G-3 ကျောင်းသား

ဝေါ၊ စက်တင်ဘာ ၂၊ ၂၀၂၅။

ပဲခူးတိုင်း၊ ဝေါမြို့နယ်၊ သူရဲသမိန်ကျေးရွာမှာ လက်နက်ကြီးကျရောက်ပေါက်ကွဲလို့ G-3(တတိယတန်း)ကျောင်းသား ၁ ဦး ဗုံးစထိမှန်ဒဏ်ရာရတယ်လို့ ဒေသခံတွေထံက သိရပါတယ်။

ဒဏ်ရာရသူမှာ သူရဲသမိန်အထကကျောင်းမှာ တက်ရောက်နေတဲ့ အသက် ၉ နှစ်အရွယ် G-3 ကျောင်းသား မောင်ထူးမြတ်လင်း ဖြစ်ပြီး ကျောင်းကနေ နေအိမ်ကိုပြန်လာချိန် စက်တင်ဘာ ၁ ရက် မနေ့မွန်းတည့် ၁၂ နာရီခန့်မှာ အမှတ် ၅ ရပ်ကွက်လမ်းပေါ် ကိုကျရောက်ပေါက်ကွဲတဲ့ လက်နက်ကြီးဗုံးစထိမှန်ခဲ့တာလို့ ဆိုပါတယ်။

” ကလေးတွေ(ထမင်းစား)ကျောင်းလွှတ်တဲ့အချိန်ကျတာ။ ကလေးက ၃ တန်းကလေး။ ကျတာက လမ်းကို။ အစမှန်သွားတာ။ ဆေးဆရာအိမ်ဘေးနားကျတာ။ ကလေးကလည်းအဲ့နားကအဖြတ်ထိတာ”လို့ သူရဲသမိန်ဒေသခံတဦးက မြေလတ်အသံကို ပြောပါတယ်။

လက်နက်ကြီးအစထိမှန်တာကြောင့် မောင်ထူးမြတ်လင်းရဲ့ လက်မောင်းနဲ့ဦးခေါင်းမှာ ဗုံးစထိမှန်ဒဏ်ရာရရှိသွားခဲ့ပြီး ဆင်ရွာတိုက်နယ်ဆေးရုံကို ပို့ဆောင်ကုသထားရတယ်လို့ သိရပါတယ်။

ဩဂုတ် ၃၀ နဲ့ ၃၁ ရက်တွေမှာလည်း လက်နက်ကြီးတွေနဲ့ပစ်ခတ်ခံရတာကြောင့် သူရဲသမိန်ကျေးရွာအနီးကို ဗုံးကျရောက်ပေါက်ကွဲတာတွေရှိခဲ့ပြီး ဘယ်တပ်ဖွဲ့ကပစ်ခတ်တယ်ဆိုတာကိုတော့ မြေလတ်အသံက အတည်မပြုနိုင်သေးပါဘူး။

သူရဲသမိန်ကျေးရွာတောင်ပိုင်းဘုန်းကြီးကျောင်းမှာ စစ်ကော်မရှင်အင်အား ၁၀၀ ခန့်တပ်စွဲထားပြီး ဩဂုတ် ၂၉ ရက်ကစတင်ကာ ဆင်ရွာနဲ့ သူရဲသမိန်ကတဆင့် ညောင်ခြေထောက်ကို စစ်ကော်မရှင်တပ်က အင်အားတွေဖြည့်တင်းတာတွေလုပ်ဆောင်နေတယ်လို့ သိရပါတယ်။

ဧပြီ ၁၂ ရက်ကလည်း သူရဲသမိန်ကျေးရွာ အမှတ် ၁ ရပ်ကွက်ကို ဗုံးသီးကျရောက်ပေါက်ကွဲလို့ အမျိုးသမီး ၁ ဦးသေဆုံးပြီး ၃ ဦးဒဏ်ရာရတယ်လို့ သိရပါတယ်။

စာတည်း – ဟိန်းစံ