ပဲခူး၊ ဇူလိုင် ၁၊ ၂၀၂၅။

ပဲခူးတိုင်း၊ ရွှေကျင်နဲ့ဝေါက စစ်ကောင်စီတပ်စွဲထားတဲ့နေရာ ၂ ခု တပြိုင်တည်းတိုက်ခိုက်ခံရပြီး စစ်ကောင်စီတပ်သား ၄ ဦးသေဆုံးခဲ့တယ်လို့ ဇူလိုင် ၁ ရက်နေ့ ဒီနေ့မှာ ပဲခူးခရိုင်ပကဖက သတင်းထုတ်ပြန်ထားပါတယ်။

ဇွန် ၂၉ ရက်နေ့ နေ့လည် ၁၂ နာရီကျော်ခန့်မှာ ခမရ ၅၉၈ တပ်ရင်းရှေ့မှာ ဘန်ကာနဲ့ ကတုတ်ကျင်းတွေ ပြန်လည်တည်ဆောက်နေတဲ့ စစ်ကောင်စီတပ်ဖွဲ့ဝင်တွေကို လက်နက်ကြီးတွေနဲ့သွားရောက်ပစ်ခတ်ခဲ့သလို ဝေါမြို့နယ်၊ သူရဲသမိန်ကမ်းနားပိုင်းရှိ စစ်ကောင်စီတပ်လက်နက်ကြီးအထိုင်ချထားတဲ့နေရာက စစ်ကောင်စီတပ်ဖွဲ့ဝင်တွေကို စနိုက်ပါနဲ့သွားရောက်ပစ်ခတ်ခဲ့တယ်လို့ သိရပါတယ်။

“တပြိုင်နက်ထဲ ပစ်တာပါ။ သူရဲသူမိန်ရော၊ ၅၉၈ ရောပါ တန်ပြန်လက်နက်ကြီးပြန်ပစ်ပါတယ်။ လက်နက်ငယ်လဲ ဖောက်ပါတယ်။ ကျနော်တို့ဘက်က ထိခိုက်မှုမရှိပါ။”လို့ ပဲခူးခရိုင်ပကဖ တာဝန်ခံကပြောပါတယ်။

ပစ်ခတ်မှုအတွင်းမှာ သူရဲသမိန်ကမ်းနားပိုင်းရှိ စစ်ကောင်စီတပ်လက်နက်ကြီးအထိုင်ချထားတဲ့နေရာက စစ်ကောင်စီတပ်ဖွဲ့ဝင် ၁ ဦး၊ ခမရ ၅၉၈ ဘန်ကာပြုပြင်နေတဲ့ နေရာက ၃ ဦးသေဆုံးပြီး ထိခိုက်ဒဏ်ရာရသူတွေလည်းရှိခဲ့တယ်လို့ ဆိုပါတယ်။

စစ်ကောင်စီတပ်ဖွဲ့ဝင်တွေ သေဆုံးဒဏ်ရာရတာကိုတော့ ဒေသခံ သတင်းပေးတွေထံကနေတဆင့် အတည်ပြုထားနိုင်တာဖြစ်တယ်လို့ ဆိုပါတယ်။

အဆိုပါ တိုက်ခိုက်မှုကိုတော့ KNU/KNLA တပ်မဟာ(၃)၊ ရင်း(၇)နဲ့ ပူးပေါင်းတပ်တွေဖြစ်တဲ့ ပဲခူးခရိုင် ပကဖ၊ ဗျူဟာ(၃၆) ဒေါနတပ်ရင်းတို့က သွားရောက်တိုက်ခိုက်ခဲ့တာလို့ ဆိုပါတယ်။

မေ ၈ ရက်နေ့မှာ ခမရ ၅၉၈ တပ်ကို KNLA ပူးပေါင်းတပ်တွေက တိုက်ခိုက်သိမ်းပိုက်ခဲ့ပြီးနော​က် ၃ ရက်အကြာ မေ ၁၁ ရက်နေ့မှာ စစ်ကောင်စီတပ်က ပြန်လည်ရယူပြီးနောက် ပျက်စီးသွားတဲ့အဆောက်အဦတွေကို ပြန်လည်ပြင်ဆင်နေတာလို့ သိရပါတယ်။

စာတည်း – မြတ်

မြေလတ်အသံ၊ ဇူလိုင် ၁၊ ၂၀၂၅။

စစ်ကိုင်းမြို့နယ်၊ မင်းကွန်းတိုက်နယ်ကျေးရွာကို မီးရှို့ဖျက်ဆီးနေတဲ့ စစ်ကောင်စီတပ်စခန်းကို ဝင်ရောက်တိုက်ခိုက်ရာ စစ်သား ၄ ဦးသေဆုံးပြီး ၄ ဦးအရှင်ဖမ်းမိခဲ့တယ်လို့ ဇွန် ၃၀ ရက်‌နေ့မှာ ယူနီကွန်း ပျောက်ကြားတပ်ဖွဲ့က ထုတ်ပြန်ပါတယ်။

မင်းကွန်းတောင်ရွာရှိ နဂါးပတ်တောင်ကျောင်းတိုက်အတွင်း အင်အား ၃၀ခန့်နဲ့ တပ်စွဲထားတဲ့ စခန်းကုန်းကို ဇွန် ၂၇ ရက်နေ့မှာ အလစ်အငိုက်ဝင်ရောက်တိုက်ခိုက်ခဲ့ရာ နာရီဝက်အတွင်း သိမ်းပိုက်နိုင်ခဲ့တာလို့ ဆိုပါတယ်။

“၂၇ ရက်နေ့မှာပါ။ နာရီပိုင်းနဲ့သိမ်းလာနိူင်ပါတယ်။ အလောင်း ၄ လောင်းတွေ့ခဲ့တယ်။ စခန်းကဘုန်းကြီးကျောင်းမှာ တပ်စွဲထားတာဖြစ်လို့ မီးမရှို့ခဲ့ပါ။ ကျန်တဲ့စကစတွေကတော့ မင်းကွန်းထဲကို ထွက်ပြေးကြတယ်ထင်တယ်ဗျ”လို့ ယူနီကွန်းပျောက်ကြားတပ်ဖွဲ့မှ တာဝန်ရှိသူကပြောပါတယ်။

တိုက်ပွဲအတွင်း စစ်ကောင်စီတပ်သား အသက် ၂၀ အရွယ် ၃ ဦးနဲ့ အသက် ၄၀ ကျော်အရွယ် ၁ ဦးတို့ကို ဖမ်းမိပြီး G-3 ၄ လက်၊ MA-1 ၂ လက်အပါအဝင် စစ်အသုံးအဆောင်ပစ္စည်းတချို့တို့ကို သိမ်းဆည်းရရှိခဲ့တယ်လို့ No More Dictatorship People Defence Force-NMDမှတာဝန်ရှိသူက ပြောပါတယ်။

လက်ရှိတိုက်ခိုက်သိမ်းပိုက်ခံရတဲ့ စစ်ကောင်စီစခန်းဟာ မင်းကွန်းတိုက်နယ်ရဲစခန်းနဲ့ ၁ မိုင်ကျော်ခန့်ကွာဝေးသလို စစ်ကောင်စီတပ်က မင်းကွန်းတိုက်နယ်တခုလုံးမှာ အင်အား ၃၀၀ ခန့်နဲ့တပ်ဖြန့်ထားတဲ့ကြားက အခုလိုသိမ်းပိုက်နိုင်ခဲ့တာဖြစ်တယ်လို့လည်း သူကပြောပါတယ်။

ဒီတိုက်ခိုက်မှုကို ယူနီကွန်းပျောက်ကြားတပ်ဖွဲ့ နဲ့ No More Dictatorship (NMD) တို့က ပူးပေါင်းလုပ်ဆောင်ခဲ့တာဖြစ်တယ်လို့ သိရပါတယ်။

အဲဒီစစ်တပ်ဟာ ဇွန် ၂၇ ရက်နေ့၊ မနက်ပိုင်းမှာပဲ မင်းကွန်းကျေးရွာကိုမီးရှို့ဖျက်ဆီးခဲ့သေးတယ်လို့ သိရပါတယ်။

အိမ်ခြေ ၆၀၀ ခန့်ရှိတဲ့ မင်းကွန်းတောင်ရွာကို စစ်ကောင်စီတပ်က ဇွန် ၈ ရက်နေ့ကစတင်ကာ စစ်ကြောင်းထိုးဝင်ရောက်လာခဲ့ပါတယ်။
ဒီစစ်ကြောင်းဟာ မင်းကွန်းရွာရဲ့ မြောက်ဘက်ကတော်လှန်ရေးတပ် တပ်တွေစိုးမိုးထားတဲ့ ကင်းရွာနဲ့ ချောင်းမကြီးရွာတွေကို စစ်ကြောင်းထိုးဝင်ရောက်ခဲ့ပြီး ကျောင်းထိုင်ဆရာတော် ၁ ပါးနဲ့ ပြည်သူ ၃ ဦး ကို သတ်ဖြတ်ခဲ့တယ်လို့ သိရပါတယ်။

အဲဒီနောက် ကင်းရွာနဲ့ ချောင်းမကြီးရွာတို့ကို မီးရှို့ကာ စစ်ကြောင်းနှစ် ကြောင်းခွဲပြီး တပ်စွဲခဲ့တယ်လို့ သိရပါတယ်။

ဇွန် ၂၈ ရက်နေ့မှာလည်း တော်လှန်ရေးပူးပေါင်းတပ်တွေက ချောင်းမကြီးရွာကို တပ်စွဲထားတဲ့ စစ်ကောင်စီတပ်ကို ဝင်ရောက်တိုက်ခိုက်ခဲ့တာမို့ စစ်ကောင်စီတပ်အကျဆုံးများခဲ့ပြီး မင်းကွန်းရွာထဲကို ပြန်ဆုတ်သွားကာ ဒီ‌နေ့အထိစစ်တပ်က မင်းကွန်းရွာထဲမှာ တပ်စွဲထားဆဲဖြစ်တယ်လို့ သိရပါတယ်။

စာတည်း – မြတ်

မုံရွာ၊ ဇွန် ၃၀၊ ၂၀၂၅။

စစ်ကိုင်းတိုင်း၊ မုံရွာမြို့အခြေစိုက် အနောက်မြောက်တိုင်း စစ်ဌာနချုပ် (နမခ)ကို ရှော့တိုက်ရှော့ကတ်တွေနဲ့ပစ်ခတ်ရာ စစ်ကောင်စီတပ်ဖွဲ့ဝင်တချို့သေဆုံးပြီး အဆောက်အအုံအချို့လည်း ပျက်စီးခဲ့တယ်လို့ Chindwin Rocket Brother- CRB အဖွဲ့ဆီက သိရပါတယ်။

ဇွန် ၂၇ ရက် ညနေ ၅ နာရီခွဲခန့်က ရှော့တိုက်ရှော့ကတ် ၁၀ လုံးနဲ့ ပစ်ခတ်ခဲ့ရာ အရာရှိတွေအပါ သေဆုံးသူများခဲ့တယ်လို့ ဆိုပါတယ်။

“အခုလိုသေဆုံးတဲ့ အချက်အလက်တွေကို CDM ဗိုလ်ကြီးတချို့က အတည်ပြုပေးတာပါဗျ။ ပစ်ခတ်မှုကြာချိန်ကတော့ မိနစ် ၃၀ လောက်ရှိတယ်ဗျ။ နမခထဲကနေ လက်နက်ကြီးတွေနဲ့ ပြန်လည်ပစ်ခတ်ပါတယ်။ ကျတော်တို့ရဲဘော်တွေနဲ့ မလှမ်းမကမ်းမှာကို ၃ လုံး ကျပေါက်ကွဲခဲ့သေးတယ်။ အထိအခိုက်တော့ မရှိခဲ့ဘူးဗျ။”လို့ CRB အဖွဲ့ရဲ့ တာဝန်ခံတဦးက မြေလတ်အသံကို ပြောပါတယ်။

တိုက်ခိုက်မှုအတွင်း တဆ ၄/၃၀၀ အထူးကြပ်မတ်ဆောင်အပါ စစ်တိုင်းရုံးအတွင်းရှိ အရာရှိ ၃ ဦး၊ စစ်ကောင်စီတပ်ဖွဲ့တင် ၁၄ ဦးနဲ့ အရာရှိမိသားစုဝင်တွေလည်းသေဆုံးခဲ့တယ်လို့ ဆိုထားပေမယ့် ဒီသေဆုံးမှုတွေနဲ့ပတ်သက်ပြီးမြေလတ်အသံကသီးခြားအတည်မပြုနိုင်သေးပါဘူး။

ဒါ့အပြင် ဆီဂိုဒေါင်၊ စခန်းရုံးနဲ့ ရိက္ခာဂိုဒေါင်၊ အရာရှိရိပ်သာမှာ ရပ်ထားတဲ့ အိမ်စီးကား ၂ စီးတို့ မီးလောင်ပျက်စီးပြီး လိုင်းခန်းနှစ်ခန်းလည်း လက်နက်စထိမှန်ပျက်စီးသွားခဲ့တယ်လို့ သိရပါတယ်။

တိုက်ခိုက်မှုအပြီးမှာ နမခထဲကနေ ပါရာမိုတာ အင်ဂျင်တပ်လေထီး ၁ စီးတက်လာပြီး အနီးဝန်းကျင်ကို ၂ နာရီကြာ ပျံဝဲခဲ့တယ်လို့ သူက ဆက်ပြောပါတယ်။

ဒီတိုက်ခိုက်မှုကို Chindwin Rocket Brothers-CRB အဖွဲ့က ဦးဆောင်ပြီး မဟာမိတ်အဖွဲ့တွေဖြစ်တဲ့ ချိုမိုင်မိုင်(ကနီ)၊ Anonymous Heroes၊ Chindwin Brothers တို့ ပူးပေါင်းလုပ်ဆောင်ခဲ့တာလို့လည်း သိရပါတယ်။

ပြီးခဲ့တဲ့ ဇွန် ၁၄ ရက်ကလည်း တော်လှန်ရေးတပ်ဖွဲ့ဝင်တွေက နမခကို ရှော့တိုက်ဒုံးနဲ့ပစ်ခတ်ခဲ့လို့ အရာရှိ ၂ ဦးအပါ စစ်ကောင်စီတပ်ဖွဲ့ဝင် ၅ ဦး နေရာမှာသေဆုံးကာ ၁၀ ဦးကျော် ထိခိုက်ဒဏ်ရာရရှိခဲ့ပါသေးတယ်။

စာတည်း – လင်း

ဖြူး၊ ဇူလိုင် ၃၀၊ ၂၀၂၅။

ပဲခူးတိုင်း၊ ဖြူးမြို့နယ်၊ ဝဲဒေါင့်ဝဲကြီးကျေးရွာတိုက်ပွဲအတွင်းမှာ ကလေး ၁ ဦးအပါအဝင် ပြည်သူ ၄ ဦးသေဆုံးပြီး ၅၀ ကျော်ဒဏ်ရာရတယ်လို့ ကူညီဆောင်ရွက်ပေးနေသူတွေဆီက သိရပါတယ်။

ဇွန် ၂၉ ရက်မနက် ၂ နာရီခန့်မှာ ကျေးရွာအတွင်းတပ်စွဲထားတဲ့ စစ်ကောင်စီအဖွဲ့ကို ဖြူးပကဖ ပူးပေါင်းတပ်တွေဘက်က လာရောက်တိုက်ခိုက်ရာမှ တိုက်ပွဲပြင်းထန်ခဲ့ရာ နှစ်ဖက်လက်နက်ကြီး ပစ်ခတ်တာရှိသလို စစ်ကောင်စီဘက်က လေကြောင်းကနေလာရောက်ဗုံးကြဲတာတွေလည်းရှိခဲ့တယ်လို့ ဆိုပါတယ်။

“နှစ်ဖက်ပွဲကနေချိန်မှာ စကစဘက်က လေကြောင်းအကူအညီတောင်းတဲ့အချိန်မှာ လာကြဲသွားတာလည်းပါတယ်။ အစမှန်တဲ့ဒဏ်ရာများတယ်။ ဗုံးကြဲစတွေနဲ့ လက်နက်ကြီးစမှန်တာတွေ ရှိတယ်”လို့ ကူညီဆောင်ရွက်ပေးနေသူတဦးက ပြောပါတယ်။

လေကြောင်းကနေကြဲတဲ့ ဗုံးပေါက်ကွဲစတွေနဲ့ လက်နက်ကြီးစတွေမှန်တာကြောင့် အသက် ၇ နှစ်အရွယ် မောင်ဇွဲပြည့်၊ အသက် ၃၀ ကျော်အရွယ်အမျိုးသမီး ၁ ဦး၊ ၃၅ နှစ်အရွယ် ဒေါ်သီတာဦး နဲ့ ၅၆ နှစ်အရွယ် ဒေါ်ခင်အေးစုတို့ သေဆုံးခဲ့တယ်လို့ ဆိုပါတယ်။

ဒါ့အပြင် ကလေးငယ် ၄ ဦးအပါအဝင် အမျိုးသမီး၊ အမျိုးသား ၄၅ ဦးခန့်ဒဏ်ရာခဲ့ကာ စောင့်ကြည့်ကုသရမယ့်အခြေအနေကြောင့် ဆေးရုံမှာကုသမှုခံယူနေရသူ ကလေးငယ် ၃ ဦးအပါအဝင် ၂၀ ဦးခန့်ရှိနေသေးပြီး ကျန်သူတွေကတော့ ဆေးရုံကနေ နေအိမ်ပြန်သွားကြပြီလို့ သိရပါတယ်။

ဆေးရုံမှာကုသဆဲ လူနာတွေအနက် ၇ လသားအရွယ်ကလေးငယ် အပါအဝင် ၅ ဦးက စိုးရိမ်ရအခြေအနေရှိပြီး ကျန်သူတွေကတော့ ဦးခေါင်း၊ လက်၊ ခြေထောက်၊ ခန္ဓာကိုယ်တွေမှာ အစမှန်ဒဏ်ရာတွေရထားကြတာလို့ ဆိုပါတယ်။

ဝဲဒေါင့်ဝဲကြီးကျေးရွာရှိ စစ်ကောင်စီကင်းစခန်းကို တိုက်ခိုက်ခဲ့ရာ တိုက်ပွဲ ၅ နာရီခန့်ကြာမြင့်ခဲ့ပြီး တိုက်ပွဲအတွင်းမှာ စစ်ကောင်စီဘက်က ၁၀ ဦးထက်မနည်းသေဆုံးကာ ရန်ကုန်တိုင်းပကဖ အဖွဲ့ဝင် ၁ ဦးသေဆုံးပြီး ဖြူးပကဖအဖွဲ့ဝင်တဦးဒဏ်ရာရတယ်လို့ ဖြူးပကဖကထုတ်ပြန်ထားပါတယ်။

အဆိုပါတိုက်ပွဲအခြေအနေနဲ့ပတ်သက်ပြီး ဖြူးပကဖထံကို မြေလတ်အသံက ဆက်သွယ်မေးမြန်းထားပေမယ့် ပြန်လည်ဖြေကြားတာမျိုးမရှိပါဘူး။

အဆိုပါ တိုက်ခိုက်မှုကို ဖြူးမြို့နယ်ပကဖ၊ ရန်ကုန်တိုင်းပကဖ တိုက်ခိုက်ရေးတပ်ဖွဲ့(၃)၊ ဧရာဝတီအမှတ်(၃)တပ်ရင်းနှင့် အာဠာဝကစစ်ကြောင်းတို့ ပူးပေါင်းတိုက်ခိုက်ခဲ့တယ်လို့ ထုတ်ပြန်ချက်မှာ ဖော်ပြထားပါတယ်။

ဇွန် ၂၅ ရက်ကလည်း ပဲခူးတိုင်း၊ ညောင်လေးပင်၊ ကျောက်တံခါး၊ ဖြူးမြို့နယ်တွေအတွင်းက ရန်ကုန်-မန္တလေး အမြန်လမ်းဟောင်းပေါ်ရှိ စစ်ကောင်စီတပ်ဖွဲ့စခန်း ၉ ခုကို တပြိုင်နက် တိုက်ခိုက်ခံရပြီး တိုက်ပွဲတွေအတွင်း စစ်ကောင်စီတပ်ဖွဲ့ဝင် ၂၀ ဦးထက်မနည်းသေဆုံးကာ ရဲအုပ် ၁ ဦးအပါ စစ်သုံ့ပန်း ၃ ဦးကို ဖမ်းဆီးရရှိခဲ့ပြီး တော်လှန်ရေးတပ်ဖွဲ့တွေဘက်ကလည်း ၁ ဦး သေဆုံး၊ ၂ ဦး ထိခိုက်ဒဏ်ရာရခဲ့သလို လက်နက်ခဲယမ်းအများအပြားကိုလည်း သိမ်းဆည်းရမိခဲ့တယ်လို့ NUG ကာကွယ်ရေးဝန်ကြီးဌာနထုတ်ပြန်ချက်အရ သိရပါတယ်။

စာတည်း – လင်း