ဒဏ်ရာရသူတွေအတွက် ဆရာဝန်မလုံလောက်ဖြစ်နေ

ဒီပဲယင်း၊ မေ ၁၂၊ ၂၀၂၅။

စစ်ကိုင်းတိုင်း၊ ဒီပဲယင်းမြို့နယ်၊ အိုးထိမ်းတွင်းကျေးရွာ စာသင်ကျောင်းကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် အစုလိုက်အပြုံလိုက်သေဆုံးပြီး လက်ရှိမှာ ကလေးအလောင်းတွေအပါ အလောင်း ၂၀ ကျော်တွေ့ရှိထားတယ်လို့ ဒီပဲယင်းဒေသခံတွေဆီက သိရပါတယ်။

မေ ၁၂ ရက် ဒီနေ့မနက် ၉ နာရီခွဲလောက်မှာ ဂျက်ဖိုက်တာနဲ့ ပေါင် ၅၀၀ ဗုံး ၁ လုံးချ တိုက်ခိုက်ခဲ့ရာ အိုးထိမ်းတွင်းကျေးရွာ စာသင်ကျောင်းပေါ်ကျရောက်ပေါက်ကွဲခဲ့တာလို့ ဆိုပါတယ်။

“ကလေးတွေ ကျောင်းတက်နေတဲ့အချိန် ဂျက်ဖိုက်တာနဲ့ ပေါင် ၅၀၀ ဗုံးကြဲချတိုက်ခိုက်သွားတာ၊ ကလေးတွေ ပညာရေးနဲ့မဝေးအောင်လို့ ဘေးရွာက ကလေးတွေပါစုပြီး ပညာသင်ကြားကြတာ၊ ၁၃ နှစ်ဝန်းကျင်ကနေ ၆ နှစ်၊ ၇ နှစ် ကလေးတွေပါတယ်၊” လို့ ဒီပဲယင်းဒေသခံတဦးကပြောပါတယ်။

လက်ရှိမှာ ရှာဖွေကယ်ဆယ်ရေးတွေလုပ်ဆောင်နေချိန် သေဆုံးအလောင်း ၂၀ ကျော် ထိခိုက် ဒဏ်ရာရသူ ၃၀ ကျော်ကယ်ထားနိုင်ပြီး ဘယ်သူဘယ်ဝါတွေဆိုတာတော့ အတည်မပြုနိုင်သေးပါဘူး။

“ဒီရွာကတော့ ဒါပထမဆုံးအကြိမ်ပါ၊ လောလောဆယ်သေဆုံးက ၂၀ ကျော်ရပြီ၊ ထိခိုက်ဒဏ်ရာရလို့ ကယ်ဆယ်တာက ၃၀ ကျော်ပြီ၊ လက်ရှိတော့ ရှာဖွေကယ်ဆယ်နေတုန်းပါ၊ ပြီးတော့မှ ကျောင်းသားစာရင်းနဲ့ ပြန်တိုက်ကြည့်ရမှာပါ၊ ၅ တန်း၊ ၄ တန်း အရွယ်တွေပါ၊”လို့ ဒီပဲယင်း ဒေသခံတဦးက ပြောပါတယ်။

ဗုံးကျရောက်ပေါက်ကွဲခဲ့တဲ့စာသင်ကျောင်း ၁ ထပ်ဆောင် ပြိုကျပျက်စီးသွားခဲ့ပြီး လက်ရှိအချိန်ထိလည်း ဆက်လက်ရှာဖွေရေးတွေလုပ်ဆောင်နေကာ ဒဏ်ရာရသူတွေအတွက်လည်း ဆရာဝန်အင်အားမလုံလောက်ဖြစ်နေတယ်လို့ သိရပါတယ်။

“၁၁ နာရီလောက်က ဆရာမ ၂ ဦးနဲ့ ကျောင်းသား၊ သူ ၁၀ ဦး DB ရပြီးတာ။ ကာတွေနဲ့ ဝိုင်းထုတ်ပေးနေကြတယ်တဲ့။ ထိခိုက်ဦးရေများတော့ ဆရာဝန်အင်အား မလုံလောက်တာရော မနိုင်မနင်းဖြစ်နေတာတဲ့။ ဆေးရုံပို့ဖို့ ဝိုင်းလုပ်နေကြတယ်ဗျ။” လို့ သူကပြောပါတယ်။

မေလဆန်းပိုင်းမှာ စစ်ကိုင်းတိုင်းထဲကမြို့နယ်တွေကို စစ်ကောင်စီကလေကြောင်းကနေ ခပ်စိပ်စိပ်တိုက်ခိုက်တဲ့အတွက် ဒေသခံတွေထိခိုက်သေဆုံးမှုတွေရှိနေပါတယ်။

ပြီးခဲ့တဲ့ မေ ၁၀ ရက်ညနေပိုင်းမှာ ဝက်လက်မြို့နယ်၊ ရွာတော်ကုန်းကျေးရွာကို ပေါင် ၅၀၀ ဗုံးသီးနဲ့ကြဲချတိုက်ခိုက်လို့ ဒေသခံ ၈ ဦးသေဆုံးခဲ့ပါသေးတယ်။

စာတည်း – လင်း

စစ်ကိုင်း၊ ဇန်နဝါရီ ၁၈၊ ၂၀၂၃။

စစ်ကိုင်းတိုင်း၊ ဒီပဲယင်းမြို့နယ်၊ ချောင်းနားကျေးရွာမှာ စစ်ကောင်စီကဖမ်းဆီးခေါ်ဆောင်သွားပြီး နှိပ်စက်ခံရကာ ပြန်လွတ်လာတဲ့ ပြည်သူတဦးဟာ ယမန်နေ့ ဇန်နဝါရီလ ၁၇ ရက်နေ့က ဆုံးပါးသွားခဲ့တယ်လို့ ဒီပဲယင်းမြို့နယ်ညီနောင်များအဖွဲ့ ဆီက သိရပါတယ်။

ချောင်းနားကျေးရွာမှာ ဇန်နဝါရီလ ၉ ရက်နေ့က ခမရ-၃၆‌၄နဲ့ ခလရ-၇၀၁ တပ်ရင်းပူးပေါင်းစစ်ကြောင်းဝင်ကာ နေအိမ်တွေကို မီးရှို့ဖျက်စီးပြီးနောက် ဦးသိန်းထွန်းနဲ့ ဦးမြင့်ဆွေတို့ ၂ ဦးကို ဖမ်းဆီးခေါ်ဆောင်သွားခဲ့တာ လို့ဆိုပါတယ်။

၁၁ရက်နေ့က ပြန်လည်လွတ်မြောက်လာပြီး ဦးသိန်းထွန်းဟာ ဖမ်းဆီးထားစဉ်ကရခဲ့တဲ့ ဒဏ်ရာတွေကြောင့် ဆုံးပါးသွားခဲ့တယ်ဖြစ်ပါတယ်။

“သူက ပြန်ရောက်လာချိန်ထဲက စကားတောင်ကောင်းကောင်းပြောနိုင်တော့တဲ့ အခြေအနေမျိုးမဟုတ်ဘူး၊ ရိုက်နှက်ထားတဲ့ဒဏ်ရာတွေရှိတယ်၊ ခေါင်းတွေမှာပေါက်ပြဲထားတဲ့ဒဏ်ရာတွေရှိတယ် အဲ့ဒဏ်ရာတွေနဲ့ပဲဆုံးသွားတယ်။” လို့ ဒီပဲယင်းမြို့နယ်ညီနောင်များအဖွဲ့ တာဝန်ရှိသူက ပြောပါတယ်။

တဦးကတော့ ပြန်လည်လွတ်မြောက်လာပြီး ကျန်းမာရေးကောင်းမွန်တယ်လို့ ဆိုပါတယ်။

အဲဒီစစ်ကြောင်းဟာ ချောင်းနားရွာက အိမ်ခြေ ၁၄ လုံးကိုမီးရှို့ကာ ရေဦးနယ်ဘက်ကိုထွက်ခွာသွားပြီး၊ ရေဦးနယ် ချမ်းသာရွာက နှစ် ၁၀၀ ကျော်သက်တမ်းရှိ ခရစ်ယာန်ဘုရားကျောင်းကိုမီးရှို့ဖျက်စီးပြီး ရေဦးမြို့စခန်းထဲကို ဝင်ရောက်သွားတယ်လို့ သိရပါတယ်။

ဒီပဲယင်းဟာ တနိုင်ငံလုံးမှာ မီးရှို့ဖျက်စီးခံရတဲ့ အရေတွက် အများဆုံးမြို့နယ်တခုဖြစ်ပြီး၊ အာဏာသိမ်းပြီးနောက်ပိုင်းကစလို့ လက်ရှိအချိန်ထိ ရွာပေါင်း ၄၀ ဝန်းကျင်နဲ့ နေအိမ်အလုံးပေါင်း ၄၈၂၄ လုံး မီးရှို့ဖျက်ဆီးခံထားရတာလည်း ဖြစ်ပါတယ်။

စစ်ကိုင်း၊ ဒီဇင်ဘာ ၂၃၊ ၂၀၂၂။

စစ်ကိုင်းတိုင်း၊ ဒီပဲယင်းမြို့နယ်မှာ စစ်ကောင်စီတပ်စစ်ကြောင်းထိုးပစ်ခတ်နေပြီး ကလေးငယ်သုံးဦး လက်နက်ကြီးထိမှန်ထားတယ်လို့ ဒီပဲယင်းမြို့နယ်ညီနောင်များအဖွဲ့က ဆိုပါတယ်။

ထိခိုက်ဒဏ်ရာရသူသုံးဦးမှာ မသိမ့်ရတာနာစိုး(ခ)မဖွေးဖွေး အသက် ၁၁ နှစ်ဖြစ်ပြီး ဗိုက်ပေါက်ထွက်ခဲ့သလို မောင်အောင်ငွေဖြိုး အသက် ၁၄ နှစ်မှာ နောက်ကျောလက်နက်ကြီးစ ဖောက်ဝင်ပြီး ဒူးခေါင်းထိခိုက်ခဲ့ပြီး ကျန်ကလေးငယ်တဦးကတော့ လက်ပွန်းပဲ့-အသေးစားဒဏ်ရာရရှိခဲ့တယ် လို့ဆိုပါတယ်။

စစ်ကြောင်းထိုးမီးရှို့နေတဲ့ စစ်ကောင်စီတပ်ဟာ ဒီနေ့ဒီဇင်ဘာလ ၂၃ ရက်မှာ ဒီပဲယင်းမြို့နယ်၊ အနောက်တောင်ဘက်ခြမ်းကျေးရွာတွေကို ဝင်ရောက်လာသလို လက်နက်ကြီးတွေနဲ့ပစ်ခတ်လို့ ဒီပဲယင်းမြို့နယ်၊ ကြည်ဘုရားထွက်ကျေးရွာအတွင်းကျရောက်ပြီး ကလေးငယ်သုံးဦးလက်နက်ကြီးထိမှန်ခဲ့သလို ဒေသခံတွေ ထွက်ပြေးတိမ်းရှောင်နေရတယ်လို့ ဆိုပါတယ်။

“ကလေးတွေအပြင် နွားတွေလည်းထိမှန်ခဲ့တယ်၊ ခုကတော့ အားလုံးပြေးနေရလို့ စာရင်းအတိအကျမသိနိုင်သေးဘူး”လို့ ဒီပဲယင်းမြို့နယ်ညီနောင်များအဖွဲ့က ဆိုပါတယ်။

စစ်ကောင်စီတပ်ဟာဒီဇင်ဘာလအတွင်းမှာပဲ ဒီပဲယင်းမြို့နယ်၊ ချောင်းပေါက်ကျေးရွာကနေအိမ် ၃၂ လုံး ကိုမီးရှို့ဖျက်ဆီးသွားခဲ့သလို ဒီဇင်ဘာလ ၂၂ ရက်ကလည်း ပျံကျရွာကို မီးဝင်ရှို့သွားခဲ့ကြောင်း သိရပါတယ်။

ဒီပဲယင်းမြို့နယ်အတွင်း စစ်ကောင်စီတပ်ဟာ ဒီဇင်ဘာလ ၁ ရက်မှ ၁၀ ရက်အထိ ကျေးရွာပေါင်း ၁၉ ရွာမှ ပြည်သူနေအိမ် ၁၇၀၀ ကျော်မီးရှို့ဖျက်ဆီးသွားခဲ့ပြီး၊ အာဏာသိမ်းပြီးချိန်ကစလို့ ၂ နှစ်နီးပါး ကာလအတွင်း မီးရှို့ဖျက်ဆီးခံရမှု နေအိမ် ၃၀၀၀ ကျော်သွားပြီလို့ဆိုပါတယ်။

ဒီဇင်ဘာလအတွင်း စစ်ကြောင်းထိုးဖျက်ဆီးမှုတွေကြောင့် မုံရွာ – ဒီပဲယင်း – ရေဦး ကားလမ်း ယာဥ်များအသွားအလာတွေရပ်နားပေးကြဖို့လည်း ဒေသတွင်းအဖွဲ့တွေက မေတ္တာရပ်ခံထားတယ်လို့ သိရပါတယ်။