အမျိုးသား

စစ်ကိုင်း၊ ဒီဇင်ဘာ ၂၂၊ ၂၀၂၂။

စစ်ကိုင်းတိုင်း၊ ကောလင်းမြို့၊ မြို့မကုန်းရပ်ကွက်၊ သုဝဏ္ဏရပ်မှာနေတဲ့ လောင်းကစားဒိုင်လုပ်နေသူ အမျိုးသားတဦး ပစ်ခတ်ရှင်းလင်းခံခဲ့ရတယ်လို့ ဒေသခံကတဆင့်သိရပါတယ်။

ဒီဇင်ဘာလ ၂၁ ရက်မနေ့ကနေ့လည် ၁ နာရီခန့်က မျက်နှာဖုံးစွပ်နဲ့ လက်လုပ်သေနတ်တချို့ကိုင်ဆောင်ထားတဲ့ လူတစုကရောက်လာပြီး သေနတ်နဲ့ပစ်သတ်သွားတာလို့ အမည်မဖော်လိုသူ အမျိုးသားတဦးက မြေလတ်အသံကိုပြောပါတယ်။

“သူက တော်တော်လေးအနံ့ထွက်နေတာ။ စခတွေနဲ့ပေါင်းပြီး မူးယစ်ဆေး၊ လောင်းကစား အကြီးကျယ်လုပ်နေတာ။ ဂျင်ဝိုင်းထောင်ထားတယ်၊ လောင်းကစားတွေက အခုမှမဟုတ်ဘူး ဟိုးအရင်ထဲကဆရာကြီး၊ စခတွေနဲ့ပေါင်းစားပြီး ခုကပိုဆိုးလာတာလေ။ ကောလင်းမှာ စခတွေနဲ့မပတ်သက်ရင် ဖဲတောင်မရိုက်ရဲဘူး”လို့ ပြောပါတယ်။

ပစ်ခတ်ခံရလို့ နာမည်ကြီးလောင်းကစားလုပ်ငန်းလုပ်ကိုင်သူ ဦးတင့်ကို အသက် ၅၅ နှစ်သေဆုံးခဲ့ပြီး၊ ဘယ်အဖွဲ့အစည်းက လုပ်ခဲ့လဲဆိုတာတော့ မြေလတ်အသံအနေနဲ့ အတည်ပြုနိုင်ခြင်းမရှိသေးပါဘူး။

ကောလင်းမြို့ပေါ်မှာ စစ်တပ်ကအာဏာသိမ်းပြီးနောက်ပိုင်း လောင်းကစားနဲ့ မူးယစ်ဆေးလုပ်ငန်း လုပ်ကိုင်သူတွေပေါများလာပြီး၊ စစ်ကောင်စီကို လိုင်းကြေးပေးပြီး ပေါ်ပေါ်ထင်ထင်လုပ်ကိုင်နေကြတာတွေ ရှိသလို၊ ရဲဝန်ထမ်းတွေကိုယ်တိုင်ပါဝင်တဲ့ လောင်းကစားဝိုင်းတွေလည်းရှိတယ်လို့ အထက်ပါအမျိုးသားက ဆက်ပြောပါတယ်။

ပြီးခဲ့တဲ့ဒီဇင်ဘာလ ၄ ရက်ကလည်း ကောလင်းမြို့နယ်၊ ဗျူဟာလမ်းပိုင်းတနေရာမှာ ဘိန်းဖြူတွေနဲ့အတူ မူးယစ်ဆေးအကြီးကျယ်ရောင်းနေတဲ့ လုပ်ငန်းရှင်တဦးကို ကောလင်းမြို့နယ်ပြည်သူ့လုံခြုံရေးအဖွဲ့က ဖမ်းဆီးအရေးယူခဲ့ပါသေးတယ်။

မကွေး၊ ဒီဇင်ဘာ ၂၀၊ ၂၀၂၂။

မကွေးတိုင်း၊ ပေါက်မြို့နယ်၊ စသိန်းရွာကအမျိုးသားတဦး ဒီဇင်ဘာလ ၂၀ ရက်ဒီမနက်ပိုင်းမှာ ကြိုးဆွဲချသေဆုံးခဲ့တယ်လို့ သိရပါတယ်။

အသက် ၅၄ နှစ်အရွယ် ဦးဌေးမောင်ဦးဖြစ်ပြီး သူဟာ ရွာအနီးရှိလယ်ပြင်မှာနွားကျောင်းနေခဲ့ပြီးနောက် ဒီကနေ့ညပိုင်းအထိ နေထိုင်တဲ့နေရာကိုပြန်မရောက်တာကြောင့် လိုက်လံရှာဖွေချိန် အဲ့ဒီနေရာအနီးရှိ ဇီးဖြူပင်ပေါ်မှာ ကြိုးဆွဲချသေဆုံးနေတာကိုဒီညနေ ၆ နာရီလောက်မှ တွေ့ရှိခဲ့ရတယ်လို့ ဆိုပါတယ်။

“စစ်သားတွေ အိမ်မီးရှို့ခံရပြီးကတည်းကနေစရာလည်းမရှိတော့ဘူးဆိုပြီး စိတ်ဓါတ်ကျတယ်လို့ ခဏခဏပြောနေတာ။ အဲလောက်ထိလုပ်မယ်လို့တော့ မထင်ဘူး”လို့ ဦးဌေးမောင်ဦးရဲ့ ညီဖြစ်သူက ပြောပါတယ်။

ပြီးခဲ့တဲ့ နိုဝင်ဘာလ ၂၃ ရက်မှာ စစ်ကောင်စီလက်အောက်ခံ တပ်မ ၁၀၁ စစ်ကြောင်းဟာ စသိန်းရွာကိုစစ်ကြောင်းထိုးမီးရှို့ချိန်မှာ ဦးဌေးမောင်ဦးတို့နေအိမ်လည်း မီးထဲပါသွားပြီး အဲ့ဒီကစလို့ စိတ်ဓါတ်ကျတဲ့အခြေအနေဖြစ်ပေါ်နေတာလို့လည်း သိရပါတယ်။

သူသေဆုံးချိန်မှာ အသက် ၅၄ နှစ်အရွယ် လေဖြတ်ထားတဲ့ဇနီးသည်ကျန်ခဲ့တယ်လို့သိရပြီး၊ သူ့ရုပ်အလောင်းကိုတော့ ဒီဇင်ဘာလ ၂၁ ရက်မှာသင်္ဂြုလ်သွားမယ်လို့လည်း သိရပါတယ်။

မြေလတ်အသံ၊ စက်တင်ဘာ ၁၊ ၂၀၂၂။

ရခိုင်ပြည်နယ်၊ ကျောက်တော်မြို့၊ ကဝိရတနာ စစ်ဘေးရှောင်စခန်းမှ အမျိုးသားတဦးမှာ စစ်ကောင်စီ၏ ဖမ်းဆီးခြင်းကို ခံလိုက်ရပြီးနောက် ရက်ပေါင်း ၅၀ကျော်အထိ မိသားစုနှင့် အဆက်အသွယ် လုံးဝပြတ်တောက်နေသည်ဟု သိရသည်။

ယခုလို ဦးကျော်ဟိန်း ပျောက်ဆုံးနေ၍ ကျန်ရှိနေသည့် မိသားစု ၅ဦးမှာ ကျန်းမာရေး၊ ပညာရေး၊ စားဝတ်နေရေး ဖြေရှင်းနိုင်ဖို့သူများဆီက ချေးယူ သုံးစွဲနေရသဖြင့် လက်ရှိတွင် အကြွေး ၃သိန်း တင်နေပြီဟု ဇနီးဖြစ်သူဒေါ် အေးသန်းက ပြောသည်။

“ကျမမှာ သားသမီး ၄ယောက်ရှိပါတယ်။ အကြီးဆုံးသားကတော့ ဆယ်တန်းတက်နေပါတယ်။ သားလတ်ကတော့ ၆တန်း၊ သားငယ်ကတော့ ၁တန်းတက်နေပါတယ်။ သမီးအငယ်ဆုံးကတော့ ၄နှစ်ပဲရှိသေးတယ်။ ဒီလထဲမှာဆိုရင် သမီးလေး နေမကောင်းဖြစ်လို့ ဆေးခန်းပြရတယ်။ အကူအညီပေးမယ့် ဆွေမျိုးတွေလည်းမရှိဘူး။ သူများဆီကယူထားတဲ့အကြွေးကိုတောင် ဘယ်လိုပြန် ပေးရမလဲမသိတော့ဘူး”ဟု ဆိုသည်။

ဖမ်းဆီးခံရသူမှာ ဦးကျော်ဟိန်း(ဆေးဆရာ) ၃၉ နှစ် ဖြစ်ပြီး ၎င်းကို ပြီးခဲ့သည့် ဇူလိုင် ၁၉ရက် ညအချိန်တွင် မီးရ ထားစစ်ဘေးရှောင်စခန်းမှ ဆေးကု၍ပြန်လာစဉ် ဖမ်းဆီးခံလိုက်ရခြင်းဖြစ်သည်။

မိသားစုများအနေဖြင့် ဦးကျော်ဟိန်းမှာ လက်ရှိ အချိန်ထိ အသက်ရှင်လျှက်ရှိ၊ မရှိဆိုသည်တခုတည်းကိုသာ သိခွင့်ရရှိလိုကြောင်း ဇနီးဖြစ်သူက စစ်ကောင်စီကို တောင်းဆိုထားသည်။

ဦးကျော်ဟိန်းမှာ ကျောက်တော်မြို့နယ်၊ မီးဝကျေးရွာမှဖြစ်ပြီး မိသားစုနှင့်အတူ ပြီးခဲ့သည့် ၂၀၁၉ခုနှစ်မှစတင်ကာ စစ်ဘေးရှောင်စခန်းတွင် လာရောက် ခိုလှုံနေသူဖြစ်သည်။

ယင်းအပြင် ဦးကျော်ဟိန်းမှာ ဆေးဆရာလုပ်ကာ မိသားစုကို လုပ်ကျွေးနေသူတစ်ဦးဖြစ်ပြီး မည်သည့် အဖွဲ့အစည်းနှင့်လည်း ဆက်စပ်မှုမရှိဟု သိရသည်။

မြေလတ်အသံ၊ ဇူလိုင် ၁၃၊ ၂၀၂၂။

ရခိုင်ပြည်နယ်၊ စစ်တွေမြို့၊ ကျေးပင်ကြီးရပ်ကွက် ရှိ စိန်ရွှေရီရွှေဆိုင်မှ တကွင်းလျှင် ၁ ကျပ်သားရှိသည့် ရွှေလက် ကောက် ၂ ကွင်းကို အမျိုးသားတဦးက ယနေ့ဇူလိုင် ၁၃ ရက်နေ့ နံနက် ၉ နာရီကျော်အချိန်ခန့်တွင် လုယူထွက်ပြေးသွားသည်ဟု သိရသည်။

လုယူထွက်ပြေးသွားသူမှာ အသက် ၃၀ ကျော်အရွယ်ရှိသူတစ်ဦးဖြစ်ပြီး ၎င်းလုယူသွားသည့် လက်ကောက် ၂ ကွင်းမှာ ကာလတန်ဖိုးအားဖြင့် သိန်း ၄၀ နီးပါးရှိသည်ဟု ရွှေဆိုင်ပိုင်ရှင် ဒေါ်ချမ်းမကပြောသည်။

“သူဆိုင်ထဲကိုဝင်လာတဲ့အခါ အိတ်အမဲတလုံးကိုင်လို့ဝင်လာတယ်။ အိတ်ထဲမှာ မီးပြင်တဲ့ကိရိယာတခုပါတယ်။ ပြီးတော့ ငွေထုတ်ဖို့ပုံစံ လုပ်ပြီးတော့ စာရေးမဆီကလက်ကောက်ကြည့်ဖို့ တောင်းတယ်။စာရေးမကလည်း တစ်ကွင်းထုတ်ပြတယ်။သူကနောက်ထပ်ဒီလိုပုံစံတစ်ကွင်း မရှိဘူးလားမေးတော့။စာရေးမကထုတ်ပြလိုက်တယ်။အဲဒီနှစ်ကွင်းကို ကိုင်ပြီးတော့ထွက်ပြေးသွားတယ်။ ကျွန်မတို့လိုက်တော့ မမီလိုက်ဘူး” ဟုဆိုသည်။

လက်ရှိတွင် လုယူထွက်ပြေးသွားသူကို မဖမ်းမိလိုက်သဖြင့် စစ်တွေမြို့ အမှတ်၁ရဲစခန်းတွင် အမှုဖွင့်ထားသည်ဟု သိရသည်။

လက်ကောက်လုယူထွက်ပြေးသွားသူအမျိုးသားမှာ Mask တပ်ထားပြီး ဂျင်းဘောင်းဘီအပြာ၊ အဖြူရောင်စပို့ရှပ်အကျ်ီလက်ရှည်နှင့်လက်တွင် ပလတ်စတစ်အိတ်အမည်းတစ်လုံးကို ကိုင်ထားသည်ကို ဆိုင်၏ CCTV မှတ်တမ်းတွင်တွေ့ရသည်။

ပြီးခဲ့သည့် ဇူလှိုင်လ ၇ ရက်နေ့တွင်လည်း မြောက်ဦးမြို့၊ တောင်ရပ်ရပ်ကွက်ရှိ “ဦးသာကျော်ဖြူရွှေပန်းထိမ်ဆိုင်” မှ ရွှေဆွဲကြိုး ၂ ပင်ကို အမျိုးသားတဦးက လုယူထွက်ပြေးမှုဖြစ်ပွားခဲ့သည်။

ယင်းအချိန်၌ ၎င်းအမျိုးသားကို ရပ်ကွက်သားများက ဝိုင်းဝန်ဖမ်းဆီးနိုင်ခဲ့ပြီး ရက္ခိုင့်တပ်တော် (AA)မှ တာဝန်ရှိသူများကို လွဲပြောင်းပေးခဲ့သည်။

ပဲခူး၊ မေ ၁၉၊ ၂၀၂၂။

ပဲခူးတိုင်း၊ အနောက်ခြမ်းပေါင်းတည်မြို့မှာ စစ်ကောင်စီက အမျိုးသားတဦးကို စစ်ဆေးစရာရှိလို့ ဖမ်းဆီးသွားခဲ့ပြီး ၂၄နာရီမပြည့်ခင်မှာပဲ သေဆုံးသွားတယ်လို့ မိသားစုဝင်တွေကို အကြောင်းကြားလာခဲ့ပါတယ်။

အသက် ၃၈နှစ်အရွယ် ကိုမင်းမင်းဟာ ပေါင်းတည်မြို့နယ် ကြို့ပင်အုပ်စု ဟင်္သာကန်ကျေးရွာမှာ နေထိုင်သူဖြစ်ပြီး NLD ပါတီဝင်တဦးဖြစ်ကာ မေလ ၁၈ရက် မနေ့က နေ့လယ်ပိုင်းမှာ စစ်တပ်က ဖမ်းဆီးပြီး စစ်ကြောရေးမှာ သေဆုံးခဲ့တာဖြစ်တယ်လို့ ဒေသခံတဦးက ပြောပါတယ်။

“ကိုမင်းမင်း ဖုန်းကို စစ်တယ် ဖုန်းထဲမှာ ဘာမှ မတွေ့ဘူး မတွေ့တော့ လူကိုစစ်မယ် ဆိုပြီးခေါ်သွားတာ ညက ၈နာရီလောက်အထိ အကောင်း ခုမနက်မှ သေပြီလို့ သိရတာ”လို့ သူနဲ့နီးစပ်သူတဦးက ပြောပါတယ်။

ဖမ်းဆီးခံရစဥ်က ကိုမင်းမင်းဟာ ကျန်းမာရေးကောင်းမွန်ပြီး စစ်ကောင်စီကတော့ ပန်ကာလေအအေးမိကာ သေဆုံးတာလို့ သတင်းလွှင့်ထားပြီး ဒေသခံတွေကတော့ မေလ ၁၅ ရက်နေ့က ကိုမင်းမင်းရဲ့ ကွမ်းယာဆိုင်ရဲ့တောင်ဖက် နှစ်ဖာလုံခန့်အကွာမှာ မိုင်းခွဲခံရလို့ ရဲတဦး ပြင်းထန်ဒဏ်ရာ ရခဲ့တာနဲ့ ပတ်သက်ပြီး လက်စားချေ သတ်ဖြတ်ခံရတာလို့ ဆိုပါတယ်။

ကိုမင်းမင်းဟာ ရပ်ရွာအတွင်းမှာ ပရဟိတဆောင်ရွက်သူတဦးလည်း ဖြစ်ပြီး ဇနီးဖြစ်သူနဲ့အတူ သမီးတယောက်နဲ့ သားတယောက်ကျန်ရစ်ခဲ့ပါတယ်။

အာဏာသိမ်း စစ်တပ်ဟာ ပြီးခဲ့တဲ့ မေလ ၁၇ ရက်နေ့ ဟင်္သာကန်ရပ်ကွက်က ကြံ့ခိုင်ရေးထောက်ခံသူ မိသားတစုနဲ့ အခြားမိသားတစုကို ဖမ်းဆီးကာ ပိုက်ဆံတောင်းပြီး ညအချိန်ရောက်မှ ပြန်လွှတ်ပေးခဲ့တယ်လို့လည်း သိရပါတယ်။

မကွေး၊ ဒီဇင်ဘာ ၃၁၊ ၂၀၂၁။

ပေါက်မြို့နယ်‌တောင်ပိုင်း ဇီးတောရွာကို ပျူစောထီး ၁၄ဦး ဝင်ရောက်မွှေနှောက်ခဲ့ပြီး စပါးရိတ်ပြီး ပြန်လာတဲ့ အမျိုးသားတဦးကို ‌သေနတ်နဲ့ အချက်ပေါင်းများစွာ ပစ်ခဲ့လို့ ပွဲချင်းပြီး သေဆုံးသွားတယ်လို့ ‌ဒေသခံတွေဆီက သိရပါတယ်။

မကွေးတိုင်း ပေါက်မြို့နယ်တောင်ပိုင်း ဇီးတော၊ ရွာသစ်၊ တပ်ကုန်းရွာတွေကို ဒီနေ့ မနက် ၁၁နာရီဝန်းကျင်မှာ ဆိုင်ကယ် ၈စီးနဲ့ ပျူစောထီး ၁၄ယောက် ရွာတွေကို ဝင်ပြီး အိမ်တွေကို ဖျက်ဆီးသွားခဲ့တာဖြစ်တယ်လို့ ဒေသခံတဦးက မြေလတ်အသံကို ပြောပါတယ်။

“ပျူစောထီးအဖွဲ့တွေ ရွာထဲကိုပတ်ပြီး မွှေသွားပါတယ်၊အမျိုးသမီးတွေပဲတွေ့လို့ တောင်ဘက်ကိုဆိုင်ကယ်နဲ့မောင်းသွားပါတယ်၊တောင်နားကျ စပါးရိတ်ပြန်လာတဲ့ ၁ ယောက်ကိုပစ်သတ်ခဲ့ပါတယ်၊ အဲဒီနားမှာပွဲချင်းပြီးတစ်ခါထဲကိုသေသွားပါတယ်၊အချက်ပေါင်းမနည်းပါဘူးပစ်သွားကြတာ” လို့ ပြောပါတယ်။

သေနတ်နဲ့ ပစ်ခံရသူ အမျိုးသားဟာ နံရိုးကြားကို ထုတ်ချင်းပေါက်ဝင်သွားပြီး အဲ့ဒီနေရာမှာပဲ ပွဲချင်းပြီးသေဆုံးသွားခဲ့တယ်လို့ သိရပါတယ်။