အုတ်ဖို၊ စက်တင်ဘာ ၈၊ ၂၀၂၅။

ပဲခူးတိုင်း၊ အုတ်ဖိုမြို့နယ်၊ ကန်သာယာကျေးရွာမှာ အုပ်ချုပ်ရေမှူး ၁ ဦး ပစ်ခတ်ခံရပြီး သေဆုံးခဲ့တယ်လို့ သာယာဝတီခရိုင် တပ်ရင်း (၃၈၀၂)၊ တပ်ခွဲ ၅၊ပြန်ကြားရေးတာဝန်ခံ ရိုးမမြေဆီက သိရပါတယ်။

ပစ်သတ်ခံရသူက ကန်သာယာအုပ်စု အုပ်ချုပ်ရေးမှူး အသက် ၆၀ ကျော်အရွယ် ဦးထွန်းသိန်း ဖြစ်ပြီး စက်တင်ဘာ ၆ ရက် ည ၇ နာရီခွဲမှာ ပျူစောထီး ခေါင်းဆောင် ကိုလှရွှေရဲ့နေအိမ်ရှေ့မှာ စကားပြောနေကြစဉ် သာယာဝတီခရိုင် တပ်ရင်း ၃၈၀၂ တပ်ခွဲ ၅ Black Tiger ပျောက်ကြားအဖွဲ့က ပစ်ခတ်ခဲ့တာလို့ဆိုပါတယ်။

“အုပ်ကြီးက ပျူခေါင်းဆောင်လှရွှေအိမ်ရှေ့မှာ နှစ်ယောက် စကားပြောနေတာကို ဝင်ပစ်တာ၊ အုပ်ကြီးထွန်းသိန်းခေါင်းကို ကျည် ၃ ချက်မှန်ပြီးသေတယ်။ အုပ်ကြီးက ခေတ်အဆက်ဆက် စစ်တပ်ထောက်တိုင်လုပ်လာတာ”လို့ တာဝန်ခံရိုးမမြေက ပြောပါတယ်။

ပစ်ခတ်ချိန်အတွင်း ပျူစောထီးခေါင်းဆောင် ကိုလှရွှေကတော့ ထွက်ပြေးလွတ်မြောက်သွားပြီး အုပ်ချုပ်ရေးမှူး ဦးထွန်းသိန်းနေအိမ်ကနေ စစ်မှုထမ်းစာရွက်တွေနဲ့ အခြားစာရွက်စာတမ်းတွေကို ယူဆောင်ကာ ကာကွယ်ရေးအဖွဲ့ဝင်တွေက မီးရှို့ခဲ့တယ်လို့လဲ ဆိုပါတယ်။

“ပျူခေါင်းဆောင်လှရွှေက ထွက်ပြေးသွားပြီး စတွေဆီ ဖုန်းဆက်အကြောင်းကြားလို့ လက်နက်ကြီး ၂ လုံးနဲ့ စတွေရွာထဲကို ပစ်တယ်။ အုပ်ကြီးအိမ်ထဲဝင်ရှာတော့ စစ်မှုထမ်းရမယ့် လူငယ်တွေနာမည်စာရင်းပါတဲ့ စာရွက်နဲ့ တခြားစာရွက်စာတမ်းတွေသိမ်းရတာ တခါထဲမီးရှို့ပစ်တယ်” လို့ တာဝန်ခံရိုးမမြေက ပြောပါတယ်။

အုတ်ဖိုမြို့နယ်၊ စစ်တောကျေးရွာရာအိမ်မှူး အသက် ၅၀ ကျော်အရွယ် ဦးသန်းစိုးကိုလည်း စက်တင်ဘာ ၇ ရက် မနက် ၁၁ နာရီခွဲမှာ သူ့နေအိမ်ကနေ လယ်တဲကိုဘေးတွဲဆိုင်ကယ်နဲ့အလာမှာ တော်လှန်ရေးတပ်ဖွဲ့ဝင်တွေက လမ်းမှာစောင့်ပြီး ပစ်ခတ်ရာသေဆုံးခဲ့ပါသေးတယ်။

စာတည်း – လင်း

မိတ္ထီလာ၊ ဩဂုတ် ၁၃၊ ၂၀၂၅။

မန္တလေးတိုင်း၊ မိတ္ထီလာမြို့နယ်၊ တပျော်ကျေးရွာက စစ်ကောင်စီခန့်အုပ်ချုပ်ရေးမှူး ၁ ဦးနေအိမ်မှာ ပစ်သတ်ခံရတယ်လို့ ဒေသခံတွေဆီက သိရပါတယ်။

ပစ်သတ်ခံရသူက အသက် ၆၀ ကျော်အရွယ်ရှိ ဦးရွှေတင်ဆိုသူဖြစ်ပြီး ဩဂုတ် ၁၂ ရက်နေ့လယ် ၂ နာရီခန့်က နေအိမ်မှာရှိနေချိန် လက်နက်ကိုင်လူတစုက ဝင်ရောက်ပစ်ခတ်သွားတာလို့ ဆိုပါတယ်။

“သူ့အိမ်မှာဘဲရှင်းခံရတာ။ သူ့ဘက်ကခုခံနိုင်တာမျိုးမရှိဘူးလို့ သိရတယ်။ သူအရင်ကပြောတာတော့ ‘ငါ့သားက ဗိုလ်ကြီး ငါဘယ်မှမကြောက်ဘူး’လို့ပြောဖူးတာရှိတယ်”လို့ ဒေသခံတဦးကပြောပါတယ်။

သေနတ်နဲ့ပစ်ခံရလို့ အုပ်ချုပ်ရေးမှူး ဦးရွှေတင်မှာ ရင်ဘတ်နဲ့ဝမ်းဗိုက်တွေမှာ ကျည်ထိဒဏ်ရာတွေနဲ့ သေဆုံးသွားတယ်လို့ ဆိုပါတယ်။

အုပ်ချုပ်ရေးမှူး ဦးတင်ရွှေဟာ စစ်အာဏာသိမ်းပြီးမှ အုပ်ချုပ်ရေးမှုးဖြစ်လာသူဖြစ်ကာ ရပ်ရွာအပေါ်မှာ ဒုက္ခပေးတာမျိုးမရှိပေမယ့် စစ်ကောင်စီတပ်နဲ့ပေါင်းပြီး သစ်ထုတ်လုပ်ရေးလုပ်ငန်း၊ သစ်အရောင်းအဝယ်လုပ်နေသူဖြစ်တယ်လို့ ဆိုပါတယ်။

သေဆုံးသူ ဦးရွှေတင်ရဲ့သား ၁ ဦးမှာ စစ်ကောင်စီဗိုလ်ကြီးတဦးဖြစ်တယ်လို့ သိထားရပြီး ဘယ်တပ်က ဖြစ်တယ်ဆိုတာတော့မသိရဘူးလို့ အထက်ပါဒေသခံက ဆက်ပြောပါတယ်။

အဆိုပါပစ်ခတ်မှုကို ဘယ်လက်နက်ကိုင်အဖွဲ့အစည်းတွေဘက်က ပစ်ခတ်ခဲ့တယ်ဆိုတာကိုတော့ သီးခြားအတည်မပြုနိုင်သေးပါဘူး။

ပြီးခဲ့တဲ့ ဖေဖော်ဝါရီ ၂၇ ရက်ကလည်း မိတ္ထီလာမြို့နယ်၊ ရေချိုကျေးရွာနဲ့ မိတ္ထီလာမြို့အကြားမှာ မိတ္ထီလာမြို့နယ်အထွေထွေအုပ်ချုပ်ရေးဦးစီးဌာနက ရုံးအုပ် တဦးပစ်သတ်ခံရလို့သေဆုံးခဲ့သေးတယ်လို့ သိရပါတယ်။

စာတည်း – လင်း

ပစ်ခတ်ဖို့သွားတဲ့ တော်လှန်ရေးတပ်ဖွဲ့ဝင် ၁ ဦးလည်းဓါးထိုးခံရပြီးသေဆုံး

တောင်တွင်းကြီး၊ ဇူလိုင် ၂၊ ၂၀၂၅။

မကွေးတိုင်း၊ တောင်တွင်းကြီးမြို့နယ်၊ အိုးပေါက်အုပ်စု၊ အိုးပေါက်ကျေးရွာက ပျူစောထီးခေါင်းဆောင် အုပ်ချုပ်ရေးမှူး ပစ်ခတ်ခံရပြီးသေဆုံးခဲ့တယ်လို့ ပုဏ္ဏဝတီ ပြည်သူ့ကာကွယ်ရေးတပ် (တောင်တွင်းကြီး) တိုက်ခိုက်ရေးခေါင်းဆောင်ဆီက သိရပါတယ်။

ပစ်ခတ်ခံရသူဟာ အသက် ၆၀ နှစ်အရွယ် ဘိုကွီး(ခ)ခင်မောင်လတ်ဆိုသူဖြစ်ပြီး ဇွန် ၂၉ ရက် ည ၁၀ နာရီခွဲဝန်းကျင်က သူ့နေအိမ်မှာပစ်ခတ်ခဲ့တာလို့ ဆိုပါတယ်။

“သူ့ရဲ့ ဦးခေါင်းကို ၂ ချက်ပစ်ခဲ့တယ်၊ ဝမ်းဗိုက်ကို ၃ ချက်ပစ်ခဲ့တယ်၊ သူကထွက်ပြေးမယ်လုပ်တဲ့အချိန် ကျနော်တို့ ပစ်ခတ်ရှင်းလင်းတာ၊” လို့ ပုဏ္ဏဝတီပြည်သူ့ကာကွယ်ရေးတပ် တိုက်ခိုက်ရေး ခေါင်းဆောင်က ပြောပါတယ်။

ဦးခင်မောင်လတ်ဟာ စစ်မှုထမ်းကြေးကောက်တာ၊ ပဲခူးရိုးမက ဆင်းလာတဲ့သစ်လှည်း၊ ဝါးလှည်းတွေကို ဆက်ကြေးကောက်တာ၊ ဖမ်းဆီးရိုက်နှက်တာတွေလုပ်နေသူဖြစ်တယ်လို့ သူကဆက်ပြောပါတယ်။

“တောင်တွင်းကြီး-ဆတ်သွား နေပြည်တော်လမ်းဘေး အိုးပေါက်ကျေးရွာမှာနေပြီးတော့ ပဲခူးရိုးမက ဆင်းလာတဲ့ သစ်လှည်း၊ ဝါးလှည်းတွေကို သူက ဂိတ်ဖွင့်ဖမ်းဆီးပြီး ဆက်ကြေးကောက်တယ်၊ ဖမ်းဆီး ရိုက်နှက်တယ်၊ နှိပ်စက်တယ်၊ သူ့ကျေးရွာမှာလည်း ပျူစောထီးဖွဲ့နိုင်ဖို့ ပျူစောထီးသင်တန်းတွေပေးဖို့ ဖိအားပေးတာတွေလုပ်တယ်”လို့ အထက်ပါတိုက်ခိုက်ရေးခေါင်းဆောင်က ဆက်ပြောပါတယ်။

ဘိုကွီး(ခ)ခင်မောင်လတ်ရဲ့အလောင်းကို နေအိမ်ရှေ့မှာထားခဲ့တာကြောင့် ဇွန် ၃၀ ရက်မှာ ဆိုင်ကယ် ၈ စီးနဲ့ စစ်ကောင်စီတပ်ဖွဲ့ဝင်တွေလာကြည့်ပြီး ဇူလိုင် ၂ ရက်ဒီကနေ့မှာတော့ အလောင်းကို အိုးပေါက်ရွာမှာ သင်္ဂြိုဟ်တယ်လို့သိရကြောင်း တိုက်ခိုက်ရေးခေါင်းဆောင်ကပြောပါတယ်။

ဇွန် ၂၉ ရက်မှာပဲ ဦးခင်မောင်လတ်ကို ပစ်ခတ်ဖို့ဝင်သွားတဲ့ အသက် ၂၆ နှစ်အရွယ် တော်လှန်ရေးတပ်ဖွဲ့ဝင် ၁ ဦးလည်း နေအိမ်ထဲကိုဝင်ချိန်နော က်ထပ် ပျူစောထီးဝပ်ဖွဲ့ဝင် ၁ ဦးက ဓါးနဲ့ထိုးခဲ့တာကြောင့် သေဆုံးခဲ့တယ်လို့ ဆိုပါတယ်။

“သူ့နေအိမ်ထဲကို ကျနော့်ရဲဘော်တဦးကဝင်သွားတဲ့အချိန်မှာ ပျူစောထီးအဖွဲ့ဝင်တဦးက အိမ်ထဲမှာ ပုန်းပြီးအလစ်အငိုက် ဓါးနဲ့ထိုးပြီးထွက်ပြေးသွားတယ်၊ ကျနော်တို့ ရဲဘော်တဦးတော့ ကျဆုံးသွားတယ်”လို့ သူက ဆက်ပြောပါတယ်။

သေဆုံးသွားတဲ့တပ်ဖွဲ့ဝင်ရဲ့အလောင်းကိုပြန်သယ်ပြီး ဇွန် ၃၀ ရက် ညနေ ၃ နာရီလောက်မှာ သင်္ဂြိုဟ်ခဲ့တယ်လို့ ပုဏ္ဏဝတီပြည်သူ့ကာကွယ်ရေးတပ် တိုက်ခိုက်ရေး ခေါင်းဆောင်က ပြောပါတယ်။

ဒီပစ်ခတ်မှုကို ပြည်သူ့ကာကွယ်ရေးတပ် ပုဏ္ဏဝတီ (တောင်တွင်းကြီး)၊ သရက်ခရိုင် အမှတ် ၅ တပ်ရင်း (ဆင်ပေါင်ဝဲမြို့နယ်)နဲ့ မကွေးတောင်ပိုင်းပြည်သူ့ကာကွယ်ရေးအဖွဲ့ တို့က ပူးပေါင်းလုပ်ဆောင်ခဲ့တာ လို့ သိရပါတယ်။

ပြီးခဲ့တဲ့ ဧပြီ ၂၃ ရက်ကလည်း မကွေးတိုင်း၊ ဆင်ပေါင်ဝဲမြို့နယ်၊ ဓနုံးမြှောင်ဂိတ်မှ ဗိုလ်ကြီးဖြိုးမောင် ဦးဆောင်ပြီး ဝါးစေ့မြှောင်ဂိတ်က ကားနဲ့တက်လာတဲ့ စစ်ကြောင်းကို ပြည်သူ့ကာကွယ်ရေးတပ် ပုဏ္ဏဝတီ (တောင်တွင်းကြီး) အဖွဲ့က ဝါးစေ့မြှောင်ဂိတ်အနီးမှာ ပစ်ခတ်တိုက်ခိုက်ခဲ့ရာ စစ်ကောင်စီဘက်က ၈ ဦးသေဆုံးခဲ့ပါ‌သေးတယ်။

စာတည်း – လင်း

ကြို့ပင်ကောက်၊ ဇွန် ၉၊ ၂၀၂၅။

ပဲခူးတိုင်း၊ သာယာဝတီခရိုင်၊ ကြို့ပင်ကောက်မြို့နယ်၊ ဗောဓိကုန်းကျေးရွာက ပျူစောထီးခေါင်းဆောင် အုပ်ချုပ်ရေးမှူးကိုပစ်ခတ်ရာ သေဆုံးခဲ့ပြီး သူ့ဆီကနေ လက်ပစ်ဗုံးပါသိမ်းဆည်းရရှိခဲ့တယ်လို့ BTZM GBK – PDF ပဲခူးရိုးမအခြေပြုတပ်ဖွဲ့ဆီက သိရပါတယ်။

ပစ်ခတ်ခံရသူဟာ အသက် ၅၀ နှစ်အရွယ် မောင်ညိမ်းဆိုသူဖြစ်ပြီး ဇွန် ၈ ရက် ညနေ ၅ နာရီခွဲခန့်မှာ လယ်ကွင်းထဲ စပါးပက်နေတဲ့အချိန် ပစ်ခတ်ခဲ့တာလို့ဆိုပါတယ်။

“မောင်ညိမ်းက ကုန်းရွာ(အနီးက)ကွင်းချောင်းမှာ တပ်အထိုင်ချထားတဲ့ စစ်ကောင်စီ(တပ်ဖွဲ့ဝင်တွေ)ကို အပြည့်အဝထောက်ပံ့တာတွေအပြင် အနီးဝန်းကျင်ပြည်သူတွေကို ဒုက္ခပေးနေတဲ့အတွက် ခုလိုသုတ်သင်ရှင်းလင်းခဲ့တာ”လို့ BTZM GBK – PDF ပဲခူးရိုးမအခြေပြုတပ်ဖွဲ့ တပ်ခွဲမှူး တေဇမင်းက ပြောပါတယ်။

ဒါ့အပြင်သူဟာ စစ်မှုထမ်းဟောင်းတဦးလည်းဖြစ်ပြီး ကျေးရွာဒေသခံလူငယ်တွေကို စစ်မှုထမ်းဖို့ဆိုကာ ငွေတောင်းတာတွေရှိတယ်လို့ ဆိုပါတယ်။

“စစ်မှုထမ်းဖို့ဆိုပြီး ရွာတွေကလူငယ်ပိုင်းတွေကို အကုန်ဆွဲတယ်၊ ဆွဲပြီးလို့ ပိုက်ဆံရှိတဲ့သူတိုင်းကို သိန်း ၂၀၀ တတ်နိုင်တဲ့သူတိုင်းကို သူကိုယ်တိုင်လိုက်နုတ်(ထုတ်)ပေးတယ်၊ သူအတွက်သီးသန့်တောင်းတာလည်းရှိတယ်၊ သူ့အတွက် သိန်း ၃၀ တောင်းတယ်၊ တော်လှန်ရေးအဖွဲ့တွေက ၂၀၂၂ ခုနှစ်လောက်ကတည်က သူ့ကိုရှင်းလင်းဖို့ဆိုပြီး ပြင်ဆင်ခဲ့ကြတာ၊ သူကပါးနပ်တော့ ကျနော်တို့တော်လှန်ရေးအဖွဲ့တွေက မရှင်းလင်းနိုင်ခဲ့ဘူး၊ အခုမှရှင်းလင်းနိုင်တာ။” လို့ တပ်ခွဲမှူး တေဇမင်းကဆက်ပြောပါတယ်။

ပစ်ခတ်ပြီးနောက် သူ့ရဲ့ လွယ်အိတ်ထဲက လက်ပစ်ဗုံး ၂ လုံး သိမ်းဆည်းရခဲ့ပြီး အလောင်းကိုတော့ပစ်ခတ်တဲ့နေရာမှာပဲ ထားခဲ့တယ်လို့ ဆိုပါတယ်။

ပြီးခဲ့တဲ့ ဇွန် ၂ ရက်ကလည်း ပဲခူးတိုင်း၊ သာယာဝတီခရိုင်၊ ကြို့ပင်ကောက်မြို့နယ်၊ ဘော်ဘင်ဆယ် ရေလွှတ်မြောင်းပေါင်(ဘောင်)ပေါ်ကို စစ်ကြောင်းထိုးလာတဲ့ စစ်ကောင်စီတပ်ဖွဲ့ဝင်တွေကို BTZM GBK PDF က မိုင်းဆွဲတိုက်ခိုက်ခဲ့ရာ ၆ ဦးသေပြီး ၁ ဦးဒဏ်ရာရခဲ့ပါသေးတယ်။

စာတည်း – လင်း

ညောင်ဦး၊ ဇွန် ၃၊ ၂၀၂၅။

မန္တလေးတိုင်း၊ ညောင်ဦးမြို့နယ်၊ ပုဂံမြို့သစ်၊ ဂန့်ဂါရပ်ကွက်ရှိ ဇရပ်မှာထိုင်နေတဲ့ အုပ်ချုပ်ရေးမှူးအဖွဲ့ ပစ်ခတ်ခံရပြီး ၈ ဦးသေဆုံးကာ လက်နက်အချို့ သိမ်းဆည်းရမိခဲ့တယ်လို့ ညောင်ဦးခရိုင်အခြေစိုက် ထနောင်းမြေစစ်ကြောင်းထံက သိရပါတယ်။

ဇွန် ၁ ရက် နေ့လယ် ၂ နာရီကျော်မှာ ဂန့်ဂါရပ်ကွက်အုပ်ချုပ်ရေးမှူး ပျူစောထီးခေါင်းဆောင် ဇော်ဇော်ဦးစီးအဖွဲ့ဟာ အလှူခံမဏ္ဍပ်ဖွင့်လှစ်ထားတဲ့ အခင်းဖြစ်နေရာမှာ ငွေကြေးကောက်နေကြောင်း သတင်းရတာကြောင့် သွားရောက်ပစ်ခတ်ခဲ့တာဖြစ်ပြီး ပစ်ခတ်ချိန်မှာ ဇရပ်အတွင်း နှစ်ဖက်ခွဲထိုင်နေကြတယ်လို့ ဆိုပါတယ်။

” ကျနော်တို့အထင်ကျည်ထိတာလား၊ သူ(အုပ်ချုပ်ရေးမှူး) ကလစ်ဖြုတ်ပြီး ပြန်ပစ်တဲ့ နာနတ်သီး (လက်ပစ်ဗုံး)ကျကွဲပြီး ထိတာလားဘဲ။ ကျနော်တို့က ကားနဲ့ဖြတ်ပြီး ပစ်သွားတာပဲ။ အဓိက သူ့ကို (အုပ်ချုပ်ရေးမှူး)ပစ်တာ။ သူ့နောက်လိုက်တွေတော့ပါတယ်။ ကားပြန်လှည့်ခါနီးမှာတော့ နာနတ်သီးကွဲသံကြားလိုက်သေးတယ်။ ကားနဲ့လမ်းမပေါ်ကဖြတ်သွားရင်း မစ်ရှင်လုပ်တာ၊ ပြန်လှည့်လာတော့ အကုန်လဲနေကြပြီ “လို့ ထနောင်းမြေစစ်ကြောင်း IO မူတူးက မြေလတ်အသံကို ပြောပါတယ်။

ပစ်ခတ်မှုအတွင်း အုပ်ချုပ်ရေးမှူး ဦးဇော်ဇော်အပါအဝင် ၈ ဦးသေဆုံး၊ ၁ ဦးဒဏ်ရာရထားတာကိုတွေ့ရကာ ပစ်ခတ်မှုဖြစ်ခဲ့တဲ့နေရာကို ဝင်ရောက်ရှင်းလင်းချိန်မှာ ဦးဇော်ဇော်ကိုင်ဆောင်တဲ့ လက်လုပ်သေနတ် ၂ လက်၊ လက်ပစ်ဗုံး ၁ လုံး၊ ဦးဇော်ဇော်ကိုင်ဆောင်တဲ့မှတ်ပုံတင်၊ ကျည်အချို့သိမ်းဆည်းရမိခဲ့တယ်လို့ သိရပါတယ်။

စစ်ကောင်စီထောက်ခံတယ်လီဂရမ်တွေမှာတော့ အုပ်ချုပ်ရေးမှူးနဲ့ရပ်မိရပ်ဖတွေဟာ ဂန့်ဂါရပ်ကွက်ရှိ ဓမ္မာရုံ၌ ရပ်ကွက်အုပ်ချုပ်ရေးမှူးနဲ့ လူ ၁၅ ဦးခန့်ဟာ ပဌာန်းပွဲအတွက် အစည်းအဝေးပြုလုပ်နေချိန် PDF တွေဘက်က ဝင်ရောက်ပစ်ခတ်ခဲ့တာကြောင့် အုပ်ချုပ်ရေးမှူး ဦးဇော်ဇော် (ခ)ဦးမြင့်ဇော် အပါ ဦးတင်မြိုင်၊ ဦးခင်မောင်ဌေး၊ ဦးခင်မောင်သန်း၊ ဦးသန်းထွန်း၊ ဦးစိုးမင်းနှင့် ဦးကြည်ထွန်းတို့ သေဆုံးခဲ့ပြီး ၆ ဦး ဒဏ်ရာပြင်းထန်ရခဲ့တယ်လို့ ရေးသားဖော်ပြကြပါတယ်။

စစ်ကောင်စီတယ်လီဂရမ်ချန်နယ်တွေမှာ ဖော်ပြနေမှုအပေါ် ထနောင်းမြေစစ်ကြောင်း IO မူတူးက အခုလိုတုံ့ပြန်ပါတယ်။

” ပဌာန်းပွဲလုပ်မယ့်သူတွေကလည်း သေနတ်တွေကော လက်ပစ်ဗုံးတွေကပါနေတာဆိုတော့ ဟုတ်၊ မဟုတ်ဆိုတာ စဥ်းစားကြည့်ပါအုန်း”လို့ ၎င်းက ပြောပါတယ်။

အဆိုပါ ပစ်ခတ်မှုကိုတော့ ထနောင်းမြေစစ်ကြောင်း၊ Bagan & Nyaung-U Special Task Force တို့က ပူးပေါင်းတိုက်ခိုက်ခဲ့တာလို့ ဆိုပါတယ်။

ဇွန် ၂ ရက် မနက် ၅ နာရီခန့်မှာလည်း ညောင်ဦးမြို့နယ်၊ စဥ့်ကူးကျေးရွာနေ ရာအိမ်မှူး အသက် ၄၀ ဝန်း ကျင်ရှိ ဦးထွန်းထွန်းနိုင်ဟာ နေအိမ်မှာ ရှိနေချိန်သေနတ်သမားတွေက ဝင်ပစ်သွားလို့ သေဆုံးသွားတယ်လို့ သိရပါတယ်။

စာတည်း – ဟိန်းစံ

လက်ပံတန်း၊ မေ ၂၈၊ ၂၀၂၅။

ပဲခူးတိုင်း၊ လက်ပံတန်းမြို့နယ်က စစ်ကောင်စီခန့်အုပ်ချုပ်ရေးမှူးတဦးကို မေ ၂၇ ရက်မနက် ၁၁ နာရီကျော်မှာ ပစ်ခတ်ရှင်းလင်းခဲ့တယ်လို့ ရွှေတန်းမြေပြည်သူ့ကာကွယ်ရေးတပ်ဖွဲ့က ပြောပါတယ်။

အသတ်ခံရသူမှာ မြေစီးကျေးရွာအုပ်ချုပ်ရေးမှူး အသက် ၃၀ အရွယ် ချစ်လင်းဖြစ်ပြီး သူ့အိမ်မှာ တဦးတည်းရှိနေချိန်ပစ်ခတ်ခဲ့တာလို့ ဆိုပါတယ်။

“သူ့အိမ်ကမိသားစုက ပုန်းနေလား ထွက်ပြေးတာလားမသိဘူး။ တယောက်မှထွက်မလာဘူး။ အိမ်ဝင်ချိန်မှာတော့ သူကထွက်ပြေးဖို့ကြံတုန်း ၉ မမနဲ့ ၂ ချက်ပစ်ခတ်လိုက်တာ”လို့ ရွှေတန်းမြေ ပြည်သူ့ကာကွယ်ရေးတပ်ဖွဲ့၊ သာယာဝတီခရိုင်ပကဖ၊ အမှတ် (၁) တိုက်ခိုက်ရေးတပ်ဖွဲ့မှ တာဝန်ခံကဆိုပါတယ်။

ကိုချစ်လင်းကို ပြီးခဲ့တဲ့ ၂၀၂၄၊ အောက်တိုဘာလမှာ စစ်ကောင်စီတပ်က မြေစီးကျေးရွာအုပ်စုရဲ့ အုပ်ချုပ်ရေးမှူးအဖြစ်ခန့်ခဲ့တာလို့ ဆိုပါတယ်။

အုပ်ချုပ်ရေးမှူးမဖြစ်ခင်ကတည်း စစ်ကောင်စီတပ်တွေပေါင်းကာ စစ်မှူထမ်းဥပဒေကိုအကြောင်းပြပြီး လူငယ်တွေကိုဖမ်းဆီးရာမှာ ကိုယ်တိုင်ပါဝင်နေသူဖြစ်တယ်လို့ လည်း သိရပါတယ်။

ပြီးခဲ့တဲ့မေ ၂၁ ရက်ကလည်း လက်ပံတန်းမြို့နယ်၊ သိုက်ဝါးချောင်းကျေးရွာနေ စစ်ကောင်စီတပ် သတင်းပေး ရာအိမ်မှူးအုန်းသန်းကို ရွှေတန်းမြေပြည်သူ့ကာကွယ်ရေးအဖွဲ့က ပစ်ခတ်ရှင်းလင်းခဲ့တယ်လို့ သိရပါတယ်။

စာတည်း – လင်း

ချောက်၊ မေ ၂၆၊ ၂၀၂၅။

မကွေးတိုင်း၊ ချောက်မြို့နယ်နဲ့ ပဲခူးတိုင်း၊ အုတ်ဖိုမြို့နယ်တွေမှာ အုပ်ချုပ်ရေးမှူး ၂ ဦး ပစ်သတ်ခံရတယ်လို့ ဒေသကာကွယ်ရေးအဖွဲ့တွေဆီက သိရပါတယ်။

မေ ၂၄ ရက်နေ့လယ် ၁၂ နာရီခန့်မှာ ချောက်မြို့နယ်၊ အုံမြားကြီးကျေးရွာအုပ်ချုပ်ရေးမှူး အသက် ၆၈ နှစ်အရွယ် ဦးနေဝင်းဟာ ရွာဘုန်းကြီးကျောင်းထဲရှိနေချိန် ခေါင်းကိုပစ်ခတ်ခံရပြီး သေဆုံးခဲ့တာလို့ ဆိုပါတယ်။

“ဦးနေဝင်းက ရွာထဲမှာရှင်းခံလိုက်ရတာလို့တော့ သိရတယ်။ သူကစစ်မှုထမ်းယန္တရား အသက်ဝင်အောင်လုပ်ပေးနေသူပေါ့။ စကစခန့်အုပ်ကြီး။ သူကလည်းဆိုးတယ်။ စစ်မှုထမ်း ကြေးကောက်တာ။ စစ်သားတွေနဲ့ပေါင်းတာက တရွာလုံးကကြောက်နေရတာ”လို့ ဒေသ ကာကွယ်ရေးအဖွဲ့တဦးက ပြောပါတယ်။

ဦးနေဝင်းပစ်သတ်ခံရပြီးနောက် မေ ၂၅ ရက်မနက်ပိုင်းကစတင်ပြီး စစ်ကောင်စီတပ်အင်အား ၄၀ ခန့်ဟာ စဥ့်ကူးမြို့ဘက်ကနေ ရွှေဘုံတောင်၊ အုံမြား၊ ရွာမတို့ကိုဝင်မွှေကာ နေ့လယ်ပိုင်းမှာ ပြည်တော်သာရွာအနီး ဒေသကာကွယ်ရေးအဖွဲ့ဝင်အချို့နဲ့ ၁၅ မိနစ်ခန့်တိုက်ပွဲဖြစ်ခဲ့သေးတယ်လို့ ဆိုပါတယ်။

အဲ့ဒီနောက်ညနေပိုင်းမှာ စစ်ကြောင်းက စဥ့်ကူးမြို့ဘက်ကို ပြန်ထွက်သွားတယ်လို့ သိရပါတယ်။

အလားတူ ပြီးခဲ့တဲ့ မေ ၂၂ ရက်ကလည်း ပဲခူးတိုင်း၊ အုတ်ဖိုမြို့နယ်၊ ဂွေ့ချောင်းကြီးကျေးရွာအနီးမှာ ဆိုင်ကယ်နဲ့ပြန်လာတဲ့ မြောက်ချောကုန်းအုပ်ချုပ်ရေးမှူး အသက် ၅၈ နှစ်အရွယ် ဦးသန်းလွင်ဆိုသူ ပစ်ခတ်ခံရပြီး သေဆုံးခဲ့ပါသေးတယ်။

အဆိုပါ အုပ်ချုပ်ရေးမှူး ၂ ဦးကို ပစ်သတ်ခဲ့တာနဲ့ပတ်သက်ပြီး ဘယ်လက်နက်ကိုင်အဖွဲ့တွေက ပစ်ခတ်တယ်ဆိုတာကိုတော့ သတင်းထုတ်ပြန်တာမျိုးမရှိသေးပါဘူး။

မေ ၂၄ ရက်ကလည်း ညောင်ဦးမြို့နယ်၊ မြေနီကျေးရွာမှာ စစ်ကောင်စီတပ်နဲ့ပေါင်းပြီး အမှုပွဲစားလုပ်နေတဲ့ အမျိုးသား ၁ ဦးပစ်သတ်ခံရလို့ သေဆုံးသွားတယ်လို့သိရပါတယ်။

စာတည်း – လင်း

ညောင်ဦး၊ ဧပြီ ၂၀၊ ၂၀၂၅။

မန္တလေးတိုင်း၊ ညောင်ဦးမြို့နယ်၊ မြေနီကျေးရွာမှာ ကျေးရွာအုပ်ချုပ်ရေးမှူးနဲ့ သမက်ဖြစ်သူတို့ ပစ်သတ်ခံရပြီးသေဆုံးခဲ့တယ်လို့ ဒေသကာကွယ်ရေးအဖွဲ့ဝင်တဦးဆီက သိရပါတယ်။

ပစ်ခတ်ခံရသူတွေဟာ မြေနီကျေးရွာအုပ်ချုပ်ရေးမှူး အသက် ၇၀ အရွယ် ဦးရဲတင့်နဲ့ သမက်ဖြစ်သူ အသက် ၃၃ နှစ်အရွယ် ဦးဇော်မင်းမြတ်တို့ဖြစ်ပြီး ဧပြီ ၁၉ ရက် မနက် ၁ နာရီခန့်မှာ လက်နက်ကိုင်အဖွဲ့တခုက ဝင်ရောက်ပစ်ခတ်သွားတာလို့ ဆိုပါတယ်။

“ရွာထဲမှာ ဝင်ရှင်းခံရတာတော့သိတယ်။ အိမ်ခြံဝန်းထဲ ခေါ်ထုတ်ပြီးရှင်းခံရတယ်လို့ သိရတယ်။ အုပ်ကြီးကတော့ စစ်ကောင်စီခန့်အုပ်ချုပ်ရေးမှူးပဲ။”လို့ ဒေသကာကွယ်ရေးအဖွဲ့ဝင်တဦးက ပြောပါတယ်။

ဦးရဲတင့်ဟာ စစ်ကောင်စီခန့်အုပ်ချုပ်ရေးမှူးဖြစ်တာကြောင့် ပစ်ခတ်ဖို့စီစဥ်သေးပေမယ့် ကျေးရွာအပေါ် ဒုက္ခပေးတာမရှိသလို သူကြောင့်ဖမ်းဆီးခံရသူတွေလည်းမရှိတဲ့အတွက် ကျေးရွာခံတွေကတားမြစ်တဲ့အတွက် ပစ်ခတ်မှုမလုပ်ဖြစ်ခဲ့ဘူးလို့ အထက်ပါဒေသကာကွယ်ရေးအဖွဲ့ဝင်က ဆက်ပြောပါတယ်။

ဒီပစ်ခတ်မှုကို ဘယ်လက်နက်ကိုင်အဖွဲ့က လုပ်ဆောင်ခဲ့တယ်ဆိုတာကိုတော့ အတည်မပြုနိုင်သေးပါဘူး။

ဧပြီ ၆ ရက်ကလည်း ညောင်ဦးမြို့နယ်၊ ငါ့သရောက်မြို့၊ အမှတ် ၃ ရပ်ကွက်နေ ကြံခိုင်ရေးပါတီ ရပ်ကျေးဥက္ကဌတဦး နေအိမ်မှာပစ်သတ်ခံရပြီး သေဆုံးသွားသေးတယ်လို့ သိရပါတယ်။

စာတည်း – လင်း

အုတ်ဖို၊ ဧပြီ ၂၀၊ ၂၀၂၅။

ပဲခူးတိုင်းအနောက်ခြမ်း၊ အုတ်ဖိုမြို့နယ်က လက်ပစ်ဗုံးကိုင်ဆောင်တဲ့ အုပ်ချုပ်ရေးမှူး ၁ ဦးကို ဧပြီ ၂၀ ရက် ဒီနေ့မနက် ၆ နာရီကျော်လောက်မှာ သေနတ်နဲ့ပစ်ခတ်ရာသေဆုံးခဲ့တယ်လို့ မြေအောက်ပြောက်ကျားတပ်ဖွဲ့က သတင်းထုတ်ပြန်ပါတယ်။

အုတ်ဖိုမြို့အနောက်ဘက် ၁ မိုင်ခန့်အကွာ ငရှဥ့်ရိုးအုပ်စုက အသက် ၄၅ နှစ်ဝန်းကျင် အုပ်ချုပ်ရေးမှူး နိုင်ဦးကို ငရှဥ့်ရိုးရွာလယ်မှာ သေနတ်နဲ့အနီးကပ်ပစ်ခဲ့တာလို့ ဆိုပါတယ်။

“ကျည်ကုန်မခံဘူး ၁ ချက်ထဲပဲဆော်ခဲ့တာ ပွဲသိမ်းပဲ။ အုတ်ဖိုအနောက်ဘက်ကို PDF တွေ မလာရဲဘူးထင်နေတာ။ အနောက်ဘက်က အုပ်ကြီးတွေ မခန့်လေးစားနဲ့ ပြည်သူကို ရက်စက်လွန်းတယ်”လို့ မြေအောက်ပြောက်ကျားတပ်ဖွဲ့တာဝန်ခံ ရဲဘော်ဒေဝက ပြောပါတယ်။

တိုက်ခိုက်မှုအပြီးမှာပဲ အုတ်ဖိုမြို့စောင့်တပ်က စစ်သားနဲ့ ရဲအင်အား ၄၀ ဦးလောက်က အလောင်းကို ကိုနိုင်ဦးနေထိုင်တဲ့ ကျောင်းစုရွာကို ပြန်သယ်သွားတယ်လို့ ရဲဘော်ဒေဝက ဆက်ပြောပါတယ်။

ပစ်ခတ်ပြီးနောက် လက်ပစ်ဗုံး ၂ လုံး၊ မိုလ်ဘိုင်းဖုန်း ၁လုံး၊ ငွေ ၁ သိန်းကျပ် နဲ့ မှတ်ပုံတင် ၁ ခု သိမ်းဆည်းခဲ့တယ်လို့ ဆိုပါတယ်။

အုပ်ချုပ်ရေးမှူး နိုင်ဦးဟာ စစ်ကောင်စီကထုတ်ပေးထားတဲ့ သေနတ်နဲ့လက်ပစ်ဗုံးပြပြီး ပြည်သူတွေဆီက စစ်မှုထမ်းကြေးလို့ဆိုကာ ခြိမ်းခြောက်ငွေတောင်းတာ၊ လူငယ်တွေကိုအဓမ္မပေါ်တာဆွဲ ဖမ်းဆီးရုံသာမက အသက် ၆၀ ကျော်အရွယ် အမျိုးသားတွေကိုပါ ပေါ်တာဆွဲဖမ်းဆီးပြီး ခြိမ်းခြောက် ငွေညစ်တာတွေလုပ်တယ်လို့ ထုတ်ပြန်ချက်မှာဖော်ပြပါတယ်။

မြေအောက်ပြောက်ကျားတပ်ဖွဲ့အနေနဲ့ တော်လှန်ရေးတပ်ဖွဲ့တွေကို ဒုက္ခပေးနေကြတဲ့ စစ်ကောင်စီနဲ့ ထောက်တိုင်တွေကို အရှိန်မြှင့် တိုက်ခိုက်သွားမှာဖြစ်လို့ ပြည်သူတွေအနေနဲ့ ၎င်းတို့ အနီးဝန်းကျင်မှာ သွားလာနေထိုင်တာတွေ မပြုလုပ်ဖို့ကိုလည်း အသိပေးထားပါသေးတယ်။

ပြီးခဲ့တဲ့ ဧပြီ ၈ ရက် မွန်းလွဲ ၁ နာရီခွဲဝန်းကျင်ကလည်း အုတ်ဖိုမြို့နယ်၊ သရက်နှစ်ဖျားလိမ်အုပ်စု ပေါင်းတည်စုရွာက လက်ပစ်ဗုံးကိုင်ဆောင်တဲ့ ရာအိမ်မှူးဖိုးဖြူကို မြေအောက်ပြောက်ကျားတပ်ဖွဲ့က သေနတ်နဲ့ ပစ်ခတ်ရှင်းလင်းခဲ့ပါသေးတယ်။

ပုံစာ – သိမ်းဆည်းရမိသည့် လက်ပစ်ဗုံး ငွေ ၁ သိန်းကျပ်နှင့် ဖုန်း။

သတင်း – မောင်ဆွေအင်း၊ စာတည်း – လင်း

မင်းလှ၊ ဧပြီ ၁၂၊ ၂၀၂၅။

ပဲခူးတိုင်းအနောက်ခြမ်း၊ မင်းလှမြို့နယ်မှာ စစ်မှုထမ်းကြေးအဓမ္မကောက်တဲ့ အုပ်ချုပ်ရေးမှူး ၁ ဦးကို သေနတ်နဲ့ပစ်ခတ်ရာသေဆုံးခဲ့တယ်လို့ သာယာဝတီခရိုင် တပ်ရင်း ၃၈၀၂ တပ်ခွဲ ၃ က သတင်းထုတ်ပြန်ပါတယ်။

မင်းလှမြို့နယ်၊ သင်တောကန်အုပ်စု၊ သင်တောကန်ရွာက အသက် ၅၀ နှစ်ဝန်းကျင် အုပ်ချုပ်ရေးမှူး ကြည်လှိုင်ကို ဧပြီ ၁၁ ရက် မွန်းလွဲ ၂ နာရီလောက်က စစ်ကွင်းမြို့ အနောက်ဘက်အထွက် လမ်းပေါ်မှာ သေနတ်နဲ့ ၇ ချက် ပစ်ခတ်ရှင်းလင်းခဲ့တာလို့ဆိုပါတယ်။

“သူ့ကို ရှင်းလင်းဖို့ ချောင်းနေတာကြာပြီ။ သူက ဆိုင်ကယ်နောက်မှာ မိန်းမတယောက်က အမြဲပါနေလို့ မလုပ်ရဘူး။ မနေ့ကတော့ သူကတယောက်တည်းဆိုင်ကယ်နဲ့ ရွာကိုပြန်လာတုန်း ဆော်တာ ပွဲချင်းပြီး”လို့ သာယာဝတီခရိုင် တပ်ရင်း ၃၈၀၂ တပ်ခွဲ ၃ က တာဝန်ရှိသူတဦးက ပြောပါတယ်။

အဲဒီတိုက်ခိုက်မှုကို သာယာဝတီခရိုင် တပ်ရင်း ၃၈၀၂ တပ်ခွဲ ၃ နဲ့ မင်းလှမြို့နယ်ပြည်သူ့ကာကွယ်ရေး အဖွဲ့ တို့ ပူးပေါင်းလုပ်ဆောင်ခဲ့တာလို့ ဆိုပါတယ်။

အုပ်ချုပ်ရေးမှူး ကြည်လှိုင်ဟာ ရဲဝန်ထမ်းဟောင်းတဦးလည်းဖြစ် စစ်တပ်အမာခံထောက်တိုင်ဖြစ်ပြီး တော်လှန်ရေးတပ်ဖွဲ့ဝင်တွေရဲ့သတင်းတွေကို စစ်ကောင်စီဆီကိုပေးပို့တာ၊ စစ်မှုထမ်းကြေးလစဥ် ကောက်တာ၊ လူငယ်တွေကို စစ်မှုထမ်းဖို့အတွက်စုဆောင်းတာတွေ လုပ်တဲ့အတွက် အခုလိုပစ်ခတ်တာလို့ ထုတ်ပြန်ချက်မှာပါရှိပါတယ်။

ပြီးခဲ့တဲ့ ဧပြီ ၈ ရက် မွန်းလွဲ ၁ နာရီကလည်း အုတ်ဖိုမြို့နယ် သရက်နှစ်ဖျားလိမ်အုပ်စု ပေါင်းတည်စုရွာက လက်ပစ်ဗုံးဆောင်တဲ့ ရာအိမ်မှူးတဦးကိုလည်း အုတ်ဖိုမြေအောက် ပြောက်ကျားတပ်ဖွဲ့က သေနတ်နဲ့ပစ်ခတ်လို့ သေဆုံးခဲ့ပါသေးတယ်။

သတင်း – မောင်ဆွေအင်း၊ စာတည်း – လင်း