အားကစား

မြေလတ်အသံ၊ ဖေဖော်ဝါရီ ၂၀၊ ၂၀၂၅။

ချန်ပီယံလိဂ် ၁၆ သင်းအဆင့် Play off ပွဲစဉ်မှာ ရီရဲလ်မက်ဒရစ်က မန်ချက်စတာစီးတီးကို နှစ်ကျော့လုံး အနိုင်ကန်ပြီး ၁၆ သင်းအဆင့်ကို တက်ရောက်သွားခဲ့ပါတယ်။

မနေ့ညက ယှဉ်ပြိုင်ခဲ့တဲ့ Play off ဒုတိယအကျော့မှာတော့ မက်ဒရစ်အိမ်ကွင်းမှာ အမ်ဘာပေရဲ့ ဟက်ထရစ် သွင်းဂိုးတွေနဲ့အတူ ၃-၁ ရလဒ်နဲ့ မန်စီးတီးကို အနိုင်ရရှိခဲ့တာပါ။ ပထမအကျော့ မန်စီးတီးအိမ်ကွင်းမှာလည်း ၂-၃ နဲ့ ရီရဲလ်မက်ဒရစ်က နိုင်ခဲ့တာကြောင့် နှစ်ကျော့ပေါင်း ၆-၃ ရလဒ်နဲ့ အပြတ်အသတ် အနိုင်ရရှိခဲ့ပါတယ်။

လာလီဂါမှာ အငြင်းပွားဖွယ်အနီကဒ်နဲ့ သရေရလဒ်ကြောင့် အဆင့် ၁ နေရာကနေ ဖယ်ပေးခဲ့ရတဲ့ ရီရဲလ်မက်ဒရစ်ဟာ ဒီပွဲမှာတော့ ကစားကွက်အသာ ဂိုးအသာနဲ့ မန်စီးတီးကို အပြတ်အသတ် ချေမှုန်းခဲ့တာပါ။ ဒီပွဲမှာ ရခဲ့တဲ့ ဟက်ထရစ်သွင်းဂိုးကြောင့် တိုက်စစ်မှူး အမ်ဘာပေအနေနဲ့လည်း ဒီရာသီ ချန်ပီယံလိဂ် သွင်းဂိုး ၇ ဂိုးအထိ ရရှိလာခဲ့ပြီ ဖြစ်ပါတယ်။

မန်ချက်စတာစီးတီးအသင်းကတော့ ပရီးမီးယားလိဂ်မှာလည်း လက်ရှိ အဆင့် ၄ နေရာအထိ ရောက်ရှိနေသလို ချန်ပီယံလိဂ်မှာလည်း ၁၆ သင်းအဆင့်တောင် မရောက်နိုင်ဘဲ စောစောစီးစီး အိမ်ပြန်ခဲ့ရပြီပဲ ဖြစ်ပါတယ်။ ဒါ့အပြင် လာမယ့် တနင်္ဂနွေညမှာ လက်ရှိ ပရီးမီးယားလိဂ် အဆင့် ၁ နေရာက လီဗာပူးလ်နဲ့ ရင်ဆိုင်ရဦးမှာဖြစ်လို့ အဲ့ဒီပွဲဟာလည်း မန်စီးတီးတို့အတွက် ခက်ခဲတဲ့ပွဲ ဖြစ်လာဦးမလား ကြည့်ရမှာပါ။

ချန်ပီယံလိဂ် ၁၆ သင်းအဆင့် Play off မှာ အနိုင်ရရှိခဲ့ကြတဲ့ ဖီယင်နု၊ ကလပ်ဘရုဂ်၊ ဘိုင်ယန်၊ ဘင်ဖီကာ၊ ဒေ့ါမွန်၊ ပီအက်စ်ဂျီ၊ ပီအက်စ်ဗွီ နဲ့ ရီရဲလ်မက်ဒရစ်တို့ကတော့ ၁၆ သင်းအဆင့်ကို တက်လှမ်းခဲ့ကြပါပြီ။

ချန်ပီယံလိဂ် ၁၆ သင်းအဆင့် မဲခွဲပွဲကိုတော့ ဖေဖော်ဝါရီ ၂၁ ရက် သောကြာနေ့မှာ ကျင်းပသွားမှာပဲ ဖြစ်ပါတယ်။ 

Photo – Real Madrid C.F.

မြေလတ်အသံ၊ ဖေဖော်ဝါရီ ၈၊ ၂၀၂၅။

စပိန်လာလီဂါဇယားရပ်တည်မှုမှာ အဆင့် ၁ နေရာက ရီရဲလ်မက်ဒရစ်နဲ့ အဆင့် ၂ နေရာက အက်သလက်တီကိုမက်ဒရစ် အသင်းတို့ရဲ့ မက်ဒရစ်ဒါဘီပွဲကို မြန်မာစံတော်ချိန် မနက်ဖြန်မနက် ၂ နာရီခွဲအချိန် ရီရဲလ်မက်ဒရစ်အိမ်ကွင်း ဘာနေဗျူး မှာ ယှဉ်ပြိုင်သွားကြမှာ ဖြစ်ပါတယ်။

ဒီပွဲစဉ်ဟာ လာလီဂါပွဲစဉ် ၂၃ ဖြစ်ပြီးတော့ ဒီ ၂ သင်းကြားက အမှတ်ကွာဟမှု ၁ မှတ်သာရှိပြီး ဒီပွဲအနိုင်ရရှိရေးက ချန်ပီယံဖြစ်ဖို့အတွက် အရေးပါနေသလို မြို့ခံပြိုင်ဘက်အသင်းတွေရဲ့ထုံးစံအတိုင်း ပြိုင်ဆိုင်မှုလည်း ပြင်းထန်မယ့် ပွဲစဉ်ပါ။

အိမ်ရှင် ရီရဲလ်အသင်းက နောက်ဆုံးယှဉ်ပြိုင်ခဲ့တဲ့ လာလီဂါပွဲစဉ် ၂၂ မှာ အက်စပန်ညိုအသင်းကို ၁-၀ ရလဒ်နဲ့ရှုံးနိမ့်ထားပေမယ့် အဆင့် ၁ နေရာမှာ ဆက်လက်ရပ်တည်နေဆဲဖြစ်ပါတယ်။ အဓိကနောက်ခံလူတွေဖြစ်တဲ့ ရူဒီဂါ၊ ကာဘာဟယ်၊ ဒေးဗစ်အလာဘာ၊ မီလီတာအိုတို့ ဒဏ်ရာရနေတာက အိမ်ရှင်အသင်းအတွက် စိုးရိမ်စရာပါ။ ဒါပေမယ့် ကွင်းလယ်လူ ကာဗာမင်ဂါ ဒဏ်ရာက ပြန်လည်သက်သာပြီး လေ့ကျင့်ခန်းဆင်းနိုင်တာကတော့ အသင်းအတွက် အပေါင်းလက္ခဏာဆောင်တဲ့ အခြေအနေဖြစ်ပါတယ်။ 

ဒီပွဲစဉ်မှာ အိမ်ရှင်အသင်းအနေနဲ့ နည်းပြ အန်စလော့တီရဲ့ ဦးဆောင်မှုနဲ့အတူ အမ်ဘာပေ၊ ဗီနီဆီးယက်စ်၊ ရိုဒရီဂို၊ ဘယ်လင်ဂမ်တို့ရဲ့ သွင်းဂိုးတွေကို မြင်တွေ့နိုင်မလား စောင့်ကြည့်ရမှာပါ။

ဧည့်သည်အသင်းဖြစ်တဲ့ အက်သလက်တီကို အသင်းကတော့ နောက်ခံလူ လီနော်မန် အဝါကတ် ၅ ကတ်ကြောင့် ပွဲပယ်ခံရတာကလွဲရင် လူစုံတက်စုံ အနေအထားပါ။ လာလီဂါနောက်ဆုံး ၃ ပွဲမှာ လီဂါနက်ကိုရှုံးထားပြီး ဗီလာရီရဲလ်ကို သရေကျကာ မာရော့ကာကို အနိုင်ကစားထားတဲ့ အက်သလက်တီကိုတို့အနေနဲ့ ဘာနေဗျူးမှာတော့ ရုန်းကန်ရမယ့်အခြေအနေဖြစ်ပါတယ်။

ဒီပွဲစဉ်မှာတော့ သက်တော်ရှည်နည်းပြ ဒီယေဂိုဆီမြူနီရဲ့ ဦးဆောင်မှုနဲ့အတူ ဆောလော့တ်၊ အဲဗာရက်ဇ်၊ ဂရစ်ဇ်မန်းတို့ရဲ့ တိုက်စစ်တွဲလုံးတွေကို မြင်တွေ့နိုင်သလို ဒီရာသီ လာလီဂါမှာ ပေးဂိုး ၁၄ ဂိုးသာ ခွင့်ပြုထားရပြီး ပေးဂိုးအနည်းဆုံးအဖြစ် ရပ်တည်နေတဲ့ အက်သလက်တီကိုရဲ့ ခံစစ်ပိုင်းကိုလည်း တွေ့မြင်ရမှာပါ။

ဒီ ၂ သင်းရဲ့ လာလီဂါမှာ နောက်ဆုံးတွေ့ဆုံခဲ့တဲ့ မက်ဒရစ်ဒါဘီ ၅ ကြိမ်မှာတော့ ၁ ကြိမ်စီ အနိုင်ရထားပြီး ၃ ကြိမ် သရေရလဒ် ထွက်ပေါ်ထားပါတယ်။

တိုက်စစ် ခံစစ်အားပြိုင်မှုနဲ့အတူ အဆင့် ၁ နေရာကို ဘယ်သူရယူသွားမလဲဆိုတာအပြင် အဆင့် ၂ နဲ့ ၃ မှတ်သာကွာဟပြီး အဆင့် ၃ နေရာမှာရှိတဲ့ ဘာစီလိုနာအသင်းရဲ့ ဖိအားပေးမှုကြောင့် ဒီပွဲရဲ့ ရလဒ်က လာလီဂါ ဇယားထိပ်ပိုင်းကို အပြောင်းအလဲ ဖြစ်စေမလား စောင့်ကြည့်ရအောင်ပါ။

Photo – LaLiga.

မြေလတ်အသံ၊ ဖေဖော်ဝါရီ ၃၊ ၂၀၂၅။

မနေ့က ယှဉ်ပြိုင်ခဲ့တဲ့ ပရီးမီးယားလိဂ် ပွဲစဉ် ၂၄ ရဲ့ နောက်ဆုံးပွဲစဉ်မှာ အာဆင်နယ်အသင်းက မန်ချက်စတာစီးတီးအသင်းကို ၅-၁ ရလဒ်နဲ့ ဂိုးပြတ်အနိုင်ရယူခဲ့ပြီး အဆင့် ၁ နေရာက လီဗာပူးလ်ကို ဆက်လက်ဖိအားပေးနိုင်ခဲ့ပါတယ်။

အာဆင်နယ်အသင်းက အဓိက တောင်ပံတိုက်စစ်ကစားသမား ဆာကာ ဒဏ်ရာရပြီးတဲ့နောက်ပိုင်း ပုံမှန်ပွဲထွက်လေ့ရှိတဲ့ မာတင်နယ်လီ၊ ထရော့ဆက်၊ ဟားဗက်ဇ် တို့နဲ့ တိုက်စစ်တွဲလုံးနဲ့ ပုံမှန်အတိုင်းပွဲထွက်လာပြီး ဆာကာ၊ ဂျေဇူး၊ တိုမီယာစု၊ ဘန်ဝှိုက်တို့ ဒဏ်ရာကြောင့် မပါဝင်နိုင်ခဲ့ပါဘူး။

မန်စီးတီးဘက်ကတော့ လက်ရှိ ဇန်နဝါရီ အပြောင်းအရွှေ့ကာလ ဖရန့်ဖတ်ကနေ ဝယ်ယူထားတဲ့ အိုမာ မာမွတ်ရှ် ကို ကွင်းလယ်မှာ ပွဲထုတ်လာသလို ဂိုးသမားနေရာမှာတော့ အီဒါဆင်အစား အော်တီဂါ နဲ့ ပွဲထွက်လာခဲ့ပါတယ်။ ဒီပွဲမှာ အဓိကပွဲထွက်လူစာရင်းက အကီ၊ ဒီယက်ဇ်၊ ဒိုကူ တို့နဲ့ ဒီရာသီကာလရှည်ကြာ အနားယူနေရတဲ့ ရိုဒရီ အပြင် အော်စကာဘော့ဘ် လည်း ဒဏ်ရာကြောင့် မပါဝင်နိုင်ခဲ့ပါဘူး။

ပွဲအစ ၁ မိနစ်ကျော်မှာပဲ မန်စီးတီး နောက်တန်းကစားသမား အကန်ဂျီရဲ့ ဘောလုံးထိန်းသိမ်းပုံ မသေသပ်မှုကနေတဆင့် အာဆင်နယ်အတွက် ဦးဆောင်ဂိုးကို အသင်းခေါင်းဆောင် အော်ဒီဂတ်က ရယူပေးနိုင်ခဲ့ပါတယ်။ အဲ့ဒီနောက် ပထမပိုင်းတပိုင်းလုံးနီးပါး မန်စီးတီးက တောက်လျှောက် တိုက်စစ်ဆင် ကစားလာခဲ့ပေမယ့် ချေပဂိုးမရရှိခဲ့ပါဘူး။

ဒုတိယပိုင်း ၅၅ မိနစ်မှာတော့ ဟာလန်းရဲ့ ခေါင်းတိုက်သွင်းဂိုးနဲ့ မန်စီးတီးတို့ ချေပဂိုးပြန်လည်ရရှိခဲ့ပါသေးတယ်။ ဒါပေမယ့် ချေပဂိုးသွင်းယူပြီး ၁ မိနစ်အကြာမှာပဲ ကွင်းလယ်လူပါတေးရဲ့ကန်ချက် ဂျွန်စတုန်းနဲ့ထိပြီး လမ်းကြောင်းပြောင်း ဂိုးဝင်ခဲ့လို့ အာဆင်နယ်တို့ ပွဲကိုချက်ချင်းပြန်လည် ဦးဆောင်နိုင်ခဲ့ပါတယ်။ အဲ့ဒီနောက် ၆၂ မိနစ်မှာ လူးဝစ်စကယ်လီ၊ ၇၆ မိနစ်မှာ ကိုင်ဟားဗက်ဇ် နဲ့ ၉၀ မိနစ်မှာ အီသန်နွယ်နာရီတို့က အသီးသီး သွင်းဂိုးတွေရယူနိုင်ခဲ့ကာ မန်ချက်စတာစီးတီးကို ဂိုးပြတ် အနိုင်ယူခဲ့တာပါ။

ဒီနိုင်ပွဲကြောင့် အာဆင်နယ်အသင်းက လက်ရှိ အဆင့် ၁ က လီဗာပူးလ်အသင်းထက် ၁ ပွဲပိုကန်ထားပြီး ၆ မှတ်ကွာဟနေပေးမယ့် အဆင့် ၂ နေရာကနေ အနီးကပ်ဆုံး ဖိအားပေးနေဆဲ ဖြစ်ပါတယ်။

ပြီးခဲ့တဲ့ ၄ ရာသီဆက်တိုက် ပရီးမီးယားလိဂ် ချန်ပီယံဖြစ်ခဲ့တဲ့ မန်ချက်စတာစီးတီးအသင်းက လက်ရှိမှာတော့ ပရီးမီးယားလိဂ် အဆင့် ၄ နေရာမှာ ရပ်တည်နေပြီး အဆင့် ၁ နဲ့ ၁၅ မှတ်အထိ ကွာဟနေပြီ ဖြစ်ပါတယ်။ ဒါ့အပြင် လက်ရှိခြေစွမ်းအရ လာမယ့်ဗုဒ္ဓဟူးနေ့ ရီရဲလ်မက်ဒရစ်နဲ့ ကန်ရမယ့် ချန်ပီယံလိဂ် ၁၆ သင်းအဆင့် Play-off ပွဲမှာလည်း ရုန်းကန်ရဦးမယ့် အခြေအနေပါ။

Photo – Premier League.