အောင်စိုး 
စစ်ကိုင်း၊ ဇန်နဝါရီ ၂၆၊ ၂၀၂၃။
စစ်ကိုင်းတိုင်း၊ ခင်ဦးမြို့နယ်မှာ PDF တွေ ခြုံခိုတိုက်ခိုက်မှာကိုကြောက်လို့ သစ်ပင်၊ ခြုံနွယ်တောတွေကိုမီးရှို့တဲ့စစ်အုပ်စု ဇန်နဝါရီ ၂၅ ရက်နေ့မနက်ပိုင်းမှာ တိုက်ခိုက်ခံရတာကြောင့် ၅ ဦးသေဆုံးခဲ့တယ်လို့ သိရပါတယ်။
အဲဒီစစ်အုပ်စုမှာ အင်အား ၃၀ ခန့်နဲ့ အင်းပတ်ကွေ့စျေးတန်း၊ ရွာသစ်ကုန်း(ပျူ)ရွာ တို့မှာ အထိုင်ချတပ်စွဲကာ ကျေးရွာတွေကိုမီးရှို့နေတာကြောင့် ကာကွယ်ရေးပူးပေါင်းတပ်ဖွဲ့တွေက လက်နက်ကြီး ၁၈ လုံးပစ်ခတ်တိုက်ခိုက်ခဲ့တာ ဖြစ်တယ်လို့ Khin U Dog Killers(KDK)မှ ပြန်ကြားရေးတာဝန်ခံက ပြောပါတယ်။
“စကစအများစုက ဒီပဲယင်းမြို့နယ် ညောင်လှကျွေးရွာဘက်က အထိနာနေတဲ့ကောင်တွေကို သွားကြိုနေတဲ့အချိန် စခန်းမှာကျန်ခဲ့တာတွေကို ကျနော်တို့က တိုက်ခိုက်ခဲ့တာပါ။ စကစ ဘက်ကလည်း လက်နက်ငယ်နဲ့ခဏပဲရမ်းပစ်ခဲ့တယ်။ အတွင်းသတင်းအရ ငါးယောက်သေတာကို အတည်ပြုနိုင်ခဲ့တယ်။ သေတဲ့ငါးယောက်က စျေးတန်းကကောင်တွေဗျ။ ကျနော်တို့ ရဲဘော်တွေတော့ အထိအခိုက်မရှိ ဆုတ်ခွာနိုင်ခဲ့တယ်” လို့ဆိုပါတယ်။
ဒီတိုက်ခိုက်မှုကိုတော့ Khin U Specialforce Organization_KSO၊ Khin U Dog Killers၊ Local Brothers၊Wolf Guerrilla (Ye-U)၊FAF၊PDA၊ တပ်ရင်း၂၀ခွဲ-၃တို့က ပူးပေါင်းလုပ် ဆောင်ခဲ့တာဖြစ်ပါတယ်။
အဲဒီစစ်ကောင်စီတွေက ရေဦးမြို့နယ် နဲ့ ဒီပဲယင်းမြို့နယ်ဘက်တို့ကို တပ်ကူလုပ်ပေးနေတဲ့စခန်းတွေဖြစ်ပြီး ဇန်နဝါရီ ၂၃ ရက်နေ့မှာလည်း KSO အဖွဲ့ကမိုင်းဆွဲတိုက်ခိုက်ခဲ့တာကြောင့် ၅ ဦးသေဆုံးခဲ့သေးတယ်လို့ သိရပါတယ်၊
ဇန်နဝါရီ ၂၄ ရက်နေ့မှာ တပ်စွဲထားတဲ့စခန်းထဲကနေ တပ်သား ၁၅ ဦးမှာ PDFရဲ့ ပုန်းလျိုတိုက်ခိုက်မှုက ကင်းလွတ်အောင် သူတို့စခန်းအနီးမှာရှိတဲ့ ငှက်ပျောခြံ၊ လျှော်ဖြူခြံ၊ ခြုံတောတွေကို မီးရှို့ခဲ့တာကြောင့် အင်းပတ်ကျေးရွာကို မီးကူးစက်ကာ လူနေအိမ် ၂လုံး လောင်ကျွမ်းပြာကျခဲ့ပါတယ်။