လက်ဝှေ့

မြေလတ်အသံ၊ ဇန်နဝါရီ ၁၀၊ ၂၀၂၅။

နှစ်သစ်ကူးကာလမှာ ခေတ္တနားထားတဲ့ ONE Friday Fights ပြိုင်ပွဲတွေဟာ ဇန်နဝါရီ ၁၀ ရက် ဒီနေ့မှာပြန်လည်စတင်တော့မှာဖြစ်ပြီး ဒီပြိုင်ပွဲမှာ မြန်မာဖိုက်တာ သွေးလင်းထက် ပါဝင်ထိုးသတ်သွားမှာဖြစ်ပါတယ်။ 

ONE Friday Fights 93 မှာ သွေးလင်းထက်နဲ့ ယှဉ်ပြိုင်ထိုးသတ်သွားမယ့်ပြိုင်ဘက်ကတော့ ထိုင်းဖိုက်တာ ရော့ကစ်တီဖြစ်ပြီး မွေထိုင်း(စတောဝိတ်)တန်းမှာ ထိုးသတ်သွားကြမှာပါ။ 

ရော့ကစ်တီဟာ ONE Friday Fights နှစ်ပွဲထိုးသတ်ထားပြီး နှစ်ပွဲစလုံးကို ပထမအချီ အလဲထိုးနဲ့ အနိုင်ရရှိထားကာ ဘောနပ်စ်ဆုတွေ သိမ်းပိုက်ထားတဲ့ ဖိုက်တာတဦးဖြစ်ပါတယ်။ 

အသက် ၁၉ နှစ်သာရှိသေးပြီး ဘယ်ခြေ၊ ဘယ်လက်အားပြုကစားတဲ့ကစားသမားဖြစ်ကာ ခြေကန်ချက်၊  လက်သီးချက်တွေဟာ ပြိုင်ဘက်မှန်းဆရခက်အောင် အနိမ့်အမြင့်နေရာစုံကို ထိုးသတ်နိုင်သူတယောက်ပါ။ မထင်မှတ်တဲ့အချိန်ထွက်လာတဲ့ အနီးကပ်တံတောင်ရိုက်ချက်နဲ့ ပြိုင်ဘက်ကိုအငိုက်မိသွားအောင်လည်း လုပ်တတ်ပါတယ်။ 

အားနည်းချက်အနေနဲ့ ဖွင့်ထိုးတတ်တဲ့ဖိုက်တာဖြစ်တာကြောင့် သူ့ကိုယ်သူကာကွယ်နိုင်မှုအားနည်းကာ ပြိုင်ဘက်ရဲ့လက်သီးချက်တွေထိရင် နောက်ကိုတွ့န်သွားတတ်ပါတယ်။ ထိုးသတ်ခဲ့တဲ့နှစ်ပွဲစလုံးအနိုင်ယူပြီး ဘောနပ်စ်ဆုတွေ သိမ်းပိုက်ထားတယ်ဆိုပေမယ့် သူ့ရဲ့ပြိုင်ဘက်တွေဟာ သိပ်ပြီးအားကောင်းတဲ့ပြိုင်ဘက်တွေ မဟုတ်တာလည်း တွေ့ရပါတယ်။ 

သွေးလင်းထက်အနေနဲ့တော့ ပြီးခဲ့တဲ့ပွဲမှာရှုံးနိမ့်လိုက်တာဟာ သူ့အတွက်အချက်ပေးသံဖြစ်သွားခဲ့ပြီး ပွဲအတွင်းမှာ ထိုးသတ်တဲ့စနစ်အပြောင်းအလဲမလုပ်နိုင်ရင် ONE မှာထိပ်တန်းရောက်ဖို့ မလွယ်ဘူးဆိုတာ ကောင်းကောင်းသိသွားလောက်ပါတယ်။ 

ပြိုင်ဘက်ဖြစ်သူ ရော့ကစ်တီဟာ သွေးလင်းထက်ရဲ့ပွဲတွေကို အပြန်ပြန်အလှန်လှန်ကြည့်ရှုလေ့လာထားတယ်ဆိုတာကြောင့် ဒီပွဲမှာ သွေးလင်းထက်တယောက် အိမ်စာကြေဖို့လိုအပ်နေပါတယ်။

ပြီးခဲ့တဲ့ပွဲတုန်းက သွေးလင်းထက်ရဲ့အားသာချက်ဖြစ်တဲ့ အောက်ခြေသိမ်းကန်ချက်တွေ၊ ပါဝါပြင်းတဲ့လက်သီးချက်တွေကို အသုံးပြုလို့မရအောင် ပြိုင်ဘက်ကစားသမားက စနစ်တကျကစားသွားတာကြောင့် ခက်ခက်ခဲခဲ ထိုးသတ်ခဲ့ရပါတယ်။ ဒီပွဲမှာလည်း ဒီလိုကြုံလာရင် ဘယ်လိုလုပ်ရမလဲဆိုတာ တွေးထားပြီးသား ဖြစ်နေမယ်လို့ထင်ပါတယ်။

ပြိုင်ဘက်ရဲ့ ထိုးသတ်ပုံတွေကို ဂရုစိုက်ချဉ်းကပ်ရင်း ကိုယ့်ရဲ့အားသာချက်ဖြစ်တဲ့ လက်သီးပါဝါကို ကောင်းကောင်းအသုံးချနိုင်ရင် ဒီပွဲမှာ သွေးလင်းထက်တယောက် ရလဒ်ကောင်းကိုမျှော်လင့်နိုင်ပါလိမ့်မယ်။ 

Photo – One Lumpinee FC 

မြေလတ်အသံ၊ ဇန်နဝါရီ ၁၀၊ ၂၀၂၅။

ဇန်နဝါရီ ၁၀ ရက် ဒီနေ့ညမှာ ကျင်းပသွားတဲ့ ONE Friday Fights 93 ပြိုင်ပွဲမှာ သွေးလင်းထက် ဟာ ပြိုင်ဘက်ဖြစ်သူ ထိုင်းဖိုက်တာ ရော့ကစ်တီကို ပထမအချီမှာတင် အလဲထိုးနဲ့ အနိုင်ယူခဲ့ပါတယ်။ 

ပထမအချီအစမှာ သွေးလင်းထက်ဟာ ညာခြေအပြင်းကန်ချက်နဲ့ ပွဲကိုစဖွင့်ပါတယ်။ ရော့ကစ်တီကတော့ သွေးလင်းထက်ကျွံဝင်လာမှာကို အမှားစောင့်ရင်း ဘယ်ထောက်လက်သီးတုံ့ပြန်ခဲ့တာ ထိရောက်ခဲ့ပါတယ်။ 

သွေးလင်းထက်က နောက်ဆုတ်မသွားဘဲ သူ့ရဲ့အားသာချက်ဖြစ်တဲ့ အနိမ့်ကန်ချက်တွေနဲ့ ဘယ်ညာလက်သီးတွဲလုံးတွေကိုအသုံးပြုပြီး ဖိအားပေးခဲ့တာကြောင့် ရော့ကစ်တီတယောက် အမှားမစောင့်တော့ဘဲ အပြန်အလှန်ကန်ချက်တွေသုံးရင်း ပွဲကိုလှုပ်ခတ်လိုက်ပါတယ်။ 

သွေးလင်းထက် တောက်လျှောက်ဖိအားပေး ထိုးခဲ့ပြီး နှစ်ယောက်စလုံးထိချက်တွေရှိခဲ့ကာ ပထမအချီပြီးဖို့စက္ကန့်ပိုင်းအလိုမှာ ကြိုးဝိုင်းထောင့်ကပ်သွားချိန် သွေးလင်းထက်ရဲ့ညာဝိုက်လက်သီးတလုံး ရော့ကီတစ်ရဲ့ ဘော်ဒီကိုထိပြီး မျက်နှာကာထားတဲ့လက်ပါ ကျသွားပါတယ်။ 

အဲ့ဒီအချိန်မှာပဲ သွေးလင်းထက်ရဲ့ ဘယ်ဝိုက်လက်သီးဟာ ရော့ကစ်တီရဲ့မေးရိုးပေါ်တိတိကျကျထိခဲ့ပြီး လဲကျသွားကာ ပြန်ထမလာနိုင်တော့ဘဲ သွေးလင်းထက်အနိုင်ရခဲ့ပါတယ်။

ပွဲအပြီးမှာတော့ အိမ်စာကြေခဲ့ပြီး အလဲထိုးနိုင်ပွဲရယူမယ်လို့ကြုံးဝါးထားတဲ့ သွေးလင်းထက်တယောက် အလဲထိုးနိုင်ပွဲနဲ့အတူ ONE Championship ကချီးမြှင့်တဲ့ ဘောနပ်စ်ဆုကို ရရှိခဲ့ပါတယ်။ 

Photo – SS from One Championship Live.

မြေလတ်အသံ၊ နိုဝင်ဘာ ၁၊ ၂၀၂၄။

နိုဝင်ဘာ ၁ ရက်မှာ ယနေ့ည ကျင်းပသွားမယ့် ONE Firday Fights 85 မှာ မြန်မာဖိုက်တာ သွေးလင်းထက်က ထိုင်းဖိုက်တာ ဘရာဇီး နဲ့ (မွေထိုင်း)စတောဝိတ်တန်းမှာ ယှဉ်ပြိုင်ထိုးသတ်သွားမှာဖြစ်ပါတယ်။ 

ဒီပွဲဟာ သွေးလင်းထက်အတွက် ONE မှာထိုးသတ်ရတဲ့ ဒုတိယမြောက်ပွဲဖြစ်ပြီး ပထမပွဲစဉ်တုန်းက ထိုင်းဖိုက်တာ ဂန်ချိုင်း ကို အမှတ်နဲ့အနိုင်ရခဲ့ကာ ဖျော်ဖြေမှုကောင်းတဲ့ထိုးသတ်ပုံကြောင့် နှစ်ဦးစလုံး ဘောနပ်စ်ဆုတွေရရှိခဲ့ပါတယ်။ 

ပြိုင်ဘက်ကစားသမားဖြစ်သူ ဘရာဇီးကတော့  အသက် ၁၉ နှစ်နဲ့ ONE မှာ သုံးပွဲထိုးသတ်ထားကာ ၃ ပွဲစလုံးဒိုင်ဆုံးဖြတ်ချက်ရယူခဲ့ရပြီး ၂ ပွဲနိုင် ၁ပွဲရှုံးရလဒ်ပိုင်ဆိုင်ထားပါတယ်။ 

ဘရာဇီးဟာ မွေထိုင်းကစားသမားပီပီ ခြေကန်ချက်တွေ ကောင်းမွန်ပါတယ်။ အနိမ့်ကန်ချက်တွေနဲ့ ပြိုင်ဘက်ကစားသမားအာရုံရှုပ်ထွေးအောင်လုပ်ပြီးမှ အမြင့်ကန်ချက်ကို ရုတ်တရက်ထုတ်သုံးတတ်သူ ဖြစ်ပါတယ်။ အနီးကပ်ရင်ဆိုင်ထိုးသတ်ချိန်တွေမှာလည်း သူ့ကို အပိုင်မချုပ်နိုင်ရင် လျှင်မြန်ထိရောက်တဲ့ တံတောင်ရိုက်ချက်တွေ ထွက်လာတတ်ပါတယ်။ 

ထိုးချက်ကန်ချက်တွေ ပြင်းထန်တာမျိုးတွေ့ရနည်းပေမယ့် နည်းစနစ်ပိုင်းကောင်းမွန်ပြီး ပြိုင်ဘက်ကစားသမားဆီက အမှတ်ရအောင်ထိုးသတ်နိုင်ကာ သက်လုံပိုင်းလည်း အတန်အသင့်ကောင်းမွန်ပါတယ်။ 

ပြိုင်ဘက်ကစားသမားဆီက အမှတ်ရအောင်ထိုးသတ်ဖို့အတွက် သူ့ကိုယ်သူလုံအောင်ကာလွန်းတာကြောင့် ပြိုင်ဘက်ရဲ့ထောက်လက်သီးဒဏ်ကို မကြာခဏခံရတာတော့ တွေ့ရပါတယ်။ ဆိုင်ထိုးပြိုင်ထိုးချိန်မှာလည်း လက်သီးထက် တံတောင်ရိုက်ချက်ကိုသာ အားကိုးများတာကြောင့် အကွာအဝေးချိန်ဆထိုးတတ်တဲ့ ဖိုက်တာနဲ့ဆိုရင် အထိနာသွားနိုင်ပါတယ်။ 

သွေးလင်းထက်ကတော့ ရိုးရာကစားသမားဘဝမှာကတည်းက ထိုးသတ်ပုံကောင်းမွန်တဲ့ကစားသမားအဖြစ် အသိအမှတ်ပြုခံထားရသူဖြစ်ပြီး ONE မှာ ပထမပွဲကို အမှတ်အသာနဲ့ အနိုင်ယူထားနိုင်ပါတယ်။ ထိုးသတ်ပုံစုံလင်တဲ့ကစားသမားဖြစ်ပြီး လက်သီးပါဝါမြင့်ကာ ပြိုင်ဘက်ကို လဲကျအောင်ထိုးနိုင်တာလည်းတွေ့ရပါတယ်။ ပထမပွဲတုန်းကလည်း ပြိုင်ဘက်က မာဂုဏ်မြင့်လွန်းတာကြောင့်သာ အလဲထိုးဖို့အခွင့်မသာခဲ့တာပါ။

ဒီပွဲမှာ သွေးလင်းထက် အမှတ်မထင်သုံးတတ်တဲ့ အနိမ့်ကန်ချက်ပြင်းပြင်းတွေနဲ့ ဒူးတိုက်ချက်တွေကို အချိန်ကိုက်အသုံးချနိုင်မလား စောင့်ကြည့်ရမှာဖြစ်ပြီး ပြိုင်ဘက်နဲ့ပူးကပ်ချိန်မှာ တံတောင်ရိုက်ချက်ကို ဦးအောင်ထုတ်နိုင်ဖို့ လိုမယ်ထင်ပါတယ်။ 

ပြိုင်ဘက်ထက် လက်သီးပါဝါပိုသာပေမယ့် ပြိုင်ဘက်ဟာ ထိုင်းကစားသမားဖြစ်နေပြီး အားပေးဝန်းရံသူ များတာကိုသတိပြုရမှာပါ။ သွေးလင်းထက်အနေနဲ့ ONE ရဲ့ ဒေါ်လာတသိန်းတန်စာချုပ်တင်မကဘဲ ချန်ပီယံခါးပတ်ကိုပါ မျှော်လင့်ထားတယ်ဆိုရင် ဒီလိုပွဲတွေကို အနိုင်ထိုးသတ်နိုင်ဖို့ လိုပါတယ်။ 

သွေးလင်းထက် ပါဝင်ထိုးသတ်သွားမယ့် ONE Firday Fights 85 ကို နိုဝင်ဘာ ၁ ရက် ဒီနေ့ည ၇ နာရီမှာ စတင်ကျင်းပသွားမှာဖြစ်ပါတယ်။ 

Photo – One Lumpinee FC