စစ်ယာဥ်တန်း

တောင်ငူ၊ ဇွန် ၂၀၊ ၂၀၂၅။

ပဲခူးတိုင်း၊ တောင်ငူမြို့နယ်၊ ထိုးဝါးချောင်းကျေးရွာအနီး တောင်ငူ-လိပ်သိုလမ်းမှာ စစ်ကောင်စီယာဥ်တန်း တိုက်ခိုက်ခံရပြီး သေဆုံးသူရှိကာ ကျည်မျိုးစုံနဲ့ရိက္ခာတွေလည်း သိမ်းဆည်းခဲ့တယ်လို့ ဇွန် ၂၀ ရက်မှာ တောင်ငူခရိုင် တပ်ရင်း ၃၅၀၂၊ တပ်ခွဲ ၁ က သတင်းထုတ်ပြန်လာပါတယ်။

ဇွန် ၁၇ ရက်မနက် ၇ နာရီခွဲမှာ လိပ်သိုကနေ တောင်ငူဘက်ကိုပြန်ဆင်းလာတဲ့ ကား ၅ စီး အင်အား ၈၀ ကျော်ပါယာဥ်တန်းကို ကြားဖြတ်တိုက်ခိုက်ရာ အပြန်အလှန်ပစ်ခတ်မှု မိနစ် ၄၀ ခန့်ဖြစ်ပွားခဲ့တယ်လို့ ဆိုပါတယ်။

“တောင်ငူကနေ ကမ်းနီးချောင်းကနေတဆင့် လိပ်သို ထုံးဘိုကြီးကြောကို စစ်ကြောင်းဝင်နေတာ။ အဲ့စစ်ကြောင်းကို ချောင်းနေရာကနေ လိပ်သိုဘက်ကဆင်းလာတဲ့ ကားတန်းကိုတွေ့လို့ပစ်လိုက်ကြတာ။ “လို့ တောင်ငူခရိုင် တပ်ရင်း ၃၅၀၂ ပြန်ကြားရေးတာဝန်ခံ ကိုစွန်ရဲကပြောပါတယ်။

တိုက်ပွဲအတွင်းမှာ စစ်ကောင်စီဘက်က ၅ ဦးထက်မနည်းသေဆုံးတာကို မြေပြင်တပ်ဖွဲ့ဝင်ရဲ့တွေ့ရှိချက်အရ အတည်ပြုနိုင်ခဲ့တယ်လို့ ဆိုပါတယ်။

ဒါ့အပြင် တိုက်ပွဲဖြစ်ပြီးနောက် စစ်ကောင်စီတပ်ဖွဲ့ဝင်တွေကျန်ရစ်ခဲ့တဲ့ ၆၀ မမ ၅ လုံး၊ ကျည်မျိုးစုံ ၉၀၀၊ M14 မိုင်း ၄ လုံး၊ လက်ပစ်ဗုံး ၄ လုံး၊ စကားပြောစက် ၂ လုံး၊ ကျည်ဘောက် ၄ ခု၊ ဖုန်း ၁ လုံး၊ စစ်ကောင်စီတပ်ဖွဲ့ဝင်တွေအသုံးပြုမယ့် ရိက္ခာအချို့နဲ့ မြေသယ်ကား ၁ စီးကို သိမ်းဆည်းရမိခဲ့တယ်လို့ သိရပါတယ်။

အဆိုပါ တိုက်ခိုက်မှုကိုတော့တပ်ရင်း (၃၅၀၂) တပ်ခွဲ(၁)၊ တပ်ခွဲ (၂) ၊ KNU တပ်မဟာ(၂)၊ တပ်ရင်း(၅) လက်အောက်ခံ ကမ်းနီကြားဒေသကာကွယ်ရေးအဖွဲ့တို့ ပူးပေါင်းတိုက်ခိုက်ခဲ့တာလို့ သိရပါတယ်။

ပြီးခဲ့တဲ့ဇွန် ၁၃ ရက်နဲ့ ၁၄ ရက်တွေမှာလည်း တောင်ငူဘက်ကနေ အင်အား ၂၀၀ ခန့်နဲ့ စစ်ကြောင်းထိုးလာတဲ့ စစ်ကောင်စီတပ်ဖွဲ့ဝင်တွေနဲ့ ထိုးဝါးချောင်း၊ ဆိတ်ကုန်းနဲ့ ထုံးဘိုကြီးကျေးရွာတွေအနီး တိုက်ပွဲဖြစ်ခဲ့သေးတယ်လို့ ကိုစွန်ရဲကပြောပါတယ်။

တိုက်ပွဲတွေကြောင့် ဆိတ်ကုန်း၊ ထုံးဘိုကြီး၊ ထိုးဝါးချောင်းကျေးရွာတွေက ဒေသခံ ၃,၅၀၀ ကျော်ဟာ နေရပ်စွန့်ခွာထွက်ပြေးနေရတာ တပတ်ကျော်ရှိနေပြီး စစ်ကြောင်းကလည်း အဲ့ဒီကျေးရွာတွေအနီးမှာ ဇွန် ၂၀ ရက် ဒီနေ့အထိ လှည့်ပတ်သွားလာနေသေးတာကြောင့် ဒေသခံတွေမှာ နေရပ်မပြန်ရသေးဘူးလို့ သိရပါတယ်။

စာတည်း – လင်း

စစ်ကိုင်း၊ မတ် ၄၊ ၂၀၂၃။

စစ်ကိုင်းတိုင်း၊ စစ်ကိုင်းမြို့နယ်ထဲမှာ မတ်လ ၃ ရက် မနေ့ နေ့လယ်ပိုင်းက စစ်ကောင်စီ ယာဥ်တန်းနှစ်ခုဆုံချိန် ဒေသခံကာကွယ်ရေးတပ်တွေက ဒရုန်းနဲ့ ဗုံးကြဲတိုက်ခိုက်ခဲ့တယ်လို့ သိရပါတယ်။

စစ်ကိုင်းအခြေစိုက် တမခ ၃၃ က ထွက်လာတဲ့ ယာဥ်တန်းနဲ့ မုံရွာမြို့ဘက်က ထွက်လာတဲ့ယာဥ်တန်း စုစုပေါင်း ၂၀ စီးလောက် ဆုံရာ စစ်ကိုင်းမြို့နယ်ထဲက မုံရွာ-မန္တလေး အဝေးပြေးလမ်းမ တနေရာမှာ ဗုံးသီး ၄ လုံး ကြဲချတိုက်ခိုက်ခဲ့တာလို့ T. G.R Women Drone Force ခေါင်းဆောင် ကျားခင်စိန်က အခုလို ပြောပါတယ်။

“မနေ့က စကစ ကားတန်းတွေက ရှုပ်နေတာပဲ။ မုံရွာကနေရော၊ စစ်ကိုင်းကနေရော သူတို့တွေ ကားနဲ့ ပစ္စည်းတခုခုကို သယ်ဆောင်နေကြတာ။ သူတို့ကားတန်းတွေ အဝေးပြေးလမ်းမပေါ် ရောက်လာတဲ့အချိန်မှာ ဒရုန်းနဲ့ကြဲချလိုက်တယ်။ ထိခိုက်မှုတွေတော့ ရှိပါတယ်။ အတိအကျတော့ မသိသေးပါဘူး” လို့ ဆိုပါတယ်။

ဒီပစ်ခတ်မှုကို T. G. R Women Drone Force၊ မြောင်မြို့နယ် T.G.R ပြည်သူ့ကာကွယ်ရေးတပ်ဖွဲ့နဲ့ Black Eagle People Defense Force တပ်ဖွဲ့တို့က ပူးပေါင်းဆောင်ရွက်ခဲ့ကြတာ ဖြစ်ပြီး အဲ့ဒီယာဥ်တန်းတွေပေါ်ကလည်း ပြန်လည်ပစ်ခတ်မှုတွေ ရှိခဲ့တယ်လို့ ဆိုပါတယ်။

T. G. R Women Drone Force တပ်ဖွဲ့ဟာ ပြီးခဲ့တဲ့ ဖေဖော်ဝါရီလထဲမှာလည်း စစ်ကောင်စီတပ်ဖွဲ့တွေကို ဒရုန်းနဲ့ ၆ ကြိမ်ထက်မနည်း တိုက်ခိုက်ခဲ့သေးတယ်လို့ သိရပါတယ်။

ဒါ့အပြင် ဇန်နဝါရီလ ၇ ရက် မနက် ၆ နာရီဝန်းကျင်မှာလည်း စစ်ကိုင်းမြို့ဘက်က ထွက်လာတဲ့ စစ်ကောင်စီကား ၃ စီးကို မြင်းမူမြို့နယ်၊ ဂွေးပင်တောရွာနဲ့ နတ်ရေကန်ရွာကြားမှာ တိုက်ခိုက်ခဲ့ရာ စစ်ကောင်စီဘက်က ထိခိုက်သေဆုံးမှုတွေ ရှိခဲ့ပါသေးတယ်။

ရေစကြို၊ ဖေဖော်ဝါရီ ၂၄၊ ၂၀၂၃။

မကွေးတိုင်း၊ ရေစကြိုမြို့အခြေစိုက် ခလရ ၂၅၈ တပ်ထဲက ထွက်လာတဲ့ စစ်သားတွေကို ဖေဖေါ်ဝါရီလ ၂၃ ရက် မနေ့ကနေ့လယ်ပိုင်းမှာ ပဒေသာမိုင်းနဲ့ တိုက်ခိုက်ခဲ့တယ်လို့ ပြည်သူ့ကာကွယ်ရေးတပ်ဖွဲ့ – ရေစကြိုမြို့နယ်က သတင်းထုတ်ပြန်ထားပါတယ်။

အိမ်စီးကား ၃ စီးအပြည့်နဲ့ ရေစကြိုမြို့ထဲကို ဝင်လာချိန် နေ့လည် ၁ နာရီဝန်းကျင်လောက်မှာ ပဒေသာမိုင်း ၃ လုံးတွဲ ၂ ဆိုင်းနဲ့ တိုက်ခိုက်ခဲ့တာလို့ ဆိုပါတယ်။

“သူတို့ရဲ့တပ်ထဲကနေ ထွက်လာပြီး ရေစကြိုမြို့ထဲကို ဝင်လာတာမှာ စိုက်ပျိုးရေးခြံနားအရောက်မှာ တိုက်ခိုက်ခဲ့တာပါ။ ကား၂ စီးက ထိုးရပ်သွားပြီး ပတ်ဝန်းကျင်ကို ရမ်းသမ်းပစ်နေပါတယ်။ ကား ၂ စီးကိုလည်း ပြန်ပြင်နေတာ တွေ့လိုက်ရတယ်” လို့ ရေစကြိုပကဖမှ တာဝန်ခံ ရဲဘော်ဝေကြီးက ပြောပါတယ်။

တိုက်ခိုက်မှုအတွင်း စစ်သားတွေဘက်က ထိခိုက်သေဆုံးမှု အခြေအနေကိုတော့ ဆက်လက်စုံစမ်းနေပြီး ကာကွယ်ရေး ရဲဘော်တွေဘက်ကတော့ အထိအခိုက်မရှိခဲ့ဘူးလို့ သူကဆက်ပြောပါတယ်။

ရေစကြိုမြို့နယ် ပ.က.ဖအဖွဲ့ဟာ ပြီးခဲ့တဲ့ ဖေဖေါ်ဝါရီလ ၁၄ ရက်လည်း ရေစကြိုမြို့နယ် အထက – ၁ ကျောင်းရှေ့မှာ စောင့်နေတဲ့ စစ်သားတွေကို မိုင်းဆွဲတိုက်ခိုက်ခဲ့ပါသေးတယ်။

ရေစကြိုနယ်အတွင်းမှာ ကာကွယ်ရေးတပ်ဖွဲ့ဝင်တွေက စစ်ကောင်စီတပ်သားတွေ၊ စစ်ကောင်စီခန့် အုပ်ချုပ်ရေးမှူးတွေနဲ့ သတင်းပေး ဒလန်ဆိုသူတွေကို မကြာခဏ ရှင်းလင်းတိုက်ခိုက်နေသလို စစ်ကောင်စီတပ်တွေဘက်ကလည်း ကျေးရွာတွေကို စစ်ကြောင်းထိုးမီးရှို့တာ၊ ဒေသခံပြည်သူတွေကို မထင်ရင် မထင်သလို ဖမ်းဆီးသတ်ဖြတ်တာတွေ လုပ်ဆောင်လျှက် ရှိနေပါတယ်။