မြေလတ်အသံ၊ သြဂုတ် ၃၀၊ ၂၀၂၅။

စစ်ကိုင်းတိုင်း၊ ယင်းမာပင်ခရိုင်ပြည်သူ့ကာကွယ်ရေးတပ်-PDF တပ်ရင်း ၁၄ တပ်ရင်းမှူး ကိုဇေယျာဌေး ဖမ်းဆီးစစ်ဆေးခံနေရတယ်လို့ တပ်ရင်း ၁၄ နဲ့ နီးစပ်သူတွေထံက သိရပါတ​ယ်။

ဇူလိုင်လဆန်းပိုင်းက ယင်းမာပင်ခရိုင်တပ်ရင်း ၁၄-၁၅ တပ်ဖွဲ့ဝင်တချို့ မူးယစ်ဆေးဝါးတွေနဲ့အတူ ချင်းပြည်နယ်၊ ဟားခါးမြို့အတွင်းဖမ်းဆီးခံခဲ့ရတာနဲ့ပတ်သက်ပြီး အမျိုးသားညီညွတ်ရေးအစိုးရ-NUG ကာကွယ်ရေးဝန်ကြီးဌာနညွှန်ကြားချက်နဲ့ ခရိုင်ကွပ်ကဲရေးအဖွဲ့က သြဂုတ် ၂၆ ရက် ည ၇ နာရီကျော်မှာ ဖမ်းဆီးခဲ့တာလို့ ဆိုပါတယ်။

” တပ်ရင်း၁၄၊ ၁၅ ဆိုတာက တူတူပဲဗျ။ တပ်ရင်းမှူး(ဇေယျာဌေး)တဦးတည်း ကိုင်ထားတာ။ သူ့ကို MOD က ဖမ်းဝရမ်းထုတ်ထားတာကြာပါပြီ။ သူ့ကို စစ်ဆေးခံဖို့ ခဏခဏခေါ်တာရှိတယ်။ ဒါပေမယ့်သူက လာရောက်အစစ်ဆေးမခံလို့ ဖမ်းဆီးလိုက်ရတာ” လို့ ယင်းမာပင်ခရိုင်တပ်ရင်း ၁၄ နဲ့ နီးစပ်သူ တပ်ဖွဲ့ဝင်တဦးက မြေလတ်အသံကို ပြောပါတယ်။

လက်ရှိ တပ်ရင်းမှူးကို ယင်းမာပင်ခရိုင်ကွပ်ကဲရေးရုံးမှာ ဖမ်းဆီးထိန်းသိမ်းထားကာ စစ်ဆေးမှုတွေလုပ်ဆောင်နေပြီး စစ်ဆေးမှုအခြေအနေအသေးစိတ်တွေကို မသိရှိရသေးလို့ ခရိုင်ကွပ်ကဲရေးဘက်ကလည်း သတင်းထုတ်ပြန်လာတာမရှိသေးပါဘူး။

ပြီးခဲ့တဲ့ ဇူလိုင် ၈ ရက်က ယင်းမာပင်ခရိုင်တပ်ရင်း ၁၅ တပ်ရင်းမှူးထောက်ခံစာနဲ့ ဟိုင်းလပ်ကား ၂ စီး၊ တပ်ရင်း ၁၅ က တပ်ဖွဲ့ဝင် ၃ ဦး၊ ယာဥ်မောင်း ၂ ဦးလိုက်ပါကာသယ်ယူလာတဲ့ စိတ်ကြွဆေးပြား ၃ သန်းခန့်၊ ဘိန်းဖြူ ၁၁၀ ကီလိုဂရမ်ခန့်၊ သေနတ် ၂ လက်ကို Chinland Defense Force Hakha က ဟားခါးမြို့နယ်အတွင်း ဖမ်းဆီးရမိခဲ့ကြောင်း ရုပ်သံနဲ့တကွ ထုတ်ပြန်လာတာပါ။

ဖမ်းဆီးခံရစဥ်မှာ ယင်းမာပင်ခရိုင်တပ်ရင်း ၁၄-၁၅ တပ်ရင်းမှူးက တပ်ဖွဲ့မှာအသုံးပြုမယ့် လက်နက်နဲ့ ဖောက်ခွဲရေးပစ္စည်းတွေသယ်ယူဖို့ အတွက်သာ ထောက်ခံစာရေးသားပေးခဲ့တာဖြစ်ပြီး မူးယစ်ဆေးဝါးတွေသယ်ဆောင်လာတာဟာ ပုဂ္ဂလိကလုပ်ရပ်သာဖြစ်တယ်လို့ ဇူလိုင် ၈ ရက်ညနေပိုင်းမှာပဲ တပ်ရင်း ၁၅ က ထုတ်ပြန်လာပါတယ်။

ဖြစ်စဥ်နဲ့ပတ်သက်ပြီး တပ်ရင်း ၁၅ အနေနဲ့လည်း အပြည့်အဝတာဝန်ယူမှာဖြစ်သလို စုံစမ်းမှုတွေလုပ်ဆောင်နေကြောင်း၊ NUG အစိုးရရဲ့ စုံစမ်းစစ်ဆေးမှုတွေကိုလည်း ပူးပေါင်းဆောင်ရွက်မှာဖြစ်ကြောင်းဖော်ပြခဲ့တာပါ။

မူးယစ်ဆေးဝါးတွေကို သယ်ယူပို့ဆောင်မှုမှာ အဓိကတာဝန်ရှိသူတွေဟာ မောင်ဇော်လတ် (ခ) ဝင်းမော်ဦး၊ တပ်ရင်း ၁၄ တပ်ခွဲမှူး ကိုပုတီး (ခ) ကျော်မင်းဇော်တို့ ဖြစ်ပြီး ၎င်းတို့ ၂ ဦးမှာ ထွက်ပြေးတိမ်းရှောင်နေကြောင်း CDF ဟားခါးက ထုတ်ပြန်ခဲ့ကာ ဇူလိုင် ၁၂ ရက်မှာ ကိုပုတီးက မိခင်တပ်ရင်းထံ လာရောက် အဖမ်းခံခဲ့တယ်လို့ သိရပါတယ်။

စာတည်း – ဟိန်းစံ

ယင်းမာပင်၊ မေ ၃၊ ၂၀၂၅။

စစ်ကိုင်းတိုင်း၊ ယင်းမာပင်မြို့နယ်၊ ပြန်လှည့်ရွာမှာ သူနာပြုဆရာမ ၁ ဦး နဲ့ PDF တပ်ရင်းမှူး ၁ ဦး သေနတ်ဒဏ်ရာတွေနဲ့သေဆုံးမှု ဖြစ်ပွားခဲ့တယ်လို့ ဒေသခံတွေထံက သိရပါတယ်။

သေဆုံးသူတွေဟာ ဗျူဟာ ၄၂ လက်အောက် ယင်းမာပင်ခရိုင်တပ်ရင်း ၁၇ B 21 PDF တပ်ရင်းမှူး ကိုဖိုးစီ ဖြစ်ပြီး ဧပြီ ၃၀ ရက်ညပိုင်းက အထက်ပါကျေးရွာရှိ သူနာပြုဆရာမနေအိမ်ကို ရောက်ရှိလာပြီး နေအိမ်တွင်းမှာပဲ ပစ်ခတ်မှုတွေဖြစ်ပွားကာ ၂ ဦးစလုံး အခင်းဖြစ်နေရာမှာ သေဆုံးခဲ့တယ်လို့ သိရပါတယ်။

“ ကိုဖိုးစီရောက်လာတော့ (ဆရာမလေး အိမ်မှာရှိတဲ့) အဖွားကြီးက နှိုးပေးတာ၊ အဲ့လိုခေါ် ပေးပြီးတော့ (ကိုဖိုးစီက) နင့်လည်းသတ်မှာ၊ ငါ့ဟာငါလည်း သတ်သေမှာဆိုပြီးတော့ ပြောပြောဆိုဆိုလုပ်သွားတာ၊ အဖွားကြီးက တောင်းပန်တာကို မရဘူး။ ဆရာမလေးကိုတော့ နှမြောတာပေါ့ရွာက” လို့ အခင်းဖြစ်ကျေးရွာမှဒေသခံတဦးက မြေလတ်အသံကို ပြောပါတယ်။

ပစ်ခတ်မှုတွေဖြစ်ပြီးနောက် နေအိမ်တွင်း ကျည်ခွံ ၅ ခု တွေ့ရှိခဲ့ပြီး သူနာပြုဆရာမမှာ နားထင်နဲ့ ရင်အုပ်ဖောက်ဝင်ဒဏ်ရာ ၂ ချက်၊ ကိုဖိုးစည်မှာ ရင်ဘတ်ဖောက်ဝင်ဒဏ်ရာ ၂ ချက်နဲ့ အသီးသီးသေဆုံးခဲ့တာဖြစ်ကာ ပစ်ခတ်မှုတွေဟာ အခင်းဖြစ်နေအိမ်တွင်းရှိ အဖွား ၁ ဦးနဲ့ အမျိုးသမီး ၁ ဦးရှေ့မှာ ဖြစ်ပွားခဲ့တာလို့ အထက်ပါဒေသခံက ပြောပါတယ်။

သေနတ်နဲ့ပစ်သတ်ခံရသူ CDM သူနာပြုဆရာမ မဇာနည်ဝင်းဟာ ရှမ်းမြောက်ဒေသဇာတိ ဖြစ်ပြီး ယင်းမာပင်နယ်အတွင်း ဆေးခန်းတခုမှာ စေတနာ့ဝန်ထမ်းအဖြစ် ဆေးကုသပေးနေသူဖြစ်ကာ နားရက်နေအိမ်ကိုပြန်လာချိန် အခုလိုပစ်ခတ်ခံခဲ့ရတာလို့ ဆိုပါတယ်။

B21တပ်ရင်းက ရဲဘော်တဦးကလည်း ကိုဖိုးစီက အခင်းဖြစ်ရက် ည ၉ နာရီလောက် ၎င်းရဲ့စခန်းကနေ ရွာထဲကိုထွက်သွားတာကိုသိရှိထားကာ သေဆုံးမှုဖြစ်စဉ်အသေးစိတ်ကိုတော့မသိရှိဘူးလို့ ပြောပါတယ်။

“ကျနော်တို့က ပိုပြီးတော့ တိကျသေချာအောင် ရင်ခွဲရုံပို့ပြီး ဆရာဝန်ရဲ့ ဆေးစစ်ချက်ကို စောင့်နေတယ်၊ ပင်လည်ဘူးတိုက်ပွဲတုန်းက ဗျူဟာမှူးရဲ့ အမိန့် ပြန်တမ်းကို စောင့်နေတာ” လို့ ၎င်းက ပြောပါတယ်။

အခင်းဖြစ်ပွားပြီးနောက် တပ်ရင်းမှူး ကိုဖိုးစီရဲ့ရုပ်အလောင်းကို ပုလဲနယ်ထဲက ၎င်းရဲ့မွေးရပ်ရွာကို လက်အောက်တပ်ဖွဲ့ဝင်တွေက ပြန်သယ်သွားခဲ့ပြီး၊ ဆရာမလေးကိုတော့ အခင်းဖြစ်တဲ့ရွာမှာပဲ သင်္ဂြိုဟ်မှာဖြစ်ကာ ရှမ်းမြောက်ဒေသရှိ သူ့မိဘတွေနဲ့ အဆက်အသွယ်ရထားပြီလို့ သိရပါတယ်။

ကိုဖိုးစီနဲ့ မဇာနည်ဝင်းရဲ့ ပတ်သက်မှုနဲ့ ပြဿနာအသေးစိတ်နဲ့ ဘာကြောင့်ပစ်ခတ်မှုတွေပြုလုပ်ခဲ့တယ်ဆိုတော့ အသေးစိတ်မသိရသေးပါဘူး။

စာတည်း – ဟိန်းစံ

ပဲခူး၊ ဇန်နဝါရီ ၂၊ ၂၀၂၂။

ပဲခူးတိုင်း အနောက်ခြမ်းသာယာဝတီခရိုင်၊ မင်းလှမြို့နယ် ၊စိန်ကန့်လန့်ကျေးရွာအနီးရှိ တပ်မ ၆၆ လက်အောက်ခံ ခလရ (၁)တပ်က တပ်ရင်းမှူးအပါအဝင် ၁၀ ဦးကျော် ရှေ့တန်းမှာ တိုက်ပွဲကျခဲ့တယ်လို့ ဒေသတွင်းစစ်ကောင်စီနဲ့ နီးစပ်သူတွေကဆီက သိရပါတယ်။

ဒီဇင်ဘာလ ၃၁ ရက်နေ့တိုက်ပွဲမှာ သေဆုံးခဲ့ခြင်းဖြစ်ပြီး၊ ရှေ့တန်းကိုမသွားခင် မင်းလှမြို့ပေါ်က တအိမ်တယောက်ထွက်ပြီး ပန်းကုံးစွပ်ကြဖို့ အမိန့်ပေးထားတဲ့ အစီအစဉ်လည်းပျက်သွားခဲ့တယ်လို့ ဒေသခံတွေက ပြောပါတယ်။

သေဆုံးခဲ့တဲ့ ရှေ့တန်းစစ်မြေပြင်နေရာကို အတိအကျမသိရပေမယ်၊ ကရင်နီပြည်နယ်အတွင်း ဖြစ်နိုင်ကြောင်းနဲ့ ချောင်ပိတ်တိုက်ခိုက်ခံလိုက်ရတာဖြစ်တယ်လို့လည်း သေဆုံးသွားတဲ့ စစ်ကောင်စီတပ်ဖွဲ့ဝင်တွေရဲ့ မိသားစုနဲ့ နီးစပ်သူတွေက ပြောပါတယ်။

အဆိုပါစစ်တပ်နဲ့နီးစပ်သူအသိုင်းအဝိုင်းရဲ့ Facebook စာမျက်နှာတွေမှာလည်း သေဆုံးသွားတဲ့ တပ်ရင်းမှူးနဲ့ ပတ်သက်လို့ ဝမ်းနည်းကြောင်း ရေးသားဖေါ်ပြထားကြပါတယ်။

ပြီးခဲ့တဲ့ ရက်ပိုင်းကလည်း တပ်မ ၆၆ လက်အောက်ခံ ခလရ (၁) စိန်ကန့်လန့်တပ်က စစ်ယူနီဖေါင်းဝတ်ထားတဲ့ စစ်သားမိန်းမတွေကို တင်ဆောင်ထားတဲ့ စစ်ကား ၂ စီးဟာ မင်းလှတာဆုံဘက်ကို စစ်ကြောင်းချီတက်သွားတဲ့ပုံစံနဲ့ တက်သွားကြောင်းတွေ့မြင်ခဲ့ရကြောင်း ဒေသခံတွေက ပြောပါတယ်။