ကြို့ပင်ကောက်

ကြို့ပင်ကောက်၊ ဧပြီ ၂၆၊ ၂၀၂၃။

ပဲခူးတိုင်းအနောက်ခြမ်း၊ သာယာဝတီခရိုင်၊ ကြို့ပင်ကောက်မြို့နယ်က စစ်ကောင်စီသတင်းပေးတဦးကို ဧပြီလ ၂၅ ရက် မနေ့ ညနေပိုင်းက သေနတ်နဲ့ပစ်ခတ်ရှင်းလင်းခဲ့တယ်လို့ Black Dragon ,GBKPDF က သတင်းထုတ်ပြန်ပါတယ်။

အသတ်ခံရသူဟာ ကြို့ပင်ကောက်မြို့နယ်၊ ဘော်ပင်ဆည်အမှတ် ၁၊ ရုံးချောင်းအုပ်စု၊ ဆည်တော်ဦးရွာက အသက် ၅၀ အရွယ် ကိုမောင်မျိုးဖြစ်ပြီး၊ သူရဲ့နေအိမ်မှာ သေနတ်နဲ့ပစ်ခတ် ရှင်းလင်းခဲ့ကာ သက်သေခံဖုန်းကို သိမ်းဆည်းခဲ့တယ်လို့ ဆိုပါတယ်။

“သေနတ်နဲ့ခေါင်းကို ၁ ချက်၊ ဗိုက်ကို ၂ ချက်၊ တင်ပါးကို ၁ ချက်ပစ်လို့ ပွဲချင်းပြီးသေသွားပါတယ်။ ပစ်ခတ်နေတဲ့အချိန် အိမ်ထဲမှာ သူ့ဇနီးနဲ့မြေးတဦးလည်းရှိနေတယ်။ သူတို့ကိုအန္တရာယ်မပြုခဲ့ဘူး”လို့ Black Dragon အဖွဲ့တာဝန်ခံက မြေလတ်အသံကို ပြောပါတယ်။

ကိုမောင်မျိုးဟာ ပျူစောထီးခေါင်းဆောင်တဦးဖြစ်တဲ့အပြင် သိမ်းဆည်းခဲ့တဲ့သူ့ရဲ့ဖုန်းကို စစ်ဆေးရာမှာ ဖုန်း Call Recoder မှတ်တမ်းမှာလည်း ကျေးရွာအုပ်ချုပ်ချုပ်ရေးမှူးက PDFသတင်းမေးမြန်းမှုကို “တောင်ပေါ်မှာ အခြေအနေမကောင်းကြောင်း၊ သတိဝိရီယနဲ့ နေထိုင်နေရပြီး ထူးခြားသတင်းရှိပါက ပေးပို့သွားမှာဖြစ်တယ်” လို့ ပြောဆိုထားတာတွေကို တွေ့ရှိခဲ့ရတယ်လို့ ဆိုပါတယ်။

စစ်ကောင်စီတပ်ကို သတင်းပေးလုပ်မယ့်သူတွေနဲ့ လုပ်နေတဲ့သူတွေကို သတိပေးအဆင့် ပြီးဆုံးသွားပြီ ဖြစ်တဲ့အတွက် ကိုယ့်အသိနဲ့ကိုယ် နုတ်ထွက်ကြဖို့နဲ့ Black dragon က လုံးဝနယ်မြေရှင်းလင်းရေး လုပ်သွားမှာ ဖြစ်တယ်လို့ဆိုပါတယ်။

အဲဒီတိုက်ခိုက်မှုကို တပ်ရင်းအမှတ် ၃၈၀၁ တပ်ခွဲ ၃ နတ်စစ်သည်လက်အောက်ခံ BLA K Dragon (GBK PDF)နဲ့ Black Wolf – UG ပြောက်ကျားတပ်ဖွဲ့တို့က ရှင်းလင်းခဲ့တာလို့ သိရပါတယ်။

ဧပြီလ ၂၁ ရက်ညနေကလည်း ကြို့ပင်ကောက်မြို့နယ်၊ ပဲခူးရိုးမတောင်ခြေမှာရှိတဲ့ တောင်နှစ်လုံးပေါက်ရွာက စစ်တပ်သတင်းပေးဆိုသူ ကိုတင်ကြိုင်ကို သာယာဝတီခရိုင် တပ်ရင်း ၃၈၀၁ တပ်ခွဲ ၃ လက်အောက်ခံ Black Dragon, GBK PDFက ရှင်းလင်းခဲ့ပါသေးတယ်။

စာတည်း- ရင်ငြိမ်း

ကြို့ပင်ကောက်၊ ဧပြီ ၂၂၊ ၂၀၂၃။

ပဲခူးတိုင်း(အနောက်ခြမ်း)၊ ကြို့ပင်ကောက်မြို့နယ်၊ ပဲခူးရိုးမတောင်ခြေမှာရှိတဲ့ တောင်နှစ်လုံးပေါက်ရွာက စစ်တပ်သတင်းပေးဆိုသူကို ဧပြီ လ ၂၁ ရက် မနေ့ ည ၆ နာရီခွဲခန့်မှာ ပစ်ခတ်ရှင်းလင်းခဲ့တယ်လို့ သာယာဝတီခရိုင် တပ်ရင်း ၃၈၀၁ တပ်ခွဲ ၃ လက်အောက်ခံ Black Dragon, GBK PDFက ထုတ်ပြန်ပါတယ်။

သေဆုံးသွားသူဟာ တောင်နှစ်လုံးပေါက်ရွာ ပျူစောထီးအဖွဲ့ဝင်ဆိုသူ အသက် ၅၀ နှစ်အရွယ် ကိုတင်ကြိုင်ဖြစ်ပြီး သူ့ရဲ့နေအိမ်ရှေ့မှာ သေနတ်နဲ့ပစ်ကာ ဓါးနဲ့ထိုးခဲ့တာလို့ Black Dragon, GBK PDFရဲ့တပ်ခွဲမှူး ရိုးမနဂါးက မြေလတ်အသံကို ပြောပါတယ်။

“သေနတ်နဲ့ရင်ဘတ်ကို ၂ ချက် ပစ်တယ်။ လဲကျသွားမှ ဓါးမြှောင်နဲ့ တချက် ထပ်ထိုးခဲ့တာ ပွဲချင်းပြီးသွားတယ်” လို့ ပြောပါတယ်။

ကိုတင်ကြိုင်ဟာ စစ်ကောင်စီတပ်က ချပေးတဲ့ လက်နက်ကိုင်ဆောင်သူဖြစ်ကြောင်းသတင်းရလို့ သူရဲ့နေအိမ်ကို ဝင်ရောက်ရှာဖွေပေမယ့် မတွေ့ခဲ့ဘူးလို့ ဆက်ပြောပါတယ်။

ကိုတင်ကြိုင် သေဆုံးမှုကို မိသားစုဝင်တွေက ရဲတပ်ဖွဲ့ကို ဆက်သွယ်အကြောင်းကြားပေမယ့် အခုအချိန် အထိလာရောက်စစ်ဆေးတာတွေ မလုပ်သေးဘူးလို့လည်း ဒေသခံတွေဆီက သိရပါတယ်။

ကိုတင်ကြိုင်ဟာ စစ်ကောင်စီနဲ့ပေါင်းပြီး သစ်တွေခိုးထုတ်တာ၊ တောင်ပေါ်တက်တဲ့ အလုပ်သမားတွေအပေါ် အနိုင်ကျင့်တာတွေလည်း ရှိပြီး PDF တွေရဲ့သတင်းကို ထောက်လှမ်းကာ စစ်တပ်ကို သတင်းပို့ယူ လုပ်နေတဲ့ ပျူစောထီး ဖြစ်တယ်လို့ ဆိုပါတယ်။

ပြီးခဲ့တဲ့ မတ်လ ၁၃ ရက်ကလည်း ကြို့ပင်ကောက်မြို့နယ်၊ ရုံးချောင်းအုပ်ချုပ်ရေးမှူး ကိုအေးထွန်းနဲ့အဖွဲ့ကို PDF မဟာမိတ်တွေ ပေါင်းပြီး ရှင်းလင်းခဲ့လို့ ကိုအေးထွန်းအပါ ၂ ဦးသေဆုံးပြီး ဒဏ်ရာရရှိသူတွေ ရှိခဲ့ပါသေးတယ်။

စာတည်း – ရင်ငြိမ်း

ကြို့ပင်ကောက်၊ ဧပြီ ၁၂၊ ၂၀၂၃။

ပဲခူးတိုင်း(အနောက်ခြမ်း)၊ ကြို့ပင်ကောက်မြို့မှာ ဧပြီလ ၁၁ ရက် မနေ့နေ့လယ် ၁၂ နာရီလောက်က စစ်ကောင်စီက ပြုလုပ်မယ့်ရွေးကောက်ပွဲကို ဆန့်ကျင်ရေး ပြောက်ကျားသပိတ်ပြုလုပ်ခဲ့တယ်လို့ သိရပါတယ်။

“ဖက်ဆစ်ရွေးကောက်ပွဲသပိတ်မှောက် ဖက်ဒရယ်လမ်းကို ရဲရဲလျှောက်” စာတန်းနဲ့အတူ သွေးမအေးဘူး၊ ဖက်ဒရယ်လမ်းကိုရဲရဲလျှောက်၊ စစ်**နိဂုံး ၂၀၂၃၊ တော်လှန်သင်္ကြန်ဆင်နွှဲကြ စာတန်းတွေကို ရေးဆွဲခဲ့ကြပါတယ်။

“ကျနော်တို့ကျောင်းသားအင်အားစုတွေအနေနဲ့ သွေးမအေးဘဲ ဆက်တော်လှန်နေပါမယ်ဗျ။ ပြည်သူလူထုအနေနဲ့ ဖက်ဆစ်ရွေးကောက်ပွဲကို အသိအမှတ်မပြုဘဲ ဆက်ပြီးသပိတ်မှောက်ပါဝင်ပေးဖို့ ပြောချင်ပါတယ်” လို့ ကြို့ပင်ကောက်မြို့နယ် ကျောင်းသားသမဂ္ဂအဖွဲ့ဝင်တဦးက ပြောပါတယ်။

အဲဒီလှုပ်ရှားမှုကို ကြို့ပင်ကောက်မြို့နယ်လုံးဆိုင်ရာ ကျောင်းသားသမဂ္ဂနဲ့ အထက ကြို့ပင်ကောက်ကျောင်းသားသမဂ္ဂတို့ ပူးပေါင်းလှုပ်ရှားခဲ့ကြတာလို့ သိရပါတယ်။

စာတည်း – 007

ကြို့ပင်ကောက်၊ ဧပြီ ၅၊ ၂၀၂၃။

ပဲခူးတိုင်း(အနောက်ခြမ်း)၊ သာယာဝတီခရိုင်၊ ကြို့ပင်ကောက်မြို့နယ်၊ ပြည်သူ့လွှတ်တော်အမတ် ဦးဌေးမင်းသိန်းကို ဧပြီလ ၄ ရက် မနေ့နေလယ် ၁၂ နာရီလောက်မှာ စစ်အုပ်စုကဖမ်းဆီးသွားတယ်လို့ သိရပါတယ်။

ဦးဌေးမင်းသိန်းဟာ အမျိုးသားဒီမိုကရေစီအဖွဲ့ချုပ် – NLD ပါတီကနေ ရွေးကောက်တင်မြှောက်ခံထားရတဲ့ ကြို့ပင်ကောက်မြို့နယ်ပြည်သူ့လွှတ်တော်အမတ်ဖြစ်ပြီး စျေးချိုတောင်ရပ်ကွက်၊ ပွဲစားတန်းလမ်းကသူ့ ရဲ့နေအိမ်မှာ ဖမ်းဆီးခဲ့တာလို့ ဆိုပါတယ်။

“မနေ့က ၁၂ နာရီလောက်ကဖမ်းဆီးသွားတာပါ။ သူကသပိတ်ပြီးကာလကတည်းက မလုပ်တော့တာ ကိုယ်စားလှယ်တွေက ၅၀၅ (က) ကဖွင့်ထားတာဘဲ။ ၂ နှစ်နီးပါးလောက်အဆက်အသွယ်မရှိတော့ဘူး။ အခု ပြည်ကိုခေါ် သွားတယ်ကြားတယ်”လို့ ကြို့ပင်ကောက်မြို့နယ်ကိုယ်စားပြု ပဲခူးတိုင်းလွှတ်တော်ကိုယ်စားလှယ် တဦးက မြေလတ်အသံကို ပြောပါတယ်။

ဦးဌေးမင်းသိန်းဟာ ၂၀၁၅ ခုနှစ် နဲ့ ၂၀၂၀ ပြည့်နှစ် အထွေထွေရွေးကောက်ပွဲတွေမှာ ပြည်သူ့လွှတ်တော်အမတ် အဖြစ်ရွေးချယ်ခံခဲ့ရသူဖြစ်ပြီး စစ်အာဏာသိမ်းပြီးချိန် ဆန္ဒပြမှုတွေနောက်ပိုင်း ၂ လခန့် ရှောင်တိမ်းပြီးနောက် နေအိမ်မှာပြန်လည်နေထိုင်တာနဲ့ပတ်သက်ပြီး ဝေဖန်မှုတွေလည်းရှိနေပါတယ်။

ကြို့ပင်ကောက်မြို့နယ်မှာ ၂၀၂၀ ရွေးကောက်ပွဲကနေ ပြည်သူ့လွှတ်တော်အမတ်အဖြစ် ဦးဌေးမင်းသိန်း၊ တိုင်းဒေသကြီးလွှတ်တော်အမတ်အဖြစ် ၂ ဦးရွေးချယ်ခံခဲ့ရရာ လက်ရှိမှာ တိုင်းဒေသကြီးအမတ်တဦးဖြစ်သူ ဦးအောင်ကိုမင်းဟာ စစ်ကောင်စီထံမှာခံဝန်ထိုးပြီး ကြို့ပင်ကောက်မြို့နေအိမ်မှာပဲ နေထိုင်နေသူဖြစ်တယ်လို့ သိရပါတယ်။

စာတည်း- ရင်ငြိမ်း

ကြို့ပင်ကောက်၊ မတ် ၂၄၊ ၂၀၂၃။

ပဲခူးတိုင်း(အနောက်ခြမ်း)၊ သာယာဝတီခရိုင်၊ ကြို့ပင်ကောက်မြို့နယ်မှာ မတ်လ ၂၄ ရက် ဒီမနက်အစောပိုင်းက အမျိုးသားတဦး ကြိုးဆွဲချသေဆုံးခဲ့တယ်လို့ ဒေသခံတဦးဆီက သိရပါတယ်။

သေဆုံးသူဟာ ကြို့ပင်ကောက်မြို့နယ်၊ ဂုမ္မကွင်းအုပ်စု၊ ကြို့ကုန်းရွာမှာနေထိုင်တဲ့ အသက် ၄၃ နှစ်အရွယ် ကိုရဲထွန်းဖြစ်ပြီး ရွာထိပ်ရှိတံတားအောက်ခံတန်းမှာ လည်ပင်းကိုကြိုးချည်လျက် သေဆုံးနေတာလို့ ဒေသခံတဦးက မြေလတ်အသံကို ပြောပါတယ်။

“ရွာထိပ်တံတားအောက်က အောက်ခံယက်မတန်းကို ကြိုးချည်ပြီး ကြိုးဆွဲချတာပါ။ ရွာသားတချို့မြင်ပြီး ရဲကိုအကြောင်းကြားလိုက်တာ။ ဘာလို့လုပ်တာလဲတော့ မသိဘူး။ သူက အရက်တော့ တအားသောက်တယ်” လို့ ပြောပါတယ်။

သေဆုံးသူရဲ့ရုပ်အလောင်းကိုတော့ ဒေသတွင်း ပရဟိတအသင်းကားနဲ့ ကြို့ပင်ကောက်ဆေးရုံကို ပို့ဆောင်လိုက်တယ်လို့ သိရပါတယ်။

မတ်လ ၁၅ ရက်နေ့ကလည်း သဲကုန်းကြီးရွာက အသက် ၂၄ နှစ်အရွယ် အမျိုးသားတဦး ကြိုးဆွဲချသေဆုံးခဲ့တာကြောင့် မတ်လတတိယအပတ်နဲ့ နောက်ဆုံးအပတ်အတွင်း ကြို့ပင်ကောက်မြို့နယ်မှာ ကြိုးဆွဲချသေဆုံးသူ ၂ ဦးရှိခဲ့တာ ဖြစ်ပါတယ်။

စာတည်း – ရင်ငြိမ်း

ကြို့ပင်ကောက်၊ မတ် ၂၁၊ ၂၀၂၃။

ပဲခူးတိုင်း(အနောက်ခြမ်း)၊ ကြို့ပင်ကောက်မြို့နယ်မှာ စစ်ကောင်စီလက်အောက်ခံ မြန်မာ့လယ်ယာဖွံ့ဖြိုးရေးဘဏ်က လယ်သမားတွေဆီကနေ စိုက်ပျိုးစရိတ်ချေးငွေတွေကို ခြိမ်းခြောက်တောင်းခံနေတယ်လို့ ဒေသခံတွေဆီက သိရပါတယ်။

NLD အစိုးရလက်ထက်က စိုက်ပျိုးစရိတ်အတွက် လယ် ၁၀ ဧကနဲ့ အောက် လုပ်ကိုင်တဲ့လယ်သမားတွေကို တဧက ကျပ် ၁ သိန်းခွဲနှုန်းနဲ့ ထုတ်ချေးထားတာတွေဖြစ်တယ်လို့ သိရပါတယ်။

“ပထမစိုက်ဘဏ်က စာပို့တယ်။ တောင်သူတွေက မဆပ်နိုင်တော့ အခုရွာအထိ လိုက်လာတယ်။ စစ်သား၊ ရဲနဲ့ ထွေအုပ်ဝန်ထမ်းတွေ ပါတယ်။ အုပ်စုလိုက် လာပြီးတောင်းတယ်။ မဆပ်နိုင်ရင် လူကိုဖမ်းမယ်ဆိုပြီး ခြိမ်းခြောက်သွားတယ်” လို့ ဒေသခံလယ်သမားတဦးက ပြောပါတယ်။

ဒါ့အပြင် ကျေးရွာအချို့မှာ အုပ်ချုပ်ရေးမှူးနဲ့ ရပ်ကျေးစိုက်ဘဏ် အတွင်းရေးမှူးတွေကလည်း လယ်သမားတွေကို ခြိမ်းခြောက်တောင်းခံတာတွေရှိတယ်လို့ သူကဆက်ပြောပါတယ်။

ဒေသခံလယ်သမားတို့လက်ဝယ်မှာ မိုးစပါးလက်ကျန်မရှိတော့တဲ့အပြင် စပါးစိုက်ပျိုးချိန်က သွင်းအားစုစရိတ်တွေ ကြီးမြင့်တာကြောင့်လည်း အများစုဟာ အကျိုးအမြတ်ရရှိမှု နည်းပါးတယ်လို့လည်း သိရပါတယ်။

ကြို့ပင်ကောက်မြို့နယ် ပအဖအဖွဲ့ဝင်တဦးကတော့ “အာဏာရှင်လက်အောက်ကို ရောက်နေတဲ့အချိန်မှာ တောင်သူလယ်သမားတွေ လက်ထဲကနေပြီးတော့ စိုက်ပျိုးစရိတ်ချေးငွေတွေကို ပုံသဏ္ဍာန်အမျိုးမျိုးနဲ့ အကြပ်ကိုင် ဖိအားပေးတောင်းခံပြီး ပြည်သူ့ဘဏ္ဍာငွေတွေနဲ့ ပြည်သူလူထုကို နှိပ်ကွပ်မယ့် ပြည်သူကို သေနတ်ပြောင်းပြန်လှည့်မယ့် ကျည်ဆံဖိုးနဲ့အခြားသောဒုက္ခပေးမယ့် အရာတွေလုပ်နေတဲ့အတွက်လည်း အခုလိုတောင်းခံမှုအပေါ် ကန့်ကွက်ရှုံ့ချတယ်” လို့ ပြောပါတယ်။

ကြို့ပင်ကောက်မြို့နယ်မှာ နှစ်စဥ် မိုးစပါးစိုက်ဧက ၇ သောင်းကျော်ရှိရာ တောင်သူတဦး ပြန်ဆပ်ရမယ့်ငွေပမာဏမှာ အနည်ဆုံး ကျပ် ၂ သိန်းကနေ ကျပ်သိန်း ၂၀ အထိ ဖြစ်တယ်လို့ သိရပါတယ်။

စာတည်း – 007

ကြို့ပင်ကောက်၊ မတ် ၁၄၊ ၂၀၂၃။

ပဲခူတိုင်း(အနောက်ခြမ်း)၊ ကြို့ပင်ကောက်မြို့၊ အရှေ့တောင်ဘက် ကျေးရွာတရွာက အုပ်ချုပ်ရေးမှူးနဲ့အဖွဲ့ဟာ မတ်လ ၁၃ ရက်မနေ့ည ၁၀ နာရီခွဲလောက်က တိုက်ခိုက်ခံရလို့ သေဆုံးမှုတွေရှိတယ်လို့ သိရပါတယ်။

ကြို့ပင်ကောက်မြို့နယ်၊ ရုံးချောင်းအုပ်စု၊ ရုံးချောင်းရွာမှာ ဖြစ်ပွားခဲ့တာဖြစ်ပြီး အုပ်ချုပ်ရေးမှူးအပါ ၈ ဦးလောက် စကားပြောနေချိန်မှာ တိုက်ခိုက်ခဲ့တာလို့ ဆိုပါတယ်။

“ကိုအေးထွန်းက အုပ်ကြီးလည်းဖြစ်သလို ပျူစောထီးခေါင်းဆောင်လည်း ဖြစ်တယ်။ သူတို့အင်အား ၈ ဦးလောက်နဲ့ ရှိနေတာကို ပစ်ခတ်ခဲ့တာပါ။ သူတို့ဘက်ကလည်း တထောင့်ထိုးတူမီးတွေ လက်ပစ်ဗုံးတွေနဲ့ ပြန်ပစ်သေးတယ်ဗျ” လို့ တိုက်ခိုက်ရာမှာ ပါဝင်တဲ့ Black Dragon အဖွဲ့ဝင်တဦးက ပြောပါတယ်။

Black Dragon(GBK PDF)ရဲ့ သတင်းထုတ်ပြန်ချက်မှာတော့ အုပ်ချုပ်ရေးမှူးပျူစောထီးခေါင်းဆောင် ကိုအေးထွန်းနဲ့ ပျူခေါင်းဆောင် ပါ ၃ ဦး သေဆုံးပြီး ဒဏ်ရာရသူ ၅ ဦး ရှိတယ်လို့ ဖော်ပြထားပါတယ်။

ဒေသခံတဦးပြောတာကတော့ ကိုအေးထွန်းရဲ့အလောင်းနဲ့ ဒဏ်ရာရသူ ၂ ဦးကို အဲဒီညကပဲ ကြို့ပင်ကောက်မြို့နယ်၊ အလယ်ကုန်းတိုက်နယ်ဆေးရုံကို ပို့ဆောင်ထားတယ်လို့ ဆိုပါတယ်။

အဲဒီတိုက်ခိုက်မှုမှာ သာယာဝတီခရိုင်၊ ကြို့ပင်ကောက်မြို့နယ် နတ်စစ်သည်တပ်ရင်းအမှတ် ၃၈၀၁ တပ်ခွဲ ၂ – Black Dragon(GBK PDF)၊ တပ်ရင်းအမှတ် ၃၈၀၁ တပ်ခွဲ ၅ ဟီးရိုးပြောက်ကျား၊ Yoma – GBK PDF တပ်ပေါင်းစုတို့ ပူးပေါင်းလုပ်ဆောင်ခဲ့တာလို့ သိရပါတယ်။

ပြီးခဲ့တဲ့ မတ်လ ၇ ရက်က Black Dragon (GBK PDF)က စစ်တပ်သတင်းပေးနဲ့ ပျူစောထီးခေါင်းဆောင်တွေ အုပ်ချုပ်ရေးမှူးတွေ နုတ်ထွက်ကြဖို့ သတိပေးထားခဲ့ပါသေးတယ်။

စာတည်း – 007