စစ်ကိုင်း၊ ဖေဖော်ဝါရီ ၁၊ ၂၀၂၅။
စစ်ကိုင်းတိုင်း၊ ဝက်လက်မြို့နယ်အရှေ့ခြမ်းမှာ ရွှေဘိုခရိုင်တပ်ရင်း ၁၅ က ဦးဆောင်ကာ ကိုယ်ထူကိုယ်ထ ဖွင့်လှစ်ထားတဲ့စာသင်ကျောင်းက ဆရာမတွေနဲ့ ကျောင်းသားတွေကို အလှူရှင်တွေကိုယ်စား စာရေးကိရိယာနဲ့ ငွေကြေးထောက်ပံ့ပေးခဲ့တယ်လို့ ရွှေဘိုခရိုင်တပ်ရင်း ၁၅ ဆီကသိရပါတယ်။
အဲ့ဒီကျောင်းက ကျောင်းသား၊ ကျောင်းသူ ၄၅ ဦးအတွက် ဗလာစာအုပ် ၁ ဒါဇင်၊ ခဲတံ ၄ ချောင်းစီနဲ့ ဆရာမ ၃ ဦး၊ ဆရာ ၁ ဦး စုစုပေါင်း ၄ ဦးအတွက် ငွေကျပ် ၁ သိန်းစီကို အလှူရှင် ၂ ဦးရဲ့ကိုယ်စားလှူဒါန်းခဲ့တာလို့ ရွှေဘိုခရိုင်တပ်ရင်း ၁၅ တပ်ရင်းမှူး ဗိုလ်ကောက်ရိုးက ပြောပါတယ်။
အလှူရှင်မရှိတဲ့လတွေမှာ ကျောင်းသားကျောင်းသူတွေအတွက်လိုအပ်တဲ့ ဗလာစာအုပ်၊ သင်ရိုးစာအုပ်၊ စာရေးကိရိယာနဲ့ ကျောပိုးအိတ် စတာတွေကို တပ်ရင်းရန်ပုံငွေထဲ ဝယ်ယူထောက်ပံ့ပေးတယ်လို့ ဆက်ပြောပါတယ်။
ဒါ့အပြင် ဆရာ ဆရာမ ၄ ဦးကိုလည်း လစဥ် ကျောင်းသားမိဘတွေက ၁ လကို ငွေကျပ် ၄ သောင်းစီ ထောက်ပံ့ပေးတယ်လို့ ဆိုပါတယ်။
အဲဒီစာသင်ကျောင်းဟာ ၂၀၁၈ ခုနှစ်က ဗိုလ်ကြီး နေမျိုးဇင်လှူဒါန်းခဲ့တဲ့ ကိုယ်ထူကိုယ်ထကျောင်းဖြစ်ပြီး အာဏာသိမ်းချိန်အစပိုင်းမှာ ဖွင့်လှစ်နိုင်ခဲ့ခြင်းမရှိဘဲ ၂၀၂၃ ဖေဖော်ဝါရီ ၁၃ ရက်မှာ ရွှေဘိုခရိုင်တပ်ရင်း ၁၅ က ဦးဆောင်ကာ ပြန်လည်ဖွင့်လှစ်ခဲ့တာလို့ ဆိုပါတယ်။
တည်းဖြတ် – HP