တပ်ရိက္ခာနွေစပါး

မြေလတ်အသံ၊ မေ ၉၊ ၂၀၂၃။

မြန်မာနိုင်ငံလုံးဆိုင်ရာကျောင်းသားများ ဒီမိုကရက်တစ်တပ်ဦး ( ကျောင်းသားတပ်မတော် ) ABSDF၊ စစ်ကြောင်း ( ၃ )၊ ချင်းတွင်းဒေသတပ်ရင်းအနေနဲ့ တပ်ရိက္ခာ နွေစပါးတွေကို စတင်စိုက်ပျိုးနေပြီလို့ သိရပါတယ်။

အဲဒီစိုက်ပျိုးမှုကို စစ်ဒေသ ၁ ဖြစ်တဲ့ စစ်ကိုင်းတိုင်းထဲက ဒေသတခုမှာ စိုက်ပျိုးနေတာဖြစ်ပြီး ယခုနှစ် နွေစပါးရာသီမှာ ၂ ဧက စတင်စိုက်ပျိုးနေပြီဖြစ်ကာ တပ်ဖွဲ့ရဲ့ စိုက်ပျိုးရေးတာဝန်ခံနဲ့ တပ်ဖွဲ့ဝင်များ၊ ဒေသခံပြည်သူလူထုရဲ့ကူညီမှုတွေနဲ့ စတင်နိုင်ခဲ့တယ်လို့ အဲဒီအဖွဲ့ထံက သိရပါတယ်။

“ဆန်တအိတ်ကို တသိန်းဝန်းကျင်လောက်ဖြစ်လာတဲ့အခါကျတော့ ကျနော်တို့မှာ စားနပ်ရိက္ခာဆန်က ပြည်သူလူထုကအဓိကထောက်ပံ့တာဖြစ်တယ်။ ပြည်သူလူထုကအဓိကထောက်ပံ့တဲ့အခါမှာ လက်ရှိအခြေအနေထိတော့ ပြည်သူလူထုက ကျနော်တို့အပေါ် ထောက်ပံ့နိုင်ပေမယ့် အချိန်ကြာလာတာနဲ့အမျှ အခက်ခဲတွေ ကြုံလာနိုင်တယ်ဆိုတာ တွက်ဆမိတော့ ပြည်သူလူထုဝန်ကို မျှပြီး ပြည်သူ့ဝန်ထမ်းအနေနဲ့ နွေရာသီစပါးကို စိုက်ပျိုးရခြင်းဖြစ်တယ်။” လို့ ချင်းတွင်း​ဒေသတပ်ရင်းမှူး ရဲ​ဘော်​ဇေယျ က မြေလတ်အသံကို ပြောပါတယ်။

အာဏာသိမ်းမှု ၂ နှစ်ကျော် ကြာလာတာနဲ့အမျှ ပြည်သူလူထု အထွေထွေအကျပ်အတည်း ဖြစ်လာနေပြီး ငွေကြေးဖောင်းပွမှု ဖြစ်လာကာ ကုန်ဈေးနှုန်းတွေ ကြီးမြင့်လာတာကြောင့် ထောက်ပံ့ရတဲ့ ပြည်သူတွေ မှာ ဝန်ထုပ်ဝန်ပိုး ဖြစ်နေတယ်လို့ သူက ဆိုပါတယ်။

နွေစပါးကို ဆည်ရေသောက်ဧရိယာ တခုအနေနဲ့စိုက်ပျိုးထားပြီး ကုန်ကျငွေ တဧကကို ၅ သိန်းဝန်းကျင်ကုန်ကျပြီး ၂ ဧကကုန်ကျစားရိတ် ၁၀ သိန်းကို ခဲယမ်းမီးကျောက်ဝယ်ယူရမယ့် အထဲက ၂၀ ရာခိုင်နှုန်းခန့် အသုံးပြုခဲ့ရပြီး ထွက်ရှိချိန်မှာတော့ တင်း ၁၅၀ နဲ့ ၂၀၀ ကြားထွက်ရှိမယ်လို့ ခန့်မှန်းထားကာ ငွေအားဖြင့် ၂၃ သိန်းခန့်ရနိုင်မယ်လို့ ဆိုပါတယ်။

“တော်လှန်ရေးအောင်ပွဲဟာ ယနေ့နဲ့မနက်ဖြန်ဖြစ်သွားနိုင်သလို အချိန်ကာလအားဖြင့်လည်း ကြာကောင်းကြာသွားနိုင်တယ်။ ကာလတခုကြာနိုင်တယ်။ ကြိုတင်ပြင်ဆင်တဲ့အနေနဲ့ ရိက္ခာကို စိုက်ပျိုးရခြင်း ဖြစ်ပါတယ်။” လို့ ရဲ​ဘော်​ဇေယျ ကဆက်လက်ပြောပါတယ်။

ချင်းတွင်းဒေသတပ်ရင်းအနေနဲ့ စစ်ရှောင်တွေကို ပြန်လည်နေရာချထားတဲ့ နေရာမှာလည်း အဆောက်အဦးလိုအပ်ချက်တွေကို ကူညီပံ့ပိုးပေးနေသလို တခြား ဆီထွက်သီးနှံ နေကြာနဲ့ မြေပဲတွေကိုလည်း စိုက်ပျိုးနေတယ်လို့ သိရပါတယ်။

သတင်း – 007