မြိုင်၊ ဇွန် ၁၅၊ ၂၀၂၅။

မကွေးတိုင်း၊ မြိုင်မြို့နယ်အနောက်မြောက်ရှိ သန်းနုတောရွာကို စစ်ကောင်စီတပ်က စက်တပ်လေထီးနဲ့ ဗုံးကြဲတိုက်ခိုက်ခဲ့တာကြောင့် ၆ ဦးထိခိုက်ဒဏ်ရာရပြီး အိမ် ၂ လုံးပျက်စီးခဲ့တယ်လို့ ဒေသတွင်းအခြေအနေတွေကိုသိရှိထားသူတွေဆီက သိရပါတယ်။

ဇွန် ၁၅ ရက်နေ့လယ် ၂ နာရီဝန်းကျင်မှာ စစ်ကောင်စီရဲ့စက်တပ်လေထီး ၂ စီးနဲ့ဗုံး ၂ လုံးကြဲချတိုက်ခိုက်ခဲ့တာကြောင့် သန်းနုတောရွာနေ အမျိုးသား ၂ ဦးနဲ့ အမျိုးသမီး ၄ ဦးသေဆုံးခဲ့တာလို့ ဆိုပါတယ်။

“အမျိုးသား ၂ ဦး အမျိုးသမီး ၄ ဦးဒဏ်ရာရတယ်၊ အမျိုးသမီး ၂ စိုးရိမ်ရ။ အိမ် ၂ လုံးပျက်တယ်။ စပါးကျီ ၁ လုံးပျက်တယ်။ ခိုင်းနွား ၂ ကောင်သေတယ်။”လို့ မြိုင်မြို့နယ်အတွင်းကအခြေအနေတွေကို တင်ပြပေးနေတဲ့ We Love Myaing အဖွဲ့မှ တာဝန်ရှိသူက ပြောပါတယ်။

သန်းနုတောကျေးရွာဟာ မြိုင်မြို့နဲ့ ၅ မိုင်ခန့်အကွာမှာရှိပြီး ခုလိုလေကြောင်းကနေဗုံးကြဲတိုက်ခိုက်ခံရတာ ပထမဆုံးအကြိမ်ဖြစ်တယ်လို့ သိရပါတယ်။

“ပါရာမော်တာ ၂ စီးနဲ့ ၂ လုံးကြဲတာ၊ အကြောင်းမဲ့ကြဲတာ။ မြိုင်အနောက်မြောက်ဘက် တအား မဝေးဘူး။ အဲ့ဒီရွာကိုတော့ ပထမဆုံးပေါ့။ အဲ့ဒီဘက်အပိုင်းကတော့ ပထမဆုံးမဟုတ်ဘူးဗျ။ မြိုင်နယ်က တနယ်လုံး ပတ်ကြဲခံနေရတာဆိုတော့။”လို့ အထက်ပါတာဝန်ရှိသူက ဆိုပါတယ်။

ပြီးခဲ့တဲ့ မေ ၂၄ ရက်ကလည်း မြိုင်မြို့နယ်၊ အိုရင်းကျေးရွာကို တိုက်ပွဲဖြစ်ဖြစ်တာမရှိဘဲ ဂျက်ဖိုက်တာနဲ့ ဗုံးကြဲတိုက်ခိုက်ခဲ့ရာ ဒေသခံ ၁ ဦး ဒဏ်ရာရရှိပြီးနေအိမ် ၃ လုံးပျက်စီးခဲ့ပါတယ်။

စာတည်း – လင်း

မြိုင်၊ မေ ၂၄၊ ၂၀၂၅။

မကွေးတိုင်း၊ မြိုင်မြို့နယ်၊ အိုရင်းရွာကျေးရွာကို စစ်ကောင်စီတပ်က မေ ၂၄ ရက် ဒီမနက် ၇ နာရီကျော်မှာ လေကြောင်းကနေ ဗုံးကြဲတိုက်ခိုက်ခဲ့တာကြောင့် အမျိုးသမီး ၂ ဦး ဒဏ်ရာရရှိခဲ့တယ်လို့ ဒေသခံတွေကပြောပါတယ်။

အိမ်ခြေ ၅၀၀ ကျော်ရှိတဲ့ အိုရင်းရွာရဲ့အရှေ့မြောက်ဘက်ရှိ လူနေအိမ်တွေပေါ် တိုက်ခိုက်ရေး လေယာဥ် ၁ စီးနဲ့ ဗုံးသီး ၂ လုံး ကြဲချခဲ့တာကြောင့် အသက် ၁၉ နှစ်အရွယ် အမျိုးသမီး ၁ ဦးနဲ့ ၇၀ အရွယ်အမျိုးသမီး ၁ ဦးတို့ ဒဏ်ရာရခဲ့ကြတာပါ။

“ဒဏ်ရာရသူတွေက အမျိုးမတော်ဘူး။ မီးလောင်ဗုံး ၂ လုံးကြဲတာ။ အိမ်ကတော့ ၃ လုံးပျက်စီးတယ်။ ဒဏ်ရသူတွေက တယောက်တအိမ်ပေါ့နော်။အစတွေမှန်သွားကြတာ။ စိုးရိမ်စရာတော့မရှိပါ”လို့ မြိုင်ဒေသခံဖြစ်သူ မြိုင်ဒေါင်းမင်းကပြောပါတယ်။

စစ်ကောင်စီတပ်က အိုရင်းကျေးရွာအနီးမှာ တိုက်ပွဲဖြစ်တာမရှိဘဲ ဗုံးကြဲတိုက်ခိုက်လာတာဖြစ်ပြီး ကျေးရွာနေပြည်သူတွေကတော့ ဗုံးကြဲချိန်ထွက်ပြေးခဲ့ကြပေမယ့် ဗုံးကြဲပြီးနောက် ကျေးရွာထဲကို ပြန်ဝင်လာခဲ့ကြပြီလို့ မြိုင်ဒေါင်းမင်းက ဆိုပါတယ်။

ပြီးခဲ့တဲ့မေ ၂၀ ရက်ကလည်း ဗဟင်းကျေးရွာရှိ ထမင်းဆိုင်ကို ပေါင် ၃၀၀ ဗုံး ၁ လုံး ကြဲချတိုက်ခိုက်ခဲ့ရာ ထမင်းဆိုင်တွင်းရှိနေတဲ့ PDF တပ်ဖွဲ့ဝင် ၄ ဦးနဲ့ ထမင်းဆိုင်ရှင် သားအမိ ၂ ဦးတို့ နေရာမှာပဲသေဆုံးခဲ့တယ်လို့ ဒေသခံတွေဆီကသိရပါတယ်။

ဒါ့အပြင် မေ ၁၉ ရက် ည ၈ နာရီခန့်မှာလည်း မြိုင်နယ်အရှေ့မြောက်ဘက်တောတိုက်ထဲ ဂျက်ဖိုက်တာနဲ့ လေကြောင်းတိုက်ခိုက်ခဲ့တာကြောင့် စစ်ဘေးရှောင် အမျိုးသမီး ၁ ဦး ထိခိုက်ဒဏ်ရာရခဲ့ပါသေးတယ်။

၂၀၂၁ စစ်အာဏာသိမ်းချိန်ကနေ ၂၀၂၅၊ မေ ၂၃ ရက်အထိ စစ်ကောင်စီနဲ့ ၎င်းတို့ရဲ့လက်ပါးစေတွေကြောင့် သေဆုံးခဲ့တဲ့အရပ်သားပြည်သူစုစုပေါင်း ၆,၇၂၁ ဦးရှိခဲ့တယ်လို့ နိုင်ငံရေးအကျဥ်းသားများ ကူညီစောင့်ရှောက်ရေးအသင်း – AAPP က ထုတ်ပြန်ပါတယ်။

စာတည်း – လင်း

မြေလတ်အသံ၊ မေ ၂၁ ၊ ၂၀၂၅ ။

မကွေးတိုင်း၊ မြိုင်မြို့နယ်၊ ဗဟင်းကျေးရွာမှာ လေယာဉ်နဲ့ဗုံးကြဲခံရပြီး PDF တပ်ဖွဲ့ဝင် ၄ ဦး အပါ ၆ ဦးထက်မနည်း သေဆုံးခဲ့ပြီး ၁၀ ဦးကျော်ဒဏ်ရာရရှိခဲ့တယ်လို့ ဒေသခံတွေထံက သိရပါတယ်။

မေ ၂၀ ရက် ညနေ ၅ နာရီခန့်မှာ ဗဟင်းကျေးရွာရှိ ထမင်းဆိုင်ကို ပေါင် ၃၀၀ ဗုံး ၁ လုံး ကြဲချတိုက်ခိုက်ခဲ့ရာ ထမင်းဆိုင်တွင်းရှိနေတဲ့ PDF တပ်ဖွဲ့ဝင် ၄ ဦးနဲ့ ထမင်းဆိုင်ရှင် သားအမိ ၂ ဦး နေရာမှာပဲ သေဆုံးခဲ့တယ်လို့ ဆိုပါတယ်။

“တချို့အလောင်းတွေက တစစီဖြစ်သွားတာကြောင့် တိကျမှုတော့ မရှိဘူး။ ၁၀ ဦးထက်လည်း ကျော်နိုင်တယ်”လို့ ဒေသတွင်းသတင်းရင်းမြစ်ထံမှသိရပါတယ်။

လေယာဉ်ဗုံးကြဲခံရမှုကြောင့် ထမင်းဆိုင်အတွင်းရှိနေတဲ့ ယင်းမာပင်ခရိုင်အမှတ် ၁၂ တပ်ရင်းမှ တပ်ခွဲမှူး ဇော်မြတ်၊ တပ်ဖွဲ့ဝင် မွန်း၊ ဒေးဗစ် ၊ လင်းယုန်တို့ ကျဆုံးခဲ့တယ်လို့ အဆိုပါတပ်ရင်းတာဝန်ခံက အတည်ပြုပြောပါတယ်။

“ ယင်းမပင်ခရိုင် အမှတ်၁၂တပ်ရင်း၊ တပ်ခွဲ ၃ က ရဲဘော်တွေ အစည်းဝေးတခုကိုသွားပြီးအပြန် ထမင်းဆိုင်မှာဝင်နားတဲ့အချိန်မှာ AS(လေကြောင်းတိုက်ခိုက်ခံရ) အလုပ်ခံရတယ်ပေါ့။” လို့ ယင်းမာပင်ခရိုင်အမှတ် ၁၂ တပ်ရင်းက ပြည်သူ့လုံခြုံရေးတာဝန်ခံက ပြောပါတယ်။

ဒါ့အပြင် ထမင်းဆိုင်ပိုင်ရှင် အမျိုးသမီးနဲ့ ၎င်းရဲ့သားဖြစ်သူတို့လည်း သေဆုံးခဲ့တာကြောင့် စုစုပေါင်း ၆ ဦးသေဆုံးခဲ့ပြီး ရုပ်အလောင်းရှာဖွေမရ၊ အတည်ပြုမရတာတွေကြောင့် သေဆုံးသူပိုများနိုင်တယ်လို့ ဒေသခံတွေက ပြောဆိုပြီး ထမင်းဆိုင်ရှင် မိသားစုဝင် ၃ ဦးအပါ ဒေသခံ ၁၀ ဦးထက်နည်း ဒဏ်ရာရရှိတယ််လို့ ဒေသခံတွေက ပြောပါတယ်။

စစ်ကောင်စီတပ်ဟာ လေကြောင်းပစ်မှတ်နေရာတွေကို တိုက်ရိုက်ကြဲချတိုက်ခိုက်တာ မဟုတ်ဘဲ အခြားမြို့နယ်တွေအပေါ်လှည့်ပတ်ပျံသန်းပြီးမှ ပြန်လည် တိုက်ခိုက်ခဲ့တာကြောင့် ပြည်သူများအနေဖြင့် ပိုသတိထားသင့်တယ် ဒေသခံတဦးက ပြောပါတယ်။

“ အခုလာတဲ့လေယဉ်တွေက ချောင်းဦး၊ ဆားလင်းကြီး၊ ပုလဲ၊ ပုံတောင်၊ ထီးလင်း အဲ့ဘက်ထိအောင်သွားပြီး ပြန်လာကာမှ ခုမြိုင်ဘက်ကိုချတာ။ ဟိုမှာမချခဲ့ဘဲ မျက်လှည့်ပြပြီးချတဲ့ပုံစံ လုပ်ပြီးချတာ။”လို့ ၎င်းက ဆိုပါတယ် ။

မေ ၁၉ ရက် ည ၈ နာရီခန့်မှာလည်း မြိုင်နယ်အရှေ့မြောက်ဘက်တောတိုက်ထဲ ဂျက်ဖိုက်တာနဲ့ လေကြောင်းတိုက်ခိုက်မှုသွားခဲ့တာကြောင့် အမျိုးသမီး ၁ ဦးထိခိုက်ဒဏ်ရာရခဲ့ပါသေးတယ်။

စာတည်း – ဟိန်းစံ

မြေလတ်အသံ၊ မေ ၁၃၊ ၂၀၂၅။

မကွေးတိုင်း၊ မြိုင်မြို့နယ်အတွင်းရှိ စာသင်ကျောင်းတွေ ယာယီပိတ်သိမ်းထားဖို့ မြို့နယ်ပညာရေးဘုတ်အဖွဲ့က မေ ၁၂ ရက် ယမန်နေ့မှာ သတိပေးထုတ်ပြန်ပါတယ်။

စစ်ကောင်စီက စာသင်ကျောင်းတွေကို လေကြောင်းကနေတိုက်ခိုက်နေတာကြောင့် အခုလိုပိတ်သိမ်းဖို့ သတိပေးထုတ်ပြန်ခဲ့တာဖြစ်ပြီး NUG ပညာရေးဝန်ကြီးဌာန၊ မြိုင်ပညာရေးဘုတ်အဖွဲ့ လက်အောက်ကျောင်းတွေအားလုံးပါဝင်တယ်လို့ သိရပါတယ်။

“ ကျောင်းတွေပိတ်ထားရမယ်အခုနေတော့ လုံခြုံရေးအဆင်ပြေလောက်မှ ပြန်ဖွင့်ရမယ့် အနေအထားရှိတယ်။ မနေ့ကဖြစ်စဉ်နဲ့ပတ်သက်ပြီးပြောစရာ စကားမရှိလောက်အောင်ပါပဲ” လို့ မြိုင်မြို့နယ်ကသင်ကြားရေးကျောင်းကဆရာတဦးက မြေလတ်အသံကို ပြောပါတယ်။

စစ်ကိုင်းတိုင်း၊ ဒီပဲယင်းမြို့နယ်၊ အိုးထိမ်းတွင်းကျေးရွာစာသင်ကျောင်းကို မေ ၁၂ ရက် မနက် ၉ နာရီခွဲမှာ စစ်ကောင်စီတပ်ကလေကြောင်းကနေ ပေါင် ၅၀၀ ဗုံးနဲ့ ကြဲချတိုက်ခိုက်ခဲ့တာကြောင့် စာသင်ဆောင်အတွင်းရှိ ဆရာမ ၂ ဦး ၊ကျောင်းသားကျောင်းသူ ၂၀ ဦး သေဆုံးပြီး ၄၀ ကျော်ထိခိုက်ဒဏ်ရာရခဲ့ပါတယ်။

အဲ့ဒီလိုစာသင်ကျောင်းတွေကို လေယာဥ်နဲ့ဗုံးကြဲချနေတာကြောင့် မြိုင်မြို့နယ်အတွင်းကကျောင်းတွေ လေကြောင်းအန္တရာယ်ရှောင်ရှားစေနိုင်ဖို့ အခုလိုသတိပေးထုတ်ပြန်ခဲ့တာလို့ ဆိုပါတယ်။

“ လူမဆန်တဲ့သူတွေကိုလူမဆန်ဘူးပြောနေလည်း အပိုပဲမို့ ဘာမှမပြောချင်တော့ပါဘူး” လို့ မြိုင်မြို့နယ်ပညာရေးဘုတ်အဖွဲ့ဝင်တဦးက ပြောပါတယ်။

မြိုင်မြို့နယ်အတွင်းက NUG ပညာရေးဝန်ကြီးဌာနလက်အောက် ကြားကာလစာသင်ကျောင်းတွေရဲ့ စတုတ္တမြောက်စာသင်နှစ်ကို ဧပြီလတတိယအပတ်အတွင်းက စတင်ကာ ဖွင့်လှစ်သင်ကြားပေးနတာဖြစ်ပြီး လေကြောင်းအန္တရာယ်အပေါ်မူတည်ပြီး ကျောင်းတခုနဲ့တခု ဖွင့်လှစ်တဲ့ရက်တွေ မတူကြဘူးလို့ ၎င်းက ပြောပါတယ်။

စာတည်း – ဟိန်းစံ