ပြည်သူတွေကို ဧပြီလ ၄ ရက် ဒီကနေ့ နေ့လယ်စာအတွက် အညာပစ်တိုင်းထောင်လေးများအဖွဲ့ကဦးဆောင်ပြီး ခေါက်ဆွဲကြော်လှူဒါန်းခဲ့ကြတယ်လို့ သိရပါတယ်။

အိမ်ထောင်စု ၁၂၈ စုက ဒေသခံတွေကို ၁ ဦးလျှင် ၁ ဗူးနူန်းနဲ့ ဗူး ၆၀၀ ကို Mi Mi Lay Lin Family (Australia )ရဲ့ကူညီမှုနဲ့ လှူဒါန်းခဲ့တာလို့ အညာပစ်တိုင်းထောင်လေးများ အဖွဲ့တာဝန်ရှိသူတဦးက ပြောပါတယ်။

အညာပစ်တိုင်းထောင်လေးများအဖွဲ့ဟာ အဟာရကျွေးမွေးလှူဒါန်းတာတွေအပြင် မီးဘေးသင့်ပြည်သူတွေကို မီးဖိုဆောင်သုံးပစ္စည်းတွေ၊ ဆန်နဲ့ဆီတွေကိုလည်း အလှူရှင်တွေကိုယ်စား လှူဒါန်းပေးနေတာလည်းဖြစ်ပါတယ်။

စာတည်း – ရင်ငြိမ်း