ရေစကြို၊ ဩဂုတ် ၃၁၊ ၂၀၂၅။

မကွေးတိုင်း၊ ရေစကြိုမြို့နယ်၊ ရေလယ်ကျွန်းဒေသ၊ ငတရော်ရွာကို စစ်ကော်မရှင်တပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် နေအိမ်ပျက်စီးပြီး အမျိုးသမီး ၃ ဦး သေဆုံးခဲ့တယ်လို့ ရေစကြိုမြို့ခံတွေ ဆီက သိရပါတယ်။

ဩဂုတ် ၃၁ ရက် ဒီနေ့လယ် ၁ နာရီခွဲဝန်းကျင်လောက်မှာ ဂျက်ဖိုက်တာနဲ့ ပေါင် ၃၀၀ ဗုံး‌တွေ ကြဲချတဲ့အပြင် ရော့ကတ်နဲ့ပါပစ်ခတ်တာကြောင့် နေအိမ် ၂ လုံးပျက်စီးပြီး ဒေသခံတွေသေဆုံးခဲ့ကြတာလို့ ဆိုပါတယ်။

“ပေါင် ၃၀၀ ဗုံးသီးတွေလည်း ကြဲချတယ်၊ သေဆုံးသွားတာတော့ ၃ ဦးရှိတယ်၊ ဒဏ်ရာရတဲ့သူတွေလည်းရှိတယ်၊ သေဆုံးတာက အမျိုးသမီး ၃ ဦးပါ၊ တိုက်ပွဲမရှိဘဲနဲ့ ဒီအတိုင်းလာကြဲသွားတာ၊ နေအိမ် ၂ လုံးလောက် ပျက်စီးသွားတယ်”လို့ ရေစကြိုမြို့ခံတဦးက ပြောပါတယ်။

ငတရော်ရွာဟာ အိမ်ခြေ ၁,၀၀၀ နဲ့ လူဦးရေ ၃,၀၀၀ ကျော်ရှိတဲ့ကျေးရွာတရွာဖြစ်ပြီး ခုလို လေကြောင်းကနေ တိုက်ခိုက်ခံရတာကြောင့် ဒေသခံတွေလည်းကြောက်လန့်ပြီး ထွက်ပြေးနေကြရတယ်လို့ သိရပါတယ်။

အခုနှစ်မေ ၁၉ ရက်မနက်ပိုင်းကလည်း အင်အား ၂၀၀ ဝန်းကျင်ပါစစ်ကြောင်းက ငတရော်ကျေးရွာကို စစ်ကြောင်းထိုးမီးရှို့ခဲ့တာကြောင့် နေအိမ်တွေပျက်စီးဆုံးရှုံးခဲ့ပါသေးတယ်။

စာတည်း – လင်း

ရေစကြို၊ ဩဂုတ် ၂၇၊ ၂၀၂၅။

မကွေးတိုင်း၊ ရေစကြိုမြို့၊ အမှတ် (၇)၊ နှစ်ထောင်ပြည့်ရပ်ကွက်က အမျိုးသား ၁ ဦး စစ်ကော်မရှင်တပ်တွေရဲ့ ပစ်ခတ်တာကိုခံရပြီး သေဆုံးခဲ့တယ်လို့ ရေစကြိုမြို့ခံတွေဆီက သိရပါတယ်။

ဩဂုတ် ၂၆ ရက် ညနေ ၂ နာရီခွဲမှာ အဲ့ဒီရပ်ကွက်ရှိ ပန်းခြံထဲမှာတပ်စွဲနေတဲ့စစ်ကော်မရှင်တပ်တွေက ဆိုင်ကယ်စီးအမျိုးသား ၂ ဦးကို လိုက်လံပစ်ခတ်ချိန် ရပ်ကွက်တွင်းရှိ နေအိမ် ၁ အိမ်မှာ အဝတ်လှမ်းနေတဲ့ အသက် ၃၉ နှစ် အရွယ် ကိုဇော်ဇော်ဝင်းကို ထိမှန်ပြီးသေဆုံးခဲ့တာလို့ ဆိုပါတယ်။

“လူ ၂ ဦးက အရက်ဆိုင်ကပြန်လာတာ၊ ဦးထုပ်မဆောင်းဘူး၊ အရက်ကလည်း မူးနေတော့ မေ့မေ့ရော့ရော့နဲ့ သူတို့ရှေ့မှာ ဦးထုပ်မဆောင်းပဲနဲ့ ဆိုင်ကယ်စီးပြေးလို့ဆိုပြီး ဆိုင်ကယ်နဲ့ ၅ ဦးလောက်ကလိုက်ပစ်တာ၊ လိုက်ပစ်ရင်းနဲ့ အမှတ် (၇)၊ နှစ်ထောင်ပြည့်ရပ်၊ တိလောကဘကကျောင်းနဲ့ မျက်နှာချင်းဆိုင် အနောက်ဘက်အိမ်မှာရှိတဲ့ ရေချိုးပြီး အဝတ်လျှော်ပြီး၊ အဝတ်လှန်းနေတဲ့ အမျိုးသား ၁ ဦး (ကျည်ထိ) သေသွားတာ”လို့ ရေစကြိုမြို့ခံတဦးက ပြောပါတယ်။

ကိုဇော်ဇော်ဝင်းဟာ မြိုင်မြို့နယ်က ရေနံမှော်တခုမှာ အလုပ်လုပ်ကိုင်နေသူဖြစ်ပြီး နေအိမ်ကိုပြန်ရောက်ချိန် နာရီပိုင်းအတွင်းမှာတင် ခုလိုပစ်ခတ်ခံခဲ့ရတာဖြစ်သလို ပစ်ခတ်ခံရချင်းဆေးရုံကိုသွားပေမယ့် ဦးခေါင်းနဲ့ ခန္ဓာကိုယ် ကျည်ထိမှန် ဒဏ်ရာတွေနဲ့ ဆေးရုံမှာတင်သေသွားတာလို့ သိရပါတယ်။

“တကယ်တော့ သူက လူပျိုကြီးပါ၊ မိအိုဖအို လုပ်ကိုင်ကျွေးနေတာ၊ ရေနံမှော်ထဲက ပြန်ရောက်တာ ၁ နာရီကျော်ကျော်ပဲရှိသေးတယ်၊ ခဏနားပြီး အဝတ်လျှော် အဝတ်လှန်းနေတုန်းမှာ ဖြစ်သွားတာ၊ ရေစကြိုဆေးရုံပေါ်ရောက်သေးတယ်၊ အသက်ကယ်ဆေး ၂ လုံးထိုးတာကို မမှီလိုက်ဖူး၊ သေသွားတာ၊” လို့ ရေစကြိုမြို့ခံတဦးကပြောပါတယ်။

ကိုဇော်ဇော်ဝင်ရဲ့အလောင်းကိုတော့ သြဂုတ် ၂၇ ရက်ဒီညနေ ၃ နာရီဝန်းကျင်မှာ သင်္ဂြိုဟ်သွားမယ်လို့လည်း သိရပါတယ်။

ရေစကြိုမှာ ဆိုင်ကယ်စီးဦးထုပ် မဆောင်းတာ၊ ဆိုင်ကယ် ၂ ဦးစီးလာရင် ရပ်ခိုင်းပြီး မရပ်ပါက နောက်ကနေ လိုက်လံပစ်ခတ်လေ့ရှိတယ်လို့ သိရပါတယ်။

ပြီးခဲ့တဲ့ ၂၀၂၄၊ စက်တင်ဘာ ၁၅ ရက်ကလည်း ရေစကြို အမှတ် ၁ ထင်းတန်းရပ်ကွက်မှာ ဆိုင်ကယ်စီးလာတဲ့ လူငယ် ၂ ဦးကို စစ်ကော်မရှင်က ပစ်ခတ်လို့ သေဆုံးခဲ့ပါသေးတယ်။

စာတည်း – လင်း

ရေစကြို၊ ဩဂုတ် ၆၊ ၂၀၂၅။

မကွေးတိုင်း၊ ရေစကြိုမြို့နယ်၊ ဖြုံဘူးကျေးရွာကို စစ်ကောင်စီတပ်ကပစ်ခတ်တဲ့ လက်နက်ကြီးကျည် ထိမှန်ပြီး အသက် ၂ နှစ် အရွယ် ကလေး ၁ ဦးသေဆုံးခဲ့တယ်လို့ ရေစကြိုမြို့ မြို့ခံတွေဆီက သိရပါတယ်။

ဩဂုတ် ၄ ရက် မနက် ၁၀ နာရီဝန်းကျင်မှာ ရေစကြိုအခြေစိုက် ခလရ ၂၅၆ တပ်ကပစ်ခတ်တဲ့ ၈၀ မမ လက်နက်ကြီးကျည်တွေက ဖြုံဘူးကျေးရွာကိုကျရောက်ပေါက်ကွဲချိန် ထိမှန်သေဆုံးခဲ့ကြတာလို့ ဆိုပါတယ်။

“အားလုံးပေါင်း ၁၇ လုံးပစ်တာ၊ တနေကုန်ပဲ၊ မနက် ၁၀ နာရီလောက်က ခလရ ၂၅၆ ကနေပြီးတော့ အနောက်ဘက်ကို ၃ လုံးပစ်တာ၊ အထိအခိုက်တော့မရှိပါဘူး၊ နေ့လယ် ၁၂ နာရီလောက်ကြတော့ ရေလယ်ကျွန်းဘက်ကို လှမ်းပစ်တာ ဖြုံဘူးရွာထဲကျတဲ့အချိန်မှာ ကလေး ၁ ဦးကတော့ ဆေးကုသမှုခံယူပြီး ဆုံးသွားတယ်၊” လို့ ရေစကြိုမြို့ခံတဦးက ပြောပါတယ်။

ဒီပစ်ခတ်မှုကြောင့် အသက် ၂ နှစ် အရွယ် ယောကျ်ားလေး ၁ ဦး သေဆုံးပြီး အသက် ၆၀ နှစ် အရွယ်ဦးဝင်းကြည်ကတော့ ဒဏ်ရာပြင်းပြင်းထန်ထန်ရခဲ့တယ်လို့ ဆိုပါတယ်။

ဒါ့အပြင် အဲ့ဒီနေ့ ည ၁၁ နာရီခွဲလောက်မှာ ရေစကြိုမြို့အနောက်ဘက်အခြမ်းကို ၉ လုံး ထပ်မံ ပစ်ခတ်ခဲ့ပြီး ဒီပစ်ခတ်မှုမှာတော့ အထိအခိုက်မရှိခဲ့ဘူးလို့ ရေစကြိုမြို့ခံတဦးက ပြောပါတယ်။

ဖြုံဘူးကျေးရွာဟာ လူဦးရေ ၆၀၀ လောက်ရှိပြီး ဩဂုတ် ၃ ရက်ကစလို့ တရွာလုံး ရွာကနေတိမ်းရှောင်နေရတာလို့ သိရပါတယ်။

စာတည်း – လင်း

ရေစကြို၊ ဇူလိုင် ၁၇၊ ၂၀၂၅။

မကွေးတိုင်း၊ ရေစကြိုမြို့နယ်၊ ကမ္ဘဲ့ကျေးရွာမှာ စစ်ကောင်စီတပ်ကပစ်ခတ်တဲ့ လက်နက်ကြီးကျည် ထိမှန်ပြီး ပြည်သူ့တပ်ဖွဲ့ဝင် ၁ ဦးအပါ ၄ ဦးသေဆုံးခဲ့တယ်လို့ ရေစကြိုမြို့နယ်ပြည်သူ့ကာကွယ်ရေးတပ်ဖွဲ့ဆီက သိရပါတယ်။

ဇူလိုင် ၁၅ ရက်ည ၁၀ နာရီဝန်းကျင်မှာ ရေစကြိုအခြေစိုက် ခလရ ၂၅၈ တပ်ကပစ်ခတ်တဲ့ ၈၀ မမ လက်နက်ကြီးကျည်တွေက ကမ္ဘဲ့ကျေးရွာကိုကျရောက်ပေါက်ကွဲချိန် ထိမှန်သေဆုံးခဲ့ကြတာလို့ ဆိုပါတယ်။

“ပထမ ၁ လုံးပစ်ခတ်တာမှာ ပြည်သူနေအိမ်ထိမှန်ပြီး မီးလောင်သွားတာ။ မီးလောင်သွားတဲ့အချိန် ကျနော်တို့ရဲဘော်တွေက မီးလောင်တဲ့အိမ်ကိုသွားရောက်ငြှိမ်းသတ်ဖို့လုပ်တဲ့အချိန် နောက် ၁ လုံးက သူတို့စုဝေးတဲ့နေရာကျရောက်ပေါက်ကွဲပြီး တပ်ဖွဲ့ဝင် ၁ ဦး၊ သူ့ဇနီး၊ CDM ကျောင်းဆရာမနဲ့ ပြည်သူ ၁ ဦးထိခိုက်သေဆုံးခဲ့တယ်” လို့ ရေစကြိုမြို့နယ် ပြည်သူ့ကာကွယ်ရေးတပ်ဖွဲ့ရဲ့ သတင်းနဲ့ ပြန်ကြားရေးတာဝန်ခံက ပြောပါတယ်။

ဒီပစ်ခတ်မှုကြောင့် အသက် ၂၀ နှစ် အရွယ် ရေစကြိုပကဖတပ်ဖွဲ့ဝင်ကောက်ကြီး(ခ)မောင်ရန်နိုင်နဲ့ ဇနီးဖြစ်သူ အသက် ၂၄ နှစ် အရွယ် မသဇင်ဝေ၊ အသက် ၃၂ နှစ် အရွယ် CDM ကျောင်းဆရာမ မနွေဦးမေနဲ့ အသက် ၁၇ နှစ် အရွယ်မောင်ရှင်းလင်းကိုတို့ သေဆုံးခဲ့ပြီး ဒေသခံ ၄ ဦးလည်း ထိခိုက်ဒဏ်ရာရခဲ့တယ်လို့ ဆိုပါတယ်။

“ကျဆုံးသွားတဲ့ တပ်ဖွဲ့ဝင်နဲ့ ဇနီးကိုတော့ ရေစကြို ပကဖ ကနေ စစ်ဓလေ့ထုံးစံအတိုင်း နာရေးကို ပြုလုပ်ပေးခဲ့တယ်၊ CDM ကျောင်းဆရာမကိုတော့ ဇာတိရွာကို ပြန်ခေါ်သွားပြီးတော့ ကောင်းမွန်စွာပဲ သင်္ဂြိုဟ်ပေးကြတယ်၊ ရွာထဲက ပြည်သူကိုလည်း ဒီတချိန်တည်းမှာပဲ မိသားစုတွေက နာရေးလုပ်ခဲ့တာ၊” လို့ အထက်ပါတာဝန်ခံကပြောပါတယ်။

ပြီးခဲ့တဲ့ ၂၀၂၃၊ အောက်တိုဘာ ၁၉ ရက်ကလည်း အိမ်ခြေ ၁၀၀ ဝန်းကျင်ရှိတဲ့ ကမ္ဘဲ့ကျေးရွာကို စစ်ကောင်စီတပ်တွေက စစ်ကြောင်းထိုးပြီး နေအိမ်တွေကို မီးရှို့ဖျက်ဆီးခဲ့သေးတယ်လို့ သိရပါတယ်။

စာတည်း – လင်း

ရေစကြို၊ ဇူလိုင် ၂၊ ၂၀၂၅။

မကွေးတိုင်း၊ ရေစကြိုမြို့နယ်၊ ပခုက္ကူ-ရေစကြိုကားလမ်းပိုင်းမှာ ခလရ ၂၅၆ တပ်ရင်းကိုပို့မယ့် ရိက္ခာတင်ကား ၁ စီးကို ဖမ်းဆီးခဲ့တယ်လို့ ရေစကြိုပြည်သူ့ကာကွယ်ရေးအဖွဲ့ဆီက သိရပါတယ်။

ပခုက္ကူအခြေစိုက် တပ်မ ၁၀၁ ကနေ ရေစကြိုအခြေစိုက် ခလရ ၂၅၆ တပ်ကိုပို့မယ့် ရိက္ခာတင် မှန်လုံကားကို ဇူလိုင် ၂ ရက် မနက် ၉ နာရီမှာဖမ်းမိခဲ့တာလို့ ဆိုပါတယ်။

“ရေစကြို-ပခုက္ကူကားလမ်းမပေါ် တနေရာမှာ ကျနော်တို့ ရှောင်တခင်စစ်ဆေးရင်းနဲ့ ပခုက္ကူတပ်မ ၁၀၁ ကနေ ခလရ ၂၅၆ တပ်ထဲကိုပို့မဲ့ရိက္ခာတွေကို ဖမ်းဆီးမိခဲ့တာ၊ ဖမ်းဆီးမိတာက ရေစကြိုမြို့ ပခုက္ကူ-ရေစကြိုကားလမ်းတနေရာမှာပါ”လို့ ရေစကြိုပြည်သူ့ကာကွယ်ရေးအဖွဲ့ရဲ့ သတင်းနဲ့ ပြန်ကြားရေးတာဝန်ခံက ပြောပါတယ်။

ကားပေါ်မှာပါတဲ့ ဆန် ၃၅ အိတ်၊ စားဆုံးဆီ ၁၄ ပုံး၊ စက်သုံးဆီ ၇ ပုံး၊ ဆား ၁ အိတ်၊ ဟင်းချိုမှုန့် ၁ အိတ်တို့ကိုသိမ်းဆည်းထားပြီး ကားမောင်းနဲ့ယာဥ်နောက်လိုက်ကိုတော့ စစ်ဆေးနေတယ်လို့ သူကဆက်ပြောပါတယ်။

ခလရ တပ်ထဲကို ပို့မယ်ဆိုတာကို ရှောင်တခင်စစ်ဆေးချိန် ပြေစာထဲမှာတွေ့ရတဲ့ အချက်အလက်တွေအရ အတည်ပြုနိုင်တာလို့လည်း ဆိုပါတယ်။

ခုလိုစစ်ကောင်စီတပ်တွေဆီပို့မယ့် ရိက္ခာကားတွေကို ဖမ်းမိတာ ၄ ကြိမ်ထက်မနည်းရှိခဲ့ပြီး ပြီးခဲ့တဲ့နှစ် ဇူလိုင် ၁၄ ရက်ကလည်း ရေစကြို ခလရ ၂၅၇ တပ်ထဲကနေ ဇီးတောရွာ ပျူစောထီးတွေဆီပို့မဲ့ရိက္ခာကား ၁ စီးကိုလည်း ရေစကြိုပြည်သူ့ကာကွယ်ရေးအဖွဲ့က ရေစကြိုမြို့နယ်အတွင်းမှာ ဖမ်းဆီးခဲ့ပါသေးတယ်။

စာတည်း – လင်း

ရေစကြို၊ ဇွန် ၂၈၊ ၂၀၂၅။

မကွေးတိုင်း၊ ရေစကြိုမြို့ပေါ်က ငြိမ်းဇာနည်အမည်ရှိ စစ်ကောင်စီတပ်ဖွဲ့ဝင်တွေတပ်စွဲထားတဲ့နေရာကထွက်လာတဲ့ အငြိမ်းစားတပ်ကြပ်ကြီး ၁ ဦးကို ပစ်ခတ်ရာသေဆုံးခဲ့တယ်လို့ ရေစကြိုမြို့နယ်ပြည်သူ့ကာကွယ်ရေးတပ်ဖွဲ့ဆီက သိရပါတယ်။

ဇွန် ၂၈ ရက် ဒီမနက် ၉ နာရီလောက်မှာ အဆိုပါစခန်းကထွက်လာတဲ့ အသက် ၆၄ နှစ်အရွယ် အငြိမ်းစားတပ်ကြပ်ကြီး ထွန်းအောင် ကို ဒေသခံကာကွယ်ရေးတပ်တွေကဖမ်းဆီးရာ အဖမ်းမခံဘဲထွက်ပြေးချိန်မှာ ပစ်ခတ်လိုက်တာလို့ ဆိုပါတယ်။

“ငြိမ်းဇာနည်စခန်းကနေ ဒီကောင်က မြို့အပြင်ကိုထွက်လာတာ၊ ကျနော်တို့ရဲဘော်တွေက တားပြီးဖမ်းဆီးတာ၊ သူက အသာတကြည်အဖမ်းဆီးမခံဘဲ ဆိုင်ကယ်နဲ့ထွက်ပြေးတဲ့အတွက်ကြောင့် လိုက်လံပစ်ခတ်ပြီးတော့ အသေဖမ်းဆီးလိုက်ရတာ။”လို့ ရေစကြိုမြို့နယ် ပြည်သူ့ကာကွယ်ရေးတပ်ဖွဲ့ သတင်းနဲ့ပြန်ကြားရေးတာဝန်ခံက ပြောပါတယ်။

သူဟာ ၂၀၂၁ ဧပြီ ၂၆ မှာအငြိမ်းစားယူပြီးနောက် ရေစကြိုမြို့ပေါ်က စစ်မှုထမ်းဟောင်းရုံးမှာ ပြန်လည်တာဝန်ထမ်းဆောင်နေသူဖြစ်တယ်လို့လည်း ဆိုပါတယ်။

“အငြိမ်းစားယူထားပေမဲ့လည်း သူက စစ်မှုထမ်းဟောင်းရုံးမှာပြန်ပြီးတော့ တာဝန်ထမ်းဆောင်နေတဲ့သူပါ၊ သူက မြို့ပေါ်မှာ စစ်ကောင်စီအတွက်ပေါ်တာဆွဲပေးတာမျိုးတွေ၊ သန်းခေါင်စာရင်းကောက်ပေးတာမျိုးတွေ လုပ်ပေးတယ်။”လို့ အထက်ပါသတင်းနဲ့ပြန်ကြားရေးတာဝန်ခံက ပြောပါတယ်။

ပစ်ခတ်ပြီးနောက် စာရွက်စာတမ်း၊ ဖုန်း ၁ လုံး၊ ဆိုင်ကယ် ၁ စီး သိမ်းဆည်းခဲ့ပြီး အလောင်းကို ရေစကြိုမြို့အထွက်မှာထားခဲ့တယ်လို့ သူကဆက်ပြောပါတယ်။

ပြီးခဲ့တဲ့ မေ ၃ ရက်ကလည်း ရေစကြိုမြို့ပေါ် ရုံးပေါင်းစုံထဲကို လက်နက်ခဲယမ်းပို့ပြီးပြန်လာတဲ့ ခလရ ၂၅၈ တပ်က အင်အား ၉၀ ပါ စစ်ကြောင်းကို ရေစကြိုမြို့နယ်ပြည်သူ့ကာကွယ်ရေးတပ်ဖွဲ့က ‌ရေစကြိုမြို့အထွက်မှာ မိုင်းဆွဲ တိုက်ခိုက်ခဲ့ပါသေးတယ်။

စာတည်း – လင်း

ရေစကြို၊ မတ် ၁၅၊ ၂၀၂၅။

မကွေးတိုင်း၊ ရေစကြိုမြို့နယ်အတွင်း စစ်ကြောင်းထိုးကာ ဒေသခံတွေကိုသတ်ဖြတ်ခဲ့တဲ့ စစ်ကောင်စီစစ်ကြောင်းက မြေတော်ရွာကို ၂ ရက်ဆက်မီးရှို့ဖျက်ဆီးနေတယ်လို့ ဒေသခံတွေ ဆီကသိရပါတယ်။

အင်အား ၁၅၀ ဝန်းကျင်ပါတဲ့စစ်ကောင်စီစစ်ကြောင်းဟာ မတ် ၁၄ ရက်မနေ့ကမနက် ၆ နာရီလောက်မှာ ရွာထဲဝင်ရောက်လာပြီးနောက် မနက် ၆ နာရီခွဲလောက်ကစတင်မီးရှိုခဲ့တယ်လို့ ဆိုပါတယ်။

အဲ့ဒီနောက်ရွာမှာ ညအိပ်တပ်စွဲခဲ့ကာ မတ် ၁၅ ရက်ဒီမနက်ပိုင်းကနေ နေ့လယ် ၃ နာရီကျော်အထိ ရွာထဲက နေအိမ်တွေကို မီးထပ်ရှို့နေတာလို့ ဒေသခံတဦးက ပြောပါတယ်။

“ရွာကိုမီးတန်းရှို့တာပဲ၊ နာရီဝက်လောက်အကြာမှာ မီးတန်းရှို့တာ၊ မနေ့ကတနေကုန်မီးရှို့တယ်၊ ဒီနေ့မနက် ၉ နာရီလောက်ကစပြီးပြန်ရှို့တာ၊ ရေစကြိုမြို့နယ်မှာ ဒီစစ်ကြောင်းအဆိုးဆုံးပြောပါတော့၊” လို့ ဒေသခံတဦးက ပြောပါတယ်။

မြေတော်ကျေးရွာမှာ အိမ်ခြေ ၅၀၀ ဝန်းကျင်ရှိပြီး လက်ရှိအချိန်ထိရွာထဲမှာ စစ်ကောင်စီတပ်တွေရှိနေသေးတာကြောင့် ပျက်စီးဆုံးရှုံးမှုအခြေအနေကိုတော့ အတည်မပြုနိုင်သေးဘူးလို့ဆိုပါတယ်။

စစ်ကြောင်းထိုးနေတဲ့အတွက် မြေတော်ရွာအပါအဝင် သပြေပင်၊ ဆည်သစ်မြင်၊ မြေဇပ်ကုန်း၊ ကိုင်း၊ ကျွဲကုန်း၊ ချောက်မှုးကျွန်း၊ ဘိုကုန်း၊ ကံဦး၊ မဲကုန်း၊ တောင်ကုန်း၊ မိဖုရား၊ မီးလောင်းကျွန်း၊ ဖြုံဘူး၊ မိုးကွဲ၊ မိုးဖြူ၊ ငတရော် စတဲ့ကျေးရွာတွေက ဒေသခံ ၂ သောင်းခွဲကျော်လည်း ရွာကထွက်ပြေးတိမ်းရှောင်နေရတယ်လို့ ဆိုပါတယ်။

အဆိုပါစစ်ကြောင်းဟာ တပ်မ ၁၁ လက်အောက်ခံ ခလရ ၂၅၆၊ ခလရ ၂၅၇၊ ခလရ ၂၅၈ က စစ်ကောင်စီတပ်သားတွေပါဝင်တဲ့ ပြီးခဲ့တဲ့ မတ် ၇ ရက်ကနေ ၁၂ ရက်အထိ ရေစကြိုမြို့နယ်၊ သာဂေါင်ရွာမှာ တပ်စွဲနေထိုင်ခဲ့ပြီး အသက် ၉၀ အရွယ်အမျိုးသား ၁ ဦးအပါ ဒေသခံ ၆ ဦးကိုသတ်ဖြတ်ခဲ့ကာ ရွာကထွက်ချိန်မှာလည်း နေအိမ်တွေကိုမီးရှို့ခဲ့ပါသေးတယ်။