မြေလတ်အသံ၊ ဇွန် ၂၊ ၂၀၂၅။

မန္တလေးတိုင်း၊ သပိတ်ကျင်းနဲ့ စဉ့်ကူးမြို့နယ်က စာသင်ကျောင်း၊ ဟိုတယ် နဲ့ လူနေအိမ်တွေကို စစ်ကောင်စီတပ်က ဇွန် ၁ ရက်မှာ တိုက်ခိုက်ရေးလေယာဥ်နဲ့ဗုံးကြဲတိုက်ခိုက်ခဲ့တယ်လို့ ဒေသခံတွေဆီကသိရပါတယ်။

သပိတ်ကျင်းမြို့နယ်၊ ၄ မိုင်ကံသာကျေးရွာရှိ နှစ်ထပ်ဆောင်စာသင်ကျောင်းကို ညနေ ၇ နာရီကျော်မှာ ပေါင် ၅၀၀ ဗုံး ၁ လုံးကြဲချခဲ့တာလို့ဆိုပါတယ်။

“စာသင်ကျောင်းဖွင့်လှစ်ပြီးသင်ကြားနေတာတော့မရှိဘူးဗျ။ မရှိလို့ လူထိခိုက်တာမရှိတာဗျ။ တိုက်ပွဲဖြစ်တာကတော့ လုံးဝကိုမရှိတာဗျ”လို့ ပြင်ဦးလွင်ခရိုင်ပြည်သူ့ကာကွယ်ရေးအဖွဲ့မှ တာဝန်ရှိသူတဦးကပြောပါတယ်။

ဗုံးကြဲခံရတဲ့ စာသင်ကျောင်းဆောင်မှာ အခြေခံပညာအထက်တန်းကျောင်းဖြစ်ပြီး ကျောင်းအဆောက်အဦ ၁ ခုလုံးပြိုကျပျက်စီးခဲ့တယ်လို့ ဆိုပါတယ်။

ဒါ့အပြင် နေ့လယ် ၁ နာရီနဲ့ ၂ နာရီကျော်မှာတော့ စဉ့်ကူးမြို့နယ်၊ နတ်တောင်ကျေးရွာရှိ Lucky 7 ဟိုတယ်နဲ့ နွယ်ရုံကျေးရွာတို့ကို ပေါင် ၃၀၀ ဗုံး ၁ လုံးစီ ကြဲချတိုက်ခိုက်ခံရတယ်လို့ အထက်ပါ တာဝန်ရှိသူကပြောပါတယ်။

Lucky7 ဟိုတယ်ဗုံးကြဲခံရမှုမှာ အနီးပတ်ဝန်းကျင်ရှိ အသက် ၂၀ နဲ့ ၃၀ ကျော်အရွယ်အမျိုးသမီး ၃ ဦးထိခိုက်ဒဏ်ရာရရှိခဲ့ပြီး နွယ်ရုံကျေးရွာမှာတော့ နေအိမ် ၂ လုံးပျက်စီးခဲ့ပေမယ့် လူအထိအခိုက်မရှိခဲ့ဘူးလို့ သူကဆက်ပြောပါတယ်။

အခုလိုစစ်ကောင်စီတပ်က လေကြောင်းကနေဗုံးကြဲတိုက်ခိုက်ခဲ့ချိန် သပိတ်ကျင်းနဲ့ စဉ့်ကူးမြို့နယ်တို့မှာ တိုက်ပွဲဖြစ်ပွားတာ လုံးဝမရှိဘူးလို့သိရပါတယ်။

ပြီးခဲ့တဲ့ ဧပြီ ၁ ရက်ကနေ မေ ၁၇ ရက်အထိ စစ်ကောင်စီတပ်က မတ္တရာမြို့နယ်၊ စဉ့်ကူးမြို့နယ်နဲ့ သပိတ်ကျင်းမြို့နယ်တို့ကို လေကြောင်းတိုက်ခိုက်မှု ၅၇ ကြိမ်ပြုလုပ်ခဲ့တာကြောင့် ပြည်သူ ၇၂ ဦး သေဆုံးကာ ၁၄၁ ဦး ထိခိုက်ဒဏ်ရာရရှိခဲ့တယ်လို့ ပြည်သူ့ကာကွယ်ရေးတပ်မတော် (မန္တလေး)ရဲ့ မှတ်တမ်းအရသိရပါတယ်။

စာတည်း – လင်း

မန္တလေး၊ မေ ၂၆၊ ၂၀၂၅။

မန္တလေးမြို့၊ အောင်မြေသာစံမြို့နယ်ရှိ အင်းဝဘဏ်မှာ လုံခြုံရေးတာဝန်ကျတဲ့ စစ်ကောင်စီတပ်ဖွဲ့ဝင် အချင်းချင်း ပစ်ခတ်မှုဖြစ်ခဲ့ပြီး တပ်ကြပ်ကြီး ၁ ဦးသေဆုံးကာ ၁ ဦးဒဏ်ရာရခဲ့တယ်လို့ စစ်ကောင်စီရဲ့ အလယ်ပိုင်းတိုင်းစစ်ဌာနချုပ်နဲ့ နီးစပ်သူဆီက သိရပါတယ်။

မေ ၂၅ ရက်မနေ့ကနေ့လယ် ၁၂ နာရီဝန်းကျင်မှာ မန္တလေးမြို့၊ ဈေးချိုနာရီစင်အနီး ၂၆ လမ်းနဲ့ ၈၄ လမ်းထောင့်ရှိ အင်းဝဘဏ်မှာလုံခြုံရေးစောင့်နေကြချိန် ပစ်ခတ်မှုဖြစ်ခဲ့ကြတာလို့ ဆိုပါတယ်။

“ပြင်ဦးလွင်ကလာတဲ့ လုံခြုံရေးကားလို့ပြောတာပဲ။ တပ်ကြပ်ကြီးကိုတပ်သားကပစ်တာ။ တပ်မှာ ကိုယ့်ထပ်ရာထူးကြီးတဲ့ သူကိုအဲဒီလိုအာခံလို့မှမရတာ။ ဒုတပ်ကြပ်ကလည်း တပ်ကြပ်ကြီးဘက်က ဝင်ပြောပုံပဲ။ ဒုတပ်ကြပ်ကဒဏ်ရာရတယ်။ တပ်ကြပ်ကြီးကတော့သေတယ်”လို့ အလယ်ပိုင်းတိုင်း စစ်ဌာနချုပ်နဲ့ နီးစပ်သူတဦးကပြောပါတယ်။

သေဆုံးသူတွေဟာ ဘယ်တပ်တွေကလဲဆိုတာကိုတော့ သီးခြားအတည်မပြုနိုင်သေးပါဘူး။

ဒီပစ်ခတ်မှုကကြားရတဲ့ သေနတ်သံတွေကြောင့် မန္တလေးဈေးချိုထဲကဆိုင်တချို့လည်း ကြောက်လန့်ပြီး ပိတ်ခဲ့ကြတယ်လို့ မန္တလေးမြို့ခံတဦးက ပြောပါတယ်။

“ဘ‌‌ဏ်ပိတ်ရက်ဖြစ်တာ။ သေနတ်သံကတော့အချက်ရေတော်တော်များတယ်။ အဲ့တာကြောင့် ဆိုင်တချို့ကပိတ်သွားကြတာ။ ဒီနေ့တော့ပုံမှန်ပါပဲ”လို့ မြို့ခံတဦးက ပြောပါတယ်။

ပစ်ခတ်မှုဖြစ်ပြီးနောက် စစ်ကောင်စီဘက်က ရှာဖွေစစ်ဆေးမှုတွေလုပ်ခဲ့ပြီး ပစ်ခတ်ခဲ့တဲ့ စစ်ကောင်စီတပ်သားက လက်ရှိအချိန်ထိထွက်ပြေးလွတ်မြောက်နေဆဲဖြစ်တယ်လို့ သိရပါတယ်။

စာတည်း – လင်း

တောင်သာ၊ မေ ၂၆၊ ၂၀၂၅။

မန္တလေးတိုင်း၊ တောင်သာမြို့နယ်၊ နတ်စောင့်ကျေးရွာအနီး မြင်းခြံ-တောင်သာ ခရိုင်ချင်းဆက်လမ်းပေါ်မှာ လမ်းပေါ်ရေကျော်ချိန် ဖြတ်မောင်းတဲ့ကား ချောင်းထဲကျခဲ့တယ်လို့ ဒေသခံတွေဆီက သိရပါတယ်။

မေ ၂၆ ရက်မနက် ၁၀ နာရီခန့်မှာ နတ်စောင့်ကျေးရွာအနီး ဆင်တဲဝချောင်းကို ဖြတ်သန်းရာ ကားလမ်းပေါ် ရေအမြင့် ၂ ပေကျော်ရောက်နေချိန် ဖြတ်မောင်းတဲ့ ခရီးသည်တင်ယာဥ်ဟာ ရေစီးနဲ့အတူ ချောင်းထဲထိုးချခဲ့တာလို့ဆိုပါတယ်။

“လမ်းမကျွမ်းကျင်မှုရယ်။ ရေကျော်နေတော့ အချို့ကားတွေက ထွန်စက်ခေါင်းတွေနဲ့ဆွဲပြီးသွားတာ။ ပိုက်ဆံနှမြောတာလား ကားသမားရဲ့ကျွမ်းကျင်မှုနည်းတာလား သူရှေ့က ကားတွေကထွန်စက်တွေနဲ့ ဆွဲသွားကြတာ။ တံတားလည်းကျဥ်းတော့ ရေစီးနဲ့ ချောင်းထဲကျသွားတာ”လို့ ဒေသခံတဦးက ပြောပါတယ်။

အဲ့ဒီကားပေါ်မှာ ခရီးသည် ၄၀ ကျော်ပါဝင်ပြီး ချောင်းထဲကိုကျချိန် ဒေသခံတွေနဲ့ အနီးအနားက ခရီးသွားပြည်သူတွေ ဝိုင်းဆယ်ကြတာကြောင့်ခရီးသည်အားလုံးထိခိုက်မှုမရှိခဲ့ဘဲ ကားကိုတော့ မဆယ်ယူရသေးဘူးလို့ ဆိုပါတယ်။

တောင်သာမြို့နယ်ထဲမှာ မေ ၂၄ ရက်ညပိုင်းကတည်းက မိုးသည်းထန်စွာရွာသွန်းနေတာကြောင့် ဆင်တဲဝချောင်းဖြတ်သန်းရာနေရာတွေမှာ ကားလမ်းရေကျော်တာ၊ ချောင်းအနီးအနားဝန်ကျင်မှာ ရေလျှံတာတွေရှိနေတာပါ။

အဆိုပါ လမ်းပိုင်းဟာ ယခင်ကခရီးသည်တင်ယာဥ်တွေ ဖြတ်သန်းသွားလာတာမျိုး မရှိသလောက်နည်းပြီး ပြီးခဲ့တဲ့ဧပြီလပိုင်းလောက်က နန်းမြင့်တောင် တောင်ကြားတိုက်ပွဲတွေကြောင့် စစ်ကောင်စီဘက်က လမ်းပိုင်းအချို့ပိတ်ထားတဲ့အတွက် ခရီးသည်တင်ယာဥ်တွေက မိန်းလမ်းအတိုင်း သွားလာမှုနည်းသွားပြီး ကျေးရွာချင်းဆက်လမ်းတွေကိုအသုံးပြုပြီးသွားလာနေကြရတယ်လို့ သိရပါတယ်။

စာတည်း – လင်း

မန္တလေး၊ မေ ၂၅၊ ၂၀၂၅။

လူငယ်တွေ‌‌‌‌‌‌‌‌ဦးစီးပြုလုပ်တဲ့ မန္တလေးက ငလျင်ရန်ပုံငွေပန်းချီပြပွဲကို စစ်ကေင်စီတပ်က ဝင်စီးနင်းပြီး ပန်းချီပညာရှင်တွေကိုဖမ်းဆီးသွားတယ်လို့ ဒေသခံတွေဆီက သိရပါတယ်။

မန္တလေး ၇၉ လမ်း၊ ၂၇ လမ်းနဲ့ ၂၈ လမ်းကြားက လက်ဖက်ရည်ဆိုင်အပေါ်ထပ်မှာပြုလုပ်မယ့် “နမ္မတီး” ငလျင်ဒဏ်သင့် ပြည်သူများကူညီရေးပန်းချီပြပွဲ၊ ပြိုင်ပွဲနဲ့ စာအုပ်ရောင်းချပွဲအတွက်ပြင်ဆင်နေချိန် မေ ၂၂ ရက်ညနေပိုင်းမှာ စစ်ကောင်စီတပ်က ဝင်ရောက်စီးနင်းပြီး ပြပွဲဦးဆောင်သူနဲ့ ပန်းချီဆရာတွေကို ဖမ်းဆီးသွားတာလို့ သိရပါတယ်။

“ငလျင် ဘေးသင့်ပြည်သူတွေကို ယာယီအိမ်တွေဆောက်ပေးဖို့ ပြုလုပ်တဲ့ပွဲပါ။ ပထမဆုံး ဖိတ်ထားတဲ့သူတွေကို ပွဲက ခွင့်ပြုချက်မရဘူးလို့ သတင်းကြားတာ။ အဲ့ဒီကနေ ‌‌‌‌‌‌‌‌‌‌‌‌‌‌‌‌‌‌‌‌‌‌ဆက်တိုက် အကုန်လိုက်ဖမ်းတာတဲ့။ အခု တော်တော်များများ အဖမ်းခံထားရတယ်။” လို့ ဖြစ်စဥ်ကိုသိရှိသူနဲ့ နီးစပ်သူတဦးက ပြောပါတယ်။

အဆိုပါပွဲကို မေ ၂၃ ရက်ကနေ ၂၈ ရက်အထိပြုလုပ်ဖို့ စီစဥ်ထားတာဖြစ်ပြီး အခုလိုစီးနင်းဖမ်းဆီးခံရတာကြောင့် ပွဲကိုဖျက်လိုက်ရတယ်လို့လည်း သိရပါတယ်။

စစ်ကောင်စီချန်နယ်တွေမှာတော့ ဒီပြပွဲနဲ့ပတ်သက်ပြီး နိုင်ငံတော်အလံပုံတူပန်းချီပေါ်မှာ နိုင်ငံတော်အကြည်ညိုပျက်စေတဲ့ပုံတွေ ရေးဆွဲကြောင်းသတင်းရတဲ့အတွက် အမှတ် ၈ ရဲစခန်းကိုခေါ်ဆောင်စစ်ဆေးရာ နောက်ဆက်တွဲအကြမ်းဖက်တွေကို ဖမ်းမိတယ်ဆိုပြီး ဖော်ပြထားပါတယ်။

လက်ရှိမှာ အမျိုးသား၊ အမျိုးသမီး ၆ ဦးဝန်းကျင်လောက် အမှတ် ၈ ရဲစခန်းမှာ ဖမ်းဆီးခံထားရတယ်လို့သိရပြီး နောက်ဆက်တွဲအခြေအနေတွေကိုတော့ မြေလတ်အသံက ဆက်လက်စုံစမ်းနေပါတယ်။

ဒါ့အပြင် ဒီဖမ်းဆီးမှုကြောင့် မေလနောက်ဆုံးပတ်ထဲမှာပြုလုပ်ဖို့စီစဥ်ထားတဲ့ ရန်ပုံငွေ ဂီတဖျော်ဖြေပွဲလည်း ရပ်နားလိုက်ရတယ်လို့ ဒေသခံတွေဆီကသိရပါတယ်။