ညောင်ကျိုးစခန်း

ရွှေတောင်၊ မတ် ၁၃၊ ၂၀၂၅။

ပဲခူးတိုင်း၊ ပန်းတောင်းမြို့နယ်၊ ရခိုင်ရိုးမပေါ်ရှိ ညောင်ကျိုးစခန်းက ဒဏ်ရာရစစ်ကောင်စီတပ်သားတွေကို ရွှေတောင်မြို့နယ်ရှိ ကုတင် ၁၀၀ စစ်ဆေးရုံကိုပို့ဆောင်နေတယ်လို့ ဒေသခံတွေဆီကသိရပါတယ်။

ရွှေတောင်မြို့ရှိ စစ်ကောင်စီတပ်ဆေးရုံမှာ ကုတင် ၁၀၀ ဆံ့ပြီး အဲဒီဆေးရုံကို မတ် ၁၂ ရက်မှာ ဒဏ်ရာရတဲ့ စစ်ကောင်စီတပ်သား ၄၀ ကျော်ကို ပို့ဆောင်ခဲ့တယ်လို့ဆိုပါတယ်။

“ဖောကား ၁ စီးနဲ့ပို့တာ။ အကောင်ကြီး (အရာရှိ)တွေဆိုရင်တော့ လူနာတင်ကားနဲ့ပို့တယ်။ မနေ့ကဆိုရင် ဖောကား ၁ စီးနဲ့ ၂ ခေါက်ပို့တယ်။ တခေါက်မှာ ၂၀ ကျော်စီပါတယ်”လို့ ဥသျှစ်ပင်မြို့ခံ အမျိုးသားတဦးက မြေလတ်အသံကို ပြောပါတယ်။

တိုက်ပွဲအတွင်း ဒဏ်ရာရတဲ့စစ်သားတွေကို ညောင်ကျိုးကျေးရွာရှိ လူနာတင်ကားတွေနဲ့ ဥသျှစ်ပင်မြို့နယ်၊ လဲရွာတံတားကိုပို့ဆောင်ပြီး အဲဒီတံတားကနေတဆင့် ဖောကားနဲ့ ရွှေတောင်မြို့ကုတင် ၁၀၀ ဆေးရုံကိုပို့ဆောင်တာလို့ဆိုပါတယ်။

“ညောင်ကျိုးက (ပရဟိတ)အသင်းကားကို သူတို့(စကစ)ကိုယ်တိုင်မောင်းပြီးဆင်းလာတာတွေ့တယ်။ အဲ့တာကို အရပ်ဖက်အဖွဲ့ကားတွေက ဥသျှစ်ပင် လဲရွာတံတားဂိတ်ကနေစောင့်ပြီး လူနာကို ကုတင် ၁၀၀ ပို့ပေးရတာ”လို့ အထက်ပါအမျိုးသားကပြောပါတယ်။

အာရက္ခတပ်တော်(AA)နဲ့ ပူးပေါင်းတပ်ဖွဲ့တွေ ထိုးစစ်ဆင်တိုက်ခိုက်နေတဲ့ ညောင်ကျိုးတိုက်ပွဲမှာ မတ် ၁၂ ရက် ဒီနေ့အထိတိုက်ပွဲပြင်းထန်နေပြီး ပူးပေါင်းတပ်တွေရဲ့ထိုးစစ်ကလည်း ညောင်ကျိုးကျေးရွာအလွန် ညောင်ခြေထောက်ကျေးရွာအနီးထိ ရောက်ရှိနေပြီလို့ မြေပြင်အခြေအနေကို သိရှိတဲ့ တော်လှန်ရေးတပ်ဖွဲ့ဝင်တဦးပြောပါတယ်။

“ညောင်ကျိုးက မကျသေးပေမယ့် ညောင်ကျိုး ဒီဘက်ထိပါ ရောက်နေတယ်ပြီ။အဲဒီနေရာက ညောင်ကျိုးနဲ့ ညောင်ခြေထောက်ကြား။ ဥသျှစ်ပင်အနီးတော့မရောက်သေး။ လက်နက်ကြီးပစ်သံတွေတော့ ကြားနေရတယ်”လို့ သူကဆိုပါတယ်။

စစ်ကောင်စီတပ်ရဲ့ညောင်ကျိုးကျေးရွာရှိ ပင်မ စခန်းကုန်းမှာ ရခိုင်ရိုးမပေါ်ရှိ ပန်းတောင်း-တောင်ကုတ်ကားလမ်းမပေါ်မှာတည်ရှိပြီး ညောင်ခြေထောက်ကျေးရွာအခြေစိုက် ကပစ ၆ နဲ့ ၁၀ မိုင်ခန့်ကွာဝေးပါတယ်။

ပဲခူးတိုင်း နဲ့ ရခိုင်ပြည်နယ်အစပ်၊ ပန်းတောင်း-တောင်ကုတ်ကားလမ်းမရှိ ရခိုင်ရိုးမပေါ်က စစ်ကောင်စီတပ်စခန်းတွေဖြစ်တဲ့ မိုးထိတောင်၊ ပန်းကန်ကွဲ၊ တောင်ပုံကြီး၊ နတ်တောင်ကုန်းတို့ကို အာရက္ခတပ်တော် (AA)နဲ့ တော်လှန်ရေးပူးပေါင်းတပ်တွေက တိုက်ခိုက်သိမ်းပိုက်ထားပါတယ်။

စာတည်း – လင်း

ပန်းတောင်း၊ မတ် ၁၁၊ ၂၀၂၅။

တိုက်ပွဲပြင်းထန်နေတဲ့ ပဲခူးတိုင်း၊ ပန်းတောင်းမြို့နယ်၊ ရခိုင်ရိုးမပေါ်ရှိ ညောင်ကျိုးစခန်းကနေ စစ်ကောင်စီတပ်သား ၃၀ ခန့်မတ် ၁၁ ရက်ဒီကနေ့မှာ ထွက်ပြေးလာခဲ့ကြတယ်လို့ မြေပြင်အခြေအနေကိုသိရှိတဲ့ဒေသကာကွယ်ရေးတပ်ဖွဲ့ဝင်တွေဆီက သိရပါတယ်။

စစ်ကောင်စီတပ်သား ၃၀ ခန့်ဟာ ညောင်ကျိုးကျေးရွာအနီးရှိ ချောင်းလမ်းကြောင်းကနေ ညောင်ခြေထောက်ကျေးရွာရှိ ကပစ ၆ တပ်နယ်ထဲကို ထွက်ပြေးသွားကြတာလို့ ဆိုပါတယ်။

“အခုက ညောင်းကျိုးကနေ ပြေးနေတာ။ ဒီနေ့ကိုပြေးလာတာ ၃၀ ရှိတယ်။ ချောင်းထဲအတိုင်း ခြေလျင်ပြေးလာတာပေါ့။ ညောင်ခြေထောက်ရွာကိုတည့်တည့်ပဲ။ စခန်းကနေ လက်နက်ကြီး တောက်လျှောက်ပစ်နေတယ် “လို့ မြေပြင်အခြေအနေကိုသိရှိတဲ့ ကာကွယ်ရေးတပ်ဖွဲ့ဝင်တဦးက မြေလတ်အသံကိုအတည်ပြုပြောဆိုပါတယ်။

ဒါ့အပြင် ဒီကနေ့မနက်ပိုင်းမှာ ညောင်ကျိုးတိုက်ပွဲကို Mi-35 ရဟတ်ယာဥ် ၁ စီးနဲ့ ၁၀ မိနစ်ခန့်ကြာ ပစ်ကူပေးခဲ့သလို ၂၇ မိုင်စခန်းဘက်ကနေလည်း လက်နက်ကြီး နဲ့ တောက်လျောက်ပစ်ကူပေးနေတယ်လို့ ဆိုပါတယ်။

“စကစတွေက ညောင်ခြေထောက်လမ်းအတိုင်း အောက်(ကို)စုန်ဆင်းတာ။အဲ့တလမ်းပဲရှိတယ်။ တောထဲ၊ ချောင်းထဲကပြေးပြီးတော့ပြန်ထွက်မလာပဲ နီးစပ်ရာ တဲတိုက်တွေ ၀င်နေကြတဲ့ သူ(စကစ)တွေလည်း ရှိသေးတယ်။ ရှောင်နေကြတာပေါ့”လို့ အထက်ပါစစ်ရေးသတင်းရင်းမြစ်က ပြောပါတယ်။

ညောင်ကျိုးကျေးရွာရှိစစ်ကောင်စီတပ်ရဲ့ ပင်မကုန်းစခန်းမှာ ညောင်ခြေထောက်ကျေးရွာရှိ ကပစ ၆ နဲ့ ၁၀ မိုင်ခန့် ဝေးသလို ဥသျှစ်ပင်မြို့နဲ့ မိုင် ၂၀ ခန့်ကွာဝေးပါတယ်။

အာရက္ခတပ်တော်(AA)နဲ့ တော်လှန်ရေးပူး ပေါင်းတပ်ဖွဲ့တွေ ထိုးစစ်ဆင်တိုက်ခိုက်နေတဲ့ ညောင်ကျိုးစခန်းတိုက်ပွဲမှာ မတ် ၁၁ ရက်ဒီကနေ့အထိပြင်းထန်နေပြီး စစ်ကောင်စီတပ်က မှော်ဘီမြို့ အခြေစိုက် ခမရ တပ်ရင်း ၃ ရင်းကို ပို့ဆောင်ကာ ခုခံနေတယ်လို့ သိရပါတယ်။

ပဲခူးတိုင်း နဲ့ ရခိုင်ပြည်နယ်အစပ်၊ ပန်းတောင်း-တောင်ကုတ်ကားလမ်းမရှိ ရခိုင်ရိုးမပေါ်က စစ်ကောင်စီတပ်စခန်းတွေဖြစ်တဲ့ မိုးထိတောင်၊ ပန်းကန်ကွဲ၊ တောင်ပုံကြီး၊ နတ်တောင်ကုန်းတို့ကို အာရက္ခတပ်တော် (AA)နဲ့ တော်လှန်ရေးပူးပေါင်းတပ်တွေက တိုက်ခိုက်သိမ်းပိုက်ထားပါတယ်။

■ ရခိုင်ပြည်နဲ့ ပဲခူးတိုင်းအစပ်က နတ်တောင်ကာကင်းစခန်းကို AA သိမ်းပိုက်ထား

ပန်းတောင်း၊ ဖေဖော်ဝါရီ ၂၅၊ ၂၀၂၅။

ပဲခူးတိုင်း၊ ပန်းတောင်းမြို့နယ်၊ ရခိုင်ရိုးမပေါ်က ညောင်ကျိုး ပင်မစခန်းကုန်းကို အာရက္ခတပ်တော်(AA)နဲ့ ပူးပေါင်းတပ်တွေက ထိုးစစ်ဆင်တိုက်ခိုက်နေပြီး တိုက်ပွဲပြင်းထန်နေတယ်လို့ ​ဒေသခံစစ်ရေးသတင်းရင်းမြစ်က ပြောပါတယ်။

ပြီးခဲ့တဲ့ဖေဖော်ဝါရီ ၂၂ရက်မှာ ညောင်ကျိုးကျေးရွာနဲ့ တမိုင်ခန့်ကွာဝေးတဲ့ နတ်တောင်ကာကင်းစခန်းကို အာရက္ခတပ်တော် (AA)နဲ့ ပူးပေါင်းတပ်တွေက သိမ်းပိုက်နိုင်ခဲ့ပြီးနောက် ညောင်ကျိုးကျေးရွာရှိ ပင်မစခန်းကုန်းကို ဆက်ပြီးတိုက်ခိုက်နေတာဖြစ်တယ်လို့ ဆိုပါတယ်။

“ကျနော်တို့ပန်းတောင်းတပ်နယ်ထဲမှာရှိတဲ့ ညောင်ကျိုးပင်မကုန်းကို တိုက်နေပြီ။ ရှေ့ကကာကင်းကုန်းဖြစ်တဲ့ နတ်တောင်ကုန်းကို စကစလက်လွှတ်လိုက်ရပြီလို့သိထားရတယ်။ အခုပင်မကုန်းစခန်းပွဲလည်း တော်တော်ကြမ်းနေတယ်”လို့ မြေပြင်အခြေအနေကိုသိရှိတဲ့ ဒေသခံစစ်ရေးသတင်းရင်းမြစ်က ပြောပါတယ်။

ညောင်ကျိုးကျေးရွာရှိ ပင်မကုန်းစခန်းတိုက်ပွဲအတွင်း စစ်ကောင်စီတပ်ဘက်မှ တိုက်ခိုက်ရေးလေယာဥ်အပြင် စက်တပ်လေထီးတွေနဲ့ပါ လူနေကျေးရွာတွေကို ဗုံးကြဲတိုက်ခိုက်နေတယ်လို့ ဆိုပါတယ်။

“ဒီဖက်မှာက ထိတွေ့မှုတွေရော၊ တိုက်ပွဲတွေရော တောက်လျောက်ဖြစ်နေတာ။ စစ်တပ်က ပါရာမိုတာတွေနဲ့ အရပ်သားပစ်မှတ်တွေကို ဗုံးကြဲနေတယ်။အများကြီးထိခိုက်မှုတွေရှိတယ်။ ပပွေး၊လင်းတဲ ရွာတွေကို ကြဲတာ။ ပြည်သူတွေပဲရှိကြတာ။ အဲဘက်မှာ တော်လှန်ရေးအဖွဲ့ဆိုတာ တောထဲမှာပဲနေကြတာဗျ”လို့ တော်လှန်ရေးတပ်ဖွဲ့ဝင်တဦးက ပြောပါတယ်။

ဒါ့အပြင် ညောင်ကျိုးတိုက်ပွဲအတွင်းမှာ စစ်ကောင်စီတပ်သားတွေဟာ ကစဉ့်ကလျားထွက်ပြေးနေကြတာရှိပြီး အရပ်သားတွေကိုပါ လမ်းပြအဖြစ် ဖမ်းခေါ်နေတာတွေလည်း ရှိနေတယ်လို့ အထက်ပါတော်လှန်ရေးတပ်ဖွဲ့ဝင်က ပြောပါတယ်။

ညောင်ကျိုးပင်မစခန်းမှာ ညောင်ခြေထောက်ကျေးရွာအခြေစိုက် ကပစ ၆ နဲ့ ၁၀ မိုင်ခန့် သာဝေးပါတယ်။

ပန်းတောင်း-တောင်ကုတ်လမ်းမပေါ်မှာရှိတဲ့ စစ်ကောင်စီတပ်ရဲ့ကာကင်စခန်းတွေနဲ့ ပင်မကုန်းစခန်းတွေ ထိုးစစ်ဆင်တိုက် ခိုက်ခံနေရတာနဲ့ပတ်သက်ပြီး CDMဗိုလ်ကြီး ဇင်ယော်က အခုလိုသုံးသပ်ပြောဆိုပါတယ်။

“ညောင်ကျိုးပြီးသွားရင်တော့ စကစရဲ့ခံစစ် စခန်းတွေဟာ ကြီးကြီးမားမားမရှိတော့ဘူး။ ကပစ ၆ အထိကို နောက်ကနေလိုက်ပြီးတော့ တိုက်နိုင်တဲ့အနေအထားမျိုးဖြစ်သွားမယ်။ ညောင်ကျိုးအဖွဲ့တွေ ဆုတ်ပြေးရင်လည်း ကပစ ၆ ဖက်ကိုပဲ လမ်းကြောင်းရှိတယ်။ ကပစ ၆ ဟာ သံရည်ကျိုစက်ရုံဖြစ်တဲ့အတွက် တိုက်နေပြီဆိုရင်တောင်မှ ထုတ်လုပ်ရေးလုပ်ငန်းလုပ်နိုင်တော့မှာမဟုတ်ဘူး။ ခံစစ်ဆင်ရမယ်၊ ပြင်ရမယ်ဖြစ်တော့ သံမဏိထုတ်လုပ်ရေးရပ်ဆိုင်းသွားမှာဖြစ်တဲ့အတွက် ကျန်တဲ့စက်ရုံတွေကိုပါ အကြပ်အတည်းဖြစ်စေပါတယ်”လို့ ဆိုပါတယ်။

ပဲခူးတိုင်းနဲ့ ရခိုင်ပြည်နယ်အစပ်၊ ပန်းတောင်း-တောင်ကုတ်ကားလမ်းမရှိ ရခိုင်ရိုးမပေါ်က စစ်ကောင်စီတပ်စခန်းတွေဖြစ်တဲ့ မိုးထိတောင်၊ ပန်းကန်ကွဲ၊ တောင်ပုံကြီး၊ နတ်တောင်ကုန်းတို့ကို အာရက္ခတပ်တော် (AA)နဲ့ တော်လှန်ရေးပူးပေါင်းတပ်တွေက တိုက်ခိုက်သိမ်းပိုက်ထားပါတယ်။

စာတည်း – ဈာန်မြင့်