အမျိုးသမီး

မကွေး၊ မေ ၃၊ ၂၀၂၅။

မကွေးတိုင်း၊ မကွေးမြို့၊ အောင်စေတနာ (စီ)ရပ်ကွက်၊ သုခိတာလမ်းနဲ့ အောင်စေတနာ (၁၀) လမ်းထောင့်မှာ ကြိုးဆွဲချတဲ့အမျိုးသမီးကို အသက်ရှင်လျက်ပြန်ကယ်နိုင်ခဲ့တယ်လို့ မြေပြင်ကူညီပေးခဲ့သူတွေဆီက သိရပါတယ်။

ကြိုးဆွဲချသူဟာ နဘူးကျေးရွာနေ အသက် ၃၀ ဝန်းကျင်အရွယ် မ*** ဖြစ်ပြီး မေ ၂ ရက်ည ၈ နာရီဝန်းကျင်က ခရေပင်မှာကြိုးဆွဲချနေချိန်မှာ ကယ်ဆယ်နိုင်ခဲ့တာလို့ဆိုပါတယ်။

“လမ်းသွားလမ်းလာတဦးက ကြိုးဆွဲချနေတာမြင်တော့ အကူအညီတောင်းလို့ ကျနော်တို့ရောက်တာနဲ့ ကြိုးဖြတ်လိုက်တယ်။ ကြိုးကမျှော့ကြိုးဆိုတော့ ပုံမှန်ကြိုးလိုမဟုတ်တော့ အသက်ရှိနေသေးတာ။ လိုအပ်တာလုပ်ပေးပြီး ဆေးရုံပို့ပေးခဲ့ရတာ။”လို့ ကူညီရေးလုပ်ဆောင်ပေးခဲ့သူတဦးက ပြောပါတယ်။

ဆေးရုံမှာ လိုအပ်တဲ့စစ်ဆေးမှုပြုလုပ်ပြီးနောက် စိတ်ချရတဲ့အခြေအနေရှိတာကြောင့် နေအိမ်ကိုပြန်ခွင့်ပေးခဲ့ပြီး လတ်တလောမှာတော့ စကားမပြောနိုင်သေးဘူးလို့ ဆိုပါတယ်။

နဘူးကျေးရွာနဲ့ အောင်စေတနာ (စီ)ရပ်ကွက်ဟာ ဆိုင်ကယ်နဲ့လာပါက မိနစ် ၂၀ ခန့်မောင်းနှင်ရတဲ့ အကွာအဝေးဖြစ်ပြီး အဆိုပါအမျိုးသမီးဟာ နေအိမ်ကနေတဦးတည်း လမ်းလျောက်ထွက်သွားခဲ့တာလို့ မိသားစုဝင်တွေဆီက သိရပါတယ်။

အဆိုပါ အမျိုးသမီးမှာအိမ်ထောင်လည်းရှိပြီး စီးပွားရေးလည်းအသင့်အတင်ပြေလည်တဲ့ မိသားစုကဖြစ်တယ်လို့ သိရပါတယ်။

စာတည်း – လင်း

စစ်ကိုင်း၊ မတ် ၂၈၊ ၂၀၂၃။

စစ်ကိုင်းတိုင်း၊ ကလေးမြို့နယ်၊ လက်ပံချောင်းကျေးရွာမှာ မတ်လ ၂၇ ရက်မနေ့ နေ့လယ် ၁၂ နာရီလောက်က စစ်ကောင်စီတပ်တွေပစ်လိုက်တဲ့ လက်နက်ကြီးကျည် ကျရောက်ပေါက်ကွဲခဲ့လို့ ဒေသခံအမျိုးသမီးတဦး ကျည်ထိမှန် ဒဏ်ရာရရှိခဲ့ပါတယ်။

အသက် ၃၀ နှစ်အရွယ် မဇူးထန်က နေအိမ်ထဲရှိနေချိန် လက်နက်ကြီးကျည် တလုံးက သူ့အိမ်အနောက်ဖက်ကို ကျရောက်ပေါက်ကွဲရာမှာ ဒဏ်ရာရရှိသွားတာလို့ ရွာခံသားတဦးက ပြောပါတယ်။

“ဒဏ်ရာကတော့ ဘယ်ဖက်ခြေထောက်မှာ ရသွားတာ။ သူမကို ကလေးမြို့ ဆေးရုံကို ပို့လိုက်ရတယ်။ အသက်အန္တရာယ်တော့ မစိုးရိမ်ရဘူး” လို့ ဆိုပါတယ်။

ဒီပစ်ခတ်မှုကို ကလေးအခြေစိုက် ဒေသကွပ်ကဲမှုစစ်ဌာနချုပ်မှ လုပ်ခဲ့တာဖြစ်ပြီး တိုက်ပွဲမဖြစ်ပဲ အကြောင်းမဲ့ ပစ်ခတ်ခဲ့တာလို့ ဆိုပါတယ်။

“လက်နက်ကြီးကျည်တွေက သုံး၊ လေးလုံးလောက်ကျ တယ်ဗျ။ အဲဒီထဲကမှ အိမ်ထဲကိုတော့ တလုံးပဲကျတာ။ ကျန်တဲ့အလုံးတွေကတော့ ရွာအပြင်မှာ ကျသွားတာ။ ရွာကလူတွေကတော့ အိမ်တွင်းကနေ အိမ်ပြင်မထွက်ရဲကြတော့ဘူး”လို့ ဆိုပါတယ်။

စစ်ကောင်စီတပ်တွေရဲ့ လက်နက်ကြီး ရမ်းသမ်းပစ်ခတ်မှု၊ စမ်းသပ်ပစ်ခတ်မှုတို့ကြောင့် စစ်ကိုင်းတိုင်း၊ မကွေးတိုင်း၊ ပဲခူးတိုင်းတို့က မြို့နယ်အချို့မှာ အရပ်သား ထိခိုက်၊ သေဆုံးမှုတွေ မကြာခဏဆိုသလို ရှိနေတယ်လို့ ဒေသခံတွေဆီက သိရပါတယ်။

ပြီးခဲ့တဲ့ မတ်လ ၁၃ ရက်ည ၅ နာရီလောက်မှာ မကွေးတိုင်း၊ ပခုက္ကူမြို့နယ်၊ ကျွန်းချောင်း EPC ရုံးဝန်ထမ်းတွေနေထိုင်တဲ့ ရပ်ကွက်ထဲကို စစ်ကောင်စီတပ်တွေပစ်လိုက်တဲ့ လက်နက်ကြီးကျည် ကျရောက်ပေါက်ကွဲခဲ့ရာ ပေါက်တောကျေးရွာမှ မိသားစုဝင် ၄ ဦး ပြင်းထန်ဒဏ်ရာရှိခဲ့ပါတယ်။

ဒါ့အပြင် အခုနှစ်ဖေဖေါ်ဝါရီလ ၂၁ ရက်ည ၈ နာရီလောက်မှာလည်း ခင်ဦးမြို့နယ်၊ အင်းပတ်ကွေ့ကျေးရွာထဲကို စစ်တပ်ကပစ်လိုက်တဲ့ လက်နက်ကြီးကျည် ထိမှန်လို့ အသက် ၆၀ နှစ်အရွယ်အဘွားတဦးနဲ့ ၃၀ နှစ်အရွယ်အမျိုးသားတဦး ကျည်ထိမှန် ဒဏ်ရာရခဲ့ပါသေးတယ်။

စာတည်း – လင်း

မြေလတ်အသံ၊ မတ် ၁၊ ၂၀၂၃။

စစ်ကိုင်းအခြေစိုက် တပ်ရင်းတခုဖြစ်တဲ့ စစ်ကိုင်းခရိုင် တပ်ရင်း အမှတ် ၃ ရဲ့ ၃ လကြာ လေ့ကျင့်သင်ကြားပေးနေတဲ့ အထူးကွန်မန်ဒို စစ်သင်တန်း ပြီးဆုံးသွားပြီဖြစ်လို့ သင်တန်းဆင်းပွဲ ကျင်းပခဲ့ပြီး အမျိုးသမီးကွန်မန်ဒို ရဲဘော်တွေလည်း ပါဝင်တယ်လို့ သိရပါတယ်။

ဖေဖော်ဝါရီ ၂၈ ရက်နေ့ မနေ့ကမနက်ပိုင်းမှာ အပတ်စဉ် ၃ ခုမြောက် သင်တန်းဆင်းပွဲကို ကျင်းပခဲ့တာဖြစ်ပြီး အပတ်စဉ် ၁ နဲ့ ၂ ကတော့ ၂၀၂၂ ခုနစ် ၁ လပိုင်းနဲ့ ၈ လပိုင်းမှာ ပြုလုပ်ခဲ့ပြီးပြီ ဖြစ်တယ်လို့ ဆိုပါတယ်။

“သင်တန်း ၃ ခုပေါင်းကို အမျိုးသမီးကွန်မန်ဒို ၂၀ ကျော်တော့ မွေးထုတ်ပြီးပါပြီ။ အတိကျကြီးတော့ ပြောလို့မရဘူးပေါ့။ သင်တန်းဆင်းပြီးတဲ့ ရဲဘော်တွေအနေနဲ့ကတော့ စစ်အာဏာရှင် အမြစ်ပြတ် ပြုတ်ကျရေးနဲ့ အကြမ်းဖက်စစ်တပ်ရဲ့ ပစ်မှတ်နေရာတွေကို ဦးတည်ပြီး တိုက်ခိုက်သွားမှာပါ။” လို့ တပ်ရင်း ၃ တာဝန်ခံတဦးက ပြောပါတယ်။

မြေပြင်အခြေနေပေါ်မူတည်ကာ သင်တန်းကာလ အတိုးအလျော့ရှိပြီး၊ သင်တန်းတခါပြုလုပ်ရင် သိန်း ၁၅၀ ဝန်းကျင် ကုန်ကျကာ တပ်ရင်းအသုံးစရိတ်ထဲက မျှထုတ်ပြီး ပြုလုပ်ခဲ့တာ ဖြစ်တဲ့အတွက် ကွန်မန်ဒိုရဲဘော်တိုင်းကိုတော့ ယူနီဖောင်း အပြည့်အစုံ မဆင်ပေးနိုင်ဘူးလို့ ဆိုပါတယ်။

အဆိုပါ သင်တန်းအပြင် အခြေခံစစ်ပညာသင်တန်း၊ စစ်မြေပြင်ဆေးသင်တန်း၊ စစ်မြေပြင်ထောက်လှမ်းရေးသင်တန်း၊ ဦး၊ ရေး၊ ထောက်သင်တန်းတွေလည်း သင်ကြားနေတယ်လို့လည်း သူကဆက်ပြောပါတယ်။

သင်တန်းဆင်းပွဲမှာ အမျိုးသားညီညွတ်ရေးအစိုးရ ကာကွယ်ရေးဝန်ကြီးရဲ့ သဝဏ်လွှာ ဖတ်ကြားတာ၊ စစ်ရေးပြတာ၊ တပ်ရင်းတာဝန်ရှိသူက မိန့်ခွန်းပြောကြားတာ၊ ဆုရ သင်တန်းသူ/သားတွေကို ဆုချီးမြှင့်တာစတဲ့ အစီစဉ်တွေနဲ့ ပြုလုပ်ခဲ့တယ်လို့ သိရပါတယ်။

စစ်ကိုင်း၊ ဖေဖော်ဝါရီ ၉၊ ၂၀၂၃။

စစ်ကိုင်းတိုင်း၊ ပုလဲမြို့နယ်၊ သာစည်ကျေးရွာက အမျိုးသမီး ၂ ဦး ဖေဖော်ဝါရီ ၉ ရက် မနက် ၇ နာရီမှာ လယ်ပြင်ထဲ မြေပဲသိမ်းနေချိန် တိုက်မိုင်းထိမိခဲ့တာကြောင့် တဦးမှာ ခြေထောက်တဖက် ဖြတ်လိုက်ရတယ်လို့ သိရပါတယ်။

ဒဏ်ရာရသူ ၂ ဦးမှာ မခိုင်မာဝင်း ၁၉ နှစ်နဲ့ မခိုင်မာလင်း ၁၆ နှစ်တို့ဖြစ်ပြီး မခိုင်မာလင်းက ဝမ်းဗိုက်ကိုပဲ မိုင်းစထိခဲ့ပေမယ့် မခိုင်မာဝင်းကတော့ ညာဖက် ခြေထောက် ခြေကျင်းဝတ်ကနေ ဖြတ်လိုက်ရတယ်လို့ Pale Joker PDF မှ တာဝန်ရှိသူက ပြောပါတယ်။

“မိုင်းကို အကြီးဖြစ်သူက နင်းမိတာ။ အတူတူ သီးနှံကောက်နေကြတာဆိုတော့ နှစ်ယောက်လုံးကို ထိသွားတာ။ မိုင်းကတော့ စကစတွေ ထောင်ထားတဲ့ မိုင်းပါ။ ဘာဖြစ်လို့လဲဆိုတော့ လယ်ပြင်က ကန့်ဒေါင့်ရဲစခန်းနဲ့ ၂ ဖာလုံလောက်ပဲ ဝေးတယ်” လို့ ဆိုပါတယ်။

လက်ရှိမှာ သူတို့ ညီအစ်မ၂ ဦးကို မြိုင်မြို့နယ်ဘက်က တော်လှန်ရေးဆေးရုံတရုံမှာ အချိန်မီ ဆေးကုသမှု ခံယူခဲ့ရတာကြောင့် အသက်အန္တရာယ် စိုးရိမ်စရာ မရှိတော့ဘူးလို့လည်း ဆိုပါတယ်။

သာစည်ကျေးရွာနဲ့ ၃ ဖာလုံခန့်သာဝေးတဲ့ ကန့်ဒေါင့်ကျေးရွာမှာ ရဲစခန်းရှိပြီး စစ်ကောင်စီနဲ့ ပျူစောထီးတွေ တပ်စွဲအထိုင်ချထားတဲ့ ကျေးရွာတရွာ ဖြစ်ပါတယ်။

မြေလတ်အသံ၊ ဖေဖော်ဝါရီ ၇၊ ၂၀၂၃။

စစ်ကောင်စီရုံးစိုက်ရာ နေပြည်တော်ကောင်စီနယ်မြေ၊ ဇေယျာသီရိမြို့နယ်၊ စစ်ကောင်စီတပ် စစ်ရုံးချုပ်အတွင်းက စစ်ဘက်ရေးရာလုံခြုံရေးတပ်ဖွဲ့အရာရှိချုပ်ရုံး(စရခ)မှာ တာဝန်ထမ်းဆောင်နေတဲ့ အမျိုးသမီးတပ်ကြပ်ကြီး/စာရေး ၂ ဦး အခုလ ဖေဖော်ဝါရီလဆန်းပိုင်းက ထွက်ပြေးသွားတယ်လို့ သိရပါတယ်။

အဲ့ဒီ တပ်ကြပ်ကြီး/ စာရေးအမျိုးသမီး ၂ ဦးဟာ စစ်ကောင်စီတပ် စစ်ဘက်ရေးရာလုံခြုံရေးတပ်ဖွဲ့အရာရှိချုပ်ရုံး(စရခ )ရုံးရဲ့ ထိပ်တန်းလျှို့ဝှက် အချက်အလက်တွေ ထိန်းသိမ်းထားတဲ့ဌာနမှာ တာဝန်ထမ်းဆောင်သူတွေဖြစ်ပြီး သူတို့နောက်ကို စစ်ကောင်စီတပ်ရဲ့ အရေးကြီးအချက်အလက်တွေ ပါသွားတယ်လို့ ယူဆပြီး စစ်ခေါင်းဆောင်တွေက တွေ့တဲ့နေရာမှာ ပစ်သတ်ဖို့ နိုင်ငံအနှံ့ တပ်တွေကို ညွှန်ကြားထားတယ်လို့ ဆိုပါတယ်။

“၁ လပိုင်း လစာထုတ်ပြီး နောက်ရက်မှာ ပြေးသွားတာ၊ အစောပိုင်းမှာ သူတိုကိုလိုက်ပြီး ဆက်သွယ်ပြန်ခေါ်သေးတယ်။ ဘယ်လိုမှ ရှာမရတော့ ခွင့်မဲ့ကြေငြာပြီး တွေ့တဲ့နေရာမှာ ပစ်သတ်ဖို့ထိ ညွှန်ကြားထားတယ်လို့ သိရတယ်။ သူတို့ (တပ်ကြပ်ကြီး/စာရေးမ ၂ ဦး)က စရခရုံး ရဲ့ အရေးကြီးထိပ်တန်းလျှို့ဝှက်တွေ ထိန်းထားတဲ့ဌာနမှာ တာဝန်ထမ်းဆောင်ခဲ့တာဆိုတော့ အရေးကြီး အချက်အလက်တွေ ပါသွားနိုင်တယ်ဆိုပြီး အဲ့ဒီလို အမိန့်ပေးထားတာလို့ သိရတယ်။ သူတို့နောက်ကို အဲ့ဒီဒေတာတွေ ပါ၊မပါဆိုတာ ဘယ်သူမှမသိဘူး။ စစ်ခေါင်းဆောင်တွေက ထင်မြင်ယူဆချက်တွေနဲ့ သတ်ခိုင်းနေတာ” လို့ နေပြည်တော်စစ်ကောင်စီတပ် စစ်ရုံးချုပ်နဲ့ နီးစပ်တဲ့ သတင်းရင်းမြစ်တဦးက မြေလတ်အသံကို ပြောပါတယ်။

ထွက်ပြေးလွတ်မြောက်နေတဲ့ တပ်ကြပ်ကြီး/စာရေးအမျိုးသမီး ၂ ဦးဟာ အမျိုးသမီး ကွန်ပျူတာဒီပလိုမာ တပ်ကြပ်ကြီး/စာရေးသင်တန်း အမှတ်စဉ် ၃ ဆင်း တပ်ကြပ်ကြီးတွေ ဖြစ်ပြီး လက်ရှိအချိန်ထိတော့ ထွက်ပြေးလွတ်မြောက်နေဆဲ ဖြစ်တယ်လို့ သိရပါတယ်။

လက်ရှိမှာ နေပြည်တော်စစ်ရုံးအတွင်း လုံခြုံရေးပိုမိုတင်းကြပ်ထားပြီး စစ်ရုံးအတွင်းမှာရှိနေတဲ့ တပ်ကြပ်ကြီး/စာရေးအမျိုးသမီးတွေထားရှိတဲ့ အပျိုဆောင်ကိုလည်း မကြာခဏ လူစစ်ဆေးမှုတွေ လုပ်ဆောင်နေတယ်လို့ သိရပါတယ်။

စစ်ကောင်စီတပ်ရဲ့ စစ်ဘက်ရေးရာလုံခြုံရေးတပ်ဖွဲ့အရာရှိချုပ်ရုံး (စရခ)ဟာ စစ်ကောင်စီတပ်တခုလုံးရဲ့ နိုင်ငံအနှံ စစ်ဘက်ရေးရာလုံခြုံရေးတပ်ဖွဲ့ (စရဖ) တပ်အားလုံးကို ကွပ်ကဲနေတဲ့ ရုံးဖြစ်ပြီး စရဖတပ်တွေဟာ တော်လှန်ရေးအင်အားစုတွေရဲ့ သတင်းနဲ့ လှုပ်ရှားမှုကို အသွင်အမျိုးမျိုးနဲ့ ဖမ်းဆီးမှုတွေ လုပ်ဆောင်နေတဲ့ တပ်ဖွဲ့ဖြစ်ကာ လက်ရှိစစ်ဘက်ရေးရာ လုံခြုံရေးတပ်ဖွဲ့ အရာရှိချုပ်ဟာ စစ်ကောင်စီတွဲဖက် အတွင်းရေးမှူး ဒု-ဗိုလ်ချုပ်ကြီး ရဲဝင်းဦး ဖြစ်တယ်လို့ စစ်ဘက်သတင်းရင်းမြစ်တွေဆီက သိရပါတယ်။

စစ်ကိုင်း၊ ဖေဖော်ဝါရီ ၁၊ ၂၀၂၃။

စစ်ကိုင်းတိုင်း၊ ရေဦးမြို့နယ်၊ မူးသာကုန်းကျေးရွာထဲကို စစ်ကောင်စီတပ်က ဖေဖော်ဝါရီ ၁ ရက် ဒီနေ့နေ့လယ်လောက်မှာ လက်နက်ကြီး နဲ့ပစ်ခတ်ခဲ့တာကြောင့် အသက် ၂၀ နှစ်အရွယ်အမျိုးသမီးတဦး ကျည်ထိမှန်သေဆုံးခဲ့တယ်လို့ သိရပါတယ်။

စစ်ကောင်စီတပ်ဖွဲ့ဟာ ရေဦးမြို့နယ် တိုင်းရင်းဆေးရုံထဲကနေ လက်နက်ကြီးတွေနဲ့ ပစ်ခတ်ခဲ့တဲ့အတွက် မူးသာကုန်ရွာသားတဦးရဲ့နေအိမ်ပေါ်ကျရောက်ခဲ့ရာ မိသားစု ၄ ဦးအနက် ၃ ဦးဒဏ်ရာရပြီး ၁ ဦးမှာသေဆုံးခဲ့တာလည်း ဖြစ်ပါတယ်။

“လက်နက်ကြီးနဲ့ ရမ်းသမ်းပစ်တာကတော့ နေ့တိုင်းဆိုသလိုပါပဲ။ အရင်ကတော့ လူထိခိုက်တာမျိုးတော့ရှိတယ်။ သေတဲ့အထိတော့မဖြစ်ဖူးဘူး။ ဒီတခေါက်တော့ မိသားစုလေးဦးလည်းထိသွားတယ်။ အငယ်ဆုံးသမီးကတော့ ဆုံးသွားတယ်။ ရွာထဲကကျွဲ ၂ ကောင်လည်းထိသွားတယ်”လို့ ရေဦးဒေသခံတဦးက ပြောပါတယ်။

သေဆုံးသူနာမည်နဲ့ နောက်ဆက်တွဲအခြေအနေတွေကိုတော့ အသေးစိတ်မသိရှိရသေးပါဘူး။
ပြီးခဲ့တဲ့နှစ် မေလ ပိုင်းလောက်ကလည်း မူးသာကုန်းကျေးရွာက နေအိမ် ၄ လုံးကို စစ်ကောင်စီတပ်ဖွဲ့တွေက မီးရှို့ဖျက်ဆီးသွားခဲ့သေးတယ်လို့ သိရပါတယ်။

မကွေး၊ ဒီဇင်ဘာ ၂၈၊ ၂၀၂၂။

မကွေးတိုင်းဒေသကြီး၊ ပေါက်မြို့နယ်၊ ကျူတောကျေးရွာ၊ ယောချောင်းဘေးအနီးက ကြက်သွန်စိုက်ခင်းအတွင်း မိုင်းပေါက်ကွဲလို့ ၁ ဦးသေဆုံးပြီး ၅ ဦးဒဏ်ရာရခဲ့တယ်လို့ သိရပါတယ်။

ဒီဇင်ဘာလ ၂၇ ရက်မနေ့ကမနက် ၈ နာရီဝန်းကျင်မှာ တောင်သူဦးတင်အေးပိုင်ဆိုင်တဲ့ ကြက်သွန်စိုက်ခင်းအတွင်း ကြက်သွန်နုတ်ဖို့လာကြတဲ့ နေ့စား အမျိုးသမီးတွေ စိုက်ခင်းထဲအရောက်မှာ ဘယ်အဖွဲ့ကထောင်ထားမှန်းမသိတဲ့ မိုင်းပေါက်ကွဲခဲ့တာလို့ ဒေသခံတဦးကပြောပါတယ်။

“ဦးတင်အေးက စကစ နဲ့ပဏာစားတဲ့သူ။ ရွာမှာကို မနေတာ။ ဘယ်ရောက်နေလဲ မသိဘူး။ စီးပွားရေးကတော့ သူ့သားသမီးတွေက လုပ်ပေးတာ။ ခုမိုင်းပေါက်ကွဲလို့ ထိတဲ့သူတွေက နေ့စားအငှားလိုက်တဲ့သူတွေလို့တော့ သိရတယ်။ ဘယ်အဖွဲ့က ဘာရည်ရွယ်ချက်နဲ့ ဘယ်သူကို လုပ်လဲဆိုတာတော့မသိရဘူး”လို့ ပြောပါတယ်။

မိုင်းပေါက်ကွဲလို့ ကျူတောကျေးရွာသူ အသက် ၃၅ နှစ်အရွယ်မမူမူဌေး မှာ မိုင်းထိမှန်ဒဏ်ရာတွေနဲ့ နေရာမှာတင် သေဆုံးသွားခဲ့ပြီး၊ ဒေါ်သီတာခိုင်၊ ဒေါ်အေးစန်း၊ မဇင်မာနွယ်၊ ဒေါ်မူမူဝင်းနဲ့ ဒေါ်မာမာလွင်တို့မှာ မိုင်းစထိမှန်ဒဏ်ရာတွေ ရရှိခဲ့တယ်လို့ ဆိုပါတယ်။

မိုင်းထိမှန်ဒဏ်ရာရသူတွေနဲ့ သေဆုံးသူကိုတော့ ဒေသလူမှုကူညီရေးအသင်းကားတွေနဲ့တင်ပြီး ပေါက်ဆေးရုံနဲ့ ပခုက္ကူဆေးရုံကို ပို့ထားရတယ်လို့ သိရပါတယ်။

ဒီမိုင်းပေါက်ကွဲတာနဲ့ပတ်သက်ပြီး PDF တွေကို နာမည်ဖျက်ဖို့ ပျူစောထီးအဖွဲ့တွေက လုပ်ဆောင်ခဲ့တာဖြစ်နိုင်တယ်လို့ ပြောဆိုမှုတွေရှိနေပေမယ့် ဘယ်အဖွဲ့အစည်းကအမှန်တကယ်လုပ်တာလဲကိုတော့ မြေလတ်အသံက အတည်မပြုနိုင်သေးပါဘူး။

ပေါက်မြို့နယ်၊ ကျူတောကျေးရွာဘက်မှာတော့ အခုလို မိုင်းပေါက်ကွဲတာကြောင့် ဒေသခံတွေထိခိုက်သေဆုံးတာ ပထမဆုံးအကြိမ်ဖြစ်တယ်လို့ သိရပါတယ်။

မကွေး၊ ဒီဇင်ဘာ ၂၆၊ ၂၀၂၂။

မကွေးတိုင်းဒေသကြီး၊ ပခုက္ကူမြို့ အမှတ်(၆)ရပ်ကွက်၊ ၁၀ လမ်းနဲ့ ၁၁ လမ်းကြားမှာ ငွေတိုးချေးစားသူ အမျိုးသမီး ၁ ဦး ပစ်ခတ်ခံရပြီး သေဆုံးသွားတယ်လို့ သိရပါတယ်။

ဒီဇင်ဘာလ ၂၅ ရက်နေ့ ညနေ ၃ နာရီခန့်မှာ အမှတ်(၆)ရပ်ကွက်၊ မြိုင် ၉ လမ်းနေ ဒေါ်မြင့် ၆၃ နှစ်ကို သေနတ်သမားတွေက နေအိမ်ကနေခေါ်သွားပြီး ပစ်သတ်ခဲ့တာဖြစ်တယ်လို့ ဒေသခံတဦးက ပြောပါတယ်။

“သိရသလောက်က သူကဒလန်ဆိုပြီးလည်း သတင်းထွက်နေတယ်။ ငွေတိုးလဲချေးစားတယ်။ လမ်းမှာပစ်ခတ်ခံရတာ။ ပစ်ခတ်ခံရတဲ့နေရာမှာဘဲ သေနေတာ။ ပုဂ္ဂိုလ်ရေး မကျေနပ်ချက်ကြောင့်လား ဘာကြောင်ပစ်သတ်ခံရတယ်ဆိုတာတော့ အတိအကျမပြောနိုင်ဘူး” လို့ ပြောပါတယ်။

သေနတ်နဲ့ပစ်ခတ်ခံရလို့ ဒေါ်မြင့်မှာ ယာလက်မောင်း၊ ဝဲဘက်ကျော၊ ယာဝမ်းဗိုက်တွေမှာ ကျည်ဖောက်ဝင်ဒဏ်ရာတွေရပြီး သေဆုံးသွားတယ်လို့ ဆိုပါတယ်။

ဖြစ်စဉ်ဖြစ်ပွားပြီးနောက်မှာတော့ စစ်ကောင်စီတပ်ဖွဲ့တွေရောက်လာပြီး စစ်ဆေးမှုတွေပြုလုပ်ကာ အလောင်းကို ပခုက္ကူဆေးရုံကို ယူဆောင်သွားတယ်လို့ သိရပါတယ်။

ညပိုင်းမှာတော့ စစ်ကောင်စီတပ်ဖွဲ့ဟာ အမှတ်(၅)၊ အမှတ်(၆)ရပ်ကွက်တွေကို ဧည့်စာရင်းစစ်တာတွေ ပြုလုပ်ခဲ့တယ်လို့ ဆိုပါတယ်။

အခုဖြစ်စဉ်နဲ့ပတ်သက်ပြီး ဘယ်အဖွဲ့က ဘာကြောင့်လုပ်တယ်ဆိုတာ ထုတ်ပြန်ထားတာမရှိသေးပါဘူး။

ဒီဇင်ဘာလ ၃ ရက်နေ့လည်ပိုင်းမှာလည်း အမှတ်(၃)ရပ်ကွက် အုပ်ချုပ်ရေးမှူး ဦးဇော်ဌေးနေအိမ်ကို လူငယ် ၂ ဦးကဝင်လာပြီး ဓါးနဲ့ထိုးခုတ်လို့ အုပ်ချုပ်ရေးမှူး ဦးဇော်ဌေး ဒဏ်ရာရကာ အုပ်ချုပ်ရေးမှူးရဲ့ မိတ်ဆွေ ဓားဒဏ်ရာကြောင့်သေဆုံးသွားခဲ့ပါသေးတယ်။

မြေလတ်အသံ၊ အောက်တိုဘာ ၁၇၊ ၂၀၂၂။

ရခိုင်ပြည်နယ်၊ အမ်းမြို့နယ်၊ မွှားကျေးရွာအုပ်စု၊ ဟင်းရွက်ကျေးရွာက စားသောက်ကုန်အရောင်းဆိုင်ပိုင်ရှင် အမျိုးသမီးတဦးကို အောက်တိုဘာလ ၁၆ ရက် မနေ့က မနက် ၇ နာရီ လောက်မှာ စစ်ကောင်စီက ဖမ်းဆီးသွားခဲ့တယ်လို့ သိရပါတယ်။

ဖမ်းဆီးခံရသူမှာ ဒေါ်မညို ၄၂ နှစ် ဖြစ်ပြီး၊ သူ့ကို နေအိမ်မှာရှိနေစဉ် စစ်ကောင်စီတပ်သားတွေက အရပ်သားကား ၂ စီးနဲ့ လာရောက်ဖမ်းဆီးကာ အမ်းမြို့ ရဲစခန်းကို ခေါ်ဆောင်သွားခဲ့တယ်လို့ အမည်မဖော်လိုတဲ့ ဒေသခံတဦးက ပြောပါတယ်။

“သူက တယောက်တည်းနေတာ။ အပျိုကြီးပါ။ စားကုန်တွေရောင်းပြီးတော့ စီးပွားရေးလုပ်နေတာ။ သူ့ဇာတိကတော့ ရမ်းဗြဲမြို့နယ်ကပါ။ AAနဲ့လည်း ပတ်သက်တာမရှိဘူး။ အေးအေးဆေးဆေး နေတတ်သူတယောက်ပါ။ သူ့ကိုအပြန်ဆုံးပြန်လွှတ်ပေးပါလို့ တောင်းဆိုချင်ပါတယ်” လို့ ဆိုပါတယ်။

ဒေါ်မညိုကို စစ်ကောင်စီက ဖမ်းဆီးသွားခဲ့ပြီးနောက် အဆက်အသွယ်လုံးဝမရတော့တာကြောင့်လည်း စိုးရိမ်နေကြရတယ်လို့ မိသားစုဝင်တွေက ပြောပါတယ်။

အလားတူ ပြီးခဲ့တဲ့ အောက်တိုဘာလ ၇ ရက် မှာလည်း ဟင်းရွက်ကျေးရွာနဲ့ မိုင်ဝက်သာသာဝေးတဲ့ တလိုင်းတောင်ကျေးရွာက အရပ်သားဆေးဆရာ ဦးအောင်ဆန်းကို စစ်ကောင်စီတပ်သားတွေက ဖမ်းဆီးသွားခဲ့သေးတယ်လို့ ကျေးရွာဒေသခံတွေက ပြောပါတယ်။

ဒါ့အပြင် အောက်တိုဘာလ ၁၄ ရက် မနက်ပိုင်းမှာလည်း ကဇုကိုင်းကျေးရွာအုပ်စုရဲ့ ULA တိုက်နယ်မှူး ဦးဗြားကြီး (ခ) ဦးမျိုးမြင့်ဇော် ၄၀ နှစ် ကို စစ်ကောင်စီက ပစ်ခတ်ဖမ်းဆီးခဲ့ပြီးနောက် ညနေပိုင်းမှာပဲ သတ်ဖြတ်လိုက်တယ်လို့ မြေပြင်သတင်းရင်းမြစ် တဦးက မြေလတ်အသံကို ပြောဆိုခဲ့ပါတယ်။

မြေလတ်အသံ၊ သြဂုတ် ၂၄၊ ၂၀၂၂။

တိုက်ပွဲများဖြစ်နေသည့် ချင်းပြည်နယ်၊ ပလက်ဝမြို့နယ်၊ အဘောင်သားကျေးရွာမှ အမျိုးသမီးတဦးမှာ ၄ ရက်ကြာပျောက်ဆုံးနေသည့် လင်ယောင်္ကျားကို ရှာနေစဉ် ယနေ့ဩဂုတ် ၂၄ ရက်နေ့တွင် မိုင်းနင်းမိကာ သေဆုံးသွားခဲ့သည်ဟု သိရသည်။

သေဆုံးခဲ့သူမှာ ဒေါ်နန်လောင်ခမ်း ၄၃ နှစ်ဖြစ်ပြီး လင်ဖြစ်သူမှာ ဦးအေးခိုင်ဖြစ်သည်။ ၎င်းမှာ ရွာနှင့်တဖာလုံခန့်ကွာဝေးသည့် ချောင်းတဖက်ကမ်းရှိ လယ်ပြင်တွင် သေဆုံးနေခဲ့ခြင်းဖြစ်သည်ဟု ကျေးရွာသားတဦးက ပြောသည်။

“သူ့မှာ ခြေထောက်တွေ၊ လက်တွေ အကုန်လုံးပြတ်သွားပါတယ်။ သွေးထွက်လွန်သွားပြီးသေတာ။ အရမ်းသနားဖို့ကောင်းပါတယ်။ လင်ကိုတွေ့မယ်ဆိုပြီးတော့ သွားရှာတာ။ အခုတော့ သူလည်း သေရရှာတယ်။ အခုတော့ သားနှစ်ယောက်နဲ့သမီးငယ်တဦးကျန်ခဲ့ပါတယ်။” ဟုဆိုသည်။

ပျောက်ဆုံးနေသူ ဦးအေးခိုင်မှာ အဘောင်သားရွာ ၏မူလတန်း(လွန်)ကျောင်းတွင် တာဝန်ထမ်းဆောင်နေသည့် ကျောင်းအုပ်ကြီးတဦးဖြစ်သည်။ ၎င်းမှာ ဩဂုတ် ၂၁ ရက်နေ့တွင် ပျောက်ဆုံးသွား ခြင်းဖြစ်သည်။

လက်ရှိအချိန်ထိ ဦးအေးခိုင်မှာ ကျေးရွာသားများနှင့် အဆက်အသွယ်မရှိသေးကြောင်း၊ မည်သို့ မည်ပုံ ပျောက်ဆုံးသွားသည်ကိုလည်း မသိရှိရသေးကြောင်း ကျေးရွာသားများကဆိုသည်။

ပြီးခဲ့သည့် မေလ ၂၆ ရက်နေ့၊ နေ့လယ်ပိုင်းတွင်လည်း စစ်ကောင်စီက အဘောင်သားကျေးရွာမှ အုပ် ချုပ်‌ရေးမှူး ဦးသာထွန်းအောင်နှင့် ဆယ်အိမ်မှူး ဦးအောင်ထွန်း၊ ဦးသာနီအောင်တို့ကို ဖမ်းဆီးခေါ်ဆောင်သွားခဲ့သည်။

ယင်းနောက် ဆယ်အိမ်မှူးများကိုပြန်လွှတ်ပေးခဲ့သော်လည်း အုပ်ချုပ်ရေးမှူးကိုမှု ဖမ်းဆီးတရားစွဲဆိုထားခဲ့သည်။