အင်တာမီလန်

မြေလတ်အသံ၊ ဇွန် ၁၊ ၂၀၂၅။

ယနေ့မနက်ယှဉ်ပြိုင်ခဲ့တဲ့ ဥရောပချန်ပီယံလိဂ် ဗိုလ်လုပွဲမှာ ပီအက်စ်ဂျီအသင်းက အင်တာမီလန်အသင်းကို ၅ ဂိုး ဂိုးမရှိရလဒ်နဲ့ ဂိုးပြတ်အနိုင်ရယူပြီး ပီအက်စ်ဂျီအသင်းသမိုင်းတလျှောက် ပထမဆုံးအကြိမ် ချန်ပီယံလိဂ်ဖလားကို မြူးနစ်မြို့မှာ ကိုင်မြှောက်နိုင်ခဲ့ပြီဖြစ်ပါတယ်။

ရှုံးထွက်ပွဲစဉ်တွေမှာ ပရီးမီးယားလိဂ်အသင်းတွေဖြစ်တဲ့ လီဗာပူးလ်၊ အက်စတွန်ဗီလာနဲ့ အာဆင်နယ်တို့ကို ကျော်ဖြတ်ခဲ့ပေမယ့် သိသိသာသာ ကောင်းမွန်တဲ့ခြေစွမ်းမျိုး မပြနိုင်ခဲ့တဲ့ ပီအက်စ်ဂျီဟာ ဗိုလ်လုပွဲမှာတော့ တပွဲလုံး ဘောလုံးပိုင်ဆိုင်မှုအသာ၊ ကစားကွက်အသာ၊ ဂိုးအသာနဲ့ အပြတ်အသတ်အနိုင်ရခဲ့ပြီး ဒီရလဒ်ဟာ ချန်ပီယံလိဂ်လို့ အမည်ပြောင်းလဲကျင်းပခဲ့တဲ့နောက်ပိုင်း ဂိုးကွာဟမှုအများဆုံး ဗိုလ်လုပွဲပါ။

ကွာတားဖိုင်နယ်မှာ ဘိုင်ယန်မြူးနစ်နဲ့ ဆီမီးဖိုင်နယ်မှာ ဗိုလ်စွဲဖို့ရေပန်းစားခဲ့တဲ့ ဘာစီလိုနာတို့ကို ခက်ခက်ခဲခဲ ကျော်ဖြတ်လာခဲ့ရတဲ့ အင်တာမီလန်အသင်းအနေနဲ့ ဗိုလ်လုပွဲမှာလည်း ခြေစွမ်းကောင်းတွေပြသလာနိုင်ဖို့ မျှော်လင့်ထားခဲ့ပေမယ့် ပီအက်စ်ဂျီအသင်းရဲ့ ကစားကွက်အောက်မှာ အတုန်းအရုန်းဖြစ်ခဲ့ရပြီး ကစားကွက်တောင်မတည်နိုင်ဘဲ ဂိုးပြတ်အရှုံးပေးခဲ့ရတာပါ။

ချန်ပီယံလိဂ်ဖလားရယူနိုင်ဖို့ နှစ်ပေါင်းအတော်ကြာ ကြိုးစားနေခဲ့တဲ့ ပီအက်စ်ဂျီအသင်းဟာ နေမာ၊ မက်ဆီနဲ့ အမ်ဘာပေတို့ရှိစဉ်က မရရှိခဲ့တဲ့ ချန်ပီယံလိဂ်ဖလားကို ဒီနှစ် နည်းပြ လူးဝစ်အင်းနရစ် လက်ထက်မှာတော့ ထိုက်ထိုက်တန်တန် ဆွတ်ခူးရယူနိုင်ခဲ့တာဖြစ်ပြီး နည်းပြ အင်းနရစ်က ဒီရာသီ ဖလား ၃ လုံး ရရှိအောင် စွမ်းဆောင်ပေးနိုင်ခဲ့တာပဲ ဖြစ်ပါတယ်။

မြေလတ်အသံ၊ မေ ၇၊ ၂၀၂၅။

ယနေ့ မေ ၇ ရက် မနက်အစောပိုင်းက ယှဉ်ပြိုင်ခဲ့တဲ့ အင်တာမီလန်နဲ့ ဘာစီလိုနာတို့ရဲ့ ချန်ပီယံလိဂ် အကြိုဗိုလ်လုပွဲဒုတိယအကျော့မှာ အင်တာမီလန်က ၄ – ၃ ရလဒ်နဲ့ ချန်ပီယံလိဂ်ဖလားချန်ပီယံဖြစ်ဖို့ ရေပန်းစားနေတဲ့ ဘာစီလိုနာကို အနိုင်ယူပြီး ချန်ပီယံလိဂ်ဗိုလ်လုပွဲအဆင့်ကို တက်လှမ်းနိုင်ခဲ့ပါတယ်။

ပထမအကျော့ ဘာစီလိုနာ အိမ်ကွင်းမှာ တဖက် ၃ ဂိုးစီနဲ့ သရေရလဒ်ထွက်ပေါ်ခဲ့ပြီးနောက် ဒုတိယအကျော့ အင်တာမီလန်အိမ်ကွင်းယှဉ်ပြိုင်မှု မိနစ် ၉၀ အတွင်း တဖက် ၃ ဂိုးစီနဲ့ထပ်မံသရေရလဒ်ထွက်ပေါ်ခဲ့လို့ အချိန်ပိုကန်ရာမှာ အင်တာမီလန်က ၁ ဂိုးထပ်မံသွင်းယူနိုင်ခဲ့လို့ ၄- ၃ ရလဒ်နဲ့ အင်တာမီလန်အသင်း အနိုင်ရရှိခဲ့ကာ နှစ်ကျော့ပေါင်းရလဒ် ၇ – ၆ နဲ့ နည်းပြ အင်ဇာဂီရဲ့ အင်တာမီလန်အသင်း ချန်ပီယံလိဂ်ဗိုလ်လုပွဲကို တက်ရောက်နိုင်ခဲ့တာပါ။

အင်တာမီလန်အသင်းဟာ ချန်ပီယံလိဂ်ဗိုလ်လုပွဲမှာ ပီအက်စ်ဂျီနဲ့ အာဆင်နယ်အသင်းက ဗိုလ်လုပွဲတက်လာမယ့်အသင်းနဲ့ တွေ့ဆုံရမှာဖြစ်ပါတယ်။

အဆိုပါ ၂ သင်းဟာ အကြိုဗိုလ်လုပွဲ ပထမအကျော့ အာဆင်နယ်အိမ်ကွင်းတွေ့ဆုံမှုအတွင်း ၀ – ၁ ရလဒ်နဲ့ ပီအက်စ်ဂျီက အနိုင်ရရှိခဲ့ကာ မနက်ဖြန် မေ ၈ ရက် မြန်မာစံတော်ချိန် မနက် ၁ နာရီခွဲမှာ အကြိုဗိုလ်လုပွဲ ဒုတိယအကျော့အဖြစ် ပီအက်စ်ဂျီအိမ်ကွင်းမှာ ထပ်မံယှဉ်ပြိုင်ရမှာပါ။

ချန်ပီယံလိဂ် ဗိုလ်လုပွဲ ပွဲစဉ်ကိုတော့ ဇွန်လ ၁ ရက် မြန်မာစံတော်ချိန် မနက် ၁ နာရီခွဲအချိန် ဂျာမနီနိုင်ငံ၊ မြူးနစ်မြို့ရှိ ဘိုင်ယန်မြူးနစ်အသင်းအိမ်ကွင်း အလိုင်းယန့်အရီနာမှာ ကျင်းပသွားမှာလို့ သိရပါတယ်။

Photo – Sportskeeda Football.