မိုင်း

မြစ်ခြေ၊ စက်တင်ဘာ ၂၊ ၂၀၂၅။

မကွေးတိုင်း၊ ပခုက္ကူခရိုင်၊ မြစ်ခြေမြို့အနီး စစ်ကော်မရှင်စစ်ကြောင်း ၂ ကြောင်းကို မိုင်းထောင်ရင်း မိုင်းမတော်တဆဖြစ်ပြီး ပြည်သူ့ကာကွယ်ရေးတပ်ဖွဲ့ – PDF ၁ ဦးကျဆုံးခဲ့တယ်လို့ ပခုက္ကူခရိုင်ပြည်သူ့ကာကွယ်ရေးတပ်ဖွဲ့ ၅ ဧရာဒေါင်းပြည်သူ့ကာကွယ်ရေးတပ်ဖွဲ့ဆီက သိရပါတယ်။

ကျဆုံးခဲ့သူဟာ ဧရာဒေါင်း ပြည်သူ့ကာကွယ်ရေးတပ်ဖွဲ့ ၅ တပ်ဖွဲ့ဝင် အသက် ၂၀ နှစ်အရွယ် မောင်မောင်ခန့် (ခ) AK မောင်ကြီးဖြစ်ပြီး စက်တင်ဘာ ၁ ရက် ညနေ ၃ နာရီခန့်မှာ မိုင်းထောင်ရင်း ပေါက်ကွဲမှုဖြစ်ကာ ကျဆုံးခဲ့တာလို့ ဆိုပါတယ်။

” မိုင်း Error ဖြစ်သွားတာ၊ ဆေးရုံကိုမရောက်လိုက်ဘူး၊ ဖြစ်တဲ့နေရာမှာတင် ပွဲချင်းပြီး ကျဆုံးသွားတာ။ စစ်ကော်မရှင် စစ်ကြောင်း ၂ ကြောင်းကျွံလာမှာကြောင့် မိုင်းသွားခင်းတာ၊ မတော်တဆ ကပ်တောက်က error ထဖြစ်ပြီး သူအဲ့ဒီနားမှာတင် ပွဲချင်းပြီး(ကျ)သွားတာ” လို့ ဧရာဒေါင်းပြည်သူ့ကာကွယ်ရေးတပ်ဖွဲ့ သတင်းနဲ့ပြန် ကြားရေးတာဝန်ခံ ကိုရှိန်းက မြေလတ်အသံကို ပြောပါတယ်။

ကျဆုံးတပ်ဖွဲ့ဝင်ရဲ့ ဈာပနအခမ်းအနားကိုတော့ စက်တင်ဘာ ၁ ရက် ယမန်နေ့ ညနေ ၅ နာရီမှာပဲ မြစ်ခြေမြို့တနေရာမှာ ပြုလုပ်ခဲ့ပြီး အခမ်းအနားကို ရပ်မိရပ်ဖတွေ၊ ပြည်သူတွေ၊ တော်လှန်ရေးတပ်ဖွဲ့ဝင်တွေ တက်ရောက်ခဲ့ကြတယ်လို့ ဆိုပါတယ်။

” သူတော်လှန်ရေးထဲဝင်တာ မနက်ဖြန်ဆို ၁ နှစ်ပြည့်ပြီ၊ မြစ်ခြေမြို့ကပါပဲ၊ သူ့ရဲ့မိဘတွေကိုတော့ (ကျပ်) သိန်း ၂၀ ထောက်ပံ့ပြီး ခမ်းခမ်းနားနားတော့ လုပ်ပေးခဲ့တယ်၊ စစ်ကြောင်းလည်းရှိတော့ အကျဉ်းချုပ်နဲ့ မြန်မြန်လုပ်ပေးခဲ့တာ၊ အမိန့်ပြန်ပြီး သေနတ်ဖောက်တာပဲလုပ်ခဲ့တာ” လို့ သူက ဆက်ပြောပါတယ်။

စစ်ကော်မရှင်တပ်နဲ့တိုက်ပွဲတွေအတွင်း ယမန်နေ့ကျဆုံးတပ်ဖွဲ့ဝင်အပါ ဧရာဒေါင်းပြည်သူ့ကာကွယ်ရေးတပ်ဖွဲ့ ၅ မှ တပ်ဖွဲ့ဝင် ၈ ဦးအထိ ကျဆုံးခဲ့တယ်လို့ သိရပါတယ်။

ပဲခူး၊ မတ် ၃၁၊ ၂၀၂၃။

ပဲခူးတိုင်းဒေသကြီး၊ ကျောက်ကြီးမြို့နယ်၊ ကျောက်ကြီး-နတ်သံကွင်းလမ်း ညောင်ကုန်းတံတားမှာ အုတ်သယ်ကား မိုင်းထိလို့ ၂ ဦးသေ၊ ၃ ဦး ဒဏ်ရာရသွားတယ်လို့ သိရပါတယ်။

မတ်လ ၃၀ ရက်နေ့ မနက် ၈ နာရီ ၅၀ မိနစ်ခန့်မှာ ပဲနွယ်ကုန်းဘက်ကနေ ကျောက်ကြီးဘက်ကို စည်ပင်ဌာနအတွက် အုတ် ၄၀၀၀ လောက်တင်ပြီးလာတဲ့ Faw ကား အပြာရောင်ယာဥ်ဟာ ညောင်ကုန်းတံတားပေါ်အတက်မှာ မိုင်းနင်းမိခဲ့တာဖြစ်တယ်လို့ ဒေသခံတဦးက ပြောပါတယ်။

“အဲကားက ကျောက်ကြီးဘက်ကနေ ပဲနွယ်ကုန်းဘက်ကိုအသွား အဲတံတားပေါ်ကပဲ ဖြတ်သွားတယ်။ ဘာမှမဖြစ်ဘူး။ အုတ်သယ်ပြီးအပြန် တံတားပေါ်အတက် ချဉ်းကပ်လမ်းနဲ့တံတားနဲ့ကြားမှာ မိုင်းနင်းမိပြီး ပေါက်ကွဲမှုဖြစ်တာ။ ကားကဝိတ်ပါလာတဲ့အတွက် ဖြစ်တာလို့ ယူဆလို့ရတယ်။ ကားကတော့ ခေါင်းပိုင်းကို ထိသွားတာ” လို့ ပြောပါတယ်။

ကားမိုင်စထိတာကြောင့် ကားခေါင်းခန်းပါစောမင်းဦး ၃၈ နှစ် ကွင်းချောင်းဝကျေးရွာနေသူ၊ ဦးရန်နိုင်အောင် ၅၇ ကွင်းချောင်းဝကျေးရွာနေသူ ၂ ဦးမှာ ဆေးရုံအရောက်မှာ သေဆုံးခဲ့ပြီး ယာဥ်မောင်း ဦးအောင်ဌေးဦး ၃၈ နှစ်နဲ့ ယာဥ်နောက်ကနေ လိုက်ပါလာသူ ညီမင်းခန့်၊ ဦးစိန်မင်းဆိုသူ ၃ ဦးမှာ ဒဏ်ရာရခဲ့တယ်လို့ ဆိုပါတယ်။

သေဆုံးဒဏ်ရာရသူတွေအနက် ဒဏ်ရာပြင်းတဲ့ ဦးစိန်မင်းကို တောင်ငူစစ်ဆေးရုံနဲ့ ကျန်သူတွေကိုတော့ ကျောက်ကြီးဆေးရုံတို့ကို လူမှုကူညီရေးကားတွေနဲ့ ပို့ထားရတယ်လို့ သိရပါတယ်။

အဲဒီတံတားဟာ သံကူကွန်ကရစ်တံတားအဖြစ် ၂၀၂၂ ခုနှစ် ဇွန်တွင် ပထမအကြိမ်မိုင်းခွဲခံရပြီး ယာယီဘေလီတံတားတည်ဆောက်ပြီး နိုဝင်ဘာလတွင် ဒုတိယအကြိမ် မိုင်းခွဲခံရကာ တံတားပြန်မတည်ဆောက်ခင် မြေသားရှောင်ကွင်းလမ်းမှာ ဖြတ်သန်းနေကြတာလို့ ဆိုပါတယ်။

ယင်းနောက် မြေသားလမ်းတွင် ၂၀၂၃ ခုနှစ် ဖေဖော်ဝါရီလ ၃ ရက်နေ့ မနက် ၇ နာရီကျော်ခန့်မှာ ကျောက်ကြီးမြို့ဘက်ကနေ ပဲနွယ်ကုန်းဘက်ကို စျေးရောင်းဖို့ထွက်လာတဲ့ လိုက်ထရပ် အဖြူရောင်ယာဥ်ဟာ ညောင်ကုန်းတံတား ရှောင်ကွင်းလမ်းအ‌ရောက်မှာ မိုင်းထိခဲ့လို့ ကလေး ၁ ဦးအပါအဝင် ၄ ဦးဒဏ်ရာရခဲ့သေးတယ်လို့ သိရပါတယ်။

ဒါအပြင် မတ်လ ၂၀ ရက်နေ့ မနက် ၇ နာရီခန့်မှာ ကျောက်ကြီးဘ​က်နေ ပဲနွယ်ကုန်းဘက်ကို မောင်းနှင်လာတဲ့ ”ဝင်းရတနာ” ယာဥ်လိုင်း ခရီးသည်ပို့ဆောင်ရေးယာဥ်ဟာ ညောင်ကုန်းတံတား ရှောင်ကွင်းလမ်းကနေ မောင်းနှင်လာချိန် မိုင်းထိခဲ့လို့ ၃ ဦးသေဆုံးပြီး ၂ ဦးဒဏ်ရာ ရခဲ့သေးတယ်လို့ ဆိုပါတယ်။

စာတည်း – 007

မကွေး၊ မတ် ၃၀၊ ၂၀၂၃။

မကွေးတိုင်းဒေသကြီး၊ ပခုက္ကူမြို့နယ်၊ ဘလုံတောကျေးရွာနဲ့ ပခန်းကြီးကျေးရွာကြား ပခုက္ကူ-ရေစ​ကြိုလမ်းပိုင်းမှာ စစ်ကောင်စီအတွက် မိုင်းထောင်ထားချိန် ဒေသခံတွေက လယ်ကွင်းမီးရှို့လို့ မိုင်းတွေကိုအချိန်မီရုပ်သိမ်းခဲ့ရတယ်လို့ သိရပါတယ်။

မတ်လ ၂၉ ရက်နေ့ည ၄ နာရီခန့်မှာ စစ်ကောင်စီလာမယ့်လမ်းမှာ အကြီးစား မိုင်း ၂ လုံးထောင်ထားချိန် ဒေသခံတွေက လယ်ကွက်မီးရှို့ခဲ့ရာ မိုင်းအထိကူးစက်လောင်ကျွမ်းခဲ့လို့ မပေါက်ကွဲခင် အချိန်မှီ ဖြုတ်သိမ်းခဲ့ရတယ်လို့ People Defence Force Column 1က ဗိုလ် 7 က ပြောပါတယ်။

“ကျနော်တို့ဘက်က မိုင်းကို သေချာစနစ်တကျ ပြင်ထားတာ။ အဲဒါကို ဘယ်ဒေသခံက သူတို့လယ်ကွက်ကို မီးရှို့လဲမသိဘူး။ ထောင်ထားတဲ့မိုင်းနားထိ မီးကရောက်လာပြီး မိုင်းအပြင်ပိုင်းအချို့ပါ မီးလောင်ခဲ့တာ။ ကျနော်တို့ဘက်က အချိန်မီသိလိုက်လို့ အမြန်ပြန်ဖြုတ်ခဲ့ရတာ။ မဟုတ်ရင် လမ်းသွားလမ်းလာဒေသခံတွေ ဘယ်လောက်တောင် သေမလဲ မသိဘူး” လို့ ပြောပါတယ်။

ဒေသခံတွေကို အဲဒီလမ်းပိုင်းမှာ မီးမရှို့ဖို့ အကြိမ်ကြိမ်သတိပေးထားပေမယ့် လိုက်နာတာမရှိဘဲ မကြာခဏမီးရှို့နေလို့ စစ်ကောင်စီကို မိုင်းဆွဲမယ့်အစီအစဥ်တွေ ဖျက်သိမ်းနေရတယ်လို့ ဆိုပါတယ်။

ဒေသခံ ပြည်သူတွေအနေနဲ့ ဒေသကာကွယ်ရေးအဖွဲ့တွေ ထုတ်ပြန်ထားတဲ့ ဒေသန္တရအမိန့်တွေကို လိုက်နာပေးကြဖို့ အရေးကြီးတယ်လို့ ဆိုပါတယ်။

အဲဒီ မိုင်း ၂ လုံးပေါက်ကွဲပါက ပေ ၃၀ ပတ်လည်အတွင်း ရောက်ရှိလာမယ့် စစ်ကောင်စီတပ်သားတွေ အထိနာသေစေနိုင်ပြီး ဒေသခံအချို့ရဲ့ မဆင်မခြင်လုပ်ရပ်ကြောင့် အစီအစဥ်ပျက်စီးခဲ့ရတယ်လို့ သိရပါတယ်။

ဒါ့အပြင် ပြည်သူတွေရဲ့ လှူဒါန်းထောက်ပံမှုနဲ့ပြုလုပ်ထားရတဲ့ မိုင်း ၂ လုံး တန်ဖိုး ကျပ် ၁၀ နီးပါးဆုံးရှုံးခဲ့ရတယ်လို့ ဆိုပါတယ်။

စာတည်း – 007

ရွှေဘို၊ မတ် ၆၊ ၂၀၂၃။

စစ်ကိုင်းတိုင်း၊ ရွှေဘိုမြို့နယ်မှာ ဆိုင်ကယ်စီးလာတဲ့ စစ်သားနဲ့ ပျူစောထီးတဦး မတ်လ ၅ ရက်က မိုင်းထိခဲ့တာကြောင့် ပျူစောထီးတဦးသေကာ စစ်သားတဦး ပြင်းထန်ဒဏ်ရာ ရရှိသွားတယ်လို့ ဗိုလ်ကျားရိုင်း-ရွှေဘို LPDF က သတင်းထုတ်ပြန်ထားပါတယ်။

ရွှေဘိုမြို့နယ် ညောင်ကိုင်းရွာကနေ စစ်တပ်စခန်းချထားတဲ့ ဇီးဖြူကုန်းရွာကို အပြန် မနေ့နေ့လယ် ၁၂ နာရီလောက်မှာ ဂျိုးမြေဇင်းရွာနဲ့ မြို့လှရွာကြားမှာ မိုင်းမိခဲ့တာ​လို့ သိရပါတယ်။

“ဆိုင်ကယ်က စုတ်ပြတ်သွားပြီးတော့ ပျူကတော့ ပွဲချင်းပြီး သေသွားတယ်။ စစ်သားကတော့ ခြေတဖက် ပြတ်သွားတယ်။ သေနတ်ဖောက်သံလည်း မကြားရဘူး။ တနာရီလောက်ကြာတော့မှ အလောင်းနဲ့ ဒဏ်ရာရစစ်သားကို လာကောက်သွားတယ်” လို့ ဗိုလ်ကျားရိုင်း – ရွှေဘိုရဲ့တာဝန်ခံ ရဲဘော်ဗလကြီးက ပြောပါတယ်။

ခြေတဖက် ပြတ်သွားသူဟာ တပ်ကြပ်ငစိုးဆိုသူ ဖြစ်ပြီး သေဆုံးတဲ့ ပျူစောထီးဟာ တည်သီးတောရွာသား ဝေဠုဆိုသူ ဖြစ်တယ်လို့ သူက ဆက်ပြောပါတယ်။

ဗိုလ်ကျားရိုင်း-ရွှေဘို (LPDF) အဖွဲ့ ၊ ဗိုလ်ဂျပန်ကြီး (T.T.T) – SHWEBO (LPDF) အဖွဲ့၊ မတစ်ထောင်(တစ်ကောင်ဘွား ) – ဒီပဲယင်းအဖွဲ့နဲ့ ရွှေဘိုမြို့နယ် တိုက်နယ် -၂ မဟာမိတ်အင်အားစုတွေက ပူးပေါင်းခဲ့တာလို့ သိရပါတယ်။

ဗိုလ်ကျားရိုင်း ရွှေဘိုနဲ့ပူးပေါင်းအဖွဲ့ဟာ ဖေဖေါ်ဝါရီလ ၂၁ ရက်ကလည်း ရွှေဘိုမြို့နယ်ကို စစ်သားနဲ့ပျူစောထီး အင်အား ၇၀ ကျော်လောက်က ပေါက်ချိုင်ကျေးရွာကို စစ်ကြောင်းထိုးမီးရှို့နေချိန် တိုက်မိုင်း၊ ဆွဲမိုင်း၊ လက်နက်ကြီးတွေ၊ ဒရုန်းတွေနဲ့ တိုက်ခိုက်ခဲ့လို့ စစ်သားနဲ့ပျူစောထီးတွေ သေ​ဆုံးဒဏ်ရာ ရခဲ့ပါသေးတယ်။

စာတည်း – 007

စစ်ကိုင်း၊ ဖေဖော်ဝါရီ ၁၂၊ ၂၀၂၃။

စစ်ကိုင်းတိုင်း၊ ကျွန်းလှမြို့နယ်၊ ကြာတကန်ကျေးရွာအနီးမှာ သုံးဘီးနဲ့လာတဲ့ဒေသခံတွေ မိုင်းထိပြီး ၅ ဦးဒဏ်ရာရခဲ့တယ်လို့ သိရပါတယ်။

ဖေဖော်ဝါရီလ ၁၀ ရက်မနက် ၈ နာရီခန့်မှာ ထန်းပင်ကုန်း- ကြာတကန်- ကျွန်းလှသွားလမ်းပေါ်မှာ သုံးဘီးဆိုင်ကယ်တစီး မိုင်းထိပြီး သုံးဘီးပေါ်ပါသူတွေ ထိခိုက်ဒဏ်ရာရသွားတာလို့ ဒေသခံတဦးက ပြောပါတယ်။

“သိရတာက သူတို့က ကျွန်းလှဘက်ကနေ ထန်းပင်ကုန်းဘက်ကို သုံးဘီးနဲ့လာတာ၊ ကြာတကန်အနီးမှာ မိုင်းထိတာလို့ သိရတယ်။ အဲ့နားမှာလည်း ပြီးခဲ့တဲ့ ရှေ့ရက်တွေက တခါဖြစ်သေးတယ်။ ဘယ်သူထောင်တဲ့ မိုင်းလဲတော့ မသိရဘူး”လို့ ပြောပါတယ်။

မိုင်းပေါက်ကွဲမှုကြောင့် သုံးဘီးဆိုင်ကယ်ပေါ်ပါ ကျွန်းလှမြို့နယ်၊ ပျဉ်းမနားမြိုင်ရပ်ကွက်နေ ကိုပြည့်ဖြိုးခိုင် ၃၁ နှစ်၊ ဦးဝေလင်း ၄၉ နှစ်၊ ဦးဝင်းမင်းထွန်း ၄၂ နှစ်၊ ဒေါ်မေသန်းထွန်း ၄၀ နှစ်နဲ့ မဖြိုးဖြိုးဝင်း ၂၀ နှစ် တို့ ထိခိုက်ဒဏ်ရာရခဲ့ပြီး သူတို့ကို ဒေသခံတွေရဲ့အကူအညီနဲ့ ကျွန်းလှဆေးရုံကို ပို့ပေးခဲ့ရတယ်လို့ သိရပါတယ်။

အဲ့ဒီလမ်းပိုင်းမှာ စစ်ကောင်စီနဲ့ ဒေသခံကာကွယ်ရေးတပ်တို့ ထိတွေ့မှု ဖြစ်လေ့ရှိတာကြောင့် ဒီမိုင်းကို ဘယ်အဖွဲ့အစည်းက ထောင်ထားခဲ့လဲ ဆိုတာကိုတော့ သီးခြားအတည်မပြုနိုင်သေးပါဘူး။
ဒါ့အပြင် ကျွန်းလှနယ်ထဲမှာ မကြာခဏဆိုသလို လမ်းသွားဒေသခံပြည်သူတွေဟာ အခုလိုပဲမိုင်းနင်းမိပြီး ထိခိုက်ဒဏ်ရာရတာတွေလည်း ရှိနေပါတယ်။

ပြီးခဲ့တဲ့ ဇန်နဝါရီလ ၂၉ ရက်ညနေပိုင်းကလည်း ကျွန်းလှမြို့၊ သစ်ရာမြိုင်ရပ်ကွက်ကနေ ရွာဘက်တွေကို သုံးဘီးနဲ့ကုန်စိမ်းလိုက်ရောင်းတဲ့ မိသားစု ၁ စု မိုင်းထိပြီး အသက် ၄ လအရွယ်ကလေးငယ် အပါအဝင် မိသားစုဝင် ၃ ဦးဒဏ်ရာရခဲ့သေးတယ်လို့ သိရပါတယ်။

ပဲခူး၊ ဖေဖော်ဝါရီ ၄၊ ၂၀၂၃။

ပဲခူးတိုင်းဒေသကြီး၊ ကျောက်ကြီးမြို့နယ်၊ နတ်သံကွင်း – ကျောက်ကြီးသွားကားလမ်း ညောင်ကုန်ကျေးရွာတံတားအနီးမှာ စျေးရောင်းထွက်လာတဲ့ကား မိုင်းထိလို့ ကလေးငယ် ၁ ဦးအပါအဝင် ၄ ဦးဒဏ်ရာရသွားတယ်လို့ သိရပါတယ်။

ဖေဖော်ဝါရီလ ၃ ရက်မနေ့ကမနက် ၇ နာရီဝန်းကျင်မှာ ကျောက်ကြီးမြို့ဘက်ကနေ ပဲနွယ်ကုန်းဘက်ကို စျေးရောင်းဖို့ထွက်လာတဲ့ လိုက်ထရပ် အဖြူရောင်ကားဟာ ညောင်ကုန်းတံတား ရှောင်ကွင်းလမ်းအေရာက်မှာ မိုင်းထိခဲ့တာလို့ ဒေသခံတဦးကပြောပါတယ်။

“သူတို့က မိသားစုလိုက် စျေးရောင်းဖို့ထွက်လာတဲ့ကားပါ။ ကျောက်ကြီးဘက်ကနေ ရွာလှည့်ရောင်းတာပေါ့။ အဲဒါ ကားဘီးက မိုင်းနင်းမိတာ။ ကား ၁ စီး ပက်လက်လန်သွားတဲ့အထိ ဖြစ်သွားတယ်။ ကံကောင်းတာက ဒဏ်ရာရတာလောက်ဘဲရှိကြတယ်” လို့ပြောပါတယ်။

ကားမိုင်းထိတာကြောင့် ကားပေါ်ပါ ကျောက်ကြီးမြို့၊ ကပ်ကျေးရပ်ကွက်နေ ဒေါ်ဇာခြည်ဦး ၄၀ နှစ်ခန့်၊ မရှင်းသန့်လင်း ၇ နှစ်၊ ဦးလွင်ကိုအောင် ၄၀ နှစ်၊ မောင်အောင်သူရမျိုးလွင် ၂၃ နှစ်တို့ ထိခိုက်ဒဏ်ရာရသွားတယ်လို့ သိရပါတယ်။

အဲဒီမိုင်းကိုတော့ ဘယ်အဖွဲ့အစည်းက ထောင်ထားတယ်ဆိုတာကို မသိရသေးသလို ထိခိုက်ဒဏ်ရာရသူတွေကိုတော့ ဒေသလူမှုကူညီရေးအသင်းတွေက ကျောက်ကြီးမြို့နယ် ပြည်သူ့ဆေးရုံကိုတင်ပို့ကာ ဆေးကုသမှုခံယူနေတယ်လို့ သိရပါတယ်။

ဇန်နဝါရီလ ၁၄ ရက်ကလည်း ကျောက်ကြီး-နတ်သံကွင်းသွားလမ်း စစ်ပင်တံတားအနီးမှာ တံတားပြင်နေတဲ့ စစ်ကောင်စီအဖွဲ့နဲ့ လက်အောက်ခံဝန်ထမ်းတွေကို လက်နက်ကိုင်အဖွဲ့ ၁ ခုက ဒရုန်းနဲ့ဗုံးချတိုက်ခိုကိချိန် ဘေးနားကဖြတ်သွားတဲ့ ငါးဒိုင်က သုံးဘီးတစီးထိမှန်ခဲ့တာကြောင့် ထိခိုက်သေဆုံးမှုတွေရှိခဲ့တယ်လို့ သိရပါတယ်။

မကွေး၊ နိုဝင်ဘာ ၁၂၊ ၂၀၂၂။

မကွေးတိုင်း၊ မြိုင်မြို့နယ်၊ ဗဟင်းရဲစခန်းမှာ ကင်းစောင့်နေတဲ့ ရဲ ၄ ဦးကို ဒေသခံကာကွယ်ရေးတပ်ဖွဲ့ဝင်တွေက နိုဝင်ဘာလ ၁၁ ရက်မနေ့က မိုင်းခွဲတိုက်ခိုက်ခဲ့ပါတယ်။

မနက် ၃ နာရီခွဲလောက်မှာ မိုင်းသုံးလုံးတွဲနဲ့ တိုက်ခိုက်ခဲ့တာဖြစ်ပြီး ရဲ ၄ ဦးအနက် ၃ ဦးမှာ မိုင်းစထိမှန် သေဆုံးခဲ့တယ်လို့ ဗဟင်းကျေးရွာ ပြည်သူ့ကာကွယ်ရေးတပ်ဖွဲ့ရဲ့ ရဲဘော်တဦးက ပြောပါတယ်။

“အဲဒီရဲစခန်းကင်းဂိတ်မှာ ၄ ယောက်လောက်ရှိတာ၊ ၃ ယောက်ကတခါထဲလဲပြီး သေသွားတယ်။ တယောက်ကတော့ ထပြေးတယ်။ အဲဒီစခန်းမှာ အင်အားဘယ်လောက်ဆိုတာ ခန့်မှန်းလို့မရဘူး။ သူတို့ဘက်က ပြန်လည်ပစ်ခတ်မှုမလုပ်နိုင်ပါဘူး။ စခန်းထဲပြေးဝင်သွားတာ” လို့ ပြောပါတယ်။

ဒါ့အပြင် မနေ့ကညနေ ၅ နာရီလောက်မှာလည်း အဲ့ဒီရဲစခန်းကိုပဲ ဗဟင်းကျေးရွာ ပြည်သူ့ကာကွယ်ရေးတပ်ဖွဲ့ဝင်တွေက ထပ်မံတိုက်ခိုက်ခဲ့ပေမယ့် ထိခိုက်ဒဏ်ရာများနိုင်တယ်လို့သာ ခန့်မှန့်နိုင်ပြီး၊ ဘယ်နဦးထိခိုက် သေဆုံးခဲ့လည်း ဆိုတာကိုတော့ အတည်မပြုနိုင်သေးဘူးလို့လည်း သိရပါတယ်။