နန်းခမ်း

မန္တလေး၊ ဖေဖော်ဝါရီ ၁၀၊ ၂၀၂၅။

မန္တလေးတိုင်း၊ မိုးကုတ်မြို့အနောက်ခြမ်းမှာရှိတဲ့ ဝင်းထရံရပ်ကွက်ကို စစ်အုပ်စုက လေကြောင်းတိုက်ခိုက်မှုပြုလုပ်သွားတဲ့အတွက် ၅ ဦးသေဆုံးပြီး ၂၀ နီးပါးဒဏ်ရာရရှိခဲ့တယ်လို့ မိုးကုတ်မြို့ခံဆီက သိရပါတယ်။

ဖေဖော်ဝါရီလ ၁၀ ရက် မနက် ၁ နာရီဝန်းကျင်မှာ သယ်ယူပို့ဆောင်ရေးလေယာဉ် Y 12 ၁ စီးနဲ့ ဝင်းထရံရပ်ကွက်ထဲမှာရှိတဲ့ ကျောက်တွင်းလုပ်ငန်းခွင်ထဲကို ၁၀ မိနစ်ကျော် ဗုံးကြဲချသွားလို့ ဒေသခံ ၅ ဦးသေဆုံးပြီး ၁၉ ဦးထိဒဏ်ရာရရှိခဲ့တယ်လို့ဆိုပါတယ်။

“တွင်းလုပ်တဲ့ တဲတွေပေါ်ကျတာဗျ၊ တဲအိမ်တွေပဲ ပျက်စီးသွားတာ ထိတွေ့မှုလည်းမရှိဘူး တွင်းလုပ်ငန်းမှာ အဖွဲ့အစည်းတွေလုပ်ကိုင်တယ်ဆိုပြီး သတင်းတွေထွက်နေလို့နေမှာ၊ ဒဏ်ရာရတဲ့သူတွေထဲမှာ စိုးရိမ်ရတဲ့သူတွေလည်းပါတယ်” လို့ မိုးကုတ်မြို့ခံ ကိုကျားပေါက်က ပြောပါတယ်။

ထိခိုက်သေဆုံးသူနဲ့ ဒဏ်ရာရသူတွေဟာ ဝင်းထရံရပ်ကွက်က ဒေသခံတချို့ နဲ့ အခြားနယ်ကနေလာပြီး ကျောက်တွင်းလာရောက်လုပ်ကိုင်နေတဲ့ သူတွေဖြစ်ကာ သေဆုံးသွားသူအချို့ကတော့ ရုပ်ပျက်ဆင်းပျက်နဲ့ သေဆုံးခဲ့ရတာဖြစ်တယ်လို့ ဆိုပါတယ်။

ဗုံးသီးချတိုက်ခိုက်ခံရတဲ့နေရာမှာ ပြည်သူတချို့သာကျန်ရှိပြီး အများစုကတော့ ထွက်ပြေးတိမ်းရှောင်နေကြရတယ်လို့ ဆိုပါတယ်။

မိုးကုတ်မြို့ကို ပြီးခဲ့တဲ့ ၂၀၂၄ ဇူလိုင် ၂၄ ရက်မှာ တအောင်းအမျိုးသားလွတ်မြောက်ရေးတပ်မတော် TNLA နဲ့ ကာကွယ်ရေးပူးပေါင်းပေါင်းတပ်ဖွဲ့တို့က တိုက်ခိုက်သိမ်းပိုက်ထားတာပဲဖြစ်ပါတယ်။

၂၀၂၄ ခုနှစ် နိုဝင်ဘာ ၁၁ ရက်ကလည်း မိုးကုတ်မြို့က လူနေရပ်ကွက်ကို စစ်ကောင်စီတပ်က လေကြောင်းတိုက်ခိုက်မှုပြုလုပ်ခဲ့လို့ ဒေသခံ ၁၀ ဦးထက် မနည်းသေဆုံးခဲ့ပါတယ်။

စာတည်း – ဈာန်မြင့်

ပဲခူး၊ ဖေဖော်ဝါရီ ၆၊ ၂၀၂၅။

ပဲခူးတိုင်း၊ သာယာဝတီခရိုင်၊ အုတ်ဖိုမြို့ရှိ မြန်မာနိုင်ငံစစ်မှုထမ်းဟောင်းအဖွဲ့ ရုံးကို Golden Garuda Battalion – G2B တပ်ဖွဲ့မှ မိုင်းခွဲတိုက်ခိုက်ခဲ့တယ်လို့ အဲဒီတပ်ဖွဲ့ဆီက သိရပါတယ်။

ဖေဖော်ဝါရီ ၅ ရက် မနေ့က မနက် ၄ နာရီခွဲလောက်မှာ အုတ်ဖိုမြို့၊ မြို့မရဲစခန်းအနီးမှာရှိတဲ့ စစ်မှုထမ်းဟောင်းအဖွဲ့ရုံးကို ကာကွယ်ရေးတပ်ဖွဲ့တွေက မိုင်း ၂ လုံးနဲ့ သွားရောက်တိုက်ခိုက်ခဲ့ရာ စစ်မှုထမ်းဟောင်းအဖွဲ့၀င် ၁ ဦးသေဆုံးပြီး ၃ ဦးထက်မနည်း ထိမှန်ဒဏ်ရာရရှိခဲ့တယ်လို့ ဆိုပါတယ်။

“အဲဒီရုံးမှာက အမြဲတမ်း ဒီအုပ်ချုပ်ရေးအဖွဲ့တွေ ၇ ဦးလောက်ရှိတယ်။ သေဆုံးသွားတာကတော့ ၁ ဦးကတော့ သေချာတယ်။ ကျန်တဲ့ ၂ ဦး ၃ ဦးမက ဒဏ်ရာရတာရှိတယ်။ ပြင်းထန်ဒဏ်ရာရတယ်။ သေဆုံးတဲ့သူ အလောင်းကို ရဲကားနဲ့သယ်သွားတယ်။ ပြီးတော့ အုတ်ဖိုဆေးရုံရင်ခွဲရုံကိုပို့တယ်။” လို့ Golden Garuda Battalion – G2B တပ်ဖွဲ့ရဲ့စစ်ရေးတာဝန်ခံ ကိုဂျာနူးက ပြောပါတယ်။

၆၄ နှစ်မြောက်ကချင်တော်လှန်ရေးနေ့ကို ဂုဏ်ပြုတဲ့အနေနဲ့ စာစောင်တွေထုတ်ဝေပြီး ဂုဏ်ပြုတာထက်စာရင် အခုလိုမစ်ရှင်နဲ့ ဂုဏ်ပြုချင်တဲ့အတွက် လုပ်ဆောင်ရခြင်းဖြစ်တယ်လို့ သူကဆိုပါတယ်။

ဒါ့အပြင် အဆိုပါရုံးမှာ စစ်မှုထမ်းဖို့ဖမ်းလာတဲ့သူတွေကို လာရောက်စုဆောင်းတာမျိုးတွေ ပြုလုပ်သလို အဲဒီရုံးက ကားတွေနဲ့ စစ်မှုထမ်းဖို့အတွက် အတင်းအကြပ်ပေါ်တာဆွဲခေါ်တာတွေလုပ်တယ်လို့ ကိုဂျာနူးက ပြောပါတယ်။

အဲ့ဒီရုံးဟာ အုတ်ဖိုမြို့မရဲစခန်းအနီးမှာရှိတဲ့အတွက် မစ်ရှင်ကိုဖော်ဆောင်ဖို့ အခက်အခဲတွေရှိခဲ့တယ်လို့ ဆိုပါတယ်။

“မြို့မရဲစခန်းနဲ့က ခြံစည်းရိုးပဲခြားတယ်။ လုံခြုံရေးတင်းကျပ်တဲ့ အခြေနေတွေကနေပြီးတော့ ကျနော်တို့ရအောင်သွားပြီးတော့ ခက်ခက်ခဲခဲမိုင်းထောင်ပြီးတော့မှ သေချာပြင်ဆင်ရတာဖြစ်တဲ့အတွက် အသက်အန္တရာယ်တွေ အများကြီးရှိတာပေါ့။ တချက်ကလေး ပေါက်သွားတာနဲ့ ကျနော်တို့ရဲဘော်တွေ အားလုံး အသက်ဆုံးရှုံးနိုင်ချေရှိတယ်ဆိုတော့ ဒီဟာကိုဖော်ဆောင်ဖို့အတွက်ကတော့ ကြာပြီပေါ့နော်။ စစ်မှုထမ်းတွေကိုအတင်းအကြပ် ပေါ်တာဆွဲကတည်းက ကျနော်တို့သေချာစောင့်ကြည့်နေတာဖြစ်တယ်။”လို့ ကိုဂျာနူးကပြောပါတယ်။

တိုက်ခိုက်ပြီးနောက် ကာကွယ်ရေးတပ်ဖွဲ့တွေထွက်လို့မရအောင် မြို့ပတ်ပတ်လည်မှာ စစ်ကောင်စီက ဂိတ်ချလုံခြုံရေးချထားသလို ရုံးပတ်ပတ်လည်ကိုလည်း အရပ်ဝတ်တွေနဲ့ ကင်းပုန်းဝပ်ပြီးစောင့်ဆိုင်းနေတာမျိုးတွေလည်းရှိတယ်လို့ သိရပါတယ်။

စာတည်း − လင်း

မကွေး၊ ဖေဖော်ဝါရီ ၆၊ ၂၀၂၅။

မကွေးတိုင်း၊ နတ်မောက်မြို့နယ်၊ ထုံးပေါက်ချိုင်းရွာက ထွေအုပ်စာရေးတဦး ဖေဖော်ဝါရီ ၅ ရက်ညနေ ၅ နာရီခွဲမှာ ပစ်ခတ်ခံရပြီးသေဆုံးခဲ့တယ်လို့ နတ်မောက်ပြည်သူ့ကာကွယ်ရေးအဖွဲ့ဆီက သိရပါတယ်။

သေဆုံးသူဟာ အသက် ၃၃ နှစ်အရွယ် ထွေအုပ်စာရေး ကိုအောင်ကိုဦး ဖြစ်ပြီး ထုံးပေါက်ချိုင်းရွာအနီးက ပိတောက်ကုန်းရွာကို ရောက်နေချိန် သူနေထိုင်နေတဲ့အိမ်ပေါ်မှာပဲ ကာကွယ်ရေးတပ်ဖွဲ့တွေက သေနတ်နဲ့ ပစ်ခတ်ခဲ့တာလို့ နတ်မောက်ပြည်သူ့ကာကွယ်ရေးအဖွဲ့တာဝန်ခံ ကိုအဆိပ်သီးက ပြောပါတယ်။

“ ၄ ချက်လောက် ပစ်ခတ်ရှင်းလင်းခဲ့တယ်။ သူ့ဆီမှာ အရင်တုန်းက လက်ပစ်ဗုံးတို့ဘာတို့ရှိတာကို ကျနော်တို့သတင်းကြားထားတော့ ချက်ချင်းပစ်ခတ်ရှင်းလင်းခဲ့တာ။ ရင်ဘတ်နဲ့ခေါင်း(ကျည်ထိတယ်)။” လို့ ကိုအဆိပ်သီးကပြောပါတယ်။

ပစ်ခတ်ပြီးနောက် ကိုအောင်ကိုဦးဆီကနေ ဖုန်း ၁ လုံးနဲ့ ကွန်ပျူတာ ၁ လုံးသိမ်းဆည်းခဲ့ပြီး အလောင်းကိုတော့ ပစ်ခတ်ပြီး ၁ နာရီလောက်အကြာမှာ စစ်ကောင်စီတပ်ဖွဲ့ဝင်တွေ လာသယ်သွားတယ်လို့ ဆိုပါတယ်။

ကိုအောင်ကိုဦးဟာ ထွေအုပ်စာရေးအဖြစ် ၈ နှစ်ကျော်လုပ်ကိုင်လာသူဖြစ်ပြီး တပေါက်ချိုင်းရွာက ဒေသခံတွေကိုလည်း လွန်ခဲ့တဲ့ ၂ နှစ်လောက်ကတည်းက ညပိုင်းကင်းစောင့်ခိုင်းတာတွေလုပ်ခဲ့ကာ သူ့ကို နတ်မောက်ပကဖနဲ့ ရေနံချောင်း PDF တို့က ပူးပေါင်းပစ်ခတ်ခဲ့ကြတာလို့ ဆိုပါတယ်။

နတ်မောက်ပြည်သူ့ကာကွယ်ရေးအဖွဲ့ဟာ အခုနှစ် ဖေဖော်ဝါရီ ၂ ရက် ညနေ ၆ နာရီလောက်မှာလည်း နတ်မောက်မြို့နယ်၊ အုပ်ရှစ်မျှောင်ရွာက အုပ်ချုပ်ရေးမှူးဦးမျိုးချစ် နဲ့ စန်းကုန်းရွာအုပ်ချုပ်ရေးမှူး အသက် ၇၆ နှစ်အရွယ် ဦးခင်မောင်ကိုလည်း နေအိမ်တွေမှာပစ်ခတ်ရာ သေဆုံးခဲ့တယ်လို့ နတ်မောက်ပကဖဆီက သိရပါတယ်။

စာတည်း – လင်း

မကွေး၊ ဖေဖော်ဝါရီ ၁၊ ၂၀၂၅။

မကွေးတိုင်း၊ ပေါက်မြို့နယ်၊ သရက်ကန်ကျေးရွာကို စစ်ကောင်စီက လေကြောင်းတိုက်ခိုက်ခဲ့တာကြောင့် ဒေသခံ ၃ ဦးသေဆုံးပြီး ၃ ဦးဒဏ်ရာရခဲ့တယ်လို့ ဒေသခံတွေဆီက သိရပါတယ်။

ဖေဖော်ဝါရီ ၁ ရက်ဒီမနက်အစောပိုင်း ၁၂ နာရီခွဲလောက်မှာ မိတ္ထီလာရှမ်းတဲလေတပ်ဘက်က တက်လာတဲ့ MiG 29 ဂျက်ဖိုက်တာ ၁ စီးပေါ်ကနေ သရက်ကန်ရွာမြောက်ပိုင်းကို ပစ်ခတ်တိုက်ခိုက်ခဲ့တာလို့ ဆိုပါတယ်။

“အကြောင်းမရှိပဲ ပြည်သူတွေကိုတိုက်ခိုက်သွားတာ။ ရွာထဲမှာ PDF စခန်းလည်းမရှိ၊ ဘာမှလုပ်ကိုင်နေတာလဲမရှိဘဲနဲ့ လေကြောင်းတိုက်ခိုက်သွားတာ၊ ကိုဇော်လင်းစိုးတို့နေအိမ်ဆိုပျောက်သွားတာ၊ သူဘေးနားက အိမ်ကဆိုရင်တခြမ်းပဲ့သွားတယ်၊ အဲ့မှာအိပ်တဲ့လူ ၂ ယောက်ကဘာမှမဖြစ်သွားဘူး” လို့ ပေါက်မြို့နယ်ခံတဦးက ပြောပါတယ်။

ဒီတိုက်ခိုက်မှုကြောင့် သရက်ကန်းရွာနေ ကိုဇော်လင်းစိုးနဲ့ ဇနီးဖြစ်သူ၊ ရွာထဲမှာအလုပ်လာလုပ်တဲ့ ပခုက္ကူမြို့နယ်၊ သံဘိုရွာက ကိုဝက်ကြီးတို့ ၃ ဦးသေဆုံးခဲ့တယ်လို့ ဆိုပါတယ်။

ဒါ့အပြင် သရက်ကန်ရွာက ကိုဖိုးကြာ၊ သံဘိုကျေးရွာက ကိုဝင်းအောင်နဲ့ ကိုလူပျိုကြီးတို့လည်း ထိခိုက်ဒဏ်ရာတွေရခဲ့ကာ စိုးရိမ်ရတဲ့အခြေအနေရှိတဲ့အတွက် ဆေးဝါးကုသပေးနေရတယ် လို့ ပေါက်မြို့နယ်ခံတဦးက ပြောပါတယ်။

အလားတူ နေအိမ် ၈ လုံးထိမှန်ပျက်စီးခဲ့ကာ သေဆုံးသူတွေကိုတော့ ဒီနေ့လယ်ပိုင်းမှာသင်္ဂြိုဟ်ပေးခဲ့တယ်လို့ ဆိုပါတယ်။သရက်ကန်ကျေးရွာဟာ လေကြောင်းတိုက်ခိုက်ခံရတာပထမအကြိမ်ဖြစ်ပြီး လက်ရှိမှာဒေသခံတွေ လည်း ရွာကတိမ်းရှောင်နေကြရတယ်လို့ သိရပါတယ်။

စာတည်း – လင်း

မြေလတ်အသံ၊ ဖေဖော်ဝါရီ ၁၊ ၂၀၂၅။

အာဏာသိမ်းပြီး ၄ နှစ်တာကာလအတွင်း ဆိပ်ဖြူဘာမထီပြည်သူ့ကာကွယ်ရေးတပ်ဖွဲ့မှ ကျဆုံးခဲ့တဲ့ တပ်ဖွဲ့ဝင်တွေရဲ့မိဘတွေကို အာဏာသိမ်း ၄ နှစ်ပြည့် ဖေဖော်ဝါရီ ၁ ရက် ဒီနေ့မှာ ထောက်ပံ့ငွေတွေပံ့ပိုးပေးခဲ့တယ်လို့ အဲဒီတပ်ဖွဲ့ဆီ‌က သိရပါတယ် ။

ကျဆုံးသွားတဲ့ ရဲဘော် ၁၃ ဦးရဲ့ မိဘတွေကို ‌၁ ဦးလျှင် ငွေကျပ် ၂ သိန်းစီ ကိုယ်တိုင်ကိုယ်ကျ သွားရောက်ထောက်ပံ့ပေးခဲ့ပြီး အဝေးရောက်နေတဲ့ အချို့မိသားစုဝင်တွေကိုတော့ ဖုန်းကနေတဆင့်အကျိုးအကြောင်းပြောကာ ကန်တော့ခဲ့တယ်လို့ ပခုက္ကူခရိုင်အမှတ်(၁၉)တပ်ရင်း က ရဲဘော်မိုက်ကယ်က ပြောပါတယ်။

“ပုံမှန်တော့ ကျနော်တို့ထောက်ပံ့ပေးတာမျိုးတော့ မရှိပါဘူး။ ပြည်သူတွေကမှတဆင့် ထောက်ပံ့တဲ့ငွေကို ကျနော်တို့ နိုင်သလောက်စုပြီးတဲ့အခါမျိုးမှာ ထောက်ပံ့ပေးတာပါ။ အခုထောက်ပံ့ငွေတွေကိုတော့ သူတို့နေအိမ်အထိသွားပြီး ထောက်ပံ့ပေးဖြစ်ပါတယ်။” လို့ ရဲဘော်မိုက်ကယ်က ဆိုပါတယ်။

မြန်မာတနိုင်ငံလုံးဟာ စစ်ကောင်စီတပ်ဖွဲ့ရဲ့ မတရားသဖြင့်အာဏာသိမ်းခံရတာ ၄ နှစ်ရှိပြီဖြစ်ပြီး ယနေ့အချိန်ထိ ရွပ်ရွပ်ချွံချွံပါဝင်ခဲ့သူတိုင်းကို လေးစားလျက်ရှိကြောင်းနဲ့ အာဏာရှင်အမြစ်ပြုတ်သည့်တိုင်အောင် ဆက်လက်တိုက်ပွဲဝင်ပေးကြစေလိုကြောင်း တိုက်တွန်းပြောကြားခဲ့ပါတယ်။

စာတည်း – ကိုချမ်း

မကွေး၊ ဇန်နဝါရီ ၂၇၊ ၂၀၂၅။

မကွေးတိုင်း၊ ရေစကြိုမြို့ပေါ်ကနေ စစ်ကောင်စီတပ်ဖွဲ့က လက်နက်ကြီးနဲ့ပစ်ခတ်ခဲ့တဲ့အတွက် ဆင်ခြေယာရွာ က နို့တိုက်မိခင် ၁ ဦးအပါအဝင် ၆ ဦးထိမှန်ဒဏ်ရာရရှိသွားတယ်လို့ အဲဒီရွာ ရပ်ကျေးပကဖတာဝန်ခံဆီက သိရပါတယ်။

ဇန်နဝါရီ ၂၆ ရက် မနေ့ ညနေ ၄ နာရီခွဲမှာ ရေစကြိုမြို့ပေါ်ကနေ ၁၂၀ မမ ၃ လုံး နဲ့ ပစ်ခတ်ခဲ့ရာ မြို့ပေါ် နဲ့ ၄ မိုင်ခန့်အကွာမှာရှိတဲ့ ဆင်ခြေယာရွာထဲကို လက်နက်ကြီးကျည် ၂ လုံးကျရောက်ပေါက်ကွဲသွားပြီး အဲဒီရွာက အမျိုးသမီး ၄ ဦးနဲ့ အမျိုးသား ၂ ဦးထိမှန်ဒဏ်ရာရရှိသွားတယ်လို့ ဆိုပါတယ်။

“ ၃ ချက် အသံကြားတယ်။ ၁ လုံးကတော့ရွာထဲမှာ လိုက်ရှာနေတုန်း။ မကွဲတဲ့ အလုံး ၁ လုံးကတော့ရှိဦးမယ်။ ထိခိုက်ဒဏ်ရာရတာတော့ရှိတယ်။ သေဆုံးတာတော့ မရှိဘူး။ နေအိမ် ၁ လုံးတော့ ပျက်စီးသွားတယ်။” လို့ ဆင်ခြေယာရွာရပ်ကျေးပကဖတာဝန်ခံ ကိုဇင်ကို က ပြောပါတယ်။

“ဒီကလေးမလေးရဲ့ အမျိုးသားက ကျနော်တို့အဖွဲ့ထဲက။ သူကအဖွဲ့ထဲမှာရောက်နေတဲ့အချိန် နောက်က အသံကြားလို့ သွားကြည့်တဲ့အခါ ဒီကလေးမလေးက နေရာမှာတင်ပေါင်ပြတ်သွားတယ်။ ကျနော်တို့လည်း ကားချက်ချင်းစီစဉ်ပြီးတော့ ဆေးရုံပို့ရတာပဲ။” လို့ သူက ဆိုပါတယ်။

ပထမဆုံးပစ်ခတ်လိုက်တဲ့ လက်နက်ကြီးဟာ နေအိမ်တည့်တည့်ပေါ်ကျရောက်သွားတဲ့အတွက် မအိကေကျော် ပေါင်ပြတ်သွားတာဖြစ်ပြီး အိမ်နီးနားချင်းတွေဖြစ်တဲ့ ဒေါ်ကြည်မာကတော့ ညာဘက်ပေါင်ရင်းထိမှန်သွားသလို မကွေးကွေး ကတော့ ဝဲဘက်ခြေထောက်နဲ့ ပုခုံး ၊ ဦးတိုးဝင်းကတော့ ဝဲဘက်ပေါင်၊ ဒေါ်မြင့်ရီကတော့ ဝမ်းဗိုက်၊ ကိုအောင်ကိုကတော့ နားတဖက် နားစည်ကွဲသွားတယ်လို့ သိရပါတယ်။

နောက်ထပ် ၁ လုံးကတော့ အဲဒီအိမ် နဲ့ ၂ အိမ်ကျော်လောက်က ရေကန်ကို ကျရောက်သွားတယ်လို့ ရေကန်နဲ့ ငှက်ပျော်ပင်တချို့သာ ထိမှန်သွားခဲ့ပါတယ်။

ရေစကြိုမြို့ပေါ်ကနေ မကြာခဏလက်နက်ကြီးတွေနဲ့ ပစ်ခတ်တာမျိုးတွေရှိပေမယ့်လည်း အခုလို ဆင်ခြေယာရွာထဲကို လက်နက်ကြီးကျရောက်ပေါက်ကွဲတာဟာ ပထမအကြိမ်ဖြစ်တယ်လို့ ဆိုပါတယ်။ လက်နက်ကြီး ကျရောက်ပေါက်ကွဲတဲ့ ညပိုင်းမှာတော့ ရွာထဲကဒေသခံတွေကို ဘုန်းကြီးကျောင်းနဲ့ လုံခြုံတဲ့အဆောက်အဦ တွေမှာ သွားရောက်ရှောင်တိမ်းခိုင်းတယ်လို့ ဆိုပါတယ်။

ဒီနေ့မနက်မှာတော့ ရွာထဲက ပြည်သူတွေကို ကတုတ်ကျင်းတူးဖော်ဖို့ လိုက်လံပြောကြားထားတယ်လို့ ကိုဇင်ကို က ဆိုပါတယ်။ အရင်က ရွာထဲမှာ ကတုတ်ကျင်းတွေ တူးထားပေမယ့်လည်း ရေကြီးတုန်းက မြေတွေ ပြန်လည်ပိတ်သွားတဲ့အတွက် နောက်ထပ်တဖန် ပြန်လည်တူးဖော်ခိုင်းခြင်းဖြစ်ပါတယ်။

စာတည်း – လင်းဇေ