အထိုင်စခန်း

ဒဏ်ရာရတဲ့ အလောင်းတွေကို ကား ၅ စီးနဲ့ မန္တလေးပြန်သယ်

မတ္တရာ၊ ဇူလိုင် ၂၀၊ ၂၀၂၅။

မန္တလေးတိုင်း၊ မတ္တရာမြို့နယ်နဲ့ ပုသိမ်ကြီးမြို့နယ်အစပ်က စစ်ကောင်စီအထိုင်စခန်းကို တော်လှန်ရေးတပ်တွေ ဝင်ရောက်တိုက်ခိုက်ခဲ့ပြီး စစ်တပ်က ကား ၅ စီးနဲ့ ဒဏ်ရာရတဲ့ အလောင်းတွေကို မန္တလေးမြို့အတွင်း ခေါ်ဆောင်သွားတယ်လို့ ဒေသခံတွေဆီက သိရပါတယ်။

မတ္တရာ-မန္တလေးကားလမ်းပိုင်းမှာရှိတဲ့ စစ်ကောင်စီရဲ့နောက်တန်းအထိုင်စခန်းတွေဖြစ်တဲ့ မြကန်သာရွာနဲ့ သရက်ကိုင်းရွာအထိုင်စခန်းတွေကို တော်လှန်ရေး တပ်တွေက ဒီနေ့မနက် အစောပိုင်းမှာ ဝင်ရောက်တိုက်ခိုက်ခဲ့တာလို့ သိရပါတယ်။

“ဒီနေ့ မနက်ပိုင်းက မတ္တရာမြို့ထဲ နာရေးကားတွေအကုန် ခေါ်သွားတယ်။မန္တလေးဘက်ကို ကား ၅ စီးတောင်ထွက်သွားတယ်။ ဒီကောင်တွေ(စကစ)တော်တော်သေတယ်လို့ကြားတယ်”လို့ တော်လှန်ရေးတပ်ဖွဲ့ဝင်တဦးက ပြောပါတယ်။

အဲ့ဒီနောက် Y-12 နဲ့ ၁၄ ကြိမ် ၁ ခါ၊ ၁၀ ကြိမ် ၁ ခါ‌၊ ဂျက်ဖိုက်တာနဲ့ ၆ ကြိမ် မတ္တရာမြို့နယ်အရှေ့ ခြမ်းကို လေကြောင်းတိုက်ခိုက်မှုပြုလုပ်သွားတယ်လို့ သိရပါတယ်။

အဲဒီကျေးရွာထဲက မြကန်သာ ကျေးရွာဟာ စစ်တပ်ရဲ့ နောက်တန်းစခန်းအဖြစ် ဆေးကုသသူတွေပါရှိတဲ့ အဓိကနေရာဖြစ်တယ်လို့လည်း သိရပါတယ်။

ဒါ့အပြင် ဒီရွာဟာ မတ္တရာမြို့နယ်က စစ်သားစုဆောင်းရေးတပ်၊ ထီးတော်မိုးတပ်ရဲ့ မြောက်ဘက်မှာရှိပြီး စစ်တပ်ကခံစစ်ကို ဒီနေရာကနေ ထပ်မံပြင်ဆင်နေတာလို့ သိရပါတယ်။

မတ္တရာမြို့နယ်အရှေ့ခြမ်းကို စစ်တပ်ကထိုးစစ်ဆင်ပြီး ပြန်လည်သိမ်းယူဖို့ကြိုးစားနေချိန်မှာ ၎င်းတို့ရဲ့ နောက်တန်းစခန်းကို အလစ်အငိုက်ဝင်တိုက်ခံရတာလို့ သိရပါတယ်။

စစ်တပ်ကစစ်မှုထမ်းသင်တန်းဆင်းတွေ အများအပြားကို မတ္တရာမြို့နယ်အရှေ့ခြမ်းကိုပို့ဆောင်ပြီး ထိုးစစ်ဆင်နေတာ ၆ လနီးပါးရှိနေပြီလို့ သိရပါတယ်။

သတင်း – ဧပရယ်

မြေလတ်အသံ၊ ဇူလိုင် ၈ ၊ ၂၀၂၅။

စစ်ကိုင်းတိုင်း၊ ကလေးမြို့နယ်၊ နှောညောင်ပင်ရွာ စစ်ကောင်စီတပ်အထိုင်စခန်းကို တိုက်ခိုက်သိမ်းပိုက်နိုင်ခဲ့ပြီး တိုက်ပွဲအတွင်း စစ်ကောင်စီတပ်ဖွဲ့ဝင် ၆ ဦးသေဆုံးကာ လက်နက်၊ ခဲယမ်းတွေ သိမ်းဆည်းနိုင်ခဲ့တယ်လို့ ကလေးခရိုင်ပြည်သူ့ကာကွယ်ရေးတပ်ဖွဲ့(ပကဖ) ထံက သိရပါတယ်။

ဒေသအခေါ် ကံပုလဲအရှေ့ရွာလို့ ခေါ်ဆိုတဲ့ နှောညောင်ပင်ရွာမှာ စစ်ကောင်စီတပ်နဲ့ ပျူစောထီးပူးပေါင်းအင်အား ၃၀ နဲ့ အထိုင်ချတပ်စွဲထားတာဖြစ်ပြီး အဆိုပါတပ်စခန်းကို ဇူလိုင် ၅ ရက် မနက် ၁ နာရီခန့် မှာ ဝင်ရောက်တိုက်ခိုက်ခဲ့ရာ ၁ နာရီခန့်ကြာ တိုက်ပွဲဖြစ်ပွားခဲ့ပြီးနောက် စစ်ကောင်စီတပ်ဖွဲ့ဝင်တွေ စခန်းစွန့်ခွာထွက်ပြေးသွားတယ်လို့ ဆိုပါတယ်။

“ ရွာမှာ အထိုင်ချထားတာက အာဏာသိမ်းပြီးကတည်းကပါ။ အိမ်ခြေကငါးရာကျော်ရှိတဲ့ မြို့နဲ့အနီးဆုံး စကစ အမာခံရွာကြီးဖြစ်ပါတယ်။ လက် နက်ကြီးပစ်ကူတဲ့ဂိတ်က မြို့သာရပ်ကွက်နဲ့ သာစည်ရွာအကြားမှာရှိတာပါ။ တမိုင်ပတ်ချာလည်တွေချည်းပါပဲ” လို့ ကလေးခရိုင်ပြည်သူ့ကာကွယ်ရေးအဖွဲ့( ပကဖ)တာဝန်ရှိသူတဦးက မြေလတ်အသံကို ပြောပါတယ်။

စခန်းအတွင်းဝင်ရောက်စီးနင်းစဥ် သေဆုံးစစ်ကောင်စီတပ်ဖွဲ့ဝင်ရုပ်အလောင်း ၆ ခုနဲ့ စစ်ကောင်စီတပ်သား ၁ ဦးကို အရှင်ဖမ်းမိခဲ့ပြီး လက်နက်၊ ခဲယမ်း အများအပြားသိမ်းဆည်းနိုင်ခဲ့ပေမယ့် နာရီဝက်ခန့်အကြာမှာ ဒေသကွပ်ကဲမှုစစ်ဌာနချုပ်(ကလေး)ကနေ စစ်ကူအင်အား ၃၀ ခန့် ရောက်ရှိလာတာကြောင့် လက်နက်ခဲယမ်းအားလုံး မသယ်ယူနိုင်ခဲ့ဘူးလို့ အထက်ပါတာဝန်ရှိသူက ပြောပါတယ်။

နှောညောင်ပင်စစ်ကောင်စီစခန်းကနေ BA-100 ၆၀ မမ စိန်ပြောင်း ၁ လက်၊ ကာဘိုင်သေနတ် ၄ လက်၊ BA 63 (G-3) သေနတ် ၂ လက်၊ ၆၀ မမ ဗုံးသီး ၁၂ လုံး၊ MG-1 လက်ပစ်ဗုံး ၂လုံး၊ လက်နက်ငယ် ကျည်မျိုးစုံ ၁၇၀၀ ကျော်၊ ကျည်ဘောက် ၁၈ ဘောက်၊ I-con(စကားပြောစက်) ၂ လုံး သိမ်းဆည်းရရှိခဲ့တယ်လို့ သိရပါတယ်။

အဆိုပါစခန်းသိမ်းတိုက်ခိုက်မှုကို ကလေးခရိုင်ပြည်သူ့ကာကွယ်ရေးအဖွဲ့ (ပကဖ)ဦးဆောင်မှုနဲ့ ဒေသခံကျေးရွာပကဖအဖွဲ့များ၊ RAW (Kalay) ဆေးအဖွဲ့တွေက ပူပေါင်း လုပ်ဆောင်ခဲ့တာလို့သိရပါတယ်။

စာတည်း – ဟိန်းစံ