ရွေးကောက်ပွဲဆန့်ကျင်ရေး

ဆားလင်းကြီး၊ ဒီဇင်ဘာ ၆၊ ၂၀၂၅။

စစ်ကိုင်းတိုင်း၊ ဆားလင်းကြီးမြို့နယ်အတွင်းမှာ ရွေးကောက်ပွဲဆန့်ကျင်ရေး Billboard ထောင်ပြီး စစ်အာဏာရှင်စနစ်ဆန့်ကျင်ရေးလှုပ်ရှားမှု ပြုလုပ်ခဲ့တယ်လို့ ဒီဇင်ဘာ ၅ ရက်မှာ ဆာလင်းကြီးမြို့နယ်သပိတ်အင်အားစုက သတင်းထုတ်ပြန်ပါတယ်။

အဲ့ဒီရွေးကောက်ပွဲဆန့်ကျင်ရေး Billboard တွေကို ဒီဇင်ဘာ ၃ ရက်နဲ့ ၄ ရက်တွေမှာ ဆားလင်းကြီးမြို့နယ်အတွင်း အများပြည်သူအသုံးများတဲ့ လမ်းမကြီးတွေဘေးမှာ စိုက်ထူခဲ့ပြီး လှုပ်ရှားမှုမှာ ဆာလင်းကြီးမြို့နယ်သပိတ်အင်အားစုတွေနဲ့ မြို့နယ်ပြည်သူ့အုပ်ချုပ်ရေးအဖွဲ့ဝင်တွေ၊ နယ်မြေတာဝန်ခံတွေပါဝင်ကြတယ်လို့ ဆိုပါတယ်။

“အဓိက ရည်ရွယ်ချက်ကတော့ လာမယ့်ဒီဇင်ဘာ ၂၈ ရက်နေနဲ့ ဇန်နဝါရီ ၁၁ ရက်တွေမှာ အပိုင်းလိုက်ကျင်းပမယ့် စစ်တပ်ရဲ့ရွေးကောက်ပွဲကို ဆန့်ကျင်တဲ့အနေနဲ့ Billboard ထောင်ပြီး အထူးလှုပ်ရှားမှုလုပ်တာလို့ ပြောချင်ပါတယ်။ ခရီးသွားပြည်သူတွေအများကြီး ဖြတ်သန်းသွားလာနေတဲ့ပြ​ည်သူတွေ သိရှိဖို့ရယ်၊ မြို့ပြလူထုဖြစ်ဖြစ် အွန်လိုင်းက စောင့်ကြည့်တဲ့ ပြည်သူဖြစ်ဖြစ် မြေပြင်မှာသွားလာနေတဲ့ လမ်းသွားလမ်းလာကျေးလက်နေပြည်သူ တော်လှန်ရေးသမားတွေဖြစ်ဖြစ် လူထုလှုပ်ရှားမှုကနေဦးဆောင်ဦးရွက်ပြုတဲ့ Billboard ထောင်ပြီး ရွေးကောက်ပွဲဆန့်ကျင်ရေး။ ဒါကြီးကို ထောင်လိုက်ခြင်းအားဖြင့် ပြည်သူတရပ်လုံးသိရှိနိုင်ဖို့ ရည်ရွယ်ပြုလုပ်တဲ့ လှုပ်ရှားမှု ဖြစ်ပါတယ်။”လို့ ဆာလင်းကြီးမြို့နယ်သပိတ်အင်အားစုကတာဝန်ရှိသူတဦးက မြေလတ်အသံကို ပြောပါတယ်။

“သင့်မဲဖြင့် တရားဝင် လူသတ်ခွင့်မပေးနဲ့”စာတန်းပါ Billboard တွေကို စိုက်ထူခဲ့တာဖြစ်ပြီး အများပြည်သူတွေအနေနဲ့ စစ်ကော်မရှင်က ပြုလုပ်မယ့်ရွေးကောက်ပွဲဟာ အတုအယောင်သာဖြစ်တယ်ဆိုတာကို နိုင်ငံရေးအသိ၊ တော်လှန်အသိရသွားစေဖို့မျှော်လင့်တယ်”လို့ သိရပါတယ်။

စစ်ကော်မရှင်ဟာ နိုင်ငံရေးထွက်ပေါက်ဖြစ်တဲ့ ရွေးကောက်ပွဲကိုဖန်တီးပြီး အရပ်သားအသွင်ပြောင်းလဲကာ စစ်အာဏာရှင်စနစ်အုပ်ချုပ်ရေးတစ်ခု အမြစ်တွယ်စေဖို့၊ စစ်တပ်က တိုင်းပြည်နဲ့ ပြည်သူလူထုအပေါ် ရာသက်ပန်ဓားမိုးအုပ်ချုပ်သွားဖို့ဆိုတဲ့ စစ်တပ်ကြီးစိုးတဲ့နိုင်ငံရေးမျိုးကို ပုံဖော်သွားဖို့၊ ဒီအတုအယောင်ရွေးကောက်ပွဲကို ကျင်းပရန် စိုင်းပြင်းနေခြင်းလည်း ဖြစ်တယ်လို့ သပိတ်ကော်မတီထံက သိရပါတယ်။

ဆားလင်းကြီး၊ နိုဝင်ဘာ ၂၅၊ ၂၀၂၅။

စစ်ကိုင်းတိုင်း၊ ဆားလင်းကြီးမြို့နယ်မှာ လူတန်းစားအစုံ ထောင်နဲ့ချီပါဝင်တဲ့ စစ်ကော်မရှင်ရဲ့ရွေးကောက်ပွဲဆန့်ကျင်ရေး ဆိုင်ကယ်သပိတ်လှုပ်ရှားမှုကို နိုဝင်ဘာ ၂၄ ရက်က ပြုလုပ်ခဲ့တယ်လို့ သိရပါတယ်။

သပိတ်အင်အားစုတွေနဲ့ အင်အားထောင်နဲ့ချီတဲ့ ဒေသခံလူထုတွေ စုပေါင်းပြီး ဆားလင်းကြီးမြို့နယ်အတွင်းကနေ ဒေသတွင်းကျေးရွာတွေနဲ့ မကွေးတိုင်းအတွင်း ကျေးရွာတွေအထိ တရွာဝင်တရွာထွက် ဆိုင်ကယ်နဲ့လှည့်လည်ကာ ရွေ့လျားသပိတ်ပြုလုပ်ခဲ့တာလို့ သပိတ်လှုပ်ရှားမှုမှာ ပါဝင်ခဲ့သူတဦးက မြေလတ်အသံကို ပြောပါတယ်။

“ ဆိုင်ကယ်သပိတ်ဆိုတာ ရွေ့လျား၊ တရွာဝင် တရွာထွက်၊ ရွာပေါင်းများစွာကို ခြေဆန့်ပြီးတော့ ကျနော်တို့ ဆိုင်ကယ်သပိတ် လုပ်တဲ့အခါမှာ လူထုက ထင်မှတ်မထားလောက်အောင် နှမ်းရိတ်နေတဲ့ တောင်သူဦးကြီးတွေ၊ နှမ်းခါနေတဲ့ တောင်သူဦးကြီးတွေ၊ စပါးရိတ်၊ စပါးပုတ်နေတဲ့ တောင်သူ လယ်သမား ကျေးလတ်နေ ပြည်သူက အစ လူထုရဲ့ ရဲရဲတောက်အလံတွေနဲ့ ဆိုင်ကယ်သံကြားပြီးတော့ စစ်အာဏာရှင် ဆန့်ကျင်ရေး၊ အတုအယောင်ရွေးကောက်ပွဲ အလိုမရှိ ကြွေးကြော်သံတွေ ကြားလိုက်တာနဲ့ လူထုက ဝုန်းကနဲ သူတို့ရဲ့ နေနေတဲ့ ရောက်နေတဲ့ နေရာကနေ ကျနော်တို့ ဆိုင်ကယ် လူစုလူဝေးရှိတဲ့ သပိတ်တွေနားအထိ အတူတူပူပေါင်းဝန်းရံလာမှုကို မြင်ရတွေ့ရတာ အားရကျေနပ်လောက်တဲ့ သပိတ်လို့ ကျနော် ဆိုချင်ပါတယ်။” လို့ သပိတ်လှုပ်ရှားမှု ဦးဆောင်သူတဦးက ပြောပါတယ်။

စစ်ကော်မရှင်က လာမယ့် ဒီဇင်ဘာ ၂၈ ရက်မှာ ရွေးကောက်ပွဲပြုလုပ်မှာဖြစ်ပြီး အဆိုပါရွေးကောက်ပွဲ တရားမဝင်ကြောင်းကို လူထုအားနဲ့ ဖော်ထုတ်ရမှာဖြစ်ကြောင်း အထက်ပါ သပိတ်လှုပ်ရှားမှုမှာ ပါဝင်သူက ဆက်ပြောပါတယ်။

“ဒီရွေးကောက်ပွဲကို ဆန့်ကျင်ဖို့ လူထုအားလိုပါတယ်၊ လူထုကလည်း ဒီရွေးကောက်ပွဲဟာ အတုအယောင်ဖြစ်တယ်။ ငါတို့ကို ထောင်ချောက်ဆင်ထားတဲ့ ရွေးကောက်ပွဲကြီးဆိုတာကို လူထုတရပ်လုံးက နိုင်ငံရေးအသိ၊ နိုင်ငံရေးသတိ နိုးကြားပြီးတော့ ဒီရွေးကောက်ပွဲကို အုံလိုက်ကျင်းလိုက် အချိန်ကိုက် ဆန့်ကျင်လှုပ်ရှားကြမယ်ဆိုရင် ဒီရွေးကောက်ပွဲဆန့်ကျင်ရာမှာ လူထုလှုပ်ရှားမှု တနည်းအားဖြင့် သပိတ်တွေရဲ့ အရေးပါမှုက အင်မတန်မှ အခရာ ဖြစ်ပါတယ်။” လို့ သူကပြောပါတယ်။

အဆိုပါ ဆိုင်ကယ်သပိတ်လှုပ်ရှားမှုကို ဆားလင်းကြီးမြို့နယ် သပိတ်စစ်ကြောင်းက မကွေးတိုင်းကကျေးရွာ ၆ ရွာနဲ့ စစ်ကိုင်းတိုင်းက ကျေးရွာ ၄ ရွာတို့မှာ လှည့်လည်ချီတက်ခဲ့ကြတာဖြစ်ပါတယ်။

“လူထုရဲ့အား ပါဝင်မှုအခြေအနေကတော့ အံ့မခန်းပါပဲ၊ အားရကျေနပ်လောက်တဲ့ လူထုရဲ့ပါဝင်မှု ကျနော်တို့ တွေ့ခဲ့ရပါတယ်”လို့ လှုပ်ရှားမှုမှာ ပါဝင်ခဲ့သူတဦးက ပြောပါတယ်။

ယင်းမာပင်၊ အောက်တိုဘာ ၂၇၊ ၂၀၂၅။

စစ်ကိုင်းတိုင်း၊ ယင်းမာပင်မြို့နယ်ထဲမှာ ယင်းမာပင်မြို့နယ် သပိတ်အင်အားစုကဦးဆောင်ပြီး စစ်ကော်မရှင်က ကျင်းပပြုလုပ်မယ့် ရွေးကောက်ပွဲကို ဆန့်ကျင်တဲ့လှုပ်ရှားမှုတွေ ပြုလုပ်ခဲ့တယ်လို့ သပိတ်ကော်မတီဝင်တဦးက မြေလတ်အသံကို ပြောပါတယ်။

အောက်တိုဘာ ၂၇ ရက်မှာ သပိတ်အင်အားစုပူးပေါင်းအဖွဲ့တွေနဲ့ ဒေသခံတွေပူးပေါင်းပြီး တော်လှန်ရေးပိုစတာတွေကိုင်ဆောင်ကာ လှုပ်ရှားမှုပြုလုပ်ခဲ့ကြတာပါ။

“လတ်တလောမှာတော့ နေ့စဉ်ပုံမှန်ထွက်နေတာတော့ ၃ ဖွဲ့၊ ၄ ဖွဲ့လောက်တော့ ရှိတယ်ပေါ့၊ အဲ့ဒီထဲမှာမှ ပါနေတဲ့အင်အားစုတွေအကုန် စုပေါင်းပြီးတော့ တပ်ပေါင်းစုလို ပုံစံမျိုးကတော့ ၁လ ၁ကြိမ်သော်လည်းကောင်း၊ ၁လ ၂ကြိမ်သော်လည်းကောင်း လှုပ်ရှားဖြစ်ပါတယ်။”လို့ အထက်ပါသပိတ်ကော်မတီဝင်က ပြောပါတယ်။

အလားတူ ကုလသမဂ္ဂမှာ ပြည်သူလူထုရဲ့ အသံအစစ်အမှန်ကို ချပြနိုင်ရေးအတွက် သံအမတ်ကြီး ဦးကျော်မိုးထွန်း နေရာပြန်ရရေး လှုပ်ရှားမှုတွေကိုလည်း အဆိုပါ ရွေးကောက်ပွဲဆန့်ကျင်ရေးသပိတ်တွေမှာ တပါတည်း လှုပ်ရှားနေကြောင်း အထက်ပါ သပိတ်ကော်မတီဝင်က ပြောပါတယ်။

“သံတမန်ရေးအရ ကုလသမဂ္ဂမှာ ပြည်သူလူထုရဲ့ စစ်မှန်တဲ့အသံတွေကို ကုလသမဂ္ဂမှာ ချပြနိုင်ဖို့ပေါ့။ ဦးကျော်မိုးထွန်းသာ နေရာပြန်မရဘဲနဲ့ စစ်ကောင်စီဖက်က အဲ့ဒီနေရာကို ရသွားမယ်ဆိုရင် တကယ့်ပြည်သူလူထုခံနေရတဲ့ ဒုက္ခသုက္ခနဲ့ အခြေအနေ အစစ်အမှန်ကို ကုလသမဂ္ဂမှာ တင်ပြနိုင်ခြင်း မရှိဘဲနဲ့ စစ်ကောင်စီရဲ့ အတုအယောင် အလိမ်အညာ သတင်းတွေကိုပဲ ကုလသမဂ္ဂမှာ ရောက်ရှိသွားမှာပေါ့လေ၊ ဒါကြောင့် ကျနော်တို့ တော်လှန်ရေးအနေနဲ့ရော ပြည်သူလူထုအတွက်က ဦးကျော်မိုးထွန်းသည် ကုလသမဂ္ဂမှာ နေရာပြန်လည် ရရှိရေးက အရမ်းအရေးကြီးတဲ့ အခြေအနေဖြစ်တယ်။” လို့ သူက ပြောပါတယ်။

ယင်းမာပင်မြို့နယ် သပိတ်အင်အားစုမှာတော့ ရွှေနွယ်သွေး သပိတ်စစ်ကြောင်း၊ အောင်လံလွှင့်မည် ရွှေရေကြည် သပိတ်စစ်ကြောင်း၊ အောင်လံလွှင့်မည် ဒေါင်းသွေးနီ သပိတ်စစ်ကြောင်း၊ နောက်ပြန်မလှည့်ကြေး ဒီတော်လှန်ရေး သပိတ်စစ်ကြောင်းတွေ အပါအဝင် သပိတ်ကော်မတီ ၁၅ ခုနဲ့ ဖွဲ့စည်းထားတယ်လို့ သိရပါတယ်။

မြေလတ်အသံ၊ စက်တင်ဘာ ၁၅၊ ၂၀၂၅။

စစ်ကော်မရှင်ပြုလုပ်မယ့် အတုအယောင်ရွေးကောက်ပွဲကို ဆန့်ကျင်တဲ့ ဆန္ဒပြလူထုလှုပ်ရှားမှုသပိတ် စစ်ကိုင်းတိုင်း၊ ဆားလင်းကြီးမြို့နယ်တနေရာမှာ ပြုလုပ်ခဲ့ကြတယ်လို့ ဒေသတွင်းသပိတ်အင်အားစုတွေထံက သိရပါတယ်။

အဲ့ဒီလူထုလှုပ်ရှားမှုကို စက်တင်ဘာ ၁၄ ရက် မနေ့ မနက်ပိုင်းမှာ ဆားလင်းကြီးမြို့နယ် သပိတ်အင်အားစုတွေနဲ့ ဒေသခံပြည်သူတွေပူးပေါင်း အင်အား ၂၀၀ ခန့်က ပြုလုပ်ခဲ့တာဖြစ်ပြီး အတုယောင်ရွေးကောက်ပွဲမှာ ပြည်သူတွေမပါဝင်ဖို့ ဟောပြောလှုံ့ဆော်ခဲ့ကြတယ်လို့ ဆိုပါတယ်။

” စကမ ပြုလုပ်တဲ့အတုယောင်ရွေးကောက်ပွဲဟာ ပြည်သူတွေအတွက် ထွက်ပေါက်မဟုတ်ပဲ ထောင်ချောက်သာဖြစ်ကြောင်း လူထုကို လှုပ်နှိုးဖို့ ပြုလုပ်ခဲ့တာဖြစ်တယ်”လို့ ဆားလင်းကြီးမြို့နယ် သပိတ်အင်အားစုအဖွဲ့ဝင်တဦးက မြေလတ်အသံကို ပြောပါတယ်။

လာမယ့် ဒီဇင်ဘာလမှာ ရွေးကောက်ပွဲလုပ်ဖို့ ပြင်ဆင်နေပြီး အပိုင်း ၃ ပိုင်းခွဲ ပြုလုပ်သွားမှာဖြစ်ကာ အပိုင်း ၁ ကို မြို့နယ် ၁၀၂ ခုမှာ စတင်ကျင်းပမယ်လို့ စစ်ကော်မရှင်လက်အောက် ရွေးကောက်ပွဲ ကော်မရှင်က ထုတ်ပြန်ထားပါတယ်။

စစ်ကိုင်း၊ ဇန်နဝါရီ ၂၃၊ ၂၀၂၃။

စစ်ကိုင်းတိုင်း၊ ဆားလင်းကြီးမြို့နယ်မှာ ဇန်နဝါရီလ ၂၃ ရက်ဒီနေ့မနက်အစောပိုင်း အညာပစ်တိုင်းထောင်လေးများအဖွဲ့က ဆိတ်ခေါင်းချိတ်ပြီး ခွေးသားရောင်းတဲ့ ရွေးကောက်ပွဲ စာတန်းနဲ့အတူ မြန်မာတနိုင်ငံလုံးဆိုင်ရာ သပိတ်အင်အားစုများပေါင်းစပ်ညှိနှိုင်းရေးကော်မတီ (GSCB) က ထုတ်ဝေတဲ့ ရွေးကောက်ပွဲဆန့်ကျင်ရေး လက်ကမ်းစာစောင်တွေကို ဖြန့်ဝေခဲ့ကြတယ်လို့ သိရပါတယ်။