ဆန့်ကျင်ဆန္ဒပြ

စစ်ကိုင်း၊ မေ ၈၊ ၂၀၂၃။

စစ်ကိုင်းတိုင်း၊ ယင်းမာပင်နဲ့ ဆားလင်းကြီးမြို့နယ်ထဲမှာရှိတဲ့ သပိတ်စစ်ကြောင်းတွေစုပေါင်းပြီး တရုတ်နိုင်ငံတော်အလံကိုမီးရှို့ကာ တရုတ်အစိုးရကို ဆန့်ကျင်ကန့်ကွက်ကြောင်း ဆန္ဒပြခဲ့ကြတယ်လို့ သိရပါတယ်။

မေလ ၈ ရက် ဒီကနေ့မနက် ၈ နာရီခွဲက “သို့ တရုတ်အစိုးရ ဖက်ဆစ်တပ်နဲ့ပေါင်းပြီး မြန်မာပြည်သူတွေကိုသတ်နေတာ ချက်ချင်းရပ်” စာသားပါ ဘန်နာတွေကိုင်စွဲပြီး ဆန္ဒပြခဲ့ကြတာလို့ ဆိုပါတယ်။

ယင်းမာပင်-ဆားလင်းကြီးရွာပေါင်းစုံသပိတ်၊ လက်ပံတောင်းဒေသသပိတ်၊ အညာပစ်တိုင်းထောင်လေးများ သပိတ်၊ ယင်းမာပင်မြောက်ခြမ်းကျေးရွာများ သပိတ်၊ နောက်ပြန်မလှည့်ကြေး ဒီတော်လှန်ရေးသပိတ်၊ အောင်လံလွှင့်မည် ရွှေရေကြည်သပိတ်၊ ကယ်တင်ရှင်မရှာတို့ကျေးရွာသပိတ်၊ ရွှေနွယ်သွေးသပိတ်၊ ရွှေဥက္ကံသပိတ် စတဲ့သပိတ်စစ်ကြောင်းတို့ ပူးပေါင်းကာ အတူချီတက်ဆန္ဒပြခဲ့ကြတာလည်း ဖြစ်ပါတယ်။

စာတည်း – 007

မြေလတ်အသံ၊ မတ် ၃၀၊ ၂၀၂၃။

ကိုရီးယားနိုင်ငံ ဆိုးလ်မြို့က မြန်မာသံရုံးမှာ တပ်မတော်နေ့ တပ်ထောက်ခံပွဲလုပ်နေလို့ အညာသားတွေနဲ့ တိုင်းရင်းသားပေါင်းစုံ စုပေါင်းပြီး စစ်အာဏာရှင်ဆန့်ကျင်ရေးလှုပ်ရှားမှု လုပ်ခဲ့ကြပါတယ်။

ကိုရီးယားနိုင်ငံ မြန်မာသံရုံးနားက စစ်သမိုင်းပြတိုက်ရှေ့မှာ တောင်ကိုရီးယားနိုင်ငံမှာရှိတဲ့ ကျောင်းသားလူငယ်၊ အလုပ်သမားလူထုက ကိုရီးယား စံတော်ချိန် ညနေ ၆ နာရီကနေ ၈ နာရီအထိ လူအင်အား ၅၀ လောက်နဲ့ မြန်မာ့အရေးကို ဆန္ဒထုတ်ဖော်ပြီး တပ်ထောက်ခံပွဲကို ကန့်ကွက်ခဲ့ကြတယ်လို့ ဆိုပါတယ်။

“ပြည်တွင်းက ဒုက္ခမျိုးစုံ ခံစားနေရတဲ့ ပြည်သူလူထုအတွက် ကျနော်တို့ ပြည်ပမှာ ရောက်နေတာ နေသာသလိုမနေကြောင်း၊ စစ်အာဏာရှင်စနစ်ကို အဆုံးတိုင်တော်လှန်မည်ဖြစ်ကြောင်း၊ ရောက်တဲ့နေရာကနေ ဆန့်ကျင်နေကြောင်း ပြသတဲ့သဘောပါ” လို့ ကိုရီးယားနိုင်ငံရောက် အညာသားတဦးက ပြောပါတယ်။

ဆားလင်းကြီး၊ မတ် ၈၊ ၂၀၂၃။

စစ်ကိုင်းတိုင်း၊ ဆားလင်းကြီးမြို့နယ်၊ မုံရွာမြို့နယ်နဲ့ မကွေးတိုင်း၊ ပခုက္ကူမြို့နယ်တွေမှာ မတ်လ ၈ ရက် ဒီကနေ့မှာ ကျရောက်တဲ့ အပြည်ပြည်ဆိုင်ရာအမျိုးသမီးများနေ့ အထိမ်းအမှတ် စစ်အာဏာရှင်ဆန့်ကျင်လှုပ်ရှားမှုတွေကို အမျိုးသမီးသပိတ်စစ်ကြောင်းတွေ ဦးဆောင်ပြီး မတ်လ ၇ ရက် မနေ့က ပြုလုပ်ခဲ့ကြတယ်လို့ သိရပါတယ်။

ဆားလင်းကြီးမြို့နယ်အတွင်း ကျေးရွာတခုမှာ လက်ပံတောင်းတောင် ပင်မအမျိူးသမီး သပိတ်စစ်ကြောင်းက ပြုလုပ်ခဲ့ပြီး၊ မုံရွာမြို့နယ် မုံရွာ-အမြင့်လမ်းပိုင်း ကျေးရွာတရွာမှာလည်း မုံရွာ-အမြင့် အမျိုးသမီးသပိတ်စစ်ကြောင်းကလည်း ပြုလုပ်ခဲ့ရာမှာ မုံရွာလူထုဦးဆောင်ကော်မတီအဖွဲ့ဝင် အမျိုးသမီးတွေလည်း ပူးပေါင်းပါဝင်ခဲ့တယ်လို့ ဆိုပါတယ်။

သပိတ်စစ်ကြောင်းတွေမှာ အမျိုးသမီးအခွင့်အရေး၊ အမျိုးသမီးအခန်းကဏ္ဍအရေးပါပုံ၊ တော်လှန်ရေးမှာ အမျိုးသမီးတွေ ပိုမိုပါဝင်လာနိုင်ဖို့ စတဲ့အကြောင်းအရာတွေ ဟောပြောခဲ့ပြီး၊ အမျိုးသမီးများနေ့ အထိမ်းအမှတ်အနေနဲ့ မတ်လ ၇ ရက်၊ ၈ ရက်နဲ့ ၉ ရက်တွေမှာ အမျိုးသမီးသပိတ်တွေ ဆက်လက်ထွက်ရှိကြမှာ ဖြစ်တယ်လို့လည်း သိရပါတယ်။

အလားတူ မကွေးတိုင်း၊ ပခုက္ကူမြို့နယ်အတွင်းမှာလည်း ပခုက္ကူလူထုတိုက်ပွဲကော်မတီနဲ့ BEGSC တို့ ဦးဆောင်ကာ အပြည်ပြည်ဆိုင်ရာအမျိုးသမီးများနေ့ အထိမ်းအမှတ် “ညီမျှခွင့်တူ ဖမ်းဆုပ်ယူ” စာတန်းအပါအဝင် စစ်အာဏာရှင်ဆန့်ကျင်ဆန္ဒပြ ဆောင်ပုဒ်ဘန်နာများ ကိုင်ဆောင်ကာ ဆန္ဒဖော်ထုတ်ခဲ့ကြတယ်လို့ သိရပါတယ်။

“အဓိက က အမျိုးသမီးတွေရဲ့အခွင့်အရေးနဲ့ အမျိုးသမီးတွေကို ကျနော်တို့မြန်မာနိုင်ငံမှာ ရှေးရိုးကြီးစွာနဲ့ ဒီဟာမလုပ်ရဘူး။ ဟိုဟာ မသွားရဘူး ဆိုတာတွေအပြင် ကျနော်တို့လိုချင်တဲ့ ဖက်ဒရယ်ဒီမိုကရေစီ တခု ပေါ်ပေါက်တဲ့အချိန်အထိ အမျိုးသမီးတွေရဲ့အခွင့်အရေး၊ အမျိုးသမီးတွေရဲ့ လုပ်ဆောင်ချက်တွေကို အသိမှတ်ပြုဖို့အတွက် အဓိကလုပ်ဆောင်ခြင်း ဖြစ်တယ်” လို့ ပခုက္ကူ လူထုတိုက်ပွဲကော်မတီမှ တာဝန်ရှိသူက ပြောပါတယ်။

စာတည်း – ရင်ငြိမ်း