ပေါက်ခေါင်း၊ မတ် ၂၈၊ ၂၀၂၅။
ငလျင်ကြောင့် ပဲခူးတိုင်း၊ ပြည်မြို့၊ ပေါက်ခေါင်းမြို့၊ တောင်ငူမြို့နဲ့ မန္တလေးတိုင်း၊ အင်းဝမြို့ရှိ ရှေးဟောင်းသာသနိကအဆောက်အအုံတွေ ငလျင်ဒဏ်ကြောင့် ပျက်စီးခဲ့ပါတယ်။
မန္တလေးတိုင်း၊ အင်းဝမြို့ရှိ မယ်နုအုတ်ကျောင်း၊ လေးထပ်ကျောင်းနဲ့ အင်းဝဆင်ကျုံး မဟာလောကသရဖူဘုရား အပါအဝင် အင်းဝမြို့က သာသနိအဆောက်အအုံတွေ ပျက်စီးခဲ့ပါတယ်။
ဒါ့အပြင် မဟာမြတ်မုနိဘုရားရှိ သာသနိကအဆောက်အအုံတချို့လည်း ပြိုကျပျက်စီးခဲ့ပါတယ်။
ပဲခူးတိုင်း၊ ပေါက်ခေါင်းမြို့ရှိ လေးမျက်နှာစေတီ တံခွန်တိုင်ပြိုကျပြီး စွယ်တော်တိုက်အမိုးနဲ့ ကြမ်းခင်းလည်း ပျက်စီးခဲ့တယ်လို့ ဒေသခံကပြောပါတယ်။
“လမ်းသွားတဲ့အခါမှာ အိမ်တလုံးပြိုကျတာမြင်ခဲ့တယ်။ မြို့လယ်ဘုရားကြီးက တံခွန်တိုင်လည်း ပြိုကျသွားတယ်။ လူအထိအခိုက်တော့မရှိဘူး။ မကြားမိဘူး”လို့ ဒေသခံတဦးကပြောပါတယ်။
အလားတူ ပြည်မြို့ပေါ်ရှိ ရွှေကူရပ်ကွက်၊ ပန်းဘဲတန်းစာသင်ကျောင်းရဲ့ အုတ်နံရံတွေနဲ့ ပြည်မြို့နယ်၊ မှော်ဇာအုပ်စု၊ သုံးပန်လှဘုန်းကြီးကျောင်းဝန်းရှိ ရှေးဟောင်းကျောင်းတိုက်လည်း ပြိုကျခဲ့တယ်လို့ မြို့ခံတွေဆီက သိရပါတယ်။
တောင်ငူမြို့က ဝေဠုဝန်ဘုန်းကြီးကျောင်းအတွင်းရှိ ကျောင်းဆောင်တခုလည်းပြိုကျပြီး ဘုန်းကြီးကျောင်းတွင်းရှိ စစ်ဘေးရှောင် ၅ ဦးနဲ့ ကိုရင် ၁ ပါးလည်း ပိမိပြီးသေဆုံးခဲ့တယ်လို့ ဆိုပါတယ်။
စစ်ကိုင်း၊ ပဲခူး၊ မကွေး၊ နေပြည်တော်၊ မန္တလေး၊ ရခိုင်နဲ့ ရှမ်းပြည်နယ်တို့အပါအဝင် နိုင်ငံတဝန်းမှာ မတ် ၂၈ ရက်မွန်းလွဲ ၁၂ နာရီကျော်က ရစ်ချ်တာစကေး ၇ ဒသမ ၇ ရှိတဲ့ ငလျင်လှုပ်ခတ်ချိန် သာသနိကအဆောက်အအုံတွေ၊ ရှေးဟောင်းကျောင်းတိုက်၊ အဆောက်အဦတွေ၊ နေအိမ်တွေ၊ ထိခိုက်ပျက်စီးပြီး လူသေဆုံးမှုတွေရှိခဲ့တာပါ။
လက်ရှိမှာတော့ ငလျင်ဒဏ်ကြုံတွေ့ခဲ့ရတဲ့ ဒေသတွေထဲက စစ်ကိုင်း၊ မကွေး၊ ပဲခူးတိုင်း၊ နေပြည်တော်၊ မန္တလေး နဲ့ ရှမ်းပြည်နယ်အရှေ့ခြမ်းတို့ကို စစ်ကောင်စီကအရေးပေါ် အခြေအနေကြေညာထားပါတယ်။
