ပဲခူး

ပဲခူး၊‌ မတ် ၂၉၊ ၂၀၂၂။

ပဲခူးတိုင်း ပြည်မြို့နယ် တမ္မကောက်အုပ်စု တီတွတ်စံပြရွာက တိုင်းဒေသကြီးလွှတ်တော်ကိုယ်စားလှယ် အမှတ်(၁) ဦးသက်ဝင်းလှိုင်ရဲ့ နေအိမ်ကို စစ်ကောင်စီက ဒီနေ့ ညနေပိုင်းမှာ ချိတ်ပိတ်သွားခဲ့တယ်လို့ သိရပါတယ်။

ချိတ်ပိတ်ခံရတဲ့ လွှတ်တော်ကိုယ်စားလှယ်ဟာ ပြီးခဲ့တဲ့ နှစ် မေလ ၃ရက်က တော်လှန်‌ရေးလုပ်ငန်းဆောင်ရွက်နေစဥ် မတော်တဆမှုတခုကြောင့် ကျဆုံးသွားခဲ့သူဖြစ်ပြီး ဒီနေ့မှာ နေအိမ်ကို စစ်ကောင်စီက ချိတ်ပိတ်လိုက်တာကြောင့် ကျန်ခဲ့တဲ့ မိသားစုတွေဟာ အိမ်ငှားပြီး နေနေရတယ်လို့ ဒေသခံတဦးက ပြောပါတယ်။

” သူ့မိသားစုက လက်ရှိအိမ်ငှားပြီး နေနေရတယ် သားလေးရယ် သမီးလေးရယ် အမျိုးသမီးရယ်ပေါ့၊ သူတို့က အရမ်းကြောက်နေကြတယ်” လို့ ‌မိသားစုနီးစပ်သူ တဦးက ပြောပါတယ်။

ဥပဒေမဲ့ အာဏာသိမ်းပြီး ဥပဒေမဲ့ လုပ်ရပ်တွေကို လုပ်နေတဲ့ စစ်ကောင်စီကိုတော့ ပြောစရာ စကားမရှိပေမယ့် ကျန်နေခဲ့တဲ့ မိသားစုအတွက် ဒီလုပ်ရပ်ဟာ လူမဆန်တဲ့ လုပ်ရပ်တခုဖြစ်တယ်လို့ လုပ်ဖော်ကိုင်ဖက် သူငယ်ချင်းဖြစ်သူ လွှတ်တော်ကိုယ်စားလှယ် ဦးကျော်ဇေယျက ပြောပါတယ်။

” ဖခင်တယောက် ‌သေဆုံးထားလို့ ပူဆွေးသောကရောက်နေရတဲ့ သားသမီးတွေနဲ့ ခင်ပွန်းကို ဆုံးရှုံးထားလို့ သောကရောက်နေရတဲ့ ဇနီးသည်တွေ အတွက်ကို တော်တော်လူမဆန်တဲ့ လုပ်ရပ်ပေါ့ “လို့ ပြောပါတယ်။

ပြီးခဲ့တဲ့ ရက်ပိုင်းအတွင်းကလည်း ပြည်မြို့ ခေတ္တရာမြို့သစ် ၁လမ်းထိပ်က မိုဘိုင်းကမ္ဘာ ဖုန်းဆိုင်ကိုလည်း စစ်ကောင်စီက ချိတ်ပိတ်ခဲ့ပြီး ကပိုင်ရှင်ဖြစ်သူကို ဖမ်းဆီးသွားခဲ့တယ်လို့ သိရပါတယ်။

ပဲခူး၊‌ မတ် ၂၉၊ ၂၀၂၂။

ပဲခူးတိုင်းဒေသကြီး၊ ပြည်မြို့တွင် လမ်းလျှောက်သင်္ကြန်၊ ဗဟိုမဏ္ဍပ်နှင့်နာမည်ကြီးဖျော်ဖြေရေးမဏ္ဍပ် များပါ ထည့်သွင်းကျင်းပရန် စစ်ကောင်စီက ပြင်ဆင်လျှက်ရှိသည်။

စစ်ကောင်စီက ဗဟိုမဏ္ဍပ်ကို ပြည်မြို့ နာရီစင်နှင့် စာတိုက်တန်းလမ်းတွင်ပြုလုပ်မည်ဖြစ်ပြီး လမ်းလျှောက်သင်္ကြန်ကို ကမ်းနားလမ်း ဈေးကြီနှင့်တရုတ်ဘုံကျောင်းအထိ၊ ရေကစားမဏ္ဍပ်နှင့်ဖျော်ဖြေရေး အစီစဉ်များတွင်လည်း မြို့၏ နာမည်ကြီးဂိုဏ်းများဖြင့်ဖွဲ့စည်းထားသည့်အဖွဲ့များပါဝင်မည်ဖြစ်ကြောင်း မြို့ခံများက ပြောသည်။

” နာမည်ကြီးမဏ္ဍပ်တခုကတော့ ညဈေးတန်းမှာ ဆောက်ဖို့ ပြင်ဆင်နေတယ်။ လူကြီးသားသမီးတွေ၊ စစ်ထောက်ခံတဲ့သူတွေ လူမိုက်တွေ စီးပွားလုပ်ငန်းရှင်တွေရဲ့သားသမီးတချို့လည်းပါဝင်တဲ့အဖွဲ့ပေါ့။ ဗဟိုမဏ္ဍပ်ကတော့ စာတိုက်တန်းလမ်းကိုပိတ်ပြီး ဆောက်မယ်။”ဟု မြို့ခံတဦးကပြောသည်။

ဖြေဖျော်ရေးယိမ်းအဖွဲ့များအတွက်လည်း နယ်မြေအလိုက် အသက် ၁၃ နှစ်မှ ၁၆ နှစ်အထိ မိန်းကလေးငယ် ၂၀ ဦးစီရွေးချယ်ခိုင်းထားပြီး စာရင်းကောက်မှုများလည်း ပြုလုပ်နေပြီဖြစ်ကာ ရပ်ကွက်အားလုံးမဏ္ဍပ် ဆောက်လုပ်ရမည်ဖြစ်ကြောင်း ရပ်ကျေးအုပ်ချုပ်ရေးမှူးတဦးထံ ကသိရသည်။

“ယိမ်းတွေအတွက်လည်း အမျိုးသမီးငယ်တွေကို လိုက်ရွေးနေတယ်။ သူတို့လက်အောက်ခံအုပ်ကြီးတွေနဲ့ စစ်ထောက်ခံအစိမ်းတွေအများဆုံးပါတယ်” ဟု မြို့ခံတဦးကပြောသည်။

မဏ္ဍပ်ဆောက်လုပ်ရန်နှင့် ယိမ်းအဖွဲ့များအတွက် လောင်းကစားလုပ်ငန်းများနှင့် KTV၊ စားသောက်ဆိုင်များ စီးပွားရေးလုပ်ငန်းရှင်များထံက ငွေကြေးကောက်ခံမှုများပြုလုပ်နေပြီဖြစ်ကြောင်း မြို့ခံများကပြောသည်။

မကွေး၊ မတ် ၂၃၊ ၂၀၂၂။

ပဲခူးတိုင်း၊ ပြည်မြို့နယ်၊ တီတွတ်ရွာ အောင်လံ-ပြည်ကားလမ်းမဘေး နေအိမ်တွေကို စစ်ကောင်စီက ယမန်နေ့ညနေပိုင်းကစတင်ပြီး ဖယ်ရှားခိုင်းနေတယ်လို့ ဒေသခံတွေဆီက သိရပါတယ်။

အဲ့ဒီလမ်းမဘေးတလျှောက်က နေအိမ်တွေကို ဖယ်ရှားပေးဖို့ စစ်ကောင်စီတပ်အမိန့်ထုတ်ထားတာဖြစ်ပြီး တီတွတ်ရွာကစတင်လို့ ဖယ်ရှားပေးနေရတာလို့ ဒေသခံတွေက ပြောပါတယ်။

“ဖျက်ပေးနေကြရတာ နှစ်ရက်သုံးရက်ရှိပြီ၊ ပြည်နဲ့ အောင်လံကြား လမ်းမဘေးက အိမ်တွေအကုန်ပါတယ်။ ဒီနေရာတွေမှာဘဲနေ လာခဲ့တာဟိုးအရင်က တည်းကကြာနေပြီ။ ခုမှဆောက်ပြီးနေတာမဟုတ်ဘူး။ လမ်းနဲ့မလွတ်လို့ ဖယ်ခိုင်းတာတဲ့။ စစ်တပ်ထောက်ခံသူတွေရဲ့ နေအိမ်တွေလဲပါတယ်” လို့ ဒေသခံတဦးက ပြောပါတယ်။

အဲ့ဒီ လမ်းမဘေးမှာရှိတဲ့ နတ်တလင်း၊ ဇီးအုပ်၊ ထန်းပေါက်၊ တီတွဒ်၊ အောင်လံမြို့နယ်ထဲက ကျေးရွာတွေအပါအဝင် လမ်းမတလျှောက်က နေအိမ်တွေကို မတ်လ ၂၆ ရက်နေ့ကို နောက်ဆုံးထားဖယ်ရှားပေးရမှာဖြစ်ပြီး မလိုက်နာရင် ဖမ်းဆီးထောင်ချခံရမှာလို့ ဒေသခံတွေက ပြောပါတယ်။

“မတ်လ ၂၆ ဒီနေ့ အပြီးဖျက်ပေးပါလို့ ပြောတယ်။ မဖျက်ရင် အရေးယူထောင်ချခံရမယ်။ ကုန်စျေးနှုန်းကြီးနေ လို့အဆင်မပြေပါဘူးဆို ရှိတဲ့အိမ်လေးပါ ဖျက်ခိုင်းနေတော့ ဒုက္ခဘဲ” လို့ သူက ဆက်လက် ပြောပါတယ်။

အဆိုပါလမ်းမကြီးဘေးက နေအိမ်တွေထဲက စစ်ကောင်စီလက်အောက်ခံ အစိုးရဘဏ်တွေကိုပေါင်နှံထားတဲ့ အိမ်တွေဆိုရင် ဖျက်ပေးဖို့မလိုဘူးလို့ စစ်ကောင်စီဘက်ကပြောဆိုတယ်လို့ ဒေသခံများ ပြော ဆိုချက်အရသိရပါတယ်။

လမ်းမကြီးဘေးက နေအိမ်တွေအကုန်လုံးကို လမ်းနဲ့ ၇၅ ပေအကွာထိ ဖယ်ရှားခိုင်းတာဖြစ်ပြီး၊ လမ်းတလျှောက် အိမ်ခြေရာနဲ့ချီဖျက်ပေးရမှာလို့ ဒေသခံတွေက ပြောပါတယ်။

ဒါ့အပြင် နေအိမ်ဖျက်ဆီးတဲ့နေရာမှာ စစ်ကောင်စီအပိုင် ဘက်ဟိုးနဲ့ဖျက်ပေးရမယ်ဆိုပါက ဖျက်ပေးခ ၁ နာရီကို ကျပ် ၂ သိန်း ပေးဆောင်ရမယ်လို့ ဒေသခံတွေကို ပြောဆိုတယ်လို့ သိရပါတယ်။

ပဲခူး၊ မတ် ၂၂၊ ၂၀၂၂။

ပဲခူးတိုင်း၊ ပြည်မြို့မှာ ယာဥ်မောင်းလိုင်စင်နဲ့ ဆိုင်ကယ်နံပါတ်ပြားမပါရင် စစ်ကောင်စီက ထောင် ၁လ ချမှာဖြစ်ပြီး ဆိုင်ကယ်ပါ သိမ်းခံရမယ်လို့ ဒေသခံတွေဆီက သိရပါတယ်။

ဆိုင်ကယ်နံပါတ်ပြား မပါတာအပြင် နံပါတ်ပြား မထင်ရှားရင်တောင် ထောင်၁လ ချလို့ ရကြောင်း စစ်ကောင်စီတပ်သားတွေက ပြောဆိုနေတယ်လို့ ဒေသခံတဦးက ပြောပါတယ်။

” နံပါတ်ပြားမထင်ရှားလည်း ထောင် ၁လ ၊ အသိတစ်ယောက် နံပါတ်ပြားကျိုးနေတာကို ဖမ်းပြီး နံပါတ်ပြားမထင်ရှားရင် ထောင်တလတဲ့၊ အာ့ကြောင့်မလို့တဲ့ ဦးထုပ်မဆောင်းပဲရေးလိုက်မယ်တဲ့၊ ဖမ်းချင်တဲ့ ဘီးဖမ်းနေသလိုပဲ” လို့ ဒေသခံတဦးက ပြောပါတယ်။

တချို့နေရာ တွေမှာ ဆိုင်ကယ်ဖမ်းတဲ့ လုပ်ငန်းကို ယာဥ်ထိန်းရဲ မပါပဲ စစ်ကောင်စီတပ်သားတွေချည်းပဲ လုပ်ဆောင်နေပြီး ဆိုင်ကယ်စီးခွင့်ရှိတဲ့ မျဥ်းဝါထဲက မောင်းဖို့ ပြောဆိုတာမျိုးတွေလည်း ရှိနေပါတယ်။

” မနက်ပိုင်းဆိုမြို့တော်ခန်းမ ရှေ့ကနေစောင့်ပြီး မျဥ်းဝါထဲက မောင်းခိုင်းတယ်၊ ကိုးသောင်းစျေးရှေ့ကျ -ီးမှမောင်းမရဘူး၊ ဆိုင်ကယ်တွေကားတွေရပ်ထားတာနဲ့ “ လို့ ဒေသခံတဦးက ပြောပါတယ်။

ပြည်မြို့ရဲ့ လမ်းမကြီးတွေနဲ့ အချို့နေရာတွေမှာ အနှေးယာဥ်များ မျဥ်းဝါအတွင်းက မောင်းနှင်ရန်ဆိုတဲ့သတိပေးဆိုင်းပုဒ်ထောင်ထားတာတွေ့ရပြီး စစ်ကောင်စီက စက်ဘီး၊ ဆိုင်ကယ်၊ အိုးဝေသုံးဘီး တွေကို အနှေးယာဥ်လို့ ကြေငြာထားတယ်လို့လည်း သိရပါတယ်။

ဖမ်းမိတာနဲ့ ချက်ချင်း ထောင်၁လ ချတာတွေ ရှိသလို ထောင်ချမခံရတာတွေလည်း ရှိနေပြီး ပန်းတောင်းမြို့နယ် ကျေးရွာတခုက အမျိုးသားတဦးကတော့ ထောင်၁လ ကျပြီး ပြန်လွတ်လာပြီဖြစ်တယ်လို့ သိရပါတယ်။

ပဲခူး၊ မတ် ၁၉၊ ၂၀၂၂။

ရွေးကောက်ပွဲကျင်းပရန်အတွက်ဆိုကာ ပဲခူးတိုင်းဒေသကြီး၊ ပြည်ခရိုင်ရှိ မြို့နယ်အချို့တွင် အိမ်ထောင်စုစာရင်းများကို ရပ်ကျေးအုပ်ချုပ်ရေးမှူးများက တဆင့်လိုက်လံကောက်ခံနေကြောင်း အုပ်ချုပ်ရေးမှူးများထံကသိရသည်။

မတ်လဆန်းကစတင်ကာ ပန်းတောင်းမြို့၊ ပြည်မြို့ တို့တွင် လိုက်လံကောက်ယူနေခြင်းဖြစ်ပြီး ၂၀၂၃ ခုနှစ်တွင် ရွေးကောက်ပွဲကျင်းပ ရန်အတွက် အိမ်ထောင်စုစာရင်းများကို လိုက်လံကောက်ခံနေပြီး အိမ်ထောင်စုစာရင်း၊ မှတ်ပုံတင်မရှိသူများကို ပန်းခင်းစီမံချက်ဆိုကာ လုပ်ခိုင်းနေကြောင်း သိရသည်။

“ဒီမှာတော့ ရွေးကောက်ပွဲအတွက်ဆိုပြီး လူစာရင်းတွေကောက်ခိုင်းနေပြီ အရင်စာရင်းတွေကို မယုံလို့လုပ်နေတာ ထင်တယ်။ မရှိသူတွေကိုလည်း လုပ်ပေးနေတယ် ပန်းခင်းစီမံချက်ဆိုပြီး တချို့တွေလည်း လုပ်လားမလုပ်လားတော့သေချာမသိဘူး ထောက်ခံစာတွေလည်း လာလုပ်နေတာပဲ” လို့ ရပ်ကျေးအုပ်ချုပ်ရေးမှူးတဦးကပြောသည်။

အဆိုပါ အိမ်ထောင်စုစာရင်းကောက်ယူနေမှုများတွင် အချို့ စစ်ကောင်စီခန့်အုပ်ချုပ်ရေးမှူးများမှာ ဒေသခံပြည်သူများထံက ငွေကြေးတောင်းခံမှုများရှိနေပြီး အိမ်ထောင်စုစာရင်းထဲမှ နေအိမ်တွင် မရှိသူများကိုလည်း မေးမြန်းမှုများ ပြုလုပ်နေကြောင်း ဒေသခံများကပြောသည်။

စစ်ကောင်စီကလည်း ခရီးသွားလာရာတွင် ထောက်ခံစာဖြင့်သွားလာခြင်းကို ခွင့်မပြုတော့ပဲ မှတ်ပုံတင်ဖြင့်သာ သွားလာရန် ထုတ်ပြန်ကြေညာထားသည်။

ပဲခူး၊ မတ် ၁၈၊ ၂၀၂၂။

ပဲခူးတိုင်းအနောက်ခြမ်း၊ နတ်တလင်းမြို့မှာ ပြီးခဲ့တဲ့ ဖေဖော်ဝါရီလအတွင်းက ဖမ်းဆီးခံလိုက်ရတဲ့ အသက်မပြည့်သေးတဲ့လူငယ် ၇ ဦးကို စစ်ကောင်စီက အကြမ်းဖက်မှုတိုက်ဖျက်ရေးဥပဒေ ပုဒ်မ ( က / ခ ) နဲ့ စွဲချက်တင်လိုက်ပါတယ်။

အသက် ၁၅ နှစ်အရွယ် မိန်းကလေး ၂ ဦး၊ ယောက်ျားလေး ၂ ဦးနဲ့ အသက် ၁၇ နှစ်အရွယ် မိန်းကလေး ၃ ဦးဖြစ်ပြီး၊ သူတို့ကို နတ်တလင်းမြို့နယ်တရားရုံးမှာ မတ်လ ၁၇ ရက် မနေ့က စွဲချက်တင်လိုက်တာဖြစ်တယ်လို့ ဒေသခံတဦးက ပြောပါတယ်။

“ နတ်တလင်းတရားရုံးမှာ မနေ့က ၁၇ ရက်နေ့က အသက် ၁၅ နှစ်အရွယ် မခင်ငြိမ်းချမ်း၊ မမှူးမြတ်ကိုကို၊ မောင်ရဲရင့်ထက်၊ မောင်အာကာဖုန်းမြတ် တို့ ၄ ဦး နဲ့ ၁၇ နှစ်အရွယ် မစုနှင်းရည်အောင်၊ မသိမ့်သိမိမ့်မိုး၊ မမြတ်သူထက်တို့ စုစုပေါင်း ၇ ဦးကို အကြမ်းဖက်မှုတိုက်ဖျက်ရေးဥပဒေ ပုဒ်မ ၅၂ (က/ခ) တို့နှင့် စွဲချက်တင် လိုက်ပါတယ်၊ “ လို့ သူကပြောပါတယ်။

မြန်မာနိုင်ငံဟာ ကုလသမဂ္ဂအဖွဲ့ဝင်အဖြစ် ကလေးသူငယ်များအခွင့်အရေးဆိုင်ရာ သဘောတူစာချုပ်ကို ၁၉၉၁ ခုနှစ် ဇူလိုင်လ ၁၅ ရက်နေ့မှာ လက်မှတ်ရေးထိုးခဲ့တဲ့ နိုင်ငံလည်းဖြစ်ပါတယ်။ ဒါပေမယ့် လက်ရှိကာလမှာတော့ စစ်ကောင်စီက သူတို့ကိုဆန့်ကျင်တဲ့ မည်သူမဆို မထင်ရင်မထင်သလို အကြမ်းဖက်ဖမ်းဆီး တာတွေလုပ်နေတဲ့အပြင် အသက်မပြည့်သေးတဲ့ကလေးငယ်တွေကိုပါ ဖမ်းဆီး သတ်ဖြတ်တာတွေထိပါ လုပ်ဆောင်လျှက်ရှိနေပါတယ်။

နိုင်ငံရေးအကျဥ်းသာများကူညီစောင့်ရှောက်ရေးအဖွဲ့ – AAPP ရဲ့ ထုတ်ပြန်ချက်အရ ၂၀၂၁ ခုနှစ် ဖေဖော်ဝါရီ ၁ ရက်ကနေ ၂၀၂၂ ခုနှစ် မတ်လ ၁၇ ရက်အထိ ဖမ်းဆီးခံထားရသူ ၉၇၄၅ ဦးထဲမှာ ၈၄၆ ဦးက ပြစ်ဒဏ်ချမှတ်ခံထားရပြီး၊ အဲ့ဒီထဲမှာ ၁၈ နှစ်အောက် ကလေးငယ် ၂ ဦးပါဝင်တယ်လို့လည်း သိရပါတယ်။

ပဲခူး၊ မတ် ၁၈၊ ၂၀၂၂။

ပဲခူးတိုင်း၊ သာယာဝတီခရိုင်၊ သာယာဝတီမြို့က သူနာပြုဆရာမတဦး ဒီနေ့ မနက်ပိုင်း နေအိမ်မှာ လာပြီးဖမ်း‌ခေါ်သွားတယ်လို့ ဒေသခံတွေ ဆီက သိရပါတယ်။

သာယာဝတီခရိုင်ဆေးရုံက အသက်၄၀ ဝန်းကျင် သူနာပြုဆရာမကြီး ဒေါ်ဥမ္မာကြည်ကို မတ်လ ၁၈ရက် ဒီနေ့ မနက် ၇နာရီ ဝန်းကျင်က ဒလံသတင်းပေးမှုကြောင့် ဓမ္မရိပ်သာလမ်းက အိမ်မှာ ဖမ်းခံလိုက်ရတာဖြစ်တယ်လို့ ဒေသခံတဦးက ပြောပါတယ်။

” အိမ်ပြန်‌ရောက်တာ ၂ရက်လောက်ပဲ ရှိသေးတာကို ဒလံသတင်းပေးမှုကြောင့် ရဲနဲ့ စစ်သား ၁၅ယောက်ဝန်းကျင်နဲ့ လာဖမ်းသွားတာ၊ လမ်းပိတ်ဖမ်းတာ သူ့အမျိုးသားကို ဆိုင်ကယ်မောင်းခိုင်းပြီး ခေါ်သွားတာ ” လို့ ဒေသခံတဦးက ပြောပါတယ်။

အမျိုးသားဖြစ်သူကတော့ နေအိမ်မှာ ပြန်ရောက်နေပြီး သူနာပြုဆရာမကိုတော့ သာယာဝတီရဲစခန်းမှာဖမ်းဆီးထားတယ်လို့ သိရပါတယ်။

ပဲခူး၊ မတ် ၁၆၊ ၂၀၂၂။

ပဲခူးတိုင်းအနောက်ခြမ်းမှာရှိတဲ့ ပေါင်းတည်မြို့သားနှစ်ဦးက စစ်ဘောမတွေမြန်မြန်သေရင်ကောင်းမှာလို့ အချင်းချင်းစကားပြောခဲ့တာကို အပြစ်ရှာကာရပ်ကွက်အုပ်ချုပ်ရေးမှူးက ရဲစခန်းကိုတိုင်ကြားခဲ့လို့ ပြီးခဲ့တဲ့ မတ်လ ၁၃ ရက်နေ့က ၄၇၊ ၃၀ (က)၊ ၅၀ (က)/၄၉ စတဲ့အကြမ်းဖက် ပုဒ်မတွေနဲ့ ဖမ်းဆီးအမှုဖွင့်ခံခဲ့ရပါတယ်။

အုပ်ဖို ၂ ရပ်ကွက် စေတနာနာရေးကူညီမှုအသင်းရုံးနောက်ဖက်က ထန်းတောစုထဲမှာနေကြတဲ့ ကိုသက်လှ(ခ)ကိုသက်နဲ့ ကိုအောင်တင်ဝင်းတို့ဖြစ်တယ်လို့ သိရပါတယ်။

“သူတို့နှစ်ယောက်ရေချိုးရင်း ရေတွင်းမှာ ပြောတဲ့စကားကို ဘယ်သူကကြားပြီး အုန်းသိန်းကိုတိုင်လည်းမသိဘူး။ သူတို့နှစ်ယောက်အဖမ်းခံရပြီး နောက်နေ့မှာ ကာယကံရှင်မိသားစုနဲ့ ရပ်ကွက်ထဲက ရပ်မိရပ်ဖတွေက သွားတောင်းပန်တယ်။ ဒါပေမယ့်​ ကျေအေးမပေးဘူး ဒါမျိုးနောက်မလုပ်ရဲအောင် မှတ်လောက်သားလောက်ဖြစ်အောင် လုပ်ရမယ်လို့ပြောတယ်။ ပထမတော့ ရဲက ၄၇ နဲ့ စွဲတာ ကျေအေးဖို့သွားပြောပြီး နောက်နေ့မှ ထပ်ပြီးပုဒ်မတွေက တိုးသွားတာ အုန်းသိန်းက စစ်ကောင်စီအုပ်ချုပ်ရေးမှူးဖြစ်လာပြီးတော့မှ ရပ်ကွက်ထဲမှာ အာဏာပြတာပေါ့ဗျ” လို့ အဲဒီရပ်ကွက်နေသူတဦးက မြေလတ်အသံကို ပြောပါတယ်။

ပြီးခဲ့တဲ့ရက်ပိုင်းကလည်း ရပ်ကွက်ထဲက လူငယ် ၃ ယောက်ကို PDF နဲ့ ဆက်သွယ်တယ်ဆိုပြီး အဲဒီအုပ်ချုပ်ရေးမှူးကဦးဆောင်ပြီး စစ်ကောင်စီတပ်တွေနဲ့ လာဖမ်းသွားကာ စစ်ကြောရေးမှာ ရိုက်နှက်စစ်ဆေးခဲ့ပြီး အပြစ်မရှိလို့ ခံဝန်လက်မှတ်ထိုးခိုင်းကာ ပြန်လွှတ်ပေးခဲ့တယ်လို့ သိရပါတယ်။

စစ်ကောင်စီဟာမြို့နယ်အတွင်းမှာ ဖမ်းဆီးမှုတွေပြုလုပ်ပြီး သူတို့စွတ်စွဲသလိုမဟုတ်ပါက ခံဝန်ထိုးခိုင်းပြီး ချိန်းခြောက်ကာ ပိုက်ဆံတောင်းယူပြီးမှ လွှတ်ပေးတယ်လို့လည်း ကာယကံရှင်တွေနဲ့နီးစပ်သူတဦး ဆီက သိရပါတယ်။