မြေလတ်အသံ၊ မေ ၂၁၊ ၂၀၂၅။

ကချင်ပြည်နယ်၊ ဗန်းမော်မြို့နယ်အတွင်း ပျက်ကျခဲ့တဲ့ စစ်ကောင်စီတပ်သယ်ယူပို့ဆောင်ရေးရဟတ်ယာဉ်ဟာ စက်ချို့ယွင်းတာကြောင့်လို့ စစ်ကောင်စီတပ်က မေ ၂၀ ရက် ယမန်နေ့ညပိုင်းမှာ ၎င်းတို့သတင်းထုတ်ပြန်ရေးမီဒီယာတွေကတဆင့် ထုတ်ပြန်လာပါတယ်။

မေ ၂၀ ရက် နေ့လယ်ပိုင်းမှာ ဗန်းမော်မြို့နယ်အတွင်းရှိ စစ်ကောင်စီတပ်စခန်းတွေကို ထောက်ပံ့ရေးပစ္စည်းတွေ သွားရောက်ပို့ဆောင်ပြီး ပြန်လည်ထွက်ခွာလာစဉ် မြို့အနောက်တောင်ဘက် မီတာ ၁၄,၀၀၀ ခန့်အကွာအရောက်မှာ ရုတ်တရက်စက်ချို့ယွင်းပြီး မတော်တဆပျက်ကျခဲ့တာလို့ ဆိုပါတယ်။

ကချင်လွတ်မြောက်ရေးတပ်မတော် – KIA ပြောခွင့်ရ ဗိုလ်မှူးကြီး နော်ဘူ က ဗန်းမော်အခြေစိုက် စကခ ၂၁ ကိုလာတဲ့ စစ်ကောင်စီတပ်ထောက်ပို့ရဟတ်ယာဉ် ၃ စီးတွဲမှာ ၂ စီးကို KIA နဲ့ ပူးပေါင်းတပ်တွေက ဗန်းမော်မြို့အနောက်ဘက် ဧရာဝတီမြစ်ကမ်းအနီးမှာ ပစ်ခတ်နိုင်ခဲ့ပြီး ၁ စီး မှာ မီးလောင်ပြီးနောက် ရွှေကူမြို့နယ်တောတောင်အတွင်းကို ပျက်ကျသွားခဲ့တာလို့ ပြောပါတယ်။

ရဟတ်ယာဉ်ပျက်ကျခဲ့တဲ့နေရာဟာ KIA တပ်ရင်း ၅ နယ်မြေဖြစ်ပြီး ယမန်နေ့ညပိုင်းက လူမှုကွန်ယက်မှာပြန့်နှံ့လာတဲ့ရုပ်သံအရ ရဟတ်ယာဉ်မီးလောင်ပျက်ကျတဲ့နေရာအနီးမှာ မျိုးထက်အောင် အမည်ရှိ ဗိုလ်ကြီးအဆင့် ရဟတ်ယာဉ်မှူး ၁ ဦးသေဆုံးနေတာကိုလည်း တွေ့မြင်ရပါတယ်။

စစ်ကောင်စီအနေနဲ့ ယခင်က ရဟတ်ယာဉ်၊လေယာဉ်တွေ စက်ချို့ယွင်းပျက်ကျမှုဖြစ်စဉ်ဖြစ်ပွားပါက ကြားဖြတ်သတင်းနဲ့ချက်ချင်းထုတ်ပြန်လေ့ရှိပေမယ့် ယခုဖြစ်စဥ်မှာတော့ ရဟတ်ယာဉ်ပျက်ကျနေရာက ရုပ်သံပြန့်နှံ့လာပြီး စစ်တပ်ထောက်ခံသူတွေအကြား ဝေဖန်မှုတွေမြင့်တက်လာပြီးနောက် စစ်ကောင်စီဘက်က သတင်းထုတ်ပြန်လာတာပါ။

အဆိုပါ စစ်ကောင်စီရဟတ်ယာဉ်ပေါ်မှာ စစ်ကောင်စီတပ်ဖွဲ့ဝင် ၂၀ ခန့်ပါနိုင်ပြီး အသက်ရှင်ကျန်ရစ်သူမရှိကြောင်း ဗိုလ်မှူးကြီး နော်ဘူ က ပြောဆိုထားကာ သေဆုံးသူတွေအနက် ဗျူဟာမှူးပါဝင်တယ်ဆိုတာကိုတော့ သူ့အနေနဲ့အတည်မပြုကြောင်း ပြောပါတယ်။

မင်းလှ၊ ဧပြီ ၂၃၊ ၂၀၂၅။

ပဲခူးတိုင်းအနောက်ခြမ်း၊ မင်းလှမြို့နယ်၊ ပဲခူးရိုးမတောင်ခြေရှိ ကျေးရွာတွေကို စစ်ကောင်စီတပ်က ဧပြီ ၂၂ ရက် နေ့လယ် ၂ နာရီကျော်လောက်မှာ လေကြောင်းကနေ ဗုံးကြဲပစ်ခတ်ခဲ့တယ်လို့ မင်းလှမြို့နယ်ပြည်သူ့ကာကွယ်ရေးတပ်ဖွဲ့ဝင်တဦးက ပြောပါတယ်။

မင်းလှမြို့နယ်ထဲက ညောင်သုံးပင်၊ အညာတန်း၊ သင်္ကန်းချောင်နဲ့ ဦးတိုရွာ(တောင်စု)ထိပ်အနီးတို့ကို ရဟတ်ယာဉ်ပေါ်ကနေ ဗုံးကြဲတိုက်ခိုက်တာအပြင် စက်သေနတ်တွေနဲ့ပါပစ်ခတ်ခဲ့တာပါ။

“ဗုံးကြဲပစ်ခတ်ခံရတဲ့ရွာတွေက ညောင်သုံးပင်ရွာလည်း တိုက်ခိုက်ခံရတယ်၊ အညာတန်းရွာမှာက ဗုံးက ရေကန်ထဲကျတာတဲ့ ကျောက်တံခါးဘုန်းကြီးကျောင်းလည်းထိတယ်။ ဒါပေမယ့် လူမနေလို့ ထိခိုက်မှုမရှိဘူး။” လို့ ‌ဒေသခံပြည်သူ့ကာကွယ်ရေးတပ်ဖွဲ့ဝင်တဦးက ပြောပါတယ်။

လေကြောင်းတိုက်ခိုက်တာနဲ့ပတ်သက်ပြီး ထိခိုက်သေဆုံးမှုအခြေအနေကိုတော့ အတည်မပြုနိုင်သေးဘူးလို့ ဆိုပါတယ်။

လေကြောင်းမတိုက်ခိုက်ခင် အဲ့ဒီနေ့မနက် ၁၁ နာရီလောက်က မင်းလှမြို့နယ်၊ ရန်ကုန်-ပြည်လမ်းမှာ စစ်ကောင်စီတပ်သား ၁ ဦးပစ်ခတ်ခံရတဲ့ဖြစ်စဉ်ဖြစ်ခဲ့ပြီး အဲ့ဒီနောက်မှ လေကြောင်းတိုက်ခိုက်မှု ဖြစ်ခဲ့တာလို့ ဒေသခံတဦးက ပြောပါတယ်။

ပြီးခဲ့တဲ့ မတ် ၂၈ ရက်ညကလည်း မင်းလှမြို့နယ်ပြည်သူ့ကာကွယ်ရေးစခန်းအနီးကို စစ်ကောင်စီက လေကြောင်းကနေဗုံးကြဲချခဲ့ပေမယ့် ထိခိုက်မှုမရှိခဲ့ဘူးလို့ အထက်ပါပြည်သူ့ကာကွယ်‌ရေးတပ်ဖွဲ့ဝင်တဦးဆီက သိရပါတယ်။

စစ်ကောင်စီဟာ ဧပြီ ၂ ရက်ကစတင်ကာ ဧပြီ ၃၀ ရက်အထိ ယာယီအပစ်ရပ်ဆဲကြောင်း ကြေညာထားခဲ့ပေမယ့် အရပ်သားနေအိမ်တွေကို လေကြောင်းကနေဗုံကြဲတာ၊ လက်နက်ကြီးနဲ့ ပစ်ခတ်တာတွေကို ဆက်လက်လုပ်ဆောင်လျှက်ရှိနေပါတယ်။

သတင်း – မောင်ဆွေအင်း၊ စာတည်း – လင်း