Tag:

စခန်းသိမ်းတိုက်ပွဲ

အင်အားသုံးမီးရှို့နေတာက စစ်တပ်ရဲ့ ကန့်ဒေါင့်ရေရှည်ထိန်းချုပ်နိုင်ရေးအစီအမံလား (ဆောင်းပါး)

by ဟိန်းစံ August 24, 2025

written by ဟိန်းစံ

မြေလတ်အသံ၊ ဩဂုတ် ၂၄၊ ၂၀၂၅။

ကန့်ဒေါင့်ရဲစခန်းသိမ်းပိုက်ခံရသည့်တိုက်ပွဲအတွင်း တိုက်လေယာဥ် ၁ စီးပါအဆစ်ပေးလိုက်ရသည့် စစ်ကော်မရှင်တပ်က ပုလဲမြို့နယ်အတွင်း ကျေးရွာများကို အငြိုးတကြီး ပြန်လည်မီးရှို့နေသည်။

ဩဂုတ်လနောက်ဆုံးပတ်အတွင်းတွင် စစ်ကိုင်းတိုင်း၊ ပုလဲမြို့နယ်အတွင်းရှိ ကျေးရွာများကို စစ်ကော်မရှင်တပ်နဲ့ပျူစောထီးပူးပေါင်းတပ်များက လှည့်လည်စစ်ကြောင်းထိုးမီးရှို့ခဲ့ပြီး လက်ရှိအထိလည်း ကျေးရွာများအတွင်း တပ်စွဲထားဆဲဖြစ်သည်။

စစ်ကော်မရှင်တပ်များအနေဖြင့် ဩဂုတ်လဆန်းပိုင်းကတည်းက ကန့်ဒေါင့်ရွာအနီး ပျူစောထီးအထိုင်စခန်းတည်ရှိသည့် ဇီးဖြူကုန်းကျေးရွာသို့ စတင်ဝင်ရောက်လာခဲ့ခြင်းဖြစ်ပြီး တတိယအပတ်အတွင်း စစ်ကြောင်းများ စတင်လှုပ်ရှားလာခြင်းဖြစ်သည်။

ဩဂုတ် ၁၆ ရက်တွင် ဇီးဖြူကုန်းရွာပျူစောထီးအထိုင်စခန်းမှ အင်အား ၂၀၀ ကျော် ပါ စစ်ကော်မရှင်ပူးပေါင်းစစ်ကြောင်းသည် ညောင်ပင်ဇောက်ရွာ၊ ကွမ်းကိုင်းရွာများကို စတင်စစ်ကြောင်းထိုးလာပြီး ဩဂုတ်လ ၂၀ ရက်တွင် မင်းတိုင်ပင်ရွာကို ဝင်ရောက်တပ်စွဲကာ နေအိမ်များကို မီးရှို့ခဲ့ကြခြင်းဖြစ်ပြီး ယနေ့မနက်ပိုင်းအထိ ကျေးရွာတွင်းအခြေပြုလျက်ရှိသည်။

” ဒီနေ့မနက်တော့ မင်းတိုင်ပင်ကစစ်ကြောင်း ထပ်ပြီးခွဲထွက်သွားတယ်လို့ ကြားတယ်။ အတည်ပြုနေကြတုန်းပဲ။ ငှက်ပျောတော(တောင်)ရွာက စစ်ကြောင်းလည်း ပြန်ထွက်နေတယ်လို့ ကြားထားတယ်” ဟု မြေပြင်အခြေအနေကိုသိရှိသူတဦးက မြေလတ်အသံကို ပြောသည်။

ထို့နောက် မင်းတိုင်ပင်ကျေးရွာအတွင်းတပ်စွဲနေသည့် အင်အား ၂၀၀ ကျော်ပါ စစ်ကြောင်းမှ ထုတ်နုတ်အင်အား ၆၀ ခန့်သည် ဩဂုတ် ၂၂ ရက်တွင် အိုင်းမရွာသို့ ဆက်လက်ဝင်ရောက်ခဲ့ပြီး ထပ်မံမီးရှို့ခဲ့ကြောင်း ဒေသခံများထံက သိရသည်။

စစ်ကော်မရှင်တပ်များ၏ မီးရှို့မှုကြောင့် အိမ်ခြေ ၁,၀၀၀ ကျော်ရှိ မင်းတိုင်ပင်ရွာ၏ ၆၀ ရာခိုင်နှုန်း (အိမ်ခြေ ၅၀၀ ကျော်) မီးလောင်ပြာကျခဲ့ကြောင်း ဒေသခံများမှ ခန့်မှန်းထားပြီး မင်းတိုင်ပင်နှင့် အိုင်းမရွာတို့တွင် စစ်ကြောင်းများလက်ရှိအထိ ရှိနေခြင်းကြောင့် နေအိမ်ပျက်စီးမှုအသေးစိတ်အခြေအနေများကို မသိရှိရသေးပေ။

ပုလဲမြို့နယ်၊ ကန့်ဒေါင့်ရွာရဲစခန်းကို PLA နဲ့ မဟာမိတ်တော်လှန်ရေးပူးပေါင်းတပ်များက ဇွန်လ ၁၉ ရက်တွင် သိမ်းယူခဲ့ပြီး ၂ လနီးပါးအကြာ ဩဂုတ်လအတွင်း စစ်ကော်မရှင်တပ်က အဆိုပါစခန်းကို ပြန်လည်ရရှိရေးအင်အားအလုံးအရင်းဖြင့် ထိုးစစ်ဆင်လာခြင်းဖြစ်သည်။

စခန်းသိမ်းပိုက်မခံရမီရက်ပိုင်းတွင်လည်း ဇီးဖြူကုန်းပျူစောထီးအထိုင်စခန်းတိုက်ပွဲကို လေကြောင်းပစ်ကူလာရောက်သည့် တရုတ်ထုတ် F 7 တိုက်လေယာဥ် ၁ စီး ပျက်ကျခဲ့ရာ စစ်ကော်မရှင်တပ်က လေယာဥ်မှူးသေဆုံးပြီး တိုက်လေယာဥ်လည်း ပျက်စီးဆုံးရှုံးထားသည်။

စစ်ကော်မရှင်တပ်က ကန့်ဒေါင့်ရွာအနီး ကျေးရွာများဖြစ်သည့် ညောင်ပင်ဇောက်၊ ကွမ်းကိုင်း၊ မင်းတိုင်ပင်၊ ငှက်ပျောတော၊ အိုင်းမနဲ့ ချောင်းဦး ကျေးရွာများကို စစ်ကြောင်းထိုး မီးရှို့နေသော်လည်း ကန့်ဒေါင့်ရွာကို အပြည့်အဝ ပြန်လည်ထိန်းချုပ်နိုင်ခြင်းမရှိသေးကြောင်း PLA အတွင်းရေးမှူး ဒေါ်နီနီကျော်က ပြောသည်။

“ ကန့်ဒေါင့်ကိစ္စက အခု နောက်ပိုင်းရက်တွေ သတင်းတွေပြတ်နေတယ်ပေါ့လေ။ ပထမတုန်းက တော့ သူတို့ ကန့်ဒေါင့်ဘက်ကို စစ်ကြောင်းထိုးလာပြီးတော့ ကန့်ဒေါင့်နားအထိ ရောက်တယ်ပေါ့နော်။ တချို့သတင်းအရ လည်း သူတို့ ကန့်ဒေါင့်ထဲကို ခဏဝင်သွားတယ်၊ ဒါပေမယ့် သူတို့ ပြန်ထွက်သွားတယ်ပေါ့နော်။ ရဲဘော်တွေနဲ့ မဟာမိတ်တွေနဲ့၊ ကျမတို့ရဲဘော်တွေနဲ့ သူတို့ တချို့ရွာတွေမှာ ထိတွေ့တိုက်ပွဲဖြစ်တာတွေတော့ ရှိတယ်ပေါ့နော်၊ နောက်ပိုင်းအခြေအနေတော့ ကျမ မသိရသေးဘူး” ဟု သူက ပြောသည်။

ကန့်ဒေါင့်ရွာအနီးကို စစ်ကောင်စီတပ်များအင်အားအများအပြားဖြင့်ရောက်ရှိနေပြီး ကျေးရွာအတွင်းအခြေပြုတပ်စွဲထားခြင်းမရှိသေးသည်မှာ ကန့်ဒေါင့်ရဲ စခန်းသိမ်းပိုက်ပြီးနောက် တော်လှန်ရေးပူးပေါင်းတပ်များမှ ရဲစခန်းအတွင်းရှိ စစ်ကော်မရှင်တပ်ဖွဲ့ဝင်များ တည်ဆောက်ထားသည့် ဘန်ကာများ ၊ အဆောက်အဦများအားလုံးကို မြေတူးစက်များဖြင့် ဖြိုချဖျက်ဆီးရှင်းလင်းခဲ့ခြင်းကြောင့်ဟု မြေပြင်အခြေအနေသိရှိသူတဦးမှ ခန့်မှန်းပြောဆိုသည်။

“ ကန့်ဒေါင့်က ပြန်ပါသလောက်ဖြစ်နေပြီ။ ရွာထဲကို စစ်ကြောင်းတွေက ဝင်လိုက်ထွက်လိုက်လုပ်ပြီး ပျောက်နေတယ်။ ရဲစခန်းက ခုကဘာမှမရှိတော့ဘူး ကွင်းပြင်ကြီးလိုဖြစ်နေတာ။ အကုန်ဒိုဇာနဲ့ထိုးပြီးရှင်းထားတာ ။ ဒီကောင်တွေ ဘန်ကာတွေ ကတုတ်ကျင်းတွေ ဘာမှမရှိတော့ ရွာထဲ အပြီးမဝင်သေးတဲ့အခြေအနေမျိုး” ဟု ၎င်းက ဆိုသည်။

စစ်ကော်မရှင်တပ်ကိုထောက်ခံရေးသားနေသည့် တယ်လီဂရမ်ချန်နယ်များတွင် မင်းတိုင်ပင်ကျေးရွာကို ပြန်လည်သိမ်းပိုက်နိုင်ပြီးဟု ဩဂုတ်လ ၂၂ ရက်တွင် ရေးသားဖော်ပြနေကြသော်လည်း လက်ရှိစစ်ကော်မရှင်တပ် စစ်ကြောင်းထိုးဝင်ရောက်တပ်စွဲနေသည့်နေရာများသည် တော်လှန်ရေးတပ်ဖွဲ့များ၏ အထိုင်စခန်းများတည်ရှိခြင်းမရှိဟုလည်း ဒေသခံများက ဆိုသည်။

လက်ရှိတွင် စစ်ကော်မရှင်စစ်ကြောင်းများက ကန့်ဒေါင့်ကျေးရွာအား ပြန်လည်ထိန်းချုပ်ထားနိုင်သည့်အခြေအနေဖြစ်ကြောင်း မြေပြင်တပ်ဖွဲ့ဝင်များက ပြောဆိုထားပြီး မင်းတိုင်ပင်၊ ငှက်ပျောတော၊ အိုင်းမ၊ ချောင်းဦးနှင့် လက်ပုကန်ရွာများတွင် စစ်ကြောင်း ၁ ကြောင်းလျှင် အင်အား ၆၀ ဝန်းကျင်ဖြင့် စစ်ကြောင်း ၅ ကြောင်းခွဲပြီး တပ်ဖြန့်ထားသည်။

ထို့အပြင် ကန့်ဒေါင့်အနီးရှိ ပျူစောထီးအားကောင်းသည့် ဇီးဖြူကုန်း၊ အင်မထီး၊ သရက်ကန်ကျေးရွာအထိုင် စခန်းများကို စစ်ကော်မရှင်တပ်က အင်အားဖြည့်တင်းနေသည်။

ဩဂုတ်လ ၂၂ ရက်နေ့လယ်ပိုင်းတွင် ဇီးဖြူကုန်းရွာပျူစောထီးအထိုင်စခန်းသို့ မုံရွာ နမခမှ ပျံသန်းလာသည့် Mi-17 ထောက်ပို့ရဟတ်ယာဥ်ဖြင့် လူအင်အားထပ်မံဖြည့်တင်းခဲ့ကြောင်းသိရှိရပြီး ထပ်မံရောက်ရှိသည့် စစ်အင်အားများကိုလည်း ကန့်ဒေါင့်အနီးရှိ စစ်ကြောင်းများထံ ဆက်လက်ပို့ဆောင်နေကြောင်း သိရသည်။

စစ်ကော်မရှင်စစ်ကြောင်းများကြောင့် မင်းတိုင်ပင်၊ လက်ပုကန်၊ နှောကန်၊ နှောရိုး၊ ကျောက်ဖျာကန်၊ မြေနီကုန်း၊ ငှက်ပျောတော၊ စပါးစေ့၊ မန်ကျည်းကုန်း၊ အိုးဘို၊ အိုင်းမ၊ သရက်ချောင်းနား၊ သပြေကုန်း၊ ညောင်ပင်စု၊ ကုန်းကိုင်း၊ ကုက္ကိုလ်ကုန်း စသည့်ကျေးရွာများမှ ဒေသခံ ၈,၀၀၀ ကျော်နေရပ်စွန့်ခွာထွက်ပြေးနေရကြောင်း သိရသည်။

စစ်ကော်မရှင်တပ်မှ စစ်အင်အားအများအပြားဖြင့် စစ်ကြောင်းများခွဲကာ တပ်ဖြန့်နေခြင်း၊ ကန့်ဒေါင့်ရွာအနီးကျေးရွာများကို စစ်ကြောင်းထိုးမီးရှို့မှုများလုပ် ဆောင်နေခြင်းသည် ကန့်ဒေါင့်ရွာကို ရေရှည်ပြန်လည်ထိန်းချုပ်နိုင်ရေး လုပ်ဆောင်နေခြင်းဖြစ်ကြောင်း မြေပြင်တော်လှန်ရေးတပ်ဖွဲ့ဝင်များက သုံးသပ်ထားသည်။

August 24, 2025 0 comments 55 views

တညောင်တိုက်နယ်ရဲစခန်းကို စလင်းပကဖ သိမ်းပိုက်

by ဒိန်းဂျား July 30, 2025

written by ဒိန်းဂျား

ရဲ ၈ ဦးသေဆုံး၊ ၂ ဦးဖမ်းမိပြီး လက်နက်ခဲယမ်းတွေ သိမ်းဆည်း

စလင်း၊ ဇူလိုင် ၃၀၊ ၂၀၂၅။

မကွေးတိုင်း၊ မင်းဘူးခရိုင်၊ စလင်းမြို့နယ်၊ တညောင်တိုက်နယ် ရဲစခန်းမှာတပ်စွဲထားတဲ့ စစ်ကောင်စီတပ်ဖွဲ့ဝင်တွေကို ဝင်ရောက်တိုက်ခိုက်ပြီး သိမ်းပိုက်ခဲ့တယ်လို့ စလင်းပြည်သူ့ကာကွယ်ရေးတပ်ဖွဲ့ဆီက သိရပါတယ်။

စစ်ကောင်စီတပ်နဲ့ရဲ စုပေါင်းအင်အား ၃၀ ဝန်းကျင်ရှိတဲ့ အဲ့ဒီစခန်းကို ဇူလိုင် ၃၀ ရက် မနက် ၄ နာရီ ၅၀ မိနစ်ဝန်းကျင်ကနေ ၃ နာရီကြာတိုက်ခိုက်ပြီးနောက် စစ်ကောင်စီတပ်ဖွဲ့ဝင်တွေဘက်က ၈ ဦးသေဆုံးပြီး ၂ ဦးအရှင်ဖမ်းမိကာ လက်နက်ခဲယမ်းတွေ သိမ်းဆည်းရရှိခဲ့တယ်လို့ ဆိုပါတယ်။

“ကျနော်တို့ အရင်ဆုံးစခန်းအနားကို ပစ်တက်တွေတက်ပြီးမှလုပ်ရင်းကနေ စခန်းထဲကို ၅ နာရီ ၃ မိနစ်မှာ ဝင်နိုင်တယ်၊ ဝင်ပြီး ဖြေးဖြေးချင်း ဘန်ကာတွေ ၁ ခုချင်း ၁ ခုချင်းကို တိုက်ခိုက်ချေမှုန်းပြီး ဖျက်ဆီးပြီးတော့ စခန်း ၁ ခုလုံးရရေးကို တိုက်ခိုက်သိမ်းပိုက်လိုက်တယ်၊” လို့ စလင်းပြည်သူ့ကာကွယ်ရေးတပ်ဖွဲ့တာဝန်ခံ M4 ကပြောပါတယ်။

တိုက်ပွဲကြာချိန် ၃ နာရီဝန်းကျင်ကြာခဲ့ပြီး မနက် ၈ နာရီ မိနစ် ၂၀ လောက်မှာ စခန်းကိုသိမ်းပိုက်နိုင်ခဲ့ပြီး တိုက်ပွဲပြီးနောက်မှာလည်း စစ်ကောင်စီဘက်က လေကြောင်းတိုက်ခိုက်မှုတွေလုပ်ခဲ့တယ်လို့ ဆိုပါတယ်။

“စခန်းကို ဝင်ရောက်တိုက်ခိုက်တာမှာ အခက်အခဲတွေ အများကြီးတော့ရှိတယ်၊ စခန်းရဲ့ပတ်ချာလည်မှာ ပြည်သူနေအိမ်တွေ အများကြီးရှိတယ်၊ သေချာပေါက်က စခန်းသိမ်းရင် အဆိုးဆုံး ဘက်ကတော့ လေကြောင်းလာရောက်ပစ်ခတ်မယ့် အရာကို ကျနော်တို့ ထည့်တွက်ထားတာရှိတယ်၊ ကျနော်တို့ စခန်းကိုရပြီးတဲ့အချိန်မှာ လေကြောင်းက ၃ ကြိမ်လာပြီးကြဲတယ်၊” လို့ တာဝန်ခံ M4 က ပြောပါတယ်။

တိုက်ခိုက်ချိန်အတွင်း ပြည်သူတွေထိခိုက်မှုမရှိအောင်လုပ်ခဲ့ပြီး စစ်ကောင်စီတပ်ဘက်က ဗုံးကြဲချိန်မှာတော့ ရဲစခန်းအနီးရှိနေအိမ်က ကလေးငယ် ၁ ဦးသေဆုံးသွားခဲ့တယ်လို့ ဆိုပါတယ်။

“ကြဲတဲ့အထဲက စခန်းရဲ့ပတ်ချာလည် နေအိမ်က ကလေးငယ် ၁ ဦးကို ဗိုက်ပွင့်ဒဏ်ရာရသွားတယ်ဆိုပြီး ကြားတယ်၊ အခုတော့ အဲ့ဒီကလေးက ဆုံးသွားပြီလို့ ကျနော်တို့ သတင်းကြားသိရတယ်၊ အတတ်နိုင်ဆုံးတော့ ပြည်သူတွေ အန္တရာယ်ကင်းအောင် ပြည်သူတွေ မထိအောင် ကျနော်တို့ ပြင်ဆင်ပြီးကာမှ သိမ်းယူခဲ့တာပါပဲ” လို့ သူက ဆက်ပြောပါတယ်။

တိုက်ခိုက်မှုအတွင်း အလောင်း ၈ လောင်းမျက်မြင်တွေ့ခဲ့ရပြီး ၂ ဦးကိုဖမ်းဆီးကာ G 3 ၅ လက်၊ MA 13 ၁ လက်၊ 9 မမ ကျည် ၂၀၀ ကျော်၊ G3 ကျည် ၃,၀၀၀ ကျော်တို့ကို သိမ်းဆည်းနိုင်ခဲ့တယ်လို့ သိရပါတယ်။

“G3 ကျည်ကတော့ သိမ်းဆည်းရခဲ့တာ အများကြီးပဲ၊ သူတို့တတွေကို ငါးကျင်းဆီနဲ့ ငါးကျင်းပြန်ကြော်တာဆိုတော့ ပြန်ပစ်တာကြောင့် လက်ကျန်ကတော့ ၃၀၀ ကျော်ဝန်းကျင်ပဲကျန်တယ်၊ စပြီးသိမ်းဆည်းရမိတုန်းကတော့ ၃,၀၀၀ ကျော်လောက် သိမ်းဆည်းရမိခဲ့တယ်” လို့ တာဝန်ခံ M4 ကပြောပါတယ်။

သေဆုံးသွားတဲ့ အထဲမှာတော့ ဒုရဲအုပ်တွေနဲ့ လက်ရှိယာယီစခန်းမှူးတာဝန်ယူထားတဲ့သူလည်း ပါဝင်ပြီး
ဖမ်းဆီးရမိတဲ့ ရဲ ၂ ဦးကိုတော့ စစ်ဘက်ဆိုင်ရာဥပဒေအရ လူအခွင့်အရေးနဲ့အညီ ထိန်းသိမ်းစောင့် လျှောက်ထားတယ်လို့ သူက ဆက်ပြောပါတယ်။

ဒါ့အပြင် ကျန်တဲ့စစ်ကောင်စီတပ်ဖွဲ့ဝင်တွေကတော့ ထွက်ပြေးသွားကြတယ်လို့ သိရပါတယ်။

လက်ရှိမှာတော့ ကပစ ၂၁ က စစ်ကောင်စီတပ်တွေက အင်အားအလုံးအရင်းနဲ့ တညောင်တိုက်နယ် ရဲစခန်းကိုဦးတည်ကာ စစ်ကြောင်းထိုးလာနေပြီး ကာကွယ်ရေးတပ်တွေဘက်ကလည်း လက်နက်နဲ့ မိုင်းတွေဖြည့်တင်းထားတယ်လို့ သိရပါတယ်။

စာတည်း – လင်း

July 30, 2025 0 comments 121 views

တိုက်ပွဲ သတင်း

ဗန်းမောက် စခန်းသိမ်းတိုက်ပွဲ PDF တပ်ဖွဲ့ဝင်သေဆုံး

by အောင်စိုး July 16, 2025

written by အောင်စိုး

SNA တပ်ဖွဲ့ဝင် ၃ ဦးလည်းသေဆုံးပြီး သေနတ် ၁ လက်သိမ်းဆည်း

မြေလတ်အသံ၊ ဇူလိုင် ၁၅၊ ၂၀၂၅။

စစ်ကိုင်းတိုင်း၊ ဗန်းမောက်မြို့နယ်ရှိ ရှမ်းနီအမျိုးသားများတပ်မတော် – SNA ကင်းစခန်းကို တော်လှန်ရေးတပ်ဖွဲ့တွေဝင်ရောက်တိုက်ခိုက်ချိန် ၂ ဖက်သေဆုံးမှုရှိခဲ့ပြီး လက်နက် ၁ လက် သိမ်းဆည်းခဲ့တယ်လို့ ကသာခရိုင် အမှတ် ၄ တပ်ရင်းက ဇူလိုင် ၁၅ ရက်မှာထုတ်ပြန်ပါတယ်။

မြစ်သေးချင်းကျေးရွာအနီး အင်အား ၁၅ ဦးခန့်ရှိနေတဲ့ SNA ကင်းစခန်းကို ဇူလိုင် ၁၄ ရက်မှာ တော်လှန်တပ်တွေကဝင်ရောက်တိုက်ခိုက်ပြီး နာရီဝက်ကြာတိုက်ပွဲဖြစ်ခဲ့တယ်လို့ ဆိုပါတယ်။

“နယ်မြေရှင်းလင်းရေးသွားလုပ်ပြီး SNA ကာကင်းစခန်းကိုသိမ်းတာ။ စခန်းကနောက်ဆုံး ဘန်ကာတခုပဲ ကျန်တော့တဲ့အချိန်မှာ တပ်ဖွဲ့ဝင်ကျသွားလို့ ပြန်ဆုတ်ခဲ့ရတယ်”လို့ မြေပြင်အခြေအနေကိုသိရှိထားတဲ့ တော်လှန်ရေးတပ်ဖွဲ့ဝင်တဦးကပြောပါတယ်။

ဒီတိုက်ခိုက်မှုအတွင်း ကသာခရိုင်အမှတ် ၄ တပ်ရင်း (K-4) မှ အသက် ၂၀ ကျော်အရွယ် တပ်ဖွဲ့ဝင် ဇော်ဇော်အောင်သေဆုံးခဲ့ပြီး ရုပ်အလောင်းကိုတော့ ဇူလိုင် ၁၅ ရက်မနေ့က မြေမြုပ် သင်္ဂြိုဟ်ပေးခဲ့တယ်လို့ သူကဆိုပါတယ်။

ဒါ့အပြင် SNA တပ်ဖွဲ့ဝင် ၃ ဦးလည်းသေဆုံးခဲ့ပြီး ၎င်းတို့ဆီက G-3 သေနတ် ၁ လက်သိမ်းဆည်းခဲ့တယ်လို့ အထက်ပါတပ်ဖွဲ့ဝင်က ပြောပါတယ်။

ပြီးခဲ့တဲ့ဇွန် ၉ ရက်မှာလည်း အင်အား ၂၀၀ ခန့်ရှိတဲ့ ရှမ်းနီအမျိုးသားတပ်မတော် – SNAနဲ့ KIA၊ PDF၊ မိုင်းတုံတပ်ရင်း၊ ဗန်းမောက်မြို့နယ်ပကဖပူးပေါင်းတပ်ဖွဲ့တွေ ဗန်းမောက်မြို့နယ်၊ ဘူးတောင်းနဲ့ လေသာကုန်း ကျေးရွာအကြားမှာ ၃ နာရီကြာတိုက်ပွဲဖြစ်ပွားခဲ့ရာ တိုက်ပွဲအတွင်း SNA အလောင်း ၁ လောင်းနဲ့ သေနတ် ၂ လက်ကို တော်လှန်ရေးတပ်တွေဘက်က သိမ်းဆည်းရရှိခဲ့တယ်လို့ သိရပါတယ်။

အလားတူ ပြီးခဲ့တဲ့မေ ၇ ရက်နေ့ကလည်း ဗန်းမောက်မြို့နယ်၊ စက်တောကုန်းကျေးရွာကို စစ်ကြောင်းထိုးဝင်ရောက်လာတဲ့ SNA အင်အား ၁၀၀ ခန့်နဲ့ People’s Defence Force Katha Disyrict B-04 တို့တိုက်ပွဲဖြစ်ပွားခဲ့ရာ SNA ဘက်မှ ၃ ဦးသေဆုံးပြီး ၁ ဦးကို အရှင်ဖမ်းဆီးရရှိခဲ့တယ်လို့ သိရပါတယ်။

စာတည်း – လင်း

July 16, 2025 0 comments 51 views

တိုက်ပွဲ ရုပ်သံ သတင်း

ရွှေဘိုက စစ်တပ်စခန်း ၄ ခုကို သိမ်းပိုက်နိုင်မှု နှစ်ဖက်သေဆုံးများကာ ခမရ ၁၂ ဒုတပ်ရင်းမှူးကို အရှင်ဖမ်းမိ (ရုပ်/သံ)

by ကျော်ကြီး July 12, 2025

written by ကျော်ကြီး

ရွှေဘို၊ ဇူလိုင် ၁၂၊ ၂၀၂၅။

စစ်ကိုင်းတိုင်း၊ ရွှေဘိုမြို့နယ်အတွင်းက စစ်ကောင်စီတပ်နဲ့ပျူစောထီး ပူးပေါင်းအထိုင်စခန်း ၄ ခုကို သိမ်းပိုက်ခဲ့တဲ့ တိုက်ပွဲတွေအတွင်း ဒုတပ်ရင်းမှူး ၁ ဦးအရှင်ဖမ်းမိကာ လက်နက်၊ ခဲယမ်းအများအပြားသိမ်းယူနိုင်ခဲ့တယ်လို့ တော်လှန်ရေးတပ်ဖွဲ့တွေဆီက သိရပါတယ်။

ဇူလိုင် ၄ ရက် မနက် ၅ နာရီခန့်ကစတင်ကာ စခန်း ၃ ခုပေါင်း အင်အား ၁၄၀ ခန့်ရှိတဲ့ ဟင်္သာကြီးကျေးရွာရှိ စစ်တပ်စခန်းကုန်း၊ ဘိုးနတ်တောင်စခန်းကုန်းနဲ့ တောင်လှစခန်းကုန်းတွေကို ဒေသကာကွယ်ရေးပူးပေါင်းတပ်တွေဘက်က တပြိုင်နက်ဝင်ရောက်တိုက်ခိုက်ခဲ့တာလို့ ဆိုပါတယ်။

” (ဟင်္သာကြီး)ရွာထဲရောက်မှ သူပစ်ကိုယ်ပစ်ကြတာ။ စခန်း ၃ ခုလုံးကိုအဖွဲ့တွေ ခွဲခွဲပြီး တပြိုင်နက်တည်းဝင်လုံးတာ။ * *တွေဘက်ကဆို သေဆုံးများတယ်။ အချို့အလောင်းဆို နေရာဝင်ထိုင်ရတော့ ပုပ်စော်နံမှာစိုးလို့တခါတည်းရှင်းရတာ”လို့ ရွှေဘိုခရိုင်တပ်ရင်း ၂၃ IO(ထောက်လှမ်းရေး) အမျိုးသမီးက မြေလတ်အသံကို ပြောပါတယ်။

စစ်ကောင်စီစခန်း ၃ ခုအနက် ဟင်္သာကြီးနဲ့ ဘိုးနတ်တောင်စခန်းကုန်းတို့ကို ညနေ ၃ လောက်မှာ သိမ်းဆည်းနိုင်ခဲ့ပြီး တောင်လှစခန်းကုန်းကိုတော့ ဇူလိုင် ၅ ရက်မနက်ပိုင်းမှာ သိမ်းပိုက်နိုင်ခဲ့တယ်လို့ ဆိုပါတယ်။

အထက်ပါစခန်း ၃ ခုကနေ ဆုတ်ခွာထွက်ပြေးသွားတဲ့ စစ်ကောင်စီတပ်ဖွဲ့တွေဟာ ဘိုးထွန်းကျော် ဗျူဟာစခန်းကုန်းမှာ သွားရောက်ပူးပေါင်းခဲ့တာကြောင့် ၎င်းစခန်းကုန်းကိုဆက်လက်တိုက်ခိုက်ခဲ့ရာ ဇူလိုင် ၇ ရက်မှာ ထပ်မံသိမ်းပိုက်နိုင်ခဲ့တယ်လို့ သိရပါတယ်။

ဒါ့အပြင် စစ်ကောင်စီတပ်ဖွဲ့တွေရဲ့ စခန်းတွေပတ်လည်မှာ မိုင်းအလုံး ၃၀၀ ကျော်ထောင်ထားပြီး ဗန်ကာတွေနဲ့ အခိုင်အမာတပ်စွဲထားတာကြောင့် တော်လှန်ရေးတပ်ဖွဲ့ဝင်တွေအနေနဲ့ အနီးကပ်ရင်ဆိုင် တိုက်ခိုက်ခဲ့ရတယ်လို့ ဆိုပါတယ်။

ရွှေဘိုခရိုင် ၉၇၀၆ တပ်ရင်းက ရှေ့တန်းတပ်ဖွဲ့ဝင် ၁ ဦးက“ကျည်ပေါက်တာ အရမ်းများတယ်။ ဖိုက်တာနဲ့လည်း လာကြဲတယ်။ ကျနော်တို့ရဲဘော်တွေအကုန်လုံး အသေခံဝင်လုံးပြီး အရတိုက်ခဲ့ရတာ”လို့ ပြောပါတယ်။

အဆိုပါ တိုက်ပွဲတွေအတွင်း စစ်ကောင်စီဘက်က ၉ ဦးသေဆုံးခဲ့ကာ ဟင်္သာကြီးကျေးရွာထဲကနေ ကျောက်မြောင်းအခြေစိုက် ခမရ ၁၂ ဒုတပ်ရင်းမှူး ဗိုလ်မှူး ချမ်းလွင်မောင်ကို ဒဏ်ရာရလျက် အရှင်ဖမ်းမိခဲ့ပြီး သိမ်းဆည်းရမိတဲ့ စစ်ကောင်စီတပ်ဖွဲ့ဝင်တွေရဲ့ လက်နက်တွေဟာ များပြားတာကြောင့် အရေအတွက်စိစစ်ဆဲဖြစ်တယ်လို့ ဆိုပါတယ်။

လက်ရှိမှာ တိုက်ပွဲဖြစ်ပွားရာနေရာတွေကို စစ်ဆင်ရေးနယ်မြေအဖြစ်သတ်မှတ်ကာ မိုင်းရှင်းလင်းရေးနဲ့ နယ်မြေရှင်းလင်းရေး လုပ်ငန်းတွေလုပ်နေပြီး ဒေသကာကွယ်ရေးပူးပေါင်းတပ်ဖွဲ့ဝင်တွေဘက်ကလည်း ထိခိုက်ဒဏ်ရာရသူ ၇ ဦးထက်မနည်းရှိခဲ့ပြီး ရွေဘိုခရိုင် အမှတ် ၂၃ တပ်ရင်းက တပ်ဖွဲ့ဝင် ၄ ဦးဖြစ်တဲ့ ပိုင်ဇေ၊ သူရိန်၊ ရောင်နီ၊ အေစီတို့ တိုက်ပွဲကျသေဆုံးခဲ့တယ်လို့ သိရပါတယ်။

ဒီဗျူဟာကုန်းတွေဟာ ကျောက်မြောင်းအခြေစိုက် ခမရ ၁၂ တပ် စစ်ကောင်စီတပ်နဲ့ ပျူစောထီးတွေရှိတဲ့ မခေါက်ကျေးရွာတွေအနီးမှာရှိပြီး စစ်တပ်အားထားရတဲ့ ပျူစောထီးကျေးရွာနဲ့ ဗျူဟာကုန်းတွေဖြစ်ပါတယ်။

တိုက်ခိုက်မှုကိုတော့ ရွှေဘိုခရိုင်တပ်ရင်း ၁၅၊ ၁၈၊ ၂၃၊ ၂၆၊ ၁၇၀၁၊ ၉၇၀၆ တပ်ရင်းတွေနဲ့ Brave Brothers (Local PDF)၊ တိုက်နယ် ၄ ရွှေဘိုကျားကြီး(ပကဖ)တို့ စုပေါင်းတိုက်ခိုက်ခဲ့တယ်လို့ သိရပါတယ်။

စာတည်း – မြတ်၊ တည်းဖြတ် – HP

July 12, 2025 0 comments 30 views

တိုက်ပွဲ သတင်း

ကန့်ဒေါင့်စခန်းသိမ်းတိုက်ပွဲမှာ ABSDF တပ်ဖွဲ့ဝင် ၃ ဦးကျဆုံး

by အောင်စိုး June 19, 2025

written by အောင်စိုး

မြေလတ်အသံ၊ ဇွန် ၁၉၊ ၂၀၂၅။

စစ်ကိုင်းတိုင်း၊ ပုလဲမြို့နယ်၊ ကန့်ဒေါင့်ကျေးရွာနယ်မြေရဲစခန်းသိမ်းတိုက်ပွဲမှာ ABSDF တပ်ဖွဲ့ဝင် ၃ ဦးကျဆုံးခဲ့တယ်လို့ ဇွန် ၁၉ ရက်ဒီကနေ့မှာ ABSDF Column-3 ကထုတ်ပြန်ပါတယ်။

မြန်မာနိုင်ငံလုံးဆိုင်ရာကျောင်းသားများဒီမိုကရက်တစ်တပ်ဦး (ကျောင်းသားတပ်မတော်)-ABSDF၊ အမှတ် ၃ စစ်ကြောင်း၊ အမှတ် ၁၄ တပ်ရင်းမှ ၂၅ နှစ်အရွယ် တပ်ဖွဲ့ဝင် ထိုက်ကြီး(ခ)သန်းထိုက်အောင်၊ ၁၈ နှစ်အရွယ် ကျောင်းသားလေး (ခ) ချစ်ဇော်ဖြိုး၊ ၂၇ နှစ်အရွယ် ဂျိမ်းမောင် တို့ကျဆုံးခဲ့တာပါ။

အဆိုပါတပ်ဖွဲ့ဝင် ၃ ဦးဟာ ကန်ဒေါင့်စခန်းသိမ်းတိုက်ပွဲအတွင်း ဖြတ်တောက်ရေးလုပ်နေချိန် စစ်ကောင်စီတပ်က ပစ်ခတ်လိုက်တဲ့လက်နက်ကြီးကျည်ထိမှန်ပြီး ဇွန် ၁၇ ရက်ညနေ ၅ နာရီကျော်မှာ ကျဆုံးခဲ့တာလို့ ABSDF Coloum-3 မှ တပ်ရင်းမှူးဇေယျက ဆိုပါတယ်။

“မနေ့က(ဇွန် ၁၈)ပဲ အကုန်လုံးသင်္ဂြိုဟ်လို့ပြီးပါပြီ။ သက်ဆိုင်ရာမိဘတွေဆီကိုလည်း အသိပေးထားလိုက်ပါပြီ”လို့ သူကဆိုပါတယ်။

စစ်ကောင်စီတပ်တွေတပ်စွဲထားတဲ့ ကန်ဒေါင့်ကျေးရွာနယ်မြေရဲစခန်းကို ပြည်သူ့လွတ်မြောက်ရေး တပ်မတော်-PLA ဦးဆောင်ပြီး တော်လှန်ရေးပူးပေါင်းတပ်ဖွဲ့တွေက ဇွန် ၂ ရက်နေ့ကစတင်ကာ ထိုးစစ်ဆင်တိုက်ခိုက်ခဲ့ရာ ၁၇ ရက်အကြာ ဇွန် ၁၉ ရက်ဒီကနေ့မှာ အပြီးသိမ်းပိုက်ရရှိခဲ့တယ်လို့ PLA ကထုတ်ပြန်ပါတယ်။

စာတည်း – လင်း

June 19, 2025 0 comments 6 views

တိုက်ပွဲ ရုပ်သံ သတင်း

ကွမ်းဆိပ်ရွာစစ်စခန်းနဲ့ ရဲစခန်းသိမ်းတိုက်ပွဲ (ရုပ်/သံ)

by MLAT June 1, 2025

written by MLAT

မြေလတ်အသံ၊ ဇွန် ၁၊ ၂၀၂၅။

ပဲခူးတိုင်း၊ ရွှေကျင်မြို့နယ်၊ ကွမ်းဆိပ်ကျေးရွာရှိ စစ်ကောင်စီတပ်စခန်းနဲ့ ရဲစခန်းသိမ်းတိုက်ပွဲကို အခုနှစ် ဧပြီ ၂၁ ရက်က စတင်တင်တိုက်ခိုက်ခဲ့တဲ့ ရုပ်သံမှတ်တမ်းတွေကို ကရင်အမျိုးသားလွတ်မြောက်ရေးတပ်မတော် KNLA ရဲ့ Nighthawks က ဇွန် ၁ ရက် ဒီနေ့မှာထုတ်ပြန်လာပါတယ်။

KNLA တပ်မဟာ ၃ ဒရုန်းတပ်ဖွဲ့၊ တပ်မဟာ ၃ တပ်ရင်း ၈ ဒရုန်းတပ်ဖွဲ့၊ Federal Wings ဒရုန်းတပ်ဖွဲ့၊ KNLA ပူးပေါင်းတပ်တို့နဲ့အတူ တပ်မဟာ ၃ တပ်ရင်း ၇ KNLA Nighthawks ဒရုန်းတပ်ဖွဲ့တို့ ပူးပေါင်းတိုက်ခိုက်ခဲ့တာဖြစ်ပြီး မေလ ၃ ရက်မနက်ပိုင်းမှာ အဆိုပါစခန်းတွေကို သိမ်းပိုက်ရရှိခဲ့တာပါ။

ဒီစခန်းတွေကို သိမ်းပိုက်ရရှိခဲ့တဲ့အပြင် ကွမ်းဆိပ်နယ်မြေတဝိုက် ပြန့်ကျဲထွက်ပြေးသွားတဲ့ စစ်ကောင်စီတပ်ဖွဲ့ဝင်တွေကိုလည်း ရှင်းလင်းနိုင်ခဲ့တယ်လို ထုတ်ပြန်ချက်မှာဖော်ပြပါတယ်။

June 1, 2025 0 comments 11 views

စစ်ဘေးရှောင်တိုက်ပွဲ သတင်း

မန္တလေးတိုင်းက စခန်းသိမ်းတိုက်ပွဲတွေမှာ စစ်ကောင်စီဘက်က ၅၀ ကျော်သေဆုံးပြီး လက်နက်ခဲယမ်းတွေသိမ်းဆည်း

by ဒိန်းဂျား May 25, 2025

written by ဒိန်းဂျား

မြေလတ်အသံ၊ မေ ၂၅၊ ၂၀၂၅။

မန္တလေးတိုင်း၊ မြင်းခြံမြို့၊ နွားထိုးကြီးမြို့၊ တောင်သာမြို့၊ ငါန်းဇွန်မြို့ စတဲ့မြို့နယ်တွေထဲက စစ်ကောင်စီစခန်းတွေကို မေ ၁၅ ရက်ကစပြီး တော်လှန်ရေးတပ်ဖွဲ့ဝင်တွေ ပူးပေါင်းတိုက်ခိုက်ခဲ့တယ်လို့ 9/A Nyar Myae Operation ကထုတ်ပြန်ထားပါတယ်။

မေ ၁၅ ရက်ကစပြီး မြင်းခြံမြို့နယ်၊ ဆီးမီးခုံရဲစခန်း၊ ကျောက်ပြုတ်ရွာပျူစောထီးစခန်း၊ တောင်ရှေ့ဂိတ်အထိုင်စခန်း၊ ၁၈ ရပ်ကွက်၊ ခရိုင်ထွေအုပ်ရုံး၊ နွားထိုးကြီးမြို့နယ် ဝက်လူးရဲစခန်း၊ Gas ပိုက်လိုင်း၊ မြို့မစခန်း၊ ဇီရွာအနီးစစ်ကြောင်း၊ တောင်သာမြို့နယ်က ထနောင်းကုန်းပျူစောထီးရွာစခန်း၊ မြို့ဝင်ဂိတ်၊ ငါန်းဇွန်မြို့ဝင်ဂိတ်၊ မြို့သာဘဏ်စောင့်ကင်းစခန်းတို့ကို ခရိုင်အဆင့်စစ်ဆင်ရေးအဖြစ် တပြိုင်နက်တည်း တိုက်ခိုက်ခဲ့တယ်လို့ ဆိုပါတယ်။

တိုက်ခိုက်ခဲ့ရာမှာ စစ်ကောင်စီဘက်က စစ်သား၊ ပျူစောထီး၊ ရဲ ၅၀ ဦးကျော်သေဆုံးပြီး အများအပြားဒဏ်ရာရရှိကာ သေနတ် ၂၇ လက်နဲ့ ခဲယမ်းတွေသိမ်းဆည်းရရှိခဲ့ပြီး စစ်ကောင်စီဘက်က လေကြောင်းပစ်ကူ Jet Fighter၊ Y12၊ Mi 35 တို့နဲ့ ဗုံးကြဲတိုက်ခိုက်တဲ့အတွက် တော်လှန်ရေးတပ်ဖွဲ့ဝင်တွေ အထိအခိုက် အကျအဆုံးလည်း ရှိခဲ့ပါတယ်။

ကျောက်ပြုတ်ရွာအလယ်မှာ တပ်စွဲထားတဲ့ စစ်ကောင်စီနဲ့ ပျူစောထီးတပ်တွေကို နဂါးနီပြောက်ကျားတပ်ဖွဲ့ ၊ မြို့နယ်ပကဖ၊ တိုက်နယ် ၁ ကစေတန်တပ်ဖွဲ့၊ MB-9 တပ်ဖွဲ့တွေ တိုက်ခိုက်ခဲ့တာဖြစ်ပြီး တိုက်ပွဲအတွင်း နဂါးနီပြောက်ကျားတပ်ဖွဲ့ဝင် ၂ ဦး၊ မြို့နယ်ပကဖ က ၁ ဦး ကျဆုံးခဲ့ကာ ၃ ဦး ဒဏ်ရာရခဲ့တယ်လို့ သိရပါတယ်။

မြင်းခြံခရိုင်တပ်ရင်း ၇ Zero ပြောက်ကျားတပ်ဖွဲ့ ခေါင်းဆောင် ကိုသက်ကြီးက မေ ၁၅ ရက်တိုက်ပွဲနဲ့ ပတ်သက်ပြီး လေကြောင်းကနေဗုံးကြဲခံရတာကြောင့် ၎င်းတို့တပ်ရင်းမှ တပ်ဖွဲ့ဝင် မင်းခန့်၊ ဟိန်းပြည့်သော်၊ ဇံထွန်းသန့်၊ ဝင်းနိုင်နဲ့ ကျော်ဖြိုးနိုင်အပါ ၆ ဦး ကျဆုံးခဲ့တယ်လို့ သူရဲ့ဖေ့ဘွတ်လူမှုကွန်ယက်မှာ ဓာတ်ပုံတွေနဲ့အတူ ရေးသားဖော်ပြထားပါတယ်။

တိုက်ခိုက်ပြီး‌နောက် စစ်ကောင်စီဘက်က MA 11 ၂ လက်၊ MA 13 ၃ လက်၊ G 3 ၂ လက်၊ MA 3 ၃ လက်၊ ပါရီ ၂ လက်၊ ကာဘိုင် ၁ လက်၊ လက်လုပ်အတို ၁ လက်၊ ၉ လုံး ၂ လက်၊ M 22 လက်လုပ် ၁ လက်၊ MA 1 ၈ လက်၊ MA 2 ၂ လက်၊ ကျည်ဘောက် ၄၃ ခု၊ G3 ကျည် ၅၁၁ တောင့် 5.56 mm ကျည် ၅,၀၉၄ တောင့်၊ 9 mm ကျည် ၂၆၇ တောင့်၊ 7.62 သုံးမျိုးကျည် ၂,၉၇၈ တောင့်၊ ကာဘိုင်ကျည် ၁၄၈ တောင့်၊ ရှေ့ထွက်မိုင်း ၂ လုံး၊ M9 ကျည် ၄၉ လုံး၊ 60 mm ၂၈ လုံး၊ RPG အဖူး ၉ ဖူး၊ RPG ပို့ကျည် ၆ တောင့်၊ လက်ပစ်ဗုံး ၁၅ လုံး၊ နင်းမိုင်း ၂၃ လုံး၊ 8 channel jammer ၁ လုံး၊ 6 channel jammer ၁ လုံး၊ မိုင်းရှာစက် ၁ လုံး၊ ဆိုင်ကယ် ၁၅ စီး၊ ငွေကျပ် ၉၆ သိန်းနဲ့ စစ်အသုံးအဆောင်ပစ္စည်းတွေကို သိမ်းဆည်းရရှိခဲ့တယ်လို့ ထုတ်ပြန်ချက်မှာပါရှိပါတယ်။

ဒီတိုက်ခိုက်မှုကို မြင်းခြံခရိုင်စစ်ဌာနမှ ခရိုင်ကွပ်ကဲရေးမှုရဲ့ စီမံကွပ်ကဲမှုနဲ့ မြင်းခြံခရိုင် Commando၊ မြင်းခြံခရိုင်တပ်ရင်း (၁၊၂၊၃၊၄၊၆၊၇၊၈၊၉၊၁၀) အပါအဝင် မဟာမိတ်ပူးပေါင်းတပ်တို့က လုပ်ဆောင်ခဲ့တာပါ။

တိုက်ပွဲအတွင်း စစ်ကောင်စီဘက်ကလက်နက်ကြီးပစ်ခတ်တာနဲ့ လေကြောင်းသုံးတိုက်ခိုက်တာတွေကြောင့် တိုက်ပွဲဖြစ်ပွားရာနေရာအနီးဝန်းကျင်က ဒေသခံတွေ ဘေးလွတ်ရာကို ထွက်ပြေးနေရပြီး တိုက်ပွဲတွေကြောင့် စစ်ရှောင်ကျေးရွာအရေအတွက်နဲ့ လူဦးရေစာရင်းကို မကောက်ယူနိုင်သေးဘူးလို့ ဒေသခံကာကွယ်ရေးတပ်ဖွဲ့ဝင်တဦးဆီက သိရပါတယ်။

စာတည်း – လင်း

May 25, 2025 0 comments 7 views

စစ်ဘေးရှောင်တိုက်ပွဲ သတင်း

သပြေညွန့် စစ်ကောင်စီတပ်စခန်း KNLA ပူးပေါင်းတပ်တွေသိမ်းပိုက်

by ကျော်ကြီး March 9, 2025

written by ကျော်ကြီး

■ တိုက်ပွဲကြောင့် ဒေသခံ ၁၀,၀၀၀ ကျော်ထွက်ပြေးနေရ

သံတောင်ကြီး၊ မတ် ၉၊ ၂၀၂၅။

ပဲခူးတိုင်းနဲ့ ကရင်ပြည်နယ်အစပ်၊ သံတောင်ကြီးမြို့နယ်၊ သပြေညွန့်ကျေးရွာရှိ စစ်ကောင်စီတပ်စခန်းကို KNLA ပူးပေါင်းတပ်တွေသိမ်းပိုက်နိုင်ခဲ့ပြီး တိုက်ပွဲကြောင့် ဒေသခံ ၁၀,၀၀၀ ကျော်ထွက်ပြေးနေရတယ်လို့ ဒေသကာကွယ်ရေးအဖွဲ့ တာဝန်ရှိသူတဦးကပြောပါတယ်။

မတ် ၇ ရက် မနက် ၁ နာရီခန့်ကစတင်ပြီး အင်အား ၇၀ ကျော်နဲ့တပ်စွဲထားတဲ့ စစ်ကောင်စီတပ်စခန်းကို KNLA ပူးပေါင်းတပ်တွေက တိုက်ခိုက်ခဲ့ရာ မတ် ၈ ရက် မနက် ၁၁ နာရီခန့်မှာ စခန်းကိုသိမ်းပိုက်နိုင်ခဲ့တယ်လို့ ဆိုပါတယ်။

တိုက်ပွဲဖြစ်ပွါးနေစဉ် စစ်ကောင်စီတပ်ဘက်က ဂျက်ဖိုက်တာ၊ Y12၊ Mi 35 စတာတွေနဲ့ လေကြောင်းကနေ ၁၀ ကြိမ်ထက်မနည်းတိုက်ခိုက်ခဲ့ပြီး သပြေညွန့်နဲ့ ကျောက်ကြီးပေါက်ရွာတွေဘက်ကိုပါ ဗုံးကြဲတိုက်ခိုက်တာတွေ လုပ်ခဲ့ပါတယ်။

စခန်းသိမ်းတိုက်ပွဲအပြီးမှာလည်း ညနေ ၃ နာရီအထိ သပြေညွန့်ကျေးရွာဝန်းကျင်ကို လေကြောင်းကနေ ဗုံးကြဲတိုက်ခိုက်ခဲ့ပြီး ညပိုင်းမှာတော့ ငြိမ်သက်နေတယ်လို့ သိရပါတယ်။

“တော်လှန်ရေးတပ်ဖွဲ့တွေကတော့ သပြေညွန့်ရွာကိုရသွားပြီ။ ထိခိုက်သေဆုံးတော့ တိတိကျကျ မသိရသေးဘူး။ စခန်းသိမ်းနိုင်တာက အတည်ပြုနိုင်တယ်။ အသေးစိတ်ကတော့ KNLA ဘက်က သတင်းထုတ်ပြန်လိမ့်မယ်။“လို့ ဒေသကာကွယ်ရေးအဖွဲ့ တာဝန်ရှိသူတဦးက ပြောပါတယ်။

တိုက်ပွဲဖြစ်ပွားနေတာကြောင့် သံတောင်မြို့နယ်ထဲက သပြေညွန့်ရွာ၊ ထန်းတပင်မြို့နယ်ထဲက ဒလအိုင်၊ ဂွအိုင်၊ အင်းမကြီးကုန်း၊ ရွှေချောင်းကုန်း၊ ကျောက်ကြီးပေါက်၊ ကျောက်ကြီးမြို့နယ်ထဲက မကျီးတော၊ ဆင်ဆိပ်၊ ဇီးကုန်း၊ လေလံကုန်းစတဲ့ကျေးရွာတွေက ဒေသခံ ၁၀,၀၀၀ ကျော် ထွက်ပြေးတိမ်းရှောင်နေကြရပါတယ်။

ပုံစာ – စစ်ကောင်စီတပ် လေကြောင်းတိုက်ခိုက်မှုကြောင့် ကျောက်ကြီးပေါက်နှင့် မကျီးတောရွာမှ ထိခိုက်ပျက်စီးမှုများ။

တိုက်ပွဲကြောင့် ဇရပ်ကြီးမြို့ပေါ်နဲ့တောင်ငူမြို့ပေါ်ကို စစ်ဘေးရှောင်ကြမယ့် ပြည်သူတွေကို ခလရ ၇၃ တပ်နဲ့ ဇရပ်ကြီး-တောင်ငူလမ်းပိုင်းပေါ်က စစ်ကောင်စီတပ်ဖွဲ့တွေက သွားရောက်ခွင့်မပြုဘဲကန့်သတ်နေလို့ ပြည်သူတွေမှာ မြို့ပေါ်တက်စစ်ဘေးရှောင်နေရသူနည်းပါးပြီး ဘေးလွတ်ရာ ကျေးရွာတွေမှာ တိမ်းရှောင်နေကြရပါတယ်။

မတ် ၆ ရက် နေ့လယ် ၂ နာရီခန့်က သပြေညွန့်ကျေးရွာမှာ တိုက်ပွဲဖြစ်ပွါးခြင်းမရှိဘဲ စစ်ကောင်စီဘက်က ဂျက်ဖိုက်တာ ၁ စီးနဲ့ ကျောက်ကြီးပေါက်ကျေးရွာနဲ့မကျီးတောကျေးရွာတို့ကို ဗုံးကြဲခဲ့ရာ ၂ ဦးသေဆုံးပြီး ၂ ဦးဒဏ်ရာရခဲ့ကာ ဘုန်းကြီးကျောင်း ၁ ကျောင်းနဲ့ နေအိမ် ၁၀ လုံးထက်မနည်း ပျက်စီးခဲ့တယ်လို့ သိရပါတယ်။

စာတည်း – ကိုချမ်း

March 9, 2025 0 comments 2 views

သတင်း

စခန်းသိမ်းတိုက်ပွဲမှာ စစ်ကောင်စီဘက်က ၁၅ ဦးသေပြီး လက်နက်ခဲယမ်းတွေရ

by ဒိန်းဂျား February 4, 2023

written by ဒိန်းဂျား

စစ်ကိုင်း၊ ဖေဖော်ဝါရီ ၄၊ ၂၀၂၃။

စစ်ကိုင်းတိုင်း၊ မြင်းမူမြို့နယ်၊ မန္တလေး-မုံရွာလမ်းပေါ်ရှိ ထီးဆောင်းကျေးရွာကို မဟာမိတ်တပ်ပေါင်းစုတွေက ဝင်ရောက်စီးနင်းကာ ၃ နာရီအကြာတိုက်ပြီး စခန်းသိမ်းတိုက်ပွဲဆင်နွှဲနိုင်ပြီး လက်နက်ခဲယမ်း‌တွေ သိမ်းဆည်းရမိခဲ့တယ်လို့ သိရပါတယ်။

ဖေဖော်ဝါရီလ ၄ ရက်နံနက် ၁ နာရီကတည်းက အင်အား ၄၀ ခန့်ရှိတဲ့ အဲဒီစခန်းကို ဝင်ရောက်တိုက်ခိုက်နေတာဖြစ်ပြီး နံနက် ၃ နာရီမှာတော့ စခန်းကိုဖျက်သိမ်းနိုင်ခဲ့တယ်လို့ ဆိုပါတယ်။

“၄ ခရိုင် ၄ ရင်း စခန်းသိမ်းတိုက်ပွဲဆိုပြီးအမည်ပေးထားပါတယ်၊ ထီးဆောင်းမှာရှိတဲ့စခန်းကို ည ၁ နာရီကနေစတင်ပြီးတော့ ဝင်ရောက်တိုက်ခိုက်ပါတယ်၊ စခန်းအပြီးအပိုင်ဖျက်သိမ်းပြီးတော့ မနက် ၃ နာရီမှာဖြစ်ပါတယ်၊ ရန်သူဘက်က ၁၅ ယောက်လောက်ကျဆုံးပြီးတော့ ဒဏ်ရာရရှိသူအများအပြားရှိပါတယ်” လို့ တပ်ရင်းမှူး ဗိုလ်သက်ကြီးကပြောပါတယ်။

ကာဘိုင် ၁ လက် ကျည်ဘောက် ၃ ခု ကာဘိုင်ကျည် ၁၀၄ တောင့် MA3 ၁ လက် ကျည်ဘောက် ၁ ခု 5.56 ကျည် ၁၈ တောင့် ၉ လုံးကျည် ၇၆ တောင့် Drone ဖျက်တဲ့ Jummar စက် ၂ လုံး ကျည်ကာအင်္ကျီ ၁ စုံ ဖိနပ်တွေနဲ့အခြားစစ်သုံးပစ္စည်းတွေ သိမ်းဆည်းရမိခဲ့တယ်လို့ သိရပါတယ်။

“လက်နက်ကောက်ဖို့နဲ့စစ်ကောင်စီတပ်သားတွေကို လိုက်ပစ်ဖို့ရာ မနက် ၃ နာရီထိုးမှာဂျက်ဖိုက်တာရောက်လာပါတယ်၊ ၃ ကြောင်းပြန်ဝဲပြီး ပတ်ဝဲပြီးကင်းထောက်နေတာကြောင့် နောက်ဆုတ်ခဲ့ရတယ်” လို့ ဆက်ပြောပါတယ်။

တပ်ရင်း ၄ ရင်းက ရဲဘော် ၂ ဦး ဒဏ်ရာရရှိခဲ့ပြီး စစ်အုပ်စုရဲ့ လက်နက်ကြီးနဲ့ရမ်းသမ်းပစ်ခတ်မှုကြောင့် အရပ်သား ‌၁ ဦးသေဆုံးခဲ့တယ်လို့ သိရပါတယ်။

အဲဒီတိုက်ခိုက်မှုကို တပ်ရင်း(၇)မြင်းခြံခရိုင်၊ ZERO ပြောက်ကျားတပ်ဖွဲ့တပ်ရင်း(၁၉)ရွှေဘိုခရိုင်တပ်ရင်း(၂)စစ်ကိုင်းခရိုင်၊ တပ်ခွဲ(၂)၊ GTR(မြင်းမူ) နဲ့ တပ်ရင်း(၁)ကျောက်ဆည်ခရိုင်၊နဂါးနီ(ကျောက်ဆည်) တို့က ပူးပေါင်းလုပ်‌ဆောင်ခဲ့တာလို့ သိရပါတယ်။

February 4, 2023 0 comments 2 views

10 October 2025 9:29 PM

စခန်းသိမ်းတိုက်ပွဲ

အင်အားသုံးမီးရှို့နေတာက စစ်တပ်ရဲ့ ကန့်ဒေါင့်ရေရှည်ထိန်းချုပ်နိုင်ရေးအစီအမံလား (ဆောင်းပါး)

တညောင်တိုက်နယ်ရဲစခန်းကို စလင်းပကဖ သိမ်းပိုက်

ရဲ ၈ ဦးသေဆုံး၊ ၂ ဦးဖမ်းမိပြီး လက်နက်ခဲယမ်းတွေ သိမ်းဆည်း

ဗန်းမောက် စခန်းသိမ်းတိုက်ပွဲ PDF တပ်ဖွဲ့ဝင်သေဆုံး

SNA တပ်ဖွဲ့ဝင် ၃ ဦးလည်းသေဆုံးပြီး သေနတ် ၁ လက်သိမ်းဆည်း

ကန့်ဒေါင့်စခန်းသိမ်းတိုက်ပွဲမှာ ABSDF တပ်ဖွဲ့ဝင် ၃ ဦးကျဆုံး

ကွမ်းဆိပ်ရွာစစ်စခန်းနဲ့ ရဲစခန်းသိမ်းတိုက်ပွဲ (ရုပ်/သံ)

မန္တလေးတိုင်းက စခန်းသိမ်းတိုက်ပွဲတွေမှာ စစ်ကောင်စီဘက်က ၅၀ ကျော်သေဆုံးပြီး လက်နက်ခဲယမ်းတွေသိမ်းဆည်း

သပြေညွန့် စစ်ကောင်စီတပ်စခန်း KNLA ပူးပေါင်းတပ်တွေသိမ်းပိုက်

■ တိုက်ပွဲကြောင့် ဒေသခံ ၁၀,၀၀၀ ကျော်ထွက်ပြေးနေရ

စခန်းသိမ်းတိုက်ပွဲမှာ စစ်ကောင်စီဘက်က ၁၅ ဦးသေပြီး လက်နက်ခဲယမ်းတွေရ

MYAELATT

ATHAN

သတင်း

ဆောင်းပါး

အထူးကဏ္ဍ