စလင်း၊ စက်တင်ဘာ ၂၊ ၂၀၂၅။

မကွေးတိုင်း၊ မင်းဘူးခရိုင်၊ စလင်းမြို့ စစ်ကော်မရှင်လက်အောက် လူဝင်မှုကြီးကြပ်ရေးနှင့်ပြည်သူ့အင်အားဦးစီးဌာနရုံး(လဝက)မှာ မှတ်ပုံတင်လာလုပ်တဲ့ အမျိုးသား ၁ ဦးကို စစ်ကော်မရှင်လက်အောက်ရဲတပ်ဖွဲ့ဝင်တွေက ထိုးကြိတ်ဖမ်းဆီးသွားတယ်လို့ စလင်းမြို့ခံသတင်းရင်းမြစ်တွေထံက သိရပါတယ်။

ဖမ်းဆီးခံရသူဟာ ကျောက်ရဲတုန်းကျေးရွာနေ အသက် ၃၅ နှစ်ဝန်းကျင်ရှိ ဝေဖြိုးမောင် ဆိုသူဖြစ်ပြီး စက်တင်ဘာ ၂ ရက် ဒီကနေ့မနက် ၁၀ နာရီခွဲလောက်မှာ စလင်းမြို့လဝကရုံးမှာ မှတ်ပုံတင်ပြုလုပ်ဖို့ ရှိနေစဥ် လဝကဝန်ထမ်းတဦးရဲ့ ဖုန်းဆက်တိုင်ကြားခံရပြီးနောက် စလင်းမြို့ရဲတပ်ဖွဲ့ဝင် ၆ ဦးက လာရောက်ဖမ်းဆီးသွားတာလို့ ဆိုပါတယ်။

” မှတ်ပုံတင်လာလုပ်တော့ သူတို့စာရင်းဇယားတွေ ဖြည့်ပြီးပြီ၊ လိုင်စင်ဓါတ်ပုံတွေလည်း သူတို့ရိုက်ပြီးသွားပြီ၊ စစ်ကော်မရှင်ကို အပြင်(ရုံးအပြင်)ကလူတဦးက ဖုန်းဆက်တာ၊ စစ်ကော်မရှင်တပ်ဖွဲ့ဝင်တွေ ရောက်လာပြီး သူ့အမျိုးသားကို ဖမ်းဆီးတယ်၊ ထိုးကြိတ်ရိုက်နှက်ပြီးမှ ဖမ်းဆီးတာ” လို့ ဖြစ်စဥ်ကိုသိရှိထားသူ စလင်းမြို့ဒေသသတင်းရင်းမြစ်တဦးက မြေလတ်အသံကို ပြောပါတယ်။

ကိုဝေဖြိုးမောင် ဟာ ၎င်းရဲ့ဇနီးဖြစ်သူနဲ့အတူ လဝကရုံးကိုလာရောက်တာဖြစ်ပြီး အမျိုးသမီးဖြစ်သူကိုတော့ ဖမ်းဆီးတာမျိုးမရှိဘဲ လက်ရှိမှာ သူ့ကို စလင်းမြို့မရဲစခန်းမှာ ဖမ်းဆီးထိန်းသိမ်းထားကာ ဖမ်းဆီးတဲ့ အကြောင်းအရင်းကိုတော့ မသိရဘူးလို့ ဆိုပါတယ်။

” အရင်တုန်းကလည်း လဝကရုံးကနေ ဖမ်းဆီးတဲ့အနေအထားတွေရှိတယ်၊ မှတ်ပုံတင်လာလုပ်တဲ့ လူငယ်တွေကို စစ်ကော်မရှင်ကို ဖုန်းဆက်တယ်၊ ရဲ**တွေက ပေါ်တာဆွဲတဲ့သဘောနဲ့ ဖမ်းဆီးတယ်၊ ပေါ်တာဆွဲပြီး ဖမ်းဆီးခံရတာ တော်တော်တော့များပြီ” လို့ သူက ဆက်ပြောပါတယ်။

ပြီးခဲ့တဲ့ ဩဂုတ် ၂၅ ရက်ကလည်း စလင်း-တညောင်လမ်းပိုင်းစစ်ဆေးရေးဂိတ်မှာ ဆိုင်ကယ်စီးလာတဲ့ အမျိုးသမီး ၂ ဦးကို စစ်ကော်မရှင်တပ်ဖွဲ့ဝင်တွေက ဖုန်းစစ်ဆေးပြီးနောက် ရိုက်နှက်ဖမ်းဆီးခဲ့သေးတယ်လို့ သိရပါတယ်။

စာတည်း – ဟိန်းစံ

စလင်း၊ ဩဂုတ် ၃၀၊ ၂၀၂၅။

မကွေးတိုင်း၊ စလင်းမြို့နယ်အတွင်း လေကြောင်းရန်ကာကွယ်နိုင်ရန် အသိပညာပေးလက်ကမ်းစာစောင်တွေကို ဒေသခံပြည်သူတွေနဲ့ ခရီးသွားပြည်သူတွေကို ဖြန့်ဝေပေးခဲ့တယ်လို့ စလင်းမြို့နယ် ပြည်သူ့ကာကွယ်ရေးတပ်ဖွဲ့ဆီက သိရပါတယ်။

ဩဂုတ် ၁၈ ရက်ကနေ ၃၀ ရက်အထိ စလင်းမြို့နယ်အတွင်း စလင်းပကဖ နယ်မြေစိုးမိုးထားတဲ့ ဒေသတွေမှာ လက်ကမ်းစာစောင် ၂,၀၀၀ ကျော်ကို ဖြန့်ဝေပေးခဲ့တာလို့ ဆိုပါတယ်။

“လက်ကမ်းစာစောင်တွေထဲမှာတော့ လေကြောင်းတိုက်ခိုက်ခံလာရရင် ဘယ်လိုရှောင်တိမ်းရမလဲဆိုတာတွေ၊ ဘယ်လိုပြုမူရမလဲဆိုတာတွေနဲ့ လေကြောင်းတိုက်ခိုက်မှုခံရရင် ပုန်းခိုဖို့ ဗုံးခိုကျင်းတွေကို ဗုံးဒဏ်ခံနိုင်အောင် ဘယ်လိုဆောက်လုပ်ရမလဲဆိုတာတွေပါထည့် သွင်းဖော်ပြထားပေးပါတယ်၊” လို့ စလင်းပြည်သူ့ကာကွယ်ရေးတပ်ဖွဲ့ တာဝန်ခံ M4 က ပြောပါတယ်။

စစ်ကော်မရှင်တပ်ဘက်က နေရာအနှံ့လေကြောင်းတိုက်ခိုက်မှုမြင့်တက်လာတာကြောင့် ပြည်သူတွေအတွက် အသိပေးစာစောင်ထုတ်ဝေပေးခဲ့တာဖြစ်ပြီး ယခင်ကလည်း လေကြောင်းရန်၊ လက်နက်ကြီးနဲ့ မြေမြှုပ်မိုင်းအန္တရာယ် အသိပညာပေးဟောပြောမှုတွေလုပ်ခဲ့တယ်လို့ သူကဆက်ပြောပါတယ်။

ဒါ့အပြင် ဒေသခံတွေအနေနဲ့လည်း လေကြောင်းရန်ကိုမပေါ့ဆဖို့ ဆောင်ရန်၊ ရှောင်ရန်တွေနဲ့ ကြိုတင်ပြင်ဆင်မှုကဏ္ဍတွေမှာ ပူးပေါင်းဆောင်ရွက်ကြဖို့လည်း တာဝန်ခံ M4 က အသိပေး ပြောဆိုထားပါတယ်။

စာတည်း – လင်း

တညောင်၊ ဩဂုတ် ၂၇၊ ၂၀၂၅။

မကွေးတိုင်း၊ စလင်းမြို့နယ်၊ တညောင်လမ်းပိုင်းမှာ ဆိုင်ကယ်စီးလာတဲ့အမျိုးသမီး ၂ ဦးကို စစ်ကော်မရှင်တပ်တွေက ရိုက်နှက်ဖမ်းဆီးခဲ့တယ်လို့ ပြည်သူ့ညီနောင်-စလင်း အဖွဲ့ဆီကသိရပါတယ်။

အသက် ၃၀ ဝန်းကျင်အဆိုပါအမျိုးသမီး ၂ ဦးကို သြဂုတ် ၂၅ ရက်မနက် ၉ နာရီဝန်းကျင်မှာ တညောင်စစ်ဆေးရေးဂိတ်ရှိ စစ်ကော်မရှင်တပ်တွေက စစ်ဆေးဖမ်းဆီးခဲ့တာဖြစ်ပြီး ဒီကနေ့အထိ ပြန်မလွတ်သေးဘူးလို့လည်း ဆိုပါတယ်။

“ဆံပင်မွှေးတွေ ဆောင့်ဆွဲပြီး ပါးတွေနားတွေရိုက်တယ်၊ ခြေထောက်နဲ့ကန်တယ်၊ အမျိုးသမီး ၂ ဦးက ၂၀ ကျော် ၃၀ ပတ်ဝန်းကျင်ပဲရှိတယ်၊ ရွာကတော့ ဘယ်ရွာကလို့တော့မသိရဘူး၊ လက်ရှိတော့ အမျိုးသမီး ၂ ဦးကို ပြန်လွှတ်တာတော့မရှိသေးဘူး၊ တညောင်စခန်းမှာပဲ ချုပ်နှောင်ထားတယ်”လို့ ပြည်သူ့ညီနောင်-စလင်းအဖွဲ့ တာဝန်ခံ ကိုပြည်သူက ပြောပါတယ်။

ဖမ်းမိချိန်မှာလည်း အဆိုပါအမျိုးသမီးတွေကို ရိုက်နှက်တာအပြင် လိင်ပိုင်းဆိုင်ရာကိုင်တွယ်ကျူးလွန်တာတွေလည်းလုပ်ကာ ဒီအခြေအနေတွေကို တပ်တွင်းသတင်းပေးတွေကတဆင့်ပြန်သိရတယ်လို့ သူကဆက်ပြောပါတယ်။

တညောင်စခန်းမှာ ရဲနဲ့ စစ်ကော်မရှင်တပ်အင်အား ၃၀ ဝန်းကျင်ရှိပြီး ဖမ်းဆီးခံရသူတွေကိုလည်း နှိပ်စက်ညှင်းပမ်းလေ့ရှိတယ်လို့ ဆိုပါတယ်။

“သူတို့က အရိုင်းအစိုင်းကောင်တွေဆိုတော့ တရားခံမိရင်ဒီလိုပဲလုပ်နေကြပါ၊ အမျိုးသားဆိုလည်း အမျိုးသား အလျှောက် ညှင်းပမ်းနှိပ်စက်တယ်၊ အမျိုးသမီးဆိုလည်း အမျိုးသမီးအလျှောက် ညှင်းပမ်းနှိပ်စက်တာလုပ်တယ်၊” လို့ အထက်ပါတာဝန်ခံ ကိုပြည်သူ ကပြောပါတယ်။

အဆိုပါအမျိုးသမီး ၂ ဦးရဲ့ဖုန်းတွေကို စစ်ကော်မရှင်တပ်တွေကစစ်ဆေးပြီးနောက်မှာ ဖမ်းဆီးသွားတာလို့လည်း ဆင်ဖြူကျွန်းမြို့ခံတဦးက အတည်ပြုပါတယ်။

ဖမ်းခံရသူတွေနဲ့ပတ်သက်တဲ့ အချက်အလက်တွေနဲ့ ဘာကြောင့်ဖမ်းခံရတယ်ဆိုတာကိုတော့ မြေလတ်အသံက သီးခြားအတည်မပြုနိုင်သေးပါဘူး။

ပြီးခဲ့တဲ့ ဩဂုတ် ၂၅ ရက်ကလည်း စလင်းမြို့နယ်၊ ဆင်ဖြူကျွန်း သရက်တောရွာထိပ်မှာ စစ်ကော်မရှင်အဖွဲ့က ခရီးသွားပြည်သူတွေနဲ့ ဈေးသည်တွေကို စစ်ဆေးမှုတွေလုပ်ပြီး ငွေတောင်းတာတွေလုပ်ခဲ့သေးတယ်လို့ သိရပါတယ်။

၂၀၂၁၊ စစ်အာဏာသိမ်းချိန်ကနေ ၂၀၂၅၊ သြဂုတ် ၂၆ ရက်အထိ စစ်ကော်မရှင်တပ်နဲ့ လက်အောက်ခံအဖွဲ့အစည်းတွေကြောင့် ဖမ်းဆီးခံရသူဦးရေ ၂၉,၅၉၁ ဦးရှိခဲ့ပြီး ၂၂,၃၄၅ ဦးမှာ ဖမ်းဆီးထိန်းသိမ်းခံထားရဆဲဖြစ်တယ်လို့ နိုင်ငံရေးအကျဥ်းသားများ ကူညီစောင့်ရှောက်ရေးအသင်း – AAPP ကထုတ်ပြန်ထားပါတယ်။

စာတည်း – လင်း

စလင်း၊ သြဂုတ် ၁၈၊ ၂၀၂၅။

မကွေးတိုင်း၊ စလင်းမြို့နယ်ရှိ ကျေးရွာတရွာမှာ မိုးခေါ်လွန်ဆွဲပွဲကို သြဂုတ် ၁၆ ရက်နဲ့ ၁၇ ရက်မှာ ပြုလုပ်ကျင်းပခဲ့တယ်လို့ စလင်းမြို့နယ်ပြည်သူ့ကာကွယ်ရေးအဖွဲ့ ဒုတာဝန်ခံဆီက သိရပါတယ်။

စလင်းမြို့နယ်အတွင်းက ကျေးရွာတွေမှာမိုးခေါင်တဲ့အတွက် မြန်မာ့ရိုးရာဓလေ့တခုဖြစ်တဲ့ မိုးခေါ် လွန်ဆွဲပွဲကို ဒေသခံတွေကပြုလုပ်ခဲ့ကြတာဖြစ်ပြီး ပိုက်ဆံကြဲတာ၊ အအေးနဲ့မုန့်တွေလည်း ကျွေးမွေးခဲ့ကြတယ်လို့ ဆိုပါတယ်။

“ပကဖနဲ့ ပကဖဆေးဘက်ဆိုင်ရာ ရဲဘော်လေးတွေရှိမယ်၊ ရုံးပိုင်းဆိုင်ရာကလေးတွေ၊ ရပ်ကျေး ပကဖတွေပါမယ်။ နောက်ဆုံးနေ့မှာ ရွှေမိုးငွေမိုး ရွာတယ်ပြောရမှာပေါ့၊ ပိုက်ဆံကြဲတာတွေ လုပ်ခဲ့တယ်။ လာအားပေးကြတဲ့ပြည်သူတွေကိုရော အအေးတိုက်တာမျိုးတွေ မုန့်တွေလုပ်ပြီး ဧည့်ခံတာတွေရှိတယ်” လို့ စလင်းမြို့နယ်ပြည်သူ့ကာကွယ်ရေးအဖွဲ့ ဒုတာဝန်ခံက ပြောပါတယ်။

စလင်းမြို့နယ်အတွင်းရှိ ကျေးရွာ ၁၀ ရွာခန့်က ပြည်သူတွေနဲ့ပြုလုပ်ကျင်းပခဲ့တာဖြစ်ပြီး ဒီနှစ်ဟာ မိုးခေါင်လွန်းတဲ့အခြေအနေဖြစ်တာကြောင့် စလင်းပကဖ ကဦးဆောင်ကာ ဒေသခံပြည်သူတွေလည်း စိတ်ပင်ပန်းမှု ခဏတာပြေပျောက်အောင် ဒီပွဲကိုပြုလုပ်ခဲ့တာလို့ ဆိုပါတယ်။

လွန်ဆွဲပွဲစခဲ့တဲ့ သြဂုတ် ၁၆ ရက်စပြီးမိုးရွာခဲ့တယ်လို့သိရပြီး ၄ လနီးပါးကြာမှ ရွာတဲ့ မိုးဖြစ်တဲ့အတွက် ဒေသခံတွေလည်း ဝမ်းသာနေကြတယ်လို့ သူကဆက်ပြောပါတယ်။

“(မိုးရွာတော့) သူတို့ကတော့ဝမ်းသာတာပေါ့၊ သူတို့ဝမ်းသာတာမြင်တော့ ကျနော်တို့ ပိုဝမ်းသာတာပေါ့၊ ပွဲနေ့က ဒီလိုပွဲလေးလုပ်ပေးတဲ့အတွက် သူတို့အနေနဲ့ ခဏတာ ပျော်ကြရွှင်ကြတယ်။ စိတ်ထွက်ပေါက်လေးတခု ရသွားတဲ့အတွက် သူတို့ပျော်တာမြင်ရတော့ ကျနော်တို့ ပိုပြီးပျော်ရပါတယ်၊” လို့ ဆိုပါတယ်။

ဒေသခံတွေအနေနဲ့ တော်လှန်ရေးကာလအတွင်း စိတ်ပင်ပန်းမှုတွေရှိနေကြတဲ့အပြင် စစ်ကောင်စီတပ်တွေရဲ့ စစ်ကြောင်းထိုးတာတွေကိုလည်း ရင်ဆိုင်နေကြရတာကြောင့် နောက်ပိုင်းတွေမှာလည်း ပျော်ပွဲရွှင်ပွဲလေးတွေ ပြုလုပ်ပေးဖို့ရှိတယ်လို့ သူကဆက်ပြောပါတယ်။

စလင်းမြို့နယ်ထဲက ကျေးရွာတွေမှာ စိုက်ပျိုးရေးအဓိကလုပ်ဆောင်ကြတာဖြစ်ပြီး မိုးမရွာရင် အဝီစီတွင်းတွေက ရေတင်စိုက်ပျိုးကြရတာဖြစ်လို့ မိုးရွာရင်တော့ ရေတင်ရတဲ့စရိတ် သက်သာကြတယ်လို့ သိရပါတယ်။

စာတည်း – လင်း

စလင်း၊ ဩဂုတ် ၄၊ ၂၀၂၅။

မကွေးတိုင်း၊ စလင်းမြို့မှာ စစ်မှုထမ်းအပတ်စဉ် ၁၆ အတွက် သြဂုတ် ၁ ရက်ကစပြီး စစ်ကောင်စီတပ်တွေက ပေါ်တာဆွဲဖမ်းဆီးနေတယ်လို့ ဒေသခံတွေဆီကသိရပါတယ်။

စလင်းမြို့တွင်း လမ်းတွေပေါ်မှာသွားလာနေတဲ့ ဒေသခံအမျိုးသားတွေ၊ ကားဂိတ်တွေမှာ ခရီးသွားအမျိုးသားတွေကို ဖမ်းဆီးနေတာဖြစ်ပြီး ဩဂုတ် ၄ ရက်အတွင်း ဖမ်းဆီးခံရသူ ၂၀ ခန့်ရှိပြီလို့ ဆိုပါတယ်။

“အိမ်ထဲတော့ဆွဲတာမရှိဘူး။ လမ်းပေါ်သွားလာနေသူတွေဆို ဆွဲတယ်။ အများအားဖြစ်တော့ လဆန်း ဒုတိယအပတ်ထိဆွဲတယ်။ ပြီးရင်နားပြီ။ ခုက အပတ်စဉ် ၁၆ အတွက် ဆွဲနေတာ”လို့ ဒေသခံတဦးက ပြောပါတယ်။

စလင်းမြို့နယ်မှာ စစ်မှုထမ်းအတွက် တပတ်စဉ်လျှင် အနည်းဆုံး လူဦးရေ ၃၀ မှ အများဆုံး ၆၀ အထိဖမ်းဆီးပြီး သင်တန်းကျောင်းကိုပို့ဆောင်လေ့ရှိတယ်လို့ ဆိုပါတယ်။

လက်ရှိ အပတ်စဉ် ၁၆ အတွက်လည်း စလင်းမြို့နယ်မှာ လူဦးရေ ၅၀ ဖမ်းဖို့စီစဉ်ထားတယ်လို့ စစ်ကောင်စီတပ်တွေနဲ့နီးစပ်သူတွေဆီကသိရကာ ဖမ်းထားသူတွေကို နယ်မြေခံတပ်တွေဖြစ်တဲ့ ခလရ ၂၅၃၊ ၂၅၄၊ ၂၅၅ တပ်တွေမှာထားရှိကာ ဗထူး စစ်သင်တန်းကျောင်းကို အများဆုံးပို့ဆောင်တယ်လို့ အထက်ပါဒေသခံက ပြောပါတယ်။

ခုလိုပေါ်တာဆွဲဖမ်းဆီးတာတွေများလာတာဟာ စလင်းမြို့နယ်မြောက်ပိုင်းခြမ်းမှာ တိုက်ပွဲပြင်းထန်နေတာကြောင့် တဖက်လှည့်နဲ့ ပြည်သူတွေကို ဖိအားပေးချင်တာဖြစ်နိုင်တယ်လို့ အထက်ပါဒေသခံက ဆက်ပြောပါတယ်။

ခုလိုစစ်မှုထမ်းအတွက်ဖမ်းဆီးတာတွေရှိနေတာကြောင့် အသက်ပြည့်သည်ဖြစ်စေ၊ မပြည့်သည်ဖြစ်စေ စိုးရိမ်ကြောက်လန့်စွာနေထိုင်နေရပြီး အချို့အမျိုးသားတွေကတော့ ရန်ကုန်အပါအဝင် မြို့ကြီးတွေကို ထွက်ခွာသွားတာမျိုးရှိတယ်လို့ သိရပါတယ်။

စာတည်း – မြတ်

စလင်း ၊ ဩဂုတ် ၂ ၊ ၂၀၂၅ ။

မကွေးတိုင်း၊ မင်းဘူးခရိုင်၊ စလင်းမြို့နယ်၊ တညောင်တိုက်နယ်ရဲစခန်းသိမ်းတိုက်ပွဲကနေပြန်လာတဲ့ ပြည်သူ့ကာကွယ်ရေးတပ်ဖွဲ့ – စလင်းတပ်ဖွဲ့ဝင်တွေကို စလင်းမြို့နယ် ရွာ ၆ ရွာက ဒေသခံပြည်သူတွေစုပေါင်းပြီးကြိုဆိုခဲ့ကြတယ်လို့ စလင်းပကဖတာဝန်ခံ M 4 က ပြောပါတယ်။

တညောင်တိုက်နယ်ရဲစခန်းကို ဇူလိုင် ၃၀ ရက်မှာ စလင်းပကဖတပ်ဖွဲ့ဝင်တွေက တိုက်ခိုက်သိမ်းပိုက်နိုင်ခဲ့တာဖြစ်ပြီး အောင်ပွဲရပြီးပြန်လာတဲ့တပ်ဖွဲ့ဝင်တွေကို ရွာ ၆ ရွာက ဒေသခံ ၁,၅၀၀ ခန့်က ကြိုဆိုခဲ့ကြတာလို့ ဆိုပါတယ်။

” လေကြောင်းအန္တရာယ်တွေကြောင့် ပြည်သူတွေကို ကြိုဆိုမှုတွေ လူစုလူဝေးမလုပ်ဘဲနဲ့ ခဏထိန်းထား‌တာ၊ ကျနော်တို့တော်လှန်ရေးတပ်ဖွဲ့ဝင်တွေကို ပြည်သူတွေကနေပြီးတော့ ဝမ်းမြောက်ဝမ်းသာ ဝမ်းပန်းတသာလှိုက်လှိုက်လှဲလှဲနဲ့ ကြိုဆိုကြတာပါ၊ အဓိကတော့ ရဲဘော်တွေအတွက် မုန့်တွေ၊ အားဆေးတွေ၊ အောင်သပြေတွေ၊ ပန်းကုံးတွေနဲ့ ကြိုဆိုကြတာ” လို့ ပြည်သူ့ကာကွယ်ရေးတပ်ဖွဲ့-စလင်း တာဝန်ခံ M 4 က ပြောပါတယ်။

ဇူလိုင် ၃၀ ရက်မှာ တညောင်တိုက်နယ်ရဲစခန်းကို PDF တပ်ဖွဲ့တွေက တိုက်ခိုက်သိမ်းပိုက်နိုင်မှုမှာ စစ်ကောင်စီတပ်ဖွဲ့ဝင် ၈ ဦးသေဆုံးပြီး လက်နက်၊ ခဲယမ်းအများအပြား သိမ်းဆည်းရရှိခဲ့တာပါ။

” စခန်းသိမ်းနိုင်တဲ့အတွက် တော်တော်ဝမ်းသာတယ်၊ ဒီစခန်းသိမ်းနိုင်ဖို့လည်း ကျနော်တို့အချိန်ယူပြီးတော့ သေချာထောက်လှမ်းရတယ်၊ သေချာစစ်ရေးကြိုတင်ရေးဆွဲပြီးမှ လုပ်နိုင်ခဲ့တယ်၊ အဓိကတော့ ပြည်သူတွေကို အနိုင်ကျင့်နှိပ်စက်နေတဲ့ စစ်အုပ်စုရဲ့စခန်းဖြစ်တဲ့အတွက် ပြည်သူတွေအတွက် လုပ်နိုင်ခဲ့လို့ ပိုပြီးတော့ဝမ်းသာရပါတယ်၊ ပြည်သူတွေရဲ့ ကြိုဆိုမှုအပေါ်မှာတော့ လုံးဝကိုအတိုင်းမသိ ဝမ်းသာပီတိဖြစ်ရပါတယ်” လို့ ၎င်းက ဆိုပါတယ်။

စလင်းမြို့နယ် တညောင်တိုက်နယ်ဟာ မကွေးတိုင်းထဲက စစ်ကောင်စီတပ်ရဲ့ ကပစတပ်အများအပြားကို လျှပ်စစ်မီးဖြန့်ဝေနေတဲ့ ဓာတ်အားပေးစက်ရုံရှိတာကြောင့် စစ်ကောင်စီတပ်အင်အားအများအပြားရှိတဲ့နေရာဖြစ်သလို စလင်းတပ်နယ်လက်အောက်တပ်ရင်းတွေနဲ့လည်း နီးကပ်တဲ့နေရာတခုလည်း ဖြစ်ပါတယ်။