ချောင်းဦး၊ မေ ၁၀၊ ၂၀၂၅။

စစ်ကိုင်းတိုင်း၊ ချောင်းဦးမြို့နယ်၊ သုံးပန်လှကျေးရွာမှာ လေကြောင်းကနေနဲ့ဗုံးကြဲခံရလို့ ရှင်ပြုခါနီးသားအဖ ၂ ဦးအပါ အရပ်သား ၃ ဦးသေဆုံးပြီး ၃ ဦးဒဏ်ရာရရှိခဲ့တယ်လို့ ဒေသခံတွေထံက သိရပါတယ်။

မေ ၁၀ ရက် ဒီကနေ့မနက် ၁၁ နာရီကျော်မှာ စစ်ကောင်စီတပ်ရဲ့ စက်တပ်လေထီး ၁ စီးက ကျေးရွာအတွင်းကို ၁၂၀ မမ ဗုံးသီးအပါ ဗုံး ၃ လုံး ကြဲတိုက်ခိုက်ခဲ့ရာ နေအိမ်တွေပေါ်ကျရောက်ပေါက်ကွဲခဲ့တာလို့ ဆိုပါတယ်။

” လူတွေက တစစီ ဖြစ်သွားတာလေ။ အသားစတွေပဲ ကျန်ခဲ့တယ်။ အိမ်ခြေအပျက်အစီးကတော့ ၅လုံးလောက်ပဲရှိပါတယ်။”လို့ ချောင်းဦးဒေသခံအမျိုးသမီးတဦးက မြေလတ်အသံကို ပြောပါတယ်။

ဗုံးကျရောက်ပေါက်ကွဲလို့ ရှင်ပြုပွဲလုပ်မယ့်မိသားစုဝင်တွေဖြစ်တဲ့ အသက် ၃၀ နှစ်အရွယ် ကိုနန်းကို ၊ ၎င်းရဲ့သားဖြစ်သူ အသက် ၁၂ နှစ်အရွယ် မောင်ဖြိုးကိုသန့်တို့ သေဆုံးခဲ့ပြီး ဇနီးဖြစ်သူ အသက် ၂၈နှစ် အရွယ် မသဲသဲစိုးနဲ့ သမီးဖြစ်သူ မသွန်းသီရိကို အသက် ၅ နှစ်တို့မှာ ဒဏ်ရာရရှိခဲ့တယ်လို့ သိရပါတယ်။

” မိခင်နဲ့သမီးလေးက ဆေးရုံမှာတင်ထားရတယ်။ သားလေးကို မနက်ဖြန်မှာ ရှင်ပြုတော့မှာလို့ သိရပါတယ် ။ သူတို့က ပိုက်ဆံမတတ်နိုင်လို့ မဏ္ဍပ်ကို မဆောက်တာပါ။ ဘောက်(Sound Box)လည်း မပါပါဘူး။ သင်္ကန်းကပ်ပြီးပဲ ရှင်ပြုမှာပါ။” လို့ အထက်ပါအမျိုးသမီးက ဆက်ပြောပါတယ်.

ဒါ့အပြင် ဗုံးစထိမှန်တာကြောင့် နောက်ထပ်ရွာခံ အသက် ၃၀ နှစ် ကိုကျော်ဇင်ထွန်း သေဆုံးခဲ့ပြီး ဦးအောင်ကျော်ဦး အသက် ၅၀ နှစ်မှာ ဒဏ်ရာရရှိခဲ့တာကြောင့် သေဆုံးသူ ၃ ဦးနဲ့ ဒဏ်ရာရသူ ၃ ဦး ရှိခဲ့တာပါ။

ဖေဖော်ဝါရီ ၂၅ ရက်မှာလည်း ချောင်းဦးမြို့နယ်၊ ချောင်းမရွာနဲ့ နွယ်ခွေရွာတို့ကို စစ်ကောင်စီတပ်က လေကြောင်းကနေတိုက်ခိုက်ခဲ့တာကြောင့် အမျိုးသား ၃ ဦး၊ အမျိုးသမီး ၇ ဦး သေဆုံးခဲ့ပြီး ၈ ဦး ဒဏ်ရာရရှိခဲ့တယ်လို့ သိရပါတယ်။

စာတည်း – ဟိန်းစံ

တောင်သာ၊ ဧပြီ ၂၁၊ ၂၀၂၅။

မန္တလေးတိုင်း၊ တောင်သာမြို့နယ်၊ သံဘို(ရွာသစ်)ကျေးရွာမှာ စက်တပ်လေထီးနဲ့ဗုံးကြဲခံရပြီး ကလေးငယ် ၁ ဦးအပါအဝင် ၃ ဦးသေဆုံးပြီး ၄ ဦးဒဏ်ရာရတယ်လို့ ဒေသခံတွေနဲ့တောင်သာပကဖဆီက သိရပါတယ်။

ဧပြီ ၂၁ ရက်မနက် ၂ နာရီ ၄၅ မိနစ်ခန့်မှာ မိတ္ထီလာလေတပ်ကနေ တက်လာတဲ့ စက်တပ်လေထီး ၃ စီးဟာ သံဘိုကျေးရွာကို ဒေသခံနေအိမ်တွေအပေါ် ဗုံး ၁၁ လုံးကြဲချခဲ့တယ်လို့ ဆိုပါတယ်။

“ပြည်သူအိမ်ခေါင်ပေါ်ကို တည့်တည့်ချတာ။ အပေါ်ကနေ စက်လက်တွေနဲ့လည်းကုတ်သွားတယ်။ သားအမိ ၂ ယောက်က ပွဲချင်းပြီး။ တအိမ်တည်းက ၅ ယောက်ထိတာ။ “လို့ ဒေသခံအမျိုးသမီးတဦးကပြောပါတယ်။

စက်တပ်လေထီးနဲ့ဗုံးကြဲခံရလို့ အသက် ၉ နှစ်ကျော်အရွယ် မအေးမြတ်စန္ဒာ၊ မိခင်ဖြစ်သူ အသက် ၄၀ အရွယ် မတူး၊ အသက် ၃၅ နှစ်အရွယ် ကိုကျော်သူလင်းတို့သေဆုံးခဲ့ပါတယ်။

ဒါ့အပြင် မသဲသဲဝေ၊ ကိုဝင်းကျော်ရှိန်း၊ မတင့်တင့်ထွန်း၊ မေသက်နှင်းဦးတို့ ၄ ဦးဒဏ်ရာရခဲ့ပြီး ဆေးကုသဖို့ နီးစပ်ရာဆေးရုံကို ပို့ထားရသလို နေအိမ် ၂ လုံးပျက်စီးပြီး နွား ၂ ကောင်သေဆုံးခဲ့တယ်လို့ သိရပါတယ်။

ထိခိုက်သေဆုံးသူတွေကိုတော့ ဒီနေ့မှာပဲ မြေချသင်္ဂြိုဟ်နိုင်ဖို့ စီစဥ်လုပ်ဆောင်နေကြတယ်လို့ ဆိုပါတယ်။

“နေအိမ်ပေါ်တည့်တည့်ကျတာ ဗုံးက။ မနက်အစောကြီးဆိုတော့ တိုက်ပွဲဖြစ်တာလည်းမရှိဘူး။ ရွာမှာ တော်လှန်ရေးအဖွဲ့တွေနေတာမရှိဘူး။ ဖြတ်သွားဖြတ်လာသဘောလောက်ဘဲရှိတာ။ ရွာကိုတမင်သက်သက်ဗုံးချတဲ့သဘောပါ”လို့ တောင်သာမြို့နယ်ပကဖ ပြန်ကြားရေးတာဝန်ခံကပြောပါတယ်။

သံဘိုကျေးရွာက လေကြောင်းကနေ ဗုံးကြဲခံရတာ ၃ ကြိမ်မြောက်ဖြစ်ပြီး အရင် ကြဲခံရချိန်မှာတော့ လူထိခိုက်တာမျိုးတွေမရှိဘဲ တောစပ်နားတွေကျတာကြောင့် နေအိမ်အချို့ဘဲ ပျက်စီးမှုရှိခဲ့တယ်လို့ သိရပါတယ်။

သံဘိုကျေးရွာက အိမ်ခြေ ၆၄ အိမ်ရှိပြီး လူဦးရေ ၂၀၀ ကျော်နေထိုင်ကာ ဗုံးကြဲခံရတာကြောင့် ရွာခံအချို့ကတော့ ယနေ့မနက်ပိုင်းမှာမြို့ပေါ်ပြောင်းရွေ့တာရှိပြီး အများစုကတော့ ရွာက ဗုံးခိုကျင်းတွေမှာ ပုန်းအောင်းနေထိုင်နေကြတယ်လို့ ဆိုပါတယ်။

ဧပြီ ၁၈ ရက်ကလည်း တောင်သာမြို့နယ်၊ နန်းတည်ကျေးရွာပေါ်ကို ဂျက်ဖိုက်တာနဲ့ဗုံးကြဲခံရလို့ ပြည်သူ ၂ ဦးသေဆုံးပြီး ၅ ဦးဒဏ်ရာရကာ နေအိမ် ၇ လုံးပျက်စီးခဲ့တယ်လို့ သိရပါတယ်။

ပေါက်၊ ဧပြီ ၁၄၊ ၂၀၂၅။

မကွေးတိုင်း၊ ပေါက်မြို့နယ်၊ သနပ္ပင်ဇင်းကျေးရွာကို စစ်ကောင်စီတပ်က စက်တပ်လေထီးနဲ့ ဗုံးသီးချတိုက်ခိုက်ခဲ့တာကြောင့် ဒေသခံ ၂ ဦးထိခိုက်ဒဏ်ရာရခဲ့တယ်လို့ ဒေသခံတွေဆီက သိရပါတယ်။

ဧပြီ ၁၄ ရက် မနေ့ကမနက်ပိုင်းမှာ ဆိပ်ဖြူ ကပစ ၂၄ ဘက်ကတက်လာတဲ့ စက်တပ်လေထီး ၂ စီးပေါ်ကနေ စက်လတ်သေနတ်နဲ့ပစ်ခတ်ပြီးနောက် ဗုံးသီး ၂ လုံးကြဲချခဲ့တာလို့ ဆိုပါတယ်။

“ကုက္ကိုစုပျူရွာနဲ့ နီးလို့ လာချတာထင်တယ်ဗျ။ သူတို့ ပျူရွာက အနီးပတ်ဝန်းကျင်ရွာတွေကို တိုက်ခိုက်ပေးဖို့ အထက်ကိုပေါက်ကိုယ်တော်က တောင်းဆိုထားတာလို့ကြားတာပဲ”လို့ အညာမြေအရပ်ဖက်အဖွဲ့အစည်း – မြိုင်မှ တာဝန်ရှိသူတဦးက ပြောပါတယ်။

ဒီတိုက်ခိုက်မှုကြောင့် သနပ္ပင်ဇင်းရွာက အသက် ၄၀ အရွယ်အမျိုးသား ၁ ဦး ပေါင်ထိမှန်ပြီး အသက် ၃၀ အရွယ်အမျိုးသမီး နဖူးထိမှန်ဒဏ်ရာရရှိခဲ့တာပါ။

ဒါ့အပြင် သနပ္ပင်ဇင်းရွာနဲ့ အနီးတဝိုက်ကိုလည်း ကပစ ၂၄ ကနေ လက်နက်ကြီးတွေနဲ့ မကြာခဏပစ်ခတ်လေ့ရှိတယ်လို့လည်း ဆိုပါတယ်။

ဧပြီလဒုတိယပတ်အတွင်းမှာ မကွေးနဲ့စစ်ကိုင်းတိုင်းအတွင်း လေကြောင်းတိုက်ခိုက်မှုတွေ ခပ်စိပ်စိပ်လုပ်လာတဲ့အတွက် ဒေသခံထိခိုက်သေဆုံးမှုတွေရှိနေတာပါ။

ဧပြီ ၁၂ ရက်ဒီနေ့မနက် ၁၀ နာရီလောက်မှာ မိတ္ထီလာလေတပ်ဘက်ကလာတဲ့ ဂျက်ဖိုက်တာနဲ့ ရေစကြိုမြို့နယ်၊ ရေလယ်ကျွန်းဒေသရှိ သာဂေါင်ကျေးရွာကို ဗုံး ၂ လုံးကြဲချတိုက်ခိုက်ခဲ့တာကြောင့် ထိခိုက်ပျက်စီးမှုတွေရှိခဲ့တယ်လို့ ရေစကြိုမြို့နယ်ပြည်သူ့ကာကွယ်ရေးအဖွဲ့ဆီက သိရပါတယ်။

ပုံစာ – ပြီးခဲ့တဲ့ ဖေဖော်ဝါရီလအတွင်း သနပ္ပင်ဇင်းရွာ စစ်ကောင်စီတပ်ဖွဲ့မှမီးရှို့ခဲ့စဥ်။

သတင်း – ဟယ်သာ၊ စာတည်း – လင်း

ပခုက္ကူ၊ ဖေဖော်ဝါရီ ၂၆၊ ၂၀၂၅။

ဖေဖော်ဝါရီတတိယအပတ်အတွင်း ပခုက္ကူမြို့နယ်ထဲက ကျေးရွာ ၂၂ ရွာကို Paramotor – စက်တပ်လေထီး အသိပညာပေး လက်ကမ်းစာစောင်တွေဖြန့်ဝေပေးခဲ့တယ်လို့ ပခုက္ကူခရိုင်၊ ပြည်သူ့ကာကွယ်ရေးတပ်ဖွဲ့ဆီက သိရပါတယ်။

ဖေဖော်ဝါရီ ၂၄၊ ၂၅၊ ၂၆ နေ့တွေမှာ ကျေးရွာပေါင်း ၂၂ရွာကို ကွင်းဆင်းပြီး Paramotor – စက်တပ်လေထီး အသိပညာပေး လက်ကမ်းစာစောင်တွေဖြန့်ဝေခဲ့သလို သေချာဖတ်ရှုလေ့လာကြဖို့တိုက်တွန်းခဲ့တယ်လို့ ပခုက္ကူခရိုင်၊ ပြည်သူ့ကာကွယ်ရေးတပ်ဖွဲ့ဝင်တဦးက ဆိုပါတယ်။

“အာဏာသိမ်းစစ်တပ်ဟာ တနေ့ထက်တနေ့ နယ်မြေတွေ ဆုံးရှုံးတာ၊ စစ်ရှုံးလာရတာနဲ့အမျှ လေယာဉ်၊ လေထီး၊ လက်နက်ကြီးတွေကို ပိုမိုအသုံးပြုလာနေတာကြောင့် ပြည်သူတွေအနေနဲ့ စစ်ရေးသတိ၊ စစ်ရေးအသိရှိကြဖို့လည်း အသိပေးနှိုးဆော်ထားပါတယ်” လို့ သူကပြောပါတယ်။

စက်တပ်လေထီးနဲ့ပတ်သက်တဲ့ အသိပညာပေးလက်ကမ်းစာစောင်တွေကို ပခုက္ကူခရိုင်၊ ပြည်သူ့ကာကွယ်ရေးအဖွဲ့ကဦးဆောင်ကာ ကျေးရွာပေါင်း ၂၂ ရွာမှာရှိတဲ့ စာသင်ကျောင်း၊ ဈေးဆိုင်နဲ့ လူစည်ကားရာနေရာတွေမှာ ဖြန့်ဝေပေးခဲ့ကြပြီး စက်တပ်လေထီးတွေအကြောင်းနဲ့ အန္တရာယ်ပေးနိုင်တဲ့အခြေအနေတွေကို ရှင်းပြပြောဆိုတာ၊ ပညာပေးစာစောင်ပါအချက်အလက်တွေကို သေချာဖတ်ရှုလေ့လာဖို့တိုက်တွန်းတာတွေ လုပ်ဆောင်ခဲ့တယ်လို့ သိရပါတယ်။

လက်ရှိမှာတော့ ပခုက္ကူ၊ ပေါက်၊ ဆိပ်ဖြူ စတဲ့မြို့တွေမှာ စက်တပ်လေထီးတွေနဲ့ တိုက်ခိုက်ခံရပြီး ထိခိုက်သေဆုံးမှုတွေရှိနေပြီဖြစ်ပါတယ်။

စေတုတ္တရာ၊ ဖေဖော်ဝါရီ ၂၄၊ ၂၀၂၅။

မကွေးတိုင်း၊ စေတုတ္တရာမြို့နယ်၊ မုံညှင်းကျေးရွာအုပ်စု၊ မုံညှင်းကျေးရွာအနီးကို စက်တပ်လေထီး (Paramotar) နဲ့ဗုံးကြဲတိုက်ခိုက်ခဲ့တာကြောင့် ကလေး ၂ ဦးအပါအဝင် ၇ ဦးသေဆုံးခဲ့တယ်လို့ ဒေသခံတဦးကပြောပါတယ်။

ဖေဖော်ဝါရီ ၂၃ ရက်မနက် ၃ နာရီဝန်းကျင်မှာ မုံညှင်းကျေးရွာတောင်ဘက် ၂ မိုင်ခန့်အကွာက တဲတိုက်ထဲကို စစ်ကောင်စီတပ်ဖွဲ့ဝင်တွေက ဗုံးကြဲချခဲ့တာကြောင့် အဲ့ဒီနေရာမှာနေထိုင်နေတဲ့ ဒေသခံတွေကို ထိမှန်သေဆုံးခဲ့ကြတာလို့ဆိုပါတယ်။

“သေတာကတော့ အမျိုးသမီး ၄ ဦး အမျိုးသား ၃ ဦးပါ။ လက်ပြတ်တာက ၂ ဦးပါ၊ ဒဏ်ရာရသူက ၁၃ ဦးလောက်ရှိပါတယ်။ တဲတိုက်တွေအားလုံးလည်း မီးလောင်သွားပါတယ်။”လို့ ဒေသခံတဦးက ပြောပါတယ်။

‌သေဆုံးသူတွေဟာ အသက် ၄၀ အရွယ် ကိုဟန်ဌေး၊ မဌေးဌေး၊ မစန်းညွန့်၊ အသက် ၃၀ အရွယ် မလွမ်းမူ၊ အသက် ၂၀ ကျော် မယမုံဦး၊ ၃ နှစ် နဲ့ ၁၀ နှစ်အရွယ်ယောက်ျားလေး ၂ ဦး သေဆုံးခဲ့တယ်လို့ သူက ဆက်ပြောပါတယ်။

အလောင်းတွေကိုတော့ ဖေဖော်ဝါရီ ၂၄ ရက်ဒီမနက်မှာသင်္ဂြိုဟ်ပြီး ဒဏ်ရာရသူတွေကိုတော့ ဆေးကုသပေးနေတယ်လို့ ဆိုပါတယ်။

အဆိုပါတဲတိုက်မှာ စုစုပေါင်းတဲ ၁၈ လုံးရှိပြီး မုံညှင်းကျေးရွာဒေသခံတချို့က အဲ့ဒီတဲတိုက်တွေမှာ လာရောက်နေထိုင်ရင်း စိုက်ပျိုးရေးလုပ်ကိုင်နေကြတာဖြစ်တယ်လို့ ဆိုပါတယ်။

ဗုံးကြဲချတိုက်ခိုက်ပြီးနောက်မှာလည်း အိမ်ခြေ ၁၈၀ ရှိတဲ့မုံညှင်းရွာကဒေသခံ ၆၀၀ ဝန်းကျင်လည်း ရွာကနေ ထွက်ပြေးတိမ်းရှောင်နေကြတယ်လို့ အထက်ပါဒေသခံကပြောပါတယ်။

စာတည်း – လင်း