ဦးဗန့်ဂျီ

စစ်ကိုင်း၊ ဇွန် ၁၂၊ ၂၀၂၃။

စစ်ကောင်စီတပ်သားတွေရဲ့ ဖမ်းဆီးသတ်ဖြတ်တာကို ခံလိုက်ရတဲ့ စစ်ကိုင်းတိုင်း၊ ဆားလင်းကြီးမြို့နယ်၊ ပြည်သူ့ အုပ်ချုပ်ရေးအဖွဲ့ဝင် ဦးဗန့်ဂျီရဲ့ ရုပ်အလောင်းကို သွားယူချိန် မိုင်းထိမှန်ခဲ့တဲ့ PDF ရဲဘော်တဦးမှာ ခြေထောက်တဖက်ဖြတ်လိုက်ရတယ်လို့ သိရပါတယ်။

ခြေထောက်ဖြတ်လိုက်ရတဲ့ရဲဘော်မှာ ကျေးရွာကာကွယ်ရေးအဖွဲ့တခုမှ အသက် ၂၈ နှစ်အရွယ်ရှိ အမျိုးသားတဦးဖြစ်ပြီး၊ ဘယ်ဖက်ခြေထောက်ရဲ့ ဒူးအောက်ကနေ ဖြတ်ထုတ်လိုက်ရတာလို့ မြေပြင်မှ PDF ရဲဘော်တဦးက ပြောပါတယ်။

“လုံခြုံရေးအရ ရွာနာမည်နဲ့ သူ့ရဲ့နာမည်ကို ပြောလို့မရဘူး။ အခုကတော့ ခြေထောက်ဖြတ်လိုက်နိုင်လို့ အသက်အန္တရာယ်မစိုးရိမ်ရတော့ဘူး။ ကျေးလက်ဆေးခန်းတခုမှာ ဆေးကုသမှု ပေးထားတယ်”လို့ ဆိုပါတယ်။

စစ်ကောင်စီတပ်စွဲနေတဲ့ ညောင်ပင်ကြီးကျေးရွာအနီးက ထန်တောဆိပ်သစ်ကွင်းထဲမှာ စွန့်ပစ်ခံထားရတဲ့ ဦးဗန့်ဂျီရဲ့ ရုပ်အလောင်းကို ဇွန်လ ၁၁ ရက်မနက် ၈ နာရီ‌လောက်မှာ အထက်ပါရဲဘော်အပါအဝင် PDF အင်အား ၁၅ ဦးက သွားယူခဲ့ချိန် စစ်ကောင်စီထောင်ခဲ့တဲ့ မိုင်းတလုံးကို နင်းမိရာက ပေါက်ကွဲမှုဖြစ်ခဲ့တာလို့ အထက်ပါရဲဘော်က ပြောပါတယ်။

“မိုင်းကတော့ တလုံးတည်းပေါက်တာပါဗျ။ အလောင်းကောက်နေချိန်မှာ ပေါက်တာ။ ဒီရဲဘော်က နင်းမိတာဖြစ်လို့ ထိသွားတာပါ။ တခြားရဲဘော်တွေတော့ မထိမှန်ခဲ့ကြဘူး”လို့ ဆိုပါတယ်။

စစ်ကောင်စီတပ်သားတွေရဲ့ သတ်ဖြတ်တာကိုခံလိုက်ရသူ ဦးဗန့်ဂျီမှာ ဆားလင်းမြို့နယ်၊ ပြည်သူ့အုပ်ချုပ်ရေးအဖွဲ့ဝင်တဦးလည်း ဖြစ်သလို လက်ပံတောင်းတောင်ပင်မသပိတ်စစ်ကြောင်း ဦးဆောင်ကော်မတီဝင်အဖွဲ့ဝင်တဦးလည်း ဖြစ်ပါတယ်။

ဦးဗန့်ဂျီအပါအဝင် စစ်ကောင်စီလက်ချက်နဲ့ သေဆုံးခဲ့ရသူတွေအတွက် ဇွန်လ ၁၁ ရက် ည ၇ နာရီလောက်မှာလည်း ဖယောင်းတိုင်မီးတွေ ကိုင်ဆောင်ပြီး ဆုတောင်းသပိတ်တခုကို လက်ပံတောင်းတောင်ဒေသ ပင်မသပိတ် အပါအဝင် ဒေသခံကာကွယ်ရေးတပ်ဖွဲ့တွေက ဦးဆောင်ပြီး ပြည်သူတွေနဲ့အတူ ဆားလင်းကြီးမြို့နယ် တနေရာမှာ ပြုလုပ်ခဲ့ကြပါတယ်။

စာတည်း – လင်း

စစ်ကိုင်း၊ ဇွန် ၁၂၊ ၂၀၂၃။

စစ်ကိုင်းတိုင်း၊ ယင်းမာပင်ခရိုင်၊ ဆားလင်းကြီးမြို့နယ်မှာ ပြည်သူ့အုပ်ချုပ်ရေးအဖွဲ့ဝင် ဦးဗန့်ဂျီအပါအဝင် စစ်ကောင်စီလက်ချက်နဲ့ သေဆုံးခဲ့ရသူတွေအတွက် ဇွန်လ ၁၁ ည ၇ နာရီအချိန်က ဖယောင်းတိုင်မီးတွေ ကိုင်ဆောင်ပြီး ဆုတောင်းသပိတ် ပြုလုပ်ခဲ့ကြတယ်လို့ သိရပါတယ်။

အဲဒီသပိတ်ကို လက်ပံတောင်းတောင် ဒေသပင်မသပိတ် အပါအဝင် ဒေသခံကာကွယ်ရေးတပ်ဖွဲ့တွေက ဦးဆောင်ပြီး ပြည်သူတွေနဲ့အတူ ပြုလုပ်ခဲ့ကြတာဖြစ်ပါတယ်။

သေဆုံးခဲ့သူမှာ ဆားလင်းမြို့နယ် ပြည်သူ့အုပ်ချုပ်ရေးအဖွဲ့ဝင်တဦး ဖြစ်သလို လက်ပံတောင်းတောင်ပင်မသပိတ်စစ်ကြောင်း ဦးဆောင်ကော်မတီဝင်အဖွဲ့ဝင်တဦး ဖြစ်တဲ့ အသက် ၄၀ ကျော်အရွယ် ဦးဗန့်ဂျီ ဖြစ်ပါတယ်။

ဦးဗန့်ဂျီဟာ တခြားအဖွဲ့ဝင် ၃ ဦးနဲ့အတူ မေလ ၃၁ ရက်နေ့လယ် ၂ နာရီလောက်က စစ်ကောင်စီစစ်ကြောင်းတခုကို ကင်းထောက်ရင်း ညောင်ပင်ကြီးကျေးရွာအနီးမှာ မုံရွာဘက်ကနေ ဝမ်ပေါင်ကို ရိက္ခာလာပို့တဲ့ စစ်ကြောင်းနဲ့ ထိပ်တိုက်တွေ့ပြီး ပစ်ခတ်ဖမ်းဆီးခံလိုက်ရတာ ဖြစ်ပါတယ်။

ဖမ်းဆီးခံရပြီးနောက် ဦးဗန့်ဂျီကို ဇွန်လ ၃ ရက်နေ့လယ် ၁ နာရီကျော်မှာ ဖမ်းဆီးထိန်းသိမ်းထားတဲ့ နောင်အိုင်ကြီးရဲစခန်းကနေ မုံရွာမြို့က စစ်ကြောရေးတနေရာကို ပို့ဆောင်လိုက်ပြီး ၈ ရက်အကြာမှာ အခုလိုသေဆုံးလျှက် ပြန်တွေ့ခဲ့ရတာ ဖြစ်ပါတယ်။

“ကိုဗန့်ဂျီဟာ စစ်တပ်ရဲ့ လူမဆန်စွာသတ်ဖြတ်တာခံခဲ့ရတယ်။ နေ့လည်ပိုင်းက မီးရှို့သဂြိုဟ်ခဲ့ပြီ။ အဲဒါနဲ့ပတ်သက်ပြီးကျဆုံးခဲ့တဲ့ အာဇာနည် ကိုဗန်ဂျီအတွက် ဆုတောင်းပွဲလုပ်ဖြစ်တာပါ” လို့ လက်ပံတောင်းတောင် ပင်မသပိတ်ဦးဆောင်သူတဦးက ပြောပါတယ်။

အခု ဆုတောင်းပွဲကို ဆားလင်းကြီးမြို့နယ် ပအဖ၊ ပကဖ၊ ပလဖ၊ လက်ပံတောင်းတောင်ဒေသပင်မသပိတ်၊ Salingyi (SPDF) ၊ သေမင်းတမန်ပြောက်ကြားတပ်ဖွဲ့ (ဆားလင်းကြီး)နဲ့ပြည်သူ့အင်အား ၁၀၀ ကျော်တို့ ဆုတောင်းခဲ့ပြီး စစ်အာဏာရှင်တော်လှန်ရေးသပိတ်တရားတွေဟောကြားရာ ည ၈နာရီခွဲအချိန်မှာ ပြီးစီးခဲ့ကြောင်း သိရသည်။

စာတည်း – လင်းဇေ

စစ်ကိုင်း၊ ဇွန် ၁၁၊ ၂၀၂၃။

စစ်ကောင်စီတပ်သားတွေရဲ့ ဖမ်းဆီးထိန်းသိမ်းတာကို ခံထားရတဲ့ စစ်ကိုင်းတိုင်း၊ ဆားလင်းကြီးမြို့နယ် ပြည်သူ့အုပ်ချုပ်ရေးအဖွဲ့ဝင် ဦးဗန့်ဂျီ ကို ဇွန်လ ၁၁ ရက် ဒီမနက် ၈ နာရီလောက်မှာ သေဆုံးလျှက် ပြန်တွေ့ခဲ့တယ်လို့ သိရပါတယ်။

အသက် ၄၀ ကျော်အရွယ်ရှိ ဦးဗန့်ဂျီရဲ့အလောင်းကို စစ်ကောင်စီတပ်စွဲနေတဲ့ ညောင်ပင်ကြီး ကျေးရွာအနီးက ထန်တောဆိပ်သစ်ကွင်းထဲမှာ တွေ့ရှိခဲ့ရတာလို့ ဆားလင်းကြီးမြို့နယ် သတင်းမှန်ပြန်ကြားရေးအဖွဲ့မှ တာဝန်ရှိသူတဦးက ပြောပါတယ်။

“ကိုဗန့်ဂျီ ခန္ဓာကိုယ်ပေါ်မှာ ဒဏ်ရာတွေတော်တော်တွေ့ရတယ်။ ကျောကုန်းတွေ၊ ဦးခေါင်းတွေမှာ ရိုက်နှက်ခံထားရတဲ့ ဒဏ်ရာတွေပါတယ်။ ရင်ဘက်တွေမှာ ဓားထိုးဒဏ်ရာတွေ တွေ့ရတယ်ဗျ။ စကစတွေက မနေ့(ဇွန်၁၀)က သတ်ပြီးတော့ အလောင်းလာပစ်သွားတာလို့ ထင်တယ်” လို့ ဆိုပါတယ်။

လက်ရှိမှာ ဦးဗန့်ဂျီရဲ့ရုပ်အလောင်းကို စစ်ကောင်စီတပ်စွဲတဲ့နေရာတွေနဲ့ အဝေးတနေရာမှာ မီးသင်္ဂြိုလ်ပေးလိုက်ပြီလို့ သူကဆက်ပြောပါတယ်။

ဦးဗန့်ဂျီဟာ နောက်ထပ်အဖွဲ့ဝင် ၃ ဦးနဲ့အတူ မေလ ၃၁ ရက်နေ့လယ် ၂ နာရီလောက်က စစ်ကောင်စီ စစ်ကြောင်းတခုကို ကင်းထောက်ရင်း ညောင်ပင်ကြီးကျေးရွာအနီးမှာ မုံရွာဘက်ကနေ ဝမ်ပေါင်ကို ရိက္ခာလာပို့တဲ့ စစ်ကြောင်းနဲ့ထိပ်တိုက်တွေ့ပြီး ပစ်ခတ်ဖမ်းဆီး ခံလိုက်ရတာဖြစ်ပါတယ်။

ဖမ်းဆီးခံရပြီးနောက် ဦးဗန့်ဂျီကို ဇွန်လ ၃ ရက်နေ့လယ် ၁ နာရီကျော်မှာ ဖမ်းဆီးထိန်းသိမ်းထားတဲ့ နောင်အိုင်ကြီးရဲစခန်းကနေ မုံရွာမြို့က စစ်ကြောရေးတနေရာကို ပို့ဆောင်လိုက်ပြီး ၈ ရက်အကြာမှာ အခုလိုသေဆုံးလျှက် ပြန်တွေ့ခဲ့ရတာဖြစ်ပါတယ်။

စာတည်း – လင်း

စစ်ကိုင်း၊ ဇွန် ၄၊ ၂၀၂၃။

စစ်ကိုင်းတိုင်း၊ ဆားလင်းကြီးမြို့နယ် ပြည်သူ့ အုပ်ချုပ်ရေးအဖွဲ့ဝင် ဖမ်းဆီးခံထားရပြီး ၄ ရက်အကြာ ဇွန်လ ၃ ရက်မှာ မုံရွာစစ်ကြောရေးကို ပြောင်းရွေ့ ပို့ဆောင်ခံလိုက်ရပြီး လက်ရှိမှာ အသက်အန္တရာယ်စိုးရိမ်နေရတယ်လို့ သိရပါတယ်။

အသက် ၄၀ ကျော်အရွယ်ရှိ ဦးဗန့်ဂျီကို ဇွန်လ ၃ ရက်မွန်းလွှဲ ၁ နာရီကျော်မှာ ဖမ်းဆီးထိန်းသိမ်းထားတဲ့ နောင်အိုင်ကြီးရဲစခန်းကနေ မုံရွာမြို့က စစ်ကြောရေးတနေရာကို ပို့ဆောင်လိုက်တာဖြစ်တယ်လို့ ဆားလင်းကြီးမြို့နယ် သတင်းမှန်ပြန်ကြားရေးမှ တာဝန်ရှိသူတဦးက ပြောပါတယ်။

“ကိုဗန့်ဂျီကို စကစအင်အား ၃၀ ကျော်က မော်တော်နဲ့ နောင်အိုင်ကြီးရဲစခန်းကနေ မုံရွာစစ်ကြောရေးကို ပို့လိုက်တာ။ မုံရွာက (နမခ)ကိုလား၊ ဘယ်တပ်၊ ဘယ်နေရာကို ပို့တယ်ဆိုတာတော့ တိတိကျကျမသိရဘူးဗျ။ သူရိုက်နှက်ခံထားရလို့ အသက်အန္တရာယ်စိုးရိမ်နေရတယ်”လို့ သူက ဆိုပါတယ်။

ဦးဗန့်ဂျီမှာ နောက်ထပ်အဖွဲ့သား ၃ ဦးနဲ့အတူ မေလ ၃၁ရက် မွန်းလွှဲ ၂ နာရီကျော်မှာ စစ်ကောင်စီ စစ်ကြောင်းတခုကို ကင်းထောက်ရင်း ညောင်ပင်ကြီးကျေးရွာအနီးမှာ မုံရွာဘက်ကနေ ဝမ်ပေါင်ကိုရိက္ခာလာပို့တဲ့ စစ်ကြောင်းနဲ့ ထိပ်တိုက်တွေ့ပြီး ပစ်ခတ်ဖမ်းဆီးခံလိုက်ရတာဖြစ်တယ်လို့ အထက်ပါတာဝန်ရှိသူက ပြောပါတယ်။

“ကိုဗန့်ဂျီနဲ့ ပါလာတဲ့သူတွေကတော့ ရှောင်နိုင်လိုက်လို့ အဖမ်းမခံလိုက်ရဘူး။ သူကကျတော့ ဆိုင်ကယ်ကို နောက်ပြန်ဆုတ်တဲ့အချိန်မှာ စကစတွေရဲ့ ဝိုင်းဝန်းဖမ်းဆီးတာကိုခံလိုက်ရတာ” လို့ သူက ဆက်ရှင်းပြပါတယ်။

ဦးဗန့်ဂျီကို ပစ်ခတ်ဖမ်းဆီးနေချိန်မှာလည်း အနီးပတ်ဝန်းကျင်မှာရှိနေတဲ့ ညောင်ပင်ကြီးကျေးရွာက ဒေသခံအမျိုးသား ၁ ဦးမှာလည်း ဘယ်ဖက်ပေါင်ကို ကျည်ထိမှန်ခဲ့တာကြောင့် မစိုးရိမ်ရ ဒဏ်ရာရရှိခဲ့တယ်လို့ ဒေသခံတွေဆီက သိရပါတယ်။

စာတည်း – လင်းဇေ