◼ နိုင်ငံတော်လုံခြုံရေးနှင့်အေးချမ်းသာယာရေးကော်မရှင်ဖွဲ့ကာ စစ်ခေါင်းဆောင် ၂ ဦးက ဝန်ကြီးချုပ် အထက်က အာဏာချုပ်ကိုင်ထား
မြေလတ်အသံ၊ ဇူလိုင် ၃၁ ၊ ၂၀၂၃ ။
ယာယီသမ္မတတာဝန်ရယူထားသူ စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်က ဇူလိုင် ၃၁ ရက် ဒီကနေ့မှာ အမျိုးသားလုံခြုံရေးနှင့်ကာကွယ်ရေးကောင်စီ(ကာလုံ) ခေါ်ယူပြီး စစ်အာဏာသိမ်းခဲ့ချိန် ၂၀၂၁ ဖေဖော်ဝါရီ ၁ ရက်မှာ ကာကွယ်ရေးဦးစီးချုပ်ထံအပ်နှံထားတဲ့ အာဏာကို ပယ်ဖျက်ကြောင်း၊ စစ်အာဏာသိမ်းပြီးနောက် ဖွဲ့စည်းထားတဲ့ စစ်ကောင်စီကိုဖျက်သိမ်းကြောင်း၊ နိုင်ငံတော်လုံခြုံရေးနှင့်အေးချမ်းသာယာရေးကော်မရှင်နဲ့ အစိုးရသစ်ထပ်မံဖွဲ့စည်းကြောင်း ကြေညာချက်တွေ အသီးသီးထုတ် ပြန်လာပါတယ်။
ထုတ်ပြန်ချက်တွေအရ စစ်ခေါင်းဆောင်ဦးဆောင်တဲ့ ကာလုံက ကြားဖြတ်အစိုးရအဖွဲ့အနေနဲ့ ဗိုလ်ချုပ်ကြီး ညိုစောကို စစ်ဘက်ရာထူးကအနားပေးပြီး ၎င်းတို့ဖွဲ့စည်းတဲ့အစိုးရအဖွဲ့မှာ ဝန်ကြီးချုပ်အဖြစ် ခန့်အပ်ကြောင်း ဖော်ပြထားပါတယ်။
အဲ့ဒီအစိုးရဖွဲ့စည်းမှုမှာ နောက်ထပ် ဗိုလ်ချုပ်ကြီး ၂ ဦး ဖြစ်တဲ့ မြထွန်းဦးနဲ့ တင်အောင်စန်း တို့ကို စစ်ဘက်ရာထူးက ထပ်မံအနားပေးပြီး နယ်ဘက်ရာထူးတွေကတော့ ယခင်စစ်ကောင်စီလက်ထက်ကအတိုင်း ဦးမြထွန်းဦးက ပို့ဆောင်ဆက်သွယ်ရေးဝန်ကြီး၊ ဦးတင်အောင်စန်း ကိုတော့ နိုင်ငံတော်သမ္မတရုံးဝန်ကြီးဌာန ဝန်ကြီး ဆိုကာ အသီးသီးဆက်လက်ခန့်အပ်ထားသလို ကျန်ဝန်ကြီးဌာနတွေက ဝန်ကြီးတွေကလည်း ယခင်အတိုင်း အပြောင်းအလဲမရှိခဲ့ပါဘူး။
ဒါ့အပြင် ကာလုံကနေ နိုင်ငံတော်ကာကွယ်ရေး၊ လုံခြုံရေးနှင့်အေးချမ်းသာယာရေး၊ ပါတီစုံဒီမိုကရေစီအထွေထွေရွေးကောက်ပွဲကျင်းပနိုင်ရေးဆိုကာ နိုင်ငံတော်လုံခြုံရေးနှင့်အေးချမ်းသာယာရေးကော်မရှင်ကို ဖွဲ့စည်းကြောင်း တပြိုင်နက်ထုတ်ပြန်လာပါတယ်။
အဲ့ဒီ နိုင်ငံတော်လုံခြုံရေးနဲ့ အေးချမ်းသာယာရေးကော်မရှင်မှာ ဥက္ကဌအဖြစ် စစ်ခေါင်းဆောင် ဗိုလ်ချုပ် မှူးကြီး မင်းအောင်လှိုင်၊ ဒုဥက္ကဌ အဖြစ် ဒုတိယဗိုလ်ချုပ်မှူးကြီး စိုးဝင်း တို့က အသီးသီးနေရာယူထားပြီး အသစ်ဖွဲ့စည်းလိုက်တဲ့ အစိုးရအဖွဲ့က ဝန်ကြီးချုပ် ဦးညိုစောက အဖွဲ့ဝင်အဖြစ်ရှိနေတာကြောင့် အာဏာအရပ်ရပ်ကို ဥက္ကဌ နဲ့ ဒုဥက္ကဌ စစ်ခေါင်းဆောင် ၂ ဦးက ဆက်လက်ချုပ်ကိုင်ထားတယ်လို့ နားလည်ရပါတယ်။
အဲ့ဒီ နိုင်ငံတော်လုံခြုံရေးနှင့်အေးချမ်းသာယာရေးကော်မရှင်မှာ အရင် စစ်ကောင်စီအတွင်းရေးမှူး ဗိုလ်ချုပ်ကြီး အောင်လင်းဒွေးက အမှုဆောင်ချုပ်ရာထူးနဲ့ ဦးအောင်လင်းဒွေး အဖြစ် ထည့်သွင်းဖွဲ့စည်းထားတာကြောင့် ဗိုလ်ချုပ်ကြီး အောင်လင်းဒွေးလည်း စစ်ဘက်ရာထူးကနေ အနားပေးခံရတာပါ။
ဒါ့ကြောင့် ယခင်စစ်ကောင်စီမှာ ပါဝင်ခဲ့တဲ့ ဗိုလ်ချုပ်ကြီး ၄ ဦးဖြစ်တဲ့ အောင်လင်းဒွေး၊ ညိုစော၊ တင်အောင်စန်းနဲ့ မြထွန်းဦးတို့ ၄ ဦးအထိ စစ်ဘက်ရာထူးတွေကနေ အနားပေးခံရတာလည်း ဖြစ်ပါတယ်။