မြေလတ်အသံ၊ မေ ၁၄၊ ၂၀၂၅။

မကွေးတိုင်း၊ မြိုင်မြို့နယ်မှာ ရိက္ခာရှာထွက်လာတဲ့ စစ်ကောင်စီစစ်ကြောင်း ချုံခိုတိုက်ခံရပြီး ပျူစောထီး ၁ ဦး သေဆုံးတယ်လို့ မြိုင်ဒေသအခြေပြု ဗစ်တာပြောက်ကျားတပ်ဖွဲ့ထံက သိရပါတယ်။

စစ်ကောင်စီတပ်နဲ့ပျူစောထီးစခန်းတွေ အထိုင်စခန်းချထားတဲ့ ကန်နီရွာကနေထွက်လာတဲ့ အင်အား ၃၀ ခန့်ပါ စစ်ကြောင်းကို ၎င်းရွာရဲ့အရှေ့ဘက်မီတာ ၁၀၀ ခန့်အကွာ တောစပ်မှာ တိုက်ခိုက်ခဲ့တာဖြစ်ပြီး ၁၅ မိနစ်ခန့်အပြန်အလှန်ပစ်ခတ်မှုဖြစ်ပွားခဲ့တယ်လို့ ဆိုပါတယ်။

“ ရှေ့က ၅ ယောက်ကရှာပြီး နောက်ကကင်းပုန်းအင်အားနဲ့တောစပ်တွေကို ရိက္ခာရှာထွက်လာတာ။ မိုးကလည်းရွာနေတော့ မြေပဲပင်ပေါက်တွေ ကောက်တယ်၊ ဂုဏ်ရွက်တွေ၊ ဆူးပုပ်ရွက်တွေခူးတယ်၊ တောနားရသမျှတွေမွှေတယ်ပေါ့။ အဲ့လိုပဲချောင်ရင်ချောင်သလို ထွက်တယ်ဗျ” လို့ ဗစ်တာပျောက်ကျားတပ်ဖွဲ့မှ ကိုဗစ်တာက ပြောပါတယ်။

တောစပ်မှာအရွက်ခူးနေတဲ့ စစ်ကောင်စီတပ်ဖွဲ့ဝင်တွေကို တော်လှန်ရေးအဖွဲ့တွေက အနီးကပ်ပစ်ခတ်နိုင်ခဲ့တာကြောင့် ပျူစောထီး ၁ ဦး နေရာမှာသေဆုံးပြီး ၁ ဦး ပြင်းထန်ဒဏ်ရာရရှိခဲ့တာကို မျက်မြင်တွေ့ရှိခဲ့ရတယ်လို့ ဆိုပါတယ်။

“ ကျနော်တို့ ဒရုန်းနဲ့ကြည့်ရတာတော့ နာရီဝက်လောက်ကြာတော့ အလောင်းကိုထော်လာဂျီနဲ့ လာပြန်သယ်သွားတယ်၊ ဒဏ်ရာရတဲ့လူကို မပြီးတင်သွားကြတယ်” လို့ ၎င်းက ဆက်ပြောပါတယ်။

အပြန်အလှန်ပစ်ခတ်မှုအတွင်း စစ်ကောင်စီတပ်က လက်နက်ငယ်တွေအပြင် ၆၀ မမ လက်နက်ကြီး ၂ လုံး၊ ၄၀ မမ ဗုံးသီး ၈ လုံးနဲ့ ပစ်ခတ်ခဲ့ပေမယ့် ကာကွယ်ရေးတပ်ဖွဲ့တွေဘက်က ထိခိုက်မရှိပြန်လည်ဆုတ်ခွာနိုင်ခဲ့တယ်လို့ သိရပါတယ်။

မေ ၁၀ ရက် မနက် ၅ နာရီဝန်းကျင်က ကန်နီရွာအနီးမှာရှိတဲ့ ကာကွယ်ရေးတပ်ဖွဲ့တွေရဲ့ စစ်ဆေးရေးဂိတ်ကို စစ်ကောင်စီနဲ့ပျူစောထီးပူးပေါင်းအဖွဲ့တွေက လာရောက်ပစ်ခတ်ခဲ့တာကြောင့် နှစ်ဖက်ထိတွေ့တိုက်ပွဲဖြစ်ပွားခဲ့ပါသေးတယ်။

အိမ်ခြေ ၇၀၀ ကျော်ရှိ ကန်နီရွာမှာ စစ်ကောင်စီတပ်ဖွဲ့ဝင် ၁၀ ဦးကျော်နဲ့ ပျူစောထီးအင်အား ၆၀ ကျော်အထိုင်ချတပ်စွဲထားပြီး ကျေးရွာအတွင်းကျန်ရှိနေတဲ့ အမျိုးသားအားလုံးနီးပါး ပျူစောထီးတပ်ဖွဲ့ဝင်တွေအဖြစ် ဝင်ရောက်နေရတယ်လို့ သိရပါတယ်။

အဆိုပါတိုက်ခိုက်မှုကို ဗစ်တာပျောက်ကျားတပ်ဖွဲ့၊ ပခုက္ကူခရိုင်အမှတ် ၂ တပ်ရင်း တပ်ခွဲ ၂၊ အညာ​မြေပျောက်ကျားတပ်ဖွဲ့စုတို့က ပူးပေါင်းလုပ်ဆောင်ခဲ့တယ်လို့ သိရပါတယ်။

စာတည်း – ဟိန်းစံ

ရွှေကျင်၊ မေ ၁၂၊ ၂၀၂၅။

တော်လှန်ရေးတပ်တွေသိမ်းပိုက်ထားတဲ့ ပဲခူးတိုင်း၊ ရွှေကျင်မြို့နယ်က ခမရ ၅၉၈ တပ်ရင်းကို ပြန်လည်ထိန်းချုပ်ထားနိုင်တယ်လို့ မေ ၁၂ ရက်ဒီနေ့မှာ စစ်ကောင်စီကသတင်းထုတ်ပြန်လာပါတယ်။

မေ ၈ ရက်မနက် ၅ နာရီခန့်မှာ တော်လှန်ရေးပူးပေါင်းတပ်တွေက ခမရ ၅၉၈ တပ်ကိုစတင် တိုက်ခိုက်ရာ မေ ၁၀ ရက်ထိတိုက်ပွဲပြင်းထန်ခဲ့ပြီးနောက် စစ်ကောင်စီတပ်ဖွဲ့ဝင်တွေအနေနဲ့ ထိခိုက်ကျဆုံးများတဲ့အတွက် တပ်ရင်းဌာနချုပ်ကနေဆုတ်ခွာပေးခဲ့ပြီး မေ ၁၁ ရက်မှာ တန်ပြန်တိုက်ခိုက်ကာ တပ်ရင်းကိုပြန်လည်ထိန်းချုပ်နိုင်ခဲ့တယ်ဆိုပြီး ဖော်ပြထားတာပါ။

တိုက်ပွဲအတွင်း ၎င်းတို့ဘက်ကစစ်ကောင်စီတပ်ဖွဲ့ဝင်တချို့ ထိခိုက်ကျဆုံးပြီး KNLA ပူးပေါင်းတပ်တွေဘက်က သေဆုံး ၆ ဦးအလောင်း၊ လက်နက်မျိုးစုံ ၁၀ လက်၊ ဆက်စပ်ပစ္စည်းတွေ သိမ်းဆည်းရမိတယ်လို့ ထုတ်ပြန်ချက်မှာ ရေးသားထားပါတယ်။

ဒီထုတ်ပြန်ချက်နဲ့ပတ်သက်ပြီး မြေပြင်တိုက်ခိုက်ရေးပါတော်လှန်ရေးတပ်ဖွဲ့ဝင်တဦးကတော့ စစ်ကောင်စီတပ်ဖွဲ့ဝင် တချို့တဝက်လောက် တပ်ရင်းထဲပြန်ရောက်သွားတာဖြစ်နိုင်တယ်လို့ ပြောပါတယ်။

“ကာတော့ကာထားကြတယ်။ အဲ့ဒီနေ့ (မေ ၁၁) က ပိတ်ထားတဲ့နေရာတခုက ပေါက်သွားတယ်လို့ ကြားတယ်။ ကိုယ့်ဘက်က ပေါက်သွားလို့ ဝင်လို့ရသွားတာနေမယ်။ လေယာဥ်နဲ့လည်း တအားဖိပစ်တာတွေ ရှိတယ်။ ပေါက်လဲ ကြာကြာနေလို့ရမှာမဟုတ်ဘူး။ ဒီဘက်က ရိက္ခာလမ်းကြောင်း ဖြတ်ထားတာဆိုတော့”လို့ မြေပြင်တိုက်ခိုက်ရေးပါတပ်ဖွဲ့ဝင်တဦးကပြောပါတယ်။

နောက်ထပ် PDF ထောက်လှမ်းရေးတဦးကလည်း “(စစ်ကောင်စီဘက်က) ပြန်တိုးလာတယ်။ ပစ္စည်းတွေသိမ်းဆည်းပြီး တပ်ရင်းထဲကနေဆုတ်ပေးလိုက်တယ်။ သူတို့ ပြန်ထိုင်မယ်ထင်တယ်။ ကားတာယာ အဟောင်းတွေ ပို့နေတာရှိတယ်။” လို့ ပြောပါတယ်။

လက်ရှိမှာ ခမရ ၅၉၈ နဲ့ နဲ့အနီးတဝိုက်ကို တော်လှန်ရေးတပ်တွေဘက်က ပိတ်ဆို့ထားဆဲဖြစ်ပြီး စစ်ကောင်စီတပ်ကလည်း စစ်ကူအင်အား ၅၀၀ ဝန်းကျင်နဲ့ မြေပြင်စစ်ကြောင်းထိုးတိုက်ခိုက်နေကာ လေကြောင်းကနေလည်း ဗုံးကြဲတိုက်ခိုက်မှုတွေ အများအပြားပြုလုပ်နေတယ်လို့ သိရပါတယ်။

ဒီမနက်ပိုင်းမှာလည်း ကွမ်းဆိပ်၊ ညောင်ခြေထောက် ကျေးရွာအနီးဝန်းကျင်မှာ တိုက်ပွဲတွေဆက်လက်ဖြစ်ပွားနေကြောင်းသိရှိရပြီး သိမ်ဇရပ်အခြေစိုက် ခမရ ၂၀၇၊ အမတ ၃၁၀ တပ်တွေနဲ့ သူရဲသမိန်နဲ့ လက်ပန်ကျေးရွာမှာတပ်စွဲနေတဲ့ စစ်ကောင်စီတပ်တွေကနေ လက်နက်ကြီးနဲ့ ဆက်တိုက်ပစ်ခတ်နေပြီး တိုက်ပွဲနဲ့ပတ်သက်တဲ့ နောက်ဆက်တွဲအခြေအနေတွေကိုတော့ မြေလတ်အသံက ဆက်လက်စုံစမ်းနေပါတယ်။

အမျိုးသားညီညွတ်ရေးအစိုးရ – NUG ရဲ့ မေ ၁၁ ရက် ထုတ်ပြန်ချက်အရ အဆိုပါတိုက်ပွဲအတွင်းမှာ စစ်ကောင်စီတပ်သား ၃၀ သေဆုံးပြီး စစ်ကောင်စီတပ်သား ၆ ဦး၊ မိသားစုဝင် ၇ ဦးအရှင်ဖမ်းမိပြီး ပွိုင့် 5 စက်သေနတ်၊ ၇၅ နောက်ပွင့်၊ ၈၁ မမ၊ ၆၀ မမ လက်နက်ကြီးများအပါအဝင် လက်နက်မျိုးစုံနဲ့ ခဲယမ်းတွေ သိမ်းနိုင်ခဲ့တယ်လို့ NUG ရဲ့ထုတ်ပြန်ချက်မှာ ဖော်ပြထားပါတယ်။

စာတည်း – လင်း

မြေလတ်အသံ၊ မေ ၁၀၊ ၂၀၂၅။

စစ်ကိုင်းတိုင်း၊ မြောင်မြို့မှာ နယ်မြေကင်းပတ်ထွက်လာတဲ့ စစ်ကောင်စီတပ်ဖွဲ့ကို ကြားဖြတ်တိုက်ခိုက်ခဲ့ရာ ၄ ဦးသေဆုံးပြီး သေနတ် ၃ လက်ရရှိခဲ့တယ်လို့ Myaung Ranger Force ထံက သိရပါတယ်။

မြောင်မြို့မရဲစခန်းကနေ မြို့မြောက်ဘက်အထွက်ရှိ စစ်ဆေးရေးဂိတ်ထံ အင်အား ၂၀ ခန့်နဲ့ ထွက်လာတဲ့ အဆိုပါပတ်ကင်းစစ်ကောင်စီတပ်ဖွဲ့ကို မေ ၅ ရက် မနက် ၁၀နာရီခန့်မှာ BOC ဆီဆိုင်အနီးကနေ စတင်ပစ်ခတ်တိုက်ခိုက်ခဲ့ကာ အချိန် ၁ နာရီကျော်ကြာ တိုက်ပွဲဖြစ်ပွားခဲ့တယ်လို့ ဆိုပါတယ်။

“ သူတို့ကဂိတ်ကိုမထိုင်ခင် မြို့ထဲစခန်းကနေ ဂိတ်ကောက်နေတဲ့အချိန်လုံခြုံရေးအတွက် ကင်းလှည့်တဲ့သဘောမျိုးပေါ့။ အဲ့အချိန်နောက်က တောက်လျှောက်လိုက်ပြီး BOC ဆီဆိုင်ရှေ့အရောက်မှစပစ်ခဲ့တာ”လို့ Myaung Ranger Force တာဝန်ရှိသူတဦးက မြေလတ်အသံကို ပြောပါတယ်။

ပစ်ခတ်တိုက်ခိုက်မှုအတွင်း ဒုဗိုလ်အဆင့်အပါ စစ်ကောင်စီတပ်ဖွဲ့ဝင် ၄ ဦးသေဆုံး ၆ ဦးခန့် ဒဏ်ရာရခဲ့ကာ MA 11 သေနတ် ၃ လက်သိမ်းဆည်းရရှိခဲ့ပြီး ကာကွယ်ရေးတပ်ဖွဲ့တွေဘက်က တပ်ဖွဲ့ဝင် ၁ ဦး လက်မောင်းနဲ့လက်ဖျံမှာ ကျည်ထိမှန် ဒဏ်ရာရခဲ့တယ်လို့ သိရပါတယ်။

နှစ်ဖက်တိုက်ပွဲအတွင်း တိုက်ခိုက်ခံရတဲ့စစ်ကောင်စီတပ်ဖွဲ့ထံ စစ်ကူအင်အား ၃၀ ခန့်ရောက်ရှိလာပြီး အဆိုပါစစ်ကူတွေနဲ့အတူ မြောင်မြို့မရဲစခန်းအတွင်း ပြန်လည်ဝင်ရောက်သွားကာ မေ ၉ ရက် ယမန်နေ့အထိ ဂိတ်ကြေးမကောက်နိုင်တော့ဘူးလို့ သိရပါတယ်။

မြောင်မြို့အထွက်စစ်ကောင်စီစစ်ဆေးရေးဂိတ်ဟာ မြို့နယ်တွင်း နွားကား၊ ရေနံကားတွေကို ဆက်ကြေးကောက်ခံနေတဲ့ ဂိတ်ဖြစ်ကြောင်းသိရှိရပြီး တိုက်ခိုက်မှူကို Myaung Rangers Force (M.R.F)၊ စစ်ကိုင်းခရိုင်တပ်ရင်း ၁ ၊ ဗိုလ်စင်္ကြာအဖွဲ့တို့ပူးပေါင်းလုပ်ဆောင်ခဲ့တာဖြစ်ပါတယ်။

စာတည်း – ဟိန်းစံ

‌