ကျော်ကြီး 
ညောင်ဦး၊ မတ် ၁၀၊ ၂၀၂၅။
မန္တလေးတိုင်း၊ ညောင်ဦးမြို့နယ်မှာ ယာခင်းအတွင်းအသတ်ခံထားရတဲ့ စစ်ကောင်စီလက်အောက်အထွေထွေအုပ်ချုပ်ရေးဌာနစာရေးနဲ့ ဇနီးဖြစ်သူတို့ ရုပ်အလောင်းတွေ တွေ့ရှိခဲ့တယ်လို့ ဒေသခံတွေထံက သိရပါတယ်။
အသတ်ခံရသူတွေမှာ တောပြားကျေးရွာနေ ငါ့သရောက်မြို့ထွေအုပ်ရုံးစာရေး အသက် ၄၉ နှစ်အရွယ် ဦးသန်းလှိုင်နဲ့ ဇနီးဖြစ်သူ အသက် ၄၅ နှစ်အရွယ် ဒေါ်ခင်မမတို့ဖြစ်ပြီး ၎င်းတို့ရုပ်အလောင်းတွေကို တောပြားကျေးရွာအနီးယာခင်းအတွင်း မတ် ၉ ရက် မနက် ၁၀ နာရီကျော်မှာ ဒေသခံတွေက တွေ့ရှိခဲ့တာလို့ ဆိုပါတယ်။
“သူတို့အလောင်းကို ယာခင်းထဲသွားသူတွေက တွေ့ခဲ့တာ။ လင်မယား ၂ ယောက်စလုံးထိုးသွင်းဒဏ်ရာတွေနဲ့ သေဆုံးနေတာ။ သေတာက ညကတည်းက သေထားတဲ့ပုံစံရှိတယ်။”လို့ ညောင်ဦးဒေသခံတဦးက မြေလတ်အသံကို ပြောပါတယ်။
သေဆုံးသူတွေဟာ လည်ပင်းနဲ့ရင်ဘတ်တွေမှာ ထိုးသွင်းဒဏ်ရာတွေနဲ့သေဆုံးနေတာဖြစ်ပြီး ရုပ်အလောင်းတွေကိုတော့ ဒေသခံတွေက ညောင်ဦးပြည်သူ့ဆေးရုံကို ပို့ဆောင်ပေးခဲ့ရတယ်လို့ သိရပါတယ်။
ပြီးခဲ့တဲ့ မတ် ၆ ရက် ညနေပိုင်းကလည်း ညောင်ဦးမြို့နယ်၊ သူကောင်းတည်ကျွန်းကျေးရွာမှာ နေအိမ်မှာရှိနေတဲ့ အုပ်ချုပ်ရေးမှူးသားအဖ သေနတ်နဲ့ပစ်ခံရလို့ အုပ်ချုပ်ရေးမှူးသေဆုံးပြီး သားဖြစ်သူ ဒဏ်ရာရမှု ဖြစ်ပွားခဲ့ပါသေးတယ်။
စာတည်း – ဟိန်းစံ