အခြေခံစားသောက်ကုန်

ဘုတလင်၊ စက်တင်ဘာ ၁၅၊ ၂၀၂၅။

စစ်ကိုင်းတိုင်း၊ ဘုတလင်မြို့နယ် ရွာ ၅ ရွာက စစ်ဘေး၊ မီးဘေးသင့်ပြည်သူတွေကို အခြေခံစားသောက်ကုန်တွေ ထောက်ပံ့လှူဒါန်းခဲ့တယ်လို့ ဒေါင်းရာဇာပင်မသပိတ်လူမှုကူညီရေးအသင်း ဘုတလင်မြို့နယ်ဆီက သိရပါတယ်။

စစ်ကော်မရှင်စစ်ကြောင်းရဲ့မီးရှို့ခံထားရတဲ့ ရွှေတောင်၊ ပေါက်စိန်ပေါက်၊ ကံသာ၊ ထူးကြီး၊ ဇီးတောရွာတွေက အိမ်ထောင်စု ၇၀ အတွက် စက်တင်ဘာ ၁၃ ရက်မှာ ၁ အိမ်ထောင်ကို ကျပ် ၃၅,၀၀၀ ဖိုး ဆန်၊ ဆီ၊ ဆား၊ ကြက်သွန်တွေ ကျေးရွာတွေအထိသွားရောက် ထောက်ပံ့လှူဒါန်းခဲ့တာလို့ ဆိုပါတယ်။

” စစ်ကြောင်းဘယ်နေ့လာမှာလည်းဆိုပြီး ပြည်သူတွေအနေနဲ့တော့ ခေါင်းပြားအောင်မအိပ်ရပါဘူး၊ စိတ်ဒုက္ခတွေလည်း ရောက်ကြရတယ်၊ နောက်ပြီး ရာသီဥတုအခြေအနေကလည်း နေပူလိုက်၊ မိုးရွာလိုက်ဆိုတော့ ဖျားကြနာကြတယ်။ အဲ့လိုအခက်အခဲတွေတော့ ရှိပါတယ်” လို့ ဒေါင်းရာဇာပင်မသပိတ်လူမှုကူညီရေးအသင်း – ဘုတလင်အဖွဲ့ အတွင်းရေးမှူးက ပြောပါတယ်။

အထက်ပါကျေးရွာတွေကအိမ်ထောင်စုတွေဟာ ၂၀၂၄ စက်တင်ဘာလမှာ စစ်ကော်မရှင်တပ်က စစ်ကြောင်းထိုးမီးရှို့ခဲ့တာကြောင့် နေအိမ်တွေဆုံးရှုံးခဲ့ရတဲ့ စစ်ဘေး၊ မီးဘေးသင့်ခဲ့သူတွေဖြစ်တယ်လို့ သိရပါတယ်။

ဘုတလင်မြို့နယ်ကို စစ်ကော်မရှင်တပ်ဖွဲ့တွေရဲ့ မကြာခဏစစ်ကြောင်းထိုးဝင်ရောက်မှု မီးရှို့မှုတွေကြောင့် ဒေသခံတွေမှာ အရေးပေါ်စစ်ရှောင်နေရကာ အလုပ်မလုပ်နိုင်တာကြောင့် စားဝတ်နေရေး အခက်အခဲတွေရှိနေတယ်လို့ ဆိုပါတယ်။

စစ်ကိုင်း၊ ဖေဖော်ဝါရီ ၈၊ ၂၀၂၅။

စစ်ကိုင်းတိုင်း၊ ကောလင်းမြို့နယ်အနောက်ခြမ်းက စစ်ရှောင်အိမ်ထောင်စု ၁၂၀ ကို ဖေဖော်ဝါရီ ၇ ရက်မှာ အခြေခံစားသောက်ကုန်တွေ လှူဒါန်းခဲ့တယ်လို့ ကောလင်း ပြည်သူမှပြည်သူသို့ ဆီက သိရပါတယ်။

“ကောလင်းအနောက်ခြမ်းမှာရှိတဲ့ စစ်ရှောင်အိမ်ထောင်စု ၁၂၀ စုကို အခြေခံစားသောက်ကုန်တွေ လှူဒါန်းခဲ့တာ။ ဆန် ၂ ပြည်၊ မြေပဲ ၂ ဗူး၊ အာလူး ၂၅ ကျပ်သားပါတယ်။ ကာလပေါက်ဈေး ၃ မျိုးပေါင်းကို ၁ အိမ်ထောင်ကို ၁ သောင်းကျပ်နှုန်းကျတယ်။” လို့ ကောလင်း ပြည်သူမှပြည်သူသို့ တာဝန်ခံ ကိုသဲကြီးကပြောပါတယ်။

စစ်ရှောင်ကာလကြာမြင့်လာပြီး လမ်းပန်းဆက်သွယ်ရေးခက်ခဲတာ၊ ကုန်ဈေးနှုန်းကြီးမြင့်လာတာ၊ အလုပ်အကိုင်ရှားပါးလာတာတွေကြောင့် စစ်ရှောင်တွေအတွက် အတော်လေးခက်ခဲနေပါတယ်။ ကူညီပေးနေတဲ့အဖွဲ့တွေမှာလည်း ရန်ပုံငွေအားလျော့နည်းလာပြီး ထိရောက်တဲ့အကူအညီတွေ မပေးနိုင်တာကြောင့် အလှူရှင်တွေအနေနဲ့ ပြည်သူချင်းထောက်ပံ့ကူညီတဲ့စနစ်ကို အကောင်အထည်ဖော်ကြဖို့ နှိုးဆော်တယ်လို့ သူက ဆက်ပြောပါတယ်။

ကောလင်းမြို့ပေါ်ကပြည်သူတွေဟာ ၂၀၂၄ ဖေဖော်ဝါရီ ၁ ရက်ကတည်းက မြို့ကိုစွန့်ခွါခဲ့ကြရပြီး စစ်ရှောင်ကာလ ၁ နှစ်ကျော်ပြီဖြစ်ကာ စစ်ရှောင်ဦးရေ ၂ သောင်းကျော်ရှိတာကြောင့် ရရှိတဲ့ရန်ပုံငွေ လောက်ငှနိုင်မယ့်နေရာတွေနဲ့ ပိုမိုခက်ခဲတဲ့နေရာတွေကို ဦးစားပေးကူညီနေရတယ်လို့ ဆိုပါတယ်။

စာတည်း – ကိုချမ်း