စစ်ကိုင်း

စစ်ကိုင်း၊ ဖေဖော်ဝါရီ ၁၃၊ ၂၀၂၃။

စစ်ကိုင်းတိုင်း၊ အရာတော်မြို့နယ်မှာရှိတဲ့ စစ်ကောင်စီရဲ့ အမှတ် ၁၀ လေ့ကျင့်ရေးတပ် စခန်းကို ဖေဖော်ဝါရီ ၁၂ ရက်ညနေ ၅ နာရီကျော်မှာ တိုက်ခိုက်ခံရတာကြောင့် ၉ဦး ဒဏ်ရာအပြင်းအထန် ရသွားခဲ့တယ်လို့ သိရပါတယ်။

အမှတ် ၁၀ လေ့ကျင့်ရေးတပ် (အရပ်အခေါ် အရှေ့တပ်)ကို ကာကွယ်ရေးတပ် ၅ဖွဲ့က ၈၀မမနဲ့ ၅လုံးပစ်ခတ်တိုက်ခိုက်ခဲ့ချိန်မှာ ပြောင်းမတော်တဆကွဲထွက်ခဲ့တာကြောင့် ရဲဘော်တဦး ဒဏ်ရာအနည်းငယ်ရသွားခဲ့တယ်လို့ Danger Force LPDF ပြန်ကြားရေး တာဝန်ခံ ကိုမာန်ဟုန်က ပြောပါတယ်။

“စကစ ကိုးယောက်လုံးက ဆေးရုံမှာ အရေးပေါ် ကုသမှုခံယူနေတယ်လို့ အတွင်းဖရဲသီးပြောလို့ အတည်ပြုနိုင်ခဲ့တာပါ။ ကျနော်တို့ဘက်က ဒဏ်ရာရသွားတာက တပ်ကိုပထမအကြိမ် ပစ်တဲ့အချိန်မှာ ပြောင်းကွဲထွက်သွားလို့ ရသွားတာ။ ဒဏ်ရာကမစိုးရိမ်ရဘူး။ ကျနော်တို့ပစ်ခတ်ခဲ့တဲ့ လက်နက်ကြီးတွေကလည်း တပ်တွင်းထဲကို ကျရောက်ခဲ့တယ်”လို့ ဆိုပါတယ်။

အဲ့ဒီတပ်ကို ပစ်ခတ်တိုက်ခိုက်ခဲ့ချိန်မှာလည်း စစ်ကောင်စီဘက်က ၆၀မမတွေနဲ့ ပြန်လည်ပစ်ခတ်ခဲ့ပေမယ့် အထိအခိုက်မရှိ ပြန်ဆုတ်နိုင်ခဲ့တယ်လို့ ကိုမာန်ဟုန်က ပြောပါတယ်။

ဒီတိုက်ခိုက်မှုကိုတော့ Danger Force LPDF၊ ကြယ်နီတပ်ဦး၊ ပင်လယ်ပျော်သိမ်းငှက်(SF2)၊ People’s Revolution Force (PRF)၊ တမန်တော်ပျောက်ကြားတပ်ဖွဲ့ (APOSTLE)တို့က ပူးပေါင်းလုပ်ဆောင်ခဲ့တာဖြစ်ပါတယ်။

ပြီးခဲ့တဲ့ ဖေဖော်ဝါရီလ ၁ ရက်မှာလည်း အရာတော်မြို့နယ်၊ သစ်ကြင်းကြီးတပ်စခန်းကို Droneနဲ့ ၄ကြိမ်၊ ရှော့ဒုန်းနဲ့ ၃ကြိမ် တိုက်ခိုက်ခဲ့တာကြောင့် စစ်ကောင်စီတပ်သား ၂ ဦးသေဆုံးပြီး ၂ ဦးအပြင်းအထန် ဒဏ်ရာရရှိတယ်လို့ သိရပါတယ်။

စစ်ကိုင်း၊ ဖေဖော်ဝါရီ ၁၃၊ ၂၀၂၃။

စစ်ကိုင်းတိုင်း၊ ကန့်ဘလူခရိုင်၊ ကျွန်းလှမြို့နယ်က ဒေသခံတွေ၊ ကျွန်းလှမြို့နယ် အထွေထွေသပိတ်ကော်မတီ၊ CDM ဝန်ထမ်းတွေနဲ့အတူ ပြည်သူ့ကာကွယ်ရေးရဲဘော်တွေ ပူးပေါင်းပြီး ဒီနေ့ဖေဖော်ဝါရီလ ၁၃ ရက်မှာစစ်ကောင်စီကို ဆန့်ကျင်ကြောင်း စုပေါင်းဆန္ဒပြခဲ့ပါတယ်။

“ဒီနေ့ ဖေဖော်ဝါရီလ ၁၃ ရက်နေ့မှာကျရောက်တဲ့ ဗိုလ်ချုပ်မွေးနေ့အထိမ်းအမှတ်အဖြစ် ကျွန်းလှမြို့ သဖန်း ဆိပ်ဆည်အနောက်ခြမ်း ပြောင်သွယ်ချောင်းရိုးတလျှောက် ကျေးရွာတွေစုပေါင်းပြီး စစ်အာဏာရှင်ဆန့်ကျင်ရေးသပိတ် ပြုလုပ်ခဲ့သလို လူထုစည်းရုံးရေးဟောပြောပွဲတွေပါ ပြုလုပ်ခဲ့တာပါ။ အင်အား ၂၀၀ နီးပါးလောက်ရှိတယ်”လို့ သပိတ်အဖွဲ့ဝင်ဒေသခံတဦးက ပြောပါတယ်။

“ဆောင်းကျွတ်ပေမယ့် ဒေါင်းခွပ်တာရပ်မသွားဘူး၊ အောင်လံလွှင့်ဖို့ ပြင်ထားကြ ” “ဖက်စစ်ရွေးကောက်ပွဲသပိတ်မှောက်၊ ဖက်ဒရယ်လမ်းကို ရဲရဲလျှောက် “ အစရှိတဲ့ စာတန်းတွေကို ကိုင်ဆောင်ပြီး ချီတက်ဆန္ဒပြခဲ့ကြတာပါ။

ချီတက်ဆန္ဒပြပြီးနောက် သပိတ်ကော်မတီအဖွဲ့ဝင်၊ CDM ပြည်သူ့ဝန်ထမ်းတွေက ဗိုလ်ချုပ်အောင်ဆန်းနဲ့ ပတ်သက်တဲ့အကြောင်းအရာတွေ တော်လှန်ရေးနဲ့နိုင်ငံရေးသဘောတရားတွေကို စုပေါင်းဟောပြော တာတွေ ပြုလုပ်ခဲ့တယ်လို့ သိရပါတယ်။

စစ်ကိုင်း၊ ဖေဖော်ဝါရီ ၁၃၊ ၂၀၂၃။

စစ်ကိုင်းတိုင်း၊ ဒီပဲယင်းမြို့နယ်မှာ ဒီနေ့ ဖေဖော်ဝါရီလ ၁၃ ရက်နေ့ မနက်ပိုင်းမှာ ပင်လုံစာချုပ်ချုပ်ဆိုတဲ့နေ့ အထိမ်းအမှတ်အဖြစ် ကျေးရွာ ငါးရွာက ဒေသခံတွေစုပေါင်းပြီး ကျေးလက်လူထု ဆိုင်ကယ်သပိတ် စစ်ကြောင်းနဲ့ ချီတက်ဆန္ဒပြခဲ့ကြတယ်လို့ သိရပါတယ်။

“ကျနော်အနေနဲ့ ဒီပင်လုံစာချုပ်ချုပ်ဆိုခဲ့တဲ့နေ့ကို ‘ပြည်ထောင်စုနေ့’ လို့ သတ်မှတ်ခဲ့ပေမယ့် လွတ်လပ်ရေးရပြီးချိန်က စ တွက်ကြည့်ရင် ပြည်ထောင်စုဆိုတာမျိူးကို ဘယ်ပြည်သူကမှ ပြည့်ပြည့်ဝဝ ခံစားသိရှိခဲ့ကြတာ မဟုတ်ဘူး။ ပါးစပ်ဖျားပေါ်မှာသာ ရှိခဲ့တဲ့ ပြည်ထောင်စုမျိုး ဖြစ်ခဲ့ပါတယ်။ အခု နွေဦးတော်လှန်ရေးက အစပြုပြီး တကယ့်စစ်မှန်တဲ့ ပြည်ထောင်စုမျိုးကို ရည်ရွယ်ပြီး ဖက်ဒရယ်ဒီမိုကရေစီ နိုင်ငံတော်ကို အားမလျှော့၊ နောက်မဆုတ်ဘဲ အဆုံးသတ်ထိ နိုင်သမျှ တာဝန်ကိုယ်စီ ထမ်းဆောင်သွားကြမှာပါ” လို့ သပိတ်ကော်မတီဝင်တဦးက ပြောပါတယ်။

ဒေသခံစုစုပေါင်းအင်အား ရာကျော်နဲ့ “ပြည်ထောင်စုဆိုတာ ဘာလဲ” “ပြည်ထောင်စုဆိုတာ တကယ်ရှိခဲ့သလား” အစရှိတဲ့စာသားတွေ ကိုင်ဆောင်ပြီး စစ်အာဏာရှင်စနစ်နဲ့ အတုအယောင် ပြည်ထောင်စု အလိုမရှိကြောင်း ဆန္ဒထုတ်ဖော်ခဲ့ကြတာပါ။

စစ်ကိုင်း၊ ဖေဖော်ဝါရီ ၁၂၊ ၂၀၂၃။

စစ်ကိုင်းတိုင်း၊ ချောင်းဦးမြို၊ မြို့မရပ်ကွက်ရှိ ချောင်းဦးမြို့နယ် အထွေထွေအုပ်ချုပ်ရေးဦးစီးဌာနရုံးနဲ့ မြို့မရဲစခန်း ဒရုန်းနဲ့ ဗုံးကြဲတိုက်ခိုက်ခံခဲ့ရတယ်လို့ သိရပါတယ်။

ဖေဖော်ဝါရီလ ၁၁ ရက်နေ့လည် ၂ နာရီ၀န်းကျင်မှာ ထွေအုပ်ရုံးကို ဗုံး ၈ လုံး၊ ရဲစခန်းကို ဗုံး ၂ လုံးချ တိုက်ခိုက်ခဲ့တယ်လို့ Chaung U Revolution တာဝန်ရှိသူက ပြောပါတယ်။

“စုစုပေါင်း ၁၀ လုံးပေါ့ နှစ်နေရာ ခွဲချတာ။ အကုန်ပေါက်တယ်။ ရဲစခန်းနဲ့ထွေအုပ်က ကပ်လျက်ဘဲ။ နှစ်နေရာစလုံးမှာ စကစ တပ်သားတွေလည်းရှိနေတယ်။ ဝန်ထမ်းတွေကော စကစ၊ ရဲကော ထိခိုက်တာရှိတယ်။ သူတို့ရုံးနေရာတွေမှာ jumper တွေတပ်ထားတော့ ကျနော်တို့ဘက်က ဒရုန်းတွေမလာနိုင်ဘူးဆိုပြီး ပေါ့ပေါ့နေကြတာ။ အဲဒါကို ကျနော်တို့ဘက်က ရအောင်လုပ်ခဲ့ကြတာ ဖြစ်တယ်”လို့ ပြောပါတယ်။

ဒရုန်းနဲ့ဗုံးချတိုက်ခိုက်ခံရလို့ ထွေအုပ်ဝန်ထမ်း ၃ ဦးထိခိုက်ဒဏ်ရာရသလို စစ်ကောင်စီတပ်သားတွေဘက်က ထိခိုက်သေဆုံးတာတွေလဲ ရှိခဲ့ပေမယ့် စာရင်းအတိအကျမရဘူးလို့ ဆိုပါတယ်။

ထွေအုပ်ရုံးနဲ့ရဲစခန်းကို ဒရုန်းနဲ့တိုက်ခိုက်ခံရချိန်မှာ စစ်ကောင်စီတပ်သားတွေ ဘက်က ဒရုန်းတွေကို ပစ်ခတ်တာတွေလုပ်ခဲ့ပေမယ့် အပြင်ကိုထွက်ပြီး ပစ်ခတ်တာတော့ မရှိဘူးလို့ သိရပါတယ်။
အဲဒီတိုက်ခိုက်မှုကို CHU PDF၊ Maung Special People!s Defence Force တို့က ပူးပေါင်းတိုက်ခိုက်ခဲ့တာ ဖြစ်ပါတယ်။

၂၀၂၂ ခုနှစ် ဖေဖော်ဝါရီလ ၂၄ ရက်ကလည်း ချောင်းဦးမြို့မရဲစခန်းကို CHU PDF ဘက်က ဝင်ရောက်တိုက်ခိုက်ခဲ့ရာ ရဲ ၂ ဦးထိခိုက်သေဆုံးခဲ့သေးတယ်လို့ သိရပါတယ်။

စစ်ကိုင်း၊ ဖေဖော်ဝါရီ ၁၂၊ ၂၀၂၃။

စစ်ကိုင်းတိုင်း၊ ကျွန်းလှမြို့နယ်၊ ကြာတကန်ကျေးရွာအနီးမှာ သုံးဘီးနဲ့လာတဲ့ဒေသခံတွေ မိုင်းထိပြီး ၅ ဦးဒဏ်ရာရခဲ့တယ်လို့ သိရပါတယ်။

ဖေဖော်ဝါရီလ ၁၀ ရက်မနက် ၈ နာရီခန့်မှာ ထန်းပင်ကုန်း- ကြာတကန်- ကျွန်းလှသွားလမ်းပေါ်မှာ သုံးဘီးဆိုင်ကယ်တစီး မိုင်းထိပြီး သုံးဘီးပေါ်ပါသူတွေ ထိခိုက်ဒဏ်ရာရသွားတာလို့ ဒေသခံတဦးက ပြောပါတယ်။

“သိရတာက သူတို့က ကျွန်းလှဘက်ကနေ ထန်းပင်ကုန်းဘက်ကို သုံးဘီးနဲ့လာတာ၊ ကြာတကန်အနီးမှာ မိုင်းထိတာလို့ သိရတယ်။ အဲ့နားမှာလည်း ပြီးခဲ့တဲ့ ရှေ့ရက်တွေက တခါဖြစ်သေးတယ်။ ဘယ်သူထောင်တဲ့ မိုင်းလဲတော့ မသိရဘူး”လို့ ပြောပါတယ်။

မိုင်းပေါက်ကွဲမှုကြောင့် သုံးဘီးဆိုင်ကယ်ပေါ်ပါ ကျွန်းလှမြို့နယ်၊ ပျဉ်းမနားမြိုင်ရပ်ကွက်နေ ကိုပြည့်ဖြိုးခိုင် ၃၁ နှစ်၊ ဦးဝေလင်း ၄၉ နှစ်၊ ဦးဝင်းမင်းထွန်း ၄၂ နှစ်၊ ဒေါ်မေသန်းထွန်း ၄၀ နှစ်နဲ့ မဖြိုးဖြိုးဝင်း ၂၀ နှစ် တို့ ထိခိုက်ဒဏ်ရာရခဲ့ပြီး သူတို့ကို ဒေသခံတွေရဲ့အကူအညီနဲ့ ကျွန်းလှဆေးရုံကို ပို့ပေးခဲ့ရတယ်လို့ သိရပါတယ်။

အဲ့ဒီလမ်းပိုင်းမှာ စစ်ကောင်စီနဲ့ ဒေသခံကာကွယ်ရေးတပ်တို့ ထိတွေ့မှု ဖြစ်လေ့ရှိတာကြောင့် ဒီမိုင်းကို ဘယ်အဖွဲ့အစည်းက ထောင်ထားခဲ့လဲ ဆိုတာကိုတော့ သီးခြားအတည်မပြုနိုင်သေးပါဘူး။
ဒါ့အပြင် ကျွန်းလှနယ်ထဲမှာ မကြာခဏဆိုသလို လမ်းသွားဒေသခံပြည်သူတွေဟာ အခုလိုပဲမိုင်းနင်းမိပြီး ထိခိုက်ဒဏ်ရာရတာတွေလည်း ရှိနေပါတယ်။

ပြီးခဲ့တဲ့ ဇန်နဝါရီလ ၂၉ ရက်ညနေပိုင်းကလည်း ကျွန်းလှမြို့၊ သစ်ရာမြိုင်ရပ်ကွက်ကနေ ရွာဘက်တွေကို သုံးဘီးနဲ့ကုန်စိမ်းလိုက်ရောင်းတဲ့ မိသားစု ၁ စု မိုင်းထိပြီး အသက် ၄ လအရွယ်ကလေးငယ် အပါအဝင် မိသားစုဝင် ၃ ဦးဒဏ်ရာရခဲ့သေးတယ်လို့ သိရပါတယ်။

စစ်ကိုင်း၊ ဖေဖော်ဝါရီ ၁၁၊ ၂၀၂၃။

စစ်ကိုင်းတိုင်း၊ ရွှေဘိုမြို့နယ်၊ ပန်းတလင်းဘုန်းကြီးကျောင်းမှာရောက်နေတဲ့ G1 (ဒုတိယဗိုလ်မှူးကြီး) အဆင့်ရှိအငြိမ်းစားတဦးကို တော်လှန်ရေးအဖွဲ့တခုက ပစ်ခတ်ရှင်းလင်းခဲ့တယ်လို့ သိရပါတယ်။

အဆိုပါ စစ်ဆင်ရေးအတွက် ၄ လကျော်အချိန်ယူပြင်ဆင်ခဲ့ရပြီး ဖေဖော်ဝါရီလ ၁၀ ရက် မနေ့က ညနေ ၆နာရီမှာ 9mm နဲ့ ၆ ချက်ပစ်နိုင်ခဲ့တယ်လို့ စစ်ဆင်ရေးမှာပါဝင်ခဲ့တဲ့ ရဲဘော်တဦးက ဆိုပါတယ်။

“သူက ဦးဆောင်ပြီးမွှေနေတာ၊ လက်ရှိရွာစဥ်ပတ်မီးရှို့နေတာလည်းပါတယ်၊ သူသွားတဲ့နေရာတိုင်းလည်း အရပ်၀တ်နဲ့ ကားနှစ်စီးအမြဲပါပါတယ်၊ လက်ယာဖက်ခြမ်းကို ၆ ချက်လုံးပစ်ခဲ့တာ၊ ဟ– လို့ပဲ အော်သွားနိုင်တယ်” လို့ ပြောပါတယ်။

ပစ်ခတ်ခံရလို့ G1 အငြိမ်းစားဗိုလ်ဖြစ်တဲ့ ဦးကိုကိုကြီး အသက် ၆၀ ကျော်ဟာ ပွဲချင်းပြီးသေဆုံးခဲ့ပြီး၊ သူဟာဆန္ဒပြကလေးတွေကို ဖမ်းဆီးတာတွေနဲ့ ရွာမီးရှို့တာတွေမှာလည်း ဦးဆောင်ပါဝင်နေသူတဦး ဖြစ်တယ်လို့ သိရပါတယ်။

သွားရောက်ပစ်ခတ်စဉ် အဆိုပါကျောင်းထဲမှာ ဘုန်းကြီးဝတ်လဲထားတဲ့ အသွင်ယူစစ်သားတွေရှိနေလို့ အမြန်ဆုတ်ခွာခဲ့ရပြီး၊ ပစ်ခတ်ခံရပြီးချိန်ကစလို့ ရွှေဘိုမြို့ထဲမှာစစ်ကောင်စီတပ်ဖွဲ့တွေ ခြေရှုပ်နေပြီး အစစ်ဆေးတင်းကြပ်တာတွေလည်း ရှိနေတယ်လို့ ဆိုပါတယ်။

စစ်ကိုင်း၊ ဖေဖော်ဝါရီ ၁၁၊ ၂၀၂၃။

စစ်ကိုင်းတိုင်း၊ တန့်ဆည်မြို့နယ်၊ တန့်ဆည်သပိတ်အင်အားစုမှ “ဖိရင်ကြွ ထိရင်ချ နိုင်ငံသစ်ကို တည်ဆောက်ကြ” ၊ “တရားမဝင်အတုအယောင် ရွေးကောက်ပွဲ လူထုအားနဲ့တိုက်ဖျက်ကြ” ´စတဲ့ ဘန်နာတွေ ကိုင်ဆောင်ပြီး ချီတက်ဆန္ဒပြခဲ့ကြပါတယ်။

ဖေဖော်ဝါရီလ ၁၁ ရက် ဒီမနက်ပိုင်းမှာ လူဦးရေ ၁၀၀ ကျော်နဲ့ တန့်ဆည်မြို့နယ်ထဲက တနေရာမှာ ချီတက်ဆန္ဒပြခဲ့ကြတာလည်း ဖြစ်ပါတယ်။

စစ်ကိုင်း၊ ဖေဖော်ဝါရီ ၁၁၊ ၂၀၂၃။

စစ်အုပ်ချုပ်ရေး ကြေညာထားတဲ့ စစ်ကိုင်းတိုင်းထဲက မြို့နယ်တွေမှာ စစ်ကောင်စီက ပြီးခဲ့တဲ့ ဖေဖော်ဝါရီလ ၄ ရက်နောက်ပိုင်းကစပြီး ညနေ ၆ နာရီကနေ နောက်တနေ့မနက် ၆ နာရီအထိ အပြင်မထွက်ရ အမိန့်ထုတ်ပြန်လိုက်တာကြောင့် ဒေသခံတွေ အခက်အခဲဖြစ်နေတယ်လို့ သိရပါတယ်။

စစ်ကိုင်းတိုင်းထဲက အင်းတော်၊ ဗန်းမောက်၊ ကောလင်း၊ ပင်လယ်ဘူး၊ မြောင်၊ ဆားလင်းကြီး၊ ပုလဲ၊ ယင်းမာပင်၊ ခင်ဦး၊ တန့်ဆည်နဲ့ ရေဦးမြို့နယ်တွေမှာ စစ်အုပ်ချုပ်ရေးအပြင် အခုလိုညမထွက်ရအမိန့်ပါ ထပ်တိုးထုတ်ပြန်ထားတာလည်း ဖြစ်ပါတယ်။

“စစ်အုပ်ချုပ်ရေး ကြေညာချက်နဲ့အတူ ခု ညမထွက်ရဆိုပြီး တင်းကျပ်မှုတွေ လုပ်လာတာပါ။ ဒေသခံတွေမှာ တနေ့တနေ့ထိတွေ့တိုက်ပွဲတွေ မီးလောင် ဆုံးရှုံးတာတွေအပြင် ခုဆို ညရေးညတာတောင် သွားမရထွက်မရဖြစ်နေပြီ။ သူတို့က စစ်ကိုင်းကို ရည်ရွယ်ချက်ရှိရှိ တင်းကျပ်မှုတွေလုပ်နေတာ” လို့ ခင်ဦး PDF တာဝန်ရှိသူတဦးက ပြောပါတယ်။

ဒေသကာကွယ်ရေးတပ်တွေနဲ့ စစ်ကောင်စီတပ်ဖွဲ့တွေကြား တိုက်ပွဲ ပြင်းထန်နေတဲ့ စစ်ကိုင်းတိုင်း၊ မကွေးတိုင်း၊ တနင်္သာရီတိုင်း၊ ပဲခူးတိုင်း၊ ချင်းပြည်နယ်၊ မွန်ပြည်နယ်၊ ကရင်ပြည်နယ် နဲ့ ကယားပြည်နယ်ထဲက မြို့နယ် ၃၇ မြို့နယ်ကို ၂၀၂၃ ခုနှစ်၊ ဖေဖော်ဝါရီလ ၂ ရက်ကစပြီး စစ်ကောင်စီက စစ်အုပ်ချုပ်ရေး ကြေညာလိုက်တာပါ။

“ကျနော်တို့ဆီမှာတော့ နေ့တိုင်းနီးပါး ထိတွေ့တိုက်ပွဲ ဖြစ်နေတုန်းပဲ။ အရေးအကြောင်းဆို ညအချိန်တွေလည်း ထပြေးနေရတုန်းပဲ။ ခုက စစ်အုပ်ချုပ်ရေးတွေ ညမထွက်ရတွေ လုပ်ထားတော့ ဘာတွေဆက်ဖြစ်မလဲကို မသိတော့ဘူး။ စစ်*တွေကြောင့် ဒေသခံတွေပဲ အမြဲအခက်အခဲ ဖြစ်နေရတာ” လို့ စစ်ကိုင်းတိုင်းအတွင်းက ဒေသခံတဦးက ဆိုပါတယ်။

အလားတူ စစ်ကိုင်းတိုင်း အပါအဝင် မကွေးတိုင်း၊ ချင်းပြည်နယ်တို့က မြို့နယ် ပေါင်း ၂၀ ကျော်မှာလည်း ဖေဖော်ဝါရီလ ၄ ရက် နောက်ပိုင်းကစပြီး စစ်ကောင်စီက ညနေ ၆ နာရီကနေ နောက်တနေ့ မနက် ၆ နာရီအထိ ညမထွက်ရအမိန့်ကို ထုတ်ပြန်ထားတယ်လို့ သိရပါတယ်။