စစ်တပ်သတင်းပေး

စဥ့်ကူး၊ မတ် ၂၀၊ ၂၀၂၃။

မန္တလေးတိုင်း၊ စဥ့်ကူးမြို့နယ်၊ ရွာသာယာရွာက စစ်တပ်သတင်းပေးလို့လူသိများတဲ့ အမျိုးသမီးတဦး မတ်လ ၁၉ ရက် မနေ့ကနေ့လယ်ပိုင်းမှာ ပစ်ခတ်ရှင်းလင်းခံခဲ့ရပါတယ်။

အသက် ၄၃ နှစ်အရွယ် မယုခိုင်ဟာ စစ်တပ်ကို သတင်းပေးတိုင်ကြားတာတွေ လုပ်တာကြောင့် သူ့နေအိမ်ကနေ ဖမ်းလာပြီး ရွာအနောက်ဘက်ကမ်းရှိ သေနပ်ကျွန်းပေါ်အရောက်မှာ ပစ်ခတ်ရှင်းလင်းခဲ့တာလို့ Bo Tiger-ဗိုလ်ကျားကြီးအဖွဲ့ ခေါင်းဆောင် ဗိုလ်ကျားကြီးက ပြောပါတယ်။

“သူက PDF တွေ ဘယ်မှာရှိတယ်။ ဘယ်နေရာမှာနေတယ်ဆိုတာကို စစ်တပ်ကို ဖုန်းနဲ့သတင်းပေးတာ။ သူ့ရဲ့ဖုန်းစစ်‌ဆေးကြည့်လိုက်တော့လည်း စစ်တပ်နဲ့ဆက်သွယ်ပြီး ပြောဆိုရေးသားထားတာတွေ တွေ့တယ်။ သေချာတာကြောင့် သူ့ကိုနေအိမ်ကနေ ဖမ်းလာပြီး သေနတ်ကျွန်းပေါ်ရောက်မှ သေနတ်နဲ့ ၂ ချက် ပစ်ခတ်ခဲ့တာပါ” လို့ ပြောပါတယ်။

ဒီရှင်းလင်းမှုကို Bo Tiger-ဗိုလ်ကျားကြီးအဖွဲ့နဲ့ ရဲရဲတောက်အဖွဲ့တို့က ပူးပေါင်းလုပ်ဆောင်ခဲ့တာ ဖြစ်ပြီး၊ ဗိုက်နဲ့ နားထင်ကို ၁ ချက်စီပစ်ခတ်ခဲ့တာကြောင့် မယုခိုင်မှာ နေရာတင်ပွဲချင်းပြီး သေဆုံးခဲ့တယ်လို့ ဆိုပါတယ်။

ပြီးခဲ့တဲ့ မတ်လ ၁၇ ရက်ကလည်း မယ်ဇလီချောင်၊ အက်နံ၊ ရွှေခဲပြန်ရွာတွေကို စစ်ကြောင်းထိုးပြီးထွက်လာတဲ့ စစ်အုပ်စုကို ရွှေခဲပြန်ရွာအထွက်မှာ Bo Tiger အဖွဲ့က တိုက်ခိုက်ခဲ့ရာ စစ်သားသေဆုံးမှုတွေ ရှိခဲ့ပါသေးတယ်။

စာတည်း – လင်း

ကြို့ပင်ကောက်၊ မတ် ၁၄၊ ၂၀၂၃။

ပဲခူတိုင်း(အနောက်ခြမ်း)၊ ကြို့ပင်ကောက်မြို့၊ အရှေ့တောင်ဘက် ကျေးရွာတရွာက အုပ်ချုပ်ရေးမှူးနဲ့အဖွဲ့ဟာ မတ်လ ၁၃ ရက်မနေ့ည ၁၀ နာရီခွဲလောက်က တိုက်ခိုက်ခံရလို့ သေဆုံးမှုတွေရှိတယ်လို့ သိရပါတယ်။

ကြို့ပင်ကောက်မြို့နယ်၊ ရုံးချောင်းအုပ်စု၊ ရုံးချောင်းရွာမှာ ဖြစ်ပွားခဲ့တာဖြစ်ပြီး အုပ်ချုပ်ရေးမှူးအပါ ၈ ဦးလောက် စကားပြောနေချိန်မှာ တိုက်ခိုက်ခဲ့တာလို့ ဆိုပါတယ်။

“ကိုအေးထွန်းက အုပ်ကြီးလည်းဖြစ်သလို ပျူစောထီးခေါင်းဆောင်လည်း ဖြစ်တယ်။ သူတို့အင်အား ၈ ဦးလောက်နဲ့ ရှိနေတာကို ပစ်ခတ်ခဲ့တာပါ။ သူတို့ဘက်ကလည်း တထောင့်ထိုးတူမီးတွေ လက်ပစ်ဗုံးတွေနဲ့ ပြန်ပစ်သေးတယ်ဗျ” လို့ တိုက်ခိုက်ရာမှာ ပါဝင်တဲ့ Black Dragon အဖွဲ့ဝင်တဦးက ပြောပါတယ်။

Black Dragon(GBK PDF)ရဲ့ သတင်းထုတ်ပြန်ချက်မှာတော့ အုပ်ချုပ်ရေးမှူးပျူစောထီးခေါင်းဆောင် ကိုအေးထွန်းနဲ့ ပျူခေါင်းဆောင် ပါ ၃ ဦး သေဆုံးပြီး ဒဏ်ရာရသူ ၅ ဦး ရှိတယ်လို့ ဖော်ပြထားပါတယ်။

ဒေသခံတဦးပြောတာကတော့ ကိုအေးထွန်းရဲ့အလောင်းနဲ့ ဒဏ်ရာရသူ ၂ ဦးကို အဲဒီညကပဲ ကြို့ပင်ကောက်မြို့နယ်၊ အလယ်ကုန်းတိုက်နယ်ဆေးရုံကို ပို့ဆောင်ထားတယ်လို့ ဆိုပါတယ်။

အဲဒီတိုက်ခိုက်မှုမှာ သာယာဝတီခရိုင်၊ ကြို့ပင်ကောက်မြို့နယ် နတ်စစ်သည်တပ်ရင်းအမှတ် ၃၈၀၁ တပ်ခွဲ ၂ – Black Dragon(GBK PDF)၊ တပ်ရင်းအမှတ် ၃၈၀၁ တပ်ခွဲ ၅ ဟီးရိုးပြောက်ကျား၊ Yoma – GBK PDF တပ်ပေါင်းစုတို့ ပူးပေါင်းလုပ်ဆောင်ခဲ့တာလို့ သိရပါတယ်။

ပြီးခဲ့တဲ့ မတ်လ ၇ ရက်က Black Dragon (GBK PDF)က စစ်တပ်သတင်းပေးနဲ့ ပျူစောထီးခေါင်းဆောင်တွေ အုပ်ချုပ်ရေးမှူးတွေ နုတ်ထွက်ကြဖို့ သတိပေးထားခဲ့ပါသေးတယ်။

စာတည်း – 007

ပေါင်းတည်၊ မတ် ၁၀၊ ၂၀၂၃။

ပဲခူးတိုင်းအနောက်ခြမ်း၊ ပေါင်းတည်မြို့နယ်က စစ်တပ်သတင်းပေး ပျူစောထီးခေါင်းဆောင်လို့ လူသိများသူတဦးကို မတ်လ ၁၀ ရက်ဒီနေ့လယ် ၁၂ နာရီလောက်မှာသေနတ်နဲ့ပစ်သတ်ခဲ့တယ်လို့ Thegon PDF က သတင်းထုတ်ပြန်ထားပါတယ်။

ပေါင်းတည်မြို့နယ်၊ သစ်ပုတ်ကျေးရွာမှာနေထိုင်တဲ့ အသက် ၅၀ နှစ်အရွယ် ကိုအောင်ဝင်းဌေးဆိုသူဖြစ်ပြီး သူ့ကို နန်းထိုက်အောင် စစ်ဆင်ရေးအဖြစ် ရှင်းလင်းခဲ့တာလို့ တပ်ခွဲ ၄ – TPDF ရဲ့ သတင်းတာဝန်ခံက ပြောပါတယ်။

“သူက ရွာကိုဆိုင်ကယ်နဲ့တဦးတည်း ပြန်လာတာကို လက်ပံခုံရွာအနီး မြေနီလမ်းပေါ်မှာ ရှင်းလိုက်တာ၊ ပွဲချင်းပြီး သေတယ်။ နားထင်၊ ရင်ဘတ်နဲ့ နံညွန့်တွေကို တချက်စီနဲ့ ၃ ချက်ပစ်ခတ်ခဲ့တာဖြစ်တယ်” လို့ ပြောပါတယ်။

ကိုအောင်ဝင်းဌေးဟာ သစ်ပုတ်တာဝါတိုင်က စစ်သားတွေနဲ့ပေါင်းပြီး ကျွန်းသစ်ခိုးတာ၊လမ်းပြတာ၊ အိမ်ထောင်စုစာရင်းကောက်ယူတာ၊ စစ်တပ်ကို မမှန်သတင်းပေးတာ၊ လောင်းကစားဝိုင်းပြုလုပ်တာနဲ့ ဆက်ကြေးကောက်တာတွေ ပြုလုပ်နေတာဖြစ်သလို သူနဲ့ပတ်သက်ပြီး သတင်းပေးပို့ချက်တွေလည်း ရှိတာကြောင့် စိစစ်ပြီးမှ ခုလိုလုပ်ဆောင်ခဲ့တာလို့ ထုတ်ပြန်ချက်မှာ ဖော်ပြထားပါတယ်။

ပစ်ခတ်ပြီးချိန်ကစလို့ လက်ရှိအချိန်ထိ ကိုအောင်ဝင်းဌေးနဲ့ပူးပေါင်းနေတဲ့ စစ်သားတွေလည်း သူ့အိမ်ကို ရောက်ရှိလာခြင်းမရှိဘူးလို့ ဆိုပါတယ်။

ဒီရှင်းလင်းမှုကို တပ်ရင်း ၃၆၀၁၊ တပ်ခွဲ ၃ နဲ့ တပ်ရင်း ၃၆၀၂၊ တပ်ခွဲ ၄ – TPDF၊ တပ်စု ၆၊ တပ်စိတ် ၁၆ တို့က ပူးပေါင်းလုပ်ဆောင်ခဲ့တာလို့ သိရပါတယ်။

ပြီးခဲ့တဲ့ မတ်လ ၇ ရက်ကလည်း ပေါင်းတည်မြို့နယ်၊ ကျောက်တံခါးအုပ်စု၊ အောင်သပြေရွာကို ကျွန်းသစ်ခိုးယူဖို့လာတဲ့ ဖောကားတစီးကို ပေါင်းတည်မြို့နယ်တပ်ရင်း ၃၆၀၁ တပ်ခွဲ ၃ က မီးရှို့ဖျက်ဆီးခဲ့ပါသေးတယ်။

စာတည်း – လင်း

မကွေး၊ ဇူလိုင် ၂၄၊ ၂၀၂၂။

မကွေးတိုင်း၊ အောင်လံမြို့နယ် ပဲခူးရိုးမ အခြေမှာရှိတဲ့ ပဒဲရွာက စစ်ကောင်စီသတင်းပေးဆိုသူ တဦးကို မကွေးတိုင်းပြည်သူ့ကာကွယ်ရေးတပ်-အောင်လံအဖွဲ့က ရှင်းလင်းခဲ့တယ်လို့ ထုတ်ပြန်ခဲ့ပါတယ်။

သတ်ခံလိုက်ရတဲ့ စစ်ကောင်စီသတင်းပေးဆိုသူဟာ ပဒဲကျေးရွာ ဦးသိန်းဇော်ဖြစ်ပြီး တော်လှန်ရေးအင်အားစုနေရာတွေကိုသတင်းပေးတာ‌တွေ စစ်ကောင်စီရဲ့ လုပ်ငန်းစဥ်တွေမှာ ပါဝင်ပတ်သက်တာတွေ ရှိနေလို့အခုလို ရှင်းလင်းခဲ့တာဖြစ်တယ်လို့ မကွေးတိုင်းပြည်သူ့ကာကွယ်ရေးတပ်-အောင်လံအဖွဲ့ တာဝန်ရှိသူ ဗိုလ် GZက ပြောပါတယ်။

” သူအပါအဝင်လေးဦးကို ၆၊၃၊ ၂၀၂၂ရက်နေ့မှာ သတိပေးစာထုတ်ပြန်ပီးသတိပေးခဲ့ပါတယ်၊ လေးလကြာစောင့်ကြည့်ပြီးစကစနဲ့ပူးပေါင်းမှု မရပ်တာကြောင့်ရှင်းခဲ့တာပါ၊ ဇူလိုင်(၁၉)အာဇာနည်နေ့မှာ လှီးဓားနဲ့ရှင်းခဲ့တာပါ” လို့ ဗိုလ်GZ က ပြောပါတယ်။

ဦးသိန်းဇော်ဟာ အာဏာသိမ်းမှု မတိုင်ခင်ကတည်းက စစ်တပ်နဲ့ အချိတ်အဆက်ရှိကာ သစ်လုပ်ငန်းလုပ်ကိုင်သူတဦးဖြစ်ပြီး အာဏာသိမ်းပြီးနောက်ပိုင်းမှာ စစ်တပ်နဲ့ အားကိုးနဲ့ ရွာသားတွေကို ဒုက္ခပေးနေသူဖြစ်တယ်လို့လည်း ပြောပါတယ်။

” ဒလန်လိုလူမျိုးတွေကိုလှီးဓားအသုံးပြုပြီးရှင်းဖိုဘာမြူဒါဌာနချုပ်ကနေမွေးထုတ်ထားတဲ့တပ်သား‌ကရှင်းတာပါ၊ ကျနော်တို့ တပ်ကနေ လေ့ကျင့်ဖိုဘာမြူဒါဌာနချုပ်ကိုလွှတ်ထားတဲ့ရဲဘော်တွေပါ” လို့ ပြောပါတယ်။

အဲ့ဒီအဖွဲ့ဟာ ပြီးခဲ့တဲ့ ဇူလိုင်လ ၁၃ရက်က ပေါက်ခေါင်းမြို့နယ် ကံကျင်းရဲစခန်းထဲကို မိုင်းဝင်ထားပြီး ဖောက်ခွဲခဲ့တဲ့ အရိပ်မဲ့ စစ်ဆင်ရေးရဲ့ တွဲဖက်ဖြစ်တယ်လို့လည်း ဗိုလ် GZ က ပြောပါတယ်။

အောင်လံမြို့နယ်ထဲက စစ်ကောင်စီထောက်တိုင်တွေ အနေနဲ့ ပြည်သူ့ဘက် အမြန်ဆုံးရပ်တည်ကြဖို့ နဲ့ ပြည်သူ့လွတ်မြောက်ရေးအတွက် ပိုပြီးကြိုးစားအားထုတ်သွားမယ်လို့ ပြောပါတယ်။