ပခုက္ကူ ၊ မေ ၁ ၊ ၂၀၂၅။

မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့နယ်အတွင်းမှာ Local တပ်ဖွဲ့ ၅ ဖွဲ့ က ရဲဘော်တွေကိုစုဖွဲ့ပြီး အပတ်စဥ် ၁ အဖြစ် မွမ်းမံသင်တန်းပေးကာ သင်တန်းဆင်းပွဲကိုပါပြုလုပ်ခဲ့တယ်လို့ Earthquake People Defence Force ဆီက သိရပါတယ်။

အဆိုပါသင်တန်းကို ပခုက္ကူခရိုင်အတွင်းစစ်ရေးအရှိန်မြှင့်တင်ဖို့ရည်ရွယ်ကာ Earthquake People’s Defence Force၊ Thurain TR၊ Hunter Pakokku၊ Six Senses Guerrilla Force၊ Justice Revolution Force စတဲ့ တပ်ဖွဲ့ ၅ ဖွဲ့ ကရဲဘော် ၄၀ ဝန်းကျင်ကို မတ် ၁၀ ရက်ကနေဧပြီ ၂၅ ရက်နေ့အထိ ၄၅ ရက်ကြာသင်တန်းပေးခဲ့ပြီး ပခုက္ကူခရိုင် Local တပ်ရင်းအဖြစ်ဖွဲ့စည်းခဲ့တာလို့ ဆိုပါတယ်။

သင်တန်းအတွင်းမှာ စစ်ပညာသင်တန်းအပြင် နိုင်ငံရေး သင်ခန်းစာ၊ COC နှစ်ရပ်၊ ပြည်သူ့စစ်မဟာဗျူဟာ နဲ့စစ်ဘက်ဆိုင်ရာ ခေါင်းဆောင်မှု စတဲ့သင်ခန်းစာတွေကို သင်ကြားပေးခဲ့တယ်လို့ Earthquake People Defence Force ရဲဘော်တဦးက ပြောပါတယ်။

“တပ်ရင်း ၅ ရင်းစုဖွဲ့ပြီးတော့ သင်တန်းပေးရတာက စစ်တပ်ကိုတိုက်မယ်ဆိုရင် စစ်တပ်တခုလိုမျိုးဖြစ်နေမှရမှာ၊ အဖွဲ့တွေအများကြီးကွဲနေရင် ရှေ့ကိုရောက်သင့်သလောက် မရောက်နိုင်ဘူး၊ အဖွဲ့တွေပေါင်းပြီးတော့ တပ်တခုထဲဖြစ်ရင် အရွေ့တခုကိုရောက်နိုင်မယ်လို့ မျှော်မှန်းပြီးတော့ လုပ်ဆောင်တာဖြစ်တယ်”လို့ Earthquake People Defence Force ရဲဘော်တဦးက ပြောပါတယ်။

ဒါ့အပြင် စစ်ပညာပိုင်းကို မြိုင် ပကဖ က သင်တန်းဆရာတွေက သင်ကြားပေးခဲ့ပြီး နိုင်ငံရေးဗျူဟာတွေကိုတော့ နိုင်ငံရေးသင်တန်းဆရာတဦးက ပြန်ပြီးသင်ကြားပေးခဲ့တာလို့ ဆိုပါတယ်။

သင်တန်းဆင်းပွဲအခမ်းအနားကို တာဝန်ရှိသူတွေတက်ရောက်ကာမိန့်ခွန်းပြောကြားခဲ့ပြီးသင်တန်းအတွင်း ထူးချွန်တဲ့ ရဲဘော် ၅ ဦးကို ဆုချီးမြှင့်ခဲ့တယ်လို့ သိရပါတယ်။

တည်းဖြတ် – HP

မင်းဘူး၊ ဧပြီ ၂၇၊ ၂၀၂၅။

မကွေးတိုင်း၊ မင်းဘူးမြို့နယ်၊ မကွေးတံတားမှာ စစ်ကောင်စီက လုံခြုံရေးအင်အားတိုးကာ စစ်ဆေးရေးတင်းကျပ်နေတယ်လို့ ဒေသခံတွေဆီက သိရပါတယ်။

ဧပြီ ၂၀ ရက်ကစပြီး မကွေးတံတား၊ မင်းဘူးဘက်ခြမ်းမှာ အင်အားတိုးပြီး ဖြတ်သွားဖြတ်လာယာဉ်တွေနဲ့ လူတွေကို စစ်ဆေးမှုတင်းကျပ်လာတယ်လို့ဆိုပါတယ်။

“ခုနောက်ပိုင်း အစစ်အဆေးတွေကကြမ်းတယ်။ ကျနော်တို့ ၂ ခါ ၃ ခါလောက်ကြုံဖူးတယ်။ ကားဆို အကုန်လှန်လှောစစ်တယ်။ ဘောက်တွေထဲကကောဖင်ထိုင်ခုံတွေထဲကော။ လူဆိုရင်တော့ စမတ်ကဒ်၊ ယာဉ်မောင်းလိုင်စင်၊ မှတ်ပုံတင်၊ ကားဆိုလည်းလိုင်စင်ပါမှ အဲ့လိုစစ်တာ”လို့ မြို့ခံတဦးက ပြောပါတယ်။

ယခင်က အဆိုပါဂိတ်မှာ ရဲနဲ့တပ်အင်အား ၄၀ ခန့်သာရှိပေမယ့် သင်္ကြန်နောက်ပိုင်းကာလမှ အင်အား ၈၀ ခန့်ထိရှိနေတယ်လို့ ဆိုပါတယ်။

စစ်ဆေးမှုတင်းကျပ်နေတာကြောင့် အဆိုပါတံတားမှာ နေ့စဉ်ကားအစီးရေ ၆၀ နဲ့၇၀ ကြား ပိတ်မိနေတတ်ပြီး တံတားဖြတ်နိုင်ဖို့ မိနစ် ၃၀ ကနေ ၁ နာရီကြားထိစောင့်ဆိုင်းရတယ်လို့ သိရပါတယ်။

ဒါ့အပြင် စစ်ဆေးမှု ပိုတင်းကျပ်တဲ့နေ့တွေမှာဆိုလည်း တံတားနဲ့ ၄ ဖာလုံခန်ကွာဝေးတဲ့ ထောက်ရှာပင်ကျေးရွာထိ ကားတန်းတွေပိတ်မိနေတတ်တာကြောင့် ခရီးသွားတွေနဲ့ ကုန်စည်တင်ယာဉ်တွေမှာ အချိန်ကုန်၊ လူပင်ပန်းဖြစ်ကြရတယ်လို့လည်း အထက်ပါဒေသခံကပြောပါတယ်။

သင်္ကြန်ရက်နောက်ပိုင်းမှာ စလင်း၊ မင်းဘူးမြို့နယ်တွေအတွင်းမှာ စစ်ကောင်စီဘက်က စစ်ကြောင်းထိုးတာနဲ့ နှစ်ဖက်တိုက်ပွဲတွေရှိနေတာကြောင့် စစ်ဆေးမှုပိုတင်းကျပ်လာတာ ဖြစ်နိုင်တယ်လို့ သူကသုံးသပ်ပါတယ်။

သတင်း – ကျော်ကြီး၊ စာတည်း – လင်း၊ တည်းဖြတ် – HP

စေတုတ္တရာ၊ ဧပြီ ၂၆၊ ၂၀၂၅။

မကွေးတိုင်း၊ စေတုတ္တရာမြို့နယ်၊ လုံးစွန်ကျေးရွာကို စစ်ကောင်စီတပ်က ဧပြီ ၂၄ ရက်ည ၇ နာရီကျော်မှာ လေကြောင်းကနေ ဗုံးကြဲတိုက်ခိုက်ခဲ့တာကြောင့် ရွာလုံးကျွတ်နီးပါး မီးလောင်ပြာကျသွားခဲ့တယ်လို့ မင်းဘူးခရိုင်တပ်ရင်း ၃ ဆီကသိရပါတယ်။

အိမ်ခြေ ၆၀ ကျော်ရှိတဲ့ လုံးစွန်ကျေးရွာအတွင်းကို တိုက်ခိုက်ရေးလေယာဥ် ၁ စီးနဲ့ ပေါင် ၅၀၀ ဗုံးသီး ၂ လုံးကြဲချခဲ့တာကြောင့် လူနေအိမ် ၅၂ ဆောင်မီးလောင်ပြာကျခဲ့ရတာလို့ဆိုပါတယ်။

“ရွာရဲ့အလယ်တည့်တည့်ကိုကျတာဗျ။ ဗုံးသီး ၂ လုံးက။ ထိခိုက်သေဆုံးမှုတော့မရှိဘူး။ သတင်းကြိုရထားလို့ ရွာထဲကလူတွေကို ရှောင်ခိုင်းထားတာ။ အိမ်မွေးတိရစ္တာန်တွေ သေဆုံးတာတော့ရှိတယ်”လို့ မင်းဘူးခရိုင် တပ်ရင်း ၃ မှတာဝန်ရှိသူတဦးကပြောပါတယ်။

လက်ရှိမှာ နေအိမ်မီးလောင်ပျက်စီးသွားတဲ့ ရွာခံမိသားစုတွေအနေနဲ့ ယာတဲကလေးတွေမှာ ဖြစ်သလိုခိုလှုံနေကြရတာကြောင့် စားနပ်ရိက္ခာ၊ အဝတ်အထည်တွေအရေးပေါ် လိုအပ်နေတယ်လို့ ဆိုပါတယ်။

“သူတို့(ရွာခံတွေ)ရဲ့ စိတ်ထိခိုက်တာတွေ၊ အကြောက်တရားတွေက သူတို့ကိုလွှမ်းမိုးနေတယ်။ တတ်နိုင်သလောက်တော့ ကျနော်တို့တပ်ရင်း၊ တပ်ဖွဲ့တွေက လုပ်ဆောင်ပေးနေတယ်။ လောလောဆယ်ထိတော့ မလုံလောက်ဘူး”လို့ အထက်ပါတာဝန်ရှိသူက ဆက်ပြောပါတယ်။

လုံးစွန်ကျေးရွာနဲ့ ၁မိုင်ခန့်သာကွာဝေးတဲ့ စစ်ကောင်စီတပ်ရဲ့ ဂါလံငါးသောင်းစခန်းကို ဧပြီ ၂၄ ရက်ည ၆ နာရီကျော်မှာ တော်လှန်ရေးတပ်ဖွဲ့တွေက ထိုးစစ်ဆင်တိုက်ခိုက်ခဲ့ပြီးနောက် အရေးနိမ့်နေတဲ့ စစ်ကောင်စီတပ်က ကျေးရွာကို အခုလိုဗုံးလာကြဲတာလို့ မင်းဘူးခရိုင်တပ်ရင်း ၃ တာဝန်ရှိသူက ပြောပါတယ်။

ပြီးခဲ့တဲ့ ဖေဖော်ဝါရီ ၂၃ ရက်မှာလည်း စေတုတ္တရာမြို့နယ်၊ မုံညှင်းကျေးရွာအုပ်စု၊ မုံညှင်းကျေးရွာ အနီးကို စက်တပ်လေထီး (Paramotar) နဲ့ဗုံးကြဲတိုက်ခိုက်ခဲ့တာကြောင့် ကလေး ၂ ဦးအပါအဝင် ၇ ဦးသေဆုံးခဲ့တယ်လို့ သိရပါတယ်။

သတင်း – အောင်စိုး၊စာတည်း – လင်း၊တည်းဖြတ် – HP