စစ်ကိုင်း၊ ဒီဇင်ဘာ ၂၂၊ ၂၀၂၂။

စစ်ကိုင်းမြို့နယ်၊ မိုးသောက်(ဘောက်သောက်) ကျေးရွာအုပ်စုအတွင်းရှိ ကျေးရွာ ၅ ရွာက နေအိမ် ၇၀၀ ကျော်ကို ဒီဇင်ဘာလ ၂၁ ရက်မနေ့မနက်ပိုင်းမှာ စစ်တပ်ကဝင်ရောက်မီးရိူ့ခဲ့တယ်လို့ဒေသခံတဦးဆီက သိရပါတယ်။

စစ်ကိုင်းမြို့အခြေစိုက် ခမရ ၃၃ တပ်က မနေ့မနက် ၁၀ နာရီလောက်မှာ ဝင်ရောက်မီးရိူ့ခဲ့လို့ မိုးသောက်ရွာကနေအိမ် ၂၅၀၊ လင်းယဥ်ရွာက ၁၅၀၊ လင်းယဉ်ရွာသစ်ကနေအိမ် ၁၃၀၊ ရှမ်းကုန်းရွာက ၁၄၈ အိမ်နဲ့ ကုန်းကြီးရွာက ၅၁ အိမ်အပါ စုစုပေါင်း လူနေအိမ် ၇၂၉လုံး မီးရှို့ဖျက်ဆီးခံခဲ့ရတာလို့ သိရပါတယ်။

“မနေ့ကမနက် ၁၀ နာရီလောက်က တပ်မ ၃၃ ကနေ အင်အား ၇၀ လောက်နဲ့လာပြီး ကုန်းကြီးရွာကို မီးစရိူ့တာပါ၊ မီးဘေးသင့်ပြည်သူခန့်မှန်းခြေ သုံးထောင်ကျော်ရှိပါမယ်။ မီးဘေးသင့်ပြည်သူတွေကတော့ လက်ရှိမှာကြုံသလိုနေထိုင်နေရပါတယ်” လို့ စစ်ကိုင်းသတင်းမှန်ပြန်ကြားရေးတာဝန်ခံက ပြောပါတယ်။

အဲဒီအထဲက လင်းယဥ်ကျေးရွာဟာ နဝမရွှေကျင်သာသနာပိုင်စံကင်းဆရာတော်ကြီးနဲ့မန္တလေးမြို့အနောက်ပြင် မဟာဝိသုဒ္ဓါရုံတိုက်သစ် ဝါဆိုကျောင်းက ရွှေကျင်ဂိုဏ်း သာသနာပိုင် ဆရာတော်ဥုးအဂ္ဃိယတို့ရဲ့ဇာတိရွာဖြစ်တယ်လို့ ပြန်ကြားရေးတာဝန်ခံကဆက်ပြောပါတယ်။

လက်ရှိမှာ မီးဘေးသင့်ပြည်သူတွေအတွက် အရေးပေါ်ရိက္ခာ၊ မိုးကာ၊ အဝတ်အထည်၊စောင်နဲ့ ဆေးဝါးပစ္စည်းတွေ လိုအပ်နေတယ်လို့သိရပါတယ်။

စစ်ကိုင်း၊ ဒီဇင်ဘာ ၂၂၊ ၂၀၂၂။

စစ်ကိုင်းတိုင်း၊ တန့်ဆည်မြို့နယ်နဲ့ ရေဦးမြို့ နယ်က ကျေးရွာ ၁၇ ရွာကို စစ်ကောင်စီနဲ့ ပျူစောထီး အင်အား ၁၀၀ ကျော်လောက်က ဒီဇင်ဘာလ ၄ ရက်နေ့မှစတင်ကာ ဒီဇင်ဘာလ ၂၂ ရက် ဒီကနေ့မနက်ပိုင်းအချိန်ထိ မီးရှို့ဖျက်စီးခဲ့တယ်လို့ သိရပါတယ်။

တန့်ဆည်မြို့နယ်မှာ ဒီဇင်ဘာ ၄ ရက်နေ့ကနေ ၁၉ ရက်နေ့အထိ မီးရှို့ဖျက်စီးခံလိုက်ရတဲ့ကျေးရွာတွေကတော့ သာခေါင်ကြီးရွာနေအိမ် ၇၆ လုံး၊ ကမ်းဖြူရွာ နေအိမ် ၄၀ လုံး၊ ဝက်တိုးရွာ ၁၇ လုံး၊ ပုတီးရွာ ၆ လုံး၊ ပေချောင်ရွာ ၉၇ လုံး ၊ ထန်းကုန်းကြီးရွာ ၇၅ လုံး၊ မူးကျင်းစုရွာ ၇၃ လုံး၊ သာဂလရွာ ၄၁ လုံး၊ သာဂရရွာ ၁၁၇ လုံး၊ ထန်းပင်ကုန်းရွာ ၂၉ လုံး၊ ရွာရှည်(မ)ရွာ ၆ လုံး၊ ဂွေးကုန်းရွာ ၁၀ လုံး၊ ဖလံချိုင်ရွာတို့မှ ဆန်စက်ဆီစက်တွေ လည်းပါဝင်ပြီး စုစုပေါင်း အိမ်ခြေ ၈၄၈ လုံး ပြာကျပျက်စီးခဲ့တယ် လို့ ရေဦးမြို့ ပကဖ/ပလဖ ရဲဘော်အမေ့သား ကပြောပါတယ်။

“ဒီစကစတွေက ကန့်ဘလူနယ်ဘက်ကနေ စထွက်လာတာက ၁၈၀ လောက်ပါမယ်ဗျ။၈၀ လောက်က ကန့်ဘလူနယ်ဘက် ပြန်ဝင်သွားတယ်ဗျ။ ၁၀၀ လောက်က တန့်ဆည်နယ်နဲ့ အခုရေဦးနယ်ကိုဝင်လာပြီး ကျေးရွာတွေကို တိုက်ပွဲဖြစ်ပွားခြင်းမရှိပဲ မီးရှို့တာပါ။ အခုတော့ ပျက်စီးအခြေအနေကိုမသိရသေးဘူးဗျ။ စကစတွေကရွာထဲမှာဘဲရှိသေးတယ်။အပျက်အဆီးများနိုင်ပါတယ်။ ရွာဗုကြီး၊ ကလှဇဥ်၊ ပေကုန်း၊ ကြိုတိမ်ရွာတွေက ကပ်ရက်တွေပါဗျ” လို့ဆိုပါတယ်။

တပ်မ (၃၃) လက်အောက်ခံ ခမရ ၃၆၁ နဲ့ ၃၆၉ တပ်ရင်းတွေက စစ်ကောင်စီတွေနဲ့ဗျူစောထီးတွေ အင်အား ၁၀၀ကျော်က စစ်ကြောင်း ၂ကြောင်းနဲ့ ရေဦးမြို့နယ်က ကျေးရွာ ၄ ရွာဖြစ်တဲ့ ရွာဗုကြီး၊ ပေကုန်း၊ ကလှဇဥ်၊ ကြိုတိမ်ရွာတွေကို ဒီဇင်ဘာလ ၂၂ ရက်ဒီကနေ့မနက်ပိုင်းမှာ မီးရှို့ဖျက်စီးနေတယ်လို့ ရဲဘော်အမေ့သားက ပြောပါတယ်။

ပြီးခဲ့တဲ့၂၀၂၁ ဖေဖေါ်ဝါရီလ ၁ ရက်ကစလို့ အခု၂၀၂၂ ခုနှစ်၊ သြဂုတ်လ ၂၅ ရက်အထိ စစ်ကိုင်းတိုင်းက နေအိမ်ပေါင်း ၂၀၁၅၃ လုံး၊ မကွေးတိုင်းက နေအိမ်ပေါင်း ၅၄၁၈ လုံး၊ ချင်းပြည်နယ်က နေအိမ်ပေါင်း ၁၄၁၇ လုံးနဲ့ တခြားမြို့နယ်တွေက နေအိမ်ပေါင်း ၁၄၀၀ လုံးတို့ကို စစ်ကောင်စီတပ်သားတွေက မီးရှို့ဖျက်စီးခဲ့တယ်လို့ Data For Myanmar ရဲ့အချက်အလက်မှတ်တမ်းအရ သိရပါတယ်။

စစ်ကိုင်း၊ ဒီဇင်ဘာ ၂၁၊ ၂၀၂၂။

စစ်ကိုင်းတိုင်း၊ စစ်ကိုင်းမြို့နယ်၊ ညောင်ပင်ဝန်းရဲစခန်းရှေ့ကင်းစောင့်နေတဲ့ စစ်ကောင်စီတပ်သားတွေကို ကာကွယ်ရေးတပ်ဖွဲ့တွေကလက်နက်ကြီးနဲ့ပစ်ခတ်တိုက်ခိုက်ခဲ့ပြီးနောက် အဲ့ဒီစစ်သားတွေဟာ အနီးတဝိုက်ရှိ ကျေးရွာကနေအိမ် ၂ လုံးကိုမီးရှို့ဖျက်ဆီးသွားတယ်လို့ သိရပါတယ်။

အဆိုပါစစ်သားတွေကို ဒီဇင်ဘာလ ၂၀ ရက်မနေ့ကမနက်ပိုင်းမှာ တိုက်ခိုက်ခဲ့တာဖြစ်ပြီး၊ အဲဒီနေ့ ည ၁၀နာရီကျော်လောက်မှာတော့ ရဲစခန်းနဲ့သံလမ်းတခုသာခြားတဲ့ တံတားဦးကျေးရွာက နေအိမ် ၂ လုံးကို ဝင်ရောက်မီးရှို့ခဲ့တာဖြစ်တယ်လို့ People Revolution Force Kyaukseမှ တာဝန်ရှိသူတဦးက ပြောပါတယ်။

“ညောင်ပင်ဝန်းစခန်းထဲကစစ်ကောင်စီတွေက စခန်းအနားကအိမ်နှစ်လုံးကိုမီးရှို့သွားတယ်။ အကြောင်းမဲ့ရှို့တာပါ။ သူတို့ကိုလာပစ်ရင်ထပ်ရှို့မယ်လို့ ကြားထားပါတယ်။ မီးရှို့ခံရတဲ့နေအိမ်တွေနဲ့ရဲစခန်းက သံလမ်းပဲခြားတယ်”လို့ ဆိုပါတယ်။

ဒါ့အပြင်မနေ့ကတိုက်ခိုက်မှုမှာ စစ်ကောင်စီဘက်က ၃ ဦးကျည်ထိမှန်ခဲ့ပြီး ၁ ဦးကတော့အဲဒီနေရာမှာတင် သေဆုံးနိုင်တယ်လို့ အထက်ပါတာဝန်ရှိသူကဆိုပါတယ်။

တိုက်ခိုက်ခံရပြီးနောက်ခဏအကြာမှာရဲစခန်းထဲကို လူနာတင်ယာဥ်တစီး ဝင်သွားခဲ့တာကိုတွေ့မြင်ခဲ့ရတယ်လို့ PDF တောင်သာမှ တာဝန်ခံကိုဇင်ယော်ကလည်း ဒီဇင်ဘာလ ၂၀ ရက်မနေ့ကနေ့လည်ပိုင်းမှာ မြေလတ်အသံကို ပြောဆိုခဲ့ပါတယ်။

အဲဒီတိုက်ခိုက်မှုကို စစ်ကိုင်းခရိုင် တပ်ရင်း (၈)၊ မြင်းခြံခရိုင်တပ်ရင်း(၃)၊ PDF တောင်သာ၊ တိုက်နယ်(စွန်)ပကဖအဖွဲ့ ၊ ငါန်းဇွန်ပကဖအဖွဲ့ ၊ People. Revolation force Kyaukse (PRFK) တို့ပူပေါင်းပြီး တိုက်ခိုက်ခဲ့ကြတာလည်းဖြစ်ပါတယ်။

စစ်ကိုင်း၊ ဒီဇင်ဘာ ၂၁၊ ၂၀၂၂။

စစ်ကိုင်းတိုင်း၊ အင်းတော်မြို့နယ်၊ စက်တောကုန်းကျေးရွာက နေအိမ် ၄၁ လုံးနဲ့ စပါးကျီ ၃၀ လုံးကို ဒီဇင်ဘာ ၂၀ ရက်မနက်ပိုင်းလောက်မှာ စစ်ကောင်စီတပ်သားတွေက မီးရှို့ဖျက်ဆီးသွားခဲ့တယ်လို့ သိရပါတယ်။

မီးရှို့ခဲ့တဲ့စစ်ကောင်စီတွေက တပ်မ (၈၈) လက်အောက်ခံ ခမရ(၃၀၁)နဲ့ ခလရ (၄၁၆)မှ စစ်ကောင်စီအင်အား ၁၄၀ ကျော်လောက်က ကျေးရွာထဲမှာ ညအိပ်ခဲ့ပြီးတော့ မီးရှို့သွားခဲ့တာဖြစ်တယ်လို့ Indaw Revolution-IR မှ တာဝန်ရှိသူတဦးက မြေလတ်အသံကို ပြောပါ တယ်။

“စစ်**တွေက စစ်ကြောင်းနှစ်ခုပေါင်းထားတာ။ သူတို့က ၁၉ ရက်နေ့မှာ စက်တောကုန်းရွာကို ရောက်တယ်။ ညအိပ်ကြတယ်။ မနက်ရောက်တော့ ရွာကအထွက်မှာ အိမ်တွေကို မီးရှို့သွားခဲ့ကြတာပါ။ တိုက်ပွဲဖြစ်တာမရှိဘဲနဲ့ အကြောင်းမဲ့မီးရှို့ခဲ့တာ။ စပါးကျီတွေ၊ အိမ်တွေကတော့ ပြာပဲရလိုက်တော့တယ်” လို့ ဆိုပါတယ်။

အခုလို မီးရှို့ပြီးကျေးရွာကနေ ထွက်လာခဲ့တဲ့ စစ်ကြောင်း ၂ ခုကို လမ်းခုလတ်တနေရာအရောက်မှာ ကာကွယ်ရေးတပ်ဖွဲ့တွေက စောင့်ကြိုတိုက်ခိုက်ခဲ့တယ်လို့ အထက်ပါတာဝန်ရှိသူက ဆက်ပြောပါတယ်။

“စစ်တွေက ၁၄၀ ကျော်လောက်နဲ့ အင်အားအရမ်းများတော့ အထိအခိုက်အကျအဆုံးတော့ မသိရဘူးဗျ။ ကျနော်တို့ဖက်ကလည်း အထိအခိုက်လုံးဝမရှိခဲ့ဘူး။ ဒီနေ့မှာဆိုရင် စစ်တွေက နန်းမဟုတ်ကြီးရွာနဲ့ဖားပန်ရွာကို ဝင်နေတယ်ဗျ” လို့ဆိုပါတယ်။

ဒါ့အပြင် အဲဒီစစ်ကြောင်း ၂ခုက စက်တောကုန်းကျေးရွာကို မီးမရှို့ခင် ဒီဇင်ဘာ ၁၆ ရက်နေ့ကစလို့ ဂျုံးဂျုံးကျရွာသစ်၊ ဂျုံးဂျုံးကျရွာမ၊ ပန်းအင်းရွာ၊ မအူကုန်း၊ လယ်ပြင်စတဲ့ကျေးရွာ ၅ ရွာကို မီးရှို့ခဲ့တယ်လို့သိရပါတယ်။

စစ်ကိုင်း၊ ဒီဇင်ဘာ ၂၀၊ ၂၀၂၂။

စစ်ကိုင်းတိုင်း၊ ကန့်ဘလူမြို့နယ်က ၆ တန်းကျောင်းသားတဦးကို ဒီဇင်ဘာလ ၁၉ ရက်မနေ့ကညပိုင်းမှာ စစ်ကောင်စီတပ်သားတွေနဲ့ပျူစောထီးအဖွဲ့ဝင်တွေက သေနတ်နဲ့ပစ်သတ်ခဲ့ပြီး နေအိမ်ကိုပါမီးရှို့ခဲ့တယ်လို့ ဒေသခံတဦးဆီက သိရပါတယ်။

ကန့်ဘလူမြို့နယ်၊ ထန်းကုန်းတိုက်နယ်၊ ဇီးပင်သာရွာမှာနေတဲ့ အသက် ၁၃ နှစ်အရွယ် မောင်သုတဇော်ကို မနေ့ည ၈ နာရီခွဲဝန်းကျင်လောက်မှာ စစ်တပ်နဲ့ပျူစောထီးတွေက ဝင်ရောက်စီးနင်းနေအိမ်တွေမီးရှို့ချိန်မှာ သေနတ်နဲ့ပစ်သတ်ခဲ့တာလို့ ဆိုပါတယ်။

“စစ်တပ်နဲ့ပျူတွေက ဇီးပင်သာရွာကို လက်နက်ကြီးတွေနဲ့ ပစ်ခတ်ဝင်ရောက်မီးရိူ့နေချိန် ကလေးကကြောက်လို့ အိမ်သာနားပုန်းနေတာမှာ ပစ်သတ်ခံရတာပါ။ ပျူက ပစ်သလား၊ စစ်တပ်က ပစ်သလားတော့မသိဘူး။ အခုရွာထဲက စစ်တပ်နဲ့ပျူတွေထွက်သွားတော့ အလောင်းကတော့ မိဘတွေလက်ထဲရောက်ပေမယ့် သူ့အိမ်ပါမီးရိူ့ခံရတော့ ထားစရာမရှိဘူး” လို့ ဒေသခံတဦးကပြောပါတယ်။

စစ်ကောင်စီတပ်ဟာ ကန့်ဘလူမြို့နယ်၊ လယ်လှရွာက ပျူစောထီးတွေအပါ အင်အား ၅၀ လောက်နဲ့ ပစ်ခတ်ဝင်ရောက်ပြီး မောင်သုတဇော်နေအိမ်အပါအိမ် ၃ လုံးကို မီးရှို့ခဲ့တာလို့ သိရပါတယ်။

အလားတူပြီးခဲ့တဲ့ နိုဝင်ဘာလ ၅ ရက်ကလည်း ကန့်ဘလူမြို့နယ်၊ လျော်ဖြူကုန်းရွာက အသက် ၁၇ နှစ်အရွယ် အဌမတန်းကျောင်းသား မောင်ဝင်းဝင်းသူကိုလည်း ခမရ ၃၆၃ တပ်သားတွေက အခြားစစ်ရှောင် ၁၃ ဦးနဲ့အတူ ဖမ်းဆီးသတ်ခဲ့ပါသေးတယ်။

ဒါ့အပြင်နိုဝင်ဘာလ ၃ ရက်ကလည်း ခမရ ၃၆၃ တပ်က လက်နက်ကြီးနဲ့ပစ်ခတ်လို့ ကန့်ဘလူမြို့နယ်၊ ဇီးကနားရွာက အသက် ၁၃ နှစ်အရွယ် မောင်ပိုင်ဆက်ထူးသေဆုံးခဲ့ပြီး၊ စက်တင်ဘာလ ၉ ရက်ကလည်းအသက် ၅ နှစ်အရွယ် မိဿလင်ရွာသား မောင်အောင်မြင့်မြတ်ဟာ စစ်ကောင်စီတပ်ကပစ်ခတ်တဲ့ လက်နက်ကြီးထိမှန်ပြီး သေဆုံးခဲ့ရပါသေးတယ်။

မကွေး၊ ဒီဇင်ဘာ ၂၀၊ ၂၀၂၂။

မကွေးတိုင်း၊ ရေစကြိုမြို့နယ်၊ ပိတ်သင်းကပ်ရွာက နေအိမ် ၉ လုံးကိုစစ်ကောင်စီတပ်တွေက မီးရှို့ဖျက်ဆီးသွားတယ်လို့ သိရပါတယ်။

ဒီဇင်ဘာလ ၁၉ ရက်နေ့လည်ပိုင်းမှာ ဗြိဘရွာကိုမီးရှို့ပြီးထွက်လာတဲ့ စစ်ကောင်စီနဲ့ပျူအင်အား ၆၀ ကျော်ဟာ ပိတ်သင်းကပ်ရွာကိုရောက်လာပြီး ဒေသခံနေအိမ်တွေကို မီးရှို့သွားတာဖြစ်တယ်လို့ ရေစကြိုမြို့နယ် ပြည်သူ့ကာကွယ်ရေးအဖွဲ့တာဝန်ရှိသူက ပြောပါတယ်။

“အဲ့ကောင်တွေက ပြီးခဲ့တဲ့ရက်က ကျနော်တို့နဲ့တိုက်ပွဲဖြစ်လိုက်တဲ့ကောင်တွေပဲ။ သူတို့က ရွှေ့လျားစစ်ကြောင်း လျှောက်သွားနေတာ။ နေ့လည်ပိုင်းမှာ ပိတ်သင်းကပ်ကိုဝင်ပြီး မီးရှို့သွားတာ။ ဒေသခံတွေကတော့ သူတို့ ဝင်လာမယ် သတင်းကြားကတည်းကပြေးကုန်တာ။ တရွာလုံးရှို့သွားတာတော့မဟုတ်ဘူး”လို့ ပြောပါတယ်။

စစ်ကောင်စီနဲ့ပျူစောထီးအဖွဲ့ကမီးရှို့လို့ နေအိမ် ၉ လုံးပြာကျသွားပြီး အိမ်တွင်းပစ္စည်းတွေပါ မီးလောင်ဆုံးရှုံးကုန်တယ်လို့ ဆိုပါတယ်။

ပိတ်သင်းကပ်ရွာကိုမီးရှို့ပြီးနောက် ဆိပ်ရွာကိုထပ်မံဝင်ရောက်ကာ နေအိမ်ကတန်ဖိုးရှိပစ္စည်းတွေကိုလည်း ယူဆောင်ပြီး ကျောက်ဖူးကျေးရွာမှာ ညအိပ်ခဲ့တယ်လို့ သိရပါတယ်။

ဒီဇင်ဘာလ ၂၀ ရက်ဒီမနက်ပိုင်းမှာတော့ ကျောက်ဖူးရွာကနေထွက်ခွာပြီး မအူရဲစခန်းထဲမှာ တပ်စွဲနေတယ်လို့ ရေစကြိုမြို့နယ် ပြည်သူ့ကာကွယ်ရေးအဖွဲ့တာဝန်ရှိသူက ပြောပါတယ်။

ခုလိုစစ်တပ်ကရွာစဥ်လှည့်မီးရှို့နေတာကြောင့် ပိတ်သင်းကပ်၊ သစ်ကောက်ဆိပ်၊ အောက်အို၊ ဝက္ကတောအပါအဝင် ကျေးရွာ ၅ ရွာက ဒေသခံ ၁ထောင်ကျော် ဘေးလွတ်ရာကို ထွက်ပြေးတိမ်းရှောင်နေရတယ်လို့ သိရပါတယ်။

ဒီဇင်ဘာလ ၁၈ ရက်ကလည်း အဆိုပါစစ်ကောင်စီတပ်ဟာ ဗြိဘရွာကို မီးရှို့ဖျက်စီးခဲ့လို့ ဒေသခံ နေအိမ် ၇၄ လုံးမီးလောင်ပျက်စီးခဲ့ပါသေးတယ်။

မကွေး၊ ဒီဇင်ဘာ ၂၀၊ ၂၀၂၂။

မကွေးတိုင်း၊ ပေါက်မြို့နယ်၊ ထောက်ရှာပင်ရွာကနေအိမ်တွေကို စစ်ကောင်စီတပ်တွေက တိုက်ပွဲမဖြစ်ဘဲ ဝင်ရောက်မီးရှို့ခဲ့တယ်လို့ သိရပါတယ်။

စစ်ကောင်စီတပ်သားတွေဟာ အင်အား ၁၀၀ ကျော်နဲ့ ဒီဇင်ဘာလ ၁၈ ရက် ည ၈ နာရီလောက်မှာ စတင်ဝင်ရောက်လာပြီး နေအိမ်တွေကိုမီးရှို့ခဲ့ပြီးနောက် တညတာတပ်စွဲနေထိုင်ကာ ဒီဇင်ဘာလ ၁၉ ရက် ည ၇ နာရီကျော်လောက်မှပြန်ထွက်သွားခဲ့ကြတယ်လို့ ပေါက်မြို့နယ်ဒေသပျောက်ကျားတပ်ဖွဲ့ဝင် ဗိုလ်သိန်းငှက်က ပြောပါတယ်။

“အဲ့စစ်ကြောင်းက မြိုင်ကိုထိုးစစ်စင်နေတဲ့စစ်ကြောင်းပါ။ ပခုက္ကူတပ်ထဲကဖြစ်ဖို့များတယ်။ သေချာတော့မသိဘူး။ အခုစစ်ကြောင်းကနှစ်ကြောင်း တကြောင်းကမြိုင်ဘက်ကိုသွားတယ်။ နောက်တကြောင်းက ပေါက် မီးရှို့ခံရတဲ့ရွာအနီးမှာ ပျုရွာရှိတယ်၊ ပျူတွေနဲ့ ပေါင်းထောက်ရှာပင်ရွာကိုမီးရှို့တာ။ ရွာသားတွေလည်း အကုန်ရှောင်နေရတယ်” လို့ ပြောပါတယ်။

အဲ့ဒီစစ်ကောင်စီတပ်ဖွဲ့တွေကို ဒေသကာကွယ်ရေးတပ်ဖွဲ့တွေအနေနဲ့ သွားရောက်တိုက်ခိုက်ချင်ပေမယ့် စစ်ကောင်စီဘက်က လေယာဉ်နဲ့လာရောက်ပစ်ခတ်ခဲ့ပါက မြေပြင်အနေအထားမှာ လယ်ကွင်းပြင်ကြီး ဖြစ်နေတဲ့အတွက် ရှောင်ပုန်းဖို့ခက်ခဲတာကြောင့် မတိုက်ခိုက်ခဲ့ရဘူးလို့လည်း ဗိုလ်သိန်းငှက်ကပြောပါတယ်။

ထောက်ရှာပင်ကျေးရွာကို စစ်ကောင်စီတပ်တွေမီးရှို့တာဟာ အခုတခါကပထမအကြိမ်ဖြစ်ပြီး၊ နေအိမ် ၂၀ မီးလောင်ဆုံးရှုံးသွားခဲ့တယ်လို့လည်း သိရပါတယ်။

အဆိုပါစစ်ကြောင်းဟာမီးရှို့ပြီးနောက်ဒီဇင်ဘာလ ၁၉ ရက်ညမှာတော့ မြိုင်မြို့နယ်ရဲ့ အနောက်တောင်ပိုင်းမှာရှိတဲ့ လက်ခုပ်ပင်ရွာ၊ မြင်းကိုးသစ်ရွာနဲ့ ဝါးရင့်ချိုင်ရွာတွေကို စစ်ကြောင်းထိုးဝင်ရောက်ခဲ့တယ်လို့လည်း သိရပါတယ်။

မကွေး၊ စက်တင်ဘာ ၅၊ ၂၀၂၂။

မကွေးတိုင်း၊ နတ်မောက်မြို့နယ် ကျောက်အိုးကျေးရွာက အိမ်တအိမ်အတွင်းက ရှိသမျှ အိမ်အသုံးအဆောင် အကုန်ယူပြီးမှ စစ်တပ်က အကြောင်းမဲ့ မီးရှို့သွားခဲ့ပါတယ်။

စက်တင်ဘာ၄ရက် မနေ့က မနက်ပိုင်းမှာ စစ်ကောင်စီတပ်သား ၈ယောက်က အရပ်သားပြည်သူတွေရဲ့ ဆိုင်ကယ် ၄စီးကို ချောဆွဲလာပြီး ပစ္စည်းတွေသယ်အပြီးမှာ မီးရှို့ခဲ့တာဖြစ်တယ်လို့ ဒေသခံတဦးက ပြောပါတယ်။

” တရွာလုံးက ပြည်သူတွေ ရွာလုံးကျွတ်လောင်မှာကို စိုးရိမ်ခဲ့ရပါတယ်၊ တချို့ဆို ရှော့ခ်ရပြီး ဆေးကုလိုက်ရတာတွေတောင်ရှိတယ်” လို့ ပြောပါတယ်။

မီးမရှို့ခင်မှာ ပြည်သူတွေဆီက ဖုန်းအားလုံးသိမ်းထားပြီး မီးရှို့ပြီးမှ ပြန်ပေးခဲ့တာလို့ ဆိုပါတယ်၊ မီးမရှို့ခင် တရက်အလိုမှာလည်း ကျောက်အိုးရွာတကျော ပြည်သူတွေဆီက ကြက်နဲ့ အစားအသောက်တွေ အတင်းတောင်းယူတာမျိုးတွေလည်း ရှိခဲ့ပါသေးတယ်။

” စစ်ကြောင်းလာတိုင်း သယ်နိုင်တဲ့ ပစ္စည်းတွေ ဝင်ယူတာမျိုးတွေ ရှိပါတယ်၊ လက်ရှိလည်း စက်တင်ဘာ ၄ရက် ညပိုင်းမှာ ဒီနေ့မီးရှိခံရတဲ့နေအိမ်က ပစ္စည်းတွေ ကားပေါ်မှာတင်ထားပြီး စစ်ဘက်သုံးကားအကြီးတစ်စီးအင်အား ၁၅ ယောက်ဝန်းကျင်လောက်နဲ့ သပွတ်ပင်ကျေးရွာမှာ တပ်စွဲနေထိုင်နေတာပါ” လို့ ပြောပါတယ်။

အဲ့ဒီအိမ်ကို စစ်တပ်က PDF နဲ့ ဆက်စက်တယ်ဆိုကာ အကြောင်းမဲ့ မီးရှို့သွားခဲ့တာဖြစ်ပြီး အဲ့ဒီအိမ်ရှင်တွေက အိမ်မှာမနေတာ ၃နှစ်ဝန်းကျင်လောက်ရှိပြီလို့ ဒေသခံတဦးက ပြောပါတယ်။

အဲ့ဒီနေအိမ်ကို မီးမရှို့ခင်မှာလည်း ကျောက်အိုးရွာမှာ တပတ်လောက်တပ်စွဲနေထိုင်ပြီး ပြည်သူတွေကို ဖမ်းဆီးနှိပ်စက်တာတွေ လုပ်တဲ့အပြင် အတင်းအကြပ်ငွေကြေးတောင်းတာတွေလည်း လုပ်ခဲ့သေးတယ်လို့ ဒေသခံတဦးကပြောပါတယ်။

” ကျောက်အိုးကျေးရွာရဲ့ မီးရှိပြာချ ခံရတဲ့ နေအိမ်မှာ တပ်စွဲတုန်းကလည်း ကျေးရွာတွင်းမှ ပြည်သူများထံမှ အိမ်ထောင်ပရိဘောဂသုံးဖို့ အရံထားတဲ့ ပျဥ်ချပ်သစ်များသိုလှောင်ထားသည်ဟု ဆိုကာ ငွေကျပ် ရှစ်သိန်းလောက် အတင်းအဓမ္မ တောင်းယူသွားကြပါသေးတယ်” လို့ ဆိုပါတယ်။

အိမ်ခြေ၃၀၀ ဝန်းကျင်ရှိတဲ့ နတ်မောက်မြို့ အ‌ရှေ့ခြမ်းက ကျောက်အိုးရွာကို PDF မလာနိုင်အောင် နယ်မြေရှင်းလင်းရေးပုံစံနဲ့ ခဏခဏ စစ်ကြောင်းထိုးခံနေရတဲ့ ရွာတခုဖြစ်ပြီး အဲ့ရွာက ပြည်သူတွေအနေနဲ့ စိုးရိမ်ထိတ်လန့်နေကြရတယ်လို့ သိရပါတယ်။

မကွေး၊ သြဂုတ် ၂၂၊ ၂၀၂၂။

မကွေးတိုင်း၊ ဆောမြို့၊ အထက ၁ အနီးက နေအိမ်လုံးမှာ သြဂုတ်လ ၂၁ ရက်မနေ့ည ၈ နာရီခန့်က အသက် ၁၃ နှစ်အရွယ်မိန်းကလေး ၁ ဦးအပါအဝင် ဒေသခံ ၆ ဦး သေနတ်နဲ့ ပစ်ခတ်သတ်ဖြတ်ခံခဲ့ရတယ်လို့ ဒေသခံတွေဆီက သိရပါတယ်။

ပစ်ခတ်သတ်ဖြတ်ခံရတဲ့နေအိမ်ဟာ ဦးခင်မောင်လင်းဆိုသူရဲ့နေအိမ်ဖြစ်ပြီး အမည်မသိလက်နက်ကိုင်လူတစုက ဝင်ရောက်ပစ်ခတ်ခဲ့လို့ ၎င်းအပါအဝင် နေအိမ်အတွင်းမှာရှိတဲ့ သူရဲ့မိသားစုဝင်တွေထဲက ဇနီးဖြစ်သူ ဒေါ်ယဥ်ငွေ၊ ချွေးမဖြစ်သူ ဒေါ်ခင်မာသက်၊ အသက် ၁၃ နှစ်အရွယ် မြေးဖြစ်သူ မသက်အေးငြိမ်း၊ ညီဖြစ်သူ ဦးဇော်ဌေးတို့နဲ့ TV လာကြည့်တဲ့ ဧည်သည့်တွေဖြစ်တဲ့ ဦးအောင်သိန်းဝင်းတို့ ၆ ဦးသေဆုံးခဲ့ပြီး တခြားဒေသခံ ၂ ဦးဒဏ်ရာရရှိခဲ့တယ်လို့ ဒေသခံတဦးကပြောပါတယ်။

“ည ၈ နာရီလောက်ကြီး ဝင်ပစ်သွားတာ။ သေသွားတာက ဦးခင်မောင်လင်းရယ်၊ သူ့မိန်းမ၊ သူ့ညီ၊ သူ့ချွေးမ၊ သူ့မြေးမလေးရယ် ကလေးမလေးက ၁၃ နှစ်ဘဲရှိသေးတယ်။ နောက်တယောက်က သူတို့အိမ်ကို TV လာကြည့်တဲ့တယောက်။ အားလုံး ၆ ယောက်သေတယ် ဘေးအိမ်အနီးအနားက ၂ ယောက်ဒဏ် ရာရတယ်” ဆောမြို့ခံတဦးက မြေလတ်အသံကို ပြောပါတယ်။

ဦးခင်မောင်လင်းဟာ အုတ်သဲကျောက်ရောင်းဝယ်ရေးလုပ်ကိုင်သူဖြစ်ပြီး စစ်တပ်သတင်းပေး ၁ ဦးလို့စွပ်စွဲကာ မိသားစုလိုက်ပစ်ခတ်သွားခြင်းဖြစ်တယ်လို့ ဆောမြို့နယ်ပြည်သူ့အုပ်ချုပ်ရေးအဖွဲ့တာဝန်ခံက မြေလတ်အသံကို ပြောပါတယ်။

“အခုကအခြေအနေတွေကရှုပ်ထွေးနေတယ်။ အဲ့ဒီဖြစ်စဥ်ကို စုံစမ်းနေတုန်းဘဲ ရှိသေးတယ်။ မျက်မြင်တွေ့သူတွေပြောကြားချက်အရ ဆော PDF အဖွဲ့တခုဖြစ်တယ်လို့ သိရတယ်။ ဒီကျနော်တို့တပ်ဖွဲ့ဝင်တွေကို ဒလန်ရှင်းမယ်ဆိုရင်တောင် ဒလန်လို့ကျော်ဇောနေရင်တောင် ဘယ်အရာတွေလုပ်ဆောင်လို့ ဒလန်လို့သတ်မှတ်တာလဲဆိုတာတွေ အသေးစိတ်စုံစမ်းပြီးမှ ရှင်းလင်းတာတွေလုပ်ဆောင်ဖို့ မှာကြားထားပြီးသားဖြစ်တယ်။ အခုက သူကဒလန်လည်းမဟုတ်ဘူး။ နောက်ပြီးတော့မိသားစုဝင် ခလေးတွေပါအကုန်သတ်သွားပြီး ပစ္စည်းယူသွားတာ” လို့ ဆောမြို့နယ်ပြည်သူ့အုပ် ချုပ်ရေးအဖွဲ့တာဝန်ခံက ပြောပါတယ်။

ဒါ့အပြင် လာရောက်ပစ်ခတ်သွားသူတွေဟာ ကား ၂ စီး၊ ရွှေထည်၊ ငွေသားနဲ့ အခြားအဖိုးတန်ပစ္စည်းတွေကိုလည်း ယူဆောင်ထွက်ပြေးသွားတယ်လို့ ဒေသခံတွေဆီက သိရပါတယ်။

ဒီဖြစ်စဥ်နဲ့ပတ်သက်လို့ YDF(Saw) အဖွဲ့ဝင်တွေက ဒလန်အကြောင်းပြပစ်ခတ်သတ်ဖြတ်ခဲ့တာဖြစ်ပြီး၊ ဒီလုပ်ဆောင်မှုကိုရှုတ်ချတယ်လို့ ဆောမြို့နယ်ပြည်သူ့အုပ်ချုပ်ရေးအဖွဲ့၊ လောင်းရှည်ဒေသပြည်သူ့ကာကွယ်ရေးတပ်ဖွဲ့-LSRPDF၊ ဆောပြည်သူ့ကာကွယ်ရေးတပ်ဖွဲ့ (PDF Saw)၊ The Youth Force (Saw&Kyaukhtu)၊ ကျောက်ထုဒေသပြည်သူ့ကာကွယ်ရေးတပ်ဖွဲ့ (KTU Region)နဲ့ ကိုရီးယားရောက်ယောသူ၊ ယောသားများအဖွဲ့စတဲ့ ဒေသတွင်း PDF တွေနဲ့ တော်လှန်ရေးအင်အားစုတွေဘက်က ထုတ်ပြန်ထားပါတယ်။

ဒေသတွင်း PDF တွေရဲ့ YDF(Saw)အပေါ် ပူးပေါင်းထုတ်ပြန်ချက်နဲ့ပတ်သက်လို့ မြေလတ်အသံအနေနဲ့ YDF(Saw) အဖွဲ့ထံ အဆက်မပြတ်ဆက်သွယ်ခဲ့ပေမယ့် ဒီညနေပိုင်းအထိ ဆက်သွယ်လို့မရခဲ့ပါဘူး။