မိတ္ထီလာ၊ ဩဂုတ် ၁၂၊ ၂၀၂၅။

မန္တလေးတိုင်း၊ မိတ္ထီလာမြို့၊ ပေါက်ချောင်းရပ်ကွက်ရှိ စစ်ကောင်စီကျန်းမာရေးဝန်ကြီးဌာနလက်အောက် သူနာပြုသင်တန်းကျောင်းက သင်တန်းသူအမျိုးသမီးငယ် ၁ ဦး မီးလောင်သေဆုံးခဲ့တယ်လို့ ဒေသခံတွေထံက သိရပါတယ်။

သေဆုံးသူအမျိုးသမီးမှာ သူနာပြုသင်တန်းတက်ရောက်နေတဲ့ အသက် ၂၀ ကျော် မပြည့်ပြည့်ဆိုသူ ဖြစ်ပြီး ဩဂုတ် ၁၂ ရက် ဒီကနေ့မနက် ၂ နာရီကျော်မှာ ကျောင်းဝန်းအတွင်းရှိ သင်တန်းသူအိပ်ဆောင်အိမ်သာအတွင်းမှာ မီးလောင်သေဆုံးနေတာကို အဆောင်နေသင်တန်းသူတွေက တွေ့ရှိခဲ့တာလို့ ဆိုပါတယ်။

” မီးလောင်ထားတော့ မဲနေတာ။ သူ့အနား ဒီဇယ်ပုံးတော့ တွေ့ရတယ်။ ကိုယ့်ကိုကိုယ်လုပ်သွားတဲ့ပုံစံတော့ရှိတယ်။ ဘယ်လိုကြောင့်လုပ်လဲဆိုတာတော့မသိရဘူး ” လို့ ဖြစ်စဥ်ကိုသိထားသူဒေသခံတဦးက မြေလတ်အသံကို ပြောပါတယ်။

သေဆုံးသူအမျိုးသမီးဟာ ကရင်နီ(ကယား)ပြည်နယ်ကနေ မိတ္ထီလာသူနာပြုသင်တန်းကိုတက်ရောက်နေသူဖြစ်ပြီး လွိုင်ကော်မြို့က သူနာပြုနဲ့သားဖွားသင်တန်းကျောင်းဖွင့်လှစ်နိုင်ခြင်းမရှိတာကြောင့် သူနာပြုသင်တန်းသူတွေကို မိတ္ထီလာမြို့ သူနာပြုသင်တန်းကျောင်းမှာ ပြောင်းရွှေ့ပေါင်းစပ်သင်ကြားနေရကြောင်း စစ်ကောင်စီကျန်းမာရေးဝန်ကြီးဌာန ထုတ်ပြန်ချက်အရ သိရပါတယ်။

မီးလောင်သေဆုံးသွားတဲ့ ကျောင်းသူအလောင်းကို မိတ္ထီလာပြည်သူ့ဆေးရုံကို ပို့ဆောင်ထားပြီး သေဆုံးမှုနဲ့ ပတ်သက်လို့ ရဲတပ်ဖွဲ့က စစ်ဆေးမှုတွေပြုလုပ်နေတယ်လို့ သိရပါတယ်။

သေဆုံးသူရဲ့မိသားစုဝင်တွေလည်း မိတ္ထီလာမြို့ဆေးရုံကိုရောက်ရှိနေပြီး အလောင်းပြန်သယ်ရဖို့စောင့်ဆိုင်းနေကြတယ်လို့ သိရပါတယ်။

စာတည်း – ဟိန်းစံ

မိတ္ထီလာ၊ ဇွန် ၁၄၊ ၂၀၂၅။

မန္တလေးတိုင်း၊ မိတ္ထီလာမြို့နယ်၊ ဒဟတ္တန်းကျေးရွာမှာ အသက် ၉ နှစ်အရွယ်မိန်းကလေးကို သတ်ဖြတ်ခဲ့တဲ့ တရွာတည်းနေ လင်မယား ၂ ဦးကိုဖမ်းမိခဲ့တယ်လို့ ဒေသခံတွေဆီက သိရပါတယ်။

ဖမ်းမိသူတွေဟာ ၃၆ နှစ်အရွယ် ကိုစိုးမင်းအောင်နဲ့ အသက် ၃၂ နှစ်အရွယ် မလင်းဇာနည်ဇော် တို့ဖြစ်ပြီး ဇွန် ၁၁ ရက်မှာ ရဲကမသင်္ကာသူ ၁၈ ဦးကို ခေါ်ယူစစ်ဆေးရာက ပေါ်ပေါက်ခဲ့တာလို့ ဆိုပါတယ်။

“သူတို့က သူတို့အိမ်မှာ မနေရဲလို့ အခြားအိမ်နားနီးချင်းအိမ်မှာသွားနေတာ။ ရဲကရွာထဲကသံသယရှိသူတွေခေါ်သွားတာ။ စစ်ဆေးတဲ့အခါ သူတို့ထွက်ဆိုချက်တွေက ရှေ့နောက်မညီတော့ ခေါ်ထားလိုက်တာ။ ကျန်တဲ့သူ အကုန်ပြန်လွတ်လိုက်တယ်။ တဖြည်းဖြည်းစစ်မေးရင်းမှာပေါ်လာတာ။ သူတို့သတ်ကြောင်းကိုလည်း မနေ့က(ဇွန်လ ၁၃)ရက်မှာ ဝန်ခံလိုက်တယ်။”လို့ ရွာခံတဦးကပြောပါတယ်။

ခုလိုသတ်ဖြတ်တာဟာ မနှင်းရတီ နားမှာဆွဲထားတဲ့ ကာလတန်ဖိုး ၅ သိန်းကျပ်ရှိရွှေနားကပ်ကို လိုချင်တာကြောင့်ဖြစ်တယ်လို့ ထွက်ဆိုထားကြောင်း သူကဆက်ပြောပါတယ်။

၎င်းတို့ဟာ ဇွန် ၇ ရက်ညနေမှာ နေအိမ်ကနေထွက်လာတဲ့ မနှင်းရတီကို နေအိမ်ကိုခေါ်သွားပြီးနောက် နားကပ်ကိုဖြုတ်ယူချိန် ကလေးငယ်ကအော်ဟစ်တာကြောင့် တိုင်နဲ့ခေါင်းကိုဆောင့်ပြီး တိုက်ရာမှာ သေဆုံးသွားခဲ့တာလို့ သိရပါတယ်။

မနှင်းရတီရဲ့အလောင်းကို နေအိမ်ထဲကသံသေတ္တာထဲမှာထည့်ပိတ်ထားပြီး ဇွန် ၉ ရက်ညပိုင်းမှာ ကျေးရွာသုသာန်အနီး မြွေရေခွံအိတ်ထဲထည့်ပြီး စွန့်ပစ်ခဲ့ကြတာလို့ ဆိုပါတယ်။

အလောင်းကိုတော့ ဇွန် ၁၁ ရက် မနက် ၉ နာရီလောက်က ရွာထဲမှာ ဆိတ်ကျောင်းနေသူတဦးက အပုပ်နံ့ရလို့ သွားရောက်ကြည့်ရှုခဲ့ရမှာတွေ့ရှိခဲ့တာလို့ ဒေသခံတွေဆီကသိရပါတယ်။

ရွှေနားကပ်ကိုတော့ မိတ္ထီလာမြို့ကရွှေဆိုင်မှာ သွားရောက်ရောင်းချထားခဲ့တာလို့ သိရတာကြောင့် ရဲက သက်သေခံအဖြစ် နားကပ်ကိုပြန်သိမ်းလာပြီး အဆိုပါလင်မယားကိုတော့ မိတ္ထီလာမြို့မရဲစခန်းက လူသတ်မှုအတွက် ရာဇသတ်ကြီးပုဒ်မ ၃၀၂၊ လုယက်မှုကျူးလွန်ရာမှာ အလိုအလျောက် နာကျင်စေမှုအတွက် ပုဒ်မ ၃၉၄ အရ အမှုဖွင့်ထားတယ်လို့ သိရပါတယ်။

စာတည်း – လင်း

အလောင်းကို မြွေရေခွံအိတ်နဲ့ထုပ်ပြီး စွန့်ပစ်ခံထားရ

မိတ္ထီလာ၊ ဇွန် ၁၁၊ ၂၀၂၅။

မန္တလေးတိုင်း၊ မိတ္တီလာမြို့နယ်၊ ဒဟတ္တန်းကျေးရွာမှာ နေအိမ်ကနေ ၄ ရက်ကြာပျောက်နေတဲ့ အသက် ၉ နှစ်အရွယ် မိန်းကလေးငယ် သေဆုံးလျက်ပြန်တွေ့ခဲ့တယ်လို့ ဒေသခံတွေဆီကသိရပါတယ်။

သေဆုံးသူဟာ အသက် ၉ နှစ်အရွယ် Grade 3 ကျောင်းသူ မနှင်းရတီ ဖြစ်ပြီး ဇွန် ၁၁ ရက် မနက် ၉ နာရီခန့်မှာ ကျေးရွာသုသာန်အနီး မြေရေခွံအိတ်အတွင်းမှာထုပ်လျက်အနေထားနဲ့ သေဆုံးနေတာကို တွေ့ရတယ်လို့ ဆိုပါတယ်။

“ဆိတ်ကျောင်းသွားတဲ့ ဦးလေးကြီးက ပုပ်စော်နံနေတာဆိုတော့ တိရစ္ဆာန်တွေပစ်ထားလား ဆိုပြီးသွားကြည့်တာ။ ဖိနပ်ကလေးတွေတော့ ရွာကလူတွေလှမ်းခေါ်လိုက်တာ။ လာကြည့်ကြတော့မှာ အိတ်ထဲမှာ ကလေးအလောင်းကို တွေ့ရတာ။ အိတ်ထဲထည့်ခံထားရတယ်ဆိုတော့ အသတ်ခံရတဲ့ ပုံစံတော့ ရှိမယ်”လို့ ရွာခံတဦးကပြောပါတယ်။

ကလေးငယ်ရဲ့အလောင်းကို ပြန်တွေ့ရချိန်မှာ ပုပ်ပွနေပြီးဖြစ်တာကြောင့် အသတ်ခံထားရတဲ့ အခြေအနေနဲ့ပတ်သက်ပြီး ဘယ်လိုနည်းလမ်းနဲ့သတ်ထားတယ်ဆိုတာ အဖြေရှာလို့မရသေးဘူးလို့ ဆိုပါတယ်။

အဆိုပါ မိန်းကလေးငယ်သေဆုံးမှုနဲ့ပတ်သက်ပြီး တရားခံကို ဖမ်းဆီးရမိဖို့ရဲဘက်က စုံစမ်းစစ်ဆေးနေကာ အလောင်းကိုလည်း မိတ္ထီလာဆေးရုံကို သယ်ယူစစ်ဆေးမှုလုပ်နေပြီး ဆေးစစ်ချက် အဖြေကတော့ မရသေးဘူးလို့ဆိုပါတယ်။

ဇွန် ၇ ရက်ညနေ ၃ နာရီကျော်ကတည်းက မနှင်းရတီဟာ နေအိမ်ကနေ ကျေးရွာစာသင်ကျောင်းအနီးမှာ ကစားမယ်ဆိုပြီး အိမ်ကထွက်သွားရာမှ နေအိမ်ကို ပြန်ရောက်မလာဘဲ ပျောက်ဆုံးနေခဲ့တာပါ။

ကလေးငယ်ရဲ့ မိဘတွေက ထိုင်းမှာအလုပ်လုပ်နေတာကြောင့် အဖွားဖြစ်သူ၊ အကိုဖြစ်သူတို့နဲ့ နေထိုင်ပြီး ကျေးရွာထဲမှာ နေ့စဥ်ကျောင်းဆင်းချိန်တိုင်း ထွက်ကစားလေ့ရှိတယ်လို့လည်း သိရပါတယ်။

စာတည်း – လင်း

မိတ္ထီလာ၊ ဇွန် ၂၊ ၂၀၂၅။

မန္တလေးတိုင်း၊ မိတ္ထီလာမြို့နယ်၊ ဖလန်ကျင်းကျေးရွာအနီး၊ မိတ္ထီလာ-ကျောက်ပန်းတောင်လမ်းမှာ ခရီးသည်တင်ကားတိမ်းမှောက်ပြီး အမျိုးသမီး ၆ ဦးသေဆုံးကာ ၁၁ ဦးဒဏ်ရာရတယ်လို့ ကူညီကယ်ဆယ်ရေးလုပ်ဆောင်ပေးခဲ့သူတွေဆီက သိရပါတယ်။

ဇွန် ၂ ရက်မနက် ၂ နာရီခန့်မှာ ရန်ကုန်ဘက်ကနေ ချောက်ဘက်ကို ခရီးသည် ၁၉ ဦးတင်ဆောင်ပြီး မောင်းနှင်လာတဲ့ Elite ခရီးသည်တင်ကားဟာ ကားလမ်းမိုင်တိုင်အမှတ် ၁၄ မိုင် ၃ ဖာလုံကျော်အရောက်မှာ တိမ်းမှောက်ခဲ့တာလို့ဆိုပါတယ်။

“ကားက စလစ်ဖြစ်ပြီးတော့ ယာဥ်မောင်းကထိန်းရင်းနဲ့ ဘယ်ဘက်ခြမ်းကို မှောက်သွားတာ။ မိုးကတော့ အစောပိုင်းလေးက ကျထားတာရှိတယ်။ လမ်းတွေကလည်း အကွေ့အကောက်ရှိတယ်။ မိုးရွာထားတာရယ် Speed လေးလည်းနည်းနည်း ပါလာတယ်ထင်ပါတယ်။”လို့ ကူညီကယ်ဆယ်ရေး လုပ်ဆောင်ပေးခဲ့သူတဦးကပြောပါတယ်။

သေဆုံးဒဏ်ရာရသူတွေက ဘယ်ဒေသခံတွေဖြစ်တယ်ဆိုတာကိုတော့ လတ်တလောမှာ စာရင်းကောက်ယူထားရတာမျိုးမရှိဘူးလို့ အထက်ပါ ကူညီကယ်ဆယ်ရေးလုပ်ဆောင်ပေးခဲ့သူက ဆက်ပြောပါတယ်။

ယာဥ်တိမ်းမှောက်တာကြောင့် ယာဥ်ပေါ်ပါ ခရီးသည်တွေအနက် အသက် ၆၁ နှစ်အရွယ် ဒေါ်လှကြိုင်၊ ၆၀ နှစ်အရွယ် ဒေါ်တင်တင်မူ၊ ၃၃ နှစ်အရွယ် ဒေါ်သန်းသန်းဦး၊ ၃၁ နှစ်အရွယ် မချိုချိုမြင့်၊ ၂၃ နှစ်အရွယ် မဖြူဖွေး၊ ၄ နှစ်အရွယ် မချစ်စနိုးတို့ သေဆုံးခဲ့တယ်လို့ ဆိုပါတယ်။

ဒါ့အပြင် အသက် ၁၁ နှစ်ကနေ ၇၀ အရွယ်ကြားရှိ အမျိုးသမီး ၈ ဦး၊ အမျိုးသား ၃ ဦးထိခိုက် ဒဏ်ရာရသွားပြီး သေဆုံးထိခိုက်သူတွေကိုတော့ ဒေသလူမှုကူညီရေးအသင်းတွေက မိတ္ထီလာမြို့နယ် ပြည်သူ့ဆေးရုံကိုပို့ဆောင်ပေးခဲ့ရတယ်လို့ သိရပါတယ်။

ပြီးခဲ့တဲ့ ဇန်နဝါရီ ၂ ရက်ကလည်း မိတ္ထီလာမြို့နယ်အပိုင် ရန်ကုန်-မန္တလေးအမြန်လမ်း မိုင်တိုင်အမှတ် ၂၉၀/၇ အနီးတွင် လူ ၄ ဦးလိုက်ပါလာတဲ့ အိမ်စီးကားအရှိန်လွန်ပြီး လမ်းလယ်ကျွန်းကိုဝင်တိုက်လို့ အမျိုးသမီး ၁ ဦးသေဆုံးပြီး ၃ ဦးဒဏ်ရာရခဲ့သေးတယ်လို့ သိရပါတယ်။

စာတည်း – လင်း

မန္တလေး၊ ဖေဖော်ဝါရီ ၉၊ ၂၀၂၅။

မန္တလေးတိုင်း၊ မိတ္ထီလာမြို့မှာ ရိုက်နှက်နှိပ်စက်ခံထားရတဲ့ ဒဏ်ရာတွေရရှိထားတဲ့ အသက် ၂ နှစ်အရွယ် မိန်းကလေး ၁ ဦး ဖေဖော်ဝါရီ ၈ ရက် မနေ့မနက်ပိုင်းက သေဆုံးသွားတယ်လို့ ဒေသခံတွေထံက သိရပါတယ်။

သေဆုံးသူဟာ ရတနာမာန်အောင်ရပ်ကွက်၊ နယ်မြေ ၄ မှာနေထိုင်တဲ့ အသက် ၂ နှစ်အရွယ် မသူချစ်ခင် ဆိုသူဖြစ်ပြီး ၎င်းဟာ ပထွေးဖြစ်သူရဲ့ မကြာခဏရိုက်နှက်နှိပ်စက်မှုခံရပြီးနောက် ယမန်နေ့မှာသေဆုံးသွားခဲ့တာလို့ ဖြစ်စဉ်ကိုသိရှိထားတဲ့ဒေသခံတဦးက မြေလတ်အသံကို ပြောပါတယ်။

“ကလေးကို ပထွေးကနှိပ်စက်တယ်ဆိုပြီး လွန်ခဲ့တဲ့ ၁၀ ရက်ကျော်လောက်ကတည်းက ပတ်ဝန်းကျင်ကတိုင်လို့ ရပ်ကွက်ရုံးထိသွားရှင်းကြပြီးပြီ။ ကလေးဆုံးတော့ အအေးပတ်လို့သေတယ်ဆိုပြီး သတင်းဖြန့်တယ်။” လို့ ၎င်းက ပြောပါတယ်။

ကလေးမိခင်မှာ ရတနာမာန်အောင်ရပ်ကွက်၊ နယ်မြေ ၄ က အသက် ၂၅ နှစ် အရွယ် မပြည့်စုံဝင်း သေဆုံးကလေးငယ်နဲ့အတူနေသူဖြစ်ပြီး ပထွေးမှာ သီရိမင်္ဂလာရပ်ကွက်၊ နယ်မြေ ၁၄ မှာနေထိုင်တဲ့ အသက် ၄၀ အရွယ် ရန်နိုင်စိုးဖြစ်ကာ မိခင်က ပထွေးဖြစ်သူနေအိမ်ကိုသွားရောက်တိုင်း ကလေးကိုခေါ်သွားလေ့ရှိကာ ခေါ်ဆောင်သွားတိုင်းလည်း ပထွေးဖြစ်သူက မကြာခဏရိုက်နှက်နှိပ်စက်လေ့ရှိတယ်လို့ အထက်ပါဒေသခံက ပြောပါတယ်။

ကလေးငယ်သေဆုံးမှုနဲ့ပတ်သက်ပြီး မိခင်နဲ့ပထွေးတို့ကို ၎င်းတို့ရဲ့နေအိမ်တွေမှာ ရဲကသွားရောက်ဖမ်းဆီးခဲ့ကာ လက်ရှိမှာ မိတ္ထီလာမြို့မရဲစခန်းမှာချုပ်နှောင်ထားပြီး ပထွေးဖြစ်သူကို လူသတ်မှုပုဒ်မ ၃၀၂၊ မိခင်ဖြစ်သူကို လူသတ်မှုကိုအားပေးကူညီမှု ၃၀၂/၁၁၄ စတဲ့ ပုဒ်မတွေနဲ့ အသီးသီးအမှုဖွင့်စစ် ဆေးနေတယ်လို့ သိရပါတယ်။

” ကလေးမှာက ဒဏ်ရာဒဏ်ချက်တွေ အများကြီးရထားတာ။ ကြားတာကတော့ ကလေးကိုလက်နဲ့ရိုက်တာပေါ့နော်။ ရဲကစစ်ချက်ယူတာတောင် ကလေးကို ချစ်လို့ကုန်းကိုက်တာလို့ပဲ ဖြေတယ်” လို့ ၎င်းက ဆက်ပြောပါတယ်။

ပထွေးနဲ့မိခင်ဖြစ်သူတို့က ကလေးငယ်ကိုဘာကြောင့် ရိုက်နှက်နှိပ်စက်တယ်ဆိုတာကိုတော့ သေချာမသိရဘဲ နှိပ်စက်ခံရတိုင်းလည်း မိခင်ဖြစ်သူက ဂရုတစိုက်ဆေးကုသပေးတာမျိုးလည်းမရှိဘူးလို့ ဆိုပါတယ်။

သေဆုံးကလေးငယ်ရဲ့ရုပ်အလောင်းဓာတ်ပုံမှတ်တမ်းတွေအရ မျက်နှာ၊ ခြေ၊ လက်တွေအပါ ခန္ဓာကိုယ်အနှံ့မှာ ရိုက်နှက်ခံထားရတဲ့ ဒဏ်ရာအများအပြားရရှိထားပြီး ရုပ်အလောင်းကို ရပ်ကွက်တာဝန်ရှိသူတွေနဲ့ အနီးဝန်းကျင်ဒေသခံတွေက ယမန်နေ့မှာပဲ နေ့ချင်းသင်္ဂြိုဟ်ပေးလိုက်ကြတယ်လို့ သိရပါတယ်။

စာတည်း – ဟိန်းစံ