ဆားလင်းကြီး၊ စက်တင်ဘာ ၂၁၊ ၂၀၂၅။

စစ်ကိုင်းတိုင်း၊ ဆားလင်းကြီးမြို့နယ်ထဲက ကျေးရွာ ၆ ရွာမှာ စစ်ကော်မရှင်ကပြုလုပ်မယ့် ရွေးကောက်ပွဲကို ဆန့်ကျင်တဲ့လှုပ်ရှာမှုတခုဖြစ်တဲ့ ဆိုင်ကယ်သပိတ်ကို ပြုလုပ်ခဲ့တယ်လို့ ဆားလင်းကြီးမြို့နယ် သပိတ်အင်အားစုဆီက သိရပါတယ်။

စက်တင်ဘာ ၂၀ ရက် နေ့လယ်ပိုင်းကစပြီး ဆားလင်းကြီးမြို့နယ်သပိတ်အင်အားစု၊ ယင်းမာပင်မြို့နယ်သပိတ်အင်အားစု၊ မုံရွာပင်မလူထုသပိတ်တိုက်ပွဲဦးဆောင်ကော်မတီ၊ တကသကျောင်းသားဟောင်းများအင်အားစု ရန်ကုန်နဲ့ ဒဂုံတက္ကသိုလ်ကျောင်းသားများသမဂ္ဂတို့ ပူးပေါင်းပြီး ဆိုင်ကယ်အစီးရေ ၄၀ ကျော် လူအင်အား ၇၀ ခန့်နဲ့ ကျေးရွာတွေကို လှည့်လည်ကာ သပိတ်ပြုလုပ်ခဲ့တာလို့ဆိုပါတယ်။

“သပိတ်ကော်မတီရဲ့ သဘောထားကတော့ ရှင်းပါတယ် အတုအယောင်ရွေးကောက်ပွဲကို တရားဝင်မှုအားလျော့အောင် ရတဲ့ပုံစံနဲ့ လုပ်ကြဖို့ပါပဲ။ ပြည်သူတွေကို ဘာပြောချင်လဲဆိုတော့ ကျွန်တော်တို့နဲဲ့အတူ အတုအယောင်ရွေးကောက်ပွဲ ဆန့်ကျင်ရေးလှုပ်ရှားမှုတွေမှာ ပါဝင်ကြဖို့ပါပဲ”လို့ ဆားလင်းကြီးမြို့နယ်သပိတ်အင်အားစု ကော်မတီဝင်တဦးက ပြောပါတယ်။

ပြည်သူတွေအနေနဲ့ လက်ရှိအချိန်မှာ ဒုက္ခပေါင်းစုံနဲ့ ကြုံတွေ့နေကြရပြီး ဒီဒုက္ခတွေ ချုပ်ငြိမ်းဖို့အတွက် တသံတည်းညီ တချီတည်းရုန်းပြီး စစ်အာဏာရှင်ကို ဖြုတ်ချကြပါစို့လို့ တိုက်တွန်းလိုတယ်လို့ အထက်ပါ ကော်မတီဝင်က ဆက်ပြောပါတယ်။

ကျေးရွာတွေကိုလှည့်လည်ပြီး သပိတ်ပြုလုပ်ချိန် လူထုရဲအသက်စည်းစိမ်ဥစ္စာတွေကို ဖျက်ဆီးဖို့အတွက် စစ်ကော်မရှင်အနေနဲ့ ထွက်ပေါက်ဖြစ်တဲ့ တရားမဝင်အတုအယောင်ရွေးကောက်ပွဲကို ပြုလုပ်ဖို့ကြိုးစားနေတာဖြစ်ပြီး ဒီရွေးကောက်ပွဲကို ဆန့်ကျင်ကြဖို့ တိုက်တွန်းနှိုးဆော်ခဲ့တယ်လို့ ဆိုပါတယ်။

သပိတ်အဖွဲ့တွေ ကျေးရွာတွေကိုရောက်လာချိန်မှာ ကျေးရွာနေပြည်သူတွေကလည်း ရွေးကောက်ပွဲကို အလိုမရှိကြောင်း ကြွေးကြော်ခဲ့ကြတယ်လို့ သိရပါတယ်။

ဆားလင်းကြီး၊ စက်တင်ဘာ ၂၀၊ ၂၀၂၅။

စစ်ကိုင်းတိုင်း၊ ဆားလင်းကြီးမြို့၊ မီးသတ်ရုံးနားမှာ ဘေးတွဲဆိုင်ကယ်စီးလာတဲ့ မြေးအဖိုး ၃ ဦး ပစ်ခတ်ခံရပြီး ၂ ဦးသေ၊ ၁ ဦးဒဏ်ရာရတယ်လို့ ဒေသခံတွေထံက သိရပါတယ်။

ပစ်သတ်ခံရသူတွေက သိမ်တော်ကျေးရွာနေ အသက် ၈၀ ကျော်အရွယ် ဦးဘဌေး၊ မြေးဖြစ်သူ အသက် ၁၆ နှစ်အရွယ် မြေးဖြစ်သူ အမျိုးသား ၂ ဦးတို့ဖြစ်ပြီး စက်တင်ဘာ ၁၉ ရက်မနက် ၁၁ နာရီကျော်ခန့်မှာ သိမ်တော်ကျေးရွာကနေ ဆားလင်းကြီးမြို့ပေါ်အသွား မီးသတ်ရုံးအနီးမှာ စစ်ကော်မရှင်တပ်သားတွေက ပစ်ခတ်ခဲ့တာလို့ဆိုပါတယ်။

“မီးသတ်ရုံးနားမှာ ဂိတ်စောင့်တဲ့အဖွဲ့ရှိတယ်။ ဆိုက်တွဲ(ဘေးတွဲဆိုင်ကယ်)နဲ့သွားတာက မြေးအဖိုး ၃ ယောက်။ အဲ့နေရာက ဂုန်းတက်ကြီး။ အမှန်တကယ် သူတို့(စစ်ကော်မရှင်တပ်သား)တွေက တားတယ်။ အိတ်ဇောအသံက ကျယ်တော့ သူတို့ခေါ်တာကိုမကြားဘဲ ဆက်မောင်းတော့ပစ်ခံရတာ။ ဘေးတွဲက အိတ်ဇောကလည်းပွင့်နေတော့ ကလေးတွေကလည်းအသံမကြားတော့ ဇွတ်မောင်းရင်းဖြစ်တာ။”လို့ ဒေသခံတဦးကပြောပါတယ်။

စစ်ကော်မရှင်တပ်သားတွေပစ်တာကြောင့် အဘိုးဖြစ်သူနဲ့မြေး ၁ ဦးတို့သေဆုံးပြီး နောက်ထပ်မြေး ၁ ဦးကတော့ ဆားလင်းကြီးဆေးရုံပေါ်မှာ ဆေးကုသမှူခံယူနေရတယ်လို့ သိရပါတယ်။

ပစ်ခတ်ခံရပြီးသေဆုံးသွားတဲ့မြေးအဖိုး ၂ ဦးရဲ့အလောင်းတွေကိုတော့မိသားစုဝင်တွေက ညနေပိုင်းမှာ ကျေးရွာကိုပြန်သယ်သွားပြီး သဂြိုဟ်လိုက်ကြတယ်လို့ ဆိုပါတယ်။

ပြီးခဲ့တဲ့ဇွန် ၂၈ ရက်ကလည်း ဆားလင်းကြီးမြို့နယ်၊ သရက်ကိုင်းရွာကို စစ်ကော်မရှင်ဘက်က လေကြောင်းကနေ ဗုံးကြဲတိုက်ခိုက်ခဲ့တာကြောင့် အမျိုးသား ၄ ဦးသေဆုံးပြီး ၃ ဦးဒဏ်ရာရခဲ့သေးတယ်လို့ သိရပါတယ်။

စာတည်း – လင်း

မြေလတ်အသံ၊ စက်တင်ဘာ ၂၀၊ ၂၀၂၅။

ပဲခူးတိုင်း၊ တောင်ငူမြို့၊ သဖန်းပင်ကျေးရွာအုပ်စု၊ အလယ်ကျွန်းရွာမှာ ဒေသခံအမျိုးသား ၅ ဦး ပေါ်တာဆွဲဖမ်းဆီးခံရပြီး ၁ ဦးက ငွေပေးပြန်လွတ်လာကာ ၄ ဦးကတော့ စစ်မှုထမ်းအတွက် ပို့ဆောင်ခံခဲ့ရတယ်လို့ ဒေသခံတွေဆီက သိရပါတယ်။

ဖမ်းဆီးခံခဲ့ရသူတွေဟာ အသက် ၂၅ နှစ်ကနေ ၃၅ နှစ်ကြားဖြစ်ပြီး စက်တင်ဘာလ ပထမပတ်အတွင်း ညနေဘက်အလုပ်ပြန်လာချိန်တွေမှာ အလယ်ကျွန်းရွာ ပျူစောထီး ကိုမျိုးနဲ့ စစ်ကော်မရှင်တပ်က ရွာထဲမှာပဲ မသင်္ကာလို့ဆိုကာဖမ်းဆီးသွားခဲ့တာလို့ ဆိုပါတယ်။

“သူ(ပျူစောထီး ကိုမျိုး)က အလယ်ကျွန်းကျေးရွာ ပျူစောထီးပေါ့နော်၊ သူက ရွာထဲကလူတွေကို ဖမ်းတယ်၊ ချက်ချင်း သိန်း ၅၀ နဲ့ အကြပ်ကိုင်ပြီးရွေးခိုင်းတယ်၊ မရွေးနိုင်ရင်တော့ တောင်ငူ တောင်ပိုင်းတိုင်းစစ်ဌာနချုပ်ကို ပို့လိုက်တယ်။ ပို့လိုက်ပြီးရင်တော့ အဲ့ဒါပြီးရင် စစ်သင်တန်းကျောင်းတွေ ရောက်ကုန်ရော။” လို့ ဖြစ်စဥ်ကိုသိရှိတဲ့ အမျိုးသားတဦးက မြေလတ်အသံကို ပြောပါတယ်။

ဖမ်းဆီးခံရသူ ၅ ဦးထဲက ၁ ဦးမှာ ကျပ်သိန်း ၅၀ ပေးပြီးရွေးခဲ့တာကြောင့် ဖမ်းဆီးခံခဲ့ရတဲ့ စက်တင်ဘာ ၄ ရက်မှာပဲ ညတွင်းချင်းပြန်လည်လွတ်မြောက်လာကာ ကျန်ဒေသခံ ၄ ဦးကတော့ လက်လုပ်လက်စား လူတန်းစားတွေဖြစ်ပြီး ပိုက်ဆံပေးမရွေးနိုင်လို့ တောင်ပိုင်းတိုင်းစစ်ဌာနချုပ်ကို ပို့ဆောင်ခံလိုက်ရတယ်ဆို့ ဆိုပါတယ်။

ဖမ်းဆီးရာမှာ ဦးဆောင်ပါဝင်တဲ့ ပျူစောထီး ကိုမျိုးနဲ့ပတ်သက်ပြီး “အလယ်ကျွန်းကျေးရွာမှာ ပျူစောထီးအင်အားက အဲ့လောက်တော့မရှိဘူး။ လက်ရှိ သူ့ကိုက ပျူစောထီးခေါင်းဆောင်ပုံစံမျိုးပေါ့ အဲ့လို မြှောက်စားထားတာတော့ စစ်တပ်ကပေါ့။ သူက ကျေးရွာအုပ်ချုပ်ရေးပိုင်းမှာလည်း မပါဘူး၊ ပြောရရင် အနေအစားချောင်လို့ပေါ့ဗျာ။ လူငယ်တွေကို သူလုပ်လို့ရတဲ့သူတွေကို လုပ်တယ်” လို့ အထက်ပါအမျိုးသားက ပြောပါတယ်။

ဒါ့အပြင် အလယ်ကျွန်းရွာ အုပ်ချုပ်ရေးမှူး စန်းဦး ဦးဆောင်ကာ ဆယ်အိမ်မှူး၊ ရာအိမ်မှူးတွေက စစ်မှုထမ်းကြေးဟုဆိုကာ လစဉ် ၂၀,၀၀၀ ကျပ် ကောက်ခံနေတာရှိပြီး အခုလို ပေါ်တာဆွဲဖမ်းဆီးခံရချိန်မှာတော့ ဘာမှမလုပ်ပေးဘူးလို့ သူက ဆက်ပြောပါတယ်။

အလယ်ကျွန်းကျေးရွာဟာ အိမ်ခြေ ၃၀၀ ခန့်နဲ့ လူဦးရေ ၈၀၀ ခန့် ရှိပြီး အများစုမှာ အခြေခံအလုပ်သမားတွေ၊ လက်သမားတွေနဲ့ တောင်ငူမြို့ပေါ်တက်ကာ အလုပ်လုပ်ကြရသူတွေဖြစ်ပြီး အမျိုးသမီးတချို့ကတော့ ဆေးလိပ်လိပ်တဲ့အလုပ်လုပ်ကြသူတွေဖြစ်တယ်လို့ ဆိုပါတယ်။

လက်ရှိမှာတော့ စစ်မှုထမ်းအတွက် ဖမ်းဆီးနေကြတာကြောင့် ဒေသခံတွေအနေနဲ့ ညဘက်တွေမှာ အပြင်မထွက်ရဲကြတော့ဘူးလို့ သိရပါတယ်။

တပ်မိသားစုဝင်တွေ လူမှုကွန်ယက်အသုံးပြုမှုကို စစ်ဆေးကြပ်မတ်ရမယ်လို့ ဆို

မြေလတ်အသံ၊ စက်တင်ဘာ ၂၀၊ ၂၀၂၅။

တပ်မတော် နာမည်ကောင်းကျန်အောင် ဝိုင်းဝန်းဆောင်ရွက်ကြဖို့နဲ့ တပ်မိသားစုဝင်တွေ လူမှုကွန်ယက်အသုံးပြုမှုကို စစ်ဆေးကြပ်မတ်ဖို့ စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင် က မှာကြားလိုက်ပါတယ် ။

စက်တင်ဘာ ၁၉ ရက်မှာ တနင်္သာရီတိုင်း၊ မြိတ်မြို့ကိုရောက်ရှိနေတဲ့ စစ်ခေါင်းဆောင်က ၎င်းရဲ့ လက်အောက် ကမ်းရိုးတန်းဒေသတိုင်းစစ်ဌာနချုပ်ရှိ စစ်ကော်မရှင်တပ်ဖွဲ့ဝင်နဲ့မိသားစုတွေနဲ့ တွေ့ဆုံရာမှာ အခုလိုတိုက်တွန်းပြောဆိုခဲ့တာပါ။

” မိမိကိုယ်ကို ကောင်းအောင်ထိန်းသိမ်းဆောင်ရွက်ပြီး တပ်မတော်သားကောင်းများပီသစွာဖြင့် နိုင်ငံတော်နှင့်တပ်မတော်အပေါ်ကောင်းမွန်အောင် ကြိုးပမ်းဆောင်ရွက်သွားကြရန်၊ တပ်မတော်အတွက် နာမည်ကောင်းကျန်အောင် အားလုံးဝိုင်းဝန်းဆောင်ရွက်သွားကြရန်မှာကြားလိုကြောင်း ” ဆိုကာ စစ်ခေါင်းဆောင် က ပြောပါတယ်။

စစ်ကော်မရှင်တပ်ဖွဲ့ဝင်တွေနဲ့ ၎င်းတို့ရဲ့မိသားစုဝင်တွေအနေနဲ့ လူမှုကွန်ယက်အသုံးပြုရာမှာ အဖွဲ့အစည်းကို ထိခိုက်စေနိုင်မှုမရှိအောင် အသုံးပြုရန်လိုကြောင်းနဲ့ လူမှုကွန်ယက်အသုံးပြုမှုကို တာဝန်ရှိသူတွေက စစ်ဆေးကြပ်မတ်ကြဖို့ လိုအပ်တယ်လို့လည်း ဆိုပါတယ်။

ဒါ့အပြင် စစ်ကော်မရှင်တပ်ဖွဲ့ဝင်တွေအနေနဲ့ အသောက်အစား၊ အပျော်အပါးနဲ့ပတ်သက်ပြီး တဦးချင်းအနေနဲ့ အသိတရားနဲ့ ထိန်းသိမ်းနေထိုင်ကြရမယ်လို့လည်း ၎င်းက ပြောပါတယ်။

ဩဂုတ် ၁ ရက်မှာ စစ်ကောင်စီကို ဖျက်သိမ်းပြီး နိုင်ငံတော်လုံခြုံရေးနဲ့အေးချမ်းသာယာရေးကော်မရှင်(နလအ) ကို ဖွဲ့စည်းကာ နလအဥက္ကဌအဖြစ် အာဏာကိုဆက်လက်ချုပ်ကိုင်ထားပြီးတဲ့နောက် ပဲခူးတိုင်း၊ မကွေးတိုင်းက ၎င်းရဲ့စစ်ကော်မရှင်တပ်ဖွဲ့ဝင်တွေကို လိုက်လံတွေ့ဆုံနေကာ လက်ရှိမှာ ကမ်းရိုးတန်းဒေသတိုင်းစစ်ဌာနချုပ်ကို ရောက်ရှိနေတာလည်း ဖြစ်ပါတယ်။