ပဲခူး၊ ဩဂုတ် ၁၆၊ ၂၀၂၅။

စစ်ကိုင်း၊ မန္တလေး၊ မကွေးနဲ့ ပဲခူးတိုင်းတွေအပါအဝင် တိုင်းနဲ့ပြည်နယ်တချို့မှာ သြဂုတ် ၁၆ ရက် ဒီနေ့ကနေ ၁၈ ရက်အထိ ၃ ရက်အတွင်း မိုးရွာသွန်မှုများပြီး လေပြင်းတိုက်ခတ်နိုင်တယ်လို့ မိုးလေဝသနဲ့ ဇလဗေဒညွှန်ကြားမှူးဦးစီးဌာနက ဒီနေ့မှာသတိပေးထုတ်ပြန်ပါတယ်။

ယနေ့မနက် ၇ နာရီ တိုင်းထွာချက်အရ ကပ္ပလီပင်လယ်ပြင်နဲ့ ဘင်္ဂလားပင်လယ်အော်တောင်ပိုင်းတို့မှာ မုတ်သုံလေ အားကောင်းနေတာကြောင့် စစ်ကိုင်းတိုင်းအထက်ပိုင်းမှာ နေရာကျဲကျဲ၊ စစ်ကိုင်းတိုင်း အောက်ပိုင်းတို့နဲ့ မကွေးတိုင်းတို့မှာ နေရာအနှံ့အပြား မိုးထစ်ချုန်းရွာပြီး၊ မန္တလေးတိုင်းနဲ့ ပဲခူးတိုင်းတို့မှာ နေရာကွက်ပြီး မိုးကြီးနိုင်တယ်လို့ ဆိုထားပါတယ်။

ဒါ့အပြင် အဆိုပါဒေသတွေမှာ မိုးတိမ်တောင်တွေဖြစ်ထွန်းလျက်ရှိပြီး မိုးတိမ်တောင်တွေရွေ့လျားရာ နေရာတလျှောက်မှာ မိုးရွာသွန်းတာနဲ့အတူ လေပြင်းတိုက်တာ၊ မိုးထစ်ချုန်းတာ၊ မိုးကြိုးပစ်တာ၊ လျှပ်စီးလက်တာနဲ့ မိုးသီးကြွေတာတွေလည်း ဖြစ်ပေါ်နိုင်တာကြောင့် ကြိုတင်သတိပြုနိုင်ကြဖို့လိုတယ်လို့လည်း ထုတ်ပြန်ချက်မှာဖော်ပြပါတယ်။

မိုးဇလရဲ့ ဩဂုတ် ၁၈ ရက်အထိ ခန့်မှန်းချက်အရ မန္တလေးတိုင်း၊ ပဲခူးတိုင်း၊ စစ်ကိုင်းတိုင်းတို့မှာ မိုးရွာသွန်းမှု ပိုများလာနိုင်တယ်လို့ ဆိုပါတယ်။

ဒါ့အပြင် မိုးဇလရဲ့ ဩဂုတ် ၁၆ ရက် နေ့လယ် ၁၂ နာရီခွဲ ထုတ်ပြန်ချက်အရ စစ်တောင်းမြစ်ရေဟာ ညောင်လေးပင်မြို့နယ်၊ မဒေါက်မြို့ စိုးရိမ်ရေမှတ် ၁၀၇၀ စင်တီမီတာရဲ့အထက် ၁၀၂၄ စင်တီမီတာမှာရှိနေပြီး လာမယ့်ရက် တွေမှာ ဆက်လက်ကျဆင်းနိုင်တယ်လို့ ထုတ်ပြန်ထားပါတယ်။

စစ်တောင်းမြစ်ရေဟာ စိုးရိမ်ရေမှတ်အထက်ရှိနေသေးတာကြောင့် မဒေါက်မြို့ အနိမ့်ပိုင်းရပ်ကွက်ဖြစ်တဲ့ မွန်စုပိုင်း အပါအဝင် ဘုရားဖြူ၊ ညောင်ပင်ပေါက်၊ အင်းချောင်၊ ဖိုးကုန်း၊ ဇာပြတ်၊ သောင်ကြီး၊ ရေပေါ်သောင်အပါအဝင် ကျေးရွာပေါင်း ၁၀ လောက်မှာ အနိမ့်ပိုင်းတွေမှာ ရေ ၃ ပေလောက် ကျန်နေသေးပေမယ့် စိုးရိမ်ရတဲ့အခြေအနေမရှိဘူးလို့ သိရပါတယ်။

မြေလတ်အသံ၊ သြဂုတ် ၁၈၊ ၂၀၂၂။

ယနေ့သြဂုတ် ၁၈ရက် မြန်မာစံတော်ချိန် (၀၅: ၃၀)နာရီအချိန် တိုင်းထွာချက်များအရ ဘင်္ဂလားပင်လယ် အော်အရှေ့အလယ်ပိုင်းနှင့် ရခိုင်ကမ်းရိုးတန်းအနီးတွင် အားကောင်းသောလေပွေလှိုင်းတစ်ခုဖြစ်ပေါ်နေသဖြင့် ဒေသအလိုက်နေရာကွက်၍ မိုးကြီးခြင်းများနှင့် အတူ လေပြင်းတိုက်ခတ်ခြင်းများ ဖြစ်ပေါ်နိုင်သည်ဟု မိုးလေဝသနှင့် ဇလဗေဒညွှန်ကြားမှူးဦးစီးဌာနက ထုတ်ပြန်လိုက်သည်။

မိုးသက်လေပြင်းကျစဉ် ရေပြင်/မြေပြင်လေသည် တစ်နာရီလျှင် မိုင် (၄၀)အထိ တိုက်ခတ်နိုင်ပြီး လှိုင်းအမြင့်မှာ မြန်မာ့ကမ်းရိုးတန်းတစ် လျှောက် နှင့် ကမ်းလွန်ပင်လယ်ပြင်တို့တွင် (၉)ပေမှ (၁၃)ပေခန့် ရှိနိုင်သည်ဟု ထုတ်ပြန်ချက် အရသိရသည်။

ယင်းကြောင့် ရခိုင်ပြည်နယ်အတွင်း ပြေးဆွဲနေသည့် ရွှေပြည်တန်အမြန်ရေယာဉ်မှာလည်း ယနေ့မှစတင်ကာ တရက် ၂ကြိမ်ပြေးဆွဲမှုကို ၁ကြိမ်သာ ပြေးဆွဲနေရသည်ဟု ရေယာဉ်မန်နေဂျာ ဦးစံမော်သိန်းကပြောသည်။

“ဒီနေ့ဆိုရင် စစ်တွေက မြောက်ဦး၊ မင်းပြား၊ ပေါက်တောမြို့‌တွေကို နံနက်တကြိမ်ပဲထွက်တော့တယ်။ နေ့ခင်းဖက်သားအချိန် မထွက်တော့ဘူး။ ပြီးတော့ ဒီနေ့ဆိုရင် တောင်ကုတ်၊ ကျောက်ဖြူမြို့တွေကို ပြေးဆွဲတာရပ်လိုက်တယ်။ စနေ့နေ့ကျမှဘဲ ရာသီဥတုအခြေအနေအရ ပြေးဆွဲမယ်။”ဟုဆိုသည်။

ယင်းအပြင် မိုးသည်းထန်စွာရွာသွန်းခြင်းနှင့်အတူ လေပြင်းတိုက်ခတ်ခြင်း၊ လျှပ်တစ်ပြက် ရေကြီးခြင်းနှင့် မြေပြိုခြင်းစသည့် သဘာဝဘေးအန္တ ရာယ်များ ဖြစ်ပေါ်နိုင်ပါသဖြင့် ကုန်းမြင့်ဒေသ အနီးတွင် နေထိုင်ကြသူများအနေဖြင့် မြေပြိုမှုအန္တရာ ယ်နှင့် မြစ်ငယ်၊ ချောင်းငယ်များအနီးတွင် နေ ထိုင် ကြသူများအနေဖြင့် ရေကြီး၊ ရေလျှံမှုများကို ကြိုတင်သတိပြုနိုင်ပါရန်နှင့် ပြည်တွင်းရေ ကြောင်းသွားလာရေးနှင့် လေကြောင်းပျံသန်းရေးအနေဖြင့်လည်း သတိပြုနိုင်ပါရန်လည်း တိုက်တွန်းထားသည်။

မြောက်ဦးမြို့နယ်၊ကန့်သရီကျေးရွာမှ ဒေသခံတဦးက”အခုကတော့ မိုးမရွာသေးဘူး။ဒါပေမဲ့ တောင်ဖက်အရပ်က လေပြင်းတိုက်ခတ်နေတယ်။ ကောင်းကင်ကလည်း တိမ်မဲတွေပြည့်နေပါတယ်။ မိုးသဲသဲမဲမဲရွာမယ့် ပုံစံဖြစ်နေပါတယ်” ဟု ဆိုသည်။

အဆိုပါ လေပွေလှိုင်း၏ အရှိန်ကြောင့် ယနေ့နံနက်မှ သြဂုတ် ၂၀ရက်နေ့အတွင်း နေပြည် တော်၊ မန္တလေးတိုင်းဒေသကြီး၊ မကွေးတိုင်းဒေသကြီး၊ ပဲခူးတိုင်းဒေသကြီး၊ ရန်ကုန်တိုင်းဒေသကြီး၊ ဧရာဝတီတိုင်းဒေသကြီး၊ တနင်္သာ ရီတိုင်းဒေသကြီး၊ ချင်းပြည် နယ်၊ ရခိုင်ပြည်နယ်၊ ကရင်ပြည်နယ်နှင့် မွန်ပြည်နယ်တို့တွင် နေရာစိပ်စိပ်မှ နေရာ အနှံ့အပြား မိုးထစ်ချုန်းရွာပြီး၊ မြန်မာ့ကမ်းရိုးတန်းတစ်လျှောက် နှင့် ကမ်းလွန်ပင်လယ်ပြင်တို့တွင် ရံဖန်ရံခါ မိုးသက်လေပြင်းများ ကျရောက်ပြီး လှိုင်းကြီးမည်ဟု သိရသည်။

ယမန်နေ့ ဩဂုတ်လ ၁၇ရက်နေ့တွင်လည်း မိုးအဆက်မပြတ်ရွာသွန်းခဲ့ခြင်းကြောင့် ရန်ကုန် တိုင်းဒေသကြီးနှင့် ရခိုင်ပြည်နယ်၊ ကျောက်ဖြူမြို့တို့တွင် ရေ၅ပေခန့်နစ်မြုပ်ခဲ့သည်ဟု မြို့ခံများကပြောဆိုကြသည်။