ပင်မသပိတ်

ကလေး၊ ဧပြီ ၂၀၊ ၂၀၂၃။

စစ်ကိုင်းတိုင်း၊ ကလေးမြို့နယ်မှာ သင်္ကြန်ကာလ အတာသပိတ်ပြုလုပ်ခဲ့တဲ့ ကလေးမြို့ပင်မသပိတ်အင်အားစုမှ အဖွဲ့ဝင်တချို့ရဲ့နေအိမ်တွေကို စစ်ကောင်စီက စက်ယန္တရားတွေနဲ့ ဖြိုချဖျက်ဆီးနေပြီး ဒီကနေ့ မနက်ကလည်း နေအိမ်တလုံးကို ထပ်မံဖြိုချ လိုက်တယ်လို့ သိရပါတယ်။

ဧပြီလ ၁၆ ရက်နေ့က တံတားဦးထိပ်နားမှာ အတာသပိတ်ပြုလုပ်နေစဉ် စစ်ကောင်စီက ပစ်ခတ်ဖမ်းဆီးလို့ မကျိန်ဒိတ်ကိမ်၊ မအိစံ၊ ကိုမျိုးကိုဝင်းနဲ့ ကိုသန်းစိုးဦးတို့ ၄ ဦး ဖမ်းဆီးခံခဲ့ရတာလည်း ဖြစ်ပါတယ်။

အောင်သစ္စာရပ်ကွက် နယ်မြေ – ၈ က ဖမ်းဆီးခံထားရတဲ့ သပိတ်တပ်ဖွဲ့ဝင်တဦးဖြစ်တဲ့ မအိစံရဲ့နေအိမ်ကို ဧပြီလ ၂၀ ရက် ဒီကနေ့ မနက်ပိုင်းမှာ ဖျက်စီးခဲ့တာ ဖြစ်ပါတယ်။

“မနေ့ညနေကလည်း ကလေးလမ်းဆုံဘက်မှာ ထပ်ဖြိုကြတယ်။ မိတဲ့ထဲက ယောက်ျားလေးတွေရဲ့ အိမ်တော့ မပါသေးဘူး။ ဒီနေ့ မအိစံအိမ်ကို စက်ကြီးတွေနဲ့ လာဖြိုသွားတယ်။ ဖမ်းမိတဲ့နေ့က ချိတ်ပိတ်တယ်။ နောက်ရက်တွေကျ လိုက်ဖြိုနေတာ။ တခြားသူတွေ မလုပ်ရဲအောင် တမင်လုပ်ပြနေတာထင်တယ်” လို့ ကလေးမြို့ဒေသခံတဦးက ပြောပါတယ်။

ဧပြီလ ၁၉ ရက် မနက်ပိုင်းက တောင်ဖီလာရပ်ကွက်မှာရှိတဲ့ မကျိန်ဒိတ်ကိမ်ရဲ့‌ နေအိမ်ကို ဖြိုချခဲ့ပြီး၊ ညနေပိုင်းမှာတော့ သပိတ်ကိုဖမ်းဆီးစဉ် ထွက်ပြေးလွတ်မြောက်ခဲ့တဲ့ အဖွဲ့ဝင် မပွားလေးရဲ့ အောင်မင်္ဂလာရပ်ကွက်က နေအိမ်နဲ့ စင်္ကြာလမ်းက တခြားအဖွဲ့ဝင်တဦးရဲ့ နေအိမ်ကို ဖြိုချသွားတယ်လို့ သိရပါတယ်။

စာတည်း – လင်းဇေ

ကလေး၊ ဧပြီ ၁၆၊ ၂၀၂၃။

စစ်ကိုင်းတိုင်း၊ ကလေးမြို့ပေါ်သပိတ်ပြုလုပ်နေချိန် စစ်ကောင်စီရဲ့ ပစ်ခတ်ဖြိုခွင်းတာကို ခံခဲ့ရပြီး အဖွဲ့ ဝင် ၄ ဦးဖမ်းဆီးခံခဲ့ရတယ်လို့ သိရပါတယ်။

၇၉၉ ရက်မြောက် ဆန္ဒပြသပိတ်အဖြစ် ယနေ့ ဧပြီလ ၁၆ရက် နေ့လည်ပိုင်းက ကလေးမြို့၊ တံတားဦးထိပ်နားမှာ ဆန္ဒထုတ်ဖော်ဖို့ စာရွက်ကပ် ပြင်ဆင်နေချိန် စစ်ကောင်စီအဖွဲ့ ဖြတ်သွားချိန် တွေ့မိရာက ဖြိုခွင်းခံခဲ့ရတာဖြစ်တယ်လို့ သပိတ်အဖွဲ့ဝင်တွေနဲ့ နီးစပ်သူက ဆိုပါတယ်။

“အာဏာသိမ်းထဲက သပိတ်ကရက်မပျက်ခဲ့ဘူး၊ နေ့တိုင်းထွက်နေတော့ စောင့်ဖမ်းဖို့ချောင်းတာလား၊ သတင်းပေးနဲ့တွေ့လားမသိဘူး၊ မအိစံကတော့မလွယ်ဘူး၊ အသေရရ အရှင်ရရ ပစ်ဖမ်းဖို့ ထုတ်ထားတာ၊ ** တွေက သူ့ကို ကြိမ်းထားကြတာကြာပြီ” လို့ သပိတ်အဖွဲ့ဝင်တွေနဲ့ နီးစပ်သူတဦးက ပြောပါတယ်။

ပစ်ခတ်ဖြိုခွင်းခံရလို့ ကလေးပင်မသပိတ်အင်အားစုက အဖွဲ့ဝင်တွေဖြစ်တဲ့ မအိစံ(ပစ်မိန့်ထုတ်ခံထားရသူ)၊ ကိုမျိုးကို၊ ကိုဂွတို၊ မကင် တို့ ၄ ဦး ဖမ်းဆီးခံခဲ့ရပြီး ကလေး ဒကစ ထဲကို ခေါ်ဆောင်သွားတယ်လို့ သိရပါတယ်။

ကလေးပင်မသပိတ်အင်အားစုကလည်း အဆိုပါ အဖွဲ့ဝင်တွေနဲ့ အဆက်သွယ်ရှိထားသူတွေ အမြန်ဆုံးရှောင်တိမ်းကြဖို့ သတိပေးထားပြီး အခြေနေတွေကတော့ စောင့်ကြည့်နေဆဲပဲ ဖြစ်ပါတယ်။

ကလေးမြို့ပေါ်မှာ အခုရက်ပိုင်း ဖမ်းဆီးမှုတွေများလာပြီး ပြီးခဲ့တဲ့ ဧပြီလ ၁၂ရက်နေ့ မနက် ၃ နာရီကလည်း သာစည်ကျေးရွာအနီးမှာရှိတဲ့ ပကဖ စခန်းတခု စီးနင်းခံခဲ့ရပြီး ရဲဘော် ၉ ဦး အဖမ်းခံရကာ တဦးသေဆုံးခဲ့ ပါသေးတယ်။

စာတည်း – 007