မီးလောင်

မကွေး၊ ဧပြီ ၃၊ ၂၀၂၃။

မကွေးတိုင်းဒေသကြီး၊ မင်းဘူး(စကု)မြို့နယ်၊ ခန်ကုန်းကျေးရွာမှာ လင်မယားစကားများပြီး လူကိုဓာတ်ဆီလောင်းမီးရှို့ရာမှ နေအိမ် ၃၀ ကျော် မီးလောင်ခဲ့တယ်လို့ သိရပါတယ်။

ဧပြီလ ၂ ရက်နေ့ မနက် ၁၁ နာရီခန့်မှာ ခန်ကုန်းကျေးရွာနေ ဦးဝေဖြိုးအောင်ဆိုသူမှာ ဇနီးဖြစ်သူနဲ့စကားများပြီး ကိုယ့်ကိုကိုယ် ဓာတ်ဆီလောင်းမီးရှို့ရာက နေအိမ်ကိုမီးကူးစက်လောင်ကျွမ်းပြီး အခြားနေအိမ်တွေပါ မီးလောင်သွားတယ်လို့ ဒေသခံတဦးက ပြောပါတယ်။

“လင်မယားက သူတို့အိမ်တွင်းရေးကိစ္စ စကားများကြရာကနေ အမျိုးသားက သူ့ကိုယ့်သူဓာတ်ဆီလောင်းမီးရှို့တာ။ အဲဒါကနေ သူအိမ်လည်းမီးလောင် အခြားအိမ်တွေလည်း မီးကူးကုန်တာ။ တော်တော်လေး မီးငြိမ်းလိုက်ကြရတယ်။ အိမ်တွေကော နွားတင်းကုပ်တွေကော တော်တော်များများပဲ” လို့ ပြောပါတယ်။

မီးလောင်လို့ လူနေအိမ် (၃၂) လုံး၊ နွားတင်းကုတ် (၁၁)လုံး၊ လက်တွန်းထွန်စက် (၁)စီး၊ ဆိုင်ကယ် (၁)စီးနဲ့ စပါးတင်း (၃၀၀) ကာလတန်ဖိုး ကျပ်သိန်း ၇၀၀၀ နီးပါး ပျက်စီးဆုံးရှုံးခဲ့တယ်လို့ ဆိုပါတယ်။

မီးလောင်လို့ အိမ်ထောင်စု (၃၄)စုမှ အိမ်ခြေ (၃၂)လုံး၊ လူဦးရေ (၁၄၈)ဦး မီးဘေးသင့်ခဲ့လို့ ကျေးရွာဘုန်းတော်ကြီးကျောင်းမှာ ပြောင်းရွေ့ထားရတယ်လို့ သိရပါတယ်။

ဒါ့အပြင် ကိုယ့်ကိုကိုယ် ဓာတ်ဆီလောင်းမီးရှို့သူ ဦးဝေဖြိုးအောင်ဆိုသူမှာလည်း မီးလောင်ဒဏ်ရာတွေကြောင့် မင်းဘူးဆေးရုံကို အရေးပေါ်ပို့ထားရတယ်လို့ သိရပါတယ်။

၂၀၂၂ ခုနှစ်မတ်လ ၁၁ ရက်နေ့ကလည်း ကိုင်းကြီးမကျေးရွာမှာ ဒေါ်မြင့်မြင့်သန်း နေအိမ် နွားတင်းကုပ်မှာ ဝက်စာအိုးကျိုရာမှ မီးလောင်မှုဖြစ်ပြီး နေအိမ် ၇၀ ကျော် မီးလောင်ပျက်စီးခဲ့သေးတယ်လို့ သိရပါတယ်။

စာတည်း – 007

မန္တလေး၊ မတ် ၂၇၊ ၂၀၂၃။

မန္တလေးတိုင်းဒေသကြီး၊ အောင်မြေသာစံမြို့နယ်၊ အိုးဘိုရွှေကျင်ရပ်ကွက်၊ အကွက် (၄၀)၊ ၇၆ လမ်းနဲ့ ၈ လမ်းထောင့်မှာ ဖုန်းအားသွင်းထားရာမှ နေအိမ် ၇ လုံး မီးလောင်ခဲ့တယ်လို့ သိရပါတယ်။

မတ်လ ၂၇ ရက်ဒီနေ့လယ် ၁၂ နာရီလောက်မှာ အကွက်အမှတ် ၄၀ ရှိ နေအိမ်တလုံးမှာ လူမရှိဘဲ ဖုန်းအားသွင်းထားရာမှ အပူလွန်ကဲပြီး မီးလောင်မှုဖြစ်ကာ ဘေးအိမ်တွေကိုပါ မီးကူးစက်လောင်ကျွမ်းခဲ့တယ်လို့ ဒေသခံတဦးက ပြောပါတယ်။

“သိရသလောက်က နေအိမ်မှာလူမရှိဘဲ အားသွင်းထားတယ်တဲ့။ သူတို့က မြို့ထဲအနေများတယ်။ အဲ့တော့ အားသွင်းထားရာကနေ အပူလွန်ပြီး မီးလောင်တာလို့ သိရတယ်။ မီးလောင်လို့ ၅ လုံးကတော့ လုံးဝ တိုင်လောက်ပဲ ကျန်တော့တာ။ ၂ အိမ်ကတော့ မီးနည်းနည်းစွဲသွားတာလောက်ပဲ” လို့ ပြောပါတယ်။

မီးလောင်လို့ သွပ်မိုး၊ ပျဥ်ကာ၊ အောက်အုတ်စီ ၂ ထပ်နေအိမ်တွေအပါအဝင် နေအိမ် ၇ လုံးပျက်စီးခဲ့ပြီး ကျပ်သိန်းပေါင်း ၁ ထောင်ကျော် ဆုံးရှုံးခဲ့ရတယ်လို့ ဆိုပါတယ်။

မီးလောင်ရာကို မြို့နယ်မီးသတ်တပ်ဖွဲ့ဝင်တွေ၊ ဒေသခံပြည်သူတွေက ဝိုင်းဝန်းမီးငြိမ်းသတ်ခဲ့လို့ မီးလောင်ပြီး ၁ နာရီခန့်အကြာမှာ မီးငြိမ်းသွားခဲ့တယ်လို့ သိရပါတယ်။

မတ်လ ၂၅ ရက်ည ၁၀ နာရီခန့်က အောင်မြေသာစံမြို့နယ်၊ ပြည်ကြီးကျက်သရေ အရှေ့ရပ်ကွက်၊ အကွက် ၁၆၅၊ အိမ်အမှတ် ၁၅၊ ၂၃ လမ်း၊ လမ်း ၈၀ နဲ့ ၈၁ လမ်းကြားရှိ RC သုံးထပ် အဆောက်အဦး တတိယထပ်အိပ်ခန်းမှာ ဖုန်းအားသွင်းကြိုးကတဆင့် အပူလွန်ကဲပြီး မီးလောင်ကျွမ်းခဲ့ရာ နေအိမ် ၁ လုံး မီးလောင်ပျက်စီးခဲ့သေးတယ်လို့ သိရပါတယ်။

မတ်လ ၁၀ ရက်နေ့ မနက်အစောပိုင်းကလည်း မန္တလေးတိုင်းဒေသကြီး၊ မဟာအောင်မြေမြို့နယ်၊ သံလျှက်မှော်အနောက်ရပ်ကွက်၊ လမ်း ၉၀ နဲ့ ၉၀၁ လမ်းကြား၊ ၄၁ လမ်းနဲ့ ၄၂ လမ်းကြားမှာ အသားခြောက် အကျက်ကင်ရာမှာ မီးလောင်လို့ နေအိမ် ၉ လုံး ပျက်စီးခဲ့တယ်လို့ သိရပါတယ်။

စာတည်း – လင်း

ကျောက်ဆည်၊ မတ် ၁၇၊ ၂၀၂၃။

မန္တလေးတိုင်း၊ ကျောက်ဆည်မြို့နယ်၊ ငါးဆူကျေးရွာမှာ မီးအားမြှင့်စက် အပူလွန်ကဲရာမှ နေအိမ် ၄ လုံး မီးလောင်ပျက်စီးခဲ့တယ်လို့ သိရပါတယ်။

မတ်လ ၁၇ ရက်မနက် ၈ နာရီခန့်မှာ ငါးဆူကျေးရွာနေ ဦးစိုးသန်းနေအိမ်ရှိ မီးအားမြှင့်စက်အပူလွန်ကဲပြီး မီးလောင်ရာမှာ နေအိမ်တွေကို မီးကူးစက်လောင်ကျွမ်းခဲ့တာလို့ ဒေသခံတဦးက ပြောပါတယ်။

“သူတို့အိမ်မှာက တီဗီဖွင့်တဲ့အခါသုံးတဲ့ မီးအားမြှင့်စက်ပေါ့။ အဲ့ကနေ အပူလွန်ကဲပြီး မီးစလောင်တာကနေ ဘေးအိမ်တွေပါ ကူးကုန်တာ။ အိမ်တွေက ပျဥ်ထောင်အိမ်တွေ။ အိမ်ချင်းတွေကလည်း ကပ်နေတာဆိုတော့ မီးကူးမြန်သွားတာ။ လူထိခိုက်သေဆုံးတာတော့မရှိဘူး” လို့ ပြောပါတယ်။

မီးလောင်မှုကြောင့် သွပ်မိုး၊ ပျဥ်ကာ၊ ပျဥ်ခင်းနေအိမ် ၄ လုံး မီးလောင်ပျက်စီးခဲ့ပြီး ကာလတန်ဖိုး ကျပ်သိန်း ၂၀၀ ကျော်လောက် မီးလောင်ဆုံးရှုံးသွားတယ်လို့ ဆိုပါတယ်။

မီးလောင်လို့ မီးဘေးသင့်အိမ်ထောင်စု ၄ စုက လူဦးရေ ၁၉ ဦးကို ကျေးရွာဘုန်းကြီးကျောင်းမှာ ယာယီပြောင်းရွှေ့ထားရတယ်လို့ သိရပါတယ်။

ဒါ့အပြင်ဖေဖော်ဝါရီလ ၂၀ ရက်ကလည်း ကျောက်ဆည်မြို့နယ်၊ မြောင်းဦးကျေးရွာမှာ မီးလောင်မှုဖြစ်ခဲ့လို့ လူနေအိမ် ၂၅ လုံး မီးလောင်ပျက်စီးခဲ့ပါသေးတယ်။

စာတည်း – လင်း

မြင်းမူ၊ ဖေဖော်ဝါရီ ၂၈၊ ၂၀၂၃။

စစ်ကိုင်းတိုင်း၊ မြင်းမူမြို့၊ သီဟရပ်ကွက်ရှိ ကုန်စုံဆိုင်မီးလောင်ပြီး ၁ ဦး သေဆုံးကာ ၂ ဦး ဒဏ်ရာရခဲ့တယ်လို့ သိရပါတယ်။

ဖေဖော်ဝါရီလ ၂၈ ရက် ဒီမနက် ၁ နာရီကျော်ခန့်မှာ မသန်းသန်းစိုး ကုန်စုံဆိုင်ရှိ မီးအားမြှင့်စက်ကနေ ဝါယာရှော့ဖြစ်က မီးစတင်လောင်ကျွမ်းခဲ့တာလို့ ဒေသခံတဦးက ပြောပါတယ်။

“အိမ်က ၃ ထပ်။ အောက်မှာက ကုန်စုံဆိုင်။ လူက အလယ်ထပ်မှာ အိပ်ကြတာ။ ဖြစ်တာကအောက်ထပ် ကုန်စုံရောင်းတဲ့နေရာက မီးအားမြှင့်စက်ကနေ ဝါယာရှော့ဖြစ်ပြီး လောင်တာ။ ဖြစ်တာက အောက်ဆုံးထပ်ကဆိုတော့ အလယ်ထပ်က လူတွေက ပြေးရခက်တဲ့သဘော ဖြစ်သွားတယ်။ ထိခိုက်သေဆုံးသူတွေက ဆိုင်ရှင်ရဲ့မိသားစုဝင်တွေပါဘဲ” လို့ ပြောပါတယ်။

မီးလောင်မှုကြောင့် မသန်းသန်းစိုးရဲ့မိသားစုဝင် အသက် ၄၀ ကျော် အမျိုးသမီး ၁ ဦး သေဆုံးခဲ့သလို အမျိုးသမီး ၂ ဦး ဒဏ်ရာရခဲ့ပြီး ကုန်စုံဆိုင်မီးလောင်ခဲ့တာကြောင့် ကျပ်သိန်း ၆၀၀ ကျော်ဖိုး မီးလောင် ပျက်စီးဆုံးရှုံးခဲ့တယ်လို့ ဆိုပါတယ်။

မီးလောင်ရာနေရာကို မြင်းမူမြိုနယ် မီးသတ်စခန်းမှ မီးငြိမ်းသတ်ယာဉ် ၃ စီး၊ ရေသယ်ယာဉ် ၂ စီး၊ မြို့မ အရန်မီးသတ်စခန်းမှ မီးငြိမ်းသတ်ယာဉ် ၁ စီး၊ ရေသယ်ယာဉ် ၁ စီး၊ မီးသတ်တပ်ဖွဲ့ဝင်တွေနဲ့ ရပ်ကွက်နေ ပြည်သူတွေက ဝိုင်းဝန်းမီးငြိမ်းသတ်ခဲ့လို့ မီးလောင်ပြီး ၂ နာရီခန့်အကြာမှာ မီးငြိမ်းသွားတယ်လို့ သိရပါတယ်။

၂၀၂၁ ခုနှစ်၊ ဇန်နဝါရီလ ၃ ရက်ကလည်း မြင်းမူမြို့နယ်၊ ဆပ်ပြာကျေးရွာမှာ နွားစာပုံထားတဲ့နေရာကို ကလေး ၂ ဦးက မီးယူဆော့ရာမှာ မီးလောင်မှုဖြစ်ပြီး ကလေး ၂ ဦးသေဆုံးကာ နေအိမ် ၁ လုံး မီးလောင်ပျက်စီးခဲ့ပါသေးတယ်။

မကွေး၊ ဖေဖော်ဝါရီ ၂၃၊ ၂၀၂၃။

မကွေးမြို့၊ ရွာသစ်လမ်းနဲ့ နတ်မောက်လမ်း ၁၈ လမ်းထောင့်ရှိ နေအိမ် ၁ လုံးမှာ ယနေ့ဖေဖော်ဝါရီလ ၂၃ ရက်ဒီမနက်ပိုင်းက မီးလောင်ပြီး အသက် ၈၀ ခန့် အဘွားတဦး မီးလောင်သေဆုံးခဲ့တယ်လို့ မကွေးမြို့ခံတွေဆီက သိရပါတယ်။

“မနက် ၆ နာရီ ၄၀ မိနစ်လောက်က မကွေးမြို့ ရွာသစ်လမ်းနဲ့နတ်မောက်လမ်းထောင့်က နေအိမ်မီးလောင်မှုဖြစ်တယ်၊ အသက် ၈၀ ကျော်အဘွားဒေါ်ခင်ပိုက်နေအိမ်မီးလောင်တာ၊ အိမ်က တံခါးတွေကအလုံပိတ်ထားတာဆိုတော့ အဘွားမီးလောင်သေဆုံးသွားပါတယ်” လို့ မြို့ခံတဦးက ပြောပါတယ်။

မီးလောင်မှုမှာ ဝါယာလျှော့ဖြစ်လောင်ကျွမ်းခဲ့တာဖြစ်ပြီး မီးလောင်ချိန်မကြာမြင့်သော်လည်း အိမ်တံခါးသော့များပိတ်ထားတာကြောင့် ဝင်မရဘဲ အဘွားအို သေဆုံးခဲ့ရတာဖြစ်တယ်လို့ ဆိုပါတယ်။

“တံခါးတွေက သော့တွေနဲ့အသေပိတ်ထားတာဆိုတော့ ဝင်မရပြုမရဖြစ်ပြီးသော့တွေဖျက်ပြီးဝင်ကြတဲ့အခါ အသက် ၇၅ နှစ်ကျော် အဘွားကြီး တံခါးဝမှာ မတ်တပ်ရပ်ပြီးဆုံးသွားတာ၊ သေဆုံးတဲ့အလောင်းကိုတော့ နာရေးကားနဲ့မကွေးပြည်သူ့ဆေးရုံကြီးကိုသယ်သွားပါတယ်၊ မြို့ပေါ်ကမီးသတ်ကားတွေအကုန်သွားကြတယ်” လို့ မြို့ခံက ထပ်မံပြောဆိုပါတယ်။

မန္တလေး၊ ဖေဖော်ဝါရီ ၂၁၊ ၂၀၂၃။

မန္တလေးတိုင်းဒေသကြီး၊ ချမ်းအေးသာစံမြို့နယ်၊ ရန်မျိုးလုံရပ်ကွက်၊ အကွက် (၇၅၀)၊ ကုလားပျိုရပ်၊ ၃၃ အေလမ်း၊ လမ်း ၇၀နဲ့ ၇၁ လမ်းကြားမှာ ဆေးလိပ်တိုကတဆင့် မီးလောင်ခဲ့တာကြောင့် နေအိမ် ၂ လုံး ပျက်စီးခဲ့တယ်လို့ သိရပါတယ်။

ဖေဖော်ဝါရီလ ၂၀ ရက်မနေ့ည ၈ နာရီ ၃၅ မိနစ်ခန့်မှာ လူငယ် ၄ ဦး ငှားရမ်းနေထိုင်တဲ့ နေအိမ်မှာ ဆေးလိပ်သောက်ပြီး ဆေးလိပ်တိုကို အိပ်ယာဘေးမှာ ထားရှိရာမှ အိပ်ယာကို မီးကူးစက် လောင်ကျွမ်းခဲ့တာလို့ ဒေသခံတဦးက ပြောပါတယ်။

“အိမ်ဌားတွေပါ။ လူငယ်ပိုင်းတွေဘဲ သူတို့က အိပ်ယာနား ဆေးလိပ်သောက်ပြီး ဆေးလိပ်ထားထားရာကနေ စောင်ကတဆင့် မီးကူးပြီး မီးလောင်တာ။ သူတို့က အိမ်အောက်ထပ်မှာ ဌားနေတာ။ အိမ်ကလည်း သစ်သားအိမ်ဆိုတော့ မီးပိုလောင်သွားစေတာ။ အိမ်ဌားလူငယ်တွေကိုတော့ ရဲက အမှုဖွင့်ထားတယ်” လို့ ပြောပါတယ်။

မီးလောင်မှုဖြစ်ပွားလို့ သစ်သားနှစ်ထပ်နေအိမ်နဲ့ RC နှစ်ထပ်တိုက်တို့ မီးလောင်ခဲ့သလို ဆိုင်ကယ် ၂ စီး မီးလောင်ပျက်စီးခဲ့ပြီး လူထိခိုက်မှုတွေတော့ မရှိခဲ့ဘူးလို့ ဆိုပါတယ်။

မီးလောင်မှုကြောင့် မြန်မာနိုင်ငံမီးသတ်တပ်ဖွဲ့၊ အရန်မီးသတ်နဲ့ ရပ်ကွက်နေ ပြည်သူတွေက မီးငြိမ်းသတ်ယာဥ်နဲ့ ရေသယ်ယာဥ် ၂၅ စီး အသုံးပြု မီးငြိမ်းသတ်ခဲ့ရာ မီးလောင်ပြီး ၁ နာရီခန့်အကြာမှာ မီးငြိမ်းသွားတယ်လို့ သိရပါတယ်။

ဖေဖော်ဝါရီလ ၁၆ ရက် ညနေပိုင်းကလည်း ချမ်းအေးသာဇံမြို့နယ်၊ ပြည်ကြီးပျော်ဘွယ်အရှေ့ရပ်ကွက်၊ အကွက် (၂၅၅)၊ ၃၀-၃၁ ကြား၊ ၈၉-၉၀ ကြားမှာ မီးလောင်မှု ဖြစ်ပွားခဲ့တဲ့အတွက် အမျိုးသမီးကြီး ၁ ဦး သေဆုံးပြီး နေအိမ် ၄ လုံး မီးလောင်ပျက်စီးခဲ့တယ်လို့ သိရပါတယ်။